ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠮᠢᠨᠥ ᠰᠠᠶᠢᠬᠠᠨ ᠠᠪᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2016/3/11
     ᠪᠢ ᠢᠨᠢᠶᠡᠵᠦ ᠪᠠᠶᠢᠭ᠎ᠠ ᠦᠶ᠎ᠡ ᠳᠡᠭᠡᠨ ᠦᠪᠡᠷ ᠤᠨ ᠢᠶᠠᠨ ᠪᠢᠰᠢ᠂ ᠠᠪᠤ ᠶᠢᠨ ᠢᠶᠠᠨ ᠲᠠᠭᠤ ᠬᠤᠭᠤᠯᠠᠢ ᠶᠢ ᠰᠤᠨᠤᠰᠳᠠᠭ ᠪᠢᠯᠠ᠃ ᠬᠦᠮᠥᠨ ᠦᠷ᠎ᠡ ᠬᠡᠤᠭᠡᠳ ᠲᠡᠭᠡᠨ ᠰᠢᠩᠬᠡᠵᠦ ᠤᠷᠤᠰᠢᠨ ᠪᠠᠶᠢᠬᠤ ᠨᠢ ᠦᠨᠡᠨ ᠬᠢᠬᠡᠳ ᠠᠪᠤ ᠮᠢᠨᠢ ᠲᠠᠭᠠᠯᠠᠯ ᠲᠡᠭᠦᠰᠦᠭᠰᠡᠨ ᠠᠴᠠ ᠬᠤᠶᠢᠰᠢ 3 ᠵᠢᠯ ᠦᠩᠬᠡᠷᠡᠭᠰᠡᠨ ᠴᠦ ᠰᠠᠨᠠᠭ᠎ᠠ ᠰᠡᠳᠬᠢᠯ ᠠᠴᠠ ᠤᠭᠳᠤᠬᠠᠨ ᠴᠦ ᠦᠯᠥ ᠭᠠᠷᠤᠨ᠎ᠠ᠃ ᠠᠪᠤ ᠮᠢᠨᠢ ᠨᠠᠮᠠᠢᠢ ᠪᠤᠳᠤᠪᠠᠯ ᠲᠦᠯᠬᠡᠨ ᠲᠠᠶᠢᠪᠤᠩ ᠬᠦᠮᠥᠨ ᠪᠠᠶᠢᠯ᠎ᠠ᠃ ᠶᠠᠮᠠᠷ ᠴᠦ ᠬᠦᠮᠥᠨ ᠲᠠᠢ ᠦᠬᠡ ᠬᠡᠯᠡ ᠪᠠᠨ ᠤᠯᠤᠯᠴᠠᠨ᠎ᠠ᠃ ᠬᠠᠮᠤᠭ ᠤᠨ ᠪᠤᠯᠳᠠᠭ ᠦᠬᠡᠢ ᠮᠠᠭᠤ ᠨᠡᠷ᠎ᠡ ᠲᠠᠢ ᠬᠦᠮᠥᠰ ᠴᠦ ᠬᠡᠰᠡᠨ ᠠᠪᠤ ᠳᠤ ᠮᠢᠨᠢ ᠬᠠᠶᠢᠷᠠᠳᠠᠢ᠂ ᠬᠦᠨᠳᠦᠳᠭᠡᠳᠡᠭ ᠪᠠᠶᠢᠭᠰᠠᠨ᠃ ᠶᠠᠭᠤᠮ᠎ᠠ ᠶᠠᠭᠤᠮ᠎ᠠ ᠶᠢ ᠰᠠᠨᠠᠵᠦ ᠰᠡᠳᠬᠢᠬᠦ ᠲᠤᠷᠠᠳᠠᠢ᠃ ᠭᠠᠷ ᠤᠨ ᠤᠷ᠎ᠠ ᠳ᠋ᠦᠢ ᠪᠠᠷ ᠬᠡᠨ ᠠᠴᠠ ᠴᠦ ᠲᠤᠤᠷ᠎ᠠ ᠤᠷᠤᠬᠤ ᠦᠬᠡᠢ ᠨᠢᠬᠡᠨ ᠪᠠᠶᠢᠪᠠ᠃        ᠨᠠᠮᠠᠢᠢ ᠪᠠᠭ᠎ᠠ ᠪᠠᠶᠢᠬᠤ ᠳᠤ ᠠᠪᠤ ᠮᠢᠨᠢ ᠰᠤᠮᠤᠨ ᠳᠠᠭᠠᠨ ᠠᠩᠬ᠎ᠠ ᠰᠤᠩᠬᠢᠨ᠎ᠠ ᠲᠡᠷᠢᠵᠦ ᠤᠷᠭᠤᠭᠤᠯᠤᠭᠰᠠᠨ ᠪᠦᠬᠡᠳ ᠲᠡᠬᠦᠨ ᠢ ᠪᠠᠨ ᠡᠳᠦᠷ ᠪᠦᠷᠢ ᠠᠷᠠᠴᠢᠯᠠᠵᠦ ᠬᠡᠤᠭᠡᠳ ᠰᠢᠭ ᠪᠠᠶᠠᠷᠯᠠᠨ᠂ ᠲᠡᠬᠦᠦ ᠪᠢᠳᠡ ᠬᠤᠶᠠᠷ ᠴᠦ ᠠᠪᠤ ᠎ ᠪᠠᠨ ᠲᠠᠭᠠᠨ ᠬᠦᠬᠡᠷᠳᠡᠭ ᠰᠠᠨ᠃ ᠬᠠᠷᠠᠮᠰᠠᠯᠳᠠᠢ ᠨᠢ ᠨᠡᠯᠢᠶᠡᠳ ᠰᠠᠶᠢᠬᠠᠨ ᠤᠷᠭᠤᠭᠠᠳ ᠢᠷᠡᠬᠦ ᠶᠢᠨ ᠬᠢᠨᠢ ᠦᠶ᠎ᠡ ᠳᠤ ᠪᠠᠶᠠᠷᠰᠠᠶᠢᠬᠠᠨ ᠬᠡᠳᠡᠭ ᠰᠠᠬᠢᠯᠭ᠎ᠠ ᠦᠬᠡᠢ ᠪᠠᠨᠳᠢ ᠬᠡᠳᠦᠨ ᠰᠤᠩᠬᠢᠨ᠎ᠠ ᠶᠢ ᠨᠢ ᠵᠤᠯᠭᠠᠴᠢᠬᠠᠭᠰᠠᠨ ᠶᠤᠮ᠃ ᠠᠪᠤ ᠮᠢᠨᠢ ᠨᠠᠮᠠᠢᠢ ᠲᠠᠪᠤᠨ ᠨᠠᠰᠤᠳᠠᠢ ᠪᠠᠶᠢᠬᠤ ᠳᠤ ᠲᠤᠭ᠎ᠠ ᠪᠢᠴᠢᠭ ᠵᠢᠭᠠᠵᠦ ᠬᠡᠶᠢᠬᠦᠯᠥᠨ᠂ ᠬᠡᠬᠡ ᠦᠬᠡᠢ ᠬᠠᠷᠠᠩᠭᠤᠢ ᠶᠠᠪᠤᠬᠤ ᠎ ᠠᠴᠠ ᠠᠪᠤᠷᠠᠭᠰᠠᠨ ᠪᠢᠯᠠ᠃ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠳᠤ ᠤᠨᠴᠠ ᠰᠤᠷᠬᠤ ᠳᠤ ᠵᠢᠷᠤᠭ ᠲᠠᠢ ᠨᠤᠮ᠂ ᠦᠯᠢᠬᠡᠷ ᠲᠠᠢ ᠨᠤᠮ ᠢᠶᠠᠷ ᠦᠷᠬᠦᠯᠵᠢ ᠱᠠᠩᠨᠠᠳᠠᠭ ᠪᠠᠶᠢᠭᠰᠠᠨ ᠨᠢ ᠶᠡᠭᠡ ᠭᠡᠷᠡᠭ ᠪᠤᠯᠤᠭᠰᠠᠨ ᠶᠤᠮ᠃        ᠠᠪᠤ ᠮᠢᠨᠢ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠬᠡ ᠦᠬᠡᠢ ᠪᠤᠯᠪᠠᠴᠦ ᠤᠬᠠᠭᠠᠨ ᠲᠠᠢ ᠬᠦᠮᠥᠨ ᠲᠤᠯᠠ ᠪᠢᠴᠢᠭ ᠦᠰᠦᠭ ᠬᠤᠷᠳᠤᠨ ᠰᠤᠷᠴᠦ᠂ ᠦᠷ᠎ᠡ ᠭᠡᠤᠭᠡᠳ ᠢᠶᠠᠨ ᠡᠷᠳᠡᠮ ᠨᠤᠮ ᠲᠠᠢ ᠪᠤᠯᠭᠠᠬᠤ ᠰᠠᠨ ᠬᠡᠵᠦ ᠮᠦᠷᠦᠬᠡᠳᠳᠡᠭ ᠪᠠᠶᠢᠯ᠎ᠠ᠃ ᠨᠠᠮᠠᠢᠢ ᠬᠤᠶᠠᠳᠤᠭᠠᠷ ᠠᠩᠬᠢ ᠳᠤ ᠪᠠᠶᠢᠬᠤ ᠳᠤ ᠵᠢᠵᠢᠭᠭᠡᠨ ᠭᠠᠷᠮᠤᠨᠢ ᠬᠦᠭᠵᠢᠮ ᠠᠪᠴᠦ ᠦᠭᠭᠦᠭᠰᠡᠨ ᠶᠤᠮ ᠃ ᠡᠵᠢ ᠠᠭᠤᠷᠯᠠᠵᠦ ᠦᠨᠡᠳᠡᠢ ᠴᠡᠨᠡᠳᠡᠢ ᠶᠠᠭᠤᠮ᠎ᠠ ᠪᠠᠷ ᠬᠡᠤᠭᠡᠳ ᠲᠡᠮᠡᠢ ᠡᠷᠬᠡᠯᠡᠬᠦᠯᠥᠯ᠎ᠡ ᠬᠡᠬᠦ ᠳᠤ᠂ ᠠᠪᠤ ᠮᠢᠨᠢ ᠲᠤᠤᠭᠠᠷᠤᠭ᠎ᠠ ᠦᠬᠡᠢ᠃ ᠲᠡᠷᠡ ᠦᠶ᠎ᠡ ᠳᠤ ᠮᠦᠨ ᠬᠦᠭᠵᠢᠮ 200 ᠨᠡᠯᠢᠶᠡᠳ ᠭᠠᠷᠤᠢ ᠲᠦᠬᠦᠷᠢᠭ ᠤᠨ ᠦᠨᠡᠳᠡᠢ᠂ ᠡᠨᠡ ᠨᠢ ᠬᠦᠳᠡᠭᠡ ᠳᠤ ᠪᠤᠯ ᠢᠳᠡᠰᠢᠨ ᠤ ᠦᠬᠡᠷ ᠠᠪᠴᠦ ᠪᠤᠯᠬᠤ ᠪᠠᠶᠢᠭᠰᠠᠨ ᠲᠤᠯᠠ ᠤᠯᠠᠨ ᠬᠡᠤᠬᠡᠳ ᠲᠠᠢ ᠠᠵᠦ ᠠᠮᠢᠳᠤᠷᠠᠯ ᠨᠢ ᠲᠡᠶᠢᠮᠥ ᠴᠦ ᠬᠢᠯᠪᠠᠷ ᠪᠤᠰᠦ ᠦᠶ᠎ᠡ ᠳᠤ ᠡᠵᠢ ᠮᠢᠨᠢ ᠪᠤᠬᠢᠮᠳᠤᠭᠰᠠᠨ ᠪᠠᠶᠢᠬᠤ᠂ ᠪᠢ ᠲᠡᠷᠡ ᠬᠦᠭᠵᠢᠮ ᠢ ᠦᠷᠯᠦᠬᠡ ᠦᠳᠡᠰᠢ ᠦᠬᠡᠢ ᠪᠠᠷᠬᠢᠷᠠᠭᠤᠯᠵᠦ᠂ ᠬᠠᠪᠢ ᠶᠢᠨ ᠬᠡᠤᠭᠡᠳ ᠤᠳ ᠢ ᠴᠤᠭᠯᠠᠭᠤᠯᠤᠨ ᠲᠤᠭᠯᠠᠭᠰᠠᠭᠠᠷ ᠲᠠᠭᠤᠤ ᠬᠦᠭᠵᠢᠮ ᠳᠤ ᠲᠤᠷ᠎ᠠ ᠰᠡᠳᠬᠢᠯ ᠢᠶᠠᠨ ᠦᠭᠭᠦ ᠵᠠᠮ ᠳᠤ ᠤᠷᠤᠵᠦ ᠪᠢᠯᠠ᠃ ᠠᠪᠤ ᠶᠢ ᠮᠢᠨᠢ ᠬᠤᠶᠠᠷ ᠨᠠᠰᠤᠳᠠᠢ ᠪᠠᠶᠢᠬᠤ ᠎ ᠳᠤ ᠮᠢᠨᠦ ᠡᠪᠦᠭᠡ ᠡᠴᠢᠬᠡ ᠵᠠᠮᠰᠠᠷᠠᠩ ᠳ᠋ᠠ ᠬᠡᠮᠡᠬᠦ ᠬᠦᠮᠥᠨ ᠲᠦᠴᠢ ᠭᠠᠷᠤᠢ ᠨᠠᠰᠤᠳᠠᠢ ᠲᠠᠭᠠᠯᠠᠯ ᠲᠡᠭᠦᠰᠴᠦ᠂ ᠡᠴᠢᠬᠡ ᠬᠦᠮᠥᠨ ᠤ ᠬᠠᠶᠢᠷ᠎ᠠ ᠬᠠᠯᠠᠮᠵᠢ ᠶᠢ ᠦᠵᠡᠭᠡ ᠦᠬᠡᠢ ᠦᠰᠦᠭᠰᠡᠨ ᠠᠪᠤ ᠮᠢᠨᠢ ᠰᠡᠳᠬᠢᠯ ᠤᠨ ᠬᠦᠨ ᠳᠤ ᠪᠠᠨ ᠨᠠᠰᠤᠨ ᠲᠤᠷᠰᠢ ᠨᠢᠬᠡᠨ ᠭᠤᠨᠢᠭ ᠬᠠᠳᠠᠭᠠᠯᠠᠨ ᠶᠠᠪᠤᠭᠰᠠᠨ ᠶᠤᠮ᠃ ᠠᠪᠤ ᠬᠠᠶᠠ ᠬᠠᠯᠠᠮᠴᠠᠭᠠᠳ ᠢᠷᠡᠬᠦ ᠳᠡᠭᠡᠨ᠄ ︽ᠨᠠᠷᠠᠯᠠᠭ ᠦᠨᠳᠦᠷ ᠠᠯᠳᠠᠢ ᠶᠢᠨ ᠠᠭᠤᠯᠠᠨ ᠳᠤ᠂ ᠨᠠᠮᠤᠷ ᠤᠨ ᠬᠢᠷᠠᠭᠤ ᠤᠨᠠᠯ᠎ᠠ ᠳ᠋ᠠ᠂ ᠨᠠᠰᠤᠳᠠᠢ ᠪᠤᠭᠤᠷᠤᠯ ᠠᠪᠤ ᠮᠢᠨᠢ᠂ ᠨᠠᠮᠠᠢᠢ ᠎ ᠪᠠᠨ ᠲᠤᠷᠠᠰᠴᠦ ᠰᠠᠭᠤᠭ᠎ᠠ ᠳ᠋ᠠ᠂᠂᠂᠂︾ ᠬᠡᠵᠦ ᠨᠢᠯᠪᠤᠰᠦ ᠪᠦᠮᠪᠦᠷᠢᠬᠦᠯᠥᠨ ᠲᠠᠭᠤᠯᠠᠵᠦ ᠰᠡᠳᠬᠢᠯ ᠡᠪᠡᠳᠭᠡᠳᠡᠭ ᠰᠠᠨ᠃ ᠠᠪᠤ ᠶᠢ ᠮᠢᠨᠢ ᠠᠷᠪᠠ ᠭᠠᠷᠤᠢ ᠨᠠᠰᠤᠳᠠᠢ ᠪᠠᠶᠢᠬᠤ ᠳᠤ ᠮᠠᠨ ᠤ ᠨᠤᠳᠤᠭ ᠤᠨ ᠴᠤᠬᠤᠷ ᠳ᠋ᠠᠨᠽᠠᠨ ᠬᠡᠳᠡᠭ ᠬᠦᠮᠥᠨ ᠪᠠᠭ᠎ᠠ ᠦᠳᠡ ᠶᠢᠨ ᠬᠢᠷᠢ ᠳᠤ ᠬᠡᠷ ᠲᠤ ᠨᠢ ᠤᠷᠤᠬᠤ ᠳᠤ ᠠᠪᠤ ᠤᠨᠳᠠᠵᠦ ᠪᠠᠶᠢᠵᠠᠢ᠃ ᠲᠡᠷᠡ ᠬᠦᠮᠥᠨ ᠬᠦᠨᠵᠢᠯᠠ ᠶᠢ ᠨᠢ ᠬᠠᠥ ᠲᠠᠳᠠᠨ ︽ᠪᠤᠰ ᠴᠢ᠂ ᠶᠠᠭᠠᠬᠢᠭᠰᠠᠨ ᠵᠠᠳᠠᠷᠠᠭᠰᠠᠨ ᠬᠦᠮᠥᠨ ᠪᠤᠢ︖ ᠡᠳᠦᠢ ᠪᠤᠯᠳᠠᠯ᠎ᠠ ᠤᠨᠳᠠᠵᠦ ᠪᠠᠶᠢᠳᠠᠭ᠂ ᠡᠷᠳᠡ ᠪᠤᠰᠪᠠᠯ ᠨᠢᠬᠡ ᠶᠢ ᠦᠵᠡᠵᠦ᠂ ᠤᠷᠦᠢ ᠤᠨᠳᠠᠪᠠᠯ ᠨᠢᠬᠡ ᠶᠢ ᠰᠤᠨᠤᠰᠳᠠᠭ ᠶᠤᠮ︾ ᠬᠡᠵᠦ ᠵᠠᠩᠨᠠᠭᠠᠳ ᠨᠤᠭᠳᠦ ᠪᠠᠷ ᠬᠡᠳᠦ ᠤᠷᠢᠶᠠᠯᠭᠠᠭᠰᠠᠨ ᠬᠡᠳᠡᠭ᠃ ᠲᠡᠬᠦᠨ ᠳᠤ ᠯᠠ ᠠᠪᠤ ᠶᠡᠭᠡ ᠪᠠᠶᠠᠷᠯᠠᠭᠰᠠᠨ ᠢᠶᠠᠨ ᠦᠷᠬᠦᠯᠵᠢ ᠶᠠᠷᠢᠳᠠᠭ ᠰᠠᠨ᠃ ᠠᠶᠢᠯ ᠤᠨ ᠶᠢᠰᠦᠨ ᠬᠡᠤᠭᠡᠳ ᠤᠨ ᠤᠳᠬᠤᠨ ᠨᠢ ᠲᠤᠯᠠ ᠡᠵᠢ᠂ ᠠᠬ᠎ᠠ᠂ ᠡᠭᠡᠴᠢ ᠨᠡᠷ ᠎ ᠨᠢ ᠦᠨᠦᠴᠢᠨ ᠦᠷᠦᠬᠡᠰᠦᠨ ᠶᠤᠮ ᠭᠡᠳ ᠦᠬᠡ ᠬᠡᠯᠡᠳᠡᠭ ᠦᠬᠡᠢ᠂ ᠵᠢᠭᠠᠬᠠᠨ ᠲᠤᠷ᠎ᠠ ᠪᠠᠷ ᠪᠠᠶᠢᠵᠦ ᠯᠠ ᠳ᠋ᠠ᠃ ᠳ᠋ᠠᠨᠽᠠᠨ ᠬᠡᠮᠡᠬᠦ ᠲᠡᠷᠡ ᠬᠦᠮᠥᠨ ᠤ ᠦᠬᠡ ᠠᠪᠤ ᠳᠤ ᠮᠢᠨᠢ ᠶᠡᠭᠡ ᠶᠢ ᠪᠤᠳᠤᠭᠳᠠᠭᠤᠯᠵᠦ᠂ ᠦᠷᠯᠦᠬᠡ ᠡᠷᠳᠡ ᠪᠤᠰᠴᠦ᠂ ᠦᠳᠡᠰᠢ ᠤᠷᠦᠢ ᠤᠨᠳᠠᠵᠦ᠂ ᠬᠦᠮᠥᠨ ᠤ ᠬᠡᠤᠭᠡᠳ ᠬᠡᠵᠦ ᠪᠤᠳᠤᠯ ᠦᠬᠡᠢ ᠦᠪᠡᠷ ᠤᠨ ᠰᠢᠭ ᠨᠢ ᠵᠠᠩᠨᠠᠭᠰᠠᠨ ᠲᠡᠷᠡ ᠬᠦᠮᠥᠨ ᠳᠤ ᠠᠪᠤ ᠮᠢᠨᠢ ᠬᠡᠵᠢᠶ᠎ᠡ ᠬᠤᠶᠢᠨ᠎ᠠ ᠴᠦ ᠬᠠᠶᠢᠷᠠᠳᠠᠢ ᠰᠠᠶᠢᠨ ᠬᠡᠪ ᠢᠶᠠᠷ ᠢᠶᠠᠨ ᠪᠠᠶᠢᠭᠰᠠᠨ ᠪᠠ ᠨᠠᠰᠤᠨ ᠡᠴᠦᠰ ᠪᠤᠯᠬᠤ ᠳᠤ ᠨᠢ ᠡᠴᠢᠬᠡ ᠰᠢᠭ ᠢᠶᠠᠨ ᠰᠠᠨᠠᠵᠦ ᠤᠬᠢᠯᠠᠵᠦ ᠪᠠᠶᠢᠭᠰᠠᠨ ᠪᠢᠯᠠ᠃ ᠠᠪᠤ ᠮᠢᠨᠢ ᠦᠷᠦᠪᠴᠢ ᠵᠦᠬᠡᠯᠡᠨ ᠰᠡᠳᠬᠢᠯ ᠲᠠᠢ᠃ ᠨᠠᠰᠣᠳᠠᠢ ᠬᠦᠮᠥᠨ ᠪᠤᠯᠤᠨ ᠦᠨᠦᠴᠢᠨ ᠦᠷᠦᠬᠡᠰᠦᠨ ᠬᠦᠮᠥᠨ ᠳᠤ ᠬᠠᠶᠢᠷᠠᠳᠠᠢ᠃ ᠬᠠᠷᠢᠨ ᠡᠷᠡᠯᠬᠡᠦ ᠶᠡᠭᠡᠷᠬᠡᠥ ᠲᠠᠷᠤᠭ᠎ᠠ ᠨᠠᠷ ᠲᠠᠢ ᠪᠤᠯ ᠲᠠᠭᠠᠷᠠᠳᠠᠭ ᠦᠬᠡᠢ᠂ ᠬᠠᠳᠠᠭᠤ ᠦᠬᠡ ᠬᠡᠯᠡᠴᠢᠬᠡᠳᠡᠭ᠃ ᠲᠡᠬᠦᠨ ᠠᠴᠠ ᠪᠠᠨ ᠪᠤᠯᠤᠭᠠᠳ ᠠᠵᠦ ᠠᠮᠢᠳᠤᠷᠠᠯ ᠤᠨ ᠬᠠᠳᠠᠭᠤ ᠬᠦᠳᠦᠬᠦᠦ ᠶᠢ ᠠᠮᠰᠠᠭᠰᠠᠨ ᠲᠡᠳᠦᠢ ᠦᠬᠡᠢ᠂ ᠤᠷᠤᠨ ᠱᠤᠷᠤᠩ ᠤᠨ ᠲᠡᠮᠦᠷ ᠲᠤᠤᠷ ᠢᠶᠠᠷ ᠬᠦᠷᠢᠶᠡᠯᠡᠬᠦᠯᠦᠭᠰᠡᠨ ᠬᠠᠰᠢᠶᠠᠨ ᠤ ᠭᠠᠳᠠᠨ᠎ᠠ ᠬᠦᠢᠳᠡᠨ ᠰᠦᠨᠢ ᠤᠬᠢᠯᠠᠨ ᠵᠤᠭᠰᠤᠵᠦ ᠠᠪᠤ ᠶᠢ ᠎ ᠪᠠᠨ ᠠᠪᠤᠷᠠᠬᠤ ᠲᠡᠩᠬᠡᠬᠡ ᠦᠬᠡᠢ ᠶᠠᠪᠤᠭᠰᠠᠨ ᠠᠷᠪᠠᠨ ᠲᠤᠯᠤᠭᠠᠬᠠᠨ ᠨᠠᠰᠦ ᠮᠢᠨᠢ ᠬᠦᠬᠡᠷᠦᠬᠦᠢ᠂᠂᠂᠂        ᠬᠡᠳᠦᠨ ᠰᠠᠷ᠎ᠠ ᠰᠠᠭᠤᠭᠠᠳ ᠭᠡᠷᠡᠭ ᠨᠢ ᠴᠠᠭᠠᠳᠬᠠᠭᠳᠠᠵᠦ᠂ ᠭᠠᠷᠴᠦ ᠢᠷᠡᠬᠦ ᠳᠡᠭᠡᠨ ︽ᠡᠷ᠎ᠡ ᠬᠦᠮᠥᠨ ᠭᠡᠵᠢᠶ᠎ᠡ ᠴᠦ ᠱᠤᠷᠤᠩ ᠤᠨ ᠬᠠᠭᠠᠯᠭ᠎ᠠ ᠲᠠᠳᠠᠬᠤ ᠦᠬᠡᠢ︾ ᠬᠡᠵᠦ ᠠᠮᠠ ᠭᠠᠷᠴᠦ ᠪᠤᠯᠬᠤ ᠦᠬᠡᠢ ᠰᠢᠥ ᠬᠡᠮᠡᠨ ᠵᠡᠬᠢᠵᠦ ᠪᠢᠯᠠ᠃      ᠨᠢᠬᠡ ᠶᠠᠪᠤᠳᠠᠯ ᠰᠠᠨᠠᠭᠠᠨ ᠠᠴᠠ ᠭᠠᠷᠳᠠᠭ ᠦᠬᠡᠢ ᠶᠤᠮ᠃ ᠲᠡᠷᠡ ᠦᠶ᠎ᠡ ᠳᠤ ᠪᠢ ᠲᠠᠪᠤ᠂ ᠵᠢᠷᠭᠤᠭᠠᠨ ᠨᠠᠰᠦᠳᠠᠢ ᠪᠠᠶᠢᠭᠰᠠᠨ ᠪᠤᠯᠪᠠ ᠤᠤ᠂ ᠨᠠᠮᠤᠷ ᠤᠷᠦᠶᠢᠬᠠᠨ ᠡᠵᠢ ᠮᠢᠨᠢ ᠬᠤᠷᠠᠭᠠᠨ ᠲᠤᠳᠤᠷ ᠲᠠᠢ ᠴᠤ᠋ ᠰᠢᠨᠡᠭᠡᠨ ᠲᠡᠪᠡᠯ ᠠᠪᠤ ᠳᠤ ᠮᠢᠨᠢ ᠤᠶᠤᠵᠦ᠂ ᠠᠪᠤ ᠴᠦ ᠰᠢᠨᠡᠬᠡᠨ ᠲᠡᠪᠡᠯ ᠢᠶᠠᠨ ᠡᠮᠤᠰᠤᠭᠡᠳ ᠶᠡᠭᠡ ᠯᠠ ᠪᠠᠶᠠᠷ ᠲᠠᠢ ᠮᠤᠷᠳᠠᠵᠦ ᠪᠢᠯᠠ᠃ ᠲᠡᠷᠡ ᠦᠶ᠎ᠡ ᠳᠤ ᠠᠪᠤ ᠪᠠᠷᠢᠭᠠᠳᠠ ᠶᠢᠨ ᠲᠠᠷᠤᠭ᠎ᠠ ᠪᠠᠶᠢᠭᠰᠠᠨ ᠶᠤᠮ᠃ ᠤᠷᠦᠶᠢᠬᠠᠨ ᠲᠠᠰᠢ ᠪᠠᠨ ᠨᠦᠢᠳᠡᠨ ᠰᠢᠮᠠᠷᠭ᠎ᠠ ᠲᠠᠯᠪᠢᠵᠦ᠂ ᠰᠡᠬᠦᠯ ᠳᠡᠭᠡᠨ ᠴᠠᠭᠠᠨ ᠰᠢᠭᠤᠷᠭ᠎ᠠ ᠪᠤᠯᠪᠠ᠃ ᠲᠡᠭᠡᠰᠭᠢᠭᠡᠳ ᠰᠢᠭᠤᠷᠭ᠎ᠠ ᠴᠦ ᠲᠠᠳᠠᠷᠠᠵᠦ᠂ ᠬᠠᠷᠢᠨ ᠠᠪᠤ ᠠᠯᠠᠭ᠎ᠠ᠃ ᠡᠵᠢ ᠳ᠋ᠧᠩ ᠤᠨ ᠭᠡᠷᠡᠯ ᠳᠤ ᠶᠠᠭᠤᠮ᠎ᠠ ᠤᠶᠤᠵᠦ᠂ ᠲᠡᠭᠦᠦ ᠪᠢᠳᠡ ᠬᠤᠶᠠᠭᠤᠯᠠ ᠠᠪᠤ ᠶᠢ ᠪᠠᠨ ᠬᠦᠯᠢᠶᠡᠨ ᠪᠠᠷᠠᠭᠤᠨ ᠤᠷᠤᠨ ᠲᠡᠭᠡᠷ᠎ᠡ ᠰᠦᠨᠢ ᠲᠦᠯᠢ ᠪᠤᠯᠳᠠᠯ᠎ᠠ ᠰᠡᠷᠡᠬᠦᠨ ᠬᠡᠪᠳᠡᠵᠦ ᠪᠢᠯᠠ᠃        ᠤᠳᠠᠯ ᠦᠬᠡᠢ ᠠᠪᠤ ᠮᠢᠨᠢ ᠢᠷᠡᠯ᠎ᠡ᠃ ᠭᠠᠳᠠᠭ᠎ᠠ ᠢᠷᠡᠭᠡᠳ ᠵᠠᠪᠠᠯ ᠬᠤᠭᠤᠯᠠᠢ ᠪᠠᠨ ᠵᠠᠰᠠᠵᠦ᠂ ᠬᠠᠨᠢᠶᠠᠵᠦ ᠴᠢᠮᠡᠭᠡ ᠦᠭᠳᠡᠭ ᠪᠠᠶᠢᠭᠰᠠᠨ ᠶᠤᠮ᠃ ᠫᠤᠩᠰᠤᠭᠳᠧᠯᠢᠭ ᠪᠢᠳᠡ ᠬᠤᠶᠠᠷ ᠴᠦ ᠤᠷᠤᠯᠳᠤᠨ ᠪᠤᠰᠴᠦ᠂ ᠠᠪᠤ ᠢᠷᠡᠯ᠎ᠡ ᠬᠡᠵᠦ ᠡᠬᠦᠳᠡ ᠤᠷᠤᠭᠤ ᠭᠦᠶᠦᠯᠳᠦᠬᠦ ᠳᠤ ᠬᠠᠭᠠᠯᠭ᠎ᠠ ᠨᠡᠭᠡᠭᠡᠭᠳᠡᠨ ᠬᠦᠢᠳᠡᠨ ᠰᠡᠷᠢᠬᠦᠦ ᠲᠠᠳᠠᠭᠤᠯᠤᠭᠰᠠᠭᠠᠷ ᠬᠠᠮᠤᠭ ᠬᠤᠪᠴᠠᠰᠦ ᠨᠢ ᠨᠤᠷᠤᠭᠰᠠᠨ ᠠᠪᠤ ᠮᠢᠨᠢ ᠤᠷᠤᠵᠦ ᠢᠷᠡᠭᠰᠡᠨ ᠰᠠᠨ᠃ ᠲᠡᠪᠡᠯ ᠤᠨ ᠬᠢᠨᠢ ᠡᠪᠦᠷ ᠲᠦᠭᠳᠦᠶᠢᠵᠦ᠂ ᠨᠢᠬᠡ ᠶᠡᠭᠡ ᠶᠠᠭᠤᠮ᠎ᠠ ᠴᠢᠬᠢᠭᠰᠡᠨ ᠮᠡᠳᠦ ᠪᠠᠶᠢᠯ᠎ᠠ᠃ ᠠᠪᠤ ᠡᠪᠤᠷ ᠠᠴᠠ ᠪᠠᠨ ᠱᠠᠯ ᠨᠤᠶᠢᠳᠡᠨ ᠨᠢᠯᠬ᠎ᠠ ᠲᠤᠭᠤᠯ ᠭᠠᠷᠭᠠᠵᠦ ᠢᠷᠡᠪᠡ᠃ ᠳ᠋᠊ —᠎ ᠶᠢᠨ ᠦᠨᠢᠶ᠎ᠡ ᠲᠤᠭᠤᠯᠯᠠᠴᠢᠬᠠᠵᠦ᠂ ᠲᠤᠭᠤᠯ ᠨᠢ ᠬᠦᠯᠳᠡᠵᠦ ᠦᠬᠦᠬᠦ ᠰᠢᠬᠠᠭᠰᠠᠨ ᠪᠠᠶᠢᠬᠤ ᠳᠤ ᠲᠠᠭᠠᠷᠠᠯᠳᠦᠵᠦ ᠡᠪᠦᠷᠳᠦᠯᠡᠵᠦ ᠢᠷᠡᠯ᠎ᠡ ᠬᠡᠬᠦ ᠳᠤ ᠡᠵᠢ ᠠᠭᠤᠷᠯᠠᠪᠠ᠃ ᠠᠷᠭ᠎ᠠ ᠴᠦ ᠦᠬᠡᠢ ᠪᠢᠵᠡ᠃ ᠬᠠᠮᠤᠭ ᠴᠢᠳᠠᠯ ᠎ ᠢᠶᠠᠨ ᠰᠢᠪᠬᠠᠨ ᠭᠠᠭᠴᠠ ᠲᠡᠪᠡᠯ ᠲᠠᠢ ᠪᠤᠯᠭᠠᠬᠤ ᠳᠤ ᠰᠢᠥ᠃ ᠲᠡᠷᠡ ᠦᠶ᠎ᠡ ᠳᠤ ᠤᠯᠢᠭ ᠲᠠᠢ ᠲᠡᠪᠡᠯ ᠤᠨ ᠭᠠᠳᠠᠷ ᠨᠢᠳᠤᠨ ᠤ ᠬᠡᠮ ᠪᠠᠶᠢᠭᠰᠠᠨ ᠶᠤᠮ ᠴᠨᠢ︕ ᠬᠠᠷᠢᠨ ᠠᠪᠤ ᠮᠢᠨᠢ ᠲᠤᠭᠤᠯ ᠢ ᠬᠡᠷ ᠤᠨ ᠪᠠᠷᠠᠭᠤᠨ ᠤᠷᠢᠳᠦ ᠲᠠᠯᠪᠢᠭᠠᠳ ︽ᠨᠢᠯᠬ᠎ᠠ ᠠᠮᠢᠳᠠᠨ ᠡᠨᠡ ᠬᠤᠶᠠᠷ ᠠᠴᠠ ᠢᠯᠭᠠᠭ᠎ᠠ ᠶᠠᠭᠤ ᠪᠠᠶᠢᠬᠤ ᠪᠤᠢ︖︾ ᠬᠡᠵᠦ ᠲᠡᠭᠦᠦ ᠪᠢᠳᠡ ᠬᠤᠶᠠᠷ ᠤᠷᠤᠭᠤ ᠲᠤᠬᠢᠵᠦ ᠪᠢᠯᠠ᠃ ᠡᠨᠡ ᠨᠢ ᠨᠠᠳᠠ ᠨᠠᠰᠤᠨ ᠲᠤᠷᠰᠢ ᠠᠷᠢᠯᠥᠰᠢ ᠦᠬᠡᠢ ᠤᠢ ᠤᠬᠠᠭᠠᠨ ᠳᠤ ᠮᠢᠨᠢ ᠨᠢᠬᠡ ᠶᠢ ᠰᠢᠪᠡᠨᠡᠭᠰᠡᠨ ᠶᠤᠮ᠃ ᠠᠪᠤ ᠶᠢᠨ ᠮᠢᠨᠢ ᠵᠢᠵᠢᠭᠭᠡᠨ ᠬᠦᠷᠡᠩ ᠨᠤᠮ ᠤᠨ ᠰᠠᠩ ᠳᠤ100 ᠭᠠᠷᠦᠢ ᠨᠤᠮ ᠪᠠᠶᠢᠭᠰᠠᠨ ᠪᠦᠬᠡᠳ ᠵᠠᠯᠠᠭᠤ ᠳᠠᠭᠠᠨ ᠤᠷᠠᠯᠠᠵᠦ ᠬᠢᠭᠰᠡᠨ ᠲᠡᠷᠡᠬᠦ ᠨᠤᠮ ᠤᠨ ᠵᠢᠵᠢᠭ ᠱᠦᠬᠦᠢ ᠨᠢ ︽ᠮᠢᠨᠦ ᠠᠩᠬᠠᠨ ᠤ ᠶᠡᠭᠡ ᠰᠤᠷᠭᠠᠭᠤᠯᠢ︾ ᠪᠠᠶᠢᠭᠰᠠᠨ ᠶᠤᠮ᠃ ᠲᠡᠨᠳᠡ ᠯᠠ ᠪᠢ ᠠᠩᠬ᠎ᠠ ᠠᠩᠬ᠎ᠠ ᠨᠠᠴᠤᠭᠳᠦᠷᠵᠢ ᠲᠠᠢ ᠲᠠᠨᠢᠯᠴᠠᠵᠦ᠂ ᠵᠤᠵᠠᠭᠠᠨ ᠨᠤᠭᠤᠭᠠᠨ ᠨᠤᠮ ᠢ ᠨᠢ ᠦᠷᠯᠦᠬᠡ ᠦᠳᠡᠰᠢ ᠦᠬᠡᠢ ᠤᠩᠰᠢᠵᠦ᠂ ᠰᠢᠯᠥᠭ ᠤᠳ ᠢ ᠨᠢ ᠴᠡᠬᠡᠵᠢᠯᠡᠨ᠂ ᠪᠠᠰᠠ ︽ᠡᠷᠳᠡᠮᠳᠡᠨ ᠲᠤᠤᠸ᠋ᠯ ᠲᠤᠯᠤᠭᠠᠢ︾ ᠵᠡᠷᠭᠡ ᠨᠤᠮ ᠤᠳ ᠢ ᠰᠢᠮᠳᠠᠨ ᠣᠩᠰᠢᠳᠠᠭ ᠰᠠᠨ᠃ ᠲᠠᠯᠠᠨ ᠬᠡᠳᠦᠨ ᠤᠨ ᠤ ᠲᠤᠮᠳᠠᠭᠤᠷ ᠠᠪᠤ ᠮᠢᠨᠢ ᠨᠠᠳᠠ ᠠᠯᠳᠠᠷᠳᠦ ︽ᠫᠠᠨᠴᠠᠳᠠᠨᠳᠠᠷ᠎ᠠ ᠪᠤᠶᠦ ᠲᠠᠪᠤᠨ ᠰᠤᠷᠭᠠᠮᠵᠢ︾ ᠬᠡᠮᠡᠬᠦ ᠨᠤᠮ ᠢ ᠠᠪᠴᠢᠷᠠᠭᠰᠠᠨ ᠨᠢ ᠰᠠᠨᠠᠭᠳᠠᠨ᠎ᠠ᠃      ᠨᠠᠮᠠᠢᠢ ᠬᠤᠶᠢᠨ᠎ᠠ ᠰᠤᠷᠴᠦ ᠪᠠᠶᠢᠬᠤ ᠦᠶ᠎ᠡ ᠳᠤ ︽ᠢᠨᠤᠰᠲᠷᠡᠨᠡᠶᠡ᠂ ᠯᠢᠲᠶᠡᠷᠡᠲᠤᠷᠡ︾ ᠰᠡᠳᠭᠦᠯ ᠢ ᠪᠦᠬᠦᠯᠢ ᠳ᠋ᠤᠭᠠᠷ ᠢᠶᠠᠷ ᠨᠢ ᠵᠠᠬᠢᠶᠠᠯᠠᠨ᠂ ᠬᠦᠦ ᠳᠤ ᠮᠢᠨᠢ ᠬᠡᠷᠡᠭ ᠪᠤᠯᠤᠨ᠎ᠠ ᠬᠡᠮᠡᠨ ᠬᠠᠳᠠᠭᠠᠯᠠᠳᠠᠭ ᠰᠠᠨ᠃ ᠨᠢᠬᠡ ᠤᠳᠠᠭ᠎ᠠ ᠫᠷᠦᠰᠫᠧᠷ ᠮᠧᠷᠢᠮᠧᠬᠢ ᠶᠢᠨ 4 ᠪᠤᠳᠢ᠂ ᠶᠧᠰᠧᠨᠢᠨ ᠤ ᠭᠤᠷᠪᠠᠨ ᠪᠤᠳᠢ᠂ ᠷᠤᠮᠠᠶᠢᠨ ᠷᠤᠯᠠᠨ ᠤ ᠶᠢᠰᠦᠨ ᠪᠤᠳᠢ ᠶᠢ ᠨᠠᠳᠠ ᠠᠪᠴᠦ ᠲᠠᠯᠪᠢᠭᠰᠠᠨ ᠪᠠᠶᠢᠵᠦ ᠪᠢᠯᠠ᠃ ᠲᠡᠳᠡᠭᠡᠷ ᠡᠴᠠ‌‍ᠷᠤᠮᠠᠶᠢᠨ ᠷᠤᠯᠠᠨ ᠤ ᠲᠡᠭᠦᠪᠦᠷᠢ ᠨᠦᠭᠦᠳ ᠤᠳᠤ ᠴᠦ ᠨᠠᠳᠠ ᠪᠤᠢ᠂᠂᠂᠂ ᠶᠠᠮᠠᠷ ᠴᠦ ᠭᠡᠰᠡᠨ ᠠᠪᠤ ᠮᠢᠨᠢ ᠵᠦᠩ ᠰᠤᠪᠢᠩ ᠢᠶᠠᠷ ᠢᠶᠠᠨ ᠬᠡᠷᠡᠭ ᠲᠠᠢ ᠨᠤᠮ ᠤᠳ ᠢᠶᠠᠨ ᠲᠠᠨᠢᠵᠦ ᠮᠡᠳᠡᠷᠡᠳᠡᠭ ᠪᠠᠶᠢᠭᠰᠠᠨ ᠶᠤᠮ᠃ ᠠᠮᠢᠳᠤᠷᠠᠵᠦ ᠴᠢᠳᠠᠭᠰᠠᠨ ᠬᠦᠮᠥᠨ ᠯᠠ ᠦᠬᠦᠵᠦ ᠴᠢᠳᠠᠳᠠᠭ ᠬᠡᠵᠦ ᠬᠡᠵᠢᠶ᠎ᠡ ᠴᠦ ᠪᠢᠯᠡ ᠨᠢᠬᠡᠨ ᠮᠡᠷᠬᠡᠨ ᠦᠬᠡ ᠰᠤᠨᠤᠰᠤᠭᠰᠠᠨ ᠶᠤᠮ᠃ ᠡᠳᠡᠭᠡᠷᠡᠰᠢ ᠦᠬᠡᠢ ᠬᠦᠨᠳᠦ ᠡᠪᠡᠳᠴᠢᠨ ᠲᠤᠰᠴᠦ ᠠᠪᠤ ᠮᠢᠨᠢ ᠬᠡᠪᠳᠡᠷᠢ ᠳᠤ ᠤᠷᠤᠭᠠᠳ᠂ ᠪᠢ ᠰᠠᠷ᠎ᠠ ᠪᠦᠷᠢ ᠯᠠ ᠬᠤᠳᠠ ᠠᠴᠠ ᠡᠮ ᠲᠡᠷᠢᠶ᠎ᠡ ᠠᠪᠴᠦ ᠨᠢᠰᠴᠦ ᠤᠴᠢᠳᠠᠭ ᠪᠠᠶᠢᠪᠠ᠃ ᠠᠷᠠᠢ ᠭᠠᠶᠢᠭᠤᠢ ᠪᠤᠯᠵᠦ ᠪᠠᠶᠢᠨ᠎ᠠ ᠬᠡᠵᠦ ᠠᠪᠤ ᠴᠦ᠂ ᠪᠢᠳᠡ ᠴᠦ ᠡᠪᠡᠳᠴᠢᠨ ᠳᠤ ᠬᠠᠭᠤᠷᠳᠠᠵᠦ ᠪᠢᠯᠠ᠃ 1987 ᠤᠨ ᠤ 5 ᠰᠠᠷ᠎ᠠ ᠳᠤ ᠪᠢ ᠠᠪᠤ ᠲᠠᠢ ᠪᠠᠨ ᠠᠭᠤᠯᠵᠠᠬᠤ ᠪᠠᠷ ᠰᠦᠬᠡᠪᠠᠭᠠᠳᠦᠷ ᠠᠶᠢᠮᠠᠭ ᠤᠷᠤᠭᠤ ᠤᠴᠢᠪᠠᠰᠦ᠂ ᠠᠪᠤ ᠮᠢᠨᠢ ᠠᠯᠳᠠᠨ — ᠤᠪᠤᠭᠠᠨ ᠲᠡᠭᠡᠷ᠎ᠡ ᠪᠠᠨ ᠭᠠᠷᠤᠨ᠎ᠠ ᠬᠡᠳ ᠲᠦᠷᠦᠵᠦ ᠦᠰᠦᠭᠰᠡᠨ ᠨᠤᠳᠤᠭ ᠤᠷᠤᠭᠤ ᠪᠠᠨ ᠶᠠᠪᠤᠴᠢᠬᠠᠭᠰᠠᠨ ᠪᠠᠶᠢᠯ᠎ᠠ᠃ ᠲᠡᠭᠦᠦ ᠪᠢᠳᠡ ᠬᠤᠶᠠᠷ ᠠᠷᠦ ᠠᠴᠠ ᠨᠢ ᠮᠠᠰᠢᠨ ᠢᠶᠠᠷ ᠶᠠᠪᠤᠵᠦ ᠤᠴᠢᠬᠤ ᠳᠤ ᠭᠠᠶᠢᠭᠤᠢ ᠯᠠ ᠪᠠᠶᠢᠪᠠ᠃      ᠦᠷᠯᠦᠬᠡ ᠡᠷᠳᠡ ᠪᠢᠳᠡ ᠤᠪᠤᠭᠠᠨ ᠲᠡᠭᠡᠷ᠎ᠡ ᠭᠠᠷᠤᠭᠰᠠᠨ ᠪᠦᠬᠡᠳ ᠠᠪᠤ ᠴᠦ ᠰᠡᠳᠬᠢᠯ ᠦᠨᠳᠦᠷ᠂ ᠴᠡᠯᠡᠶᠢᠨ ᠴᠡᠩᠭᠡᠷᠯᠡᠬᠦ ᠨᠤᠳᠤᠭ ᠢᠶᠠᠨ ᠬᠠᠷᠠᠭᠰᠠᠨ ᠳᠠᠭᠠᠨ ᠠᠭᠤᠵᠢᠷᠠᠵᠦ ᠵᠠᠯᠪᠠᠷᠢᠯ ᠦᠢᠯᠡᠳᠦᠨ᠂ ᠠᠷᠴᠡ ᠬᠦᠵᠢ ᠠᠰᠠᠭᠠᠨ ᠰᠠᠩ ᠲᠠᠯᠪᠢᠭᠠᠳ ᠪᠠᠭᠤᠭᠰᠠᠨ ᠪᠢᠯᠠ᠃ ᠲᠡᠷᠡ ᠡᠳᠦᠷ ᠪᠢ ᠠᠪᠤ ᠲᠠᠢ ᠪᠠᠨ ᠡᠴᠦᠰ ᠤᠨ ᠤᠳᠠᠭ᠎ᠠ ᠠᠭᠤᠯᠵᠠᠵᠦ ᠪᠠᠶᠢᠭ᠎ᠠ ᠎ ᠪᠠᠨ ᠬᠡᠷᠬᠢᠨ ᠮᠡᠳᠡᠬᠦ ᠪᠢᠯᠠ᠃ ᠠᠯᠳᠠᠨ — ᠤᠪᠤᠭᠠᠨ ᠤ ᠶᠠᠭ ᠡᠩᠭᠡᠷ ᠲᠡᠭᠡᠷ᠎ᠡ ᠠᠴᠠ ᠪᠢᠳᠠ ᠬᠤᠶᠠᠷ ᠰᠠᠯᠤᠭᠰᠠᠨ ᠶᠤᠮ᠃ ᠠᠪᠤ ᠮᠢᠨᠢ ᠡᠵᠢ ᠲᠠᠢ ᠴᠤᠭ ᠤᠪᠤᠭ᠎ᠠ ᠡᠷᠬᠢᠨ᠎ᠡ ᠬᠡᠳ ᠦᠯᠡᠳᠡᠵᠦ᠂ ᠲᠡᠬᠦᠦ ᠪᠢᠳᠡ ᠬᠤᠶᠡᠷ ᠢ ᠦᠨᠦᠰᠦᠬᠡᠳ ᠬᠤᠴᠤᠷᠴᠦ ᠪᠢᠯᠠ᠃ ᠠᠶᠢᠮᠠᠭ ᠤᠷᠤᠭᠤ ᠪᠠᠨ ᠪᠤᠴᠠᠵᠦ ᠶᠠᠪᠤᠬᠤ ᠳᠤ ᠰᠡᠳᠬᠢᠯ ᠨᠢᠬᠡᠯᠡ ᠬᠦᠨᠳᠦᠭᠦᠷᠯᠡᠨ ᠵᠦᠩ ᠰᠤᠪᠢᠩ ᠮᠢᠨᠢ ᠨᠢᠬᠡ ᠶᠢ ᠬᠡᠯᠡᠬᠡᠳ ᠪᠠᠶᠢᠭᠰᠠᠨ ᠢ ᠲᠡᠨᠡᠭᠭᠡᠨ ᠪᠢ ᠲᠡᠷᠡ ᠦᠶ᠎ᠡ ᠳᠤ ᠮᠡᠳᠡᠷᠡᠭᠡ ᠦᠬᠡᠢ ᠪᠦᠬᠡᠳ ᠣᠷᠦᠢ ᠨᠢ ᠠᠶᠢᠮᠠᠭ ᠲᠤ ᠢᠷᠡᠵᠦ᠂ ᠶᠠᠭᠠᠬᠢᠭᠰᠠᠨ ᠴᠦ ᠶᠤᠮ ᠵᠢᠭᠳᠡᠶᠢᠬᠡᠨ ᠭᠤᠨᠢᠭᠳᠠᠢ ᠰᠢᠯᠥᠭ ᠪᠢᠴᠢᠵᠦ ᠪᠢᠯᠠ᠃ ᠲᠡᠷᠡ ᠪᠤᠯ ᠠᠪᠤ᠂ ᠡᠵᠢ᠂ ᠲᠠᠷᠢᠭᠠᠩᠭ᠎ᠠ ᠶᠢᠨ ᠲᠤᠬᠠᠢ ᠰᠡᠪᠡᠯᠵᠡᠭᠰᠡᠨ ᠰᠠᠯᠬᠢ ᠲᠠᠢ ᠰᠢᠯᠥᠭ ᠤᠳ ᠪᠠᠶᠢᠯ᠎ᠠ᠃ ᠲᠡᠳᠡᠨ ᠢ ᠪᠢ ︽ᠵᠡᠬᠦᠳᠦᠨ ᠤ ᠮᠦᠩᠬᠦᠨ ᠰᠢᠪᠠᠭᠤ︾ ᠨᠤᠮ ᠳᠠᠭᠠᠨ ᠤᠷᠤᠭᠤᠯᠤᠭᠰᠠᠨ᠃      ᠬᠤᠳᠠ ᠳᠤ ᠢᠷᠡᠭᠡᠳ ᠪᠢ ᠤᠳᠠᠯ ᠦᠬᠡᠢ ᠬᠤᠶᠢᠰᠢ ᠠᠵᠢᠯ ᠢᠶᠠᠷ ᠶᠠᠪᠤᠭᠰᠠᠨ ᠪᠦᠭᠡᠳ ᠤᠷᠤᠭᠰᠢ ᠪᠠᠨ ᠶᠠᠷᠢᠬᠤ ᠳᠤ ᠠᠪᠤ ᠮᠢᠨᠢ ᠪᠡᠶ᠎ᠡ ᠰᠠᠶᠢᠨ ᠪᠠᠶᠢᠨ᠎ᠠ᠂ ᠲᠠᠨ ᠢ ᠶᠠᠪᠤ ᠭᠡᠰᠡᠨ ᠬᠡᠵᠦ ᠲᠡᠬᠦᠦ ᠬᠡᠯᠡᠵᠦ ᠪᠢᠯᠠ᠃ ᠪᠢ ᠠᠷᠪᠠᠭᠠᠳ ᠬᠤᠨᠤᠭ ᠶᠠᠪᠤᠬᠤ ᠲᠤᠯᠠ ᠨᠢᠬᠡ ᠶᠡᠭᠡ ᠰᠠᠨᠠᠭ᠎ᠠ ᠵᠤᠪᠠᠭ᠎ᠠ ᠦᠬᠡᠢ᠃ ᠮᠤᠰᠺᠸᠡ᠂ ᠪᠠᠯᠲ ᠤᠨ ᠲᠠᠩᠬᠢᠰ ᠎ ᠤᠨ ᠬᠦᠪᠡᠬᠡᠨ ᠳᠠᠬᠢ ᠨᠠᠷᠢᠨ ᠬᠡᠮᠡᠬᠦ ᠨᠤᠳᠤᠭ ᠢᠶᠠᠷ ᠶᠠᠪᠤᠵᠦ᠂ ᠺᠢᠶᠧᠪᠲ ᠲᠤ ᠢᠷᠡᠭᠰᠡᠨ ᠠᠴᠠ ᠬᠤᠶᠢᠰᠢ ᠮᠦᠨ ᠯᠠ ᠲᠡᠷᠡ ᠬᠡᠬᠦ ᠰᠢᠯᠳᠠᠭᠠᠨ ᠦᠬᠡᠢ ᠬᠢᠷᠢ ᠨᠢ ᠰᠡᠳᠬᠢᠯ ᠭᠤᠨᠢᠭᠯᠠᠵᠦ᠂ ᠨᠤᠳᠤᠭ ᠤᠷᠤᠨ ᠰᠠᠨᠠᠭᠳᠠᠵᠦ᠂ ᠶᠠᠭ ᠲᠠᠷᠢᠭᠠᠩᠭ᠎ᠠ ᠠᠴᠠ ᠭᠠᠷᠤᠭᠰᠠᠨ ᠡᠳᠦᠷ ᠰᠢᠭ ᠰᠡᠳᠬᠢᠯ ᠰᠡᠩᠰᠡᠷᠡᠨ᠂ ᠶᠠᠭᠤᠮ᠎ᠠ ᠦᠵᠡᠵᠦ ᠬᠠᠷᠠᠬᠤ ᠠᠴᠠ ᠪᠠᠨ ᠲᠤᠷ᠎ᠠ ᠦᠬᠡᠢ ᠬᠦᠷᠴᠦ᠂ ᠪᠤᠰᠢᠭᠤᠬᠠᠨ ᠪᠤᠴᠠᠬᠤ ᠶᠢ ᠬᠦᠰᠡᠵᠦ᠂ ᠵᠤᠴᠢᠳ ᠤᠨ ᠪᠠᠭᠤᠳᠠᠯ ᠳᠤ ᠭᠡᠪᠳᠡᠵᠦ ᠪᠠᠶᠢᠪᠠ᠃ ᠲᠡᠭᠡᠭᠰᠡᠨ ᠢᠶᠠᠨ ᠰᠦᠮ᠎ᠡ ᠳᠤ ᠣᠴᠢᠮᠠᠷ ᠰᠠᠨᠠᠭᠳᠠᠵᠦ ᠪᠢᠯᠠ᠃ ᠡᡁᠢᠷᠢᠰᠲ᠋ᠤᠰ ᠤᠨ ᠱᠠᠰᠢᠨ ᠤ ᠰᠦᠮ᠎ᠡ ᠳᠤ ᠪᠢ ᠴᠤᠬᠤᠮ ᠶᠠᠭᠠᠬᠢᠬᠤ ᠶᠤᠰᠤᠳᠠᠢ ᠪᠠᠨ ᠮᠡᠳᠡᠬᠦ ᠦᠬᠡᠢ ᠲᠤᠯᠠ ᠲᠡᠮᠡᠢ ᠪᠠᠭ᠋ᠠᠨ ᠬᠠᠷᠠᠵᠦ ᠪᠠᠶᠢᠭᠠᠳ ᠭᠠᠷᠴᠦ ᠢᠷᠡᠯ᠎ᠡ᠃ 7 ᠳ᠋ᠤᠭᠠᠷ ᠰᠠᠷ᠎ᠠ ᠶᠢᠨ 9᠎ ᠤ ᠦᠷᠯᠦᠬᠡ ᠺᠢᠶᠧᠪᠲ ᠡᠴᠠ‌ᠮᠤᠰᠺᠸᠡ ᠳᠤ ᠢᠷᠡᠬᠦ ᠳᠤ ᠨᠠᠳᠠᠳᠦ ᠪᠦᠬᠦ ᠶᠠᠭᠤᠮ᠎ᠠ ᠤᠴᠢᠷ ᠤᠳᠬ᠎ᠠ ᠦᠬᠡᠢ᠂ ᠶᠢᠷᠳᠢᠨᠴᠦ ᠲᠡᠬᠢᠨ ᠰᠢᠷᠭᠠᠯᠳᠦᠵᠦ᠂ ᠶᠡᠷᠦ ᠠᠴᠠ ᠪᠠᠨ ᠰᠡᠳᠬᠢᠯ ᠲᠠᠶᠢᠪᠤᠩ ᠦᠬᠡᠢ᠂ ᠪᠤᠰᠤᠨ ᠰᠠᠭᠤᠨ ᠬᠤᠯᠬᠢᠭᠰᠠᠭᠠᠷ ᠪᠠᠶᠢᠪᠠ᠃ ᠵᠦᠪᠯᠡᠯᠳᠦ ᠶᠢᠨ ᠵᠤᠬᠢᠶᠠᠯᠴᠢ ᠶᠢᠨ ᠬᠤᠷᠢᠶ᠎ᠠ ᠤᠷᠤᠭᠤ ᠤᠳᠠᠰᠦᠳᠡᠵᠦ ᠯᠤᠮᠠᠺᠢᠨᠡ ᠭᠡᠳᠡᠭ ᠡᠮᠡᠭᠳᠡᠢ ᠠᠴᠠ ᠠᠰᠠᠭᠤᠭᠰᠠᠨ ᠴᠢᠨᠢ ︽ᠴᠢ ᠶᠠᠭᠠᠷᠯᠳᠠᠢ ᠶᠠᠪᠤᠬᠤ ᠬᠡᠷᠡᠭᠳᠡᠢ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠠᠪᠤ ᠶᠢᠨ ᠴᠢᠨᠢ ᠪᠡᠶ᠎ᠡ ᠮᠠᠭᠤ ᠪᠠᠶᠢᠨ᠎ᠠ︾ ᠭᠡᠪᠡ᠃ ᠮᠤᠰᠺᠸᠡ ᠠᠴᠠ ᠡᠷᠬᠦᠦ ᠬᠦᠷᠳᠡᠯ᠎ᠡ᠂ ᠡᠷᠬᠦᠦ ᠠᠴᠠ ᠤᠯᠠᠭᠠᠨᠪᠠᠭᠠᠳᠦᠷ ᠬᠦᠷᠳᠡᠯ᠎ᠡ ᠪᠢ ᠴᠤᠷᠮ᠎ᠠ ᠬᠢᠬᠡ ᠦᠬᠡᠢ ᠪᠦᠬᠡᠳ ᠰᠦᠨᠢᠵᠢᠨ ᠵᠠᠯᠪᠠᠷᠢᠵᠦ᠂ ᠬᠠᠮᠢᠭᠠᠰᠢ ᠳᠠᠭᠠᠨ ᠪᠦᠬᠦ ᠶᠠᠭᠤᠮ᠎ᠠ ᠦᠩᠬᠡᠷᠡᠭᠰᠡᠨ ᠢ ᠤᠶᠢᠯᠠᠭᠠᠵᠦ ᠪᠢᠯᠠ᠃      ᠪᠢ ᠠᠪᠤ ᠶᠢ ᠪᠠᠨ ᠲᠦᠩᠬᠡᠵᠢ ᠬᠦᠳᠡᠬᠡᠯᠡᠬᠦᠯᠬᠦ ᠠᠴᠠ ᠡᠮᠦᠨ᠎ᠡ ᠤᠴᠢᠭᠰᠠᠨ ᠶᠤᠮ᠃ ᠨᠠᠷᠠ ᠮᠠᠨᠳᠤᠬᠤ ᠦᠶ᠎ᠡ ᠎ ᠪᠠᠷ ᠬᠡᠷ ᠠᠴᠠ ᠨᠢ ᠭᠠᠷᠭᠠᠭᠰᠠᠨ ᠪᠦᠭᠡᠳ ᠠᠶᠢᠯ ᠤᠨ ᠲᠤᠮᠤ ᠬᠦᠦ ᠶᠢᠨ ᠬᠤᠪᠢ ᠳᠤ ᠡᠴᠦᠰ ᠤᠨ ᠤᠳᠠᠭ᠎ᠠ ᠠᠪᠤ ᠎ ᠲᠠᠢ ᠪᠠᠨ ᠰᠠᠯᠬᠤ ᠶᠤᠰᠦ ᠭᠦᠢᠴᠡᠳᠭᠡᠵᠦ ᠦᠬᠡ ᠬᠡᠯᠡᠬᠦ ᠪᠤᠯᠤᠭᠰᠠᠨ᠃          ︽᠂᠂᠂᠂ ᠪᠢᠳᠡ ᠦᠨᠦᠳᠦᠷ ᠶᠢᠷᠳᠢᠨᠴᠦ ᠶᠢᠨ ᠬᠠᠮᠤᠭ ᠰᠠᠶᠢᠬᠠᠨ ᠰᠡᠳᠬᠢᠯ ᠲᠠᠢ ᠬᠠᠮᠤᠭ ᠤᠨ ᠰᠢᠳᠤᠷᠭᠤ ᠬᠦᠮᠥᠰ ᠤᠨ ᠨᠢᠬᠡ ᠶᠢ ᠡᠴᠤᠰ ᠤᠨ ᠵᠠᠮ ᠳᠤ ᠨᠢ ᠦᠳᠡᠵᠦ ᠪᠠᠶᠢᠨ᠎ᠠ᠃ ᠠᠪᠤ ᠮᠢᠨᠢ ᠠᠷᠪᠠᠨ ᠬᠡᠤᠭᠡᠳ ᠲᠦᠷᠦᠬᠦᠯᠡᠵᠦ ᠦᠰᠭᠡᠭᠰᠡᠨ᠂ ᠬᠡᠷᠪᠡ ᠭᠦᠮᠥᠨ ᠠᠷᠠᠳ ᠲᠤ ᠲᠤᠰᠠᠳᠠᠢ ᠵᠢᠭᠠᠬᠠᠨ ᠴᠦ ᠬᠡᠰᠡᠨ ᠶᠠᠭᠤᠮ᠎ᠠ ᠬᠢᠪᠡᠯ ᠠᠪᠤ ᠮᠢᠨᠢ ᠪᠢᠳᠡᠨ ᠎ ᠢᠶᠠᠷ ᠲᠠᠮᠵᠢᠭᠤᠯᠤᠨ ᠲᠠ ᠨᠠᠷ ᠲᠠᠭᠠᠨ ᠲᠤᠰᠠᠯᠠᠵᠦ ᠪᠠᠶᠢᠨ᠎ᠠ ᠬᠡᠵᠦ ᠪᠤᠳᠤᠭᠠᠷᠠᠢ᠃ ᠪᠢᠳᠡ ᠶᠠᠯᠢᠬᠤ ᠦᠬᠡᠢ ᠴᠦ ᠬᠡᠰᠡᠨ ᠨᠢᠬᠡᠨ ᠮᠠᠭᠤ ᠦᠢᠯᠡ ᠦᠢᠯᠡᠳᠪᠡᠯ ᠲᠡᠷᠡ ᠪᠦᠬᠦᠨ ᠠᠪᠤ ᠳᠤ ᠮᠢᠨᠢ ᠤᠭᠳᠤᠬᠠᠨ ᠴᠦ ᠬᠠᠮᠢᠶ᠎ᠠ ᠦᠬᠡᠢ᠂ ᠵᠦᠪᠬᠡᠨ ᠪᠢᠳᠡᠨ ᠤ ᠨᠢᠬᠦᠯ ᠶᠤᠮ ᠰᠢᠥ᠂᠂᠂᠂ ᠪᠢ ᠦᠨᠦᠳᠦᠷ ᠠᠪᠤ ᠲᠠᠢ ᠪᠠᠨ ᠰᠠᠯᠬᠤ ᠶᠤᠰᠤ ᠬᠦᠢᠴᠡᠳᠭᠡᠭᠦ ᠦᠬᠡᠢ᠂ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠬᠡᠵᠢᠶ᠎ᠡ ᠨᠢᠬᠡᠨ ᠴᠠᠭ ᠲᠤ᠂ ᠬᠡᠳᠤᠨ ᠠᠷᠪᠠ᠂ ᠵᠠᠭᠤ ᠡᠰᠡᠭᠦᠯ᠎ᠡ ᠬᠡᠳᠦᠨ ᠮᠢᠩᠭ᠎ᠠ᠂ ᠮᠠᠭᠠᠳ ᠪᠤᠮ ᠰᠠᠶ᠎ᠠ᠂ ᠲᠡᠷᠪᠤᠮ ᠵᠢᠯ ᠤᠨ ᠲᠠᠷᠠᠭ᠎ᠠ ᠴᠦ ᠶᠤᠮ ᠤᠤ᠂ ᠪᠤᠷᠬᠠᠨ ᠤ ᠡᠯᠢᠬᠡᠨ ᠲᠡᠭᠡᠷ᠎ᠡ ᠪᠢᠳᠡ ᠠᠭᠤᠯᠵᠠᠨ᠎ᠠ᠃ ᠪᠤᠷᠬᠠᠨ ᠪᠤᠢ᠂ ᠪᠢ ᠠᠪᠤ ᠶᠢᠨ ᠢᠶᠠᠨ ᠠᠯᠳᠠᠨ ᠰᠠᠶᠢᠬᠠᠨ ᠪᠡᠶ᠎ᠡ ᠶᠢ ᠨᠢ ᠭᠠᠵᠠᠷ ᠲᠡᠯᠡᠬᠡᠢ ᠳᠤ᠂ ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠨᠢ ᠲᠠᠭᠠᠳᠬᠠᠯ᠎ᠠ᠃ ᠠᠪᠤ ᠮᠢᠨᠢ ᠬᠡᠷᠪᠡ ᠡᠷᠬᠢᠵᠦ ᠲᠦᠷᠦᠬᠦ ᠶᠤᠰᠤᠳᠠᠢ ᠶᠤᠮ ᠪᠤᠯ ᠦᠷ᠎ᠡ ᠬᠡᠤᠭᠡᠳ ᠪᠢᠳᠡᠨ ᠤ ᠪᠠᠨ ᠬᠡᠨ ᠨᠢᠬᠡᠨ ᠳᠤ ᠬᠦᠦ ᠪᠤᠯᠵᠦ ᠢᠷᠡᠬᠦ ᠪᠤᠯᠳᠤᠭᠠᠢ᠂᠂᠂᠂︾ ᠬᠡᠰᠡᠨ ᠪᠢᠯᠡ᠃ ᠪᠢ ᠵᠡᠬᠦᠵᠦ ᠶᠠᠪᠤᠭᠰᠠᠨ ᠴᠠᠭ ᠢᠶᠠᠨ ᠠᠪᠤ ᠎ ᠶᠢᠨ ᠢᠶᠠᠨ ᠪᠠᠭᠤᠤ ᠳᠤ ᠬᠢᠵᠦ ᠤᠷᠬᠢᠭᠰᠠᠨ ᠪᠦᠭᠡᠳ ᠭᠡᠳᠦᠶᠢᠪᠡᠷ ᠭᠠᠵᠠᠷ ᠲᠤᠤᠷ᠎ᠠ ᠤᠷᠤᠭᠰᠠᠨ ᠴᠦ ᠬᠡᠰᠡᠨ᠂ ᠭᠠᠵᠠᠷ ᠲᠡᠭᠡᠷᠡᠭᠢ ᠠᠮᠢᠳᠤᠷᠠᠯ ᠲᠠᠢ ᠬᠡᠳᠦᠨ ᠴᠠᠭ ᠢᠶᠠᠷ ᠪᠤᠯᠳᠤᠭᠠᠢ ᠬᠤᠯᠪᠤᠭᠳᠠᠭ ᠬᠡᠵᠦ ᠪᠤᠳᠤᠭᠰᠠᠨ ᠪᠢᠯᠠ᠃ ᠴᠤ᠋ ᠰᠢᠨ᠎ᠡ ᠲᠡᠷᠡ ᠴᠠᠭ ᠨᠡᠯᠢᠶᠡᠳ ᠤᠯᠠᠨ ᠴᠠᠭ ᠴᠤᠬᠢᠯᠠᠭᠰᠠᠨ ᠪᠠᠶᠢᠬᠤ ᠤᠴᠢᠷᠳᠡᠢ᠃ ᠲᠡᠷᠡ ᠴᠠᠭ ᠵᠤᠭᠰᠤᠳᠠᠯ᠎ᠠ ᠠᠪᠤ ᠮᠢᠨᠢ ᠨᠠᠷᠠᠳᠦ ᠶᠢᠨ ᠠᠮᠢᠳᠤᠷᠠᠯ ᠳᠤ ᠶᠠᠮᠠᠷᠬᠠᠨ ᠨᠢᠬᠡ ᠰᠢᠵᠢᠮ ᠢᠶᠠᠷ ᠬᠤᠯᠪᠤᠭᠠᠳᠠᠢ ᠪᠠᠶᠢᠭᠰᠠᠨ ᠪᠢᠵᠡ᠃ ᠰᠡᠬᠦᠯᠴᠢ ᠶᠢᠨ ᠡᠳᠦᠷ ᠤᠳ ᠤᠨ ᠲᠤᠬᠠᠢ ᠪᠢ ᠰᠡᠬᠦᠯ ᠳᠤ ᠨᠢ ᠰᠤᠨᠤᠰᠤᠭᠰᠠᠨ ᠪᠦᠬᠡᠳ ᠠᠪᠤ ᠪᠠᠷ ᠢᠶᠠᠨ ᠪᠠᠭ᠋ᠠᠷᠬᠠᠭᠰᠠᠨ ᠶᠤᠮ᠃ ᠵᠤᠨ ᠤ ᠢᠳᠡ ᠹᠦ᠋ ᠶᠢᠨ ᠡᠳᠦᠷ ᠤᠳ ᠲᠤ ᠪᠠᠶ᠎ᠠ ᠨᠢ ᠨᠢᠬᠡᠯᠡ ᠮᠠᠭᠤᠳᠠᠵᠦ ᠬᠠᠰᠢ ᠳᠠᠭᠠᠨ ᠨᠠᠮᠠᠢᠢ ᠬᠦᠯᠢᠶᠡᠵᠦ ᠴᠢᠳᠠᠬᠤ ᠦᠬᠡᠢ ᠪᠤᠯᠤᠭᠰᠠᠨ ᠢᠶᠠᠨ ᠮᠡᠳᠡᠭᠰᠡᠨ ᠠᠪᠤ ᠮᠢᠨᠢ ᠠᠮᠢᠳᠦ ᠳᠤ ᠨᠢ ᠠᠮᠵᠢᠵᠦ ᠢᠷᠡᠬᠦ ᠦᠬᠡᠢ ᠴᠦ ᠬᠡᠰᠡᠨ᠂ ᠬᠦᠳᠡᠭᠡᠯᠡᠬᠦᠯᠬᠦ ᠳᠤ ᠨᠢ ᠦᠪᠡᠷ ᠤᠨ ᠪᠠᠶ᠎ᠠ ᠪᠠᠷ ᠤᠷᠤᠯᠴᠠᠵᠦ᠂ ᠶᠡᠰᠦ ᠶᠢ ᠨᠢ ᠪᠠᠷᠢᠭ ᠭᠡᠰᠡᠨ ᠪᠤᠯᠤᠯᠳᠠᠢ᠃ ᠴᠢᠩ ᠵᠤᠷᠢᠭ ᠢ ᠪᠠᠷᠢᠵᠦ᠂ ᠬᠡᠳᠦ ᠬᠤᠨᠤᠭ ᠬᠤᠳᠤᠭᠤᠳᠦ ᠲᠤᠳᠦᠷ ᠢᠶᠠᠨ ᠴᠡᠪᠡᠷᠯᠡᠨ᠎ᠡ ᠬᠡᠳ ᠶᠠᠭᠤ ᠴᠦ ᠢᠳᠡᠵᠦ ᠤᠤᠭᠤᠬᠤ ᠎ ᠪᠠᠨ ᠪᠤᠯᠢᠭᠰᠠᠨ ᠬᠡᠨ᠎ᠡ᠃ ᠲᠡᠬᠦᠨ ᠤ ᠰᠢᠯᠳᠠᠭᠠᠨ ᠨᠢ ᠲᠠᠯᠢᠢᠭᠴᠢ ᠪᠤᠯᠤᠭᠰᠠᠨ ᠬᠦᠮᠥᠨ ᠵᠤᠨ ᠤ ᠬᠠᠯᠠᠭᠤᠨ ᠳᠤ ᠲᠤᠳᠤᠷ ᠠᠴᠠ ᠪᠠᠨ ᠡᠬᠢᠯᠠᠵᠦ ᠮᠠᠭᠤᠳᠠᠳᠠᠭ ᠭᠡᠵᠦ ᠰᠤᠨᠤᠰᠤᠭᠰᠠᠨ ᠤ ᠪᠤᠯᠤᠯᠳᠠᠢ᠃ ᠲᠡᠭᠡᠭᠡᠳ ᠬᠦᠮᠥᠨ ᠰᠢᠭ ᠦᠬᠦᠶ᠎ᠡ ᠬᠡᠵᠦ ᠰᠢᠢᠳᠦᠭᠰᠡᠨ ᠪᠢᠵᠡ᠃ ᠤᠶᠢᠴᠢᠬᠤ ᠠᠴᠠ ᠪᠠᠨ ᠡᠮᠦᠨ᠎ᠡ ᠡᠮᠨᠡᠯᠬᠡ ᠶᠢᠨ ᠬᠢ ᠶᠢ ᠲᠠᠭᠤᠳᠠᠵᠦ ᠬᠤᠳᠤᠭᠤᠳᠦ ᠲᠤᠳᠦᠷ ᠢᠶᠠᠨ ᠴᠡᠪᠡᠷᠯᠡᠬᠦᠯᠦᠭᠰᠡᠨ ᠬᠢᠬᠡᠳ ᠠᠮᠠ ᠵᠠᠶᠢᠯᠬᠤ ᠲᠡᠳᠦᠢ ᠯᠠ ᠴᠠᠢ ᠠᠮᠰᠠᠨ᠎ᠠ᠂᠂᠂᠂ ᠲᠡᠶᠢᠮᠥ ᠡ᠂ ᠠᠪᠤ ᠮᠢᠨᠢ ᠰᠠᠨᠠᠭᠰᠠᠨ ᠳᠠᠭᠠᠨ ᠬᠦᠷᠴᠦ ᠨᠠᠮᠠᠢᠢ ᠤᠯᠠᠨ ᠬᠤᠨᠤᠭ ᠤᠨ ᠲᠠᠷᠠᠭ᠎ᠠ ᠤᠴᠢᠬᠤ ᠳᠤ ᠴᠤᠭᠴᠠᠰ ᠨᠢ ᠤᠭᠳᠤᠬᠠᠨ ᠴᠦ ᠮᠠᠭᠤᠳᠠᠭ᠎ᠠ ᠦᠬᠡᠢ᠂ ᠴᠡᠪᠡᠷᠬᠡᠨ ᠤᠨᠳᠠᠵᠦ ᠪᠠᠶᠢᠭ᠎ᠠ ᠬᠦᠮᠥᠨ ᠰᠢᠭ ᠯᠠ ᠪᠠᠶᠢᠯ᠎ᠠ᠃ ᠶᠡᠷᠦ ᠨᠢ ᠮᠠᠨ ᠎ ᠤ ᠡᠪᠦᠭᠡ ᠲᠡᠭᠡᠳᠦᠰ ᠶᠢᠷᠳᠢᠨᠴᠦ ᠠᠴᠠ ᠤᠳᠬᠤ ᠠᠴᠠ ᠪᠠᠨ ᠡᠮᠦᠨ᠎ᠡ ᠦᠪᠡᠷ ᠢ ᠪᠠᠨ ᠪᠦᠷᠢᠨ ᠠᠷᠢᠭᠤᠳᠬᠠᠬᠤ ᠶᠢ ᠡᠷᠬᠢᠮᠯᠡᠳᠡᠭ ᠪᠠᠶᠢᠭᠰᠠᠨ ᠨᠢᠬᠡᠨ ᠰᠠᠶᠢᠬᠠᠨ ᠵᠠᠩᠰᠢᠯ ᠶᠡᠭᠡ ᠯᠠ ᠬᠦᠨ ᠬᠦᠨᠵᠡᠬᠡᠢ ᠤᠳᠬ᠎ᠠ ᠲᠠᠢ ᠶᠤᠮ᠃ ︽ᠠᠪᠤ ᠴᠢᠨᠢ ᠦᠭᠡᠷ᠎ᠡ ᠬᠦᠮᠥᠨ ᠪᠠᠶᠢᠭᠰᠠᠨ ᠪᠤᠯᠬᠤᠷ᠂ ᠲᠡᠭᠡᠯᠬᠦᠢ ᠶᠠᠭᠠᠬᠢᠬᠤ ᠪᠤᠢ︾ ᠬᠡᠵᠦ ᠡᠵᠢ ᠬᠡᠯᠡᠵᠦ ᠪᠢᠯᠡ᠃        ᠲᠡᠷᠡ ᠴᠠᠭ ᠠᠴᠠ ᠬᠤᠶᠢᠰᠢ ᠭᠤᠷᠪᠠᠨ ᠵᠢᠯ ᠦᠩᠬᠡᠷᠡᠯ᠎ᠡ᠃ ᠠᠪᠤ ᠲᠠᠢ ᠪᠠᠨ ᠠᠭᠤᠯᠵᠠᠵᠦ ᠴᠢᠳᠠᠭ᠎ᠠ ᠦᠬᠡᠢ ᠭᠤᠨᠢᠭ᠂ ᠰᠡᠳᠬᠢᠯ ᠢ ᠮᠢᠨᠢ ᠰᠢᠨᠠᠯᠭᠠᠭᠰᠠᠭᠠᠷ᠂᠂᠂᠂ ᠡᠨᠡ ᠲᠤᠬᠠᠢ ᠪᠢ ︽ᠵᠠᠯᠠᠭᠤᠰ ᠲᠡᠭᠦᠤᠨᠡᠷ ᠲᠡᠭᠡᠨ ᠬᠦᠷᠬᠡᠬᠦ ᠰᠢᠯᠥᠭ︾᠎ ᠲᠡᠭᠡᠨ ᠪᠢᠴᠢᠭᠰᠡᠨ ᠪᠢᠯᠡ᠃ ᠰᠦᠮ᠎ᠡ ᠬᠡᠶᠢᠳ᠂ ᠨᠤᠮ ᠰᠤᠳᠤᠷ᠂ ᠶᠤᠰᠤᠯᠠᠯ ᠤᠨ ᠦᠪ ᠢ ᠬᠠᠮᠠᠭᠠᠯᠠᠬᠤ ᠠᠰᠠᠭᠤᠳᠠᠯ ᠢ ᠪᠢᠴᠢᠵᠦ᠂ ᠬᠦᠨᠳᠡᠬᠦ᠂ ᠬᠦᠬᠡᠬᠡᠴᠡᠯᠳᠦᠬᠦ ᠠᠵᠢᠯ ᠮᠢᠨᠢ ᠲᠡᠷᠡ ᠦᠶ᠎ᠡ ᠡᠬᠢᠯᠡᠵᠦ᠂ ᠡᠨᠡ ᠪᠦᠬᠦᠨ ᠢᠶᠠᠨ ᠪᠢ ᠠᠪᠤ ᠶᠢᠨ ᠢᠶᠠᠨ ᠲᠦᠯᠦᠬᠡ ᠬᠢᠵᠦ ᠪᠤᠢ᠂ ᠠᠪᠤ ᠮᠢᠨᠢ ᠨᠠᠳᠠ ᠪᠠᠷ ᠲᠠᠮᠵᠢᠭᠤᠯᠤᠨ ᠬᠦᠮᠥᠰ ᠲᠤ ᠵᠢᠭᠠᠬᠠᠨ ᠴᠦ ᠪᠤᠯᠤᠭᠰᠠᠨ ᠪᠤᠶᠠᠨ ᠦᠢᠯᠡᠳᠴᠦ ᠪᠤᠢ ᠬᠡᠵᠦ ᠦᠪᠡᠷ ᠢ ᠪᠠᠨ ᠲᠠᠶᠢᠪᠤᠰᠢᠷᠠᠭᠤᠯᠤᠨ᠂ ᠰᠢᠯᠥᠭ ᠵᠤᠬᠢᠶᠠᠯ ᠪᠦᠬᠦᠨ ᠮᠢᠨᠦᠬᠢ ᠪᠢᠰᠢ᠂ ᠭᠠᠭᠴᠠ ᠲᠡᠬᠦᠨ ᠤ ᠯᠠ ᠪᠦᠳᠦᠬᠡᠯ᠂ ᠠᠪᠤ ᠮᠢᠨᠢ ᠨᠠᠳᠠ ᠪᠠᠷ ᠲᠡᠮᠵᠢᠨ ᠠᠮᠢᠳᠦ ᠰᠡᠷᠡᠬᠦᠨ ᠪᠠᠶᠢᠨ᠎ᠠ ᠬᠡᠵᠦ ᠪᠤᠳᠤᠳᠠᠭ ᠪᠤᠯᠤᠭᠰᠠᠨ ᠶᠤᠮ᠃        ᠬᠡᠷᠪᠡ ᠮᠢᠨᠥ ᠵᠤᠬᠢᠶᠠᠯ ᠪᠦᠳᠦᠬᠡᠯ ᠠᠴᠠ ᠬᠦᠮᠦᠰ ᠲᠠ ᠨᠠᠷ ᠲᠠᠭᠠᠨ ᠭᠠᠭᠴᠠ ᠴᠦ ᠠᠳᠤᠭᠠᠢ ᠲᠠᠭᠠᠯᠠᠭᠳᠠᠪᠠᠯ ᠲᠡᠷᠡ ᠮᠢᠨᠦ ᠪᠤᠰᠦ᠂ ᠠᠪᠤ ᠶᠢᠨ ᠮᠢᠨᠢ ᠪᠤᠶᠠᠨ ᠪᠦᠯᠦᠬᠡ᠂ ᠨᠠᠳᠠᠳᠦ ᠪᠠᠶᠠᠷ ᠬᠦᠷᠬᠡᠳᠡᠭ ᠬᠡᠨ ᠪᠦᠬᠦᠨ ᠠᠪᠤ ᠳᠤ ᠮᠢᠨᠢ ᠪᠤᠶᠠᠨ ᠰᠠᠨᠠᠵᠦ᠂ ᠠᠪᠤ ᠶᠢ ᠮᠢᠨᠢ ᠬᠦᠨᠳᠤᠯᠡᠬᠦ ᠪᠤᠯᠤᠭᠠᠰᠠᠢ︕ ᠰᠠᠶᠢᠨ ᠪᠤᠶᠠᠨ ᠲᠡᠯᠭᠡᠷᠡᠳᠦᠬᠡᠢ︕            ︵ᠬᠤᠯᠪᠤᠭ᠎ᠠ ᠰᠦᠯᠵᠢᠶ᠎ᠠ ᠳᠠᠬᠢ ᠬᠡᠷᠡᠳᠠᠢ ᠬᠠᠰᠪᠠᠶᠠᠷ ᠤᠨ ᠪᠦᠷᠭᠡ ᠠᠴᠠ ᠰᠢᠯᠵᠢᠬᠦᠯᠪᠡ︶
 
ᠢᠷᠡᠯᠲᠡ᠄ ᠬᠡᠰᠢᠭᠳᠡᠨ ᠮᠤᠩᠭᠤᠯ ᠰᠦᠯᠵᠢᠶ᠎ᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠭᠠᠵᠠᠷ ᠤᠨ ᠵᠢᠷᠤᠭ ᠢ ᠵᠢᠷᠤᠮᠵᠢᠭᠤᠯᠤᠨ ᠬᠡᠷᠡᠭᠯᠡᠵᠦ ᠣᠭᠲᠣᠬᠠᠨ ᠴᠤ ᠪᠤᠷᠤᠭᠤ ᠭᠠᠷᠭᠠᠵᠤ ᠪᠤᠯᠬᠤ ᠦᠭᠡᠢ
︽ᠤᠮᠠᠷᠠᠲᠤ ᠬᠢᠯᠢ ᠶᠢᠨ ᠰᠣᠶᠣᠯ︾᠎ ᠢ ᠪᠠᠳᠠᠷᠠᠭᠤᠯᠵᠤ ᠰᠣᠶᠣᠯ ᠤᠨ ᠬᠦᠴᠦᠷᠬᠡᠭ ᠣᠷᠣᠨ ᠢ ᠲᠦᠷᠭᠡᠳᠬᠡᠨ ᠁
ᠳᠠᠷᠦ᠋ᠢᠬᠠᠨ ᠬᠦᠢᠴᠡᠳᠬᠡᠵᠦ ᠦᠨᠡᠨ ᠬᠦ ᠠᠳᠬᠤᠨ ᠪᠣᠳᠠᠲᠠᠢ ᠠᠵᠢᠯᠯᠠᠬᠤ ᠶᠢ ᠲᠠᠳᠬᠠᠯ ᠪᠣᠯᠭᠠᠶ᠎ᠠ
ᠠᠷᠠᠳ ᠲᠦᠮᠡᠨ ᠢ ᠳᠡᠭᠡᠳᠦᠯᠡᠬᠦ ᠶᠢ ᠢᠮᠠᠭᠲᠠ ᠪᠠᠷᠢᠮᠲᠠᠯᠠᠰᠤᠭᠠᠢ
ᠴᠠᠭ ᠦᠶ᠎ᠡ ᠶᠢᠨ ᠤᠷᠤᠰᠬᠠᠯ ᠪᠠ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠤ ᠪᠣᠯᠪᠠᠰᠤᠨ ᠳᠠᠪᠰᠢᠯᠲᠠ ᠶᠢᠨ ᠴᠢᠭᠯᠡᠯ ᠢ ᠬᠥᠲᠥᠯᠥᠨ ᠁
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号