ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠡᠬᠡ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2016/4/1
     ᠡᠬᠡ ᠶᠢᠨ ᠰᠠᠨᠠᠭ᠎ᠠ ᠦᠷ᠎ᠡ ᠳᠤ      ᠦᠷ᠎ᠡ ᠶᠢᠨ ᠰᠠᠨᠠᠭ᠎ᠠ ᠠᠭᠤᠯᠠᠨ ᠳᠤ      ᠪᠢ ᠮᠡᠳᠡᠭᠡ ᠣᠷᠣᠭᠰᠠᠨ ᠴᠠᠭ ᠠᠴᠠ ᠪᠠᠨ ᠡᠵᠢ ᠳᠡᠭᠡᠨ ᠳᠤᠷ᠎ᠠ ᠦᠭᠡᠢ ᠪᠠᠶᠢᠯ᠎ᠠ᠃ ᠲᠡᠷᠡ ᠡᠮᠡᠭᠡᠨ ᠳᠤ ᠠᠭᠤᠷᠯᠠᠨ ᠬᠤᠷᠣᠰᠴᠤ ᠬᠡᠯᠡᠭᠰᠡᠨ ᠦᠭᠡ ᠶᠢ ᠮᠢᠨᠢ ᠰᠣᠨᠣᠰᠤᠭᠰᠠᠨ ᠬᠥᠮᠥᠰ ᠨᠠᠳᠠ ᠳᠤ ︽ᠴᠢ ᠲᠥᠷᠥᠭᠦᠯᠦᠭᠰᠡᠨ ᠡᠬᠡ ᠶᠢ ᠪᠠᠨ ᠶᠠᠭᠠᠬᠢᠵᠤ ᠢᠩᠭᠢᠵᠦ ᠬᠡᠯᠡᠵᠦ ᠴᠢᠳᠠᠵᠤ ᠪᠠᠶᠢᠨ᠎ᠠ ᠠ᠋︖︾ ᠭᠡᠵᠦ ᠮᠡᠯ ᠭᠠᠶᠢᠬᠠᠳᠠᠭ ᠪᠠᠶᠢᠵᠤ ᠪᠢᠯᠡ᠃ ᠲᠡᠶᠢᠮᠦ ᠠᠴᠠ ᠪᠢ ᠲᠡᠭᠦᠨ ᠤ ᠲᠤᠬᠠᠢ ᠪᠤᠰᠤᠳ ᠲᠤ ᠶᠠᠷᠢᠬᠤ ᠦᠭᠡ ᠪᠠᠨ ᠴᠡᠨᠡᠳᠡᠭ ᠪᠣᠯᠣᠭᠰᠠᠨ ᠶᠤᠮ᠃ ᠦᠨᠡᠨ ᠳᠡᠭᠡᠨ ᠲᠡᠷᠡ ᠵᠥᠨᠥᠭ ᠮᠢᠨᠤ ᠡᠵᠢ ᠮᠥᠨ ᠴᠦ ᠶᠤᠮ ᠦᠦ᠂ ᠪᠢᠰᠢ ᠴᠦ ᠶᠤᠮ ᠦᠦ ᠬᠡᠨ ᠮᠡᠳᠡᠯ᠎ᠡ᠃ ᠡᠶᠢᠮᠦ ᠪᠣᠳᠣᠯ ᠳᠠᠭᠠᠨ ᠬᠥᠲᠥᠯᠥᠭᠳᠡᠨ ᠪᠢ ᠲᠡᠷᠡ ᠮᠢᠨᠤ ᠡᠵᠢ ᠪᠢᠰᠢ ᠪᠠᠶᠢᠬᠤ ᠪᠣᠯᠣᠮᠵᠢᠲᠠᠢ ᠡᠰᠡᠬᠦ ᠶᠢ ᠰᠤᠳᠤᠯᠵᠤ ᠦᠵᠡᠭᠰᠡᠨ ᠃ ᠳᠠᠩᠴᠤ ᠨᠠᠳᠠ ᠳᠤ ᠲᠡᠶᠢᠮᠦ ᠪᠠᠷᠢᠮᠲᠠ ᠶᠡᠷᠦ ᠠᠴᠠ ᠪᠠᠨ ᠣᠯᠳᠠᠭ᠎ᠠ ᠦᠭᠡᠢ ᠪᠥᠭᠡᠳ ᠬᠠᠮᠤᠭ ᠤᠨ ᠭᠤᠣᠯ ᠨᠢ ᠪᠢ ᠲᠡᠷᠡ ᠬᠥᠭᠰᠢᠨ ᠰᠢᠮᠨᠤ ᠠᠴᠠ ᠣᠯᠠᠨ ᠶᠠᠭᠤᠮ᠎ᠠ ᠶᠢ ᠨᠢ ᠳᠠᠭᠤᠷᠢᠶᠠᠵᠤ ᠲᠥᠷᠥᠵᠡᠢ᠃ ᠨᠢᠳᠦ᠂ ᠦᠰᠦᠨ ᠤ ᠥᠩᠭᠡ᠂ ᠨᠢᠭᠤᠷ ᠤᠨ ᠬᠡᠯᠪᠡᠷᠢ ᠲᠥᠷᠬᠦ᠂ ᠪᠡᠶ᠎ᠡ ᠶᠢᠨ ᠭᠠᠯᠪᠢᠷ᠂ ᠠᠯᠬᠤᠭ᠎ᠠ ᠭᠢᠰᠬᠢᠭᠡ᠂ ᠳᠠᠭᠤᠤ ᠬᠤᠭᠤᠯᠠᠢ ᠁ ᠢᠩᠭᠢᠭᠡᠳ ᠪᠢ ᠥᠪᠡᠷ ᠢ ᠪᠠᠨ ᠲᠡᠭᠦᠨ ᠤ ᠲᠥᠷᠥᠭᠰᠡᠨ ᠥᠬᠢᠨ ᠪᠢᠰᠢ ᠪᠠᠶᠢᠬ᠎ᠠ ᠭᠡᠰᠡᠨ ᠲᠡᠨᠡᠭ ᠪᠤᠳᠤᠯ ᠢᠶᠠᠨ ᠣᠷᠬᠢᠭᠰᠠᠨ ᠶᠤᠮ᠃ ᠭᠡᠯ᠎ᠡ ᠴᠦ ᠭᠡᠰᠡᠨ ᠡᠵᠢ ᠳᠡᠭᠡᠨ ᠳᠤᠷ᠎ᠠ ᠦᠭᠡᠶᠢᠴᠡᠬᠦ ᠮᠢᠨᠢ ᠪᠠᠭᠠᠰᠤᠭ᠎ᠠ ᠦᠭᠡᠢ ᠪᠥᠭᠡᠳ ᠬᠠᠷᠢᠨ ᠴᠦ ᠪᠢ ᠲᠡᠭᠦᠨ ᠢ ᠤᠯᠠᠮ ᠪᠦᠷ ᠦᠵᠡᠨ ᠶᠠᠳᠠᠬᠤ ᠪᠣᠯᠣᠯ᠎ᠠ᠃ ᠪᠢ ᠲᠣᠯᠢᠨ ᠳᠤ ᠬᠠᠷᠠᠬᠤ ᠪᠣᠯᠭᠠᠨ ᠳᠠᠭᠠᠨ ᠥᠪᠡᠷ ᠤᠨ ᠢᠶᠠᠨ ᠳᠤᠷ᠎ᠠ ᠦᠭᠡᠢ ᠬᠥᠮᠥᠨ ᠲᠠᠢ ᠲᠥᠰᠲᠡᠢ ᠵᠠᠯᠠᠭᠤ ᠪᠦᠰᠡᠭᠦᠢ ᠶᠢ ᠬᠠᠷᠠᠵᠤ ᠵᠢᠪᠡᠭᠦᠦ ᠮᠢᠨᠢ ᠬᠦᠷᠪᠡᠴᠦ ᠬᠠᠮᠢᠭ᠎ᠠ ᠣᠴᠢᠵᠤ ᠱᠠᠯ ᠥᠪᠡᠷ ᠠᠭᠠᠰᠢ ᠵᠠᠩ᠂ ᠤᠬᠠᠭᠠᠨ ᠪᠣᠳᠣᠯ᠂ ᠰᠠᠨᠠᠭ᠎ᠠ ᠰᠡᠳᠬᠢᠯᠭᠡ ᠲᠠᠢ ᠲᠥᠷᠥᠭᠦᠯᠦᠭᠰᠡᠨ ᠪᠤᠷᠬᠠᠨ ᠳᠤ ᠲᠠᠯᠠᠷᠬᠠᠳᠠᠭ ᠪᠢᠯᠡ᠃      ᠮᠢᠨᠤ ᠯᠡ ᠮᠡᠳᠡᠬᠦ ᠶᠢᠨ ᠨᠠᠳᠠ ᠳᠤ ᠠᠪᠤ ᠪᠠᠶᠢᠭ᠎ᠠ ᠦᠭᠡᠢ ᠶᠤᠮ᠃ ᠶᠠᠭᠠᠬᠢᠵᠤ ᠳᠡᠨᠡᠭᠳᠡᠵᠦ ᠶᠠᠪᠤᠭᠠᠳ ᠶᠠᠮᠠᠷ ᠬᠥᠮᠥᠨ ᠠᠴᠠ ᠨᠠᠮᠠᠶᠢ ᠣᠯᠣᠭᠰᠠᠨ ᠢ ᠨᠢ ᠪᠢ ᠬᠡᠵᠢᠶ᠎ᠡ ᠴᠦ ᠮᠡᠳᠡᠬᠦ ᠶᠢ ᠬᠦᠰᠡᠵᠦ ᠪᠠᠶᠢᠭᠰᠠᠨ ᠦᠭᠡᠢ᠃ ᠨᠠᠳᠠ ᠳᠤ ᠨᠢᠭᠡᠨ ᠤᠳᠠᠭ᠎ᠠ ︽ᠪᠤᠷᠬᠠᠨ ᠤ ᠬᠠᠶᠢᠷᠠᠯᠠᠭᠰᠠᠨ ᠬᠡᠰᠢᠭ᠂ ᠭᠤᠣᠯ ᠤᠨ ᠬᠠᠶᠢᠷᠠᠲᠠᠢ ᠭᠠᠭᠴᠠ ᠥᠬᠢᠨ ᠴᠢᠮᠠᠶᠢ ᠪᠠᠨ ᠬᠤᠶᠢᠲᠤ᠂ ᠤᠷᠢᠳᠤ ᠶᠢᠨ ᠭᠠᠷ ᠬᠠᠷᠠᠭᠤᠯᠬᠤ ᠦᠭᠡᠢ ᠭᠡᠵᠦ ᠪᠢ ᠬᠥᠮᠥᠨ ᠲᠠᠢ ᠰᠠᠭᠤᠭ᠎ᠠ ᠦᠭᠡᠢ ᠶᠤᠮ︾ ᠭᠡᠵᠦ ᠬᠡᠯᠡᠭᠰᠡᠨ ᠲᠡᠷᠡ ᠬᠠᠭᠤᠷᠮᠠᠭ ᠦᠭᠡ ᠶᠢ ᠨᠢ ᠰᠠᠨᠠᠬᠤ ᠪᠠᠷ ᠣᠢ ᠭᠤᠲᠤᠵᠤ ᠤᠯᠠᠮ ᠬᠤᠣᠷ ᠪᠤᠴᠠᠯᠤᠨ᠎ᠠ᠃ ᠪᠠᠭ᠎ᠠ ᠪᠠᠶᠢᠬᠤ ᠳᠤ ᠮᠢᠨᠢ ᠥᠷᠯᠥᠭᠡ ᠪᠦᠬᠦᠨ ᠨᠠᠮᠠᠶᠢ ᠴᠡᠴᠡᠷᠯᠢᠭ ᠲᠤ ᠥᠭᠭᠦᠭᠡᠳ ᠣᠷᠣᠢ ᠳᠠᠭᠠᠨ ᠢᠷᠠᠵᠤ ᠠᠪᠤᠨ᠎ᠠ᠃ ᠴᠡᠴᠡᠷᠯᠢᠭ ᠲᠤ ᠶᠠᠪᠤᠬᠤ ᠦᠭᠡᠢ ᠭᠡᠬᠦ ᠳᠤ ᠮᠢᠨᠢ ᠡᠵᠢ ᠨᠢ ᠠᠵᠢᠯ ᠬᠢᠬᠦ ᠦᠭᠡᠢ ᠪᠣᠯ ᠴᠢᠮᠠᠶᠢ ᠪᠠᠨ ᠶᠠᠭᠠᠬᠢᠵᠤ ᠲᠡᠵᠢᠭᠡᠬᠦ ᠪᠢᠯᠡ ᠭᠡᠳᠡᠭ ᠰᠠᠨ᠃ ᠶᠠᠭᠤ ᠭᠡᠰᠡᠨ ᠦᠭᠡ ᠪᠤᠢ︖ ᠥᠪᠡᠷ ᠤᠨ ᠢᠶᠠᠨ ᠨᠣᠬᠠᠢ ᠠᠮᠢ ᠶᠢ ᠪᠣᠷᠣᠯᠠᠭᠤᠯᠬᠤ ᠭᠡᠵᠦ ᠠᠵᠢᠯ ᠬᠢᠴᠢᠬᠡᠭᠡᠳ ᠁ ᠲᠡᠭᠡᠬᠦ ᠪᠠᠶᠢᠭᠰᠠᠨ ᠶᠤᠮ ᠪᠣᠯ ᠶᠠᠭᠠᠬᠢᠬᠤ ᠭᠡᠵᠦ ᠨᠠᠮᠠᠶᠢ ᠲᠥᠷᠥᠭᠦᠯᠦᠭᠰᠡᠨ ᠶᠤᠮ ᠪᠤᠢ︖      ᠰᠤᠷᠭᠠᠭᠤᠯᠢ ᠳᠤ ᠪᠠᠶᠢᠬᠤ ᠳᠠᠭᠠᠨ ᠪᠢ ᠠᠩᠬᠢ ᠶᠢᠨ ᠢᠶᠠᠨ ᠥᠬᠢᠳ ᠲᠠᠢ ᠮᠠᠭᠤᠳᠠᠯᠴᠠᠵᠦ᠂ ᠰᠢᠷᠠᠨ ᠳᠠᠭᠠᠨ ᠲᠡᠳᠡᠨ ᠢ ᠵᠢᠭᠠᠬᠠᠨ ᠬᠤᠤᠷᠯᠠᠭᠰᠠᠨ ᠠᠴᠠ ᠪᠣᠯᠵᠤ ᠲᠡᠷᠡ ᠠᠪᠠᠭᠠᠢ ᠪᠠᠭᠰᠢ ᠳᠤ ᠳᠠᠭᠤᠳᠠᠭᠳᠠᠨ᠎ᠠ᠃ ᠲᠡᠭᠡᠭᠡᠳ ᠯᠡ ᠨᠢᠭᠤᠷ ᠢᠶᠠᠨ ᠤᠯᠠᠶᠢᠯᠭᠠᠨ ᠬᠦᠯᠦᠯᠵᠡᠭᠡᠳ ᠨᠠᠮᠠᠶᠢ ᠬᠤᠳᠠᠯ ᠦᠮᠦᠭᠡᠷᠡᠬᠦ ᠳᠤ ᠨᠢ ᠮᠢᠨᠤ ᠪᠠᠬ᠎ᠠ ᠲᠠᠪᠠ ᠬᠠᠨᠤᠵᠦ᠂ ᠬᠤᠬᠢ ᠨᠢ ᠭᠡᠵᠦ ᠪᠣᠳᠣᠳᠠᠭ ᠪᠠᠶᠢᠯ᠎ᠠ᠃ ᠤᠭ ᠨᠢ ᠨᠠᠮᠠᠶᠢ ᠥᠯᠥᠰᠬᠡᠵᠦ ᠪᠠᠶᠢᠭ᠎ᠠ ᠦᠭᠡᠢ ᠨᠢ ᠦᠨᠡᠨ ᠪᠣᠯᠪᠠᠴᠤ ᠨᠠᠳᠠ ᠳᠤ ᠬᠡᠷᠡᠭᠲᠡᠢ ᠬᠡᠷᠡᠭ ᠲᠠᠢ ᠶᠠᠭᠤᠮ᠎ᠠ ᠶᠢ ᠮᠠᠨᠢ ᠠᠷᠠᠢ ᠶᠠᠳᠠᠨ ᠵᠠᠯᠭᠠᠭᠤᠯᠵᠤ ᠪᠠᠶᠢᠭᠰᠠᠨ ᠠᠴᠠ ᠬᠠᠷᠢᠨ ᠳᠤᠷᠠᠲᠠᠢ ᠪᠦᠬᠦᠨ ᠢ ᠮᠢᠨᠢ ᠠᠪᠴᠤ ᠥᠭᠴᠦ᠂ ᠡᠷᠬᠡ ᠳᠤᠷ᠎ᠠ ᠪᠠᠷ ᠮᠢᠨᠢ ᠦᠭᠬᠦᠭᠰᠡᠨ ᠦᠭᠡᠢ ᠯᠡ ᠶᠤᠮ ᠳ᠋ᠠᠭ᠃ ᠮᠢᠨᠤ ᠣᠯᠠᠨ ᠵᠢᠯ ᠭᠠᠭᠴᠠᠭᠠᠷᠳᠠᠵᠤ᠂ ᠣᠯᠠᠨ ᠶᠠᠭᠤᠮᠠᠨ ᠳᠡᠭᠡᠷ᠎ᠡ ᠰᠠᠨᠠᠭᠰᠠᠨ ᠳᠠᠭᠠᠨ ᠬᠦᠷᠴᠦ ᠴᠢᠳᠠᠭ᠎ᠠ ᠦᠭᠡᠢ ᠳᠤ ᠵᠣᠪᠠᠯᠠᠩ ᠢᠶᠠᠷ ᠳᠦᠭᠦᠷᠡᠩ ᠡᠨᠡ ᠨᠣᠪᠰᠢ ᠶᠢᠨ ᠬᠤᠷᠸ᠎ᠠ ᠳᠤ ᠲᠥᠷᠥᠭᠰᠡᠨ ᠳᠤ ᠮᠢᠨᠢ ᠭᠠᠭᠴᠠᠬᠠᠨ ᠲᠡᠷᠡ ᠬᠥᠭᠰᠢᠨ ᠯᠡ ᠪᠤᠷᠤᠭᠤ ᠲᠠᠢ᠃ ᠬᠡᠳᠦᠶᠢᠪᠡᠷ ᠪᠢ ᠲᠡᠭᠦᠨ ᠢ ᠦᠨᠡᠨ ᠰᠡᠳᠬᠢᠯ ᠠᠴᠠ ᠪᠠᠨ ᠦᠵᠡᠨ ᠶᠠᠳᠠᠵᠤ ᠬᠤᠷᠣᠰᠳᠠᠭ ᠴᠦ ᠪᠠᠭ᠎ᠠ ᠪᠠᠯᠴᠢᠷ ᠤᠨ ᠡᠷᠬᠡ ᠪᠠᠷ ᠵᠠᠷᠢᠮ ᠳᠠᠭᠠᠨ ᠲᠡᠭᠦᠨ ᠠᠴᠠ ᠶᠠᠭᠤᠮ᠎ᠠ ᠰᠠᠯᠭᠠᠬᠤ ᠶᠢᠨ ᠲᠤᠯᠠᠳᠠ ᠳᠤᠯᠢᠭᠠᠨᠠᠵᠦ᠂ ︽ᠡᠵᠢ ᠳᠡᠭᠡᠨ ᠬᠠᠶᠢᠷᠠᠲᠠᠢ︾ ᠡᠨᠡ ᠡ ᠲᠡᠷᠡ ᠡ ᠭᠡᠵᠦ ᠨᠢᠯᠠᠭᠠᠨᠠᠬᠤ ᠠᠴᠠ ᠥᠭᠡᠷ᠎ᠡ ᠵᠠᠮ ᠪᠠᠶᠢᠭ᠎ᠠ ᠦᠭᠡᠢ ᠶᠤᠮ᠃      ᠠᠬᠠᠯᠠᠬᠤ ᠠᠩᠭᠢ ( ᠳᠡᠭᠡᠳᠦ ᠳᠤᠮᠳᠠᠳᠤ )᠎ ᠳᠤ ᠣᠷᠣᠭᠰᠠᠨ ᠴᠠᠭ ᠠᠴᠠ ᠬᠤᠶᠢᠰᠢ ᠪᠠᠷᠤᠭ ᠭᠤᠴᠢᠨ ᠨᠠᠰᠤ ᠬᠦᠷᠲᠡᠯ᠎ᠡ ᠤᠷᠤᠶᠢᠳᠠᠬᠤ᠂ ᠭᠠᠳᠠᠭᠤᠷ ᠬᠤᠨᠣᠬᠤ ᠳᠤᠭᠠᠯᠠᠩ ᠳᠤ ᠮᠢᠨᠢ ᠨᠠᠮᠠᠶᠢ ᠢᠷᠡᠲᠡᠯ᠎ᠡ ᠬᠥᠰᠢᠭᠡ ᠠᠳᠠᠯᠢ ᠦᠷᠭᠦᠯᠵᠢ ᠴᠣᠩᠬᠤᠨ ᠳᠡᠭᠡᠷ᠎ᠡ ᠪᠠᠨ ᠪᠠᠶᠢᠳᠠᠭ ᠰᠠᠨ᠃ ᠲᠡᠷᠡ ᠨᠢ ᠰᠠᠶᠢᠨ ᠳᠠᠭᠠᠨ ᠴᠦ ᠪᠢᠰᠢ ᠨᠠᠮᠠᠶᠢ ᠪᠢᠲᠡᠭᠡᠢ ᠢᠷᠡᠭᠡᠰᠡᠢ ᠭᠡᠰᠡᠨ ᠳᠡᠭᠡᠨ᠃ ᠶᠡᠷᠦ ᠨᠢ ᠲᠡᠷᠡ ᠨᠠᠳᠠ ᠳᠤ ᠪᠠᠰᠠ ᠪᠤᠰᠤᠳ ᠬᠥᠮᠥᠰ ᠲᠤ ᠥᠪᠡᠷ ᠢ ᠪᠠᠨ ᠰᠠᠶᠢᠨ ᠡᠵᠢ ᠪᠣᠯᠭᠠᠨ ᠬᠠᠷᠠᠭᠳᠠᠭᠤᠯᠬᠤ ᠭᠡᠵᠦ ᠶᠡᠬᠡᠳᠡ ᠬᠢᠴᠢᠶᠡᠳᠡᠭ ᠪᠠᠶᠢᠭᠰᠠᠨ ᠶᠤᠮ᠃ ᠶᠠᠮᠠᠷ ᠰᠠᠶᠢᠨ ᠳᠠᠭᠠᠨ ᠯᠡ ᠳᠣᠯᠣᠳᠤᠭᠠᠷ ᠠᠩᠭᠢ ᠳᠤ ᠪᠠᠶᠢᠬᠤ ᠳᠠᠭᠠᠨ ᠠᠩᠬ᠎ᠠ ᠤᠳᠠᠭ᠎ᠠ ᠪᠠᠨ ᠳᠡᠭᠡᠳᠦ ᠠᠩᠭᠢ ᠶᠢᠨ ᠬᠢᠨ ᠲᠠᠢ ᠪᠠᠨ ᠨᠠᠷᠭᠢᠵᠤ ᠭᠠᠳᠠᠭᠤᠷ ᠬᠤᠨᠣᠭᠰᠠᠨ ᠡᠪᠦᠯ ᠤᠨ ᠰᠥᠨᠢ ᠨᠠᠮᠠᠶᠢ ᠬᠠᠶᠢᠵᠤ ᠪᠠᠶᠢᠭ᠎ᠠ ᠨᠢ ᠡᠨᠡ ᠭᠡᠳ ᠬᠠᠴᠠᠷ ᠨᠢᠭᠤᠷ ᠢᠶᠠᠨ ᠬᠦᠯᠳᠡᠭᠡᠴᠢᠭᠡᠭᠰᠡᠨ ᠪᠠᠶᠢᠬᠤᠪ ᠳ᠋ᠡ᠃ ᠲᠡᠷᠡ ᠨᠠᠮᠠᠶᠢ ᠪᠠᠷᠤᠭ ᠠᠷᠪᠠᠨ ᠲᠠᠪᠤ ᠵᠢᠷᠭᠤᠭ᠎ᠠ ᠬᠦᠷᠲᠡᠯ᠎ᠡ ᠮᠢᠨᠢ ᠪᠤᠷᠤᠭᠤ ᠬᠡᠷᠡᠭ ᠲᠠᠷᠢᠬᠤ ᠪᠣᠯᠭᠠᠨ ᠳᠤ ᠦᠭᠡᠯᠡᠵᠦ᠂ ᠰᠤᠷᠭᠠᠬᠤ ᠰᠠᠨᠠᠭ᠎ᠠ ᠲᠠᠢ ᠪᠠᠶᠢᠯ᠎ᠠ᠃ ᠰᠡᠭᠦᠯ ᠳᠡᠭᠡᠨ ᠨᠠᠮᠠᠶᠢ ᠥᠭᠡᠳᠡ ᠠᠴᠠ ᠨᠢ ᠵᠠᠩᠨᠠᠬᠤ ᠪᠠᠷ ᠶᠠᠭᠤ ᠴᠦ ᠬᠡᠯᠡᠵᠦ ᠴᠢᠳᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠶᠤᠮ᠃ ᠨᠠᠳᠠ ᠳᠤ ᠵᠠᠩᠨᠠᠭᠤᠯᠬᠤ ᠪᠠᠷ ᠢᠶᠠᠨ ᠰᠠᠨᠳᠤᠷᠴᠤ ᠪᠦᠯᠳᠡᠯᠵᠡᠬᠦ ᠪᠠᠷ ᠨᠢ ᠮᠢᠨᠤ ᠬᠥᠬᠡ ᠢᠨᠢᠶᠡᠳᠦ ᠬᠦᠷᠦᠨ᠎ᠡ ᠭᠡᠵᠦ ᠵᠢᠭᠲᠡᠶᠢᠬᠡᠨ᠃ ᠢᠯᠠᠩᠭᠤᠶ᠎ᠠ ᠮᠢᠨᠤ ᠬᠡᠨ ᠲᠠᠢ ᠨᠠᠶᠢᠵᠠᠯᠠᠬᠤ᠂ ᠬᠠᠮᠢᠭᠠᠭᠤᠷ ᠬᠤᠨᠣᠬᠤ᠂ ᠠᠷᠢᠬᠢ᠂ ᠲᠠᠮᠠᠬᠢ ᠬᠡᠷᠡᠭᠯᠡᠬᠦ ᠡᠰᠡᠬᠦ ᠶᠢ ᠵᠢᠭᠠᠪᠤᠷᠢᠯᠠᠬᠤ ᠭᠡᠪᠡᠯ ᠪᠢ ᠶᠣᠰᠣᠲᠠᠢ ᠯᠡ ᠪᠠᠭᠤᠵᠤ ᠭᠠᠷᠳᠠᠭ ᠪᠠᠶᠢᠯ᠎ᠠ᠃ ᠲᠡᠶᠢᠮᠦ ᠴᠦ ᠤᠴᠢᠷ ᠠᠴᠠ ᠨᠠᠮᠠᠶᠢ ᠬᠤᠵᠢᠮ ᠨᠢ ᠭᠤᠷᠪᠠᠨ ᠴᠦ ᠨᠥᠬᠦᠷ ᠰᠣᠯᠢᠬᠤ ᠳᠤ ᠶᠠᠭᠤᠮ᠎ᠠ ᠬᠡᠯᠡᠵᠦ ᠵᠢᠷᠦᠬᠡᠯᠡᠭᠡ ᠦᠭᠡᠢ᠃ ᠤᠭ ᠠᠴᠠ ᠪᠠᠨ ᠲᠡᠷᠡ ᠮᠠᠭᠤ ᠪᠠᠷ ᠬᠡᠵᠢᠶ᠎ᠡ ᠴᠦ ᠶᠠᠭᠤ ᠴᠦ ᠵᠢᠭᠠᠯᠭᠠᠬᠤ ᠶᠢ ᠬᠦᠰᠡᠬᠦ ᠦᠭᠡᠢ ᠪᠢᠯᠡ᠃      ᠪᠢ ᠨᠢᠭᠡᠨ ᠤᠳᠠᠭ᠎ᠠ ᠰᠣᠯᠣᠩᠭᠤᠰ ᠲᠤ ᠣᠴᠢᠵᠤ ᠠᠵᠢᠯ ᠬᠢᠬᠦ ᠪᠠᠷ ᠰᠢᠢᠳᠦᠯ᠎ᠡ᠃ ᠲᠡᠭᠦᠨ ᠠᠴᠠ ᠬᠡᠳᠦᠨ ᠵᠢᠯ ᠤᠨ ᠡᠮᠦᠨ᠎ᠡ ᠡᠵᠢ ᠦᠢᠯᠡᠳᠪᠦᠷᠢ ᠶᠢᠨ ᠣᠰᠣᠯ ᠳᠤ ᠣᠷᠣᠵᠤ ᠭᠷᠦ᠋ᠫ (ᠠᠵᠢᠯ ᠤᠨ ᠳᠠᠯᠠᠪᠠᠢ ᠳᠡᠭᠡᠷᠡᠬᠢ ᠦᠢᠯᠡᠳᠪᠤᠷᠢ ᠶᠢᠨ ᠤᠰᠤᠯ ᠠᠴᠠ ᠪᠤᠯᠵᠦ ᠴᠠᠯᠢᠩ ᠠᠪᠴᠦ ᠳᠡᠳᠬᠦᠪᠦᠷᠢ ᠳᠤ ᠭᠠᠷᠬᠤ )᠎ ᠲᠤ ᠰᠠᠭᠤᠬᠤ ᠪᠣᠯᠣᠭᠰᠠᠨ ᠶᠤᠮ᠃ ᠬᠠᠮᠢᠭ᠎ᠠ ᠣᠴᠢᠵᠤ ᠦᠢᠯᠡᠳᠪᠦᠷᠢ ᠶᠢᠨ ᠣᠰᠣᠯ ᠤᠴᠢᠷ ᠠᠴᠠ ᠭᠷᠦ᠋ᠫ ᠤᠨ ᠮᠥᠩᠭᠦ ᠨᠢ ᠬᠠᠭᠤᠴᠢᠨ ᠴᠠᠯᠢᠩ ᠠᠴᠠ ᠨᠢ ᠳᠤᠲᠠᠬᠤ ᠦᠭᠡᠢ᠃ ᠡᠮᠡᠭᠡᠨ ᠭᠡᠷ ᠳᠣᠲᠣᠭᠤᠷ ᠢᠶᠠᠨ ᠳᠡᠷᠭᠡᠨᠴᠢᠷ ᠲᠠᠢ ᠶᠠᠪᠤᠵᠤ ᠥᠪᠡᠷ ᠤᠨ ᠢᠶᠠᠨ ᠬᠤᠭᠤᠯᠠ ᠤᠮᠳᠠ ᠶᠢ ᠠᠶᠠᠯᠠᠭᠤᠯᠤᠭᠰᠠᠨ ᠪᠣᠯᠣᠨ᠎ᠠ᠃ ᠮᠡᠳᠡᠭᠡᠵᠢ ᠪᠢ ᠲᠡᠭᠦᠨ ᠳᠤ ᠶᠠᠭᠠᠬᠢᠭᠠᠳ ᠴᠦ ᠲᠤᠰᠠᠯᠠᠬᠤ ᠦᠭᠡᠢ ᠰᠢᠦ ᠳ᠋ᠡ᠃ ᠦᠨᠡᠨ ᠳᠡᠭᠡᠨ ᠨᠠᠳᠠ ᠳᠤ ᠲᠡᠭᠦᠨ ᠲᠠᠢ ᠣᠷᠢᠶᠠᠴᠠᠯᠳᠤᠭᠠᠳ ᠪᠠᠶᠢᠬᠤ ᠵᠠᠪ ᠴᠦ ᠪᠠᠶᠢᠭ᠎ᠠ ᠦᠭᠡᠢ᠃ ᠬᠠᠷᠢᠨ ᠰᠣᠯᠣᠩᠭᠤᠰ ᠲᠤ ᠶᠠᠪᠤᠬᠤ ᠳᠤ ᠮᠢᠨᠢ ᠨᠠᠳᠠ ᠳᠤ ᠮᠥᠩᠭᠦ ᠬᠡᠷᠡᠭᠲᠡᠢ ᠪᠣᠯᠣᠯ᠎ᠠ᠃ ᠰᠠᠯᠤᠭᠰᠠᠨ ᠨᠥᠬᠦᠷ ᠤᠨ ᠨᠢᠭᠡ ᠨᠢ ᠮᠥᠩᠭᠦ ᠦᠭᠡᠢ ᠠᠷᠢᠬᠢᠴᠢᠨ᠂ ᠨᠥᠭᠦᠭᠡ ᠨᠢ ᠰᠤᠷᠠᠭ ᠲᠠᠰᠤᠷᠠᠭᠰᠠᠨ᠂ ᠰᠡᠭᠦᠯᠴᠢ ᠶᠢᠨ ᠢᠶᠠᠨ ᠨᠥᠬᠦᠷ ᠢ ᠭᠤᠣᠯ ᠳᠤ ᠨᠢ ᠣᠷᠣᠲᠠᠯ᠎ᠠ ᠭᠤᠮᠣᠳᠠᠭᠠᠭᠰᠠᠨ᠂ ᠬᠦᠦ ᠪᠠᠨ ᠭᠠᠭᠴᠠ ᠴᠦ ᠪᠣᠯᠪᠠ ᠡᠷᠭᠢᠵᠦ ᠣᠴᠢᠭ᠎ᠠ ᠦᠭᠡᠢ ᠤᠴᠢᠷ ᠠᠴᠠ ᠲᠡᠷᠡ ᠨᠠᠳᠠ ᠳᠤ ᠮᠥᠩᠭᠦ ᠬᠢᠯᠠᠶᠢᠯᠭᠠᠨ᠎ᠠ ᠭᠡᠵᠦ ᠪᠠᠶᠢᠬᠤ ᠦᠭᠡᠢ ᠶᠢ ᠪᠢ ᠰᠠᠶᠢᠨ ᠮᠡᠳᠡᠵᠦ ᠪᠠᠶᠢᠯ᠎ᠠ᠃ ᠴᠣᠷ ᠤᠨ ᠭᠠᠭᠴᠠ ᠪᠣᠯᠣᠮᠵᠢ ᠪᠣᠯ ᠲᠠᠬᠢᠷ ᠳᠤᠲᠠᠭᠤ᠂ ᠵᠥᠨᠥᠭ ᠡᠬᠡ ᠶᠢᠨ ᠢᠶᠠᠨ ᠬᠤᠶᠠᠷ ᠥᠷᠥᠭᠡ ᠪᠠᠶᠢᠷᠢ ᠶᠢ ᠪᠠᠷᠢᠴᠠᠭᠠᠨ ᠳᠤ ᠲᠠᠯᠪᠢᠬᠤ᠂ ᠤᠭ ᠠᠴᠠ ᠪᠠᠨ ᠥᠭᠡᠷ᠎ᠡ ᠠᠷᠭ᠎ᠠ ᠪᠠᠶᠢᠭ᠎ᠠ ᠦᠭᠡᠢ ᠶᠤᠮ ᠴᠢᠨᠢ᠃ ᠭᠤᠷᠪᠠ ᠬᠤᠨᠤᠭ ᠬᠢᠷᠢ ᠲᠠᠢ ᠪᠢ ᠲᠡᠭᠦᠨ ᠲᠠᠢ ᠱᠠᠯ ᠥᠭᠡᠷ᠎ᠡ ᠪᠠᠷ ᠬᠠᠷᠢᠴᠠᠵᠤ ᠶᠣᠰᠣᠲᠠᠢ ᠯᠠ ᠡᠬᠡ ᠥᠬᠢᠨ ᠬᠤᠶᠠᠷ ᠰᠢᠭ᠋ ᠪᠠᠶᠢᠭᠰᠠᠨ ᠪᠠᠶᠢᠬ᠎ᠠ᠃ ᠲᠡᠭᠡᠵᠦ ᠲᠡᠭᠡᠵᠦ ᠪᠢ ᠬᠡᠯᠡᠭᠡᠳ ᠲᠠᠯᠪᠢᠴᠢᠬᠠᠯ᠎ᠠ᠃ ᠮᠠᠭᠤ ᠰᠠᠨᠠᠭ᠎ᠠ ᠲᠠᠢ ᠬᠥᠭᠰᠢᠨ ᠬᠦᠯᠦᠯᠵᠡᠭᠡᠳ ᠳᠤᠤᠭᠠᠷᠬᠤ ᠦᠭᠡᠢ ᠪᠠᠶᠢᠨ᠎ᠠ᠃ ᠵᠢᠪᠡᠭᠦᠨ ᠭᠡᠳᠡᠭ ᠨᠢ᠃ ᠠᠭᠰᠤᠷᠴᠤ ᠨᠢᠭᠡ ᠦᠵᠡᠭᠡᠳ ᠠᠷᠭᠠᠳᠠᠵᠤ ᠨᠢᠭᠡ ᠦᠵᠡᠯ᠎ᠡ᠃ ᠲᠡᠷᠡ ᠨᠢᠳᠦᠨ ᠳᠡᠭᠡᠨ ᠨᠢᠯᠪᠤᠰᠤ ᠴᠡᠶᠢᠯᠡᠭᠡᠨᠡᠬᠦᠯᠵᠦ ᠪᠠᠶᠢᠭᠠᠳ ᠵᠥᠪᠰᠢᠶᠡᠷᠡᠬᠦ ᠠᠴᠠ ᠥᠭᠡᠷ᠎ᠡ ᠠᠷᠭ᠎ᠠ ᠦᠭᠡᠢ ᠪᠣᠯᠣᠯ᠎ᠠ ᠃ ᠪᠢ ᠮᠡᠳᠡᠭᠡᠳ ᠪᠠᠶᠢᠭᠰᠠᠨ ᠶᠤᠮ ᠠ᠋᠃      ᠰᠣᠯᠣᠩᠭᠤᠰ ᠲᠤ ᠣᠴᠢᠭᠠᠳ ᠨᠡᠯᠢᠶᠡᠳ ᠬᠡᠳᠦᠨ ᠵᠢᠯ ᠠᠵᠢᠯᠯᠠᠵᠤ ᠣᠪᠣᠭ᠎ᠠ ᠴᠦ ᠮᠥᠩᠭᠦ ᠲᠠᠢ ᠪᠣᠯᠣᠯ᠎ᠠ᠃ ᠰᠤᠷᠠᠭ ᠰᠤᠨᠤᠰᠬᠤ ᠠᠴᠠ ᠡᠮᠡᠭᠡᠨ ᠵᠢᠭᠡᠯᠡᠭᠰᠡᠨ ᠮᠦᠩᠬᠦᠨ ᠤ ᠪᠠᠨ ᠬᠦᠦ ᠶᠢ ᠲᠥᠯᠥᠵᠦ ᠳᠡᠶᠢᠯᠦᠯ ᠦᠭᠡᠢ ᠪᠠᠶᠢᠷᠢ ᠪᠠᠨ ᠠᠯᠳᠠᠭᠠᠳ ᠥᠪᠡᠷ ᠢᠶᠠᠨ ᠬᠥᠭᠰᠢᠳ ᠢ ᠠᠰᠠᠷᠠᠬᠤ ᠭᠠᠵᠠᠷ ᠤᠷᠤᠭᠤ ᠶᠠᠪᠤᠵᠠᠢ᠃ ᠮᠢᠨᠤ ᠬᠥᠬᠡ ᠢᠨᠢᠶᠡᠳᠦ ᠬᠦᠷᠦᠭᠰᠡᠨ ᠭᠡᠵᠦ ᠵᠢᠭᠲᠡᠶᠢᠬᠡᠨ᠃ ᠮᠡᠳᠡᠭᠡᠵᠢ ᠰᠢᠦ ᠳ᠋ᠡ᠂ ᠥᠭᠡᠳᠡ ᠦᠭᠡᠢ ᠥᠬᠢᠨ ᠨᠢ ᠲᠡᠭᠦᠨ ᠳᠤ ᠰᠣᠬᠤᠷ ᠵᠣᠭᠤᠰ ᠴᠦ ᠶᠠᠪᠤᠭᠤᠯᠤᠭ᠎ᠠ ᠦᠭᠡᠢ ᠶᠤᠮ ᠴᠢᠨᠢ᠃ ᠶᠠᠭᠠᠬᠢᠯ᠎ᠠ ᠭᠡᠵᠦ ᠬᠥᠮᠥᠨ ᠤ ᠨᠤᠲᠤᠭ ᠲᠤ ᠵᠣᠪᠠᠵᠤ ᠣᠯᠣᠭᠰᠠᠨ ᠮᠥᠩᠭᠦ ᠪᠠᠨ ᠬᠠᠮᠤᠭ ᠤᠨ ᠳᠤᠷ᠎ᠠ ᠦᠭᠡᠢ ᠬᠥᠮᠥᠨ ᠳᠡᠭᠡᠨ ᠶᠠᠪᠤᠭᠤᠯᠬᠤ ᠪᠤᠢ ᠳ᠋ᠡ᠃ ᠲᠡᠭᠦᠨ ᠤ ᠭᠷᠦ᠋ᠫ ᠤᠨ ᠮᠥᠩᠭᠦ ᠨᠢ ᠬᠤᠭᠤᠯᠠ ᠤᠮᠳᠠ᠂ ᠪᠠᠶᠢᠷᠢᠨ ᠤ ᠮᠥᠩᠭᠦ᠂ ᠵᠢᠭᠡᠯᠡᠭᠰᠡᠨ ᠮᠥᠩᠭᠦᠨ ᠤ ᠬᠦᠦ ᠳᠤ ᠬᠦᠷᠬᠦ ᠶᠠᠮᠠᠷ ᠴᠦ ᠪᠣᠯᠣᠮᠵᠢ ᠪᠠᠶᠢᠬᠤ ᠦᠭᠡᠢ᠃ ᠪᠢ ᠶᠠᠮᠠᠷ ᠶᠡᠭᠡ ᠪᠠᠶᠠᠷᠯᠠᠭᠰᠠᠨ ᠭᠡᠵᠦ ᠰᠠᠨᠠᠨ᠎ᠠ᠃ ᠤᠳᠠᠯ ᠦᠭᠡᠢ ᠡᠬᠡ ᠣᠷᠣᠨ ᠳᠤ ᠪᠠᠨ ᠢᠷᠠᠵᠤ ᠣᠯᠣᠭᠰᠠᠨ ᠮᠥᠩᠭᠦ ᠪᠠᠷ ᠢᠶᠠᠨ ᠮᠠᠶᠢᠮᠠᠢ ᠬᠢᠬᠦ ᠪᠠᠷ ᠰᠢᠢᠳᠦᠯ᠎ᠡ᠃ ᠮᠣᠩᠭᠤᠯ ᠳᠤ ᠢᠷᠡᠭᠡᠳ ᠪᠠᠶᠢᠷᠢ ᠠᠪᠴᠤ ᠳᠤᠬᠢᠵᠢᠨ ᠮᠠᠶᠢᠮᠠᠢ ᠶᠢᠨ ᠠᠵᠢᠯ ᠳᠠᠭᠠᠨ ᠴᠦ ᠣᠷᠣᠪᠠ᠃ ᠬᠥᠭᠰᠢᠨ ᠶᠠᠭᠠᠬᠢᠵᠤ ᠮᠢᠨᠤ ᠬᠠᠶ᠋ᠢᠭ ᠢ ᠣᠯᠣᠭᠰᠠᠨ ᠶᠤᠮ ᠪᠤᠢ ᠪᠦᠦ ᠮᠡᠳᠡ᠂ ᠡᠷᠭᠢᠵᠦ ᠢᠷᠡᠭᠡᠴᠢ ᠭᠡᠵᠦ ᠬᠤᠶᠠᠷ ᠴᠦ ᠤᠳᠠᠭ᠎ᠠ ᠬᠥᠮᠥᠨ ᠢᠶᠠᠷ ᠦᠭᠡ  ᠳᠠᠶᠢᠬᠰᠠᠨ ᠪᠠᠶᠢᠨ᠎ᠠ ᠯᠠᠢ᠃ ᠲᠡᠭᠦᠨ ᠤ ᠵᠥᠨᠥᠭ ᠲᠣᠯᠣᠭᠠᠢ ᠳᠤ ᠶᠠᠭᠠᠬᠢᠬᠤ ᠪᠠᠷ ᠢᠶᠠᠨ ᠨᠠᠮᠠᠶᠢ ᠣᠴᠢᠨ᠎ᠠ ᠭᠡᠰᠡᠨ ᠪᠣᠳᠣᠯ ᠣᠷᠣᠳᠠᠭ ᠪᠠᠶᠢᠨ᠎ᠠ ᠠ᠋᠃ ᠭᠡᠲᠡᠯ᠎ᠡ ᠤᠷᠵᠢᠳᠤᠷ ᠠᠰᠠᠷᠠᠮᠵᠢ ᠶᠢᠨ ᠭᠠᠵᠠᠷ ᠠᠴᠠ ᠶᠠᠷᠢᠵᠤ ᠲᠡᠭᠦᠨ ᠢ ᠨᠠᠰᠤ ᠪᠠᠷᠠᠭᠰᠠᠨ᠂ ᠣᠷᠣᠰᠢᠭᠤᠯᠬᠤ ᠠᠵᠢᠯ ᠳᠤ ᠨᠢ ᠣᠷᠣᠯᠴᠠᠬᠤ ᠦᠦ ᠭᠡᠬᠦ ᠤᠬᠠᠭᠠᠨ ᠲᠠᠢ ᠶᠤᠮ ᠬᠡᠯᠡᠪᠡ᠃ ᠦᠬᠦᠭᠰᠡᠨ ᠬᠤᠶᠢᠨ᠎ᠠ ᠪᠠᠨ ᠴᠦ ᠭᠡᠰᠡᠨ ᠬᠥᠮᠥᠨ ᠳᠤ ᠭᠠᠢ ᠪᠣᠯᠬᠤ ᠶᠤᠮ᠃ ᠨᠠᠳᠠ ᠳᠤ ᠦᠨᠡᠨ ᠳᠡᠭᠡᠨ ᠵᠠᠪ ᠠᠯᠠᠭ᠎ᠠ᠂ ᠵᠠᠪ ᠲᠠᠢ ᠪᠠᠶᠢᠭᠰᠠᠨ ᠴᠦ ᠪᠢ ᠣᠴᠢᠬᠤ ᠦᠭᠡᠢ᠂ ᠶᠠᠷᠰᠢᠭ ᠴᠠᠭᠠᠰᠢ ᠪᠠᠨ᠃ ᠬᠠᠷᠢᠨ ᠪᠢ ᠲᠡᠭᠦᠨ ᠢ ᠦᠬᠦᠭᠰᠡᠨ ᠳᠤ ᠶᠠᠭᠠᠬᠢᠭᠠᠳ ᠪᠠᠶᠠᠷᠯᠠᠬᠤ ᠦᠭᠡᠢ ᠪᠠᠶᠢᠭ᠎ᠠ ᠶᠤᠮ ᠪᠣᠯᠤᠭ᠎ᠠ ᠭᠡᠵᠦ ᠥᠪᠡᠷ ᠠᠴᠠ ᠪᠠᠨ ᠠᠰᠠᠭᠤᠵᠤ ᠰᠠᠭᠤᠯ᠎ᠠ᠃ ᠠᠰᠠᠷᠠᠮᠵᠢ ᠶᠢᠨ ᠭᠠᠵᠠᠷ ᠤᠨ ᠬᠢᠨ ᠳᠤ ︽ᠦᠨᠡᠬᠡᠷ ᠵᠠᠪ ᠪᠠᠶᠢᠬᠤ ᠦᠭᠡᠢ᠂ ᠪᠡᠶ᠎ᠡ ᠮᠠᠭᠤ ᠡᠮᠨᠡᠯᠭᠡ ᠳᠤ ᠬᠡᠪᠲᠡᠵᠦ ᠪᠠᠶᠢᠨ᠎ᠠ︾ ᠭᠡᠰᠡᠨ ᠶᠤᠮ᠃ ᠨᠥᠭᠦᠭᠡᠳᠦᠷ ᠨᠢ ᠳᠠᠬᠢᠨ ᠤᠲᠠᠰᠤᠳᠠᠵᠤ ︽ᠡᠵᠢ ᠶᠢ ᠴᠢᠨᠢ ᠨᠣᠮ ᠶᠣᠰᠣ ᠪᠠᠷ ᠨᠢ ᠨᠤᠲᠤᠭᠯᠠᠭᠤᠯᠤᠭᠰᠠᠨ᠃ ᠡᠵᠢ ᠴᠢᠨᠢ ᠲᠠᠨ ᠳᠤ ᠵᠠᠬᠢᠳᠠᠯ᠂ ᠨᠠᠨᠳᠢᠩᠨᠠᠵᠤ ᠬᠠᠳᠠᠭᠠᠯᠠᠭᠰᠠᠨ ᠡᠳ᠋ ᠵᠦᠢᠯ᠂ ᠮᠥᠩᠭᠦ ᠲᠥᠭᠦᠷᠢᠭ ᠬᠡᠷᠢᠶᠡᠰᠦᠯᠡᠵᠦ ᠦᠯᠡᠳᠡᠭᠡᠭᠰᠡᠨ᠃ ᠢᠷᠠᠵᠤ ᠠᠪᠬᠤ ᠦᠭᠡᠢ ᠪᠣᠯ ᠠᠰᠠᠷᠠᠮᠵᠢ ᠶᠢᠨ ᠭᠠᠵᠠᠷ ᠤᠨ ᠣᠷᠣᠯᠭ᠎ᠠ ᠪᠣᠯᠭᠠᠯ᠎ᠠ︾ ᠭᠡᠵᠦ  ᠰᠢᠷᠦᠬᠦᠯᠡᠳᠡᠭ ᠪᠠᠶᠢᠭ᠎ᠠ᠃ ᠪᠢ ᠭᠠᠶᠢᠬᠠᠬᠤ ᠶᠢᠨ ᠶᠡᠭᠡ ᠪᠠᠷ ᠭᠠᠶᠢᠬᠠᠯ᠎ᠠ᠃ ᠴᠢᠪᠠᠭᠠᠨᠴᠠ ᠳᠤ ᠶᠠᠮᠠᠷ ᠡᠳ᠋ ᠵᠦᠢᠯ᠂ ᠮᠥᠩᠭᠦ ᠲᠥᠭᠦᠷᠢᠭ ᠪᠠᠶᠢᠳᠠᠭ ᠪᠢᠯᠡ᠃ ᠦᠶ᠎ᠡ ᠳᠡᠮᠵᠢᠨ ᠡᠳ᠋ᠯᠡᠵᠦ ᠰᠡᠳᠡᠷᠡᠬᠦ ᠰᠢᠬᠠᠭᠰᠠᠨ ᠭᠠᠭᠴᠠ ᠪᠤᠯᠤᠷ ᠡᠭᠡᠮᠦᠭ ᠪᠠᠶᠢᠵᠤ ᠮᠠᠭᠠᠳ ᠦᠭᠡᠢ᠂ ᠬᠠᠷᠢᠨ ᠮᠥᠩᠭᠦ ᠲᠥᠭᠦᠷᠢᠭ ᠭᠡᠵᠦ ᠡᠯᠡᠭ ᠤᠨ ᠶᠠᠭᠤᠮ᠎ᠠ ᠪᠠᠶᠢᠵᠤ ᠲᠠᠭᠠᠷᠠᠨ᠎ᠠ᠃      ᠠᠵᠢᠯ ᠲᠥᠷᠥᠯ ᠢᠶᠠᠨ ᠵᠣᠬᠢᠴᠠᠭᠤᠯᠤᠭᠠᠳ ᠠᠰᠠᠷᠠᠮᠵᠢ ᠶᠢ ᠵᠣᠷᠢᠯ᠎ᠠ᠃ ᠦᠨᠡᠨ ᠢ ᠬᠡᠯᠡᠬᠦ ᠳᠤ ︽ᠮᠠᠭᠤ ᠰᠠᠨᠠᠭ᠎ᠠ ᠲᠠᠢ ᠬᠥᠭᠰᠢᠨ ᠶᠠᠭᠤ ᠴᠦ ᠬᠠᠳᠠᠭᠠᠯᠠᠭᠰᠠᠨ ᠶᠤᠮ ᠪᠢᠯᠡ᠂ ᠯᠤᠤᠬᠠᠨ ᠨᠤᠭᠤᠳ ᠰᠢᠭ᠋ ᠬᠠᠮᠤᠭ ᠶᠠᠭᠤᠮ᠎ᠠ ᠪᠠᠨ ᠦᠬᠦᠲᠡᠯ᠎ᠡ ᠪᠠᠨ ᠵᠤᠭᠤᠷᠢᠯᠠᠭᠰᠠᠨ ᠴᠦ ᠶᠤᠮ ᠪᠢᠯᠡ ᠦᠦ︾ ᠭᠡᠵᠦ ᠪᠣᠳᠣᠭᠳᠠᠭᠠᠳ ᠰᠣᠨᠢᠷᠬᠠᠯ ᠰᠢᠨᠤᠯ ᠬᠤᠶᠠᠷ ᠪᠠᠭ᠎ᠠ ᠦᠭᠡᠢ ᠬᠥᠳᠡᠯᠦᠭᠰᠡᠨ ᠶᠤᠮ᠃ ᠠᠰᠠᠷᠠᠮᠵᠢ ᠭᠡᠵᠦ ᠶᠠᠭᠠᠬᠢᠭᠰᠠᠨ ᠴᠦ ᠥᠷᠥ ᠡᠪᠡᠳᠦᠯ ᠲᠠᠢ ᠭᠠᠵᠠᠷ ᠪᠠᠶᠢᠳᠠᠭ ᠶᠤᠮ᠂ ᠪᠠᠭᠠᠬᠠᠨ ᠤᠶᠢᠳᠴᠤ ᠴᠥᠬᠦᠷᠡᠭᠰᠡᠨ ᠬᠥᠭᠰᠢᠴᠦᠦᠯ ᠪᠠᠶᠢᠨ᠎ᠠ᠂ ᠠᠵᠠ ᠦᠭᠡᠢ ᠬᠤᠭ ᠤᠳ᠃ ᠠᠰᠠᠷᠠᠮᠵᠢ ᠶᠢᠨ ᠡᠷᠬᠢᠯᠡᠭᠴᠢ ᠭᠡᠵᠦ ᠬᠦᠢᠲᠡᠨ ᠴᠢᠷᠠᠢ ᠲᠠᠢ ᠶᠦᠭᠵᠢᠷ ᠠᠪᠠᠭᠠᠢ ᠨᠠᠳᠠ ᠳᠤ ᠨᠢᠭᠤᠷ ᠥᠭᠬᠦ ᠦᠭᠡᠢ ᠶᠠᠨᠳᠠᠭᠨᠠᠵᠦ ᠪᠠᠶᠢᠭ᠎ᠠ ᠶᠢ ᠨᠢ ᠬᠠᠷᠠᠬᠤ ᠪᠠᠷ ᠨᠢᠭᠤᠷ ᠤᠷᠤᠭᠤ ᠨᠢ ᠨᠢᠯᠪᠤᠴᠢᠬᠠᠮᠠᠷ ᠰᠠᠨᠠᠭᠳᠠᠭᠠᠳ ᠪᠠᠶᠢᠯ᠎ᠠ᠃ ᠲᠡᠷᠡ ᠲᠠᠢ ᠲᠡᠷᠡ ᠦᠭᠡᠢ ᠬᠠᠤᠯᠢ ᠶᠣᠰᠣᠨ ᠤ ᠴᠣᠷ ᠤᠨ ᠭᠠᠭᠴᠠ ᠥᠪ ᠵᠠᠯᠭᠠᠮᠵᠢᠯᠠᠭᠴᠢ ᠪᠣᠯᠣᠭᠰᠠᠨ ᠨᠠᠳᠠ ᠳᠤ ᠥᠭᠬᠦ ᠦᠭᠡᠢ ᠭᠡᠳ ᠲᠡᠷᠡ ᠶᠠᠭᠠᠬᠢᠬᠤ ᠪᠢᠯᠡ ᠳ᠋ᠡ᠃ ᠨᠢᠭᠡ ᠬᠠᠶᠢᠷᠴᠠᠭ ᠲᠠᠢ ᠵᠦᠢᠯ ᠭᠠᠷᠭᠠᠵᠤ ᠦᠭᠬᠦᠯ᠎ᠡ᠃ ᠶᠣᠰᠣ ᠶᠢ ᠪᠣᠳᠣᠵᠤ ᠨᠢᠭᠤᠷ ᠳᠡᠭᠡᠷ᠎ᠡ ᠨᠢ ᠭᠡᠷ ᠠᠴᠠ ᠵᠠᠬᠢᠳᠠᠯ ᠢ ᠭᠠᠷᠭᠠᠵᠤ ᠤᠩᠰᠢᠯ᠎ᠠ᠃      ︽ᠡᠨᠡ ᠬᠤᠷᠸ᠎ᠠ ᠶᠢᠨ ᠨᠠᠷᠠ ᠪᠣᠯᠣᠭᠰᠠᠨ᠂ ᠶᠠᠭᠤ ᠶᠠᠭᠤᠨ ᠠᠴᠠ ᠬᠠᠶᠢᠷᠠᠲᠠᠢ ᠭᠠᠭᠴᠠ ᠦᠷ᠎ᠡ ᠮᠢᠨᠢ᠃ ᠮᠢᠨᠤ ᠡᠴᠦᠰ ᠤᠨ ᠭᠠᠭᠴᠠ ᠬᠦᠰᠡᠯ ᠪᠣᠯ ᠡᠷᠳᠡᠨᠢ ᠪᠣᠯᠣᠭᠰᠠᠨ‌ᠥᠬᠢᠨ ᠴᠢᠮᠠᠶᠢ ᠪᠠᠨ ᠨᠢᠭᠡ ᠦᠨᠦᠷᠯᠡᠴᠢᠭᠡᠭᠡᠳ᠂ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠪᠠᠨ ᠳᠦᠰᠢᠬᠦᠯᠵᠦ ᠬᠠᠳᠠᠨ ᠭᠡᠷ ᠲᠡᠭᠡᠨ ᠣᠴᠢᠬᠤ ᠪᠠᠶᠢᠯ᠎ᠠ᠃ ᠭᠡᠪᠡᠴᠦ ᠡᠵᠢ ᠨᠢ ᠴᠢᠮᠠᠶᠢ ᠢᠷᠡᠬᠦ ᠡᠰᠡᠬᠦ ᠶᠢ ᠮᠡᠳᠡᠬᠦ ᠦᠭᠡᠢ᠂ ᠰᠢᠨᠠᠯᠤᠨ ᠬᠡᠪᠲᠡᠵᠦ ᠪᠠᠶᠢᠨ᠎ᠠ᠃ ᠦᠷᠦ ᠠᠴᠠ ᠤᠨᠠᠭᠰᠠᠨ ᠦᠷ᠎ᠡ ᠴᠢᠮᠠᠶᠢ ᠪᠠᠨ ᠢᠷᠡᠬᠦ ᠦᠭᠡᠢ ᠪᠠᠶᠢᠯ᠎ᠠ ᠭᠡᠳ ᠵᠥᠨᠥᠭ ᠲᠣᠯᠣᠭᠠᠢ ᠨᠠᠳᠠ ᠳᠤ ᠭᠤᠮᠣᠳᠠᠬᠤ ᠡᠷᠬᠡ ᠪᠠᠶᠢᠬᠤ ᠦᠭᠡᠢ᠂ ᠨᠥᠭᠦᠭᠡ ᠶᠢᠷᠲᠢᠨᠴᠦ ᠳᠤ ᠣᠴᠢᠭᠰᠠᠨ ᠴᠦ ᠭᠡᠰᠡᠨ ᠴᠢᠨᠦ ᠰᠠᠶᠢᠨ ᠰᠠᠶᠢᠬᠠᠨ ᠤ ᠲᠥᠯᠥᠭᠡ ᠵᠠᠯᠪᠠᠷᠢᠵᠤ᠂ ᠰᠠᠴᠤᠯᠢ ᠪᠠᠨ ᠡᠷᠭᠦᠬᠦ ᠪᠣᠯᠣᠨ᠎ᠠ᠃      ᠴᠢᠨᠦ ᠡᠴᠢᠭᠡ ᠶᠢ ᠵᠠᠪᠤ ᠭᠡᠳᠡᠭ ᠬᠥᠮᠥᠨ ᠪᠠᠶᠢᠭᠰᠠᠨ᠂ ᠴᠢᠮᠠᠶᠢ ᠰᠣᠯᠣᠩᠭᠤᠰ ᠲᠤ ᠶᠠᠪᠤᠳᠠᠭ ᠵᠢᠯ ᠥᠭᠡᠳᠡ ᠪᠣᠯᠣᠭᠰᠠᠨ᠃ ᠡᠨᠡ ᠣᠯᠠᠨ ᠵᠢᠯ ᠴᠢᠮ᠎ᠠ ᠳᠤ ᠳᠤᠷᠠᠰᠤᠭ᠎ᠠ ᠦᠭᠡᠢ ᠶᠢᠨ ᠤᠴᠢᠷ ᠪᠣᠯ ᠲᠡᠷᠡ ᠶᠡᠭᠡ ᠬᠢᠯᠢᠨᠴᠡ ᠨᠢᠭᠦᠯ ᠲᠠᠢ ᠬᠥᠮᠥᠨ ᠪᠠᠶᠢᠭᠰᠠᠨ ᠶᠤᠮ᠃ ᠶᠡᠭᠡ ᠴᠦ ᠵᠦᠳᠡᠷᠡᠭᠰᠡᠨ ᠭᠡᠨ᠎ᠡ ᠯᠠᠢ ᠬᠥᠭᠡᠷᠦᠬᠦᠢ᠃ ᠠᠬ᠎ᠠ ᠳᠡᠭᠦᠦ ᠨᠠᠷ ᠨᠢ ᠣᠰᠣᠯ ᠢᠶᠠᠷ ᠦᠷᠡᠭᠳᠡᠵᠦ᠂ ᠥᠪᠡᠷ ᠢᠶᠠᠨ ᠲᠠᠭ ᠰᠤᠬᠤᠷᠠᠭᠠᠳ ᠬᠠᠷᠠᠵᠤ ᠬᠠᠨᠳᠤᠬᠤ ᠬᠥᠮᠥᠨ ᠦᠭᠡᠢ ᠦᠢᠯᠡ ᠪᠠᠨ ᠢᠳᠡᠭᠰᠡᠨ᠂ ᠣᠳᠣ ᠮᠢᠨᠤ ᠪᠠᠶᠢᠭ᠎ᠠ ᠠᠰᠠᠷᠠᠮᠵᠢᠨ ᠳᠤ ᠨᠢᠳᠦ ᠠᠨᠢᠭᠰᠠᠨ ᠰᠤᠷᠠᠭ ᠲᠠᠢ᠃ ᠠᠷᠭ᠎ᠠ ᠴᠦ ᠦᠭᠡᠢ ᠪᠢᠵᠡ ᠳ᠋ᠡ᠂ ᠲᠡᠷᠡ ᠬᠥᠮᠥᠨ ᠤ ᠬᠢᠭᠰᠡᠨ ᠠᠷᠠᠨᠳᠠᠭ ( ᠨᠢᠬᠦᠯ )᠎ ᠢ ᠡᠵᠢ ᠥᠬᠢᠨ ᠬᠤᠶᠠᠷ ᠴᠦ ᠡᠳ᠋ᠯᠡᠵᠦ ᠪᠠᠷᠠᠭ᠎ᠠ ᠦᠭᠡᠢ ᠪᠠᠶᠢᠨ᠎ᠠ᠃ ᠡᠵᠢ ᠨᠢ ᠲᠡᠷᠡ ᠬᠥᠮᠥᠨ ᠵᠦᠪᠯᠡᠯᠳᠦ ᠳᠤ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠰᠡᠨ ᠭᠢᠯᠠᠯᠵᠠᠭᠰᠠᠨ ᠴᠧᠺᠢᠰᠲ ( ᠵᠦᠪᠯᠡᠯᠳᠦ ᠬᠤᠯᠪᠤᠭᠠᠳᠤ ᠤᠯᠤᠰ ᠲᠤ ᠨᠡᠶᠢᠭᠡᠮ ᠢ ᠠᠶᠤᠯ ᠠᠴᠠ ᠬᠠᠮᠠᠭᠠᠯᠠᠬᠤ ᠶᠠᠮᠤᠨ ᠤ ᠰᠤᠷᠭᠠᠭᠤᠯᠢ ᠶᠢ ᠳᠡᠬᠦᠰᠦᠭᠰᠡᠨ ᠬᠦᠮᠦᠨ ᠢ ᠢᠩᠬᠢᠵᠦ ᠨᠡᠷᠡᠯᠡᠳᠡᠭ )᠂ ᠠᠷᠢᠬᠢ ᠲᠠᠮᠠᠬᠢ ᠬᠡᠷᠡᠭᠯᠡᠳᠡᠭ ᠦᠭᠡᠢ ᠲᠣᠮᠣᠭᠠᠲᠠᠢ ᠬᠥᠮᠥᠨ ᠭᠡᠵᠦ ᠢᠲᠡᠭᠡᠭᠡᠳ ᠬᠠᠷ᠎ᠠ ᠨᠢᠯᠬ᠎ᠠ ᠪᠠᠷ ᠢᠶᠠᠨ ᠬᠠᠨᠢᠯᠠᠭᠰᠠᠨ ᠶᠤᠮ᠃ ᠲᠡᠷᠡ ᠯᠡ ᠴᠢ ᠪᠢᠳᠠ ᠬᠤᠶᠠᠷ ᠤᠨ ᠠᠮᠢᠳᠤᠷᠠᠯ ᠳᠤ ᠠᠷᠢᠯᠬᠤ ᠦᠭᠡᠢ ᠬᠠᠷ᠎ᠠ ᠲᠣᠯᠪᠤ ᠦᠯᠡᠳᠡᠭᠡᠭᠰᠡᠨ᠂ ᠮᠢᠨᠤ ᠨᠠᠰᠤᠨ ᠤ ᠪᠥᠭᠰᠡᠨ ᠳᠤ ᠢᠩᠭᠢᠵᠦ ᠦᠢᠯᠡ ᠪᠠᠨ ᠦᠵᠡᠬᠦ ᠶᠢᠨ ᠴᠤᠨᠳᠤᠩ (ᠳᠠᠪᠢᠯᠠᠩ ᠢᠷᠸ᠎ᠠ  ᠪᠡᠯᠭᠡᠳᠡᠯ ) ᠪᠣᠯᠣᠭᠰᠠᠨ ᠠᠵᠢ᠃ ᠡᠴᠢᠭᠡ ᠴᠢᠨᠢ ᠲᠠᠩᠨᠠᠭᠤᠯ ᠤᠨ ᠭᠠᠵᠠᠷ ᠨᠢᠭᠤᠴᠠ ᠠᠵᠢᠯ ᠬᠢᠳᠡᠭ ᠭᠡᠳ ᠭᠤᠣᠯ ᠲᠥᠯᠥᠪ ᠰᠥᠨᠢ ᠣᠷᠣᠢ ᠭᠠᠷᠴᠤ ᠶᠠᠪᠤᠭᠠᠳ ᠦᠷ ᠴᠦ᠊ᠷ ᠢᠶᠠᠷ ᠤᠯᠠᠭᠠᠨ ᠨᠢᠳᠦᠯᠡᠭᠰᠡᠭᠡᠷ ᠢᠷᠠᠨ᠎ᠠ᠃ ᠪᠢ ᠲᠥᠷᠥ ᠶᠢᠨ ᠨᠢᠭᠤᠴᠠ ᠠᠯᠪᠠ ᠭᠡᠳ ᠶᠠᠭ ᠶᠠᠭᠤ ᠬᠢᠳᠡᠭ ᠢ ᠨᠢ ᠰᠣᠨᠢᠷᠬᠠᠵᠤ ᠠᠰᠠᠭᠤᠳᠠᠭ ᠦᠭᠡᠢ ᠪᠠᠶᠢᠪᠠ᠃      ᠴᠢᠮᠠᠶᠢ ᠬᠤᠶᠠᠷᠬᠠᠨ ᠰᠠᠷ᠎ᠠ ᠲᠠᠢ ᠤᠯᠠᠭᠠᠨ ᠨᠢᠯᠵᠠᠷᠠᠢ ᠪᠠᠶᠢᠬᠤ ᠳᠤ ᠪᠢ ᠰᠠᠨᠠᠮᠰᠠᠷ ᠦᠭᠡᠢ ᠲᠣᠬᠢᠶᠠᠯᠳᠤᠯ ᠢᠶᠠᠷ ᠲᠡᠷᠡ ᠬᠥᠮᠥᠨ ᠤ ᠶᠠᠮᠠᠷ ᠠᠵᠢᠯ ᠬᠢᠳᠡᠭ ᠢ ᠣᠯᠵᠤ ᠮᠡᠳᠡᠭᠰᠡᠨ᠂ ᠲᠡᠶᠢᠮᠦ ᠠ᠋ ᠡᠴᠢᠭᠡ ᠴᠢᠨᠢ ᠭᠦᠢᠴᠡᠳᠬᠡᠭᠴᠢ ( ᠦᠬᠦᠬᠦ ᠶᠠᠯᠠᠳᠠᠨ ᠢ ᠬᠤᠷᠤᠭᠠᠳᠠᠭ ᠬᠦᠮᠦᠨ ) ᠪᠠᠶᠢᠭᠰᠠᠨ ᠶᠤᠮ᠃ ᠭᠡᠮᠲᠡᠢ ᠭᠡᠮ ᠦᠭᠡᠢ ᠬᠡᠴᠢᠨᠡᠨ ᠣᠯᠠᠨ ᠬᠥᠮᠥᠨ ᠤ ᠦᠷ᠎ᠡ ᠶᠢ ᠴᠢᠨᠠᠭᠰᠢ ᠬᠠᠷᠠᠭᠤᠯᠤᠭᠰᠠᠨ ᠶᠤᠮ ᠪᠦᠦ ᠮᠡᠳᠡ᠃ ᠡᠭᠦᠨ ᠢ ᠨᠢ ᠪᠠᠲᠤᠲᠠᠢ ᠮᠡᠳᠡᠭᠰᠡᠨ ᠪᠢ ᠵᠤᠷᠪᠤᠰ ᠪᠢᠴᠢᠵᠦ ᠣᠷᠬᠢᠭᠠᠳ ᠥᠯᠥᠭᠡᠢ ᠲᠠᠢ ᠴᠢᠮᠠᠶᠢ ᠠᠪᠴᠤ ᠡᠪᠦᠯ ᠤᠨ ᠬᠦᠢᠲᠡᠨ ᠳᠤ ᠣᠷᠭᠤᠭᠰᠠᠨ ᠶᠤᠮ᠃ ᠬᠠᠮᠢᠶᠠᠲᠠᠨ ᠰᠠᠳᠤᠨ᠂ ᠨᠠᠶᠢᠵᠠ ᠨᠦᠬᠦᠳ ᠤᠨ ᠢᠶᠠᠷ ᠢᠶᠠᠨ ᠪᠠᠶᠢᠪᠠᠯ ᠵᠠᠪᠤ ᠣᠯᠣᠭᠠᠳ ᠢᠷᠡᠬᠦ ᠠᠴᠠ ᠠᠶᠤᠵᠤ ᠲᠠᠨᠢᠬᠤ ᠦᠭᠡᠢ ᠠᠶᠢᠯ ᠤᠨ ᠬᠠᠰᠢᠶᠠᠨ ᠳᠤ ᠭᠡᠷ ᠪᠠᠷᠢᠵᠤ ᠪᠠᠭᠤᠭᠠᠳ ᠮᠥᠨ ᠴᠦ ᠬᠡᠴᠡᠭᠦᠦ ᠪᠠᠶᠢᠭᠰᠠᠨ ᠳ᠋ᠠ᠃ ᠡᠷᠳᠡᠨᠢ ᠪᠣᠯᠣᠭᠰᠠᠨ ᠦᠷ᠎ᠡ ᠴᠢᠮᠠᠶᠢ ᠲᠡᠶᠢᠮᠦ ᠮᠠᠭᠤ ᠢᠷᠸ᠎ᠠ ᠶᠢᠨ ᠠᠮᠢᠲᠠᠨ ᠤ ᠳᠡᠷᠭᠡᠳᠡ ᠥᠰᠬᠡᠨ᠎ᠡ ᠭᠡᠳᠡᠭ ᠤᠬᠠᠭᠠᠨ ᠰᠠᠨᠠᠭᠠᠨ ᠳᠤ ᠪᠠᠭᠲᠠᠬᠤ ᠦᠭᠡᠢ ᠬᠡᠷᠡᠭ ᠪᠠᠶᠢᠯ᠎ᠠ᠃ ᠲᠡᠶᠢᠮᠦ ᠴᠦ ᠤᠴᠢᠷ ᠠᠴᠠ ᠴᠢᠮᠠᠶᠢ ᠥᠪᠡᠷ ᠢᠶᠠᠷ ᠢᠶᠠᠨ ᠣᠪᠣᠭᠯᠠᠵᠤ᠂ ᠨᠡᠷ᠎ᠡ ᠶᠢ ᠴᠢᠨᠢ ᠥᠭᠡᠷᠡᠴᠢᠯᠡᠭᠡᠳ ᠲᠥᠷᠥᠭᠰᠡᠨ ᠤ ᠭᠡᠷᠡᠴᠢᠯᠡᠭᠡ᠂ ᠪᠢᠴᠢᠭ ᠪᠠᠷᠢᠮᠲᠠ ᠰᠣᠯᠢᠭᠤᠯᠵᠤ ᠠᠪᠬᠤ ᠭᠡᠵᠦ ᠬᠢᠷᠢᠨ ᠳᠡᠭᠡᠨ ᠵᠦᠳᠡᠷᠡᠭᠰᠡᠨ ᠶᠤᠮ᠃ ᠢᠳᠡᠷ ᠶᠢᠰᠦ ᠪᠠᠷ ᠨᠢᠯᠬ᠎ᠠ ᠪᠡᠶ᠎ᠡ ᠲᠠᠢ ᠡᠮᠡᠭᠲᠡᠢ᠂ ᠤᠯᠠᠭᠠᠨ ᠨᠢᠯᠵᠠᠷᠠᠢ ᠥᠬᠢᠨ ᠬᠤᠶᠠᠷ ᠰᠡᠶᠢᠮᠡᠬᠡᠢ ᠲᠦᠷᠪᠡᠨ ᠬᠠᠨᠠᠳᠤ ᠳᠤ ᠮᠥᠩᠭᠦ ᠴᠠᠭᠠᠨᠰᠣ᠂ ᠬᠤᠭᠤᠯᠠ ᠤᠮᠳᠠ ᠮᠠᠭᠤᠲᠠᠢ᠂ ᠲᠡᠷᠡ ᠬᠥᠮᠥᠨ ᠢ ᠬᠡᠵᠢᠶ᠎ᠡ ᠣᠷᠣᠭᠠᠳ ᠢᠷᠡᠬᠦ ᠪᠣᠯ ᠭᠡᠵᠦ ᠠᠶᠤᠵᠤ ᠰᠠᠭᠤᠬᠤ ᠯᠡ ᠬᠠᠮᠤᠭ ᠤᠨ ᠬᠡᠴᠡᠭᠦᠦ ᠪᠠᠶᠢᠵᠠᠢ᠃ ᠵᠠᠪᠤ ᠬᠠᠮᠢᠭ᠎ᠠ ᠣᠴᠢᠵᠤ ᠡᠷᠢᠯ ᠰᠤᠷᠠᠯ ᠪᠣᠯᠵᠤ ᠰᠦᠢᠳ ᠪᠣᠯᠣᠯ ᠦᠭᠡᠢ ᠬᠡᠳᠦᠬᠡᠨ ᠰᠠᠷ᠎ᠠ ᠶᠢᠨ ᠳᠠᠷᠠᠭ᠎ᠠ ᠪᠠᠰᠠ ᠨᠢᠭᠡ ᠵᠠᠯᠠᠭᠤ ᠥᠬᠢᠨ ᠲᠠᠢ ᠳᠡᠷ᠎ᠡ ᠨᠡᠶᠢᠯᠡᠭᠦᠯᠦᠭᠰᠡᠨ ᠭᠡᠵᠦ ᠳᠤᠭᠤᠯᠳᠠᠭᠰᠠᠨ᠃ ᠪᠢ ᠭᠡᠳᠡᠭ ᠲᠡᠨᠡᠭ ᠬᠥᠮᠥᠨ ᠡᠴᠢᠭᠡ ᠶᠢᠨ ᠴᠢᠨᠢ ᠨᠠᠮᠠᠶᠢ ᠡᠷᠭᠢᠭᠦᠯᠵᠦ ᠪᠠᠶᠢᠬᠤ ᠳᠠᠭᠠᠨ ᠪᠡᠯᠡᠭᠯᠡᠭᠰᠡᠨ ᠭᠡᠵᠢᠭᠡᠨ ᠤ ᠳᠠᠷᠤᠭᠤᠯᠭ᠎ᠠ ᠶᠢ ᠴᠢᠮ᠎ᠠ ᠳᠤ ᠬᠡᠷᠡᠭ ᠪᠣᠯᠣᠨ᠎ᠠ ᠭᠡᠳ ᠬᠠᠪ ᠳᠠᠷᠤᠭᠠᠳ ᠭᠠᠢ ᠳᠠᠭᠤᠳᠠᠭᠠᠳ ᠪᠠᠶᠢᠭᠰᠠᠨ ᠢᠶᠠᠨ ᠣᠳᠣ ᠯᠡ ᠤᠬᠠᠭᠠᠷᠠᠵᠤ᠂ ᠬᠠᠷ᠎ᠠ ᠲᠣᠯᠣᠭᠠᠢ ᠪᠠᠨ ᠰᠢᠭᠠᠵᠦ ᠪᠠᠶᠢᠨ᠎ᠠ᠃ ᠮᠢᠨᠤ ᠥᠬᠢᠨ ᠡᠭᠦᠨ ᠢ ᠵᠠᠷᠤᠵᠤ ᠪᠣᠷᠣᠯᠠᠭᠤᠯᠤᠭᠠᠳ ᠪᠦᠭᠦᠳᠡᠭᠡᠷ ᠨᠢ ᠥᠭᠯᠢᠭᠡ ᠥᠭᠴᠦ᠂ ᠪᠢᠳᠠ ᠬᠤᠶᠠᠷ ᠤᠨ ᠠᠷᠤ ᠠᠴᠠ ᠪᠤᠶᠠᠨ ᠬᠢᠭᠡᠷᠡᠢ᠂ ᠬᠤᠶᠠᠷ ᠯᠠᠩ ᠰᠢᠵᠢᠷ ᠠᠯᠲᠠ ᠣᠷᠣᠭᠰᠠᠨ ᠶᠤᠮ ᠰᠢᠦ᠃      ᠬᠠᠷᠢᠨ ᠮᠢᠨᠤ ᠡᠪᠦᠭᠡ ᠳᠡᠭᠡᠳᠦᠰ ᠠᠴᠠ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠪᠤᠯᠤᠷ ᠡᠭᠡᠮᠦᠭ᠂ ᠳᠣᠲᠣᠷ᠎ᠠ ᠪᠠᠨ ᠡᠷᠡᠭᠡᠢ ᠎ ᠶᠢᠨ ᠥᠨᠳᠡᠭᠡᠨ ᠤ ᠳᠠᠶᠢᠲᠠᠢ ᠠᠯᠲᠠᠨ ᠽᠦᠩᠺᠪᠠ ᠪᠤᠷᠬᠠᠨ ᠪᠦᠬᠦᠢ ᠮᠥᠩᠭᠦᠨ ᠭᠤᠤ ᠲᠠᠢ ᠰᠠᠬᠢᠭᠤᠰᠤ᠂ ᠴᠢᠮ᠎ᠠ ᠳᠤ ᠯᠡ ᠭᠡᠵᠦ ᠬᠠᠳᠠᠭᠠᠯᠠᠭᠰᠠᠨ ᠬᠡᠳᠦᠨ ᠬᠠᠯᠲᠠᠷ ᠲᠥᠭᠦᠷᠢᠭ ᠲᠤ ᠨᠢᠭᠦᠯ ᠬᠢᠯᠢᠨᠴᠡ ᠪᠠᠶᠢᠬᠤ ᠦᠭᠡᠢ᠃ ᠪᠢ ᠴᠢᠮᠠᠶᠢ ᠰᠣᠯᠣᠩᠭᠤᠰ ᠲᠤ ᠶᠠᠪᠤᠬᠤ ᠳᠤ ᠪᠠᠶᠢᠷᠢ ᠪᠠᠨ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠪᠠᠨ ᠮᠡᠳᠡᠷᠡᠭᠡᠳ ᠭᠷᠦ᠋ᠫ ᠤᠨ ᠢᠶᠠᠨ ᠬᠡᠳᠦ ᠪᠠᠷ ᠪᠠᠩᠬᠢ ᠶᠢᠨ ᠬᠦᠦ᠂ ᠪᠠᠶᠢᠷᠢᠨ ᠤ ᠮᠥᠩᠭᠦ ᠪᠠᠨ ᠴᠦ ᠲᠥᠯᠥᠬᠦ ᠦᠭᠡᠢ ᠬᠠᠳᠠᠭᠠᠯᠠᠭᠰᠠᠨ᠂ ︿ᠶᠠᠭᠠᠬᠢᠬᠤᠪ ᠬᠤᠵᠢᠮ ᠥᠬᠢᠨ ᠳᠤ ᠮᠢᠨᠢ ᠬᠡᠷᠡᠭ ᠪᠣᠯᠬᠤ ᠴᠦ ᠪᠢᠯᠡ ᠦᠦ ᠬᠥᠭᠡᠷᠦᠬᠦᠢ ᠮᠢᠨᠢ﹀ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠯ᠎ᠠ᠃ ᠠᠰᠠᠷᠠᠮᠵᠢ ᠬᠡᠮᠡᠬᠦ ᠡᠨᠡ ᠪᠤᠶᠠᠨ ᠲᠠᠢ ᠭᠠᠵᠠᠷ ᠢᠷᠡᠨ ᠢᠷᠡᠳᠡᠯ᠎ᠡ ᠪᠠᠨ ᠡᠵᠢ ᠨᠢ ᠣᠯᠢᠭ ᠲᠠᠢ ᠴᠦ ᠬᠤᠭᠤᠯᠠ ᠢᠳᠡᠭᠡ ᠦᠭᠡᠢ ᠥᠯᠥᠩ ᠵᠡᠯᠮᠡᠭᠦᠨ ᠪᠠᠶᠢᠵᠤ ᠬᠡᠳᠦᠨ ᠲᠥᠭᠦᠷᠢᠭ ᠢᠶᠠᠨ ᠬᠤᠷᠠᠮᠳᠤᠯᠠᠭᠤᠯᠤᠭᠰᠠᠨ ᠶᠤᠮ ᠰᠢᠦ᠃ ᠯᠠᠪ ᠯᠡ ᠰᠠᠶᠢᠨ ᠢ ᠨᠢ ᠪᠢᠰᠢ ᠶᠤᠮ ᠠ᠋ ᠭᠡᠬᠦ ᠳᠤ ᠰᠠᠭᠠᠷ ᠨᠢ ᠴᠦ ᠪᠣᠯᠲᠤᠭᠠᠢ ᠨᠢᠭᠡ ᠬᠥᠯ ᠳᠡᠭᠦᠵᠢᠯᠡᠬᠦ ᠤᠨᠤᠭ᠎ᠠ ᠠᠪᠴᠤ ᠠᠪᠴᠦ ᠬᠦᠷᠬᠦ ᠪᠠᠶᠢᠬ᠎ᠠ᠃ ᠥᠬᠢᠨ ᠮᠢᠨᠢ ᠡᠭᠦᠨ ᠠᠴᠠ ᠬᠠᠳᠠᠭᠠᠯᠠᠬᠤ ᠶᠢ ᠨᠢ ᠬᠠᠳᠠᠭᠠᠯᠠᠵᠤ᠂ ᠵᠠᠷᠤᠵᠤ ᠦᠷᠡᠬᠦ ᠶᠢ ᠨᠢ ᠵᠠᠷᠤᠵᠤ ᠦᠷᠡᠭᠡᠷᠡᠢ᠃ ᠡᠴᠦᠰ ᠲᠤ ᠨᠢ ᠡᠵᠢ ᠨᠢ ᠦᠷ᠎ᠡ ᠳᠡᠭᠡᠨ ᠭᠠᠭᠴᠠᠬᠠᠨ ᠵᠦᠢᠯ ᠵᠠᠬᠢᠶ᠎ᠠ᠃ ᠪᠢ ᠤᠯᠠᠭᠠᠨ ᠭᠤᠣᠯ᠂ ᠡᠴᠦᠰ ᠤᠨ ᠠᠮᠢᠰᠬᠤᠯ ᠢᠶᠠᠨ ᠲᠠᠰᠤᠷᠠᠲᠠᠯ᠎ᠠ ᠭᠠᠭᠴᠠᠬᠠᠨ ᠴᠢᠨᠦ ᠲᠥᠯᠥᠭᠡ ᠵᠠᠯᠪᠠᠷᠢᠬᠤ ᠪᠣᠯᠣᠨ᠎ᠠ᠃ ᠴᠢ ᠬᠤᠵᠢᠮ ᠴᠦ ᠬᠠᠮᠢᠶ᠎ᠠ ᠦᠭᠡᠢ ᠨᠢᠭᠡᠨ ᠴᠠᠭ ᠲᠤ ᠡᠵᠢ ᠪᠠᠨ ᠠᠭᠤᠴᠢᠯᠠᠵᠤ᠂ ᠮᠢᠨᠤ ᠴᠢᠮᠠᠶᠢ ᠭᠡᠬᠦ ᠰᠡᠳᠬᠢᠯ ᠢ ᠵᠥᠪ ᠤᠬᠠᠭᠠᠷᠠᠪᠠᠯ ᠥᠭᠡᠷ᠎ᠡ ᠬᠦᠰᠡᠬᠦ ᠵᠦᠢᠯ ᠦᠭᠡᠢ᠃ ᠡᠪᠡᠢ ᠦᠷ᠎ᠡ ᠮᠢᠨᠢ᠂ ᠡᠵᠢ ᠨᠢ ᠥᠬᠢᠨ ᠢᠶᠠᠨ ᠦᠨᠦᠰᠦᠶ᠎ᠡ᠃︾                           ︵ᠤᠯᠠᠭᠠᠨᠪᠠᠭᠠᠳᠤᠷ ᠬᠦᠬᠡᠬᠤᠳᠠ 2008 — 2011 ᠤᠨ︶       ᠡᠬᠢ ᠰᠤᠷᠪᠤᠯᠵᠢ >>>
 
ᠢᠷᠡᠯᠲᠡ᠄ ᠬᠡᠰᠢᠭᠳᠡᠨ ᠮᠤᠩᠭᠤᠯ ᠰᠦᠯᠵᠢᠶ᠎ᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠭᠠᠵᠠᠷ ᠤᠨ ᠵᠢᠷᠤᠭ ᠢ ᠵᠢᠷᠤᠮᠵᠢᠭᠤᠯᠤᠨ ᠬᠡᠷᠡᠭᠯᠡᠵᠦ ᠣᠭᠲᠣᠬᠠᠨ ᠴᠤ ᠪᠤᠷᠤᠭᠤ ᠭᠠᠷᠭᠠᠵᠤ ᠪᠤᠯᠬᠤ ᠦᠭᠡᠢ
︽ᠤᠮᠠᠷᠠᠲᠤ ᠬᠢᠯᠢ ᠶᠢᠨ ᠰᠣᠶᠣᠯ︾᠎ ᠢ ᠪᠠᠳᠠᠷᠠᠭᠤᠯᠵᠤ ᠰᠣᠶᠣᠯ ᠤᠨ ᠬᠦᠴᠦᠷᠬᠡᠭ ᠣᠷᠣᠨ ᠢ ᠲᠦᠷᠭᠡᠳᠬᠡᠨ ᠁
ᠳᠠᠷᠦ᠋ᠢᠬᠠᠨ ᠬᠦᠢᠴᠡᠳᠬᠡᠵᠦ ᠦᠨᠡᠨ ᠬᠦ ᠠᠳᠬᠤᠨ ᠪᠣᠳᠠᠲᠠᠢ ᠠᠵᠢᠯᠯᠠᠬᠤ ᠶᠢ ᠲᠠᠳᠬᠠᠯ ᠪᠣᠯᠭᠠᠶ᠎ᠠ
ᠠᠷᠠᠳ ᠲᠦᠮᠡᠨ ᠢ ᠳᠡᠭᠡᠳᠦᠯᠡᠬᠦ ᠶᠢ ᠢᠮᠠᠭᠲᠠ ᠪᠠᠷᠢᠮᠲᠠᠯᠠᠰᠤᠭᠠᠢ
ᠴᠠᠭ ᠦᠶ᠎ᠡ ᠶᠢᠨ ᠤᠷᠤᠰᠬᠠᠯ ᠪᠠ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠤ ᠪᠣᠯᠪᠠᠰᠤᠨ ᠳᠠᠪᠰᠢᠯᠲᠠ ᠶᠢᠨ ᠴᠢᠭᠯᠡᠯ ᠢ ᠬᠥᠲᠥᠯᠥᠨ ᠁
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号