ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠴᠠᠭ ᠵᠠᠪ ᠢᠶᠠᠨ ᠳᠡᠮᠡᠢ ᠶᠠᠭᠤᠮᠠᠨ ᠳᠤ ᠪᠤᠤ ᠦᠷᠡ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2015/2/27
       ᠲᠠ ᠪᠢᠳᠡᠨ ᠤ ᠡᠪᠦᠭᠡ ᠳᠡᠭᠡᠳᠦᠰ ᠴᠠᠭ ᠴᠢᠮ᠎ᠠ ᠶᠢ ᠬᠦᠯᠢᠶᠡᠬᠦ ᠦᠭᠡᠢ᠂ ᠨᠠᠷᠠ ᠨᠠᠮ᠎ᠠ ᠶᠢ ᠬᠦᠯᠢᠶᠡᠬᠦ ᠦᠭᠡᠢ ᠭᠡᠵᠦ ᠰᠤᠷᠭᠠᠮᠵᠢᠯᠠᠨ ᠵᠠᠬᠢᠭᠰᠠᠨ᠃ ᠡᠨᠡ ᠰᠤᠷᠭᠠᠯ ᠦᠭᠡ ᠴᠠᠭ ᠤᠨ ᠶᠠᠭᠤᠮ᠎ᠠ ᠶᠢ ᠴᠠᠭ ᠲᠤᠨᠢ ᠠᠮᠵᠢᠭᠤᠯ ᠭᠡᠰᠡᠨ ᠤᠳᠬ᠎ᠠ ᠶᠢ ᠠᠭᠤᠯᠬᠤ ᠶᠢᠨ ᠬᠠᠮᠲᠤ ᠴᠠᠭ ᠵᠠᠪ ᠢᠶᠠᠨ ᠳᠡᠮᠡᠢ ᠶᠠᠭᠤᠮᠠᠨ ᠳᠤ ᠪᠤᠤ ᠦᠷᠡ ᠭᠡᠰᠡᠨ ᠰᠠᠨᠠᠭ᠎ᠠ ᠶᠢ ᠳᠠᠪᠬᠤᠷ ᠢᠯᠡᠷᠬᠡᠶᠢᠯᠡᠭᠰᠡᠨ ᠬᠦᠨ ᠤᠳᠬ᠎ᠠ ᠲᠠᠢ᠃ ︽ᠮᠦᠩᠭᠦ ᠦᠨ᠎ᠡ ᠲᠠᠢ᠂ ᠬᠦᠮᠦᠨ ᠤ ᠠᠮᠢᠳᠤᠷᠠᠯ ᠲᠡᠭᠦᠨ ᠠᠴᠠ ᠦᠨ᠎ᠡ ᠲᠠᠢ ᠴᠦ ᠴᠠᠭ ᠬᠤᠭᠤᠴᠠᠭ᠎ᠠ ᠪᠦᠬᠦᠨ ᠠᠴᠠ ᠦᠨ᠎ᠡ ᠲᠠᠢ︾ ︵ᠠ᠊ · ᠸ᠊ · ᠰᠦᠸᠤᠷᠤᠸ᠋︶ ᠭᠡᠰᠡᠨ ᠡᠰᠢᠯᠡᠯ ᠢ ᠦᠭᠦᠯᠡᠵᠦ ᠪᠠᠶᠢᠭᠰᠠᠨ ᠢᠶᠠᠨ ᠳᠠᠪᠲᠠᠨ ᠬᠡᠯᠡᠵᠦ ᠪᠠᠶᠢᠨ᠎ᠠ᠃ ᠴᠠᠭ ᠬᠤᠭᠤᠴᠠᠭ᠎ᠠ ᠪᠦᠬᠦ ᠵᠦᠢᠯ ᠠᠴᠠ ᠬᠠᠮᠤᠭ ᠤᠨ ᠦᠨ᠎ᠡ ᠲᠠᠢ ᠨᠢ ᠭᠡᠳᠡᠭ ᠢ ᠴᠠᠭ ᠨᠠᠷᠠ ᠲᠠᠢ ᠤᠷᠤᠯᠳᠤᠨ ᠪᠦᠳᠦᠭᠡᠵᠦ᠂ ᠲᠤᠭᠤᠷᠪᠢᠳᠠᠭ ᠬᠦᠮᠦᠨ ᠪᠤᠰᠤᠳ ᠠᠴᠠ ᠢᠯᠡᠭᠦᠦ ᠤᠶᠢᠯᠠᠭᠠᠨ ᠬᠡᠷᠡᠭᠵᠢᠬᠦᠯᠦᠨ᠎ᠡ᠃ ︽ᠬᠡᠷᠪᠡ ᠴᠠᠭ ᠬᠤᠭᠤᠴᠠᠭ᠎ᠠ ᠬᠠᠮᠤᠭ ᠤᠨ ᠦᠨ᠎ᠡ ᠲᠠᠢ ᠵᠦᠢᠯ ᠶᠤᠮ ᠪᠤᠯ ᠴᠠᠭ ᠢ ᠭᠠᠷᠤᠵᠠᠳᠠᠬᠤ ᠨᠢ ᠬᠠᠮᠤᠭ ᠤᠨ ᠲᠤᠮᠤ ᠦᠷᠡᠯᠭᠡ ᠮᠦᠨ︾ ︵ᠪ᠊᠂ ᠹᠷᠠᠩᠺᠯᠢᠨ︶᠃ ᠬᠠᠷᠠᠮᠰᠠᠯᠳᠠᠢ ᠨᠢ ᠶᠡᠬᠡᠩᠬᠢ ᠬᠦᠮᠦᠰ ︽ᠬᠠᠮᠤᠭ ᠤᠨ ᠲᠤᠮᠤ ᠦᠷᠡᠯᠭᠡ︾᠎ ᠶᠢᠨ ᠡᠵᠡᠳ ᠪᠠᠶᠢᠳᠠᠭ᠃ ᠬᠦᠮᠦᠨ ᠮᠦᠩᠭᠦ ᠪᠠᠨ ᠲᠠᠮᠡᠢ ᠶᠠᠭᠤᠮᠠᠨ ᠳᠤ ᠦᠷᠡᠴᠢᠬᠡᠪᠡᠯ ᠬᠠᠷᠠᠮᠰᠠᠳᠠᠭ᠃ ᠲᠡᠭᠡᠭᠰᠡᠨ ᠮᠦᠷᠳᠡᠯ᠎ᠡ ᠪᠠᠨ ᠪᠦᠬᠦᠨ ᠠᠴᠠ ᠦᠨ᠎ᠡ ᠲᠠᠢ ᠠᠯᠳᠠᠨ ᠴᠠᠭ ᠢ ᠲᠡᠮᠡᠢ ᠦᠷᠡᠵᠦ ᠭᠠᠷᠤᠵᠠᠳᠠᠵᠦ ᠪᠠᠶᠢᠨ᠎ᠠ ᠭᠡᠳᠡᠭ ᠲᠡᠭᠡᠨ ᠲᠡᠷᠡ ᠪᠤᠯᠭᠠᠨ ᠬᠠᠷᠠᠮᠰᠠᠳᠠᠭ ᠦᠬᠡᠢ᠃       ᠬᠦᠮᠦᠨ ᠮᠦᠩᠭᠦ ᠲᠠᠢ᠂ ᠮᠦᠩᠭᠦ ᠦᠬᠡᠢ᠂ ᠶᠡᠭᠡ ᠮᠦᠩᠭᠦ ᠲᠠᠢ᠂ ᠪᠠᠭ᠎ᠠ ᠮᠦᠩᠭᠦ ᠲᠠᠢ ᠶᠠᠩᠵᠦ ᠪᠦᠷᠢ᠃ ᠬᠠᠷᠢᠨ ᠲᠡᠭᠷᠢ ᠪᠤᠷᠬᠠᠨ ᠬᠦᠮᠦᠨ ᠪᠦᠬᠦᠨ ᠳᠤ ᠢᠵᠢᠯ ᠲᠡᠭᠰᠢ ᠬᠠᠶᠢᠷᠠᠯᠠᠭᠰᠠᠨ᠂ ᠮᠦᠩᠭᠦᠨ ᠠᠴᠠ ᠬᠠᠪᠢ ᠦᠬᠡᠢ ᠦᠨᠡᠳᠦ ᠪᠠᠶᠠᠯᠢᠭ ᠪᠤᠯ ︽ᠴᠠᠭ︾᠃ ᠴᠠᠭ ᠤᠨ ᠦᠨᠡᠯᠡᠮᠵᠢ ᠬᠦᠮᠦᠨ ᠪᠦᠷᠢ ᠳᠤ ᠦᠬᠡᠷ᠎ᠡ ᠦᠬᠡᠷ᠎ᠡ᠃ ᠨᠢᠭᠡ ᠬᠡᠰᠡᠭ ᠨᠢ ᠴᠠᠭ ᠢ ᠨᠢᠳᠦᠨ ᠤ ᠴᠡᠴᠡᠭᠡᠢ ᠮᠡᠳᠦ ᠬᠠᠶᠢᠷᠠᠯᠠᠳᠠᠭ ᠦᠨᠡᠳᠦ ᠡᠷᠳᠡᠨᠢᠰ ᠤᠨ ᠢᠶᠠᠨ ᠮᠠᠩᠨᠠᠢ ᠳᠤ ᠵᠠᠯᠠᠵᠦ ᠲᠡᠭᠡᠳᠦᠯᠡᠨ᠎ᠡ᠃ ᠨᠦᠬᠦᠬᠡ ᠬᠡᠰᠡᠭ ᠨᠢ ᠴᠠᠭ ᠵᠠᠪ ᠦᠬᠡᠢ ᠭᠡᠵᠦ ᠦᠬᠦᠯᠡᠨ᠎ᠡ᠃ ᠵᠠᠷᠢᠮ ᠨᠢ ᠴᠠᠭ ᠨᠦᠭᠴᠢᠭᠡᠬᠦ ᠭᠡᠵᠦ ᠵᠤᠪᠠᠨ᠎ᠠ᠃ ᠴᠠᠭ ᠢ ᠱᠠᠯ ᠲᠡᠮᠡᠢ ᠵᠦᠢᠯ ᠢᠶᠠᠷ ᠤᠷᠤᠯᠳᠤᠨ ᠦᠩᠭᠡᠷᠡᠭᠡᠳᠡᠭ ᠬᠦᠮᠦᠨ ᠴᠦᠬᠡᠨ ᠦᠬᠡᠢ᠃ ᠴᠠᠭ ᠬᠤᠭᠤᠴᠠᠭ᠎ᠠ ᠬᠤᠷᠳᠤᠨ ᠦᠩᠭᠡᠷᠡᠭᠡᠰᠠᠢ ᠭᠡᠵᠦ ᠬᠦᠯᠢᠶᠡᠭᠰᠡᠨ ᠬᠦᠮᠦᠨ ᠳᠤ ᠴᠠᠭ ᠬᠡᠴᠢᠨᠡᠨ ᠤᠳᠠᠭᠠᠨ ᠦᠩᠭᠡᠷᠡᠨ᠎ᠡ ᠭᠡᠭᠴᠢ᠃ ᠵᠢᠭᠠᠬᠠᠨ ᠤᠳᠠᠭᠠᠳ ᠦᠭᠭᠦᠭᠡᠰᠠᠢ ᠭᠡᠵᠦ ᠬᠦᠰᠡᠭᠰᠡᠨ ᠬᠦᠮᠦᠨ ᠳᠤ ᠴᠠᠭ ᠬᠤᠭᠤᠴᠠᠭ᠎ᠠ ᠬᠠᠷᠪᠤᠭᠰᠠᠨ ᠰᠤᠮᠤ ᠰᠢᠭ᠋ ᠯᠠ ᠦᠩᠭᠡᠷᠡᠨ᠎ᠡ᠃ ︽ᠲᠤᠮᠳᠠᠴᠢ ᠬᠦᠮᠦᠰ ᠴᠠᠭ ᠢ ᠶᠠᠭᠠᠬᠢᠵᠦ ᠦᠷᠡᠬᠦ ᠶᠢ ᠪᠤᠳᠤᠵᠦ ᠪᠠᠶᠢᠳᠠᠭ ᠪᠤᠯ ᠠᠪᠢᠶᠠᠰᠤᠯᠢᠭ ᠬᠦᠮᠦᠰ ᠲᠡᠭᠦᠨ ᠢ ᠶᠠᠭᠠᠬᠢᠵᠦ ᠵᠦᠪ ᠠᠰᠢᠭᠯᠠᠬᠤ ᠶᠢ ᠪᠤᠳᠤᠵᠦ ᠪᠠᠶᠢᠳᠠᠭ︾ ︵ᠨᠠ᠊᠂ ᠰᠤᠫᠧᠨᠠᠭᠠᠸᠧᠷ︶ ᠭᠡᠵᠦ ᠬᠡᠯᠡᠭᠰᠡᠨ ᠭᠦᠨ ᠤᠬᠠᠭᠠᠨᠳᠠᠨ ᠤ ᠦᠬᠡ ᠲᠠᠢ ᠰᠠᠨᠠᠯ ᠨᠡᠶᠢᠯᠡᠬᠦ ᠦᠬᠡᠢ ᠪᠠᠶᠢᠬᠤ ᠶᠢᠨ ᠠᠷᠭ᠎ᠠ ᠦᠬᠡᠢ᠃ ᠤᠬᠠᠭᠠᠨᠳᠤ ᠵᠠᠯᠠᠭᠤᠰ ᠲᠠ ᠨᠠᠷ ᠴᠠᠭ ᠢ ᠶᠠᠭᠠᠬᠢᠵᠦ ᠵᠦᠪ ᠠᠰᠢᠭᠯᠠᠬᠤ ᠶᠢ ᠪᠤᠳᠤᠵᠦ ᠪᠠᠶᠢᠳᠠᠭ ᠬᠦᠮᠦᠰ ᠪᠠᠶᠢᠭᠠᠰᠠᠢ ᠭᠡᠵᠦ ᠬᠦᠰᠡᠨ᠎ᠡ᠃ ᠵᠦᠪᠬᠡᠨ ᠪᠤᠳᠤᠭᠠᠳ ᠰᠠᠭᠤᠭᠠᠳ ᠪᠠᠶᠢᠬᠤ ᠪᠢᠰᠢ ᠴᠠᠭ ᠠᠯᠳᠠᠯ ᠦᠬᠡᠢ ᠬᠡᠷᠡᠭᠵᠢᠭᠦᠯᠳᠡᠭ ᠪᠤᠯᠤᠭᠠᠰᠠᠢ ᠭᠡᠵᠦ ᠪᠦᠷ ᠶᠡᠭᠡ ᠬᠦᠰᠡᠵᠦ ᠪᠠᠶᠢᠨ᠎ᠠ᠃ ︽ᠬᠡᠷᠪᠡ ᠰᠠᠶᠢᠨ ᠯᠠ ᠠᠰᠢᠭᠯᠠᠵᠦ ᠴᠢᠳᠠᠪᠠᠯ ᠴᠠᠭ ᠢᠮᠠᠭᠳᠠ ᠬᠠᠩᠭᠠᠯᠳᠠᠳᠠᠢ ᠤᠯᠳᠠᠳᠠᠭ︾ ︵ᠢ᠊᠂ ᠭᠶᠤᠲ︶ ᠶᠤᠮ᠃ ᠴᠠᠭ ᠢ ᠰᠠᠶᠢᠨ ᠠᠰᠢᠭᠯᠠᠬᠤ ᠬᠤᠤᠰ ᠦᠬᠡᠢ ᠡᠷᠳᠡᠮ ᠳᠤ ᠰᠢᠮᠳᠡᠨ ᠰᠤᠷᠤᠯᠴᠠᠬᠤ ᠬᠡᠷᠡᠭᠳᠠᠢ᠃ ︽ᠴᠠᠭ ᠢ ᠦᠷᠡᠯᠭᠡᠨ ᠦᠩᠭᠡᠷᠡᠭᠡᠬᠦ ᠨᠢ ᠪᠦᠬᠦᠨ ᠠᠴᠠ ᠮᠠᠭᠤ ᠬᠡᠷᠡᠭ︾ ︵ᠴ᠊᠂ ᠺᠠᠨᠲ᠋ᠤ᠋︶ ᠭᠡᠳᠡᠭ ᠢ ᠵᠢᠷᠦᠬᠡᠨ ᠳᠤ ᠪᠠᠨ ᠮᠡᠳᠡᠷᠡᠵᠦ᠂ ᠴᠢᠮᠦᠭᠡᠨ ᠳᠤ ᠪᠠᠨ ᠰᠢᠩᠭᠡᠭᠡᠵᠦ ᠠᠪᠤᠭᠰᠠᠨ ᠬᠦᠮᠦᠨ ᠴᠠᠭ ᠢ ᠦᠷ᠎ᠡ ᠠᠰᠢᠭᠳᠠᠢ ᠦᠩᠭᠡᠷᠡᠭᠡᠳᠡᠭ ᠪᠤᠯᠤᠨ᠎ᠠ᠃       ︽ᠡᠷᠭᠢᠭᠡᠳ ᠰᠠᠶᠢᠨ ᠬᠠᠷᠠᠬᠤ ᠶᠤᠮ ᠪᠤᠯ ᠠᠮᠢᠳᠤᠷᠠᠯ ᠤᠨ ᠶᠡᠬᠡᠩᠬᠢ ᠬᠡᠰᠡᠭ ᠨᠢ ᠪᠠᠯᠠᠷ ᠲᠡᠨᠡᠭ ᠶᠠᠪᠤᠳᠠᠯ ᠳᠤ ᠦᠷᠡᠭᠳᠡᠭᠰᠡᠨ ᠪᠠᠶᠢᠳᠠᠭ᠃ ᠮᠦᠨ ᠪᠠᠭ᠎ᠠ ᠦᠬᠡᠢ ᠬᠡᠰᠡᠭ ᠨᠢ ᠬᠢᠬᠦ ᠶᠠᠭᠤᠮ᠎ᠠ ᠦᠬᠡᠢ ᠰᠠᠭᠤᠬᠤ ᠳᠤ ᠵᠤᠷᠢᠭᠤᠯᠤᠭᠳᠠᠵᠦ᠂ ᠠᠮᠢᠳᠤᠷᠠᠯ ᠪᠦᠬᠦᠯᠢ ᠳᠤ ᠪᠠᠨ ᠬᠠᠮᠤᠭ ᠤᠨ ᠬᠡᠷᠡᠭᠳᠠᠢ ᠲᠡᠷᠡ ᠵᠦᠢᠯ ᠳᠤ ᠪᠠᠨ ᠶᠡᠷᠦ ᠠᠴᠠ ᠵᠠᠷᠤᠴᠠᠯᠠᠭᠳᠠᠭ᠎ᠠ ᠦᠬᠡᠢ ᠪᠠᠶᠢᠳᠠᠭ︾ ︵ᠰᠧᠨᠧᠺ︶ ᠭᠡᠵᠦ ᠡᠷᠳᠡᠨ ᠤ ᠷᠤᠮᠠ ᠶᠢᠨ ᠤᠬᠠᠭᠠᠨᠳᠠᠨ ᠤᠤᠯᠭ᠎ᠠ ᠠᠯᠳᠠᠨ ᠬᠠᠷᠠᠮᠰᠠᠵᠠᠢ᠃ ᠬᠠᠮᠤᠭ ᠤᠨ ᠬᠡᠷᠡᠭᠳᠠᠢ ᠲᠡᠷᠡ ᠵᠦᠢᠯ ᠳᠤ ᠪᠠᠨ ᠠᠮᠢᠳᠤᠷᠠᠯ ᠢᠶᠠᠨ ᠵᠤᠷᠢᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠴᠠᠭ ᠢ ᠵᠦᠪ ᠠᠰᠢᠭᠯᠠᠵᠦ ᠰᠤᠷᠬᠤ ᠱᠠᠭᠠᠷᠳᠠᠯᠭ᠎ᠠ ᠲᠠᠢ᠃ ᠲᠡᠭᠡᠵᠦ ᠪᠠᠶᠢᠵᠦ ᠠᠮᠢᠳᠤᠷᠠᠯ ᠤᠨ ᠶᠡᠬᠡᠩᠬᠢ ᠬᠡᠰᠡᠭ ᠢ ᠪᠠᠯᠠᠷ ᠲᠡᠨᠡᠭ ᠶᠠᠪᠤᠳᠠᠯ ᠳᠤ ᠦᠷᠡᠬᠦ ᠦᠬᠡᠢ᠃ ᠴᠠᠭ ᠢ ᠦᠷ᠎ᠡ ᠠᠰᠢᠭ ᠦᠬᠡᠢ ᠨᠦᠭᠴᠢᠭᠡᠵᠦ ᠪᠠᠶᠢᠭ᠎ᠠ ᠬᠦᠮᠦᠨ ᠱᠦᠭᠦᠷᠤᠨ ᠰᠢᠨᠠᠭ᠎ᠠ ᠪᠠᠷ ᠤᠰᠤ ᠬᠤᠳᠬᠤᠵᠦ ᠰᠠᠭᠤᠭ᠎ᠠ ᠬᠦᠮᠦᠨ ᠲᠠᠢ ᠯᠠ ᠠᠳᠠᠯᠢ᠃ ᠶᠠᠭᠤ ᠴᠤ ᠬᠢᠬᠦ ᠦᠬᠡᠢ ᠵᠦᠭᠡᠷ ᠰᠠᠭᠤᠬᠤ ᠶᠤᠮ ᠤᠤ ᠬᠡᠪᠳᠡᠵᠦ ᠯᠠ ᠪᠠᠶᠢᠪᠠᠯ ᠠᠵᠠ ᠵᠢᠷᠭᠠᠯ ᠭᠡᠵᠦ ᠦᠵᠡᠬᠦ ᠨᠢ ᠮᠤᠩᠬᠠᠭ ᠬᠦᠮᠦᠨ ᠤ ᠦᠢᠯᠡᠳᠦᠯ᠂ ᠠᠰᠤᠷᠤ ᠶᠡᠭᠡ ᠭᠠᠵᠢᠭᠰᠠᠨ ᠲᠦᠭᠡᠷᠢᠭᠳᠡᠯ ᠮᠦᠨ᠃ ︽ᠬᠦᠮᠦᠨ ᠵᠦᠭᠡᠷ ᠰᠠᠭᠤᠵᠦ᠂ ᠭᠤᠨᠢᠭᠳᠠᠢ ᠪᠠᠷ ᠠᠮᠢ ᠪᠠᠨ ᠲᠡᠵᠢᠭᠡᠬᠦ ᠶᠢᠨ ᠲᠤᠯᠠᠳᠠ ᠪᠢᠰᠢ᠂ ᠠᠤᠭ᠎ᠠ ᠶᠡᠭᠡ ᠦᠢᠯᠡ ᠬᠡᠷᠡᠭ ᠢ ᠬᠦᠢᠴᠡᠳᠭᠡᠬᠦ ᠶᠢᠨ ᠲᠤᠯᠠᠳᠠ ᠲᠦᠷᠦᠳᠡᠭ︾ ᠭᠡᠳᠡᠭ ᠢ ᠵᠠᠯᠠᠭᠤ ᠬᠦᠮᠦᠨ ᠪᠦᠷᠢ ᠤᠶᠤᠨ ᠤᠬᠠᠭᠠᠨ ᠳᠠᠭᠠᠨ ᠲᠤᠭᠳᠠᠭᠠᠵᠦ᠂ ᠨᠠᠰᠤᠨ ᠲᠤᠷᠰᠢ ᠳᠠᠭᠠᠨ ᠰᠠᠨᠠᠵᠦ ᠶᠠᠪᠤᠭᠠᠷᠠᠢ᠃       ᠠᠮᠢᠳᠤᠷᠠᠯ ᠳᠠᠭᠠᠨ ᠬᠡᠷᠡᠭᠳᠠᠢ ᠲᠢᠭ ᠵᠢᠷᠦᠮ ᠲᠤᠭᠳᠠᠭᠠᠬᠤ ᠶᠢ ᠬᠢᠴᠢᠶᠡ᠃ ᠲᠢᠭ ᠵᠢᠷᠦᠮ ᠲᠠᠢ ᠬᠦᠮᠦᠨ ᠪᠦᠳᠦᠭᠡᠯᠴᠢ ᠪᠠᠶᠢᠳᠠᠭ ᠶᠤᠮ᠃ ᠠᠵᠢᠯᠰᠠᠭ ᠪᠦᠳᠦᠭᠡᠯᠴᠢ ᠬᠦᠮᠦᠰ ᠬᠡᠷᠡᠭᠴᠡᠭᠡ ᠲᠠᠢ ᠲᠢᠭ ᠵᠢᠷᠦᠮ ᠢ ᠲᠤᠭᠳᠠᠭᠠᠨ ᠬᠡᠪᠰᠢᠬᠦᠯᠵᠦ᠂ ᠲᠡᠭᠦᠨ ᠢ ᠪᠠᠨ ᠶᠠᠭᠰᠢᠳᠠᠯ᠎ᠠ ᠮᠦᠷᠳᠡᠵᠦ ᠪᠠᠶᠢᠵᠦ ᠠᠮᠵᠢᠯᠳᠠ ᠤᠯᠤᠭᠰᠠᠨ ᠵᠢᠱᠢᠶ᠎ᠡ ᠵᠠᠬ᠎ᠠ ᠎ ᠠᠴᠠ ᠠᠪᠤᠨ ᠪᠤᠢ᠃ ᠬᠠᠷᠢᠨ ᠦᠷ᠎ᠡ ᠠᠰᠢᠭ ᠦᠬᠡᠢ᠂ ᠬᠡᠷᠡᠭᠴᠡᠭᠡ ᠦᠬᠡᠢ ᠲᠢᠭ ᠲᠢᠭᠯᠢᠮ ᠲᠤᠭᠳᠠᠭᠠᠵᠦ ᠦᠪᠡᠷ ᠢ ᠎ ᠪᠠᠨ ᠬᠠᠮᠢᠭᠠᠰᠢ ᠨᠢ ᠴᠤ ᠴᠢᠯᠦᠬᠡᠳᠠᠢ ᠬᠦᠳᠡᠯᠭᠡᠬᠦ ᠦᠬᠡᠢ ᠪᠠᠭᠯᠠᠵᠦ ᠬᠦᠯᠢᠬᠦ ᠨᠢ ᠰᠠᠶᠢᠨ ᠵᠦᠢᠯ ᠪᠢᠰᠢ᠃ ᠲᠡᠶᠢᠮᠦᠷᠬᠦᠦ ᠬᠡᠪ ᠮᠠᠶ᠋ᠢᠭ ᠲᠤ ᠪᠠᠷᠢᠭᠳᠠᠭᠰᠠᠨ ᠬᠦᠮᠦᠨ ᠦᠪᠡᠷ ᠢ ᠪᠠᠨ ᠴᠠᠷᠴᠠᠭᠠᠵᠦ᠂ ᠶᠠᠪᠤᠭᠠᠨ ᠳᠠᠭᠠᠨ ᠬᠦᠯᠳᠡᠭᠡᠵᠦ ᠴᠤ ᠮᠡᠳᠡᠨ᠎ᠡ᠃ ᠪᠤᠰᠤᠳ ᠤᠨ ᠲᠤᠯᠭᠠᠨ ᠬᠦᠯᠢᠶᠡᠯᠭᠡᠭᠰᠡᠨ ᠲᠢᠭ ᠵᠢᠷᠦᠮ ᠳᠤ ᠬᠦᠯᠢᠭᠳᠡᠪᠡᠯ ᠡᠷᠬᠡ ᠴᠢᠯᠦᠭᠡᠳᠦ ᠨᠢᠭᠡᠨ ᠪᠠᠶᠢᠬᠤ ᠪᠠᠨ ᠪᠤᠯᠢᠵᠦ᠂ ᠲᠡᠷᠡᠬᠦ‍ ᠲᠢᠭ ᠵᠢᠷᠦᠮ ᠤᠨ ᠪᠤᠭᠤᠯ ᠪᠤᠯᠤᠨ ᠬᠦᠬᠡᠷᠦᠬᠦᠶᠢᠯᠡᠯᠳᠠᠢ ᠪᠠᠷ ᠵᠤᠪᠠᠨ᠎ᠠ᠃ ᠴᠠᠭ ᠬᠡᠮᠨᠡᠬᠦ ᠳᠤ ᠰᠤᠷᠭᠠᠳᠠᠭ ᠲᠡᠶᠢᠮᠦ ᠲᠢᠭ ᠵᠢᠷᠦᠮ ᠢ ᠲᠤᠭᠳᠠᠭᠠᠨ ᠬᠡᠪᠰᠢᠬᠦᠯᠵᠦ ᠴᠢᠳᠠᠪᠠᠯ ᠠᠮᠢᠳᠤᠷᠠᠯ ᠳᠠᠭᠠᠨ ᠠᠰᠤᠷᠤ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠢ ᠬᠤᠷᠢᠶᠠᠨ ᠠᠪᠤᠯ᠎ᠠ ᠭᠡᠰᠡᠨ ᠦᠬᠡ᠃ ᠰᠠᠶᠢᠨ ᠲᠢᠭ ᠵᠢᠷᠦᠮ ᠤᠨ ᠠᠮᠢᠨ ᠰᠦᠨᠡᠰᠦ ᠨᠢ ᠰᠠᠶᠢᠨ ᠲᠦᠯᠦᠪᠯᠡᠯᠳᠡ᠃ ᠨᠢᠭᠳᠠ ᠨᠢᠮᠪᠠᠢ ᠰᠠᠶᠢᠳᠤᠷ ᠪᠤᠳᠤᠵᠦ ᠰᠠᠶᠢᠨ ᠲᠦᠯᠦᠪᠯᠡᠪᠡᠯ ᠠᠵᠢᠯ ᠤᠨ ᠢᠶᠠᠨ ᠬᠠᠭᠠᠰ ᠢ ᠨᠢ ᠨᠤᠭᠤᠯᠤᠯ᠎ᠠ ᠭᠡᠵᠦ ᠪᠤᠳᠤ᠃       ᠤᠳᠤ ᠬᠢᠴᠢᠭᠡᠵᠦ ᠪᠤᠯᠬᠤ ᠵᠦᠢᠯ ᠢ ᠲᠠᠷᠠᠭ᠎ᠠ ᠭᠡᠵᠦ ᠬᠡᠵᠢᠶ᠎ᠡ ᠴᠤ ᠪᠤᠤ ᠬᠤᠶᠢᠰᠢ ᠲᠠᠯᠪᠢ᠃ ᠬᠤᠶᠢᠰᠢ ᠲᠠᠯᠪᠢᠨ᠎ᠠ ᠭᠡᠳᠡᠭ ᠰᠡᠳᠬᠢᠯ ᠤᠨ ᠤᠪ ᠮᠡᠭᠡ ᠪᠤᠯᠬᠤ ᠠᠴᠠ ᠦᠬᠡᠷ᠎ᠡ ᠶᠠᠭᠤ ᠴᠤ ᠪᠢᠰᠢ᠃ ᠬᠤᠶᠢᠰᠢ ᠲᠠᠯᠪᠢᠭᠰᠠᠨ ᠠᠵᠢᠯ ᠲᠠᠷᠠᠭ᠎ᠠ ᠨᠢ ᠴᠢᠮ᠎ᠠ ᠳᠤ ᠠᠮᠠᠷ ᠬᠢᠯᠪᠠᠷ ᠪᠠᠶᠢᠨ᠎ᠠ ᠭᠡᠵᠦ ᠬᠡᠨ ᠬᠡᠯᠡᠵᠦ ᠪᠠᠶᠢᠭ᠎ᠠ ᠶᠤᠮ ᠪᠤᠢ︖ ᠲᠠᠷᠠᠭ᠎ᠠ ᠨᠢ ᠠᠮᠠᠷ ᠬᠢᠯᠪᠠᠷ ᠪᠤᠯᠤᠨ᠎ᠠ ᠭᠡᠵᠦ ᠭᠤᠷᠢᠳᠠᠬᠤ ᠶᠢᠨ ᠬᠡᠷᠡᠭ ᠦᠬᠡᠢ᠃ ᠪᠢ ᠪᠤᠯᠤᠮᠵᠢᠳᠠᠢ ᠴᠠᠭ ᠢ ᠬᠦᠯᠢᠶᠡᠵᠦ ᠪᠠᠶᠢᠨ᠎ᠠ ᠭᠡᠵᠦ ᠬᠡᠯᠡᠵᠦ ᠰᠠᠭᠤᠭ᠎ᠠ ᠬᠦᠮᠦᠨ ᠦᠪᠡᠷ ᠢᠶᠠᠨ ᠦᠪᠡᠷ ᠢ ᠪᠠᠨ ᠬᠠᠭᠤᠷᠴᠤ᠂ ᠴᠠᠭ ᠨᠦᠭᠴᠢᠭᠡᠵᠦ ᠪᠠᠶᠢᠭ᠎ᠠ ᠶᠠᠳᠠᠷᠠᠭᠰᠠᠨ ᠠᠷᠭᠠᠳᠠᠨ᠃ ᠲᠡᠷᠡ ᠪᠤᠯᠤᠮᠵᠢᠳᠠᠢ ᠴᠠᠭ ᠨᠢ ᠢᠷᠡᠭᠡ ᠴᠤ ᠤᠤ᠂ ᠦᠬᠡᠢ ᠴᠤ ᠤᠤ ᠂ ᠢᠷᠡᠯ᠎ᠡ ᠴᠤ ᠦᠷ᠎ᠡ ᠠᠰᠢᠭ ᠪᠠᠭ᠎ᠠ ᠲᠠᠢ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠠᠯᠳᠠᠭᠰᠠᠨ ᠴᠠᠭ ᠤᠨ ᠬᠤᠷᠤᠮ ᠲᠤᠳᠤᠮ ᠢᠶᠠᠷ ᠠᠯᠢᠪᠠ ᠠᠵᠢᠯ ᠦᠢᠯᠡ ᠶᠢᠨ ᠬᠡᠷᠡᠭᠴᠡᠭᠡ᠂ ᠠᠰᠢᠭ ᠲᠤᠰᠠ ᠬᠤᠷᠤᠭᠳᠠᠨ᠎ᠠ᠃       ᠲᠡᠮᠡᠢ ᠶᠠᠭᠤᠮ᠎ᠠ ᠶᠠᠷᠢᠵᠦ᠂ ᠴᠠᠭ ᠨᠦᠭᠴᠢᠬᠡᠬᠦ ᠬᠡᠷᠡᠭ ᠪᠦᠷ ᠴᠤ ᠪᠠᠶᠢᠬᠤ ᠦᠬᠡᠢ᠃ ᠢᠯᠠᠩᠭᠤᠶ᠎ᠠ ᠬᠤᠪ ᠵᠢᠪ ᠠᠴᠠ ᠬᠤᠯᠠᠬᠠᠨ ᠪᠠᠶᠢᠭᠰᠠᠨ ᠨᠢ ᠲᠡᠭᠡᠷ᠎ᠡ᠃ ᠦᠨᠦᠳᠦᠷ ᠴᠢᠮ᠎ᠠ ᠳᠤ ᠪᠤᠰᠤᠳ ᠢ ᠬᠤᠪᠯᠠᠵᠦ ᠪᠠᠶᠢᠭ᠎ᠠ ᠬᠦᠮᠦᠨ ᠮᠠᠷᠭᠠᠰᠢ ᠴᠢᠮ᠎ᠠ ᠶᠢ ᠪᠤᠰᠤᠳ ᠲᠤ ᠬᠤᠪᠯᠠᠨ᠎ᠠ᠃ ᠬᠠᠷᠢᠨ ᠠᠮᠢᠳᠤᠷᠠᠯ ᠳᠤ ᠬᠡᠷᠡᠭᠳᠠᠢ ᠲᠤᠰᠠᠳᠠᠢ ᠵᠦᠢᠯ ᠶᠠᠷᠢᠵᠦ᠂ ᠵᠦᠪᠯᠡᠵᠦ ᠪᠠᠶᠢᠭ᠎ᠠ ᠤᠬᠠᠭᠠᠨᠳᠤ ᠬᠦᠮᠦᠨ ᠤ ᠦᠬᠡ ᠶᠢ ᠠᠮᠳᠠᠷᠬᠠᠨ ᠰᠤᠨᠤᠰ᠃ ᠴᠢ ᠲᠡᠭᠦᠨ ᠤ ᠶᠠᠷᠢᠶᠠᠨ ᠤ ᠴᠩᠬᠡᠭ ᠪᠤᠯᠠᠭ ᠠᠴᠠ ᠠᠩᠭᠠᠭ᠎ᠠ ᠴᠠᠩᠭᠠᠭ᠎ᠠ ᠪᠠᠨ ᠲᠠᠶᠢᠯᠵᠦ᠂ ᠤᠬᠠᠭᠠᠨ ᠲᠠᠯᠠᠢ ᠠᠴᠠ ᠨᠢ ᠬᠤᠪᠢ ᠬᠦᠷᠳᠡᠨ᠎ᠡ᠃       ᠦᠩᠭᠡᠷᠡᠭᠰᠡᠨ ᠦᠶ᠎ᠡ ᠳᠤ ᠲᠤᠬᠢᠶᠠᠯᠳᠤᠭᠰᠠᠨ ᠤᠷᠢᠳᠦ ᠶᠢᠨ ᠮᠠᠭᠤ ᠮᠠᠭᠤᠬᠠᠢ ᠲᠤᠷᠠᠰᠤᠮᠵᠢ ᠶᠢ ᠰᠡᠬᠦᠨ ᠶᠠᠷᠢᠬᠤ ᠦᠬᠡᠢ ᠪᠠᠶᠢᠬᠤ ᠶᠢ ᠬᠢᠴᠢᠶᠡ᠃ ᠠᠭᠤᠷ ᠤᠴᠢᠷ᠂ ᠭᠤᠮᠤᠳᠠᠯ ᠭᠤᠨᠢᠭ᠂ ᠦᠰᠢᠶ᠎ᠡ ᠬᠤᠷᠤᠰᠤᠯ᠂ ᠦᠵᠡᠨ ᠶᠠᠳᠠᠯᠳᠠ ᠠᠴᠠ ᠦᠬᠡᠷ᠎ᠡ ᠶᠠᠭᠤ ᠴᠤ ᠠᠪᠴᠤ ᠢᠷᠡᠬᠦ ᠦᠬᠡᠢ᠃ ᠬᠠᠷᠢᠨ ᠴᠤ ᠲᠠᠭᠤᠰᠴᠤ᠂ ᠲᠤᠨᠳᠠᠷᠠᠰᠢ ᠦᠬᠡᠢ ᠬᠡᠷᠡᠭᠦᠯ ᠤᠨ ᠪᠤᠵᠠᠷ ᠲᠠᠷᠢᠵᠦ᠂ ᠠᠨᠢᠵᠦ ᠪᠠᠶᠢᠭᠰᠠᠨ ᠰᠢᠷᠬ᠎ᠠ ᠶᠢ ᠰᠡᠳᠡᠷᠡᠭᠡᠵᠦ᠂ ᠲᠠᠭᠠᠷᠢᠨ ᠲᠡᠭᠡᠷ᠎ᠡ ᠨᠢ ᠲᠠᠪᠤᠰᠤ ᠦᠷᠡᠬᠦ ᠪᠤᠯᠤᠨ᠎ᠠ᠃ ᠠᠭᠤᠷ ᠬᠤᠷᠤᠰᠤᠯ ᠠᠬᠤᠷ ᠬᠤᠷᠤᠰᠤᠯ ᠢᠶᠠᠨ ᠯᠠ ᠦᠷᠡᠵᠢᠬᠦᠯᠳᠡᠭ᠃ ᠡᠨᠡ ᠲᠤᠭᠤᠷᠢᠭ ᠲᠤ ᠡᠴᠦᠰ ᠮᠤᠬᠤᠷ ᠪᠠᠶᠢᠬᠤ ᠦᠬᠡᠢ᠃ ᠲᠡᠶᠢᠮᠦ ᠠᠴᠠ ᠠᠭᠤᠷ ᠬᠤᠷᠤᠰᠤᠯ ᠲᠡᠭᠡᠭᠡᠵᠦ ᠶᠠᠪᠤᠬᠤ ᠬᠡᠷᠡᠭᠴᠡᠭᠡ ᠱᠠᠭᠠᠷᠳᠠᠯᠭ᠎ᠠ ᠤᠭᠳᠤ ᠦᠬᠡᠢ ᠭᠡᠳᠡᠭ ᠢ ᠰᠠᠨᠠᠵᠦ ᠶᠠᠪᠤ᠃ ᠬᠤᠷᠤᠰᠤᠭᠰᠠᠨ ᠬᠦᠮᠦᠰ᠂ ᠬᠦᠮᠦᠨ ᠤ ᠪᠡᠶᠡᠨ ᠲᠡᠭᠡᠭᠦᠷ ᠲᠤᠷ᠎ᠠ ᠦᠬᠡᠢ ᠬᠦᠷᠭᠡᠨ ᠬᠦᠶᠦᠵᠦ᠂ ᠵᠦᠪᠬᠡᠨ ᠰᠢᠷᠬ᠎ᠠ ᠲᠠᠢ ᠭᠠᠵᠠᠷ ᠲᠤᠨᠢ ᠵᠤᠭᠰᠤᠳᠠᠭ ᠢᠯᠠᠭ᠎ᠠ ᠲᠠᠢ ᠠᠳᠠᠯᠢ ᠭᠡᠰᠡᠨ ᠲᠠᠭᠠᠯᠠᠮᠵᠢᠳᠠᠢ ᠪᠤᠰᠤ ᠵᠦᠢᠷᠯᠡᠯ ᠢ ᠨᠡᠷᠡᠳᠦ ᠵᠤᠬᠢᠶᠠᠯᠴᠢ ᠬᠡᠯᠡᠭᠰᠡᠨ᠃ ᠬᠤᠷᠤᠰᠤᠯᠳᠠᠢ ᠬᠦᠮᠦᠨ ᠬᠡᠵᠢᠶ᠎ᠡ ᠴᠤ ᠠᠵᠠ ᠵᠢᠷᠭᠠᠯᠳᠠᠢ ᠪᠠᠶᠢᠳᠠᠭ ᠦᠬᠡᠢ ᠶᠤᠮ᠃ ᠠᠵᠢᠯ ᠦᠬᠡᠢ ᠵᠦᠭᠡᠷ ᠰᠠᠭᠤᠬᠤ ᠨᠢ ᠴᠠᠭ ᠵᠠᠪ ᠢᠶᠠᠨ ᠲᠡᠮᠡᠢ ᠦᠷᠡᠬᠦ ᠠᠳᠠᠭ ᠤᠨ ᠴᠠᠭᠠᠳᠤᠬᠢ ᠠᠳᠠᠭ ᠪᠢᠯᠡ᠃ ︽ᠠᠵᠢᠯ ᠦᠬᠡᠢ ᠵᠦᠭᠡᠷ ᠰᠠᠭᠤᠬᠤ ᠨᠢ ᠵᠦᠪᠬᠡᠨ ᠬᠠᠷᠠᠩᠭᠤᠢ ᠪᠦᠳᠦᠭᠦᠯᠢᠭ ᠪᠠᠶᠢᠳᠠᠯ ᠢ ᠲᠦᠷᠦᠭᠦᠯᠦᠭᠡᠳ ᠵᠤᠭᠰᠤᠬᠤ ᠦᠬᠡᠢ ᠡᠪᠡᠳᠴᠢᠨ ᠡᠭᠦᠰᠭᠡᠬᠦ ᠰᠢᠯᠳᠠᠭᠠᠨ ᠪᠤᠯᠳᠠᠭ︾ ︵ᠠᠸᠢᠽᠧᠨᠠᠨ︶ ᠪᠠᠶᠢᠨ᠎ᠠ᠃ ᠶᠠᠭᠤ ᠴᠤ ᠬᠢᠬᠦ ᠦᠬᠡᠢ ᠪᠠᠶᠢᠬᠤ ᠠᠴᠠ ᠢᠯᠡᠭᠦᠦ ᠬᠤᠤᠷᠳᠠᠢ ᠰᠢᠨᠠᠯᠭ᠎ᠠ ᠡᠨᠡ ᠶᠢᠷᠳᠢᠨᠴᠦ ᠎ ᠳᠤ ᠪᠠᠶᠢᠬᠤ ᠦᠬᠡᠢ ᠶᠤᠮ ᠭᠡᠰᠡᠨ᠃ ᠵᠠᠯᠠᠭᠤᠰ ᠲᠠ ᠨᠠᠷ ᠡᠶᠢᠮᠦ ᠬᠤᠤᠷᠳᠠᠢ ᠰᠢᠨᠠᠯᠭ᠎ᠠ ᠪᠠᠷ ᠵᠤᠪᠠᠵᠦ ᠰᠢᠨᠠᠯᠵᠦ ᠰᠠᠭᠤᠬᠤ ᠤᠴᠢᠷ ᠦᠬᠡᠢ ᠡ᠃ ᠵᠦᠭᠡᠷ ᠰᠠᠭᠤᠭᠰᠠᠨ ᠬᠦᠮᠦᠨ ᠤ ᠰᠡᠳᠬᠢᠯ ᠵᠢᠪᠡᠷᠡᠵᠦ᠂ ᠤᠶᠤᠨ ᠰᠠᠨᠠᠭ᠎ᠠ ᠨᠢ ᠬᠤᠭ ᠎ ᠤᠨ ᠬᠤᠤᠷᠳᠤ ᠤᠷᠭᠤᠮᠠᠯ ᠳᠤ ᠢᠳᠡᠭᠳᠡᠳᠡᠭ᠃ ᠵᠦᠭᠡᠷ ᠰᠠᠭᠤᠭᠠᠳ ᠪᠠᠶᠢᠪᠠᠯ ᠲᠡᠭᠷᠢ ᠪᠤᠷᠬᠠᠨ ᠠᠴᠠ ᠵᠠᠶᠠᠭᠠᠭᠰᠠᠨ ᠭᠠᠶᠢᠬᠠᠮᠰᠢᠭᠳᠤ ᠠᠪᠢᠶᠠᠰ ᠪᠢᠯᠢᠭ ᠴᠤ ᠠᠰᠠᠵᠦ ᠪᠠᠶᠢᠭᠰᠠᠨ ᠯᠠ ᠰᠢᠭ᠋ ᠤᠷᠤᠰᠴᠤ ᠪᠠᠭᠤᠭᠰᠠᠭᠠᠷ ᠪᠦᠬᠦᠵᠦ᠂ ᠠᠳᠠᠷᠰᠢᠨ᠎ᠠ᠃ ᠶᠠᠭᠤ ᠴᠤ ᠬᠢᠬᠦ ᠦᠬᠡᠢ ᠵᠦᠭᠡᠷ ᠰᠠᠭᠤᠵᠦ᠂ ᠲᠠᠮᠡᠢ ᠬᠤᠯᠬᠢᠨ ᠴᠠᠭ ᠢ ᠨᠦᠭᠴᠢᠭᠡᠭᠰᠡᠳ ᠨᠡᠩ ᠤᠳᠠᠯ ᠦᠬᠡᠢ ᠲᠡᠭᠦᠨ ᠳᠡᠭᠡᠨ ᠲᠠᠰᠤᠯ ᠪᠤᠯᠵᠦ᠂ ᠭᠠᠷ ᠢᠶᠠᠨ ᠬᠦᠳᠡᠯᠭᠡᠵᠦ᠂ ᠲᠡᠷᠢᠬᠢ ᠪᠠᠨ ᠠᠵᠢᠯᠯᠠᠭᠤᠯᠬᠤ ᠠᠴᠠ ᠲᠤᠷ᠎ᠠ ᠦᠬᠡᠢ ᠨᠢ ᠬᠦᠷᠴᠦ᠂ ᠵᠠᠯᠬᠠᠭᠤ ᠶᠢᠨ ᠨᠠᠮᠤᠭ ᠲᠤ ᠤᠯᠠᠮ ᠪᠦᠷ ᠭᠦᠨ ᠰᠢᠭᠢᠳᠦᠨ᠎ᠡ᠃ ᠤᠯᠠᠮ ᠢᠶᠠᠷ ᠦᠪᠡᠷ ᠢᠶᠠᠨ ᠬᠢᠰᠬᠢᠭᠰᠡᠨ ᠲᠡᠷᠡ ᠬᠠᠪᠬᠠᠨ ᠠᠴᠠ ᠬᠦᠯ ᠢᠶᠠᠨ ᠰᠤᠭᠤᠯᠬᠤ ᠳᠤ ᠪᠡᠷᠬᠡ ᠪᠤᠯᠤᠨ᠎ᠠ᠃       ᠬᠢᠬᠦ ᠠᠵᠢᠯ ᠦᠬᠡᠢ ᠠᠮᠢᠳᠤᠷᠠᠯ ᠳᠤ ᠵᠢᠪᠪᠦᠵᠦ ᠤᠷᠬᠢᠪᠠᠯ ᠮᠠᠭᠤ ᠵᠤᠷᠰᠢᠯ ᠳᠤ ᠢᠳᠡᠭᠳᠡᠨ᠎ᠡ᠃ ᠬᠦᠮᠦᠨ ᠤ ᠰᠠᠶᠢᠨ ᠴᠢᠨᠠᠷ ᠤᠳ ᠢ ᠬᠦᠨᠦᠭᠡᠭᠴᠢ ᠮᠠᠭᠤ ᠵᠤᠷᠰᠢᠯ ᠤᠳ ᠤᠯᠠᠰᠢᠷᠠᠵᠠᠢ᠃ ᠡᠨᠡ ᠮᠠᠭᠤ ᠵᠤᠷᠰᠢᠯ ᠤᠳ ᠎ ᠲᠤ ᠢᠳᠡᠭᠳᠡᠪᠡᠯ ᠬᠦᠮᠦᠨ ᠪᠦᠷ ᠮᠠᠭᠤ ᠮᠠᠭᠤᠬᠠᠢ ᠶᠠᠭᠤᠮ᠎ᠠ ᠯᠠᠪᠰᠢᠷᠠᠭᠤᠯᠤᠨ ᠬᠢᠵᠦ ᠡᠬᠢᠯᠡᠨ᠎ᠡ᠃ ᠡᠨᠡᠬᠦ ᠮᠠᠭᠤ ᠵᠤᠷᠰᠢᠯ ᠎ ᠢ ᠠᠷᠢᠬᠢ ᠬᠡᠮᠡᠬᠦ ᠠᠮᠢᠳᠤᠷᠠᠯ ᠤᠨ ᠲᠠᠶᠢᠰᠤᠨ ᠲᠡᠷᠢᠭᠦᠯᠡᠵᠦ ᠪᠠᠶᠢᠨ᠎ᠠ᠃ ᠶᠡᠷᠦ ᠨᠢ ︽ᠠᠷᠢᠬᠢᠳᠠᠯᠳᠠ ᠪᠦᠬᠦ ᠭᠠᠵᠢᠭ ᠎ ᠤᠨ ᠡᠬᠢ︾ ︵ᠠᠪᠦ᠋ᠯ ᠹᠠᠷᠠᠵᠢ︶ ᠪᠠᠶᠢᠳᠠᠭ᠃ ᠠᠷᠢᠬᠢᠳᠠᠯᠳᠠ᠂ ᠭᠡᠮᠳᠦ ᠬᠡᠷᠡᠭ ᠬᠤᠶᠠᠷ ᠲᠦᠷᠦᠭᠰᠡᠨ ᠠᠬ᠎ᠠ ᠲᠡᠭᠦᠦᠰ ᠃ ᠲᠡᠮᠦᠷ ᠰᠠᠷᠠᠯᠵᠢᠨ ᠴᠤᠩᠬᠤ ᠲᠠᠢ ᠠᠷᠢᠬᠢᠨ ᠤ ᠮᠤᠬᠤᠯᠠᠭ ᠠᠴᠠ ᠦᠷᠭᠡᠰᠦᠳᠦ ᠲᠤᠤᠷᠤᠨ ᠬᠠᠰᠢᠶ᠎ᠠ ᠲᠠᠢ ᠱᠤᠷᠤᠩ ᠎ ᠤᠨ ᠬᠠᠭᠠᠯᠭ᠎ᠠ ᠬᠦᠷᠳᠡᠯ᠎ᠡ ᠦᠷᠭᠡᠨ ᠲᠠᠷᠳᠠᠩ ᠵᠠᠮ ᠵᠠᠰᠭᠠᠰᠤᠳᠠᠢ ᠪᠡᠯᠡᠨ ᠪᠠᠶᠢᠨ᠎ᠠ᠃ ᠤᠯᠠᠨ ᠵᠤᠯ ᠦᠬᠡᠢ ᠶᠠᠪᠤᠳᠠᠯ ᠢ ᠦᠳᠦᠭᠡᠭᠴᠢ ᠡᠬᠢ ᠡᠭᠦᠰᠪᠦᠷᠢ ᠨᠦᠭᠦᠳ ᠠᠷᠢᠬᠢᠨ ᠤ ᠲᠤᠩᠭᠠᠯᠠᠭ ᠰᠢᠩᠭᠡᠨ ᠦᠩᠭᠡᠨ ᠳᠤ ᠢᠯᠡ ᠬᠠᠷᠠᠭᠳᠠᠬᠤ ᠦᠬᠡᠢ ᠴᠤ ᠠᠳᠡ ᠬᠤᠤᠷᠯᠠᠯ ᠤᠨ ᠬᠠᠷ᠎ᠠ ᠪᠠᠷᠠᠭᠠᠨ ᠰᠡᠭᠦᠳᠡᠷ ᠨᠢ ᠲᠠᠯᠳᠠ ᠨᠢᠭᠤᠭᠳᠠᠭᠠᠰᠤᠳᠠᠢ ᠪᠠᠶᠢᠳᠠᠭ ᠶᠤᠮ᠃ ᠡᠷ᠎ᠡ ᠨᠦᠬᠦᠷ ᠤᠨ ᠬᠢᠨᠢ ᠭᠤᠳᠤᠷᠤᠨ ᠤᠤᠭᠤᠭᠰᠠᠨ ᠠᠷᠢᠬᠢ ᠡᠬᠡᠨᠠᠷ᠂ ᠬᠡᠤᠬᠡᠳ ᠤᠨ ᠬᠢᠨᠢ ᠨᠢᠯᠪᠦᠰᠦ ᠪᠤᠯᠤᠨ ᠰᠠᠳᠠᠷᠠᠨ ᠠᠰᠬᠠᠷᠠᠨ᠎ᠠ᠃ ᠬᠠᠷ᠎ᠠ ᠲᠠᠮᠠᠬᠢᠨ ᠤ ᠪᠦᠭᠡᠮ ᠠᠶᠤᠯ ᠬᠠᠭᠠᠯᠭ᠎ᠠ ᠲᠤᠭᠰᠢᠵᠦ ᠡᠬᠢᠯᠡᠪᠡ᠃ ᠬᠠᠷ᠎ᠠ ᠲᠠᠮᠠᠬᠢ ᠲᠠᠢ ᠶᠠᠮᠠᠷ ᠨᠢᠭᠡ ᠪᠠᠶᠢᠳᠠᠯ ᠢᠶᠠᠷ ᠬᠤᠯᠪᠤᠭᠳᠠᠭᠰᠠᠨ ᠬᠦᠮᠦᠨ ᠠᠮᠢ ᠠᠮᠢᠳᠤᠷᠠᠯ ᠢᠶᠠᠨ ᠰᠤᠩᠭᠤᠯᠳᠠ ᠦᠬᠡᠢ ᠪᠠᠷ ᠦᠷᠡᠨ ᠲᠠᠷᠠᠨ ᠬᠢᠨ᠎ᠡ᠃ ᠲᠡᠳᠡᠨ ᠳᠤ ᠠᠷᠢᠭᠤᠨ ᠭᠡᠭᠡᠨ ᠶᠠᠭᠤᠮ᠎ᠠ ᠭᠡᠵᠦ ᠨᠢᠭᠡ ᠴᠤ ᠦᠯᠡᠳᠡᠳᠡᠭ ᠦᠬᠡᠢ᠃ ᠬᠠᠭᠤᠷᠤᠨ᠎ᠠ᠂ ᠵᠠᠯᠢᠯᠠᠨ᠎ᠠ᠂ ᠬᠤᠯᠠᠭᠠᠶᠢᠯᠠᠨ᠎ᠠ᠂ ᠲᠡᠭᠡᠷᠡᠮᠳᠡᠨ᠎ᠡ᠂ ᠮᠠᠩᠰᠢᠭᠤᠷᠠᠨ᠎ᠠ᠂ ᠲᠤᠩᠳᠠᠨ᠎ᠠ᠃ ᠪᠦᠬᠦ ᠮᠠᠭᠤ ᠮᠠᠭᠤᠬᠠᠢ ᠦᠬᠡᠨ ᠤ ᠴᠤᠭᠯᠠᠭᠤᠯᠭ᠎ᠠ ᠬᠠᠷ᠎ᠠ ᠲᠠᠮᠠᠬᠢᠴᠢᠨ ᠲᠡᠭᠡᠷ᠎ᠡ ᠤᠪᠤᠭᠠᠷᠠᠵᠦ᠂ ᠡᠴᠦᠰ ᠰᠡᠭᠦᠯ ᠳᠤ ᠪᠠᠨ ᠬᠠᠶᠢᠷᠠᠨ ᠪᠡᠶ᠎ᠡ ᠪᠠᠨ ᠬᠦᠨᠦᠭᠡᠨ᠎ᠡ᠃ ᠠᠷᠢᠬᠢᠨ ᠳᠤ ᠬᠦᠯᠴᠦᠭᠦᠷᠡᠭᠰᠡᠨ ᠬᠦᠮᠦᠨ ᠢ ᠰᠠᠳᠤᠷ ᠰᠠᠮᠠᠭᠤᠨ ᠤ ᠵᠠᠮ ᠬᠦᠵᠦᠭᠦᠦ ᠪᠠᠷ ᠨᠢ ᠤᠭᠤᠰᠤᠷᠯᠠᠭᠰᠠᠨ ᠲᠤᠭᠤᠯᠭᠠᠪᠦᠷᠢᠳᠠᠢ ᠨᠤᠬᠠᠢ ᠠᠳᠠᠯᠢ ᠬᠦᠳᠦᠯᠦᠨ᠎ᠡ᠃       ᠲᠤᠭᠯᠠᠭᠠᠮ᠂ ᠨᠠᠭᠠᠳᠤᠭᠠᠢ ᠬᠠᠶᠢᠷᠠᠨ ᠴᠠᠭ ᠢ ᠵᠠᠯᠭᠢᠬᠤ ᠰᠢᠨᠤᠭ ᠰᠤᠪᠢᠳᠠᠭ ᠲᠤᠯᠤᠮ ᠶᠤᠮ᠃ ᠲᠤᠭᠯᠠᠭᠠᠮ ᠳᠤ ᠪᠠᠨ ᠤᠯᠠᠶᠢᠷᠠᠭᠰᠠᠨ ᠬᠦᠮᠦᠨ ᠴᠠᠭ ᠶᠠᠭᠠᠬᠢᠵᠦ ᠦᠩᠭᠡᠷᠡᠭᠰᠡᠨ ᠢ ᠴᠤ ᠲᠡᠷᠡ ᠪᠦᠷ ᠮᠡᠳᠡᠳᠡᠭ ᠦᠬᠡᠢ᠃ ᠲᠤᠭᠯᠠᠵᠦ ᠪᠤᠯᠤᠨ᠎ᠠ ᠡ᠃ ᠲᠡᠭᠡᠬᠦ ᠳᠤ ᠪᠠᠨ ᠴᠠᠭ ᠬᠢᠵᠠᠭᠠᠷ ᠲᠠᠢ ᠪᠠᠶᠢᠬᠤ ᠶᠤᠰᠤᠳᠠᠢ᠃ ᠡᠩ ᠤᠨ ᠴᠠᠭᠠᠨ ᠲᠤᠭᠯᠠᠭᠠᠮ ᠠᠴᠠ ᠮᠦᠷᠦᠢ ᠲᠠᠢ ᠬᠠᠷ᠎ᠠ ᠲᠤᠭᠯᠠᠭᠠᠮ ᠤᠷᠤᠭᠤ ᠭᠤᠯᠠᠰᠪᠠᠯ ᠲᠤᠭᠯᠠᠭᠠᠮ ᠱᠤᠭᠯᠠᠭᠠᠮ ᠪᠤᠯᠤᠨ ᠬᠤᠪᠢᠷᠠᠨ᠎ᠠ᠃ ᠮᠦᠷᠦᠢ ᠲᠠᠢ ᠲᠤᠭᠯᠠᠭᠠᠮ ᠵᠦᠪ ᠵᠠᠮ ᠢᠶᠠᠷ ᠦᠭᠰᠦᠵᠦ ᠶᠠᠪᠤᠭᠰᠠᠨ ᠬᠡᠴᠢᠨᠡᠨ ᠤᠯᠠᠨ ᠰᠠᠶᠢᠬᠠᠨ ᠬᠦᠮᠦᠨ ᠢ ᠪᠤᠷᠤᠭᠤ ᠵᠠᠮ ᠤᠷᠤᠭᠤ ᠲᠦᠯᠬᠢᠵᠦ ᠤᠷᠤᠭᠤᠯᠤᠭᠰᠠᠨ ᠪᠢᠯᠡ ᠳ᠋ᠧ᠃ ᠮᠦᠷᠦᠢ ᠲᠠᠢ ᠲᠤᠭᠯᠠᠭᠠᠮ ᠠᠴᠠ ᠪᠤᠯᠵᠦ ᠠᠮᠢᠳᠤᠷᠠᠯ ᠤᠷᠤᠭᠤᠳᠠᠨ ᠲᠤᠷᠤᠶᠢᠳᠠᠭᠰᠠᠨ ᠬᠦᠨ ᠢ ᠴᠤ᠂ ᠤᠴᠠᠷᠠᠭᠤᠯᠤᠭᠰᠠᠨ ᠬᠤᠬᠢᠷᠠᠯ ᠤᠨ ᠦᠭᠰᠦᠵᠦ ᠲᠡᠯᠡᠢᠭ᠌ᠰᠠᠨ ᠦᠨᠳᠦᠷ ᠢ ᠴᠤ ᠬᠡᠮᠵᠢᠬᠦ ᠠᠷᠭ᠎ᠠ ᠦᠬᠡᠢ᠃ ᠰᠡᠳᠬᠢᠯ ᠰᠠᠨᠠᠭᠠᠨ ᠳᠤ ᠤᠴᠠᠷᠠᠭᠤᠯᠬᠤ ᠬᠤᠬᠢᠷᠠᠯ ᠨᠢ ᠠᠭᠤᠯᠠ᠂ ᠲᠠᠯᠠᠢ ᠮᠡᠳᠦ᠃ ᠠᠷᠢᠬᠢᠨ ᠳᠤ ᠰᠢᠨᠤᠨ ᠲᠤᠩᠳᠠᠵᠦ ᠠᠷᠬᠠᠭ ᠠᠷᠢᠬᠢᠴᠢᠨ ᠪᠤᠯᠳᠠᠭ ᠪᠤᠯ ᠲᠤᠭᠯᠠᠭᠠᠮ ᠳᠤ ᠰᠢᠨᠤᠨ ᠲᠤᠩᠳᠠᠵᠦ ᠬᠤᠷᠤᠬᠠᠶᠢᠳᠠᠭᠰᠠᠨ ᠲᠤᠭᠯᠠᠭᠠᠮᠴᠢᠨ ᠪᠤᠯᠵᠦ ᠮᠠᠩᠰᠢᠭᠤᠷᠠᠨ᠎ᠠ᠃ ᠲᠡᠷᠡ ᠴᠤ ᠪᠤᠤ ᠬᠡᠯᠡ ᠦᠰᠪᠦᠷᠢ ᠨᠠᠰᠤᠨ ᠤ ᠬᠡᠤᠬᠡᠳ ᠬᠦᠷᠳᠡᠯ᠎ᠡ ᠰᠢᠨ᠎ᠡ ᠴᠠᠭ ᠤᠨ ᠲᠤᠭᠯᠠᠭᠠᠮ ᠳᠤ ᠲᠤᠩᠳᠠᠵᠦ᠂ ᠰᠡᠳᠬᠢᠯ ᠮᠡᠳᠡᠷᠡᠯ ᠨᠢ ᠭᠠᠵᠢᠭᠳᠠᠬᠤ ᠪᠤᠯᠤᠭᠰᠠᠨ ᠨᠢ ᠶᠠᠭᠤᠳᠠᠢ ᠶᠡᠭᠡ ᠬᠠᠷᠭᠤᠰᠤᠯ᠃ ᠲᠤᠭᠯᠠᠭᠠᠮ ᠤᠨ ᠲᠤᠩ ᠬᠡᠤᠬᠡᠳ᠂ ᠵᠠᠯᠠᠭᠤᠰ ᠲᠠ ᠨᠠᠷ ᠠᠴᠠ ᠬᠤᠯᠠ ᠶᠢᠨ ᠬᠤᠯᠠ ᠲᠠᠯᠳᠠ ᠦᠩᠭᠡᠷᠡᠭ᠃ ᠵᠤᠭ᠎ᠠ ᠴᠡᠩᠭᠡᠯ᠂ ᠱᠠᠯᠢᠶ᠎ᠠ ᠪᠠᠯᠢᠶᠠᠨ ᠳᠤ ᠵᠠᠷᠤᠭᠰᠠᠨ ᠡᠳᠦᠷ ᠬᠤᠨᠤᠭ᠂ ᠴᠠᠭ ᠮᠦᠴᠡ ᠶᠢᠨ ᠢᠶᠠᠨ ᠲᠦᠯᠦᠭᠡ ᠬᠤᠵᠢᠮ ᠤᠨ ᠡᠳᠦᠷ ᠴᠢ ᠬᠠᠷᠠᠮᠰᠠᠨ ᠬᠠᠯᠬᠠᠯᠠᠨ᠎ᠠ᠃ ᠭᠡᠬᠦ ᠳᠤ ᠪᠠᠨ ᠲᠡᠷᠡ ᠦᠶ᠎ᠡ ᠳᠤ ᠪᠦᠬᠦ ᠶᠠᠭᠤᠮ᠎ᠠ ᠤᠷᠤᠰᠤᠨ ᠦᠩᠭᠡᠷᠡᠭᠰᠡᠨ ᠪᠠᠶᠢᠬᠤ ᠪᠤᠢ᠃ ᠤᠷᠤᠰᠤᠭᠠᠳ ᠦᠩᠭᠡᠷᠡᠭᠰᠡᠨ ᠭᠤᠤᠯ ᠤᠨ ᠤᠰᠤ ᠶᠢ ᠪᠤᠴᠠᠭᠠᠨ ᠤᠷᠤᠰᠬᠠᠵᠦ ᠪᠤᠯᠬᠤ ᠪᠢᠰᠢ᠃ ᠬᠡᠢ ᠬᠠᠷᠠᠮᠰᠠᠵᠦ᠂ ᠦᠪᠡᠷ ᠢ ᠪᠠᠨ ᠵᠦᠬᠡᠬᠦ ᠠᠴᠠ ᠴᠠᠰᠢ ᠦᠬᠡᠢ ᠃       ᠬᠦᠮᠦᠨ ᠤ ᠠᠮᠢᠳᠤᠷᠠᠯ ᠪᠤᠭᠤᠨᠢᠬᠠᠨ ᠰᠢᠦ᠃ ᠬᠤᠷᠤᠮ ᠬᠤᠷᠤᠮ ᠢᠶᠠᠷ ᠬᠤᠷᠭᠤᠳᠠᠬᠤ ᠠᠯᠳᠠᠨ ᠴᠠᠭ ᠢ ᠬᠡᠢ ᠲᠡᠮᠡᠢ ᠶᠠᠭᠤᠮᠠᠨ ᠳᠤ ᠪᠤᠤ ᠦᠷᠡ︕ 
  
ᠢᠷᠡᠯᠲᠡ᠄ ᠬᠡᠰᠢᠭᠳᠡᠨ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号