ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠡᠵᠢ ᠳᠤᠷᠠᠰᠤᠮᠵᠢ ︵ᠪᠠᠷᠢᠮᠲᠠᠳᠤ ᠨᠠᠶᠢᠷᠠᠭᠤᠯᠤᠯ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019/9/20
                                         —— ᠬᠤᠷᠴᠠ        ᠵᠢᠯ ᠪᠥᠷᠢ ᠶᠢᠨ ᠡᠵᠢ ᠶᠢᠨ ᠪᠠᠶᠠᠷ ᠳᠦᠬᠦᠬᠦ ᠡᠳᠦᠷ ᠤᠳ ᠢᠶᠠᠷ ᠡᠯᠢᠭᠡ ᠵᠢᠷᠦᠬᠡ ᠡᠲᠡᠭᠡᠳ ᠡᠮᠵᠡᠭᠯᠡᠵᠦ᠂ ᠡᠨᠡᠷᠢᠯᠲᠦ ᠡᠵᠢ ᠡᠷᠬᠡ ᠦᠭᠡᠢ ᠦᠭᠡᠶᠢᠯᠡᠭᠳᠡᠨ᠎ᠡ ᠁        ᠬᠤᠶᠠᠷ ᠨᠠᠰᠤ ᠲᠠᠢ ᠲᠠᠭᠠᠨ ᠡᠵᠢ ᠦᠨᠦᠴᠢᠷᠡᠨ᠂ ᠥᠯᠥᠰᠬᠦᠯᠡᠩ ᠤᠨ ᠭᠠᠰᠠᠯᠠᠩ ᠳᠤ ᠤᠨᠠᠵᠦ᠂ ᠬᠠᠷᠠᠬᠠᠨ ᠪᠠᠭ᠎ᠠ ᠠᠴᠠ ᠪᠠᠨ ᠵᠣᠪᠠᠵᠤ ᠵᠤᠲᠠᠷᠠᠬᠤ ᠶᠢᠨ ᠦᠢᠯᠡ ᠲᠠᠢ ᠨᠦᠭᠦᠴᠡᠵᠦ᠂ ᠬᠠᠯᠠ ᠵᠣᠪᠠᠯᠠᠩ ᠢ ᠠᠮᠰᠠᠨ ᠲᠤᠭᠤᠯᠵᠤ ᠥᠰᠦᠭᠰᠡᠨ ᠭᠡᠳᠡᠭ᠃ ᠲᠡᠭᠦᠨ ᠠᠴᠠ ᠯᠠ ᠪᠣᠯᠣᠭᠰᠠᠨ ᠪᠠᠶᠢᠬ᠎ᠠ᠂ ᠡᠵᠢ ᠬᠦᠮᠦᠨ ᠬᠥᠮᠥᠨ ᠠᠴᠠ ᠢᠯᠡᠭᠦᠦ ᠥᠷᠥᠪᠴᠢᠬᠡᠨ ᠰᠡᠳᠬᠢᠯ ᠲᠠᠢ᠂ ᠥᠭᠭᠢᠶᠡᠮᠦᠷ ᠠᠷᠠᠨᠰᠢᠨ ᠲᠠᠢ᠂ ᠤᠶᠠᠷᠠᠮᠠᠲᠠᠭᠠᠢ ᠵᠠᠩ ᠲᠠᠢ᠂ ᠴᠠᠶᠢᠯᠭᠠᠨ ᠬᠦᠮᠦᠨ ᠪᠠᠶᠢᠭᠰᠠᠨ ᠶᠤᠮᠰᠠᠨ᠃ ᠬᠦᠮᠦᠨ ᠤ ᠬᠦᠴᠢᠷ ᠵᠦᠳᠡᠭᠦᠷᠢ ᠶᠢ ᠦᠵᠡᠵᠦ ᠶᠡᠷᠦ ᠲᠥᠪᠳᠡᠳᠡᠭ ᠥᠭᠡᠢ᠂ ᠬᠦᠷᠦᠯᠴᠡᠭᠡ ᠪᠠᠨ ᠰᠢᠪᠬᠠᠵᠤ ᠲᠤᠰᠠᠯᠠᠵᠤ ᠯᠠ ᠪᠠᠶᠢᠳᠠᠭ᠂ ᠵᠠᠮ ᠤᠨ ᠬᠦᠮᠦᠨ ᠲᠡᠨᠦᠭᠦᠯ ᠬᠡᠰᠦᠭᠦᠯ ᠢ ᠴᠤ ᠰᠠᠶᠢᠨ ᠮᠠᠭᠤ ᠶᠢᠨ ᠳᠣᠲᠣᠷ᠎ᠠ ᠢᠳᠡᠭᠦᠯᠵᠦ ᠤᠤᠭᠤᠯᠭᠠᠭᠠᠳ ᠶᠠᠪᠤᠭᠤᠯᠳᠠᠭ᠃ ᠦᠷ ᠤᠨ ᠬᠠᠷᠠᠩᠭᠤᠢ ᠠᠴᠠ ᠥᠳᠡᠰᠢ ᠶᠢᠨ ᠪᠥᠷᠦᠩᠬᠦᠢ ᠬᠦᠷᠲᠡᠯ᠎ᠡ ᠪᠣᠷᠪᠢ ᠪᠣᠬᠢᠰᠭᠢᠯ ᠥᠭᠡᠢ ᠶᠠᠭᠠᠷᠠᠵᠤ᠂ ᠠᠮᠢᠳᠤᠷᠠᠯ ᠠᠬᠤᠢ ᠪᠠᠨ ᠲᠥᠬᠦᠭᠡᠷᠦᠨ᠂ ᠬᠢᠭᠡᠳ ᠳᠠᠭᠤᠰᠤᠰᠢ ᠦᠭᠡᠢ ᠭᠠᠳᠠᠨ᠎ᠠ ᠳᠣᠲᠣᠨ᠎ᠠ ᠠᠵᠢᠯ ᠬᠥᠳᠡᠯᠮᠦᠷᠢ ᠪᠠᠨ ᠠᠬᠤᠢᠢᠯᠠᠵᠦ ᠵᠠᠯᠭᠠᠭᠤᠯᠵᠤ ᠶᠠᠪᠤᠬᠤ ᠳᠠᠭᠠᠨ ᠳᠠᠩᠳᠠ ᠤᠷᠲᠤ ᠪᠣᠭᠤᠨᠢ ᠠᠷᠠᠳ ᠤᠨ ᠳᠠᠭᠤᠤ ᠶᠢ ᠤᠬᠠᠮᠰᠠᠷ ᠲᠠᠢ ᠤᠬᠠᠮᠰᠠᠷ ᠦᠭᠡᠢ ᠶᠢᠨ ᠬᠤᠭᠤᠷᠣᠨᠳᠤ ᠭᠢᠩᠰᠢᠨ ᠳᠠᠭᠤᠯᠠᠵᠤ ᠯᠠ ᠪᠠᠶᠢᠳᠠᠭ ᠵᠠᠩᠰᠢᠯ ᠲᠠᠢ᠃ ᠬᠠᠶᠠ ᠪᠠᠰᠠ ᠳᠠᠭᠤᠦ ᠳᠡᠭᠡᠨ ᠤᠶᠠᠷᠠᠵᠤ᠂ ᠳᠤᠷᠠᠳᠬᠠᠯ ᠳᠠᠭᠠᠨ ᠬᠥᠲᠥᠯᠥᠭᠳᠡᠵᠦ᠂ ᠬᠤᠭᠤᠯᠠᠢ ᠨᠢ ᠡᠷᠢᠶᠡᠨᠲᠦᠨ᠂ ᠳᠠᠭᠤ ᠨᠢ ᠴᠡᠴᠡᠷᠬᠢᠯᠡᠵᠦ᠂ ᠬᠠᠨᠴᠦᠢ ᠪᠠᠷ ᠢᠶᠠᠨ ᠨᠢᠯᠪᠤᠰᠦ ᠪᠠᠨ ᠵᠦᠯᠭᠦᠵᠦ ᠪᠠᠶᠢᠭᠰᠠᠨ ᠳᠣᠬᠢᠶᠠᠯᠳᠤᠯ ᠨᠢᠭᠡ ᠪᠢᠰᠢ ᠤᠳᠠᠭ᠎ᠠ ᠨᠢᠳᠦᠨ ᠳᠤ ᠦᠷᠳᠦᠵᠦ ᠪᠠᠶᠢᠭᠰᠠᠨ ᠨᠢ ᠦᠴᠦᠭᠡᠳᠦᠷᠬᠡᠨ ᠶᠤᠮ ᠰᠢᠭ ᠪᠣᠳᠣᠯ ᠳᠤ ᠡᠷᠭᠢᠯᠳᠦᠨ᠎ᠡ᠃        ᠡᠵᠢ ᠠᠪᠤ ᠮᠠᠨᠢ ᠴᠣᠬᠤᠮ ᠨᠢᠭᠡᠨ ᠰᠠᠨᠠᠭ᠎ᠠ ᠤᠨᠤᠭ᠎ᠠ ᠲᠡᠩᠨᠡᠭᠰᠡᠨ ᠬᠤᠶᠠᠷ ᠪᠠᠶᠢᠯ᠎ᠠ᠃ ᠦᠷ᠎ᠡ ᠬᠡᠦᠬᠡᠳ ᠪᠢᠳᠡᠨ ᠢᠶᠠᠨ ᠥᠯ ᠬᠤᠭᠤᠯᠠ ᠳᠠᠰᠤᠯᠳᠠᠭᠤᠯᠵᠤ ᠦᠵᠡᠭᠡ ᠦᠭᠡᠢ᠂ ᠡᠮᠦᠰᠬᠦ ᠬᠤᠪᠴᠠᠰᠤ ᠳᠤᠲᠠᠭᠤᠯᠵᠤ ᠦᠩᠭᠡᠷᠡᠭᠡ ᠦᠭᠡᠢ᠂ ᠡᠪᠡᠳᠴᠢᠨ ᠡᠮᠬᠡᠭ ᠲᠤ ᠣᠷᠢᠶᠠᠭᠳᠠᠭᠤᠯᠵᠤ ᠪᠠᠶᠢᠭ᠎ᠠ ᠦᠭᠡᠢ᠂ ᠴᠣᠬᠤᠮ ᠴᠤ ᠬᠦᠮᠦᠨ ᠠᠴᠠ ᠳᠣᠣᠷ᠎ᠠ ᠦᠭᠡᠢ ᠬᠥᠮᠥᠨ ᠪᠣᠯᠭᠠᠵᠤ ᠥᠰᠭᠡᠭᠰᠡᠨ ᠶᠤᠮ ᠳ᠋ᠠ︕ ᠠᠪᠤ ᠮᠢᠨᠢ ᠬᠠᠷ᠎ᠠ ᠵᠠᠯᠠᠭᠤ ᠠᠴᠠ ᠪᠠᠨ ᠠᠪᠤᠭᠠᠳ ᠬᠠᠮᠲᠤ ᠶᠢᠨ ᠲᠣᠭᠤᠭ᠎ᠠ ᠬᠠᠭᠠᠷᠠᠬᠤ ᠪᠣᠯᠲᠠᠯ᠎ᠠ᠂ ᠨᠡᠶᠢᠲᠡ ᠶᠢᠨ ᠰᠥᠷᠦᠭ ᠢ ᠠᠮᠢ ᠲᠠᠢ ᠪᠠᠨ ᠬᠤᠯᠪᠣᠵᠤ᠂ ᠡᠪᠦᠯ ᠵᠤᠨ ᠤ ᠪᠡᠯᠴᠢᠭᠡᠷ ᠳᠠᠭᠠᠵᠤ᠂ ᠣᠲᠣᠷ ᠬᠠᠶᠢᠳᠠᠭ ᠢᠶᠠᠷ ᠨᠡᠭᠦᠳᠡᠯᠯᠡᠵᠦ ᠰᠠᠭᠤᠳᠠᠭ ᠪᠠᠶᠢᠭᠰᠠᠨ ᠤᠴᠢᠷ ᠠᠴᠠ ᠠᠷᠤ ᠭᠡᠷ ᠤᠨ ᠠᠮᠢᠳᠤᠷᠠᠯ ᠢᠶᠠᠨ ᠲᠣᠬᠢᠷᠠᠭᠤᠯᠵᠤ᠂ ᠠᠩᠭ᠎ᠠ ᠬᠡᠦᠬᠡᠳ ᠢᠶᠠᠨ ᠳᠣᠲᠣᠮᠳᠠᠬᠤ ᠨᠠᠷᠢᠨ ᠵᠦᠢᠯ ᠶᠡᠬᠡᠩᠬᠢ ᠳᠡᠭᠡᠨ ᠡᠵᠢ ᠶᠢᠨ ᠮᠢᠨᠢ ᠡᠭᠦᠷᠭᠡ ᠪᠠᠶᠢᠯ᠎ᠠ᠃ ᠡᠩ ᠤᠨ ᠨᠢᠭᠡᠨ ᠮᠠᠯᠴᠢᠨ ᠠᠪᠤ ᠡᠵᠢ ᠪᠠᠶᠢᠭᠰᠠᠨ ᠤ ᠬᠤᠪᠢ ᠳᠤ᠂ ᠲᠡᠷᠡ ᠴᠠᠭ ᠤᠨ ᠲᠡᠶᠢᠮᠦ ᠬᠦᠴᠢᠷ ᠭᠠᠴᠢᠭ ᠲᠠᠢ ᠪᠠᠶᠢᠳᠠᠯ ᠳᠣᠣᠷ᠎ᠠ ᠬᠤᠶᠠᠷ ᠭᠠᠷ ᠲᠠᠭᠠᠨ ᠲᠦᠰᠢᠭᠯᠡᠵᠦ᠂ ᠠᠷᠪᠠᠨ ᠠᠮᠠ ᠲᠠᠢ ᠠᠶᠢᠯ ᠪᠦᠯᠢ ᠶᠢᠨ ᠢᠶᠠᠨ ᠢᠳᠡᠯᠭᠡ ᠤᠤᠭᠤᠯᠭ᠎ᠠ᠂ ᠡᠮᠦᠰᠬᠡᠯ ᠵᠡᠭᠦᠳᠡᠯ ᠢ ᠡᠪ ᠳᠡᠪ ᠲᠠᠢ ᠪᠠᠲᠤᠯᠠᠵᠤ ᠶᠠᠪᠤᠨ᠎ᠠ ᠭᠡᠳᠡᠭ ᠬᠡᠯᠡᠬᠦ ᠳᠤ ᠠᠮᠠᠷᠬᠠᠨ ᠪᠣᠯᠪᠠᠴᠤ ᠬᠡᠷᠬᠢᠨ ᠪᠡᠶᠡᠯᠡᠭᠦᠯᠵᠦ ᠪᠠᠶᠢᠭᠰᠠᠨ ᠢ ᠨᠢ ᠣᠳᠣ ᠪᠣᠳᠤᠬᠤ ᠠᠴᠠ ᠴᠤ ᠲᠣᠯᠤᠭᠠᠢ ᠡᠪᠡᠳᠦᠮᠡᠷ ᠶᠠᠪᠤᠳᠠᠯ ᠡ︕ ᠳᠡᠷᠡ ᠪᠠᠶᠢᠳᠤᠭᠠᠢ ᠠᠮᠢᠳᠤᠷᠠᠯ ᠤᠨ ᠨᠥᠭᠦᠴᠡᠯ ᠶᠠᠮᠠᠷ ᠬᠦᠴᠢᠷ ᠪᠣᠯᠣᠭᠰᠠᠨ ᠴᠤ ᠪᠦᠬᠦᠢ ᠬᠡᠦᠬᠡᠳ ᠢᠶᠠᠨ ᠵᠠᠪᠠᠯ ᠰᠤᠷᠭᠠᠭᠤᠯᠢ ᠰᠣᠶᠣᠯ ᠤᠨ ᠮᠦᠷ ᠢᠶᠠᠷ ᠲᠤᠯᠲᠠᠯ᠎ᠠ ᠶᠠᠪᠤᠭᠤᠯᠤᠨ᠎ᠠ ᠭᠡᠵᠦ ᠲᠠᠩᠭᠠᠷᠢᠭ ᠲᠠᠯᠪᠢᠵᠤ᠂ ᠮᠦᠨ ᠲᠡᠭᠡᠵᠦ ᠪᠡᠶᠡᠯᠡᠭᠦᠯᠦᠭᠰᠡᠨ ᠤ ᠳ᠋ᠦ᠋ᠩ ᠲᠤ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠰᠢᠯᠭᠠᠭᠤᠯᠢ ᠶᠢᠨ ᠳᠦᠷᠢᠮ ᠰᠡᠷᠭᠦᠭᠡᠭᠳᠡᠭᠰᠡᠨ ᠠᠩᠬᠠᠨ ᠤ ᠵᠢᠯ ᠠᠴᠠ ᠡᠬᠢᠯᠡᠵᠦ᠂ ᠳᠡᠭᠡᠷ᠎ᠡ ᠵᠠᠭᠤᠨ ᠤ ᠶᠡᠷᠡᠭᠡᠳ ᠣᠨ ᠤ ᠳᠤᠮᠳᠠᠴᠢ ᠬᠦᠷᠲᠡᠯ᠎ᠡ ᠠᠷᠤ ᠠᠷᠤ ᠠᠴᠠ ᠨᠢ ᠲᠠᠪᠤᠨ ᠣᠶᠤᠲᠠᠨ ᠬᠦᠮᠦᠵᠢᠭᠦᠯᠦᠨ ᠭᠠᠷᠭᠠᠵᠤ ᠨᠡᠶᠢᠭᠡᠮ ᠤᠨ ᠵᠡᠷᠬᠡ ᠳᠤ ᠬᠦᠷᠭᠡᠭᠰᠡᠨ ᠨᠢ ᠡᠭᠡᠯ ᠵᠢᠷ ᠤᠨ ᠮᠠᠯᠴᠢᠨ ᠠᠷᠠᠳ ᠤᠨ ᠬᠤᠪᠢ ᠳᠤ ᠤᠯᠤᠰ ᠭᠡᠷ᠂ ᠦᠨᠳᠦᠰᠦᠲᠡᠨ ᠤᠭᠰᠠᠭᠠᠲᠠᠨ ᠬᠢᠭᠡᠳ ᠨᠡᠶᠢᠭᠡᠮ ᠨᠡᠶᠢᠲᠡ ᠳᠡᠭᠡᠨ ᠦᠵᠡᠭᠦᠯᠦᠭᠰᠡᠨ ᠦᠴᠦᠬᠡᠨ ᠲᠡᠳᠦᠢ ᠴᠤ ᠵᠢᠳᠬᠦᠯ ᠬᠡᠮᠡᠨ ᠣᠢᠢᠯᠠᠭᠠᠬᠤ ᠳᠤ ᠶᠡᠬᠡᠳᠬᠦ ᠪᠠᠷ ᠦᠭᠡᠢ ᠪᠠᠶᠢᠬ᠎ᠠ ᠡ︕        ᠡᠵᠢ ᠮᠢᠨᠢ ᠬᠠᠷᠢᠭᠤᠴᠠᠯᠭ᠎ᠠ ᠶᠢ ᠶᠠᠭᠤᠨ ᠠᠴᠠ ᠴᠤ ᠴᠢᠬᠤᠯᠠᠴᠢᠯᠠᠳᠠᠭ ᠬᠥᠮᠥᠨ ᠪᠠᠶᠢᠭᠰᠠᠨ ᠶᠤᠮ᠃ ᠶᠠᠮᠠᠷᠪᠠ ᠤᠴᠢᠷ ᠶᠠᠪᠤᠳᠠᠯ ᠢ ᠰᠢᠢᠳᠪᠦᠷᠢᠯᠡᠬᠦ ᠪᠤᠶᠤ ᠠᠵᠢᠯ ᠬᠢᠳᠡᠯ ᠪᠡᠶᠡᠯᠡᠭᠦᠯᠬᠦ ᠳᠡᠭᠡᠨ ᠬᠦᠩᠭᠡᠨ ᠬᠠᠭᠤᠳᠠᠮ ᠣᠷᠣᠳᠠᠭ ᠪᠢᠰᠢ᠂ ᠬᠠᠷᠢᠨ ᠦᠨᠡᠨᠴᠢ ᠬᠢᠨᠠᠮᠠᠭᠠᠢ ᠬᠠᠨᠲᠤᠳᠠᠭ᠃ ᠮᠢᠨᠦ ᠡᠷᠭᠢᠴᠡᠭᠦᠯᠦᠯ ᠳᠤ ᠡᠵᠢ ᠮᠢᠨᠢ ᠬᠦᠮᠦᠨ ᠲᠠᠢ ᠨᠠᠭᠠᠳᠤᠮ ᠱᠤᠭ ᠴᠤ ᠲᠣᠭᠯᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠬᠦᠮᠦᠨ ᠪᠠᠶᠢᠭᠰᠠᠨ᠃ ᠬᠤᠳᠠᠯ ᠬᠤᠭᠤᠰᠤᠨ ᠬᠢᠳᠡᠯ ᠪᠠᠷᠢᠳᠠᠯ ᠢ ᠭᠠᠭᠴᠠ ᠴᠤ ᠤᠳᠠᠭ᠎ᠠ ᠪᠠᠶᠢᠯᠭᠠᠵᠤ ᠦᠵᠡᠭᠡ ᠦᠭᠡᠢ᠂ ᠣᠷᠭᠢᠭ᠎ᠠ ᠣᠩᠭᠢᠷᠠᠭ᠎ᠠ ᠬᠦᠮᠦᠨ ᠢ ᠴᠤ ᠦᠵᠡᠵᠦ ᠶᠡᠷᠦ ᠴᠢᠳᠠᠳᠠᠭ ᠦᠭᠡᠢ᠃ ᠠᠳᠠᠯ ᠶᠠᠪᠤᠳᠠᠯ ᠬᠢᠬᠦ ᠲᠡᠭᠡᠨ ᠳᠦᠩᠭᠡᠰᠬᠢᠨ ᠠᠷᠭᠠᠯᠠᠵᠤ ᠬᠠᠰᠢ ᠶᠠᠰᠢ ᠭᠦᠢᠴᠡᠳᠬᠡᠵᠦ ᠪᠠᠶᠢᠭ᠎ᠠ ᠦᠬᠡᠢ᠃ ᠬᠠᠮᠲᠤ ᠶᠢᠨ ᠬᠥᠳᠡᠯᠮᠦᠷᠢ ᠳᠤ ᠣᠷᠣᠯᠴᠠᠭᠰᠠᠨ ᠴᠤ ᠲᠡᠶᠢᠮᠦ᠂ ᠬᠤᠷᠳᠤ ᠪᠠᠷ ᠪᠢᠰᠢ᠂ ᠴᠢᠨᠠᠷ ᠢᠶᠠᠷ ᠬᠦᠮᠦᠨ ᠠᠴᠠ ᠳᠣᠣᠷ᠎ᠠ ᠣᠷᠣᠬᠤ ᠦᠭᠡᠢ ᠶᠢ ᠯᠠ ᠬᠢᠴᠢᠶᠡᠳᠡᠭ᠃ ᠡᠨᠡ ᠲᠤᠬᠠᠢ ᠠᠶᠢᠯ ᠠᠶᠢᠮᠠᠭ ᠤᠨ ᠬᠢᠨ ᠪᠦᠷ ᠮᠡᠳᠡᠳᠡᠭ ᠢᠶᠠᠷ ᠪᠠᠷᠠᠬᠤ ᠦᠭᠡᠢ ᠪᠠᠷᠢᠭᠠᠳᠠ ᠶᠢᠨ ᠤᠳᠤᠷᠢᠳᠤᠯᠭ᠎ᠠ ᠴᠤ ᠦᠨᠡᠯᠡᠳᠡᠭ ᠶᠤᠮ᠃        ᠴᠠᠭᠠᠨ ᠰᠠᠷ᠎ᠠ ᠣᠢᠢᠷᠠᠳᠬᠤ ᠪᠤᠯᠭᠠᠨ ᠡᠵᠢ ᠬᠠᠮᠤᠭ ᠠᠴᠠ ᠵᠦᠳᠡᠷᠡᠳᠡᠭ᠃ ᠬᠦᠮᠦᠨ ᠪᠦᠷᠢ ᠳᠤ ᠰᠢᠨ᠎ᠡ ᠱᠠᠬᠠᠢ ᠡᠮᠦᠰᠦᠭᠦᠯᠦᠨ᠎ᠡ ᠭᠡᠵᠦ ᠭᠠᠵᠠᠷ ᠤᠨ ᠵᠢᠷᠤᠭ ᠬᠡᠮᠡᠷ ᠴᠠᠷᠪᠠᠭᠠᠨ ᠪᠦᠰ ᠢ ᠬᠠᠨ᠎ᠠ ᠳᠦᠭᠦᠷᠭᠡᠨ ᠬᠠᠲᠠᠭᠠᠳᠠᠭ ᠤᠨ ᠳᠡᠭᠡᠷ᠎ᠡ᠂ ᠦᠯᠢᠭᠡᠷ ᠬᠠᠶᠢᠴᠢᠯᠠᠵᠤ ᠤᠯᠠ ᠰᠢᠷᠢᠨ ᠵᠤᠯᠤᠭ ᠱᠠᠭᠯᠠᠵᠤ᠂ ᠰᠥᠨᠢᠵᠢᠨ ᠰᠠᠭᠤᠵᠤ ᠠᠵᠢᠯᠯᠠᠳᠠᠭ ᠪᠠᠶᠢᠭᠰᠠᠨ ᠃ ᠬᠡᠦᠬᠡᠳ ᠨᠢᠭᠡᠪᠦᠷᠢ ᠪᠠᠨ ᠰᠢᠨ᠎ᠡ ᠬᠦᠷᠮ᠎ᠡ ᠲᠠᠢ ᠰᠢᠨᠡᠯᠡᠭᠦᠯᠦᠨ᠎ᠡ ᠭᠡᠵᠦ᠂ ᠴᠢᠳᠠᠨ ᠶᠠᠳᠠᠨ ᠪᠠᠷᠠᠭ᠎ᠠ ᠪᠥᠰ ᠢᠶᠠᠨ ᠪᠡᠯᠡᠳᠴᠢᠬᠡᠪᠡᠯ ᠵᠢᠷᠤᠵᠤ ᠡᠰᠭᠡᠬᠦ ᠠᠴᠠ ᠠᠪᠤᠭᠠᠳ ᠣᠶᠣᠵᠤ ᠪᠥᠲᠦᠭᠡᠬᠦ ᠣᠷᠤᠳᠠᠯ᠎ᠠ ᠡᠵᠢ ᠳᠤ ᠶᠠᠮᠠᠷ ᠬᠠᠮ ᠳᠡᠮ ᠪᠣᠯᠴᠢᠬᠠᠮᠠᠷ ᠬᠦᠮᠦᠨ ᠪᠠᠶᠢᠭᠰᠠᠨ ᠪᠢᠰᠢ ᠳ᠋ᠠ᠂ ᠴᠠᠭ ᠯᠠ ᠣᠯᠳᠠᠪᠠᠯ ᠬᠡᠳᠦᠨ ᠵᠡᠭᠦᠦ ᠬᠡᠳᠦᠨ ᠰᠢᠯᠪᠢ ᠪᠠᠷ ᠶᠠᠪᠤᠭᠤᠯᠵᠤ ᠪᠠᠶᠢᠬᠤ ᠯᠠ ᠬᠡᠷᠡᠭ ︵ᠰᠢᠯᠪᠢ ᠭᠡᠬᠦ ᠠᠴᠠ ᠰᠢᠯᠪᠢ ᠲᠣᠪᠴᠢ ᠡᠮᠬᠡᠷᠢᠳᠴᠦ ᠵᠠᠩᠭᠢᠳᠬᠤ ᠳᠠᠭᠠᠨ ᠪᠣᠯ ᠠᠪᠤ ᠬᠠᠷᠢᠨ ᠶᠡᠭᠡ ᠳᠡᠮᠲᠡᠢ ᠪᠠᠶᠢᠵᠤ᠂ ᠡᠵᠢ ᠳᠤ ᠪᠠᠭ᠎ᠠ ᠴᠤ ᠭᠡᠰᠡᠨ ᠲᠤᠰᠠ ᠪᠣᠯᠵᠤ ᠪᠠᠶᠢᠭᠰᠠᠨ ᠨᠢ ᠰᠠᠨᠠᠭᠠᠨ ᠳᠤ ᠣᠷᠣᠵᠤ ᠪᠠᠶᠢᠨ᠎ᠠ︶᠃ ᠪᠠᠰᠠ᠂ ᠵᠢᠯ ᠵᠢᠯ ᠤᠨ ᠵᠢᠷᠭᠤᠭᠠᠨ ᠰᠠᠷ᠎ᠠ ᠶᠢᠨ ᠨᠢᠭᠡᠨ ᠤ ᠬᠡᠦᠬᠡᠳ ᠤᠨ ᠪᠠᠶᠠᠷ ᠤᠨ ᠦᠶ᠎ᠡ ᠪᠠᠷ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠶᠢᠨ ᠰᠣᠷᠣᠭᠴᠢ ᠬᠡᠦᠬᠡᠳ ᠢᠶᠠᠨ ᠬᠦᠮᠦᠨ ᠤ ᠡᠮᠦᠨ᠎ᠡ ᠦᠩᠭᠡ ᠲᠠᠢ ᠨᠢᠭᠤᠷ ᠲᠠᠢ ᠪᠠᠶᠢᠬᠤ ᠶᠢ ᠨᠢ ᠬᠢᠴᠢᠶᠡᠬᠦ ᠬᠡᠵᠦ ᠰᠢᠨ᠎ᠡ ᠬᠤᠪᠴᠠᠰᠤ ᠵᠤᠬᠢᠶᠡᠵᠦ ᠪᠠᠰᠠ ᠨᠢᠭᠡᠨ ᠵᠡᠷᠬᠡ ᠮᠣᠩᠭᠠᠨᠢᠳᠠᠭ ᠪᠠᠶᠢᠯ᠎ᠠ᠃ ᠨᠠᠶᠠᠭᠠᠳ ᠣᠨ ᠠᠴᠠ ᠨᠠᠭᠠᠰᠢ ᠮᠠᠨ ᠤ ᠰᠠᠶ᠋ᠢ ᠣᠶᠤᠳᠠᠯ ᠤᠨ ᠮᠠᠰᠢᠨ ᠲᠠᠢ ᠪᠣᠯᠣᠭᠠᠳ ᠡᠵᠢ ᠶᠢᠨ ᠮᠢᠨᠢ ᠦᠢᠯᠡ ᠣᠶᠣᠳᠠᠯ ᠤᠨ ᠳᠠᠷᠤᠭᠠᠰᠤ ᠨᠢᠭᠡ ᠬᠡᠮᠵᠢᠶ᠎ᠡ ᠪᠠᠷ ᠬᠥᠩᠭᠡᠯᠡᠭᠳᠡᠭᠰᠡᠨ ᠪᠠᠶᠢᠪᠠ᠃ ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠢᠳᠡᠭᠡ ᠪᠤᠳᠠᠭ᠎ᠠ ᠶᠢᠨ ᠬᠤᠪᠢ ᠳᠤ ᠦᠪᠡᠷ ᠲᠡᠭᠡᠨ ᠢᠳᠡᠬᠦ ᠭᠡᠲᠡᠯ᠎ᠡ ᠢᠷᠡᠬᠦ ᠵᠣᠴᠢᠨ᠂ ᠵᠠᠯᠠᠬᠤ ᠬᠦᠨᠳᠦᠲᠡᠨ ᠭᠡᠬᠦᠴᠢᠯᠡᠨ ᠬᠤᠷᠤᠭᠤ ᠳᠠᠷᠤᠬᠤ ᠦᠭᠡᠢ ᠴᠤ ᠳᠣᠲᠣᠷ᠎ᠠ ᠪᠠᠨ ᠲᠤᠭ᠎ᠠ ᠲᠠᠢ᠂ ᠦᠩᠭᠡ ᠦᠨᠦᠷ ᠲᠦᠷᠦᠯ ᠵᠦᠢᠯ ᠬᠠᠲᠠᠭᠤ ᠵᠦᠭᠡᠯᠡᠨ ᠵᠡᠷᠭᠡ ᠪᠠᠷ ᠲᠠᠯ᠎ᠠ ᠲᠠᠯ᠎ᠠ ᠠᠴᠠ ᠨᠢ ᠪᠦᠷᠢᠨ ᠪᠣᠳᠣᠯᠬᠢᠯᠠᠵᠤ᠂ ᠨᠠᠷᠢᠨ ᠲᠥᠰᠥᠪᠯᠡᠨ ᠨᠢᠮᠪᠠᠢ ᠪᠡᠯᠡᠳᠬᠡᠳᠡᠭ ᠪᠠᠶᠢᠯ᠎ᠠ᠃ ᠠᠮᠠᠨ ᠳᠤ ᠣᠷᠣᠲᠠᠯ᠎ᠠ ᠠᠷᠪᠠᠨ ᠳᠠᠪᠠᠭ᠎ᠠ ᠭᠡᠳᠡᠭ ᠪᠣᠯ ᠳᠠᠪᠠᠭ᠎ᠠ ᠪᠣᠯᠭᠠᠨ ᠢ ᠨᠢ ᠡᠵᠢ ᠶᠢᠨ ᠮᠢᠨᠢ ᠭᠠᠷ ᠲᠡᠭᠰᠢᠯᠡᠳᠡᠭ ᠪᠠᠶᠢᠵᠠᠢ᠃        ᠡᠵᠢ ᠡᠮᠡᠭᠡ ᠡᠵᠢ ᠲᠠᠢ ︵ᠡᠪᠦᠭᠡ ᠠᠪᠤ ᠮᠢᠨᠢ ᠨᠠᠮ᠎ᠠ ᠶᠢ ᠲᠦᠷᠦᠬᠦ ᠠᠴᠠ ᠡᠮᠦᠨ᠎ᠡ ᠨᠠᠰᠤ ᠪᠣᠯᠴᠢᠬᠠᠭᠰᠠᠨ ᠪᠠᠶᠢᠯ᠎ᠠ︶ ᠴᠣᠬᠤᠮ ᠨᠢᠭᠡᠨ ᠲᠥᠷᠥᠭᠰᠡᠨ ᠦᠬᠢᠨ ᠨᠢ ᠶᠤᠮ ᠰᠢᠭ᠂ ᠨᠢᠭᠡ ᠨᠠᠰᠤ ᠪᠠᠷ ᠢᠶᠠᠨ ᠦᠭᠡ ᠵᠦᠷᠢᠵᠦ ᠴᠢᠷᠠᠢ ᠤᠯᠠᠶᠢᠵᠤ ᠦᠩᠭᠡᠷᠡᠭᠡ ᠦᠭᠡᠢ᠂ ᠰᠢᠷᠡᠭᠡ ᠊ ᠤ ᠪᠠᠨ ᠳᠡᠭᠡᠲᠡᠢ ᠰᠠᠭᠠᠲᠠᠭᠤᠯᠵᠤ᠂ ᠬᠡᠵᠢᠶᠡᠳᠡ ᠰᠢᠨ᠎ᠡ ᠪᠡᠷᠢ ᠰᠢᠭ ᠶᠣᠰᠣᠴᠢᠯᠠᠨ ᠬᠦᠨᠳᠦᠯᠡᠵᠦ ᠶᠠᠪᠤᠭᠰᠠᠨ᠃ ᠪᠠᠶᠠᠷ ᠳᠤᠷᠠᠰᠬᠠᠯ ᠤᠨ ᠡᠳᠦᠷ ᠪᠣᠯᠬᠤ ᠪᠦᠷᠢ᠂ ᠡᠰᠡᠬᠦᠯ᠎ᠡ ᠦᠪᠡᠷ ᠤᠨ ᠢᠶᠠᠨ ᠣᠢᠢᠯᠠᠭᠠᠯᠲᠠ ᠪᠠᠷ ᠠᠮᠲᠠ ᠰᠢᠮᠲᠡ ᠲᠠᠢ ᠭᠡᠵᠦ ᠪᠤᠳᠤᠭᠰᠠᠨ ᠬᠤᠭᠤᠯᠠ ᠬᠤᠰᠢ ᠪᠣᠯᠬᠤ ᠪᠦᠷᠢ᠂ ᠬᠤᠭᠤᠯᠠᠨ ᠤ ᠪᠠᠨ ᠳᠡᠭᠡᠵᠢ ᠠᠴᠠ ᠠᠪᠴᠤ ᠡᠮᠡᠭᠡ ᠡᠵᠢ ᠳᠤ ᠬᠦᠷᠭᠡᠭᠦᠯᠳᠡᠭ ᠪᠠᠶᠢᠭᠰᠠᠨ ︵ᠤᠯᠠᠮᠵᠢᠯᠠᠯᠲᠤ ᠳᠠᠳᠬᠠᠯ ᠢᠶᠠᠷ ᠡᠮᠡᠭᠡ ᠡᠵᠢ ᠪᠠᠭ᠎ᠠ ᠠᠪᠠᠭ᠎ᠠ ᠶᠢᠨ ᠳᠤ ᠬᠠᠮᠲᠤ ᠠᠮᠢᠳᠤᠷᠠᠳᠠᠭ ᠪᠠᠶᠢᠭᠰᠠᠨ︶᠃ ᠲᠡᠷᠡ ᠮᠥᠷᠲᠡᠭᠡᠨ ᠡᠮᠡᠭᠡ ᠡᠵᠢ ᠶᠢᠨ ᠨᠥᠭᠦᠴᠡᠯ ᠳᠥᠭᠦᠮ ᠢ ᠲᠠᠭᠠᠷᠠᠭᠤᠯᠵᠤ᠂ ᠵᠢᠯ ᠲᠤ ᠬᠡᠳᠦᠨ ᠬᠤᠨᠤᠭ ᠴᠤ ᠭᠡᠰᠡᠨ ᠭᠡᠷ ᠲᠡᠭᠡᠨ ᠵᠠᠯᠠᠨ ᠢᠷᠡᠵᠦ ᠭᠠᠷ ᠤᠨ ᠬᠤᠭᠤᠯᠠ ᠪᠠᠨ ᠪᠠᠷᠢᠵᠤ ᠠᠰᠠᠷᠠᠳᠠᠭ ᠪᠠᠶᠢᠭᠰᠠᠨ᠃ ᠨᠠᠮ᠎ᠠ ᠶᠢ ᠲᠠᠪᠤ ᠵᠢᠷᠭᠤᠭᠠᠲᠠᠢ ᠪᠠᠶᠢᠬᠤ ᠳᠤ ᠪᠠᠶᠢᠬ᠎ᠠ᠂ ᠡᠵᠢ ᠶᠢᠨ ᠮᠢᠨᠢ ᠬᠤᠶᠢᠲᠤ ᠡᠵᠢ᠂ ᠨᠠᠭᠠᠴᠤ ᠡᠮᠡᠭᠡ ᠬᠦᠨᠳᠦ ᠡᠪᠡᠳᠴᠢᠯᠡᠵᠦ ᠲᠦᠢᠯ ᠤᠨ ᠪᠠᠭᠤᠷᠡᠢ ᠪᠠᠶᠢᠯ᠎ᠠ᠃ ᠡᠵᠢ ᠮᠢᠨᠢ ᠠᠮᠢᠳᠤ ᠮᠡᠨᠳᠦ ᠳᠤ ᠨᠢ ᠣᠴᠢᠵᠤ ᠠᠴᠢᠯᠠᠯ ᠵᠢᠷᠤᠮ ᠢᠶᠠᠨ ᠭᠦᠢᠴᠡᠳᠬᠡᠬᠦ ᠶᠤᠮᠰᠠᠨ ᠭᠡᠵᠦ᠂ ᠠᠪᠤ᠂ ᠳᠡᠭᠦᠦ ᠮᠧᠢ ᠷᠦᠩ ︵ᠨᠢᠯᠬ᠎ᠠ ᠯᠠ ᠪᠠᠶᠢᠭᠰᠠᠨ ᠳ᠋ᠠ︶᠎ ᠲᠠᠢ ᠬᠠᠮᠳᠦ ᠭᠤᠴᠢᠭᠠᠳ ᠭᠠᠵᠠᠷ ᠤᠨ ᠮᠠᠩᠬᠠᠨ ᠵᠠᠮ ᠢ ᠲᠣᠭᠤᠯᠵᠤ᠂ ᠲᠠᠮᠤ ᠶᠢᠨ ᠴᠠᠭᠠᠨ ᠭᠡᠭᠳᠡᠭᠰᠡᠨ ᠬᠥᠪᠡᠭᠡ ᠶᠢᠨ ᠮᠠᠩᠬ᠎ᠠ ᠶᠢ ᠭᠡᠲᠦᠯᠦᠭᠡᠳ᠂ ᠳᠡᠭᠡᠷ᠎ᠡ ᠶᠠᠩᠰᠢᠪ ᠲᠤ ᠪᠠᠶᠢᠭ᠎ᠠ ᠨᠠᠭᠠᠴᠤ ᠶᠢᠨ ᠳᠤ ᠣᠴᠢᠵᠤ ᠪᠠᠶᠢᠭᠰᠠᠨ ᠶᠤᠮ ᠪᠢᠯᠡ ︵ᠪᠣᠳᠣᠬᠤ ᠳᠤ ᠵᠠᠮ ᠭᠤᠳᠣᠰ ᠤᠨ ᠪᠡᠷᠬᠡ ᠪᠠᠷᠲᠠᠭ᠎ᠠ᠂ ᠤᠨᠤᠭ᠎ᠠ ᠤᠨᠤᠰᠢ ᠶᠢᠨ ᠨᠥᠭᠦᠴᠡᠯ ᠬᠢᠵᠠᠭᠠᠷ ᠠᠴᠠ ᠪᠣᠯᠵᠤ ᠮᠢᠨᠤ ᠳᠡᠭᠦᠦ ᠪᠢᠳᠡ ᠬᠤᠶᠠᠷ ᠨᠠᠭᠠᠴᠤ ᠶᠢᠨ ᠳᠤ ᠣᠴᠢᠭ᠎ᠠ ᠦᠭᠡᠢ ᠪᠠᠢᠭᠰᠠᠨ ᠢ ᠨᠢ ᠠᠪᠠᠴᠢᠵᠤ ᠠᠭᠤᠯᠵᠠᠭᠤᠯᠬᠤ ᠭᠡᠰᠡᠨ ᠪᠠᠶᠢᠵᠤ ᠳ᠋ᠠ︶᠃ ᠪᠢᠳᠡᠨ ᠢ ᠬᠦᠷᠬᠦ ᠳᠤ ᠨᠠᠭᠠᠴᠤ ᠡᠮᠡᠭᠡ ᠦᠨᠳᠡᠶᠢᠯᠲᠡ ᠦᠭᠡᠢ ᠬᠡᠪᠲᠡᠭᠡ᠂ ᠲᠣᠯᠣᠭᠠᠢ ᠨᠢ ᠯᠠ ᠠᠶᠢᠬᠤᠪᠲᠤᠷ ᠡᠪᠡᠳᠴᠦ ᠪᠠᠶᠢᠵᠤ ᠳ᠋ᠠ᠃ ᠡᠵᠢ ᠮᠢᠨᠢ ᠣᠴᠢᠬᠤ ᠲᠠᠢ ᠪᠠᠨ ᠵᠡᠷᠭᠡ ᠠᠶᠠᠭᠠᠨ ᠠᠮᠠᠰᠠᠷ ᠵᠠᠭᠤᠭᠰᠠᠨ ᠴᠤ ᠦᠭᠡᠢ᠂ ᠨᠠᠭᠠᠴᠤ ᠡᠮᠡᠭᠡ ᠶᠢᠨ ᠲᠣᠯᠣᠭᠠᠢ ᠶᠢ ᠨᠢ ᠠᠳᠬᠤᠨ ᠦᠭᠴᠦ᠂ ᠢᠯᠢᠵᠦ ᠨᠤᠬᠤᠯᠠᠬᠤ ᠵᠡᠷᠭᠡ ᠠᠷᠭ᠎ᠠ ᠬᠡᠮᠵᠢᠶ᠎ᠡ ᠪᠠᠷ ᠡᠪᠡᠳᠬᠦ ᠶᠢ ᠨᠢ ᠨᠠᠮᠳᠠᠭᠠᠬᠤ ᠬᠡᠵᠦ ᠣᠷᠣᠯᠳᠤᠵᠤ ᠪᠠᠶᠢᠭᠰᠠᠨ ᠢ ᠨᠢ ᠴᠡᠭᠡᠵᠢᠯᠡᠵᠦ ᠪᠠᠶᠢᠨ᠎ᠠ᠃ ᠮᠢᠨᠤ ᠨᠠᠭᠠᠴᠤ ᠡᠪᠦᠭᠡ ᠠᠪᠤ ᠲᠠᠢ ᠮᠠᠨᠢ ᠨᠠᠶᠢᠵᠠ ᠨᠥᠬᠦᠷ ᠶᠤᠮ ᠰᠢᠭ ᠨᠢᠭᠲᠡ ᠶᠠᠪᠤᠯᠴᠠᠳᠠᠭ᠃ ᠡᠵᠢ ᠪᠣᠯᠬᠤᠷ ᠦᠪᠡᠷ ᠤᠨ ᠠᠪᠤ ᠳᠠᠭᠠᠨ ᠭᠤᠮᠣᠳᠠᠯ ᠵᠣᠪᠠᠯᠠᠩ ᠢᠶᠠᠨ ᠲᠣᠭᠠᠴᠢᠬᠤ ᠤᠤ᠂ ᠠᠭᠤᠷᠯᠠᠭᠰᠠᠨ ᠤᠴᠠᠭᠠᠷᠯᠠᠭᠰᠠᠨ ᠢᠶᠠᠨ ᠶᠠᠷᠢᠬᠤ ᠦᠦ᠂ ᠪᠠᠶᠠᠷ ᠵᠢᠷᠭᠠᠯ ᠢᠶᠠᠨ ᠬᠤᠪᠢᠶᠠᠯᠴᠠᠬᠤ ᠦᠦ ᠬᠡᠬᠦᠴᠢᠯᠡᠨ ᠳᠡᠯᠭᠡᠬᠦ ᠦᠭᠡᠢ ᠵᠣᠭᠤᠭ ᠭᠡᠵᠦ ᠪᠠᠶᠢᠬᠤ ᠦᠭᠡᠢ᠂ ᠬᠦᠨᠳᠦᠯᠡᠬᠦ ᠶᠢᠨ ᠳᠡᠭᠡᠳᠦ ᠪᠠᠷ ᠬᠦᠨᠳᠦᠯᠡᠵᠦ ᠪᠠᠶᠢᠳᠠᠭ ᠃ ᠡᠵᠢ ᠮᠢᠨᠢ ᠨᠢᠭᠡ ᠨᠠᠰᠤᠨ ᠳᠠᠭᠠᠨ ᠠᠪᠤ ᠶᠢᠨ ᠨᠡᠷ᠎ᠡ ᠪᠠᠷ ᠳᠠᠭᠤᠳᠠᠵᠤ ᠦᠩᠭᠡᠷᠡᠭᠰᠡᠨ ᠦᠭᠡᠢ᠃ ᠦᠷ᠎ᠡ ᠬᠡᠦᠬᠡᠳ ᠪᠢᠳᠠᠨ ᠢᠶᠠᠨ ᠠᠯᠠᠭ ᠦᠭᠡᠢ ᠬᠠᠶᠢᠷ᠎ᠠ ᠪᠠᠷ ᠡᠩᠬᠦᠷᠡᠶᠢᠯᠡᠨ ᠬᠠᠶᠢᠷᠠᠯᠠᠵᠤ᠂ ᠠᠯᠬᠤᠮ ᠪᠦᠷᠢ ᠳᠤ ᠨᠢ ᠰᠤᠷᠭᠠᠨ ᠬᠠᠶᠢᠷᠠᠯᠠᠵᠤ᠂ ᠨᠢᠭᠡᠳ ᠨᠢᠭᠡ ᠪᠠᠷ ᠭᠠᠷ ᠢ ᠮᠢᠨᠢ ᠭᠠᠨᠵᠤᠭᠠᠨ ᠳᠤ ᠬᠥᠯ ᠢ ᠮᠢᠨᠢ ᠳᠥᠷᠥᠭᠡᠨ ᠳᠤ ᠬᠦᠷᠭᠡᠭᠰᠡᠨ ᠪᠢᠯᠡ︕ ᠡᠵᠢ ᠪᠢᠳᠠ ᠬᠡᠳᠦ ᠶᠢᠨ ᠲᠥᠷᠥᠭᠰᠡᠨ ᠡᠳᠦᠷ ᠢ ᠵᠢᠯ ᠠᠯᠳᠠᠯ ᠦᠭᠡᠢ ᠲᠡᠮᠳᠡᠭᠯᠡᠵᠦ ᠥᠭᠳᠡᠭ ᠪᠠᠶᠢᠯ᠎ᠠ᠃        ᠬᠦᠮᠦᠨ ᠣᠯᠠᠨ ᠤ ᠤᠷᠤᠰᠬᠠᠯ ᠳᠤ᠂ ᠪᠢᠳᠡ ᠴᠤ ᠬᠠᠶᠠ ᠳᠦᠷᠰᠦᠭᠦ᠋ᠢᠲᠡᠵᠦ᠂ ᠡᠵᠢ ᠪᠠᠨ ᠠᠭᠤᠷᠯᠠᠭᠤᠯᠬᠤ ᠪᠤᠶᠤ ᠡᠵᠢ ᠪᠠᠷ ᠢᠶᠠᠨ ᠵᠠᠩᠨᠠᠭᠤᠯᠵᠤ ᠵᠠᠨᠴᠢᠭᠤᠯᠵᠤ ᠪᠠᠶᠢᠭᠰᠠᠨ ᠤᠳᠠᠭ᠎ᠠ ᠴᠤ ᠪᠠᠶᠢᠳᠠᠭ᠃ ᠭᠡᠬᠦ ᠳᠡᠭᠡᠨ ᠵᠠᠩᠨᠠᠭᠤᠯᠵᠤ ᠵᠠᠨᠴᠢᠭᠤᠯᠤᠭᠰᠠᠨ ᠪᠢᠳᠡᠨ ᠨᠢ ᠤᠬᠢᠯᠠᠭ᠎ᠠ ᠦᠭᠡᠢ ᠪᠠᠶᠢᠬᠤ ᠳᠤ ᠡᠵᠢ ᠬᠠᠷᠢᠨ ᠦᠪᠡᠷ ᠢᠶᠠᠨ ᠤᠬᠢᠯᠠᠴᠢᠬᠠᠳᠠᠭ ᠪᠠᠶᠢᠭᠰᠠᠨ ᠶᠤᠮ ᠡ᠃ ᠠᠯᠠᠭ ᠦᠭᠡᠢ ᠰᠠᠨᠠᠳᠠᠭ ᠭᠡᠳᠡᠭ ᠪᠣᠯᠪᠠᠴᠤ ᠣᠯᠠᠨ ᠬᠡᠦᠬᠡᠳ ᠤᠨ ᠢᠶᠠᠨ ᠭᠤᠣᠯ ᠠᠴᠠ ᠣᠨᠴᠠᠭᠠᠢ ᠨᠠᠮ᠎ᠠ ᠶᠢ ᠢᠯᠡᠭᠦᠦ ᠰᠠᠨᠠᠳᠠᠭ ᠰᠢᠤᠬᠠᠨ ᠰᠠᠨᠠᠭᠳᠠᠭᠠᠳ ᠪᠠᠶᠢᠨ᠎ᠠ᠂ ᠨᠠᠳᠠ ᠳᠤ ᠪᠣᠯ᠃ ᠠᠯᠢ ᠪᠠᠭ᠎ᠠ ᠠᠴᠠ ᠠᠪᠤᠭᠠᠳ᠂ ᠮᠢᠨᠤ ᠠᠪᠬᠤ ᠭᠡᠰᠡᠨ ᠵᠦᠢᠯ ᠢ ᠠᠪᠴᠤ ᠥᠭᠭᠦᠭᠰᠡᠨ ᠦᠭᠡᠢ ᠤᠳᠠᠭ᠎ᠠ ᠪᠠᠶᠢᠬᠤ ᠦᠭᠡᠢ᠂ ᠠᠪᠤ ᠡᠵᠢ ᠬᠤᠶᠠᠷ᠃ ᠥᠨᠳᠥᠷ ᠳᠤᠮᠳᠠᠳᠤ ᠶᠢᠨ ᠲᠡᠭᠦᠰᠬᠦ ᠣᠨ ᠤ ᠰᠡᠭᠦᠯ ᠤᠨ ᠬᠤᠭᠤᠴᠠᠭᠠᠨ ᠳᠤ ᠦᠪᠡᠷ ‍ᠤᠨ᠊ ^ ᠪᠡᠶ᠎ᠡ ᠥᠷᠦᠴᠡᠨ ᠪᠦᠷᠬᠦᠪᠴᠢ ᠶᠢᠨ ᠦᠷᠪᠢᠰᠦᠯ ᠳᠤ ᠨᠡᠷᠪᠡᠭᠳᠡᠵᠦ᠂ ᠭᠡᠷ ᠲᠡᠭᠡᠨ ᠰᠠᠭᠤᠵᠤ ᠬᠤᠶᠠᠷ ᠰᠠᠷ᠎ᠠ ᠢᠯᠡᠭᠦᠦ ᠰᠤᠪᠢᠯᠠᠭᠰᠠᠨ ᠳᠤ ᠡᠵᠢ ᠮᠢᠨᠢ ᠨᠠᠳᠠ ᠠᠴᠠ ᠢᠯᠡᠭᠦᠦ ᠵᠣᠪᠠᠭᠰᠠᠨ ᠶᠤᠮ᠃ ᠡᠪᠡᠳᠴᠢᠨ ᠨᠢ ᠰᠡᠭᠦᠯ ᠦᠯᠡᠳᠡᠵᠦ ᠠᠷᠬᠠᠭ ᠰᠠᠭᠤᠬᠤ ᠠᠴᠠ ᠨᠢᠭᠡ ᠵᠣᠪᠠᠨ᠎ᠠ᠂ ᠰᠤᠷᠤᠯᠭ᠎ᠠ ᠶᠢ ᠨᠥᠯᠥᠭᠡᠯᠡᠵᠦ ᠰᠢᠯᠭᠠᠯᠲᠠ ᠶᠢ ᠬᠠᠷᠰᠢᠯᠠᠬᠤ ᠠᠴᠠ ᠪᠠᠰᠠ ᠵᠣᠪᠠᠨ᠎ᠠ᠃ ᠵᠣᠪᠠᠵᠤ ᠠᠯᠭᠠᠰᠠᠬᠤ ᠶᠢᠨ ᠢᠶᠠᠨ ᠡᠷᠬᠡ ᠪᠠᠷ᠂ ᠠᠯᠢ ᠪᠣᠯᠬᠤ ᠪᠠᠷ ᠬᠤᠭᠤᠯᠠ ᠤᠮᠳᠠ ᠶᠢ ᠮᠢᠨᠢ ᠵᠣᠬᠢᠴᠠᠭᠤᠯᠵᠤ᠂ ᠡᠪᠡᠳᠴᠢᠲᠡᠨ ᠤ ᠬᠤᠭᠤᠯᠠ ᠶᠢᠨ ᠪᠠᠷᠢᠮᠵᠢᠶ᠎ᠠ ᠪᠠᠷ ᠨᠠᠷᠢᠨ ᠪᠡᠯᠡᠳᠬᠡᠵᠦ ᠪᠠᠶᠢᠭᠰᠠᠨ ᠶᠤᠮ᠃ ᠵᠣᠯ ᠢᠶᠠᠷ ᠲᠡᠷᠡ ᠵᠢᠯ ᠤᠨ ᠰᠢᠯᠭᠠᠯᠲᠠ ᠳᠤ ᠪᠣᠯᠣᠮᠠᠷ ᠬᠤᠪᠢ ᠰᠢᠯᠭᠠᠭᠤᠯᠵᠤ᠂ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠵᠢᠩᠬᠢᠨᠢ ᠠᠩᠭᠢ ᠳᠤ ᠡᠯᠰᠡᠭᠳᠡᠭᠡᠳ ᠠᠪᠤ ᠡᠵᠢ ᠶᠢᠨ ᠢᠶᠠᠨ ᠠᠯᠭᠠᠰᠠᠭ᠎ᠠ ᠶᠢ ᠲᠠᠶᠢᠯᠵᠤ ᠴᠢᠳᠠᠭᠰᠠᠨ ᠳᠠᠭᠠᠨ ᠪᠢ ᠴᠤ ᠨᠢᠭᠡ ᠦᠶ᠎ᠡ ᠳᠠᠷᠤᠭᠠᠰᠤ ᠬᠥᠩᠭᠡᠷᠡᠵᠦ ᠰᠠᠨᠠᠭ᠎ᠠ ᠲᠠᠯᠪᠢᠭᠤᠷᠠᠬᠤ ᠰᠢᠭ᠋ ᠪᠣᠯᠵᠤ ᠪᠠᠶᠢᠭᠰᠠᠨ ᠢᠶᠠᠨ ᠰᠠᠨᠠᠵᠤ ᠪᠠᠶᠢᠨ᠎ᠠ᠃ ᠬᠡᠵᠢᠶᠡᠳᠡ ᠮᠠᠷᠲᠠᠭᠳᠠᠰᠢ ᠦᠭᠡᠢ ᠪᠠᠰᠠ ᠨᠢᠭᠡᠨ ᠳᠤᠷᠠᠳᠬᠠᠯ ᠭᠡᠪᠡᠯ᠂ ᠭᠡᠷ ᠲᠡᠭᠡᠨ ᠡᠪᠡᠳᠴᠢᠨ ᠰᠤᠪᠢᠯᠠᠵᠤ ᠪᠠᠶᠢᠭᠰᠠᠨ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠡᠳᠦᠷ ᠲᠤ ᠬᠤᠶᠠᠷ ᠤᠳᠠᠭ᠎ᠠ ᠮᠢᠬᠠᠨ ᠤ ᠲᠠᠷᠢᠭ᠎ᠠ ᠲᠠᠷᠢᠵᠤ ᠪᠠᠶᠢᠭᠰᠠᠨ ᠤᠴᠢᠷ᠂ ᠤᠳᠠᠭ᠎ᠠ ᠪᠣᠯᠭᠠᠨ ᠠᠶᠢᠯ ᠤᠨ ᠡᠮᠴᠢ ᠶᠢᠨ ᠳᠤ ᠬᠦᠷᠴᠦ ᠵᠡᠭᠦᠦ ᠲᠠᠷᠢᠭᠤᠯᠬᠤ ᠠᠴᠠ ᠪᠠᠨ ᠲᠡᠭᠡᠭᠡᠷᠡᠰᠢᠶᠡᠵᠦ᠂ ᠡᠵᠢ ᠶᠢ ᠭᠤᠶᠤᠵᠤ ᠲᠠᠷᠢᠭᠤᠯᠬᠤ ᠪᠠᠷ ᠨᠢᠭᠡ ᠤᠳᠠᠭ᠎ᠠ ᠲᠤᠷᠰᠢᠭᠤᠯᠵᠤ ᠦᠵᠡᠪᠡ᠃ ᠲᠡᠭᠡᠬᠦ ᠳᠤ ᠡᠵᠢ ᠮᠢᠨᠢ ᠭᠠᠷ ᠢᠶᠠᠨ ᠰᠠᠯᠭᠠᠨᠠᠭᠤᠯᠵᠤ ᠰᠠᠯᠭᠠᠨᠠᠭᠤᠯᠵᠤ ᠵᠡᠭᠦᠦ ᠪᠠᠨ ᠬᠠᠳᠬᠤᠭᠰᠠᠨ ᠴᠢᠨᠢ ᠮᠢᠬᠠᠨ ᠳᠤ ᠨᠢ ᠬᠠᠳᠬᠤᠵᠤ ᠳᠡᠶᠢᠯᠦᠭᠡ ᠦᠭᠡᠢ᠂ ᠠᠷᠠᠰᠤᠨ ᠳᠣᠣᠷ᠎ᠠ ᠨᠢ ᠪᠦᠨᠲᠦ᠋ᠢᠲᠡᠯ᠎ᠡ ᠲᠠᠷᠢᠴᠢᠬᠠᠭᠰᠠᠨ ᠪᠠᠶᠢᠯ᠎ᠠ᠃ ᠡᠨᠡ ᠨᠢ ᠡᠵᠢ ᠮᠢᠨᠢ ᠵᠡᠭᠦᠦ ᠬᠠᠳᠬᠤᠬᠤ ᠲᠠᠷ ᠦᠭᠡᠢ ᠳᠡᠭᠡᠨ ᠪᠢᠰᠢ᠂ ᠭᠠᠭᠴᠠ ᠬᠦ ᠬᠠᠶᠢᠷᠠᠲᠠᠢ ᠬᠦᠦ ᠶᠢᠨ ᠢᠶᠠᠨ ᠮᠢᠬᠠᠨ ᠳᠤ ᠵᠡᠭᠦᠦ ᠬᠠᠳᠬᠤᠬᠤ ᠬᠠᠲᠠᠭᠤ ᠰᠡᠳᠬᠢᠯ ᠪᠠᠶᠢᠭ᠎ᠠ ᠦᠭᠡᠢ ᠳᠡᠭᠡᠨ ᠳᠡᠭᠡᠭᠰᠡᠨ ᠰᠢᠦ ᠳ᠋ᠠ︕ ᠲᠡᠭᠦᠨ ᠠᠴᠠ ᠬᠤᠶᠢᠰᠢ ᠪᠢ ᠡᠵᠢ ᠶᠢ ᠠᠯᠪᠠᠳᠠᠵᠤ ᠵᠡᠭᠦᠦ ᠲᠠᠷᠢᠭᠤᠯᠬᠤ ᠭᠡᠵᠦ ᠳᠠᠬᠢᠵᠦ ᠦᠢᠯᠡ ᠶᠢ ᠨᠢ ᠦᠵᠡᠭᠡ ᠦᠭᠡᠢ᠃        ᠶᠡᠷᠦᠨᠢ ᠰᠠᠨᠠᠭ᠎ᠠ ᠠᠯᠭᠠᠰᠠᠭᠤᠷ ᠬᠦᠮᠦᠨ ᠬᠡᠵᠦ ᠮᠢᠨᠦ ᠡᠵᠢ ᠶᠤᠮ ᠪᠢᠯᠢᠤ᠂ ᠶᠠᠭᠤ ᠪᠣᠯᠭᠠᠨ ᠤ ᠡᠮᠦᠨ᠎ᠡ ᠠᠴᠠ ᠤᠷᠢᠳᠠᠪᠠᠷ ᠰᠠᠨᠠᠭ᠎ᠠ ᠪᠣᠯᠵᠤ ᠯᠠ ᠪᠠᠶᠢᠳᠠᠭ᠃ ᠨᠠᠮ᠎ᠠ ᠶᠢ ᠰᠢᠯᠢ ᠶᠢᠨ ᠭᠤᠣᠯ ᠳᠤ ᠠᠵᠢᠯ ᠤᠨ ᠬᠤᠪᠢᠶᠠᠷᠢ ᠠᠪᠬᠤ ᠳᠤ ᠬᠤᠯᠠ ᠶᠠᠪᠤᠴᠢᠬᠠᠯ᠎ᠠ ᠭᠡᠵᠦ ᠵᠣᠪᠠᠵᠤ ᠪᠠᠶᠢᠭᠰᠠᠨ᠃ ᠠᠵᠢᠯ ᠳᠤ ᠭᠠᠷᠤᠭᠰᠠᠨ ᠠᠩᠬᠠᠨ ᠤ ᠡᠪᠦᠯ ᠴᠠᠭᠠᠨ ᠰᠠᠷ᠎ᠠ ᠪᠠᠷ ᠬᠠᠷᠢᠬᠤ ᠳᠤ᠂ ᠬᠦᠢᠲᠡᠨ ᠣᠷᠣᠨ ᠳᠤ ᠠᠵᠢᠯᠯᠠᠴᠢᠬᠠᠯ᠎ᠠ᠂ ᠳᠠᠭᠠᠷᠠᠴᠢᠬᠠᠬᠤ ᠪᠤᠢ ᠳ᠋ᠠ ᠭᠡᠵᠦ ᠬᠥᠪᠰᠦ᠋ᠢᠭᠰᠡᠨ ᠰᠠᠶᠢᠬᠠᠨ ᠦᠰᠦ ᠲᠠᠢ ᠨᠡᠬᠡᠢ ᠳ᠋ᠡᠴᠡᠩ ᠣᠶᠣᠴᠢᠬᠠᠭᠠᠳ ᠬᠦᠯᠢᠶᠡᠵᠦ ᠪᠠᠶᠢᠭᠰᠠᠨ᠃ ᠠᠵᠢᠯ ᠠᠮᠢᠳᠤᠷᠠᠯ ᠤᠨ ᠣᠨᠴᠠᠭᠠᠢ ᠪᠠᠶᠢᠳᠠᠯ ᠠᠴᠠ ᠪᠣᠯᠵᠤ ᠨᠢᠭᠡᠨ ᠤᠳᠠᠭ᠎ᠠ ᠬᠠᠷᠢᠴᠠᠩᠭᠤᠢ ᠤᠷᠲᠤ ᠬᠡᠰᠡᠭ ᠬᠤᠭᠤᠴᠠᠭ᠎ᠠ ᠵᠠᠬᠢᠳᠠᠯ ᠪᠢᠴᠢᠭᠰᠡᠨ ᠦᠭᠡᠢ ᠠᠯᠭᠤᠷᠯᠠᠭᠰᠠᠨ ᠤ ᠳ᠋ᠦ᠋ᠩ ᠳᠤ ᠨᠠᠮ᠎ᠠ ᠶᠢ ᠰᠠᠨᠠᠭᠠᠳ ᠲᠡᠰᠬᠦ ᠦᠭᠡᠢ ᠪᠣᠯᠬᠤ ᠳᠠᠭᠠᠨ ᠵᠡᠭᠦᠳᠦᠨ ᠳᠡᠭᠡᠨ ᠨᠡᠷ᠎ᠡ ᠪᠠᠷ ᠬᠠᠰᠬᠢᠷᠤᠭᠠᠳ ᠪᠣᠰᠴᠤ ᠪᠠᠶᠢᠯ᠎ᠠ ᠭᠡᠵᠦ ᠠᠪᠤ ᠮᠢᠨᠢ ᠶᠠᠷᠢᠵᠤ ᠪᠠᠶᠢᠭᠰᠠᠨ᠃ ᠨᠠᠮ᠎ᠠ ᠶᠢ ᠠᠶᠢᠯ ᠭᠡᠷ ᠪᠣᠯᠣᠭᠰᠠᠨ ᠤ ᠳᠠᠷᠠᠭ᠎ᠠ ᠵᠢᠯ᠂ ᠵᠠᠪᠠᠯ ᠪᠡᠶ᠎ᠡ ᠪᠠᠷ ᠢᠶᠠᠨ ᠢᠷᠡᠵᠦ ᠨᠢᠳᠦ ᠪᠠᠷ ᠢᠶᠠᠨ ᠦᠵᠡᠬᠦ ᠶᠤᠮ ᠭᠡᠵᠦ᠂ ᠭᠡᠷ ᠠᠴᠠ ᠪᠠᠨ ᠬᠤᠪᠤᠷᠬᠠᠨ ᠭᠠᠷᠳᠠᠭ ᠡᠵᠢ ᠮᠢᠨᠢ ᠪᠡᠭᠡᠵᠢᠩ ᠵᠠᠩ ᠵᠢᠶᠠ ᠺᠸᠦ ᠪᠠᠷ ᠳᠠᠮᠵᠢᠵᠤ᠂ ᠭᠠᠭᠴᠠᠭᠠᠷ ᠬᠥᠪᠡᠭᠡᠲᠦ ᠰᠢᠷ᠎ᠠ ᠬᠤᠰᠢᠭᠤᠨ ᠳᠤ ᠢᠷᠡᠵᠦ᠂ ᠨᠢᠭᠡ ᠯᠠ ᠭᠠᠷᠠᠭ ᠰᠠᠭᠤᠭᠠᠳ᠂ ᠰᠠᠨᠠᠭ᠎ᠠ ᠨᠢ ᠠᠮᠠᠷᠠᠵᠤ ᠬᠠᠷᠢᠭᠰᠠᠨ ᠶᠤᠮᠰᠠᠨ᠃        ᠰᠠᠶᠢᠨ ᠬᠦᠮᠦᠨ ᠰᠠᠶᠢᠨ ᠤ ᠬᠠᠷᠢᠭᠤ ᠲᠠᠢ ᠭᠡᠳᠡᠭ ᠶᠤᠮ ᠳ᠋ᠠ᠃ ᠭᠡᠬᠦ ᠳᠤ ᠬᠦᠭᠡᠷᠦᠬᠦᠢ ᠡᠵᠢ ᠮᠢᠨᠢ ᠨᠢᠭᠡ ᠨᠠᠰᠤ ᠪᠠᠨ ᠢᠶᠠᠨ ᠬᠦᠮᠦᠨ ᠤ ᠯᠠ ᠲᠦᠯᠦᠭᠡ ᠲᠦᠷᠦᠴᠢᠬᠡᠭᠰᠡᠨ ᠶᠤᠮ ᠰᠢᠭ ᠪᠤᠷᠬᠠᠨ ᠰᠡᠳᠬᠢᠯ ᠲᠠᠢ ᠠᠵᠢᠯᠯᠠᠵᠤ ᠠᠮᠢᠳᠤᠷᠠᠴᠢᠬᠠᠭᠠᠳ᠂ ᠦᠢᠯᠡ ᠪᠠᠨ ᠦᠵᠡᠵᠦ ᠦᠰᠦ ᠪᠠᠨ ᠲᠣᠭᠠᠯᠠᠬᠤ ᠳᠤ ᠬᠦᠷᠴᠦ ᠪᠠᠶᠢᠵᠤ᠂ ᠦᠷ᠎ᠡ ᠬᠡᠦᠬᠡᠳ ᠪᠢᠳᠠᠨ ᠢᠶᠠᠨ ᠦᠨᠳᠦᠰᠦᠨ ᠳᠤ ᠨᠢ ᠬᠥᠯ ᠤᠯᠠ ᠶᠢ ᠨᠢ ᠣᠯᠭᠤᠴᠢᠬᠠᠭᠠᠳ᠂ ᠶᠠᠭ ᠰᠠᠶ᠋ᠢᠬᠠᠨ ᠥᠲᠡᠯᠦᠭᠡ ᠨᠠᠰᠤᠨ ᠤ ᠪᠤᠶᠠᠨ ᠵᠢᠷᠭᠠᠯ ᠢᠶᠠᠨ ᠡᠳ᠋ᠯᠡᠬᠦ ᠪᠤᠯᠵᠦ ᠪᠠᠶᠢᠳᠠᠯ᠎ᠠ ᠭᠠᠵᠠᠷ ᠳᠣᠣᠷ᠎ᠠ ᠠᠴᠠ ᠭᠠᠢ ᠤᠷᠭᠤᠵᠤ᠂ ᠠᠪᠤᠷᠠᠵᠤ ᠳᠡᠶᠢᠯᠬᠦ ᠦᠭᠡᠢ ᠬᠥᠨᠳᠦ ᠡᠪᠡᠳᠴᠢᠨ ᠡᠵᠢ ᠶᠢ ᠨᠦᠷᠢᠨ ᠪᠠᠭᠤᠴᠢᠬᠠᠯ᠎ᠠ᠃ ᠬᠤᠪᠢ ᠵᠠᠶᠠᠭ᠎ᠠ ᠶᠠᠭᠠᠬᠢᠭᠰᠠᠨ ᠭᠤᠣᠯᠴᠢ ᠦᠭᠡᠢ ᠶᠤᠮ ᠳ᠋ᠠ︕ ᠪᠤᠷᠬᠠᠨ᠊ ^ ᠲᠡᠭᠷᠢ ᠴᠤ ᠨᠢᠳᠦ ᠪᠠᠨ ᠬᠠᠮᠢᠭᠠᠰᠢ ᠨᠢ᠂ ᠶᠠᠭᠠᠬᠢᠵᠤ ᠨᠡᠬᠡᠭᠡᠴᠢᠬᠡᠭᠰᠡᠨ ᠶᠤᠮ ᠪᠣᠤ ᠮᠡᠳᠡ︕ ᠬᠥᠭᠡᠷᠦᠬᠦᠢ ᠡᠵᠢ ᠶᠢ ᠮᠢᠨᠢ ᠲᠠᠪᠢ ᠵᠢᠰᠦᠬᠡᠨ ᠨᠠᠰᠤᠨ ᠳᠤ ᠨᠢ ᠨᠠᠰᠤᠨ ᠤ ᠬᠠᠨᠢ ᠠᠴᠠ ᠨᠢ ᠬᠠᠭᠠᠴᠡᠭᠤᠯᠵᠤ᠂ ᠬᠠᠶᠢᠷᠠᠲᠠᠢ ᠦᠷ᠎ᠡ ᠬᠡᠦᠬᠡᠳ ᠠᠴᠠ ᠨᠢ ᠰᠠᠯᠭᠠᠵᠦ᠂ ᠬᠡᠵᠢᠶᠡᠳᠡ ᠪᠤᠴᠠᠭᠠᠬᠤ ᠦᠭᠡᠢ ᠪᠠᠷ ᠠᠪᠤᠭᠠᠳ ᠶᠠᠪᠤᠴᠢᠬᠠᠯ᠎ᠠ︕ ᠡᠵᠢ ᠶᠡᠷᠦ ᠠᠴᠠ ᠦᠪᠡᠷ ᠤᠨ ᠪᠡᠶ᠎ᠡ ᠪᠠᠨ ᠬᠢᠮᠠᠭᠠᠳᠠᠵᠤ ᠭᠠᠮᠨᠠᠬᠤ ᠶᠢ ᠮᠡᠳᠡᠳᠡᠭ ᠦᠭᠡᠢ᠂ ᠡᠪᠡᠳᠴᠢᠯᠡᠵᠦ ᠬᠢᠮᠤᠷᠠᠪᠠᠯ ᠦᠪᠡᠷ ᠲᠤ ᠪᠠᠨ ᠮᠣᠩᠭᠤᠯ ᠡᠮ ᠵᠣᠬᠢᠴᠠᠭᠤᠯᠵᠤ ᠤᠤᠭᠤᠴᠢᠬᠠᠭᠠᠳ ᠰᠢᠳᠦ ᠪᠠᠨ ᠵᠠᠭᠤᠵᠤ ᠬᠢᠳᠡᠭ ᠢᠶᠠᠨ ᠬᠢᠴᠢᠬᠡᠳᠡᠭ ᠬᠦᠮᠦᠨ᠃ ᠢᠡᠭᠬᠢᠵᠦ ᠨᠢᠬᠡ ᠨᠠᠰᠤᠨ ᠳᠤᠷᠰᠢ ᠲᠥᠯᠥᠭᠡᠳ ᠪᠠᠷᠠᠬᠤ ᠦᠭᠡᠢ ᠥᠷᠢ ᠲᠠᠢ ᠶᠤᠮ ᠰᠢᠭ ᠬᠥᠳᠡᠯᠵᠦ ᠳᠡᠶᠢᠯᠪᠡᠯ ᠬᠥᠳᠡᠯᠮᠦᠷᠢᠯᠡᠵᠦ ᠯᠠ ᠪᠠᠶᠢᠵᠤ᠂ ᠬᠥᠯᠥᠰᠦ ᠪᠠᠨ ᠤᠷᠤᠰᠬᠠᠨ ᠵᠢᠳᠬᠦᠵᠦ ᠯᠠ ᠪᠠᠶᠢᠵᠤ᠂ ᠵᠦᠭᠡᠷ ᠰᠠᠭᠤᠬᠤ ᠦᠭᠡᠢ ᠵᠦᠯᠭᠦᠵᠦ ᠯᠠ ᠪᠠᠶᠢᠵᠤ᠂ ᠵᠢᠷᠦᠬᠡᠨ ᠲᠠᠮᠢᠷ ᠢᠶᠠᠨ ᠰᠢᠪᠬᠠᠵᠤ ᠯᠠ ᠪᠠᠶᠢᠵᠤ ᠁ ᠪᠠᠰᠠ ᠯᠠ ᠮᠦᠡᠭᠬᠡ ᠪᠤᠰᠦ ᠶᠢ ᠦᠵᠡᠭᠦᠯᠬᠦ ᠨᠢ ᠡ᠃        ᠡᠵᠢ ᠶᠢᠨ ᠪᠠᠶᠠᠷ ᠢᠷᠡᠬᠦ ᠠᠯᠲᠠ ᠪᠠᠷ ᠦᠷ᠎ᠡ ᠶᠢᠨ ᠴᠢᠨᠢ ᠰᠡᠳᠬᠢᠯ ᠬᠤᠭᠤᠰᠤᠷᠠᠭᠠᠳ ᠪᠠᠶᠢᠨ᠎ᠠ᠂ ᠡᠵᠢ ᠲᠠᠢ ᠬᠦᠮᠦᠨ ᠢ ᠬᠠᠷᠠᠬᠤ ᠠᠴᠠ ᠠᠲᠠᠭᠠᠷᠬᠠᠬᠤ ᠰᠡᠳᠬᠢᠯ ᠴᠤ ᠤᠷᠭᠤᠭᠠᠳ ᠪᠠᠶᠢᠨ᠎ᠠ᠃ ᠮᠢᠨᠦ ᠡᠵᠢ᠄ ᠡᠭᠡᠯ ᠵᠢᠷ ᠤᠨ ᠬᠥᠳᠡᠯᠮᠦᠷᠢᠴᠢ ᠮᠠᠯᠴᠢᠨ ᠡᠵᠢ᠂ ᠡᠷᠬᠢᠮᠰᠦᠭ ᠦᠵᠡᠰᠬᠦᠯᠡᠩ ᠬᠠᠲᠤᠨ ᠡᠵᠢ᠂ ᠪᠢᠴᠢᠭ ᠦᠭᠡᠢ ᠴᠤ ᠰᠣᠶᠣᠯ ᠲᠠᠢ ᠪᠠᠭᠰᠢ ᠡᠵᠢ᠂ ᠪᠠᠶᠠᠨ ᠪᠢᠰᠢ ᠴᠦ ᠦᠭᠭᠢᠶᠡᠮᠦᠷ ᠪᠤᠷᠬᠠᠨ ᠡᠵᠢ ᠁
 
ᠢᠷᠡᠯᠲᠡ᠄ ᠬᠡᠰᠢᠭᠳᠡᠨ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠮᠣᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠭᠠᠵᠠᠷ ᠤᠨ ᠵᠢᠷᠤᠭ ᠢ ᠵᠢᠷᠤᠮᠵᠢᠭᠤᠯᠤᠨ ᠬᠡᠷᠡᠭᠯᠡᠵᠦ ᠣᠭᠲᠣᠬᠠᠨ ᠴᠤ ᠪᠤᠷᠤᠭᠤ ᠭᠠᠷᠭᠠᠵᠤ ᠪᠤᠯᠬᠤ ᠦᠭᠡᠢ
︽ᠤᠮᠠᠷᠠᠲᠤ ᠬᠢᠯᠢ ᠶᠢᠨ ᠰᠣᠶᠣᠯ︾᠎ ᠢ ᠪᠠᠳᠠᠷᠠᠭᠤᠯᠵᠤ ᠰᠣᠶᠣᠯ ᠤᠨ ᠬᠦᠴᠦᠷᠬᠡᠭ ᠣᠷᠣᠨ ᠢ ᠲᠦᠷᠭᠡᠳᠬᠡᠨ ᠁
ᠳᠠᠷᠦ᠋ᠢᠬᠠᠨ ᠬᠦᠢᠴᠡᠳᠬᠡᠵᠦ ᠦᠨᠡᠨ ᠬᠦ ᠠᠳᠬᠤᠨ ᠪᠣᠳᠠᠲᠠᠢ ᠠᠵᠢᠯᠯᠠᠬᠤ ᠶᠢ ᠲᠠᠳᠬᠠᠯ ᠪᠣᠯᠭᠠᠶ᠎ᠠ
ᠠᠷᠠᠳ ᠲᠦᠮᠡᠨ ᠢ ᠳᠡᠭᠡᠳᠦᠯᠡᠬᠦ ᠶᠢ ᠢᠮᠠᠭᠲᠠ ᠪᠠᠷᠢᠮᠲᠠᠯᠠᠰᠤᠭᠠᠢ
ᠴᠠᠭ ᠦᠶ᠎ᠡ ᠶᠢᠨ ᠤᠷᠤᠰᠬᠠᠯ ᠪᠠ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠤ ᠪᠣᠯᠪᠠᠰᠤᠨ ᠳᠠᠪᠰᠢᠯᠲᠠ ᠶᠢᠨ ᠴᠢᠭᠯᠡᠯ ᠢ ᠬᠥᠲᠥᠯᠥᠨ ᠁
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号