ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠴᠤᠶᠢᠵᠢᠡᠤᠳᠰᠠᠷ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019/1/10
       ᠴᠣᠶᠢᠵᠢᠠᠣᠳᠰᠠᠷ ︵ᠪᠠᠷᠤᠭ 1260 — ᠪᠠᠷᠤᠭ 1320︶᠄ ᠬᠡᠯᠡ ᠪᠢᠴᠢᠭ ᠤᠨ ᠡᠷᠳᠡᠮᠳᠡᠨ᠂ ᠭᠠᠷᠮᠠᠭᠠᠢ ᠣᠷᠴᠢᠭᠤᠯᠤᠭᠴᠢ᠂ ᠭᠦᠨ ᠤᠬᠠᠭᠠᠨᠳᠠᠨ᠂ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠪᠦᠭᠡᠳ ᠮᠣᠩᠭᠤᠯ ᠤᠨ ᠰᠣᠶᠤᠯ ᠤᠨ ᠡᠷᠬᠢᠮ ᠵᠢᠳᠭᠦᠯᠲᠡᠨ ᠮᠥᠨ᠃ ᠪᠠᠷᠤᠭ1260 ᠤᠨ ᠤ ᠦᠶ᠎ᠡ ᠪᠠᠷ ᠰᠢᠨᠵᠢᠶᠠᠩ᠂ ᠲᠦᠪᠡᠳ᠂ ᠬᠦᠬᠡᠨᠠᠭᠤᠷ ᠭᠤᠷᠪᠠᠨ ᠤᠷᠤᠨ ᠤ ᠠᠭᠤᠯᠵᠠᠷ ᠲᠤ ᠨᠤᠳᠤᠭᠯᠠᠵᠤ ᠪᠠᠶᠢᠭᠰᠠᠨ ᠪᠦᠭᠡᠳ ᠪᠤᠷᠬᠠᠨ ᠤ ᠨᠤᠮ ᠢ ᠬᠦᠨ ᠪᠢᠰᠢᠯᠭᠠᠵᠤ᠂ ᠰᠢᠳᠢ ᠶᠢ ᠤᠯᠤᠭᠰᠠᠨ ᠱᠢᠷᠳᠡᠭᠡᠪᠡ ᠵᠠᠯᠠᠭᠤ ᠭᠡᠷᠡᠯ ᠭᠡᠳᠡᠭ ᠬᠦᠮᠦᠨ ᠤ ᠭᠡᠷ ᠲᠤ ᠲᠦᠷᠦᠵᠡᠢ᠃ ᠲᠡᠭᠦᠨ ᠤ ᠪᠠᠭ᠎ᠠ ᠶᠢᠨ ᠨᠡᠷ᠎ᠡ ᠨᠢ ᠳ᠋ᠠᠮᠢᠳᠳᠤᠷᠵᠢ ᠭᠡᠳᠡᠭ ᠪᠦᠭᠡᠳ ᠲᠤᠶᠢᠨ ᠪᠤᠯᠤᠭᠰᠠᠨ ᠤ ᠬᠤᠶᠢᠨ᠎ᠡ ᠴᠤᠶᠢᠵᠢᠠᠤᠳᠰᠠᠷ ᠭᠡᠮᠡᠨ ᠨᠡᠷᠡᠯᠡᠪᠡ᠃ ᠤᠯᠤᠰ ᠤᠨ ᠪᠠᠭᠰᠢ ᠪᠠᠶᠢᠭᠰᠠᠨ ᠫᠠᠭᠪᠠ ᠲᠡᠭᠦᠨ ᠤ ᠨᠡᠷ᠎ᠡ ᠶᠢ ᠴᠤᠶᠢᠬᠦᠠᠤᠳᠰᠠᠷ ᠭᠡᠵᠦ ᠬᠠᠯᠠᠨ ᠦᠩᠭᠡᠷᠡᠭᠰᠡᠨ ᠪᠦᠭᠡᠳ ᠵᠠᠷᠢᠮ ᠨᠤᠮ ᠰᠤᠳᠤᠷ ᠲᠤ ᠪᠠᠰᠠ ︽ᠨᠤᠮ ᠤᠨ ᠭᠡᠷᠡᠯ — ᠨᠤᠮᠤᠨᠬᠡᠷᠡᠯ︾ ᠭᠡᠵᠦ ᠤᠷᠴᠢᠭᠤᠯᠤᠨ ᠠᠪᠤᠭᠰᠠᠨ ᠪᠠᠶᠢᠳᠠᠭ ᠶᠤᠮ᠃1265 ᠣᠨ ᠳᠤ ᠴᠤᠶᠢᠵᠢᠠᠤᠳᠰᠠᠷ ᠳᠠᠪᠤᠨ ᠨᠠᠰᠤᠳᠠᠢ ᠳᠤ ᠪᠠᠨ ᠰᠦᠮ᠎ᠡ ᠳᠤ ᠰᠠᠭᠤᠵᠤ ᠰᠤᠷᠤᠭᠠᠳ᠂1295 ᠤᠨ ᠪᠤᠯᠬᠤ ᠳᠤ ᠡᠷᠳᠡᠮ ᠨᠤᠮ ᠳᠤ ᠶᠡᠬᠡᠳᠡ ᠴᠠᠭᠠᠷᠠᠵᠤ᠂ ᠳᠠᠪᠤᠨ ᠤᠬᠠᠭᠠᠨ ᠳᠤ ᠨᠡᠪᠲᠡᠷᠡᠭᠡᠳ ᠪᠠᠷᠠᠭᠤᠨ ᠲᠦᠪᠡᠳ ᠎ ᠲᠤ ᠠᠯᠳᠠᠷᠰᠢᠵᠡᠢ᠃1295 ᠤᠨ ᠳᠤ᠂ ᠦᠯᠵᠡᠶᠢᠲᠦ ᠬᠠᠭᠠᠨ ᠳᠡᠮᠦᠷ ᠤᠨ ᠤᠷᠢᠯᠭ᠎ᠠ ᠪᠠᠷ ᠮᠣᠩᠭᠤᠯ ᠳᠤ ᠢᠷᠡᠵᠦ ᠱᠠᠰᠳᠢᠷ᠂ ᠰᠣᠳᠣᠷ ᠳ᠋ᠠᠨᠳᠠᠷᠢᠰ᠂ ︽ᠪᠤᠳᠢᠴᠠᠷ᠎ᠠ — ᠠᠸᠠᠳᠠᠷ᠎ᠠ︾ ᠵᠡᠷᠭᠡ ᠤᠯᠠᠨ ᠨᠤᠮ ᠪᠢᠴᠢᠭ ᠢ ᠤᠷᠴᠢᠭᠤᠯᠵᠤ ᠨᠠᠶᠢᠷᠠᠭᠤᠯᠪᠠ᠃ ︽ᠪᠤᠳᠢᠴᠠᠷ᠎ᠠ — ᠠᠸᠠᠳᠠᠷ᠎ᠠ︾ ᠭᠡᠳᠡᠭ ᠨᠤᠮ ᠢ ᠡᠨᠡᠳᠬᠡᠭ ᠤᠨ ᠵᠤᠬᠢᠶᠠᠯᠴᠢ ᠱᠠᠨᠲ᠋ᠢᠳᠢᠪᠠ ᠳᠤᠯᠤᠳᠤᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠳᠤ ᠪᠢᠴᠢᠭᠰᠡᠨ ᠪᠦᠭᠡᠳ1305 ᠤᠨ ᠳᠤ ᠴᠤᠶᠢᠵᠢᠠᠤᠳᠰᠠᠷ ᠳᠤᠰ ᠨᠤᠮ ᠢ ᠮᠣᠩᠭᠤᠯ ᠬᠡᠯᠡᠨ ᠳᠤ ᠰᠢᠯᠦᠭᠯᠡᠨ ᠤᠷᠴᠢᠭᠤᠯᠪᠠ᠃ ᠪᠤᠳᠢᠴᠠᠷ᠎ᠠ — ᠠᠸᠠᠳᠠᠷ᠎ᠠ ᠭᠡᠳᠡᠭ ᠨᠢ ᠮᠣᠩᠭᠤᠯ ᠢᠶᠠᠷ ︽ᠪᠤᠳᠢᠰᠠᠳ᠋ᠸ᠎ᠠ ᠨᠠᠷ ᠤᠨ ᠶᠠᠪᠤᠳᠠᠯ ᠳᠤ ᠤᠷᠤᠬᠤ︾ ᠭᠡᠰᠡᠨ ᠤᠳᠬ᠎ᠠ ᠲᠠᠢ᠃ ᠳᠠᠷᠤᠢ ᠠᠷᠢᠭᠤᠨ ᠰᠠᠶᠢᠬᠠᠨ ᠰᠡᠳᠬᠢᠯᠲᠡᠨ ᠪᠤᠯᠵᠤ᠂ ᠠᠮᠢᠲᠡᠨ ᠳᠤ ᠳᠤᠰᠠ ᠶᠢ ᠬᠦᠷᠭᠡᠭᠡᠳ ᠪᠤᠷᠬᠠᠨ ᠪᠤᠯᠬᠤ ᠵᠠᠮ ᠳᠤ ᠤᠷᠤᠬᠤ ᠰᠤᠷᠭᠠᠯ ᠤᠨ ᠴᠢᠨᠠᠷ ᠲᠠᠢ ᠬᠦᠨ ᠤᠬᠠᠭᠠᠨ ᠤ ᠵᠤᠬᠢᠶᠠᠯ ᠪᠤᠯᠤᠨ᠎ᠠ᠃ 1308 —1311 ᠤᠨ ᠤ ᠬᠤᠭᠤᠷᠤᠨᠳᠤ ᠬᠠᠶᠢᠰᠠᠩ ᠬᠦᠯᠦᠭ ᠬᠠᠭᠠᠨ ᠳᠤ ᠬᠦᠨᠳᠦ ᠬᠡᠷᠡᠭᠯᠡᠭᠳᠡᠵᠦ᠂ ︽ᠪᠠᠨᠵᠠᠷᠠᠭᠴᠠ︾ ︵ᠳᠠᠪᠤᠨ ᠰᠠᠬᠢᠶ᠎ᠠ︶ ᠵᠡᠷᠭᠡ ᠶᠢ ᠤᠷᠴᠢᠭᠤᠯᠵᠤ᠂ ︽ᠪᠤᠳᠢᠴᠠᠷ᠎ᠠ — ᠠᠸᠠᠳᠠᠷ᠎ᠠ ᠶᠢᠨ ᠳᠠᠶᠢᠯᠪᠤᠷᠢ︾ ᠪᠠ ︽ᠵᠢᠷᠦᠬᠡᠨ ᠤ ᠲᠤᠯᠳᠤ︾ ᠵᠡᠷᠭᠡ ᠨᠤᠮ ᠢᠶᠠᠨ ᠪᠢᠴᠢᠭᠡᠳ ᠶᠡᠭᠡ ᠨᠡᠶᠢᠰᠯᠡᠯ ᠳ᠋ᠠ ᠳ᠋ᠦ᠋ ︵ᠪᠡᠭᠡᠵᠢᠩ︶᠎ ᠳᠤ ᠬᠡᠪᠯᠡᠭᠦᠯᠵᠡᠢ᠃1312 ᠤᠨ ᠤ10 ᠰᠠᠷ᠎ᠠ ᠳᠤ ᠴᠤᠶᠢᠵᠢᠠᠤᠳᠰᠠᠷ ᠪᠤᠶᠠᠨᠲᠤ ᠬᠠᠭᠠᠨ ᠤ ᠰᠢᠳᠠᠷ ᠯᠠᠮᠠ ᠪᠤᠯᠵᠤ᠂ ᠤᠯᠤᠰ ᠤᠨ ᠪᠠᠭᠰᠢ ᠡᠷᠭᠦᠮᠵᠢᠯᠡᠭᠳᠡᠪᠡ᠃ ᠴᠤᠶᠢᠵᠢᠠᠤᠳᠰᠠᠷ ᠪᠤᠯ ᠮᠣᠩᠭᠤᠯ ᠬᠡᠯᠡᠨ ᠵᠦᠢ᠂ ᠠᠪᠢᠶᠠᠨ ᠤ ᠵᠦᠢ᠂ ᠦᠭᠡᠰ ᠤᠨ ᠰᠠᠩ ᠤᠨ ᠰᠤᠳᠤᠯᠤᠯ ᠳᠤ ᠴᠦᠮ ᠠᠩᠬ᠎ᠠ ᠠᠯᠬᠤᠮ ᠤᠨ ᠰᠠᠭᠤᠷᠢ ᠶᠢ ᠳᠠᠯᠪᠢᠵᠤ ᠦᠭᠬᠦᠭᠰᠡᠨ ᠬᠦᠮᠦᠨ ᠶᠤᠮ᠃ ᠲᠠᠷᠡ ᠫᠠᠭᠪᠠ ᠯᠠᠮᠠ ᠶᠢᠨ ᠵᠤᠬᠢᠶᠠᠭᠰᠠᠨ ᠲᠦᠷᠪᠡᠯᠵᠢᠨ ᠦᠰᠦᠭ ᠢ ︽ᠪᠤᠷᠬᠠᠨ ᠤ ᠨᠤᠮ ᠢ ᠤᠷᠴᠢᠭᠤᠯᠵᠤ ᠡᠰᠡ ᠪᠤᠯᠤᠭᠰᠠᠨ︾ ᠭᠡᠳᠡᠭ ᠨᠡᠷ᠎ᠡ ᠪᠠᠷ ᠤᠷᠭᠢᠭᠤᠯᠤᠭᠰᠠᠨ ᠪᠦᠭᠡᠳ ᠤᠶᠢᠭᠤᠷᠵᠢᠨ ᠮᠣᠩᠭᠤᠯ ᠦᠰᠦᠭ ᠢ ᠴᠦ ᠨᠢᠭᠡ ᠠᠯᠬᠤᠮ ᠰᠢᠨᠡᠴᠢᠯᠡᠨ ᠰᠠᠶᠢᠵᠢᠷᠠᠭᠤᠯᠵᠡᠢ᠃ ᠲᠡᠷᠡ ᠤᠶᠢᠭᠤᠷ ᠦᠰᠦᠭ ᠤᠨ ᠳᠤᠳᠠᠭᠤ ᠶᠢ ᠨᠦᠬᠦᠵᠦ᠂ ᠮᠣᠩᠭᠤᠯ ᠦᠰᠦᠭ ᠲᠤ ᠪᠠᠶᠢᠭᠰᠠᠨ ᠦᠭᠡᠢ ᠤᠳᠤᠬᠢ ︽ᠫ᠊᠂ ᠱ᠊  ︾᠎ ᠢ ᠨᠡᠮᠡᠨ ᠵᠤᠬᠢᠶᠠᠵᠤ᠂ ︽ᠵ᠊᠂ ᠶ᠊︾᠎ ᠤᠨ ᠲᠦᠷᠰᠦ ᠶᠢ ᠰᠠᠯᠭᠠᠨ᠂ ᠨᠡᠶᠢᠲᠡ123 ᠦᠶᠡᠲᠦ ᠦᠰᠦᠭ ᠪᠤᠯᠭᠠᠨ ᠵᠢᠭᠰᠠᠭᠠᠭᠠᠳ᠂ ᠠᠩᠬ᠎ᠠ ᠠᠯᠬᠤᠮ ᠮᠣᠩᠭᠤᠯ ᠬᠡᠯᠡᠨ ᠳᠤ ᠬᠡᠷᠡᠭᠯᠡᠭᠳᠡᠭᠦ ᠴᠠᠭᠠᠨ ᠲᠤᠯᠤᠭᠠᠢ ᠶᠢᠨ ᠦᠰᠦᠭ ᠢ ᠪᠦᠷᠢᠯᠳᠦᠬᠦᠯᠵᠦ᠂ ᠮᠣᠩᠭᠤᠯ ᠬᠡᠯᠡᠨ ᠤ ᠦᠭᠡᠰ ᠤᠨ ᠤᠳᠬ᠎ᠠ ᠶᠢ ᠢᠯᠭᠠᠬᠤ ᠳᠤ ᠬᠡᠷᠡᠭᠯᠡᠭᠳᠡᠭᠦ ᠭᠤᠤᠯ ᠠᠪᠢᠶ᠎ᠠ ︵ᠠᠪᠢᠶᠠᠯᠠᠪᠤᠷᠢ︶᠎ ᠨᠤᠭᠤᠳ ᠢ ᠢᠯᠡᠷᠬᠡᠶᠢᠯᠡᠭᠰᠡᠨ ᠦᠰᠦᠭ ᠤᠨ ᠰᠢᠰᠲ᠋ᠧᠮ ᠢ ᠦᠭᠡᠷᠡᠴᠢᠯᠡᠨ ᠵᠤᠬᠢᠶᠠᠪᠠ᠃ ᠴᠤᠶᠢᠵᠢᠠᠤᠳᠰᠠᠷ ᠡᠩ ᠲᠡᠷᠢᠬᠦᠨ ᠳᠤ᠂ ᠮᠣᠩᠭᠤᠯ ᠦᠰᠦᠭ ᠢ ᠴᠢᠩᠭ᠎ᠠ᠂ ᠬᠦᠨᠳᠡᠢ᠂ ᠰᠠᠭᠠᠷᠮᠠᠭ ᠭᠡᠵᠦ ᠭᠤᠷᠪᠠ ᠬᠤᠪᠢᠶᠠᠭᠰᠠᠨ ᠪᠦᠭᠡᠳ ᠮᠣᠩᠭᠤᠯ ᠬᠡᠯᠡᠨ ᠤ ᠠᠪᠢᠶ᠎ᠠ ᠵᠤᠬᠢᠴᠠᠬᠤ ᠶᠤᠰᠤ ᠶᠢ ᠠᠩᠬ᠎ᠠ ᠠᠯᠬᠤᠮ ᠵᠦᠪ ᠳᠠᠶᠢᠯᠪᠤᠷᠢᠯᠠᠵᠠᠢ ᠃ ᠲᠡᠷᠡ ᠪᠠᠰᠠ ᠡᠨᠡᠳᠬᠡᠭ ᠬᠡᠯᠡᠨ ᠤ ᠰᠢᠨᠵᠢᠯᠡᠯ ᠤᠨ ᠮᠠᠬᠠᠪᠤᠳ ᠢᠶᠠᠷ ᠢᠯᠭᠠᠬᠤ ᠵᠡᠷᠭᠡ ᠵᠢᠷᠤᠮ ᠭᠤᠷᠢᠮ ᠢ ᠠᠰᠢᠭᠯᠠᠵᠤ᠂ ᠮᠣᠩᠭᠤᠯ ᠬᠡᠯᠡᠨ ᠤ ᠠᠪᠢᠶᠠᠯᠠᠪᠤᠷᠢ ᠶᠢ ᠨᠡᠯᠢᠶᠡᠳ ᠤᠨᠤᠪᠴᠢᠲᠡᠢ ᠳᠠᠶᠢᠯᠪᠤᠷᠢᠯᠠᠭᠰᠠᠨ ᠶᠤᠮ᠃ ᠴᠣᠶᠢᠵᠢᠠᠤᠳᠰᠠᠷ ︽ᠳᠠᠭᠤᠳᠠᠬᠤᠢ ᠶᠢᠨ ᠲᠡᠶᠢᠨ ᠢᠯᠭᠠᠯ ᠯᠤᠭ᠎ᠠ ᠬᠠᠮᠳᠤ︾ ᠨᠠᠢᠮᠠᠨ ᠳᠠᠶᠢᠨ ᠢᠯᠭᠠᠯ ᠭᠠᠷᠭᠠᠭᠰᠠᠨ ᠪᠦᠭᠡᠳ ᠳᠠᠶᠢᠨ ᠢᠯᠭᠠᠯ ᠤᠨ ᠳᠠᠭᠠᠪᠤᠷᠢ ᠳᠠᠭᠠᠭᠤᠯᠬᠤ ᠲᠦᠷᠢᠮ ᠢ ᠨᠡᠯᠢᠶᠡᠳ ᠰᠠᠶᠢᠨ ᠵᠠᠳᠠᠯᠤᠨ ᠰᠢᠨᠵᠢᠯᠡᠭᠰᠡᠨ ᠪᠠᠶᠢᠯ᠎ᠠ᠃ ᠴᠤᠶᠢᠵᠢᠠᠤᠳᠰᠠᠷ ᠪᠠᠰᠠ ᠦᠰᠦᠭ ᠤᠨ ᠲᠦᠷᠢᠮ ᠤᠨ ᠵᠦᠪ ᠪᠢᠴᠢᠯᠭᠡ᠂ ᠵᠦᠪ ᠳᠠᠭᠤᠳᠠᠯᠭ᠎ᠠ ᠶᠢᠨ ᠳᠠᠯ᠎ᠠ ᠎ ᠪᠠᠷ ᠨᠠᠷᠢᠨ ᠲᠦᠷᠢᠮ ᠪᠤᠯᠪᠠᠰᠤᠷᠠᠭᠤᠯᠵᠤ᠂ ᠮᠦᠷᠳᠡᠯᠭᠡ ᠪᠠᠷᠢᠮᠳᠠᠯᠠᠯ ᠪᠤᠯᠬᠤ ︽ᠭᠤᠤᠯ ᠶᠤᠰᠤᠨ︾᠎ ᠢ ᠨᠠᠬᠡᠬᠡᠵᠡᠢ᠃ ᠲᠡᠭᠦᠨ ᠤ ᠲᠡᠷᠡ ︽ᠳᠤᠮᠳᠠᠳᠤ ᠰᠤᠯᠠ ᠪᠠᠷ ᠡᠬᠢ ᠠᠳᠠᠭ ᠢ ᠮᠡᠳᠡᠬᠦᠢ︔ ᠠᠯᠳᠠᠷᠰᠢᠭᠰᠠᠨ ᠢᠶᠠᠷ ᠮᠡᠳᠡᠬᠦᠢ︔ ᠳᠡᠪᠢᠰᠭᠡᠷ ᠢᠶᠠᠷ ᠮᠡᠳᠡᠬᠦᠢ︔ ᠤᠳᠬᠠᠰ ᠤᠨ ᠬᠦᠴᠦᠨ ᠢᠶᠠᠷ ᠢᠯᠭᠠᠨ ᠳᠤᠳᠤᠯᠠᠬᠤᠢ︾ ᠵᠡᠷᠭᠡ ᠲᠦᠷᠪᠡᠨ ᠵᠠᠷᠴᠢᠮ ᠪᠤᠯ ᠬᠡᠷᠡᠭ ᠳᠡᠭᠡᠷ᠎ᠡ ᠪᠠᠨ ᠮᠣᠩᠭᠤᠯ ᠬᠡᠯᠡᠨ ᠤ ᠦᠰᠦᠭ ᠤᠨ ᠲᠦᠷᠢᠮ ᠤᠨ ᠦᠭᠡ ᠶᠢᠨ ᠵᠦᠢ᠂ ᠠᠪᠢᠶᠠᠨ ᠤ ᠵᠦᠢ ᠪᠠ ᠤᠯᠠᠮᠵᠢᠯᠠᠯ ᠤᠨ ᠪᠤᠶᠤ ᠲᠡᠦᠬᠡᠨ ᠤ ᠵᠡᠷᠭᠡ ᠭᠤᠤᠯ ᠵᠡᠷᠴᠢᠮ ᠤᠳ ᠪᠤᠯᠤᠨ᠎ᠠ᠃ ᠡᠭᠦᠨ ᠳᠤ ᠲᠦᠷᠰᠦ ᠢᠯᠭᠠᠬᠤ ᠵᠡᠷᠭᠡ ᠲᠦᠷᠢᠮ ᠢ ︽ᠡᠳ᠋︾ ᠦᠭᠡ ᠪᠠᠷ ᠡᠰᠢᠯᠡᠨ ᠳᠠᠶᠢᠯᠪᠦᠷᠢᠯᠠᠪᠠ᠃ ᠲᠡᠭᠦᠨ ᠤ ᠲᠤᠭᠳᠠᠭᠠᠭᠰᠠᠨ ︽ᠠᠨ ᠠᠪ ᠠᠭ ᠠᠮ ᠠᠢ ᠠᠷ ᠠᠳ ᠠᠤ ᠬᠢᠭᠡᠳ ᠠᠩ ᠯᠤᠭ᠎ᠠ ᠠᠷᠪᠠᠨ ᠨᠢᠭᠡᠨ ᠳ᠋ᠠᠩ ᠳᠡᠪᠢᠰᠭᠡᠷ︾ ᠪᠠ ︽ᠠᠶᠢᠯ︾᠂ ︽ᠡᠶᠢᠨ︾ ᠬᠡᠬᠦ ᠮᠡᠳᠦ ᠳᠠᠪᠬᠤᠷ ᠳᠡᠪᠢᠰᠭᠡᠷ ᠪᠠᠶᠢᠬᠤ ᠶᠢ ᠳᠤᠳᠤᠯᠠᠨ ︽ᠳᠡᠪᠢᠰᠭᠡᠷᠯᠡᠬᠦᠢ ᠶᠤᠰᠤᠨ︾ ᠠᠨᠤ ᠡᠳᠦᠭᠡ ᠴᠦ ᠭᠡᠰᠡᠨ ᠮᠡᠰᠢ ᠶᠡᠭᠡ ᠰᠤᠳᠤᠯᠬᠤ ᠠᠴᠢ ᠬᠤᠯᠪᠤᠭᠳᠠᠯ ᠲᠠᠢ ᠪᠠᠶᠢᠭᠰᠠᠭᠠᠷ ᠪᠠᠶᠢᠨ᠎ᠠ᠃ ᠴᠤᠶᠢᠵᠢᠠᠤᠳᠰᠠᠷ ᠮᠣᠩᠭᠤᠯ ᠪᠢᠴᠢᠭ ᠤᠨ ᠬᠡᠯᠡ ᠶᠢ ᠠᠩᠬ᠎ᠠ ᠲᠦᠷᠢᠮᠵᠢᠭᠦᠯᠵᠦ᠂ ︽ᠭᠠᠨᠵᠤᠤᠷ︾᠂ ︽ᠳ᠋ᠠᠨᠵᠤᠤᠷ︾ ᠵᠡᠷᠭᠡ ᠠᠪᠤᠷᠭᠤ ᠲᠤᠮᠤ ᠨᠤᠮ ᠰᠤᠳᠤᠷ ᠎ ᠤᠳ ᠢ ᠤᠷᠴᠢᠭᠤᠯᠵᠤ ᠳᠠᠶᠢᠯᠪᠤᠷᠢᠯᠠᠬᠤ᠂ ᠲᠡᠭᠦᠨᠴᠢᠯᠡᠨ ᠪᠤᠰᠤᠳ ᠨᠤᠮ ᠰᠤᠳᠤᠷ ᠢ ᠨᠠᠶᠢᠷᠠᠭᠤᠯᠤᠨ ᠵᠤᠬᠢᠶᠠᠵᠤ ᠰᠤᠷᠳᠠᠯᠴᠢᠯᠠᠨ ᠳᠡᠯᠭᠡᠷᠡᠬᠦᠯᠬᠦ ᠳᠤ ᠶᠡᠭᠡᠭᠡᠨ ᠭᠠᠪᠢᠶ᠎ᠠ ᠵᠢᠳᠭᠦᠯ ᠭᠠᠷᠭᠠᠵᠤ ᠪᠢᠯᠡ᠃        ᠴᠤᠶᠢᠵᠢᠠᠣᠳᠰᠠᠷ ᠪᠤᠯ ᠮᠣᠩᠭᠤᠯ ᠬᠡᠯᠡᠨ ᠤ ᠤᠤᠭᠠᠨ ᠤᠷᠴᠢᠭᠤᠯᠤᠭᠴᠢ ᠶᠢᠨ ᠨᠢᠭᠡ ᠨᠢ ᠪᠤᠯᠤᠨ᠎ᠠ᠃ ᠲᠡᠷᠡ ᠪᠤᠯ ︽ᠰᠤᠳᠤᠷ ᠲᠠᠷᠨᠢ ᠶᠢ ᠣᠷᠴᠢᠭᠤᠯᠬᠤ ᠵᠢᠷᠤᠮ ᠢ ᠭᠠᠷᠭᠠᠭᠰᠠᠨ︾ ᠣᠷᠴᠢᠭᠤᠯᠭ᠎ᠠ ᠶᠢᠨ ᠣᠬᠠᠭᠠᠨᠳᠠᠨ ᠶᠤᠮ᠃ ᠡᠨᠡᠳᠬᠡᠭ᠂ ᠲᠦᠪᠡᠳ ᠬᠡᠯᠡᠨ ᠠᠴᠠ ᠨᠤᠮ ᠰᠣᠳᠤᠷ ᠤᠷᠴᠢᠭᠤᠯᠬᠤ ᠶᠠᠪᠤᠳᠠᠯ ᠲᠡᠭᠦᠨ ᠤ ᠦᠶ᠎ᠡ ᠠᠴᠠ ᠡᠬᠢᠯᠡᠭᠰᠡᠨ ᠪᠦᠭᠡᠳ ᠵᠦᠪᠬᠡᠨ ᠱᠠᠰᠢᠨ ᠤ ᠨᠤᠮ ᠰᠣᠳᠤᠷ ᠤᠷᠴᠢᠭᠤᠯᠤᠭᠰᠠᠨ ᠪᠢᠰᠢ᠂ ᠬᠠᠷᠢᠨ ᠳᠠᠪᠤᠨ ᠤᠬᠠᠭᠠᠨ ᠤ ᠨᠤᠮ ᠰᠤᠳᠤᠷ ᠢ ᠨᠡᠶᠢᠳᠡᠮ ᠤᠷᠴᠢᠭᠤᠯᠵᠤ ᠳᠡᠯᠭᠡᠷᠡᠭᠦᠯᠦᠭᠰᠡᠨ ᠪᠠᠶᠢᠵᠡᠢ᠃ ᠴᠣᠶᠢᠵᠢᠠᠤᠳᠰᠠᠷ ᠪᠠᠰᠠ ᠪᠤᠳᠤᠯᠭᠠᠳᠠᠨ ᠪᠦᠭᠡᠳ ᠬᠦᠨ ᠤᠬᠠᠭᠠᠨᠳᠠᠨ ᠪᠢᠯᠡ᠃ ᠲᠡᠷᠡ ᠬᠡᠲᠦᠨ ᠦᠶ᠎ᠡ ᠶᠢᠨ ᠬᠠᠭᠠᠳ ᠤᠨ ᠰᠢᠳᠠᠷ ᠯᠠᠮᠠ ᠶᠠᠪᠤᠵᠤ᠂ ᠱᠠᠰᠢᠨ ᠤ ᠵᠠᠩ ᠦᠢᠯᠡ ᠰᠠᠬᠢᠯ ᠰᠠᠨᠸᠠᠷ ᠢ ᠤᠯᠠᠮ ᠪᠦᠷᠢᠨ ᠲᠡᠭᠦᠯᠳᠡᠷ ᠪᠤᠯᠭᠠᠵᠤ᠂ ᠪᠤᠳ᠋ᠳ᠋ᠾᠠ ᠶᠢᠨ ᠱᠠᠰᠢᠨ ᠢ ᠳᠡᠯᠭᠡᠷᠡᠭᠦᠯᠵᠦ᠂ ᠪᠦᠭᠡ ᠮᠦᠷᠬᠦᠯ ᠢ ᠤᠰᠠᠳᠬᠠᠬᠤ ᠪᠠᠷ ᠴᠢᠷᠮᠠᠶᠢᠨ ᠳᠡᠮᠡᠴᠡᠪᠡ᠃ ᠲᠡᠷᠡ ᠪᠤᠯ ᠡᠷᠲᠡᠨ ᠤ ᠡᠨᠡᠳᠭᠡᠭ ᠳ᠋ᠠᠬᠢᠨ ᠤ ᠬᠦᠨ ᠤᠬᠠᠭᠠᠨ ᠪᠤᠯᠤᠨ ᠱᠠᠰᠢᠨ ᠤ ᠬᠦᠨ ᠤᠬᠠᠭᠠᠨ ᠢ ᠰᠤᠳᠤᠯᠤᠨ ᠰᠢᠨᠵᠢᠯᠡᠵᠦ ᠰᠤᠷᠳᠠᠯᠴᠢᠯᠠᠨ ᠨᠡᠪᠳᠡᠷᠡᠭᠦᠯᠵᠦ ᠪᠠᠶᠢᠭᠰᠠᠨ ᠠᠬᠠᠮᠠᠳ ᠡᠷᠳᠡᠮᠳᠡᠨ ᠤ ᠨᠢᠭᠡ ᠨᠢ ᠪᠤᠯᠤᠨ᠎ᠠ᠃ ᠲᠡᠭᠦᠨ ᠤ ᠪᠢᠴᠢᠭᠰᠡᠨ ︽ᠪᠤᠳᠢᠴᠠᠷ᠎ᠠ — ᠠᠸᠠᠳᠠᠷ᠎ᠠ ᠶᠢᠨ ᠳᠠᠶᠢᠯᠪᠤᠷᠢ︾ ᠪᠤᠯ ᠬᠦᠨ ᠤᠬᠠᠭᠠᠨ ︵ᠱᠠᠰᠢᠨ ᠤ ᠬᠦᠨ ᠤᠬᠠᠭᠠᠨᠳᠠᠨ ᠪᠠᠭᠳᠠᠵᠤ ᠪᠤᠢ︶᠎ ᠤ ᠵᠤᠬᠢᠶᠠᠯ ᠪᠤᠯᠬᠤ ᠪᠦᠭᠡᠳ ︽ᠠᠷᠪᠠᠨ ᠬᠤᠶᠠᠷ ᠵᠤᠬᠢᠴᠠᠩᠭᠤᠢ︾᠎ ᠨᠢ ᠴᠦ ᠱᠠᠰᠢᠨ ᠤ ᠬᠦᠨ ᠤᠬᠠᠭᠠᠨ ᠤ ᠨᠡᠯᠢᠶᠡᠳ ᠴᠢᠬᠤᠯᠠ ᠵᠤᠬᠢᠶᠠᠯ ᠪᠤᠯᠬᠤ ᠶᠤᠮ᠃ ᠴᠤᠶᠢᠵᠢᠠᠤᠳᠰᠠᠷ ᠨᠣᠮ ᠵᠤᠬᠢᠶᠠᠯ ᠤᠨ ᠢᠶᠠᠨ ᠳᠠᠬᠢᠨ ᠳᠡᠭᠦᠰᠭᠡᠯ ᠤᠨ ᠦᠭᠡ᠂ ᠤᠷᠴᠢᠭᠤᠯᠭ᠎ᠠ ᠶᠢᠨ ᠳᠠᠶᠢᠯᠪᠤᠷᠢ ᠵᠡᠷᠭᠡ ᠎ ᠶᠢ ᠢᠷᠠᠭᠤ ᠰᠠᠶᠢᠬᠠᠨ ᠢᠶᠠᠷ ᠰᠢᠯᠦᠭᠯᠡᠨ ᠪᠢᠴᠢᠵᠦ ᠪᠠᠶᠢᠭᠰᠠᠨ ᠪᠦᠭᠡᠳ ᠪᠡᠶ᠎ᠡ ᠪᠠᠨ ᠳᠠᠭᠠᠭᠠᠭᠰᠠᠨ ᠳᠤᠰᠬᠠᠢ ᠰᠡᠳᠤᠪ ᠎ ᠲᠠᠢ ᠰᠢᠯᠦᠭ ᠮᠠᠭᠳᠠᠭᠠᠯ ᠢ ᠴᠦ ᠪᠢᠴᠢᠵᠦ ᠪᠠᠶᠢᠪᠠ᠃ ︽ᠶᠡᠭᠡ ᠬᠠᠷ᠎ᠠ ᠢᠲᠡᠭᠡᠯ ᠤᠨ ᠮᠠᠭᠳᠠᠭᠠᠯ︾ ᠪᠠ ︽ᠮᠠᠾᠨᠺᠠᠯᠠ ᠎ ᠶᠢᠨ ᠮᠠᠭᠳᠠᠭᠠᠯ︾ ᠵᠡᠷᠭᠡ ᠨᠢ ᠡᠬᠦᠨ ᠢ ᠳᠤᠳᠤᠷᠬᠠᠶᠢᠯᠠᠵᠤ ᠪᠠᠶᠢᠨ᠎ᠠ᠃ ᠴᠤᠶᠢᠵᠢᠠᠤᠳᠰᠠᠷ ᠵᠢᠷᠠᠭᠠᠳ ᠨᠠᠰᠤᠯᠠᠭᠠᠳ ᠪᠠᠷᠤᠭ1320 ᠤᠨ ᠳᠤ ᠨᠠᠰᠤ ᠪᠠᠷᠠᠵᠠᠢ᠃ ᠴᠤᠶᠢᠵᠢᠠᠤᠳᠰᠠᠷ ᠪᠤᠯ ᠮᠣᠩᠭᠤᠯ᠂ ᠤᠶᠢᠭᠤᠷ᠂ ᠡᠨᠡᠳᠬᠡᠭ ︵ᠰᠠᠨᠰᠺᠷᠢᠲ︶᠂ ᠲᠦᠪᠡᠳ ᠵᠡᠷᠭᠡ ᠤᠯᠠᠨ ᠬᠡᠯᠠᠨ ᠳᠤ ᠨᠡᠪᠳᠡᠷᠡᠭᠰᠡᠨ ᠮᠣᠩᠭᠤᠯ ᠬᠡᠯᠡᠨ ᠤ ᠤᠤᠭᠠᠨ ᠰᠢᠨᠵᠢᠯᠡᠭᠡᠳᠡᠨ ᠪᠤᠯᠬᠤ ᠪᠦᠭᠡᠳ ᠮᠣᠩᠭᠤᠯ ᠦᠨᠳᠤᠰᠤᠲᠡᠨ ᠤ ᠰᠤᠶᠤᠯ ᠤᠨ ᠶᠡᠭᠡ ᠵᠢᠳᠭᠦᠯᠲᠡᠨ ᠪᠤᠯᠬᠤ ᠶᠤᠮ᠃
  
ᠢᠷᠡᠯᠲᠡ᠄ ᠨᠠ᠊ · ᠰᠠᠶᠢᠰᠢᠶᠠᠯᠲᠦ ᠶᠢᠨ ᠡᠷᠬᠢᠯᠡᠨ ᠨᠠᠶᠢᠷᠠᠭᠤᠯᠤᠭᠰᠠᠨ ︽ᠮᠤᠩᠭᠤᠯ ᠤᠷᠠᠨ ᠵᠤᠬᠢᠶᠠᠯ ᠤᠨ ᠳᠡᠦᠭᠡ︾
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠨᠡᠭᠦᠳᠡᠯ ᠤᠨ ᠰᠢᠪᠠᠭᠤᠳ ᠤᠨ ᠥᠷᠳᠡᠭᠡᠯᠡᠨ ᠪᠠᠭᠤᠬᠤ ᠴᠠᠭ ᠢᠶᠠᠨ ᠣᠭᠳᠣᠨ ᠠᠪᠴᠢᠷᠠᠯ᠎ᠠ
ᠭᠡᠰᠢᠭᠲᠡᠨ ᠤ ᠰᠤᠶᠣᠯ᠂ ᠰᠣᠶᠣᠯ ᠤᠨ ︽ᠭᠡᠰᠢᠭᠳᠡᠨ︾ ︵ᠳᠣᠣᠷᠠᠳᠤ︶
ᠭᠡᠰᠢᠭᠲᠡᠨ ᠤ ᠰᠤᠶᠣᠯ᠂ ᠰᠣᠶᠣᠯ ᠤᠨ ︽ᠭᠡᠰᠢᠭᠳᠡᠨ︾ ︵ᠳᠡᠭᠡᠳᠦ︶
ᠬᠤᠨᠢᠨ ᠮᠢᠬᠠᠨ ᠤ ᠬᠤᠷᠢᠨ ᠨᠢᠭᠡᠨ ᠣᠪ
ᠥᠨᠥᠳᠥᠷ ᠬᠠᠪᠤᠷ ᠤᠨ ᠬᠤᠭᠤᠰ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号