ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠮᠣᠩᠭᠤᠯ ᠬᠡᠯᠡ ᠪᠢᠴᠢᠭ ᠤᠨ ᠶᠡᠭᠡ ᠪᠠᠭᠰᠢ᠂ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠤ ᠣᠷᠴᠢᠨ ᠦᠶ᠎ᠡ ᠶᠢᠨ ᠠᠯᠳᠠᠷᠲᠦ ᠤᠳᠬ᠎ᠠ  ᠵᠣᠬᠢᠶᠠᠯᠴᠢ ᠡᠷᠳᠡᠨᠢᠲᠣᠬᠲᠠᠬᠤ ( ᠭᠤᠷᠪᠠ )
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/5/29
      ᠭᠤᠷᠪᠠ᠂ ᠬᠡᠰᠢᠭᠲᠡᠨ ᠨᠤᠲᠤᠭ ᠤᠨ ᠬᠥᠷᠦᠰᠦᠨ ᠳᠤ ᠪᠠᠲᠦ ᠦᠨᠳᠦᠰᠦᠯᠡᠭᠰᠡᠨ                ᠨᠣᠭᠤᠭᠠᠨ  ᠨᠠᠷᠠᠰᠦ  ——  ᠡᠷᠳᠡᠨᠢᠲᠣᠬᠲᠠᠬᠤ       ᠡᠷᠳᠡᠨᠢᠲᠣᠬᠲᠠᠬᠤ ᠪᠠᠭᠰᠢ ᠪᠣᠯ ᠬᠡᠰᠢᠭᠲᠡᠨ ᠨᠤᠲᠤᠭ ᠤᠨ ᠰᠢᠳᠢᠲᠦ ᠬᠥᠷᠦᠰᠦᠨ ᠳᠤ ᠪᠠᠲᠦ ᠦᠨᠳᠦᠰᠦᠯᠡᠭᠰᠡᠨ ᠨᠣᠭᠤᠭᠠᠨ ᠨᠠᠷᠠᠰᠦ ᠮᠥᠨ᠃ ᠲᠡᠷᠡᠪᠡᠷ ᠨᠢᠭᠡᠨ ᠨᠠᠰᠤᠨ ᠳᠠᠭᠠᠨ ᠮᠣᠩᠭᠤᠯ ᠬᠡᠯᠡ ᠪᠢᠴᠢᠭ᠂ ᠤᠳᠬ᠎ᠠ ᠵᠣᠬᠢᠶᠠᠯ ᠤᠨ ᠲᠠᠯ᠎ᠠ ᠪᠠᠷ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠵᠣᠬᠢᠶᠠᠯ ᠪᠥᠲᠦᠭᠡᠯ ᠲᠤᠭᠤᠷᠪᠢᠵᠦ ᠶᠠᠪᠤᠬᠰᠠᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ᠂ ᠪᠠᠰᠠ ᠨᠡᠯᠢᠶᠡᠳ ᠣᠯᠠᠨ ᠰᠢᠯᠦᠭ᠂ ᠵᠣᠬᠢᠶᠠᠯ ᠪᠢᠴᠢᠵᠦ ᠨᠡᠶᠢᠲᠡᠯᠡᠭᠦᠯᠵᠦ ᠪᠠᠶᠢᠵᠠᠢ᠃ ᠲᠡᠳᠡᠭᠡᠷ ᠤᠨ ᠲᠣᠳᠣᠷ᠎ᠠ ︽ᠬᠡᠰᠢᠭᠲᠡᠨ ᠤ ᠲᠤᠬᠠᠢ ᠬᠡᠯᠬᠢᠶ᠎ᠡ ᠰᠢᠯᠦᠭ︾᠂ ︽ᠲᠥᠷᠦᠭᠰᠡᠨ ᠨᠤᠲᠤᠭ ᠥᠰᠦᠭᠰᠡᠨ ᠥᠯᠦᠭᠡᠢ︾᠂ ︽ᠪᠠᠶᠠᠯᠢᠭ ᠰᠠᠶᠢᠬᠠᠨ ᠬᠡᠰᠢᠭᠲᠡᠨ︾᠂ ︽ᠬᠡᠰᠢᠭᠲᠡᠨ ᠤ ᠬᠡᠳᠦᠨ ᠭᠠᠵᠠᠷ ᠤᠨ ᠲᠤᠬᠠᠢ︾ ᠭᠡᠬᠦ ᠮᠡᠲᠦ ᠶᠢᠨ ᠲᠥᠷᠦᠭᠰᠡᠨ ᠨᠤᠲᠤᠭ ᠬᠡᠰᠢᠭᠲᠡᠨ ᠤ ᠪᠠᠨ ᠲᠤᠬᠠᠢ ᠪᠢᠴᠢᠭᠰᠡᠨ ᠮᠠᠰᠢ ᠭᠦᠨ ᠬᠠᠶᠢᠷ᠎ᠠ ᠰᠡᠳᠭᠢᠯᠭᠡ ᠪᠥᠬᠦᠢ ᠰᠢᠯᠦᠭ᠂ ᠵᠣᠬᠢᠶᠠᠯ ᠤᠳ ᠵᠣᠬᠢᠬᠤ ᠬᠤᠪᠢ ᠶᠢ ᠡᠵᠡᠯᠡᠵᠦ ᠪᠠᠶᠢᠳᠠᠭ᠃       ︽ᠲᠥᠷᠦᠭᠰᠡᠨ ᠨᠤᠲᠤᠭ ᠥᠰᠦᠭᠰᠡᠨ ᠥᠯᠦᠭᠡᠢ︾ ᠭᠡᠳᠡᠭ ᠰᠢᠯᠦᠭ ᠲᠡᠭᠡᠨ ︽ᠬᠡᠰᠢᠭᠲᠡᠨ ᠨᠡᠷᠡᠲᠦ ᠬᠤᠰᠢᠭᠤᠨ ᠳᠠᠬᠢ ᠬᠢᠩᠭᠠᠨ ᠠᠭᠤᠯᠠ ᠶᠢᠨ ᠰᠠᠯᠪᠤᠷᠢ \ ᠬᠤᠩᠭᠤᠨ ᠳᠠᠪᠠᠭᠠᠨ ᠥᠪᠦᠷ ᠤᠨ ᠭᠠᠭ᠋ᠠᠶᠢᠲᠦ ᠭᠡᠳᠡᠭ ᠭᠠᠵᠠᠷ ᠤᠨ \ ᠬᠤᠣᠰ ᠠᠭᠤᠯᠠ ᠶᠢᠨ ᠬᠠᠪᠴᠢᠯ ᠳᠤ ᠬᠤᠶᠠᠷ ᠭᠤᠣᠯ ᠤᠨ ᠬᠤᠭᠤᠷᠤᠨᠳᠦ \ ᠬᠡᠷᠦᠮᠡᠯ ᠮᠠᠩᠬᠠᠨ ᠤ ᠡᠩᠭᠡᠷ ᠲᠤ ᠬᠡᠳᠦᠨ ᠡᠷᠤᠬᠡ ᠨᠤᠲᠤᠬᠯᠠᠵᠠᠢ᠃ \ ᠨᠢᠭᠡ ᠥᠷᠦᠭᠡ ᠪᠠᠶᠢᠰᠢᠩ ᠲᠠᠢ ᠨᠢᠭᠡ ᠬᠤᠶᠠᠷ ᠮᠠᠯ ᠲᠠᠢ \ ᠳᠡᠭᠡᠷ᠎ᠡ ᠎ ᠪᠠᠨ ᠵᠠᠩᠭᠢ ᠲᠠᠢ ᠳᠡᠷᠭᠡᠳᠡ ᠪᠠᠨ ᠲᠣᠨᠤᠭ᠎ᠠ ᠲᠠᠢ \ ᠳᠡᠮᠴᠤᠭ ᠲᠠᠶᠢᠵᠢ ᠶᠢᠨ ᠠᠯᠪᠠᠲᠦ ᠲᠡᠪᠡᠳᠡᠵᠦ ᠶᠠᠪᠤᠬᠰᠠᠨ ᠮᠠᠯᠴᠢᠨ \ ᠲᠥᠮᠡᠨᠰᠠᠩ ᠤᠨ ᠭᠡᠷ ᠲᠤ ᠲᠥᠷᠦᠵᠦ ᠪᠢᠯᠡ ᠪᠢ᠃ \ ᠵᠢᠷᠤᠬᠡ ᠠᠳᠠᠯᠢ ᠠᠭᠤᠯᠠ ᠨᠢ ᠵᠡᠭᠦᠨ ᠰᠤᠭᠤᠨ ᠎ ᠳᠠᠭᠠᠨ ᠪᠣᠶᠢᠨᠢᠭ ᠲᠠᠢ \ ᠬᠤᠶᠢᠭᠤᠷ ᠤᠷᠢᠳᠤᠭᠤᠷ ᠢᠶᠠᠨ ᠭᠤᠣᠯ ᠲᠠᠢ ᠬᠤᠰᠤ ᠨᠠᠷᠠᠰᠤᠨ ᠣᠢ ᠲᠠᠢ \ ᠭᠦᠩᠭᠢᠷ ᠰᠢᠨᠰᠢᠷ ᠤᠨ ᠲᠠᠯ᠎ᠠ ᠲᠠᠢ ᠭᠦᠨ ᠨᠠᠭᠤᠷ ᠭᠡᠳᠡᠭ ᠲᠠᠩᠬᠢᠰ ᠲᠠᠢ \ ᠪᠠᠶᠠᠨᠵᠢᠷᠦᠬᠡ ᠶᠢᠨ ᠣᠪᠤᠭ᠎ᠠ ᠭᠡᠳᠡᠭ ᠨᠢ ᠮᠢᠨᠤ ᠥᠰᠦᠭᠰᠡᠨ ᠥᠯᠦᠭᠡᠢ︾ ᠭᠡᠵᠦ᠃ ︽ᠪᠠᠶᠠᠨᠵᠢᠷᠦᠬᠡ ᠶᠢᠨ ᠣᠪᠤᠭ᠎ᠠ︾ ᠭᠡᠳᠡᠭ ᠰᠢᠯᠦᠭ ᠲᠡᠭᠡᠨ ︽ᠪᠠᠶᠠᠯᠢᠭ ᠬᠡᠰᠢᠭᠲᠡᠨ ᠤ ᠥᠷᠦᠴᠡᠨ ᠳᠠᠬᠢ \ ᠪᠠᠷᠠᠭᠤᠨ ᠠᠷᠦ ᠶᠢᠨ ᠲᠠᠯ᠎ᠠ ᠶᠢᠨ ᠲᠦᠷᠦᠭᠦᠨ ᠳᠤ \ ᠰᠦᠷᠯᠢᠭ ᠰᠠᠶᠢᠬᠠᠨ ᠪᠠᠶᠠᠨᠵᠢᠷᠦᠬᠡ \ ᠰᠦᠯᠳᠡ ᠪᠣᠯᠣᠨ ᠰᠦᠨᠳᠡᠷᠯᠡᠵᠦ ᠪᠠᠶᠢᠳᠠᠭ᠃ \ ᠁ ᠪᠠᠶᠢᠭᠠᠯᠢ ᠶᠢᠨ ᠭᠤᠶᠤ ᠴᠡᠴᠡᠷᠯᠢᠭ \ ᠪᠠᠶᠠᠨᠵᠢᠷᠦᠬᠡ ᠶᠢᠨ ᠣᠪᠤᠭ᠎ᠠ ᠭᠡᠳᠡᠭ ᠨᠢ \ ᠪᠠᠭ᠎ᠠ ᠶᠢᠨ ᠮᠢᠨᠢ ᠦᠰᠦᠭᠰᠡᠨ ᠥᠯᠦᠭᠡᠢ︾ ᠭᠡᠵᠦ᠂ ᠥᠪᠡᠷ ᠤᠨ ᠲᠥᠷᠦᠭᠰᠡᠨ ᠨᠤᠲᠤᠭ ᠥᠰᠦᠭᠰᠡᠨ ᠥᠯᠦᠭᠡᠢ ᠪᠠᠨ ᠬᠤᠯᠪᠤᠨ ᠰᠢᠯᠦᠭᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠪᠠᠰᠠ ︽ᠪᠢᠷᠠᠭᠤ ᠬᠤᠲᠠ︾ ᠭᠡᠳᠡᠭ ᠰᠢᠯᠦᠭ ᠲᠡᠭᠡᠨ ︽ᠡᠮᠤᠨ᠎ᠡ ᠳᠠᠪᠠᠭᠠᠨ ᠤ ᠥᠪᠦᠷ ᠲᠤᠨᠢ \ ᠥᠭᠡᠳᠡᠩ ᠤᠨ ᠠᠶᠢᠯ ᠤᠨ ᠨᠤᠲᠤᠭ ᠲᠠᠢ \ ᠡᠪᠦᠭᠡᠨ ᠸᠠᠸᠠ ᠶᠢᠨ ᠭᠡᠷ ᠨᠢ \ ᠥᠨᠢᠷ ᠪᠠᠶᠠᠨ ᠡᠷᠦᠬᠡ ᠪᠠᠶᠢᠵᠦ \ ᠡᠭᠦᠨ ᠤ ᠥᠬᠢᠨ ᠴᠢᠮᠡᠭ ᠨᠢ \ ᠡᠷᠳᠡᠨᠢᠲᠣᠬᠲᠠᠬᠤ ᠮᠢᠨᠦ ᠭᠡᠷᠭᠡᠢ ᠪᠢᠯᠡ︾ ᠭᠡᠵᠦ ᠭᠡᠷᠭᠡᠢ ᠴᠢᠮᠡᠭ ᠤᠨ ᠢᠶᠠᠨ ᠭᠡᠷ ᠨᠤᠲᠤᠭ ᠢ ᠴᠦ ᠬᠤᠯᠪᠤᠨ ᠰᠢᠯᠦᠭᠯᠡᠭᠰᠡᠨ ᠪᠠᠶᠢᠯ᠎ᠠ᠃       ᠢᠯᠠᠩᠭᠤᠶ᠎ᠠ 1980 ᠣᠨ ᠳᠤ ᠭᠤᠴᠢᠨ ᠨᠠᠢᠮᠠᠨ ᠵᠢᠯ ᠬᠠᠷᠢᠭ᠎ᠠ ᠦᠭᠡᠢ ᠲᠥᠷᠦᠭᠰᠡᠨ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠭᠠᠳ ᠤᠤᠭᠤᠬᠰᠠᠨ ᠤᠰᠤ ᠦᠨᠠᠬᠰᠠᠨ ᠰᠢᠷᠤᠢ ᠳᠡᠭᠡᠷ᠎ᠡ ᠪᠠᠨ ᠰᠡᠳᠭᠢᠯ ᠳᠦᠭᠦᠷᠡᠩ ᠢᠶᠠᠷ ᠨᠡᠯᠢᠶᠡᠳ ᠡᠳᠦᠷ ᠪᠠᠶᠢᠴᠠᠭᠠᠯᠲᠠ ᠰᠣᠷᠪᠤᠯᠵᠢᠯᠭ᠎ᠠ ᠬᠢᠭᠰᠡᠨ ᠤ ᠳᠠᠷᠠᠭ᠎ᠠ ︽ᠪᠠᠶᠠᠯᠢᠭ ᠰᠠᠶᠢᠬᠠᠨ ᠬᠡᠰᠢᠭᠲᠡᠨ︾ ᠭᠡᠳᠡᠭ ᠤᠷᠲᠤ ᠵᠣᠬᠢᠶᠠᠯ ᠪᠢᠴᠢᠵᠦ ᠲᠤᠰ ᠵᠢᠯ ᠤᠨ 12 ᠰᠠᠷ᠎ᠠ ᠶᠢᠨ ︽ᠥᠪᠦᠷ ᠮᠣᠩᠭᠤᠯ ᠤᠨ ᠡᠳᠦᠷ ᠤᠨ ᠰᠣᠨᠢᠨ︾᠎ ᠤ ᠮᠣᠩᠭᠤᠯ ᠬᠡᠪᠯᠡᠯ ᠳᠤ ᠦᠷᠭᠦᠯᠵᠢᠯᠡᠭᠦᠯᠦᠨ ᠨᠡᠶᠢᠲᠡᠯᠡᠵᠡᠢ᠃ ᠲᠡᠷᠡ ᠵᠣᠬᠢᠶᠠᠯ ᠳᠠᠭᠠᠨ ︽ᠬᠡᠰᠢᠭᠲᠡᠨ ᠤ ᠡᠷᠲᠡᠨ ᠡᠳᠦᠭᠡ︾᠂ ︽ᠬᠤᠰᠢᠭᠤᠨ ᠤ ᠲᠥᠪ ᠪᠢᠷᠠᠭᠤ ᠪᠠᠯᠭᠠᠰᠦ︾᠂ ︽ᠬᠡᠰᠢᠭᠲᠡᠨ ᠤ ᠬᠠᠯᠠᠭᠤᠨ ᠷᠠᠰᠢᠶᠠᠨ︾᠂ ︽ᠪᠠᠶᠢᠭᠠᠯᠢ ᠶᠢᠨ ᠴᠡᠴᠡᠷᠯᠢᠭ ᠪᠠᠶᠠᠨᠵᠢᠷᠦᠬᠡ ᠶᠢᠨ ᠣᠪᠤᠭ᠎ᠠ︾᠂ ︽ᠳᠠᠯᠠᠢ ᠨᠠᠭᠤᠷ︾᠂ ︽ᠳᠠᠷᠬᠠᠨ ᠠᠭᠤᠯᠠ︾᠂ ︽ᠪᠠᠷᠰ ᠬᠤᠲᠠ ᠶᠢᠨ ᠬᠠᠭᠤᠴᠢᠳ︾ ᠵᠡᠷᠭᠡ ᠰᠡᠳᠦᠪ ᠢᠶᠠᠷ ᠨᠤᠲᠤᠭ ᠤᠰᠤᠨ ᠤ ᠪᠠᠨ ᠲᠡᠤᠬᠡ ᠰᠣᠶᠣᠯ᠂ ᠪᠠᠶᠢᠭᠠᠯᠢ ᠣᠷᠴᠢᠨ ᠢᠶᠠᠨ ᠪᠢᠴᠢᠭᠰᠡᠨ ᠪᠠᠶᠢᠯ᠎ᠠ᠃       ︽ᠡᠨᠡ ᠵᠢᠯ ᠤᠨ ᠳᠣᠯᠤᠭᠠᠨ ᠰᠠᠷ᠎ᠠ ᠶᠢᠨ ᠰᠡᠭᠦᠯᠴᠢ ᠪᠠᠷ ᠮᠣᠩᠭᠤᠯ ᠬᠡᠯᠡ ᠪᠢᠴᠢᠭ ᠤᠨ ᠠᠵᠢᠯ ᠢ ᠪᠠᠶᠢᠴᠠᠭᠠᠬᠤ ᠪᠠᠷ ᠴᠢᠮᠡᠭ᠂ ᠣᠷᠴᠢᠯᠠᠩ ᠪᠢᠳᠡ ᠭᠤᠷᠪᠠᠭᠤᠯᠠ ᠬᠥᠬᠡᠬᠤᠲᠠ ᠠᠴᠠ ᠨᠢᠰᠭᠡᠯ ᠢᠶᠠᠷ ᠰᠢᠯᠢ ᠶᠢᠨ ᠬᠤᠲᠠ ᠎ ᠳᠤ ᠬᠦᠷᠴᠦ᠂ ᠲᠡᠨᠳᠡᠴᠡ ᠪᠠᠭ᠎ᠠ ᠮᠠᠰᠢᠨ ᠢᠶᠠᠷ ᠬᠡᠰᠢᠭᠲᠡᠨ ᠢ ᠴᠢᠭᠯᠡᠨ ᠶᠠᠪᠤᠬᠤ ᠳᠠᠭᠠᠨ ᠭᠤᠴᠢᠨ ᠨᠠᠢᠮᠠᠨ ᠵᠢᠯ ᠬᠠᠷᠢᠭ᠎ᠠ ᠦᠭᠡᠢ ᠲᠥᠷᠦᠭᠰᠡᠨ ᠨᠤᠲᠤᠭ ᠤᠨ ᠢᠶᠠᠨ ᠬᠥᠭᠵᠢᠯ ᠬᠤᠪᠢᠷᠠᠯᠲᠠ ᠶᠢ ᠦᠵᠡᠨ᠎ᠡ ᠳ᠋ᠠ ᠭᠡᠵᠦ ᠲᠣᠲᠣᠷ᠎ᠠ ᠪᠠᠨ ᠪᠠᠶᠠᠷᠯᠠᠵᠦ ᠪᠠᠶᠢᠲᠠᠯ᠎ᠠ ᠬᠡᠰᠢᠭᠲᠡᠨ ᠤ ᠬᠢᠵᠠᠭᠠᠷ ᠲᠤ ᠬᠦᠷᠦᠯ᠎ᠡ᠃ ︿ᠤᠨᠠᠬᠰᠠᠨ ᠰᠢᠷᠤᠢ ᠠᠯᠲᠠ᠂ ᠤᠤᠭᠤᠬᠰᠠᠨ ᠤᠰᠤ ᠷᠠᠰᠢᠶᠠᠨ﹀ ᠭᠡᠳᠡᠭᠴᠢᠯᠡᠨ ᠨᠤᠲᠤᠭ ᠤᠨ ᠮᠢᠨᠢ ᠠᠭᠤᠯᠠ ᠤᠰᠤ ᠠᠴᠠ ᠠᠪᠤᠭᠠᠳ ᠤᠴᠠᠷᠠᠬᠰᠠᠨ ᠬᠥᠮᠦᠰ ᠨᠢ ᠬᠦᠷᠲᠡᠯ᠎ᠡ ᠢᠵᠢᠯᠢ ᠲᠠᠨᠢᠯ ᠰᠢᠭ᠋ ᠰᠠᠨᠠᠬᠳᠠᠵᠦ᠂ ᠵᠠᠮ ᠤᠨ ᠬᠤᠶᠠᠷ ᠬᠠᠵᠠᠭᠤ ᠳᠠᠬᠢ ᠮᠠᠩᠨᠤᠭ ᠰᠢᠭ᠋ ᠨᠣᠭᠤᠭᠠᠨ ᠲᠠᠯ᠎ᠠ ᠶᠢᠨ ᠳᠤᠮᠳᠠ ᠴᠠᠭᠠᠨ᠂ ᠰᠢᠷ᠎ᠠ᠂ ᠬᠦᠷᠡᠩ᠂ ᠤᠯᠠᠭᠠᠨ ᠥᠩᠭᠡ ᠶᠢᠨ ᠴᠡᠴᠡᠭ ᠠᠯᠠᠬᠰᠢᠨ ᠤᠷᠢᠬᠠᠨ ᠰᠠᠯᠬᠢᠨ ᠳᠤ ᠨᠠᠶᠢᠭᠤᠵᠦ ᠪᠠᠶᠢᠬᠤ ᠨᠢ ᠶᠠᠭ ᠮᠠᠨ ᠢ ᠳᠠᠯᠠᠯᠤᠨ ᠤᠬᠲᠤᠵᠦ ᠪᠠᠶᠢᠭ᠎ᠠ ᠰᠢᠭ᠋᠃ ᠁ ᠦᠳᠡ ᠶᠢᠨ ᠠᠯᠳᠠ ᠳᠤ ᠬᠠᠷ᠎ᠠ ᠬᠤᠰᠢᠭᠤ ᠶᠢᠨ ᠡᠩᠭᠡᠷ ᠲᠤ ᠪᠠᠶᠢᠭᠤᠯᠤᠬᠰᠠᠨ ᠳᠠᠯᠠᠢ ᠨᠠᠭᠤᠷ ᠨᠢᠬᠡᠲᠦᠯ ᠤᠨ ᠲᠥᠪ ᠲᠤ ᠬᠦᠷᠴᠦ ᠦᠳᠡᠯᠡᠯ᠎ᠡ᠃ ᠪᠢ ᠪᠠᠭ᠎ᠠ ᠳᠠᠭᠠᠨ ᠦᠬᠡᠷ ᠲᠡᠷᠭᠡᠨ ᠳᠤ ᠰᠠᠭᠤᠵᠦ ᠡᠭᠦᠪᠡᠷ ᠶᠠᠪᠤᠵᠦ ᠪᠠᠶᠢᠬᠤ ᠳᠤ ︿ᠲᠡᠮᠡᠭᠡᠨ ᠬᠦᠵᠦᠭᠦᠦ ᠬᠠᠳᠠ﹀᠎ ᠠᠴᠠ ︿ᠳᠡᠷᠡᠰᠦᠲᠦ ᠪᠣᠯᠤᠩ﹀ ᠬᠦᠷᠲᠡᠯ᠎ᠡ ᠡᠭᠡᠷᠡᠮ᠎ᠡ ᠲᠠᠯ᠎ᠠ ᠪᠠᠶᠢᠬᠰᠠᠨ ᠪᠢᠯᠡ᠃ ᠣᠳᠣ ᠬᠠᠷᠢᠨ ᠁ ᠪᠠᠭ᠎ᠠ ᠪᠠᠯᠭᠠᠰᠦ ᠪᠣᠯᠣᠨ ᠬᠦᠭᠵᠢᠵᠦ ᠪᠠᠶᠢᠨ᠎ᠠ᠃ ᠠᠳᠡ ᠠᠴᠠ ᠮᠣᠷᠳᠠᠵᠦ ᠦᠵᠦᠭᠦᠷ ᠡᠯᠡᠰᠦ ᠪᠠᠷ ᠳᠠᠭᠠᠷᠢᠨ ᠪᠢᠷᠠᠭᠤ ᠬᠤᠲᠠ ᠤᠷᠤᠭᠤ ᠳᠠᠪᠬᠢᠭᠤᠯᠤᠯ᠎ᠠ᠃ ᠪᠢ ᠠᠷᠪᠠᠭᠠᠳ ᠨᠠᠰᠤᠲᠠᠢ ᠳᠠᠭᠠᠨ ᠳᠠᠪᠤᠰᠤᠨ ᠠᠶᠠᠨ ᠲᠡᠷᠭᠡ ᠶᠢ ᠳᠠᠭᠠᠵᠦ ᠬᠤᠨᠤᠭᠠᠳ ᠬᠦᠷᠴᠦ ᠪᠠᠶᠢᠬᠰᠠᠨ ᠭᠠᠵᠠᠷ ᠲᠤ ᠥᠨᠦ ᠴᠠᠭ ᠭᠠᠷᠤᠢ ᠯᠠ ᠶᠠᠪᠤᠭᠠᠳ ᠪᠢᠷᠠᠭᠤ ᠬᠤᠲᠠ ᠳᠤ ᠬᠦᠷᠦᠯ᠎ᠡ᠃︾ ᠪᠠᠶᠠᠨᠵᠢᠷᠦᠬᠡ ᠣᠪᠤᠭ᠎ᠠ ᠶᠢᠨ ᠲᠤᠬᠠᠢ ᠪᠢᠴᠢᠬᠦ ᠳᠤ ︽ᠪᠠᠶᠠᠨᠵᠢᠷᠦᠬᠡ ᠪᠣᠯ ᠮᠢᠨᠦ ᠥᠰᠦᠭᠰᠡᠨ ᠥᠯᠦᠭᠡᠢ ᠨᠤᠲᠤᠭ ᠶᠤᠮ︾ ᠭᠡᠵᠦ ᠡᠬᠢᠯᠡᠭᠦᠯᠵᠡᠢ᠃ ᠵᠠᠯᠭᠠᠭᠠᠳ ︽ᠪᠢ ᠪᠠᠭ᠎ᠠ ᠳᠠᠭᠠᠨ ᠡᠨᠡ ᠣᠷᠴᠢᠮ ᠤᠨ ᠥᠨᠳᠦᠷ ᠣᠷᠣᠢ᠂ ᠥᠷᠭᠡᠨ ᠲᠠᠯ᠎ᠠ᠂ ᠭᠦᠳᠦᠭᠡᠷ ᠮᠠᠩᠬ᠎ᠠ᠂ ᠭᠦᠨ ᠴᠦᠩᠭᠦᠷᠦᠭ᠂ ᠮᠣᠳᠣᠨ ᠰᠥᠭᠡᠭ᠂ ᠮᠣᠬᠤᠷ ᠵᠠᠮ ᠢᠶᠠᠷ ᠪᠠᠷᠤᠭ ᠶᠠᠪᠤᠬᠰᠠᠨ ᠦᠭᠡᠢ ᠭᠠᠵᠠᠷ ᠦᠭᠡᠢ᠃ ᠠᠳᠡᠬᠢ ᠤᠷᠭᠤᠮᠠᠯ ᠪᠣᠯᠣᠨ ᠠᠷᠢᠶᠠᠲᠠᠨ ᠵᠢᠭᠦᠷᠲᠡᠨ ᠢ ᠪᠥᠷ ᠨᠢᠳᠦᠯᠡᠨ ᠲᠠᠨᠢᠳᠠᠭ ᠪᠠᠶᠢᠯ᠎ᠠ︾ ᠭᠡᠵᠡᠢ ᠃ ᠳᠠᠷᠬᠠᠨ ᠠᠭᠤᠯᠠ ᠶᠢᠨ ᠲᠤᠬᠠᠢ ᠪᠢᠴᠢᠬᠦ ᠳᠤ ︽ᠪᠢ ᠪᠠᠭ᠎ᠠ ᠳᠠᠭᠠᠨ ᠨᠠᠭᠠᠴᠦ ᠪᠠᠨ ᠦᠵᠡᠬᠦ ᠪᠠᠷ ᠠᠳᠡ ᠢᠷᠡᠭᠡᠳ ᠳᠠᠷᠬᠠᠨ ᠠᠭᠤᠯᠠ ᠶᠢᠨ ᠪᠠᠶᠢᠭᠠᠯᠢ ᠶᠢᠨ ᠦᠵᠡᠮᠵᠢ ᠶᠢ ᠪᠠᠭ᠋ᠠᠷᠬᠠᠵᠦ ᠲᠣᠭᠤᠷᠢᠵᠦ ᠦᠵᠡᠵᠦ ᠪᠠᠶᠢᠬᠰᠠᠨ᠃ ᠲᠡᠷᠡ ᠦᠶ᠎ᠡ ᠎ ᠳᠤ ᠠᠭᠤᠯᠠ ᠶᠢᠨ ᠡᠩᠭᠡᠷ ᠲᠤ ᠲᠣᠯᠢ ᠶᠢᠨ ᠰᠦᠮ᠎ᠡ ᠭᠡᠳᠡᠭ ᠬᠡᠶᠢᠳ ᠪᠠᠶᠢᠵᠦ᠂ ᠯᠠᠮᠠ ᠨᠠᠷ ᠤᠨ ᠬᠤᠷᠠᠯ ᠬᠤᠷᠠᠬᠤ ᠪᠥᠷᠢᠶ᠎ᠡ ᠪᠢᠰᠬᠢᠭᠦᠷ ᠤᠨ ᠳᠠᠭᠤ ᠯᠠ ᠰᠣᠨᠣᠰᠳᠠᠵᠦ ᠪᠠᠶᠢᠬᠰᠠᠨ ᠪᠣᠯ ᠣᠳᠣ ᠷᠠᠳᠢᠤ᠋ ᠨᠡᠪᠲᠡᠷᠡᠭᠦᠯᠭᠡ ᠶᠢᠨ ᠳᠠᠭᠤ ᠬᠠᠩᠭᠢᠨᠠᠵᠦ ᠪᠠᠶᠢᠨ᠎ᠠ᠃ ᠲᠡᠷᠡ ᠰᠥᠮ᠎ᠡ ᠣᠳᠣ ᠡᠪᠳᠡᠷᠡᠭᠡᠳ ᠣᠷᠣ ᠦᠭᠡᠢ ᠪᠣᠯᠵᠠᠢ᠃︾       1980 ᠣᠨ ᠠᠴᠠ ᠡᠮᠤᠨ᠎ᠡ ᠭᠤᠴᠢᠨ ᠨᠠᠢᠮᠠᠨ ᠵᠢᠯ ᠲᠥᠷᠦᠭᠰᠡᠨ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠭ᠎ᠠ ᠦᠭᠡᠢ ᠭᠡᠳᠡᠭ ᠎ ᠨᠢ ᠶᠠᠮᠠᠷ ᠤᠬᠠᠬᠳᠠᠬᠤᠨ ᠪᠤᠢ ᠭᠡᠪᠡᠯ᠂ 1942 — 1980 ᠣᠨ ᠪᠣᠯᠲᠠᠯ᠎ᠠ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠭ᠎ᠠ ᠦᠭᠡᠢ ᠪᠠᠶᠢᠯ᠎ᠠ ᠭᠡᠰᠡᠨ ᠦᠭᠡ ᠮᠥᠨ᠃ 1942 ᠣᠨ ᠳᠤ ᠡᠷᠳᠡᠨᠢᠲᠣᠬᠲᠠᠬᠤ ᠪᠠᠭᠰᠢ 26 ᠨᠠᠰᠤᠲᠠᠢ᠃ 1939 ᠣᠨ ᠤ 12 ᠰᠠᠷ᠎ᠠ ᠳᠤ ᠬᠢᠩᠭᠠᠨ ᠰᠤᠷᠭᠠᠯ ᠤᠨ ᠬᠤᠷᠢᠶᠠᠨ ᠠᠴᠠ ᠲᠡᠭᠦᠰᠦᠭᠰᠡᠨ ᠤ ᠳᠠᠷᠠᠭ᠎ᠠ 1940 — 1944 ᠣᠨ ᠪᠣᠯᠲᠠᠯ᠎ᠠ ᠵᠤᠤ ᠣᠳᠠ ᠶᠢᠨ ᠴᠢᠭᠤᠯᠭᠠᠨ ᠤ ᠺᠠᠶᠢᠯᠦ ᠶᠢᠨ ᠨᠢᠭᠡᠳᠦᠭᠡᠷ ᠳᠤᠮᠳᠠᠳᠦ ᠰᠤᠷᠭᠠᠭᠤᠯᠢ ᠶᠢᠨ ᠮᠣᠩᠭᠤᠯ ᠬᠡᠯᠡᠨ ᠤ ᠪᠠᠭᠰᠢ᠂ ︽ᠤᠯᠠᠭᠠᠨ ᠪᠠᠷᠰ︾ ᠰᠡᠳᠭᠦᠯ ᠤᠨ ᠡᠷᠬᠢᠯᠡᠭᠰᠡᠨ ᠨᠠᠶᠢᠷᠠᠭᠤᠯᠤᠬᠴᠢ ᠪᠠᠷ ᠠᠵᠢᠯᠯᠠᠵᠦ ᠪᠠᠶᠢᠬᠰᠠᠨ ᠲᠤᠯᠠᠳᠠ ᠲᠡᠷᠡ ᠬᠤᠭᠤᠷᠣᠨᠳᠦ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠵᠦ ᠪᠠᠶᠢᠬᠰᠠᠨ᠂ ᠲᠠᠭᠦᠨ ᠠᠴᠠ ᠬᠤᠶᠢᠰᠢ ᠳᠠᠬᠢᠨ ᠬᠠᠷᠢᠵᠦ ᠦᠵᠡᠭᠡ ᠦᠭᠡᠢ ᠠᠬᠰᠠᠨ ᠠᠵᠢ᠃ ᠭᠤᠴᠢᠨ ᠨᠠᠢᠮᠠᠨ ᠵᠢᠯ ᠭᠡᠳᠡᠭ ᠨᠢ ᠨᠢᠭᠡ ᠬᠥᠮᠦᠨ ᠳᠤ ᠠᠪᠴᠦ ᠬᠡᠯᠡᠪᠡᠯ ᠬᠠᠭᠠᠰ ᠨᠠᠰᠦ ᠶᠢ ᠎ ᠨᠢ ᠡᠵᠡᠯᠡᠵᠦ ᠪᠠᠶᠢᠭ᠎ᠠ ᠤᠷᠲᠦ ᠬᠤᠭᠤᠴᠠᠭ᠎ᠠ ᠪᠣᠯᠬᠤ ᠪᠥᠭᠡᠳ ᠢᠯᠠᠩᠭᠤᠶ᠎ᠠ ᠲᠡᠷᠡ ᠭᠤᠴᠢᠨ ᠨᠠᠢᠮᠠᠨ ᠵᠢᠯ ᠤᠨ ᠬᠤᠭᠤᠷᠤᠨᠳᠦ ᠳᠤᠮᠳᠠᠳᠦ ᠤᠯᠤᠰ᠂ ᠥᠪᠦᠷ ᠮᠣᠩᠭᠤᠯ ᠳᠤ ᠴᠠᠭ ᠲᠥᠷᠦ ᠰᠣᠯᠢᠬᠳᠠᠵᠦ ᠴᠠᠬᠯᠠᠰᠢ ᠦᠭᠡᠢ ᠶᠡᠭᠡ ᠬᠤᠪᠢᠷᠠᠯᠲᠠ ᠭᠠᠷᠤᠬᠰᠠᠨ ᠶᠤᠮ᠃ ᠣᠳᠣ ᠥᠪᠦᠷ ᠮᠣᠩᠭᠤᠯ ᠳᠤ ᠨᠤᠲᠤᠭ ᠠᠴᠠᠭᠠᠨ ᠰᠠᠯᠤᠭᠠᠳ ᠭᠤᠴᠢᠨ ᠨᠠᠢᠮᠠᠨ ᠵᠢᠯ ᠪᠣᠯᠬᠤ ᠪᠠᠶᠢᠲᠤᠭᠠᠢ᠂ ᠭᠤᠷᠪᠠ ᠳᠣᠯᠤᠭᠠᠬᠠᠨ ᠵᠢᠯ ᠪᠣᠯᠤᠮᠠᠬᠴᠠ ᠨᠤᠲᠤᠭ ᠤᠨ ᠲᠤᠬᠠᠢ ᠠᠯᠢᠪᠠ ᠣᠢ ᠰᠠᠭᠤᠬᠳᠠᠯ ᠢᠶᠠᠨ ᠪᠥᠷ ᠬᠤᠭ ᠤᠨ ᠣᠪᠤᠭᠠᠨ᠎ᠠ ᠬᠠᠶᠠᠭᠠᠳ᠂ ᠴᠢᠨᠠᠬᠰᠢᠯᠠᠪᠠᠯ ᠡᠬᠡ ᠬᠡᠯᠡ ᠪᠠᠨ ᠬᠦᠷᠲᠡᠯ᠎ᠡ ᠡᠷᠭᠢᠭᠦᠲᠡᠨ ︽ᠮᠠᠷᠲᠠᠭᠠᠳ︾ ᠬᠢᠲᠠᠳ ᠢᠶᠠᠷ ᠬᠠᠪᠰᠢᠵᠦ ᠭᠦᠶᠦᠳᠡᠭ ᠪᠣᠯᠤᠬᠰᠠᠨ ᠬᠥᠮᠦᠨ ᠵᠦᠩᠳᠡᠭᠡᠨ ᠬᠠᠷᠠᠬᠳᠠᠵᠦ ᠪᠠᠶᠢᠭ᠎ᠠ ᠪᠢᠰᠢᠦ᠃ ᠭᠡᠲᠡᠯ᠎ᠡ ᠡᠷᠳᠡᠨᠢᠲᠣᠬᠲᠠᠬᠤ ᠪᠠᠭᠰᠢ ᠳᠤ ᠬᠠᠷᠢᠨ ︽︿ᠤᠨᠠᠬᠰᠠᠨ ᠰᠢᠷᠤᠢ ᠠᠯᠲᠠ᠂ ᠤᠤᠭᠤᠬᠰᠠᠨ ᠤᠰᠤ ᠷᠠᠰᠢᠶᠠᠨ﹀ ᠭᠡᠳᠡᠭᠴᠢᠯᠡᠨ ᠨᠤᠲᠤᠭ ᠤᠨ ᠮᠢᠨᠢ ᠠᠭᠤᠯᠠ ᠤᠰᠤ ᠠᠴᠠ ᠠᠪᠤᠭᠠᠳ ᠤᠴᠠᠷᠠᠬᠰᠠᠨ ᠬᠥᠮᠦᠰ ᠨᠢ ᠬᠦᠷᠲᠡᠯ᠎ᠡ ᠢᠵᠢᠯᠢ ᠲᠠᠨᠢᠯ ᠰᠢᠭ᠋ ᠰᠠᠨᠠᠬᠳᠠᠵᠦ︾ ᠠᠭᠤᠯᠠ ᠤᠰᠤ᠂ ᠣᠢ ᠮᠣᠳᠣ᠂ ᠡᠪᠡᠰᠦ ᠤᠷᠭᠤᠮᠠᠯ ᠨᠢᠭᠡᠪᠦᠷᠢ ᠨᠢ ᠪᠠᠭ᠎ᠠ ᠵᠠᠯᠠᠭᠤ ᠶᠢᠨ ᠦᠶ᠎ᠡ ᠶᠢᠨ ᠪᠥᠬᠦᠶᠢᠯᠡ ᠣᠢ ᠰᠠᠭᠤᠬᠳᠠᠯ ᠢ ᠰᠡᠷᠭᠦᠭᠡᠨ ᠥᠭᠴᠡᠢ᠃ ᠲᠡᠶᠢᠮᠦ ᠴᠦ ᠤᠴᠢᠷ ᠠᠴᠠ ᠨᠤᠲᠤᠭ ᠤᠨ ᠢᠶᠠᠨ ᠲᠡᠤᠬᠡ᠂ ᠰᠣᠶᠣᠯ᠂ ᠠᠭᠤᠯᠠ ᠤᠰᠤ ᠪᠠᠨ ᠪᠢᠴᠢᠨ ᠵᠢᠷᠤᠬᠯᠠᠬᠤ ᠳᠠᠭᠠᠨ ᠲᠡᠳᠡᠭᠡᠷ ᠵᠢᠷᠤᠬᠯᠠᠯ ᠲᠣᠭᠠᠴᠢᠯ ᠲᠡᠮᠳᠡᠭᠯᠡᠯ ᠤᠨ ᠳᠤᠮᠳᠠᠭᠤᠷ ᠭᠦᠨ ᠵᠤᠵᠠᠭᠠᠨ ᠪᠠᠭ᠋ᠠᠷᠤᠯ ᠪᠢᠰᠢᠷᠡᠯ᠂ ᠬᠠᠶᠢᠷᠠᠯᠠᠯ ᠬᠥᠨᠳᠦᠳᠭᠡᠯ᠂ ᠮᠥᠷᠦᠭᠡᠳᠦᠯ ᠳᠤᠷᠠᠳᠬᠠᠯ ᠤᠨ ᠰᠡᠳᠭᠢᠯᠭᠡ ᠪᠠᠨ ᠢᠯᠡᠳᠭᠡᠭᠰᠡᠨ ᠪᠠᠶᠢᠯ᠎ᠠ᠃ ᠡᠨᠡ ᠪᠣᠯ ᠬᠠᠶᠢᠷ᠎ᠠ ᠰᠡᠳᠭᠢᠯᠭᠡ ᠶᠢᠨ ᠢᠯᠡᠷᠡᠯ ᠮᠥᠨ᠃       2000 ᠣᠨ ᠤ 11 ᠰᠠᠷ᠎ᠠ ᠳᠤ ᠪᠢ ᠬᠥᠬᠡᠬᠤᠲᠡ ᠳᠤ ᠠᠵᠢᠯ ᠢᠶᠠᠷ ᠣᠴᠢᠭᠠᠳ ᠡᠷᠳᠡᠨᠢᠲᠣᠬᠲᠠᠬᠤ ᠪᠠᠭᠰᠢ ᠶᠢᠨ ᠥᠪᠦᠷ ᠮᠣᠩᠭᠤᠯ ᠤᠨ ᠡᠮᠨᠡᠯᠭᠡ ᠶᠢᠨ ᠬᠤᠷᠢᠶᠠᠨ ᠳᠤ ᠰᠠᠭᠤᠵᠦ ᠪᠠᠶᠢᠭ᠎ᠠ ᠪᠣᠲᠠᠲᠠᠢ ᠬᠠᠶ᠋ᠢᠭ ᠢ ᠣᠯᠵᠦ ᠠᠪᠴᠠᠢ᠃ ᠪᠠᠭᠰᠢ ᠶᠢ ᠡᠮᠨᠡᠯᠭᠡ ᠳᠤ ᠰᠠᠭᠤᠵᠦ ᠪᠠᠶᠢᠨ᠎ᠠ᠂ ᠮᠡᠳᠡᠷᠡᠯ ᠮᠠᠭᠤᠲᠠᠭᠠᠳ ᠬᠥᠮᠦᠨ ᠲᠠᠨᠢᠬᠤ ᠦᠭᠡᠢ ᠪᠣᠯᠵᠠᠢ ᠭᠡᠵᠦ ᠰᠣᠨᠣᠰᠤᠬᠰᠠᠨ ᠪᠣᠯᠪᠠᠴᠦ ᠴᠣᠬᠤᠮ ᠶᠠᠮᠠᠷ ᠬᠥᠨᠳᠦ ᠬᠡᠮᠵᠢᠶᠡᠨ ᠳᠤ ᠬᠦᠷᠦᠭᠰᠡᠨ ᠭᠡᠳᠡᠭ ᠢ ᠨᠢ ᠮᠡᠳᠡᠭᠡ ᠦᠭᠡᠢ᠃ ᠲᠡᠭᠡᠭᠡᠳ ᠨᠢᠭᠡᠨ ᠦᠳᠡ ᠶᠢᠨ ᠡᠮᠦᠨ᠎ᠡ ᠥᠪᠦᠷ ᠮᠣᠩᠭᠤᠯ ᠤᠨ ᠡᠮᠨᠡᠯᠭᠡ ᠶᠢᠨ ᠬᠤᠷᠢᠶᠠᠨ ᠤ ᠡᠪᠡᠳᠴᠢᠲᠡᠨ ᠤ ᠪᠠᠶᠢᠷᠢ ᠶᠢᠨ ᠠᠰᠠᠷ ᠲᠤ ᠡᠷᠢᠭᠡᠳ ᠬᠦᠷᠪᠡ᠃ ᠪᠠᠭᠰᠢ ᠭᠠᠭᠴᠠᠭᠠᠷ ᠨᠢᠭᠡᠨ ᠥᠷᠦᠭᠡᠨ ᠳᠤ ᠰᠠᠭᠤᠳᠠᠭ ᠠᠵᠢ᠂ ᠤᠯᠠᠭᠠᠨᠴᠠᠪ ᠤᠨ ᠨᠢᠭᠡᠨ ᠬᠢᠲᠠᠳ ᠲᠠᠷᠢᠶᠠᠴᠢᠨ ᠪᠦᠰᠡᠭᠦᠢ ᠶᠢ ᠬᠥᠯᠦᠰᠦᠯᠡᠨ ᠰᠣᠪᠢᠯᠠᠭᠤᠯᠵᠦ ᠪᠠᠶᠢᠪᠠ᠃ ᠪᠢ ᠬᠥᠬᠡ ᠲᠤᠷᠭᠠᠨ ᠬᠠᠳᠠᠭ ᠪᠠᠷᠢᠭᠠᠳ ︽ᠡ᠊ ᠪᠠᠭᠰᠢ ᠰᠠᠶᠢᠨ ᠪᠠᠶᠢᠨ᠎ᠠ ᠦᠦ︾ ᠭᠡᠵᠦ ᠬᠥᠨᠳᠦᠳᠭᠡᠨ ᠶᠣᠰᠤᠯᠠᠬᠰᠠᠨ ᠳᠤ ᠪᠠᠭᠰᠢ ᠮᠠᠨᠢ ᠡᠭᠡᠭᠡ ᠡᠷᠡᠭᠦᠯ ᠦᠶ᠎ᠡ ᠲᠠᠢ ᠪᠠᠨ ᠠᠳᠠᠯᠢᠬᠠᠨ ᠬᠠᠳᠠᠭ ᠢ ᠲᠣᠰᠤᠨ ᠠᠪᠤᠭᠠᠳ ᠨᠠᠮᠠᠶᠢᠢ ᠬᠠᠯᠠᠭᠤᠬᠠᠨ ᠴᠢᠷᠠᠢ ᠪᠠᠷ ᠬᠠᠷᠠᠵᠦ ᠰᠠᠭᠤᠯ᠎ᠠ᠃ ᠭᠡᠪᠡᠴᠦ ᠶᠡᠷᠦ ᠦᠭᠡ ᠳᠤᠭᠠᠷᠤᠬᠰᠠᠨ ᠦᠭᠡᠢ᠃ ᠲᠡᠷᠡ ᠰᠣᠪᠢᠯᠠᠬᠴᠢ ᠲᠠᠷᠢᠶᠠᠴᠢᠨ ᠡᠮᠡᠭᠲᠡᠢ ᠮᠢᠨᠦ ᠪᠠᠭᠰᠢ ᠳᠤ ᠪᠠᠷᠢᠬᠰᠠᠨ ᠬᠠᠳᠠᠭ ᠢ ᠬᠡᠳᠦ ᠢᠮᠡᠷᠴᠦ ᠦᠵᠡᠭᠡᠳ ᠶᠡᠬᠡᠲᠡ ᠭᠠᠶᠢᠬᠠᠨ ︽ᠡᠨᠡ ᠴᠢᠨᠢ ᠶᠠᠮᠠᠷ ᠬᠡᠷᠡᠭᠲᠡᠢ ᠶᠠᠭᠤᠮ᠎ᠠ ᠶᠤᠮ ᠪᠤᠢ︖ ᠠᠯᠴᠢᠭᠤᠷ ᠦᠦ︖︾ ᠭᠡᠵᠦ ᠠᠰᠠᠭᠤᠵᠦ ᠪᠠᠶᠢᠪᠠ᠃ ᠬᠤᠶᠠᠷ ᠵᠢᠯ ᠤᠨ ᠡᠮᠤᠨ᠎ᠡ ᠥᠪᠦᠷ ᠮᠣᠩᠭᠤᠯ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠣᠯᠠᠨ ᠤᠯᠤᠰ ᠤᠨ ᠮᠣᠩᠭᠤᠯ ᠰᠣᠳᠣᠯᠣᠯ ᠤᠨ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠶᠡᠭᠡ ᠬᠤᠷᠠᠯ ᠳᠤ ᠣᠷᠣᠯᠴᠠᠬᠰᠠᠨ ᠡᠷᠳᠡᠮᠲᠡᠳ ᠪᠠᠳᠭᠡᠷ ᠵᠤᠤ ᠶᠢ ᠲᠣᠭᠤᠷᠢᠨ ᠦᠵᠡᠵᠦ ᠪᠠᠶᠢᠬᠤ ᠳᠤ ᠪᠢ ᠡᠷᠳᠡᠨᠢᠲᠣᠬᠲᠠᠬᠤ ᠪᠠᠭᠰᠢ᠂ ᠪᠠᠶᠠᠷ ᠪᠠᠭᠰᠢ᠂ ᠪᠦᠷᠢᠨᠪᠠᠬᠢ ᠪᠠᠭᠰᠢ ᠲᠠᠢ ᠬᠠᠮᠲᠦ ᠨᠢᠭᠡ ᠵᠢᠷᠤᠭ ᠲᠠᠲᠠᠭᠤᠯᠤᠬᠰᠠᠨ ᠪᠢᠯᠡ᠂ ᠪᠢ ᠲᠡᠷᠡ ᠵᠢᠷᠤᠭ ᠢᠶᠠᠨ ᠭᠠᠷᠭᠠᠨ ᠪᠠᠭᠰᠢ ᠳᠤ ᠥᠭᠪᠡ᠃ ᠰᠣᠪᠢᠯᠠᠬᠴᠢ ᠡᠮᠡᠭᠲᠡᠢ ᠲᠡᠷᠡ ᠵᠢᠷᠤᠭ ᠢ ᠵᠢᠭᠠᠭᠠᠳ ︽ᠠᠯᠢ ᠨᠢ ᠲᠠ ᠪᠤᠢ︖︾ ᠭᠡᠵᠦ ᠠᠰᠠᠭᠤᠬᠰᠠᠨ ᠳᠤ ᠪᠠᠭᠰᠢ ᠢᠨᠢᠶᠡᠰᠬᠢᠭᠡᠳ ᠥᠪᠡᠷ ᠢ ᠪᠠᠨ ᠵᠢᠭᠠᠵᠦ ᠪᠠᠶᠢᠯ᠎ᠠ᠂ ᠭᠡᠪᠡᠴᠦ ᠮᠥᠨ ᠦᠭᠡ ᠳᠤᠤᠭᠠᠷᠤᠭ᠎ᠠ ᠦᠭᠡᠢ᠃ ᠵᠠᠯᠭᠠᠭᠠᠳ ᠲᠡᠷᠡ ᠰᠣᠪᠢᠯᠠᠬᠴᠢ ᠡᠮᠡᠭᠲᠡᠢ ᠪᠠᠭᠰᠢ ᠶᠢᠨ ᠡᠪᠡᠳᠴᠢᠨ ᠤ ᠪᠠᠶᠢᠳᠠᠯ ᠢ ᠪᠠᠭ᠎ᠠ ᠰᠠᠭ᠎ᠠ ᠶᠠᠷᠢᠭᠠᠳ ᠨᠡᠩ ᠣᠯᠠᠨ ᠦᠭᠡ ᠨᠢ ᠥᠪᠡᠷ ᠤᠨ ᠵᠣᠪᠠᠯᠠᠩ ᠢᠶᠠᠨ ᠲᠣᠭᠠᠴᠢᠵᠦ ᠪᠠᠶᠢᠪᠠ᠃ ᠪᠢ ᠲᠡᠭᠦᠨ ᠤ ᠦᠭᠡ ᠶᠢ ᠰᠣᠨᠣᠰᠬᠤ ᠰᠣᠨᠢᠷᠬᠠᠯ ᠦᠭᠡᠢ᠂ ᠬᠠᠷᠢᠨ ᠪᠠᠭᠰᠢ ᠮᠠᠨᠢ ᠬᠤᠶᠠᠷ ᠦᠭᠡ ᠬᠡᠯᠡᠳᠡᠭ ᠪᠣᠯᠪᠠᠦ ᠭᠡᠵᠦ ᠴᠢᠷᠠᠢ ᠤᠷᠤᠭᠤ ᠨᠢ ᠤᠳᠠᠲᠠᠯ᠎ᠠ ᠬᠠᠷᠠᠬᠤ ᠳᠤ ᠪᠠᠭᠰᠢ ᠴᠦ ᠬᠠᠯᠠᠭᠤᠮᠰᠤᠭ ᠴᠢᠷᠠᠢ ᠪᠠᠷ ᠨᠠᠮᠠᠶᠢᠢ ᠬᠠᠷᠠᠬᠰᠠᠭᠠᠷ ᠪᠠᠶᠢᠪᠠ᠂ ᠭᠡᠪᠡᠴᠦ ᠮᠥᠨ ᠯᠠ ᠦᠭᠡ ᠳᠤᠤᠭᠠᠷᠤᠬᠰᠠᠨ ᠦᠭᠡᠢ᠃ ᠪᠠᠭᠰᠢ ᠮᠠᠨᠢ ᠨᠢᠭᠡᠨᠲᠡ ᠦᠭᠡ ᠶᠠᠷᠢᠬᠤ ᠪᠠᠨ ᠪᠣᠯᠢᠵᠦ ᠳ᠋ᠠ ᠭᠡᠵᠦ ᠪᠣᠳᠣᠬᠤ ᠳᠤ ᠲᠣᠲᠣᠷ ᠶᠡᠬᠡᠲᠡ ᠤᠶᠢᠮᠤᠷᠠᠪᠠ᠃ ᠪᠢ ᠶᠠᠪᠤᠬᠤ ᠪᠠᠷ ᠪᠣᠰᠪᠠ᠃ ᠪᠠᠭᠰᠢ ᠮᠢᠨᠦ ᠥᠭᠡᠳᠡ ᠬᠠᠷᠠᠬᠰᠠᠭᠠᠷ ᠭᠡᠨᠡᠳᠲᠡ ︽ᠥᠨᠦ ᠪᠠᠶᠠᠨᠵᠢᠷᠦᠬᠡ ᠣᠪᠤᠭᠠᠨ ᠤ ᠬᠠᠷ᠎ᠠ ᠮᠣᠳᠣ ᠪᠠᠰᠠ ᠪᠠᠶᠢᠨ᠎ᠠ ᠦᠦ︖︾ ᠭᠡᠵᠦ ᠠᠰᠠᠭᠤᠯ᠎ᠠ᠃ ᠪᠢ ᠳᠠᠬᠢᠨ ᠰᠠᠭᠤᠭᠠᠳ ᠪᠠᠶᠠᠨᠵᠢᠷᠦᠬᠡ ᠣᠪᠤᠭᠠᠨ ᠤ ᠬᠠᠷ᠎ᠠ ᠮᠣᠳᠣ ︵ᠦᠨᠡᠨ ᠳᠡᠭᠡᠨ ᠨᠢᠭᠡ ᠲᠥᠷᠦᠯ ᠤᠨ ᠨᠠᠷᠠᠰᠤᠨ ᠮᠣᠳᠣ᠂ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠨᠡᠷ᠎ᠡ ᠨᠢ ᠡᠯᠡᠰᠦᠨ ᠭᠠᠴᠤᠷ᠎ᠠ᠂ ᠨᠤᠲᠤᠭ ᠤᠨ ᠬᠥᠮᠦᠰ ᠬᠠᠷ᠎ᠠ ᠮᠣᠳᠣ ᠭᠡᠳᠡᠭ︶ ᠶᠡᠭᠡ ᠰᠦᠢᠳᠭᠡᠭᠳᠡᠵᠦ ᠪᠠᠶᠢᠭ᠎ᠠ ᠪᠣᠯᠪᠠᠴᠦ ᠪᠠᠰᠠ ᠨᠡᠯᠢᠶᠡᠳ ᠨᠢ ᠦᠯᠡᠳᠡᠭᠰᠡᠭᠡᠷ ᠪᠠᠶᠢᠨ᠎ᠠ ᠬᠡᠮᠡᠨ ᠶᠡᠭᠡ ᠪᠠᠶᠠᠷᠲᠠᠢ ᠬᠡᠯᠡᠵᠦ ᠥᠭᠭᠦᠯ᠎ᠡ᠃ ᠪᠠᠭᠰᠢ ᠮᠠᠨᠢ ᠮᠠᠰᠢ ᠠᠩᠬᠠᠷᠤᠯᠲᠠᠢ ᠰᠣᠨᠣᠰᠤᠬᠰᠠ ᠪᠣᠯᠪᠠᠴᠦ ᠳᠠᠬᠢᠨ ᠶᠠᠮᠠᠷ ᠴᠦ ᠦᠭᠡ ᠬᠡᠯᠡᠭᠡ ᠦᠭᠡᠢ᠃ ᠪᠢ ᠬᠥᠨᠳᠦ ᠭᠡᠳᠡᠭ ᠤᠨ ᠰᠡᠳᠭᠢᠯ ᠢᠶᠠᠨ ᠳᠠᠭᠠᠭᠠᠵᠦ ᠶᠠᠳᠠᠬᠰᠠᠭᠠᠷ ᠪᠠᠭᠰᠢ ᠲᠠᠢ ᠠᠶᠠᠷᠯᠠᠨ ᠰᠠᠯᠤᠭᠠᠳ ᠪᠠᠭᠤᠳᠠᠯ ᠳᠠᠭᠠᠨ ᠶᠠᠪᠤᠵᠦ ᠪᠢᠯᠡ᠃       ᠪᠠᠭᠰᠢ ᠶᠢᠨ ᠮᠠᠨᠢ ᠮᠡᠳᠡᠷᠡᠯ ᠤᠨ ᠰᠢᠰᠲ᠋ᠧᠮ ᠦᠨᠡᠬᠡᠷ ᠶᠡᠭᠡ ᠮᠠᠭᠤᠲᠠᠬᠰᠠᠨ ᠠᠵᠢ᠃ ᠭᠡᠬᠦ ᠳᠡᠭᠡᠨ ᠰᠡᠳᠭᠢᠯ ᠬᠥᠳᠡᠯᠦᠭᠦᠰᠢᠲᠡᠢ ᠨᠢ ᠭᠡᠪᠡᠯ᠂ ᠲᠡᠭᠦᠨ ᠤ ᠣᠶᠤᠨ ᠳᠠᠷᠢᠬᠢᠨ ᠠᠴᠠ ᠪᠠᠷᠤᠭ ᠪᠥᠬᠦ ᠣᠢ ᠰᠠᠭᠤᠬᠳᠠᠯ ᠨᠢ ᠠᠷᠢᠯᠤᠨ ᠣᠳᠤᠬᠰᠠ ᠪᠠᠶᠢᠬᠤ ᠳᠤ ᠥᠰᠦᠭᠰᠡᠨ ᠥᠯᠦᠭᠡᠢ ᠪᠠᠶᠠᠨᠵᠢᠷᠦᠬᠡ ᠣᠪᠤᠭᠠᠨ ᠤ ᠬᠠᠷ᠎ᠠ ᠮᠣᠳᠣ ᠪᠠᠨ ᠮᠦᠨᠬᠦ ᠴᠡᠭᠡᠵᠢᠯᠡᠭᠰᠡᠭᠡᠷ᠂ ᠮᠥᠨᠬᠦ ᠳᠤᠷᠠᠰᠤᠨ ᠮᠥᠷᠦᠭᠡᠳᠦᠭᠰᠡᠭᠡᠷ ᠪᠠᠶᠢᠳᠠᠭ ᠠᠵᠢ︕ ︽ᠥᠨᠦ ᠪᠠᠶᠠᠨᠵᠢᠷᠦᠬᠡ ᠣᠪᠤᠭᠠᠨ ᠤ ᠬᠠᠷ᠎ᠠ ᠮᠣᠳᠣ ᠪᠠᠰᠠ ᠪᠠᠶᠢᠨ᠎ᠠ ᠦᠦ︖︾ ᠡᠨᠡ ᠪᠣᠯ ᠪᠠᠭᠰᠢ ᠶᠢᠨ ᠮᠠᠨᠢ ᠨᠠᠳᠠᠳᠦ ᠬᠡᠯᠡᠭᠰᠡᠨ ᠬᠠᠮᠤᠭ ᠰᠡᠭᠦᠯᠴᠢ ᠶᠢᠨ ᠦᠭᠡ ᠮᠦᠨ᠃ ᠡᠨᠡ ᠪᠣᠯ ᠨᠤᠲᠤᠭ ᠤᠨ ᠬᠠᠶᠢᠷ᠎ᠠ ᠶᠢᠨ ᠬᠦᠴᠦᠨ ᠮᠥᠨ᠃       ᠬᠡᠳᠦᠬᠡᠨ ᠰᠠᠷ᠎ᠠ ᠥᠩᠭᠡᠷᠡᠭᠡᠳ 2001 ᠣᠨ ᠤ 1 ᠰᠠᠷ᠎ᠠ ᠶᠢᠨ 23᠎ ᠤ ᠡᠳᠦᠷ ᠪᠠᠭᠰᠢ ᠮᠠᠨᠢ ᠬᠥᠮᠦᠨ ᠤ ᠣᠷᠴᠢᠯᠠᠩ ᠠᠴᠠ ᠠᠶᠠᠷᠯᠠᠨ ᠶᠠᠪᠤᠯ᠎ᠠ᠃ ᠪᠠᠭᠰᠢ ᠮᠠᠨᠢ ᠡᠬᠡ ᠨᠤᠲᠤᠭ ᠲᠠᠭᠠᠨ ᠬᠠᠶᠢᠷᠠᠲᠠᠢ᠂ ᠡᠬᠡ ᠨᠤᠲᠤᠭ ᠤᠨ ᠮᠣᠩᠭᠤᠯᠴᠤᠳ ᠨᠢ ᠴᠦ ᠡᠨᠡᠬᠦ ᠲᠥᠪ ᠴᠢᠭᠡᠴᠢ ᠠᠷᠤᠤᠬᠠᠨ ᠡᠷᠳᠡᠮᠲᠡᠨ ᠳᠡᠭᠡᠨ ᠬᠠᠶᠢᠷᠠᠲᠠᠢ ᠶᠤᠮ᠃ ᠭᠠᠷ ᠳᠡᠭᠡᠷ᠎ᠡ ᠨᠢ ᠥᠰᠦᠭᠰᠡᠨ ᠠᠴᠢ ᠬᠥᠪᠡᠭᠦᠨ ᠬᠡᠰᠢᠭ ᠭᠤᠸᠠᠢ ᠠᠴᠢ ᠨᠠᠷ ᠲᠠᠢ ᠪᠠᠨ ᠵᠥᠪᠳᠡᠵᠦ ᠪᠠᠶᠢᠭᠠᠳ ᠴᠢᠨᠳᠠᠷ ᠢ ᠨᠢ ᠲᠥᠷᠦᠭᠰᠡᠨ ᠨᠤᠲᠤᠭ ᠲᠤᠨᠢ — ᠬᠡᠰᠢᠭᠲᠡᠨ ᠬᠤᠰᠢᠭᠤᠨ ᠤ ᠪᠠᠶᠠᠨᠵᠢᠷᠦᠬᠡ ᠣᠪᠤᠭᠠᠨ ᠤ ᠵᠡᠭᠦᠬᠡᠨ ᠲᠠᠯ᠎ᠠ ᠳᠠᠬᠢ ᠣᠯᠠᠨ ᠨᠠᠭᠤᠷ ᠤᠨ ᠬᠥᠷᠦᠰᠦᠨ ᠳᠤ ᠣᠷᠤᠰᠢᠭᠤᠯᠵᠠᠢ᠃ ᠨᠤᠲᠤᠭ ᠤᠨ ᠬᠢᠨᠢ ᠲᠥᠷᠦᠯ ᠰᠠᠳᠤᠨ᠂ ᠬᠤᠯᠪᠤᠬᠳᠠᠯ ᠪᠥᠬᠦᠢ ᠳᠠᠷᠤᠭ᠎ᠠ᠂ ᠺᠠᠳ᠋ᠷ᠂ ᠮᠠᠯᠴᠢᠨ ᠲᠦᠮᠡᠨ ᠠᠷᠢᠭᠤᠨ ᠴᠢᠨᠳᠠᠷ ᠲᠤᠨᠢ ᠬᠥᠨᠳᠦᠳᠭᠡᠯ ᠶᠣᠰᠤᠯᠠᠯ ᠤᠨ ᠰᠡᠳᠭᠢᠯᠭᠡ ᠎ ᠪᠠᠨ ᠢᠯᠡᠳᠭᠡᠭᠰᠡᠨ ᠪᠠᠶᠢᠯ᠎ᠠ᠃ ᠲᠡᠭᠦᠪᠡᠷ ᠦᠯᠦ ᠪᠠᠷᠠᠮ᠂ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠣᠷᠳᠣᠨ ᠰᠡᠶᠢᠳᠪᠦᠷᠢ ᠭᠠᠷᠭᠠᠵᠦ᠂ ᠣᠷᠣᠨ ᠤ ᠦᠨᠳᠦᠰᠦᠲᠡᠨ ᠤ ᠬᠡᠷᠡᠭ ᠡᠷᠬᠢᠯᠡᠬᠦ ᠺᠣᠮᠢᠰ ᠤᠨ ᠵᠥᠪᠰᠢᠶᠡᠷᠡᠯ ᠪᠠ ᠣᠷᠣᠨ ᠤ ᠮᠣᠩᠭᠤᠯ ᠬᠡᠯᠡ ᠪᠢᠴᠢᠭ ᠤᠨ ᠠᠵᠢᠯ ᠤᠨ ᠭᠠᠵᠠᠷ ᠤᠨ ᠪᠣᠳᠠᠲᠠᠢ ᠳᠡᠮᠵᠢᠯᠭᠡ ᠶᠢ ᠣᠯᠤᠭᠠᠳ᠂ ᠬᠤᠰᠢᠭᠤᠨ ᠤ ᠮᠣᠩᠭᠤᠯ ᠳᠤᠮᠳᠠᠳᠦ ᠰᠤᠷᠭᠠᠭᠤᠯᠢ ᠶᠢᠨ ᠬᠦᠷᠢᠶᠡᠨ ᠳᠤ ᠡᠷᠳᠡᠨᠢᠲᠣᠬᠲᠠᠬᠤ ᠪᠠᠭᠰᠢ ᠶᠢᠨ ᠬᠦᠷᠡᠯ ᠬᠥᠷᠦᠭ ᠢ ᠪᠤᠰᠬᠠᠬᠤ᠂ ᠡᠷᠳᠡᠨᠢᠲᠣᠬᠲᠠᠬᠤ ᠪᠠᠭᠰᠢ ᠶᠢᠨ ᠪᠥᠷᠢᠨ ᠵᠣᠬᠢᠶᠠᠯ ᠢ ᠡᠮᠬᠢᠳᠭᠡᠨ ᠬᠡᠪᠯᠡᠭᠦᠯᠵᠦ᠂ ᠡᠷᠳᠡᠨᠢᠲᠣᠬᠲᠠᠬᠤ ᠪᠠᠭᠰᠢ ᠶᠢᠨ ᠲᠤᠬᠠᠢ ᠪᠥᠬᠦ ᠤᠯᠤᠰ ᠤᠨ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠰᠣᠳᠣᠯᠣᠨ ᠶᠠᠷᠢᠯᠴᠠᠬᠤ ᠬᠤᠷᠠᠯ ᠬᠤᠷᠠᠯᠳᠤᠭᠤᠯᠬᠤ ᠰᠡᠶᠢᠳᠪᠤᠷᠢ ᠭᠠᠷᠭᠠᠵᠠᠢ᠃ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠲᠥᠯᠦᠭᠡᠯᠡᠭᠴᠢᠳ ᠤᠨ ᠶᠡᠭᠡ ᠬᠤᠷᠠᠯ ᠤᠨ ᠪᠠᠶᠢᠩᠭᠤ ᠶᠢᠨ ᠬᠤᠷᠢᠶᠠᠨ ᠤ ᠡᠷᠬᠢᠯᠡᠭᠴᠢ ᠰᠡᠴᠡᠨᠪᠠᠭᠠᠲᠤᠷ᠂ ᠬᠤᠰᠢᠭᠤᠨ ᠤ ᠨᠠᠮ ᠤᠨ ᠬᠤᠷᠢᠶ᠎ᠠ᠂ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠠᠯᠪᠠᠨ ᠭᠡᠷ ᠤᠨ ᠡᠷᠬᠢᠯᠡᠭᠴᠢ ᠰᠠᠶᠢᠰᠢᠶᠠᠯᠲᠦ᠂ ᠬᠤᠰᠢᠭᠤᠨ ᠤ ᠦᠨᠳᠦᠰᠦᠲᠡᠨ ᠤ ᠬᠡᠷᠡᠭ ᠡᠷᠬᠢᠯᠡᠬᠦ ᠺᠣᠮᠢᠰ ᠤᠨ ᠡᠷᠬᠢᠯᠡᠭᠴᠢ ᠭᠠᠩᠰᠦ᠋ᠬᠡ᠂ ᠪᠠᠰᠠ ᠬᠤᠰᠢᠭᠤᠨ ᠤ ᠵᠤᠭᠠᠴᠢᠯ ᠦᠢᠯᠡᠰ ᠤᠨ ᠲᠣᠪᠴᠢᠶᠠᠨ ᠤ ᠵᠠᠯᠠᠭᠤ ᠺᠠᠳ᠋ᠷ ᠡᠷᠳᠡᠮᠲᠦ ᠨᠠᠷ ᠤᠨ ᠬᠠᠯᠠᠭᠤᠨ ᠴᠢᠷᠮᠠᠶᠢᠯᠭ᠎ᠠ ᠎ ᠪᠠᠷ ᠡᠨᠡᠬᠦ ᠪᠣᠶᠠᠨᠲᠦ ᠠᠵᠢᠯ ᠣᠬᠤᠷᠬᠠᠨ ᠬᠤᠭᠤᠴᠠᠭᠠᠨ᠎ᠠ ᠠᠮᠵᠢᠯᠲᠠᠲᠠᠢ ᠪᠡᠶᠡᠯᠡᠭᠳᠡᠵᠡᠢ᠃ ᠡᠨᠡ ᠪᠣᠯ ᠡᠷᠳᠡᠨᠢᠲᠣᠬᠲᠠᠬᠤ ᠪᠠᠭᠰᠢ ᠶᠢᠨ ᠨᠢᠭᠡ ᠨᠠᠰᠤᠨ ᠤ ᠠᠵᠢᠯ ᠠᠮᠢᠳᠤᠷᠠᠯ ᠨᠢ ᠬᠥᠮᠦᠰ ᠤᠨ ᠰᠡᠳᠬᠢᠯ ᠳᠤ ᠭᠦᠨ ᠲᠠᠭᠠᠯᠠᠬᠳᠠᠬᠰᠠᠨ ᠤ ᠬᠦᠴᠦᠨ ᠮᠦᠨ᠃       ᠡᠷᠳᠡᠨᠢᠲᠣᠬᠲᠠᠬᠤ ᠪᠠᠭᠰᠢ ᠶᠢᠨ ᠮᠠᠨᠢ ᠭᠡᠭᠡᠨ ᠰᠦᠨᠡᠰᠦ ᠲᠥᠷᠦᠭᠰᠡᠨ ᠨᠤᠲᠤᠭ ᠥᠰᠦᠭᠰᠡᠨ ᠥᠯᠦᠭᠡᠢ — ᠬᠡᠰᠢᠭᠲᠡᠨ ᠨᠤᠲᠤᠭ ᠤᠨ ᠢᠶᠠᠨ ᠠᠷᠢᠭᠤᠨ ᠬᠥᠷᠦᠰᠦᠨ ᠳᠤ ᠠᠮᠤᠷᠯᠠᠩᠭᠤᠢ ᠨᠣᠶᠢᠷᠰᠤᠬᠤ ᠪᠣᠯᠲᠤᠭᠠᠢ︕ ᠡᠷᠳᠡᠨᠢᠲᠣᠬᠲᠠᠬᠤ ᠪᠠᠭᠰᠢ ᠶᠢᠨ ᠮᠠᠨᠢ ᠭᠡᠭᠡᠨ ᠳᠦᠷᠢ ᠨᠤᠲᠤᠭ ᠤᠨ ᠮᠣᠩᠭᠤᠯᠴᠤᠳ ᠤᠨ ᠢᠶᠠᠨ ᠰᠡᠳᠭᠢᠯ ᠳᠤ᠂ ᠮᠥᠨ ᠪᠥᠬᠦᠶᠢᠯᠡ ᠮᠣᠩᠭᠤᠯ ᠲᠤᠭᠤᠷᠭᠠᠲᠠᠨ ᠤ ᠰᠡᠳᠭᠢᠯ ᠳᠤ ᠪᠠᠶᠠᠨᠵᠢᠷᠦᠬᠡ ᠣᠪᠤᠭᠠᠨ ᠤ ᠮᠥᠩᠬᠡ ᠨᠣᠭᠤᠭᠠᠨ ᠨᠠᠷᠠᠰᠦ ᠮᠡᠲᠦ ᠡᠭᠦᠷᠢᠳᠡ ᠰᠦᠨᠳᠡᠷᠯᠡᠨ ᠣᠷᠤᠰᠢᠬᠤ ᠪᠣᠯᠲᠤᠭᠠᠢ︕       ᠯᠠᠪᠯᠠᠬᠰᠠᠨ ᠪᠢᠴᠢᠭ ᠮᠠᠲ᠋ᠧᠷᠢᠶᠠᠯ᠄       额尔敦陶克陶《干部履历表》，中共中央组织部1979年制。       曹都著《尹湛纳希故乡访问记》，内蒙古教育出版社1987？年。       《蒙古族文学简史》（内部发行），中国科学院内蒙古分院语言文学研究所1960年3月。5+243+1页。       ︽ᠢᠨᠵᠠᠨᠨᠠᠰᠢ ᠶᠢᠨ ᠳᠤᠷᠠᠰᠬᠠᠯ ᠤᠨ ᠵᠢᠷᠤᠭ 尹湛纳希纪念画册 YINZANNASHI`S LIFE AND WORK IN PICTURES︾ ，一九八三 呼和浩特。       道布《20世纪的中国蒙古语族语言研究》，中国社会科学院学术委员文库《道布文集》，上海辞书出版社2005年版，第320-361页。       ᠢᠨᠵᠠᠨᠨᠠᠰᠢ ᠶᠢᠨ ︽ᠨᠢᠭᠡᠨ ᠳᠠᠪᠬᠤᠷ ᠠᠰᠠᠷ︾᠂ ︽ᠤᠯᠠᠭᠠᠨ᠎ᠠ ᠤᠬᠢᠯᠠᠬᠤ ᠲᠢᠩᠬᠢᠮ︾᠂ ︽ᠬᠥᠬᠡ ᠰᠤᠳᠤᠷ︾᠂ ︽ᠤᠯᠠᠭᠠᠨ ᠡᠭᠦᠯᠡᠨ ᠤ ᠨᠢᠯᠪᠤᠰᠦ︾᠂ ︽ᠬᠥᠬᠡ ᠰᠤᠳᠤᠷ ᠤᠨ ᠨᠥᠬᠦᠪᠦᠷᠢ︾ ᠵᠡᠷᠭᠡ ᠨᠣᠮ ᠵᠣᠬᠢᠶᠠᠯ ᠤᠳ᠃       ᠡᠷᠳᠡᠨᠢᠲᠣᠬᠲᠠᠬᠤ ᠪᠠᠭᠰᠢ ᠶᠢᠨ ︽ᠢᠨᠵᠠᠨᠨᠠᠰᠢ︾ ︵1958︶᠂ ︽ᠭᠦᠯᠠᠷᠠᠨᠰᠠ᠂ ᠳᠠᠨᠽᠠᠨᠸᠠᠩᠵᠢᠯ᠂ ᠬᠡᠰᠢᠭᠪᠡᠲᠦ︾ ︵1959︶᠂ ︽ᠣᠷᠴᠢᠨ ᠦᠶ᠎ᠡ ᠶᠢᠨ ᠮᠣᠩᠭᠤᠯ ᠤᠨ ᠠᠯᠳᠠᠷᠲᠦ ᠤᠷᠠᠨ ᠵᠣᠬᠢᠶᠠᠯᠴᠢᠳ︾ ︵1981︶᠂ ︽ᠢᠨᠵᠠᠨᠨᠠᠰᠢ ᠪᠠ ᠲᠡᠭᠦᠨ ᠤ ᠭᠡᠷ ᠤᠨ ᠲᠠᠪᠤᠨ ᠵᠣᠬᠢᠶᠠᠯᠴᠢ︾ ︵1983︶᠂ ︽ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠤ ᠰᠤᠷᠭᠠᠨ ᠬᠥᠮᠦᠵᠢᠯ ᠤᠨ ᠪᠢᠴᠢᠭ ᠮᠠᠲ᠋ᠧᠷᠢᠶᠠᠯ ᠤᠨ ᠡᠮᠬᠢᠳᠭᠡᠯ︾ ︵1983︶᠂ ︽ᠡᠷᠳᠡᠨᠢᠲᠣᠬᠲᠠᠬᠤ ᠶᠢᠨ ᠵᠣᠬᠢᠶᠠᠯ ᠤᠨ ᠲᠡᠭᠦᠪᠤᠷᠢ︾ ︵1988︶ ᠵᠡᠷᠭᠡ ᠨᠣᠮ ᠵᠣᠬᠢᠶᠠᠯ ᠤᠳ᠃ ︽ᠤᠯᠠᠭᠠᠨ ᠪᠠᠷᠰ ︾ ᠰᠡᠳᠭᠦᠯ᠂ ︽ᠬᠥᠬᠡ ᠲᠤᠭ︾ ᠰᠡᠳᠭᠦᠯ ᠳᠡᠭᠡᠷ᠎ᠡ ᠨᠡᠶᠢᠲᠡᠯᠡᠭᠦᠯᠦᠭᠰᠡᠨ ᠵᠠᠷᠢᠮ ᠰᠢᠯᠦᠭ ᠵᠠᠬᠢᠶᠠᠯ ᠤᠳ᠃       ᠪ᠊ · ᠰᠡᠴᠡᠨᠪᠠᠭᠠᠲᠤᠷ ᠡᠮᠬᠢᠳᠭᠡᠨ ᠨᠠᠶᠢᠷᠠᠭᠤᠯᠤᠬᠰᠠᠨ ︽ᠮᠣᠩᠭᠤᠯ ᠬᠡᠯᠡᠨ ᠤ ᠰᠢᠨᠵᠢᠯᠡᠯ ᠤᠨ ᠳᠤᠷᠠᠰᠬᠠᠯ ᠪᠢᠴᠢᠭ︾ ︵ᠬᠤᠶᠠᠷ︶᠂ ᠥᠪᠦᠷ ᠮᠣᠩᠭᠤᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ 1986 ᠣᠨ᠃ 332-454᠃       ᠡᠷᠳᠡᠮᠲᠦ ︽ᠥᠪᠦᠷ ᠮᠣᠩᠭᠤᠯ ᠤᠨ ᠨᠡᠶᠢᠭᠡᠮ ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠠᠺᠠᠳᠧᠮᠢ ᠶᠢᠨ ᠠᠵᠢᠯ ᠤᠨ ᠠᠮᠠᠷᠠᠯᠲᠠ ᠠᠪᠤᠬᠰᠠᠨ ᠳᠣᠷᠤᠩᠭ᠎ᠠ ᠪᠠᠭᠰᠢ ᠶᠢ ᠰᠣᠷᠪᠣᠯᠵᠢᠯᠠᠬᠰᠠᠨ ᠲᠡᠮᠳᠡᠭᠯᠡᠯ︾᠂ 2009 ᠣᠨ ᠤ       ᠡᠷᠳᠡᠮᠲᠦ ︽ᠥᠪᠦᠷ ᠮᠣᠩᠭᠤᠯ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠠᠵᠢᠯ ᠤᠨ ᠠᠮᠠᠷᠠᠯᠲᠠ ᠪᠠᠨ ᠠᠪᠤᠬᠰᠠᠨ ᠪᠠ᠊ · ᠭᠡᠷᠡᠯᠲᠦ ᠫᠷᠤᠹᠧᠰᠰᠣᠷ ᠢ ᠰᠣᠷᠪᠣᠯᠵᠢᠯᠠᠬᠰᠠᠨ ᠲᠡᠮᠳᠡᠭᠯᠡᠯ︾᠂ 2009 ᠣᠨ ᠤ 9 ᠰᠠᠷ᠎ᠠ ᠶᠢᠨ 26᠎ ᠤ ᠡᠳᠦᠷ᠃       ᠡᠷᠳᠡᠮᠲᠦ ︽ᠥᠪᠦᠷ ᠮᠣᠩᠭᠤᠯ ᠤᠨ ᠮᠣᠩᠭᠤᠯ ᠬᠡᠯᠡ ᠪᠢᠴᠢᠭ ᠤᠨ ᠲᠤᠰᠬᠠᠢ ᠮᠡᠷᠭᠡᠵᠢᠯ ᠤᠨ ᠰᠤᠷᠭᠠᠭᠤᠯᠢ ᠶᠢᠨ ᠠᠵᠢᠯ ᠤᠨ ᠠᠮᠠᠷᠠᠯᠲᠠ ᠪᠠᠨ ᠠᠪᠤᠬᠰᠠᠨ ᠪᠥᠷᠢᠨ ᠪᠠᠭᠰᠢ ᠶᠢ ᠰᠣᠷᠪᠤᠯᠵᠢᠯᠠᠬᠰᠠᠨ ᠲᠡᠮᠳᠡᠭᠯᠡᠯ︾᠂ 2009 ᠣᠨ ᠤ 9 ᠰᠠᠷ᠎ᠠ ᠶᠢᠨ 26᠎ ᠤ ᠡᠳᠦᠷ᠃       ᠡᠷᠳᠡᠮᠲᠦ ︽ᠥᠪᠦᠷ ᠮᠣᠩᠭᠤᠯ ᠤᠨ ᠦᠨᠳᠦᠰᠦᠲᠡᠨ ᠤ ᠬᠡᠷᠡᠭ ᠡᠷᠬᠢᠯᠡᠬᠦ ᠺᠣᠮᠢᠰ ᠤᠨ ᠠᠵᠢᠯ ᠤᠨ ᠠᠮᠠᠷᠠᠯᠲᠠ ᠎ ᠪᠠᠨ ᠠᠪᠤᠬᠰᠠᠨ ᠡᠦ ᠵᠢᠶᠦ᠋ᠨ ᠹᠧᠩ ᠪᠠᠭᠰᠢ ᠶᠢ ᠰᠣᠷᠪᠣᠯᠵᠢᠯᠠᠬᠰᠠᠨ ᠲᠡᠮᠳᠡᠭᠯᠡᠯ︾᠂ 2009 ᠣᠨ ᠤ 10 ᠰᠠᠷ᠎ᠠ ᠶᠢᠨ 12᠎ ᠤᠨ ᠡᠳᠦᠷ᠃       ᠡᠷᠳᠡᠮᠲᠦ ︽ᠥᠪᠦᠷ ᠮᠣᠩᠭᠤᠯ ᠤᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠᠨ ᠤ ᠠᠵᠢᠯ ᠤᠨ ᠠᠮᠠᠷᠠᠯᠲᠠ ᠪᠠᠨ ᠠᠪᠤᠬᠰᠠᠨ ᠷᠠᠰᠢᠳᠣᠩᠷᠤᠪ ᠪᠠᠭᠰᠢ ᠶᠢ ᠰᠣᠷᠪᠣᠯᠵᠢᠯᠠᠬᠰᠠᠨ ᠲᠡᠮᠳᠡᠭᠯᠡᠯ︾᠂ 2009 ᠣᠨ ᠤ 10 ᠰᠠᠷ᠎ᠠ ᠶᠢᠨ 11᠎ ᠤ ᠡᠳᠦᠷ᠃       ᠡᠷᠳᠡᠮᠲᠦ ︽ᠥᠪᠦᠷ ᠮᠣᠩᠭᠤᠯ ᠤᠨ ᠡᠳᠦᠷ ᠤᠨ ᠰᠣᠨᠢᠨ ᠤ ᠬᠤᠷᠢᠶᠠᠨ ᠤ ᠠᠵᠢᠯ ᠤᠨ ᠠᠮᠠᠷᠠᠯᠲᠠ ᠪᠠᠨ ᠠᠪᠤᠬᠰᠠᠨ ᠳᠤᠭᠠᠷᠰᠦ᠋ᠷᠦᠩ ᠪᠠᠭᠰᠢ ᠶᠢ ᠰᠣᠷᠪᠣᠯᠵᠢᠯᠠᠬᠰᠠᠨ ᠲᠡᠮᠳᠡᠭᠯᠡᠯ︾᠂ 2009 ᠣᠨ ᠤ 10 ᠰᠠᠷ᠎ᠠ ᠶᠢᠨ 12᠎ ᠤᠨ ᠡᠳᠦᠷ᠃
 
ᠢᠷᠡᠯᠲᠡ᠄ ᠬᠡᠰᠢᠭᠳᠡᠨ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠬᠡᠰᠢᠭᠳᠡᠨ ᠭᠦᠡᠭ ᠷᠤᠯᠭᠠᠷᠵᠠᠪ
ᠭᠤᠩᠴᠣᠭᠰᠡᠷᠡᠩ ᠠᠪᠣᠷᠭᠤ
ᠴ᠊ · ᠬᠡᠰᠢᠭᠳᠦᠬᠳᠠᠬᠤ ᠪᠠᠭᠰᠢ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号