ᠬᠠᠷᠠᠴᠢᠨ ᠸᠠᠩ ᠤᠨ ᠣᠷᠳᠣᠨ ᠠᠴᠠ ᠬᠡᠪᠯᠡᠭᠦᠯᠦᠭᠰᠡᠨ ︽ᠠᠩᠬ᠎ᠠ ᠰᠣᠷᠭᠠᠭᠤᠯᠢ ᠶᠢᠨ ᠣᠩᠱᠢᠬᠤ  ᠪᠢᠴᠢᠭ︾᠎ ᠤᠨ  ᠲᠣᠬᠠᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/8/28
                                     —— ᠣᠭ ᠪᠢᠴᠢᠭ ᠤᠨ ᠵᠣᠬᠢᠶᠠᠭᠳᠠᠭᠰᠠᠨ 100 ᠵᠢᠯ ᠪᠠ                                               ᠲᠠᠬᠢᠨ ᠬᠡᠪᠯᠡᠭᠳᠡᠭᠰᠡᠨ 90 ᠵᠢᠯ ᠤᠨ ᠣᠢ ᠳᠤ ᠲᠣᠷᠠᠰᠬᠠᠪᠠᠢ       ﹇ᠠᠭᠤᠯᠭ᠎ᠠ ᠶᠢᠨ ᠲᠣᠪᠴᠢ﹈ ᠲᠣᠰ ᠦᠭᠦᠯᠡᠯ ᠳᠤ ᠣᠯᠣᠰ ᠤᠨ ᠨᠣᠮ ᠤᠨ ᠰᠠᠩ ᠳᠤ ᠬᠠᠲᠠᠭᠠᠯᠠᠭᠲᠠᠵᠦ ᠪᠠᠶᠢᠭ᠎ᠠ ᠬᠠᠷᠠᠴᠢᠨ  ᠸᠠᠩ ᠭᠦᠩᠰᠠᠩᠨᠣᠷᠪᠤ ᠶᠢᠨ ᠵᠠᠷᠯᠢᠭ  ᠢᠶᠠᠷ ᠵᠣᠬᠢᠶᠠᠭᠰᠠᠨ ︽ᠠᠩᠬ᠎ᠠ ᠰᠣᠷᠭᠠᠭᠤᠯᠢ ᠶᠢᠨ ᠣᠩᠱᠢᠬᠤ ᠪᠢᠴᠢᠭ ︾᠎ ᠤᠨ ᠠᠭᠤᠯᠭ᠎ᠠ᠂  ᠬᠡᠪᠯᠡᠭᠳᠡᠵᠦ ᠵᠣᠬᠢᠶᠠᠭᠳᠠᠭᠰᠠᠨ ᠴᠠᠭ᠂ ᠭᠦᠩ ᠸᠠᠩ ᠤᠨ ᠪᠢᠴᠢᠭᠰᠡᠨ ᠣᠷᠣᠰᠢᠯ ᠵᠡᠷᠭᠡ ᠶᠢ ᠰᠣᠳᠣᠯᠪᠠ᠃   ﹇ᠵᠠᠩᠭᠢᠯᠭ᠎ᠠ ᠦᠭᠡ﹈ ᠬᠠᠷᠠᠴᠢᠨ ᠸᠠᠩ᠂ ︽ᠠᠩᠬ᠎ᠠ ᠰᠣᠷᠭᠠᠭᠤᠯᠢ ᠶᠢᠨ ᠣᠩᠱᠢᠬᠤ ᠪᠢᠴᠢᠭ︾             ᠪᠡᠭᠡᠵᠢᠩ ᠳᠠᠬᠢ ᠣᠯᠣᠰ ᠤᠨ ᠨᠣᠮ ᠤᠨ ᠰᠠᠩ ᠳᠤ ᠬᠠᠷᠠᠴᠢᠨ ᠸᠠᠩ ᠤᠨ ᠣᠷᠳᠣᠨ ᠠᠴᠠ ᠬᠡᠪᠯᠡᠭᠦᠯᠦᠭᠰᠡᠨ ︽ᠠᠩᠬ᠎ᠠ  ᠰᠣᠷᠭᠠᠭᠤᠯᠢ ᠶᠢᠨ ᠣᠩᠱᠢᠬᠤ ᠪᠢᠴᠢᠭ︾ ︵ᠲᠡᠷᠢᠭᠦᠨ᠂ ᠳᠡᠳ᠋᠂ ᠭᠤᠳᠠᠭᠠᠷ︶ ︵ᠲᠣᠷᠣᠭᠰᠢ ︽ᠣᠩᠰᠢᠬᠤ ᠪᠢᠴᠢᠭ︾ ᠭᠡᠵᠦ  ᠲᠣᠪᠴᠢᠯᠠᠨ᠎ᠠ︶ ᠬᠡᠮᠡᠬᠦ ᠢᠷᠭᠡᠨ ᠣᠯᠣᠰ ᠤᠨ ᠦᠶ᠎ᠡ ᠶᠢᠨ ᠴᠢᠯᠠᠭᠤᠨ ᠪᠠᠷ ᠤᠨ ᠬᠢᠴᠢᠶᠡᠯ  ᠤᠨ ᠪᠢᠴᠢᠭ ᠪᠣᠢ᠃ ᠰᠢᠷ᠎ᠠ ᠬᠠᠪᠢᠰᠣ ᠲᠠᠢ᠂  ᠲᠡᠷᠢᠭᠦᠨ ᠲᠡᠪᠲᠡᠷ 20 ᠬᠠᠭᠤᠳᠠᠰᠣ᠂ ᠳᠡᠳ᠋ ᠲᠡᠪᠲᠡᠷ 18 ᠬᠠᠭᠤᠳᠠᠰᠣ᠂ ᠭᠤᠳᠠᠭᠠᠷ ᠲᠡᠪᠲᠡᠷ 38 ᠬᠠᠭᠤᠳᠠᠰᠣ᠂ ᠬᠡᠮᠵᠢᠶ᠎ᠡ ᠨᠢ 22. 1×14.5cm᠃ ᠥᠪᠦᠷ ᠮᠣᠩᠭᠤᠯ ᠤᠨ ᠪᠠᠭᠰᠢ ᠶᠢᠨ ᠶᠡᠭᠡ ᠰᠣᠷᠭᠠᠭᠤᠯᠢ ᠶᠢᠨ ᠨᠣᠮ ᠤᠨ ᠰᠠᠩ ᠳᠤ ᠪᠠᠰᠠ ᠣᠭ ᠨᠣᠮ ᠤᠨ  ᠭᠤᠷᠪᠠᠳᠣᠭᠠᠷ ᠲᠡᠪᠲᠡᠷ ᠨᠢᠭᠡ ᠬᠤᠪᠢ ᠬᠠᠳᠠᠭᠠᠯᠠᠭᠳᠠᠵᠦ ᠪᠣᠢ᠃ ᠠᠳᠡ ᠭᠤᠣᠯᠳᠠᠭᠤ ᠣᠩᠰᠢᠬᠤ ᠪᠢᠴᠢᠭ ᠤᠨ ᠠᠭᠤᠯᠭ᠎ᠠ ᠵᠢᠴᠢ  ᠨᠣᠮ ᠤᠨ ᠬᠡᠪᠯᠡᠯ ᠵᠡᠷᠭᠡ ᠳᠤ ᠬᠤᠯᠪᠣᠭᠳᠠᠬᠤ ᠵᠠᠷᠢᠮ ᠠᠰᠠᠭᠤᠳᠠᠯ ᠢ ᠠᠪᠴᠦ ᠶᠠᠷᠢᠯᠴᠠᠬᠤ ᠪᠣᠯᠣᠨ᠎ᠠ᠃                        ᠨᠢᠭᠡ᠂ ︽ᠣᠩᠰᠢᠬᠤ ᠪᠢᠴᠢᠭ︾᠎ ᠤᠨ ᠠᠭᠤᠯᠭ᠎ᠠ          ︽ᠣᠩᠰᠢᠬᠤ ᠪᠢᠴᠢᠭ︾᠎ ᠤᠨ ᠲᠡᠷᠢᠭᠦᠨ ᠲᠡᠪᠲᠡᠷ ᠤᠨ ᠠᠭᠤᠯᠭ᠎ᠠ᠄ ᠲᠡᠷᠢᠭᠦᠨ ᠲᠡᠪᠲᠡᠷ ᠬᠤᠶᠠᠷ ᠠᠭᠤᠯᠭ᠎ᠠ ᠠᠴᠠ ᠪᠦᠷᠢᠯᠳᠦᠵᠡᠢ᠃ ᠡᠭᠦᠨ ᠳᠤ 1-2 ᠳ᠋ᠣᠭᠠᠷ ᠬᠠᠭᠤᠳᠠᠰᠣ ᠪᠣᠯ ᠬᠠᠷᠠᠴᠢᠨ ᠸᠠᠩ ᠠᠴᠠ ᠣᠭ ᠨᠣᠮ ᠢ ᠬᠡᠪᠯᠡᠭᠦᠯᠬᠦ ᠳᠤ ᠪᠢᠴᠢᠭᠰᠡᠨ ᠣᠷᠣᠰᠢᠯ ᠪᠣᠯᠣᠨ᠎ᠠ᠃  3 - 20 ᠳ᠋ᠣᠭᠠᠷ ᠬᠠᠭᠤᠳᠠᠰᠣ ᠪᠣᠯ ᠮᠣᠩᠭᠤᠯ ᠴᠠᠭᠠᠨ ᠲᠣᠯᠣᠭᠠᠢ ᠪᠠ ᠲᠡᠭᠦᠨ ᠤ ᠲᠣᠬᠠᠢ ᠨᠠᠷᠢᠨ ᠲᠠᠶᠢᠯᠪᠣᠷᠢ ᠪᠣᠯᠣᠨ᠎ᠠ᠃            ︽ᠣᠩᠰᠢᠬᠤ ᠪᠢᠴᠢᠭ︾᠎ ᠤᠨ ᠳᠡᠳ᠋ ᠲᠡᠪᠲᠡᠷ ᠤᠨ ᠠᠭᠤᠯᠭ᠎ᠠ᠄ ᠲᠡᠳ᠋ ᠲᠡᠪᠲᠡᠷ ᠨᠢ ︽ᠰᠢᠤ ᠱᠧᠨ ﹇1﹈ ᠨᠠᠢᠮᠠᠨ ᠪᠦᠯᠦᠭ  ᠪᠡᠶ᠎ᠡ ᠶᠢ ᠵᠠᠰᠠᠬᠤ ᠦᠭᠡᠰ︾᠂ ︽ᠳ᠋ᠢ ᠯᠢ ﹇2﹈ ᠨᠠᠢᠮᠠᠨ ᠪᠦᠯᠦᠭ ᠲᠣᠰ ᠭᠠᠵᠠᠷᠣᠨ ᠲᠣᠪᠴᠢᠶ᠎ᠠ︾᠂ ︽ᠯᠢᠢ ᠱᠢ ﹇3﹈ ᠨᠠᠢᠮᠠᠨ  ᠪᠦᠯᠦᠭ ᠬᠤᠱᠢᠭᠤᠨ ᠢᠶᠠᠨ ᠤ ᠰᠠᠰᠳᠢᠷ︾᠂ ︽ᠴᠠᠩ ᠭᠧ ﹇4﹈ ᠨᠠᠢᠮᠠᠨ ᠪᠦᠯᠦᠭ ᠡᠯ᠎ᠡ ᠭᠦᠶᠦᠬᠡᠨ ᠦᠭᠡᠰ︾ ᠵᠡᠷᠭᠡ ᠳᠦᠷᠪᠡᠨ  ᠠᠭᠤᠯᠭ᠎ᠠ ᠶᠢ ᠪᠠᠭᠲᠠᠭᠠᠵᠡᠢ᠃            ᠲᠡᠳ᠋ ᠲᠡᠪᠲᠡᠷ ᠨᠡᠶᠢᠲᠡ ᠭᠤᠴᠢᠨ ᠬᠤᠶᠠᠷ ᠵᠦᠢᠯ ᠠᠭᠤᠯᠭ᠎ᠠ ᠶᠢ ᠪᠠᠭᠲᠠᠭᠠᠵᠡᠢ᠃ ᠡᠭᠦᠨ ᠳᠤ ᠨᠢᠭᠡᠳᠦᠭᠡᠷ ᠲᠤ ︽ᠠᠪᠠ ﹇5﹈᠂ ᠮᠦᠮᠦ᠂ ᠨᠠᠮᠠᠢᠢ ᠰᠠᠨᠠ ᠨᠠ ﹇6﹈᠂ ᠪᠢ ᠪᠠᠰᠠ᠂ ᠠᠪᠠ ᠮᠦᠮᠦ ᠶᠢ ᠰᠠᠨᠠᠨ᠎ᠠ︾ ﹇7﹈ ᠭᠡᠵᠦ ᠡᠬᠢᠯᠡᠭᠦᠯᠦᠭᠡᠳ ᠬᠤᠶᠠᠳᠣᠭᠠᠷ ᠠᠴᠠ  ᠎ ᠨᠢ ᠳ᠋ᠢ ᠯᠢ᠂ ᠭᠤᠷᠪᠠᠳᠣᠭᠠᠷ ᠲᠤ ᠨᠢ ᠯᠢᠢ ᠱᠢ᠂ ᠳᠦᠷᠪᠡᠳᠦᠭᠡᠷ ᠲᠤ ᠨᠢ ᠴᠠᠩ ᠭᠧ᠂ ᠲᠠᠪᠣᠳᠣᠭᠠᠷ ᠲᠤ ᠨᠢ ᠰᠢᠤ ᠱᠧᠨ ᠭᠡᠵᠦ  ᠳᠦᠷᠪᠡᠨ ᠵᠦᠢᠯ ᠳᠤ ᠬᠤᠪᠢᠶᠠᠨ ᠪᠢᠴᠢᠭᠰᠡᠨ ᠪᠦᠭᠡᠳ ᠵᠢᠷᠭᠤᠳᠣᠭᠠᠷ ᠠᠴᠠ ᠡᠬᠢᠯᠡᠨ ᠲᠠᠬᠢᠨ ᠳ᠋ᠢ ᠯᠢ᠂ ᠳᠣᠯᠣᠳᠣᠭᠠᠷ ᠲᠤ ᠯᠢᠢ ᠱᠢ᠂  ᠨᠠᠢᠮᠠᠳᠣᠭᠠᠷ ᠲᠤ ᠴᠠᠩ ᠭᠧ᠂ ᠶᠢᠰᠦᠳᠦᠭᠡᠷ ᠲᠤ ᠰᠢᠤ ᠱᠧᠨ ᠭᠡᠵᠦ ᠭᠤᠴᠢᠨ ᠬᠤᠶᠠᠳᠣᠭᠠᠷ ᠵᠦᠢᠯ ᠬᠦᠷᠲᠡᠯ᠎ᠡ ᠪᠠᠨ ᠳᠦᠷᠪᠡ ᠳᠦᠷᠪᠡ  ᠎ ᠪᠠᠷ ᠲᠠᠬᠢᠨ ᠳᠡᠭᠡᠷᠡᠬᠢ ᠠᠭᠤᠯᠭ᠎ᠠ ᠪᠠᠨ ᠲᠠᠪᠲᠠᠳᠠᠭ ᠪᠠᠶᠢᠨ᠎ᠠ᠃            ᠪᠣᠲᠠᠲᠠᠢ ᠠᠭᠤᠯᠭ᠎ᠠ ᠶᠢ ᠨᠢ ᠶᠠᠷᠢᠪᠠᠯ᠂ ᠵᠢᠱᠢᠶᠡᠯᠡᠪᠡᠯ ᠭᠠᠵᠠᠷ ᠵᠦᠢ ᠶᠢᠨ ᠬᠡᠰᠡᠭ ᠲᠤ ︽ᠬᠤᠶᠠᠳᠣᠭᠠᠷ ᠳ᠋ᠢ ᠯᠢ  ᠪᠢ ᠮᠣᠩᠭᠤᠯ  ᠬᠦᠨ ﹇8﹈᠂ ᠪᠢ ᠬᠠᠷᠠᠴᠢᠨ ᠬᠤᠱᠤ ᠨᠢ ﹇9﹈ ᠮᠣᠩᠭᠤᠯ ᠬᠦᠨ︾ ﹇10﹈ ᠭᠡᠬᠦ ᠮᠡᠲᠣ ᠪᠠᠷ ᠬᠠᠷᠠᠴᠢᠨ ᠬᠤᠰᠢᠭᠤᠨ ᠤ ᠭᠠᠵᠠᠷ  ᠵᠦᠢ ᠶᠢᠨ ᠪᠠᠶᠢᠷᠢᠰᠢᠯ᠂ ᠬᠤᠰᠢᠭᠤ ᠶᠠᠮᠣᠨ ᠤ ᠣᠶᠢᠷᠠᠯᠴᠠᠭ᠎ᠠ ᠪᠠᠶᠢᠬᠤ ᠬᠠᠳᠠ ᠠᠭᠤᠯᠠ᠂ ᠰᠦᠮ᠎ᠡ᠂ ᠵᠠᠮ᠂ ᠬᠤᠰᠢᠭᠤᠨ ᠤ ᠠᠪᠠ  ᠭᠦᠷᠦᠭᠡᠰᠦ ᠵᠡᠷᠭᠡ ᠪᠠᠶᠢᠳᠠᠯ ᠢ ᠲᠠᠨᠢᠯᠴᠠᠭᠤᠯᠣᠭᠰᠠᠨ ᠪᠠᠶᠢᠨ᠎ᠠ᠃ ᠲᠡᠣᠬᠡ ᠶᠢᠨ ᠬᠡᠰᠡᠭ ᠲᠤ ︽ᠭᠤᠷᠪᠠᠳᠣᠭᠠᠷ ᠯᠢᠢ ᠱᠢ ᠮᠠᠨ ᠤ  ᠬᠤᠱᠢᠭᠤᠨ ᠤ ᠡᠵᠡᠨ ᠨᠢ ᠬᠠᠷᠠᠴᠢᠨ ᠸᠠᠩ ᠨᠣᠶᠠᠨ ᠭᠡᠢᠦ ﹇11﹈ ᠬᠡᠯᠡᠨ᠎ᠡ︾ ﹇12﹈ ᠭᠡᠵᠦ ᠡᠬᠢᠯᠡᠭᠡᠳ ᠬᠠᠷᠠᠴᠢᠨ ᠸᠠᠩ ᠨᠣᠶᠠᠨ  ᠲᠡᠭᠦᠨ ᠤ ᠵᠡᠷᠭᠡ ᠭᠡᠷᠬᠢᠮ᠂ ᠬᠠᠷᠠᠴᠢᠨ ᠤ ᠢᠷᠡᠯᠲᠡ᠂ ᠬᠠᠷᠠᠴᠢᠨ ᠬᠤᠰᠢᠭᠤᠨ ᠤ ᠪᠣᠢ ᠪᠣᠯᠣᠭᠰᠠᠨ ᠶᠠᠪᠣᠴᠠ᠂ ᠬᠠᠷᠠᠴᠢᠨ ᠬᠤᠰᠢᠭᠤᠨ ᠤ  ᠵᠡᠷᠭᠡ ᠭᠡᠷᠬᠢᠮ ᠵᠠᠯᠭᠠᠮᠵᠢᠯᠠᠭᠰᠠᠨ ᠶᠠᠪᠣᠴᠠ ᠵᠡᠷᠭᠡ ᠲᠡᠣᠬᠡᠨ ᠣᠴᠢᠷ ᠢ ᠲᠣᠪᠴᠢ ᠠᠪᠰᠠᠷᠬᠠᠨ ᠢᠶᠠᠷ ᠪᠢᠴᠢᠭᠰᠡᠨ ᠪᠠᠶᠢᠨ᠎ᠠ᠃ ︽ᠰᠢᠦ ᠱᠧᠨ  ︾᠎ ᠳᠤ ︽ᠵᠦᠭᠡᠢ ᠬᠤᠷᠣᠬᠠᠢ ᠪᠣᠯᠪᠠᠴᠣ᠂ ᠪᠦᠭᠦᠳᠡᠭᠡᠷ ᠡᠪᠰᠡᠬᠦ ᠵᠠᠩ ᠲᠠᠢ ᠴᠢᠴᠢᠭ ﹇13﹈᠎ ᠤᠨ ᠭᠤᠣᠯ ᠢ ᠬᠤᠷᠢᠶᠠᠢᠦ ﹇14﹈ ᠪᠠᠯ  ᠬᠢᠬᠦ ᠴᠢᠳᠠᠯ ᠲᠠᠢ︾ ﹇15﹈᠂ ︽ᠴᠠᠩ ᠭᠧ︾᠎ ᠳᠤ ︽ᠣᠬᠤᠷ ᠬᠤᠪᠴᠢᠰᠣ ᠡᠮᠦᠰᠪᠡᠯ ᠣᠨᠣᠶᠢᠲᠠᠢ ﹇16﹈ ᠲᠡᠪᠡᠯ ᠠᠴᠠ  ᠰᠠᠶᠢᠬᠠᠨ᠂ ᠣᠷᠲᠠᠢ ﹇17﹈ ᠰᠠᠷᠪᠠᠴᠢᠲᠠᠢ ᠮᠠᠯᠠᠭ᠎ᠠ ᠣᠯᠠᠭᠠᠨ ᠵᠢᠯᠠᠭ᠎ᠠ ᠠᠴᠠ ᠰᠠᠶᠢᠬᠠᠨ︾ ﹇18﹈ ᠬᠡᠮᠡᠨ ᠵᠦᠢᠷ ᠰᠡᠴᠡᠨ ᠦᠭᠡ  ᠪᠣᠶᠣ ᠰᠣᠷᠭᠠᠯ ᠤᠨ ᠰᠢᠨᠵᠢ ᠲᠠᠢ ᠬᠤᠶᠠᠷ ᠮᠦᠷᠲᠣ ᠰᠢᠯᠦᠭ ᠤᠳ ᠢ ᠣᠷᠣᠭᠤᠯᠣᠭᠰᠠᠨ ᠪᠠᠶᠢᠨ᠎ᠠ᠃            ︽ᠣᠩᠰᠢᠬᠤ ᠪᠢᠴᠢᠭ︾᠎ ᠤᠨ ᠭᠤᠳᠠᠭᠠᠷ ᠲᠡᠪᠲᠡᠷ ᠤᠨ ᠠᠭᠤᠯᠭ᠎ᠠ᠄ ᠭᠤᠳᠠᠭᠠᠷ ᠲᠡᠪᠲᠡᠷ ᠲᠤ ᠮᠦᠨ ᠳᠡᠳ᠋ ᠲᠡᠪᠲᠡᠷ ᠯᠤᠭ᠎ᠠ ᠪᠠᠨ  ᠠᠳᠠᠯᠢ ᠪᠠᠷ ︽ᠰᠢᠦ ᠱᠧᠨ᠂ ᠳ᠋ᠢ ᠯᠢ᠂ ᠯᠢᠢ ᠱᠢ᠂ ᠴᠠᠩ ᠭᠧ︾ ᠬᠡᠮᠡᠬᠦ ᠳᠠᠷᠠᠭᠠᠯᠠᠯ ᠢᠶᠠᠷ ᠳᠡᠭᠡᠷᠡᠬᠢ ᠳᠦᠷᠪᠡᠨ ᠠᠭᠤᠯᠭ᠎ᠠ ᠶᠢ  ᠲᠠᠪᠲᠠᠭᠰᠠᠨ ᠪᠠᠶᠢᠨ᠎ᠠ᠃ ᠨᠡᠶᠢᠲᠡ ᠵᠢᠷᠠᠨ ᠳᠦᠷᠪᠡᠨ ᠵᠦᠢᠯ ᠪᠣᠢ ᠲᠣᠯᠠ ᠳᠡᠳ᠋ ᠲᠡᠪᠲᠡᠷ ᠠᠴᠠ ᠠᠭᠤᠯᠭ᠎ᠠ ᠨᠢ ᠪᠠᠶᠠᠯᠢᠭ᠃ ᠡᠭᠦᠨ ᠳᠤ  ᠬᠠᠷᠠᠴᠢᠨ ᠬᠤᠰᠢᠭᠤᠨ ᠤ ᠭᠠᠵᠠᠷ ᠵᠦᠢ ᠶᠢᠨ ᠲᠠᠯ᠎ᠠ ᠪᠠᠷ ᠬᠠᠷᠠᠴᠢᠨ ᠬᠤᠰᠢᠭᠤ ᠯᠤᠭ᠎ᠠ ᠬᠦᠷᠰᠢ ᠵᠡᠷᠭᠡᠯᠳᠡᠭᠡ ᠪᠦᠬᠦᠢ ᠬᠤᠰᠢᠭᠤ᠂  ᠬᠠᠷᠠᠴᠢᠨ ᠬᠤᠰᠢᠭᠤᠨ ᠤ ᠬᠢᠯᠢ ᠬᠢᠵᠠᠭᠠᠷ ᠲᠤ ᠪᠣᠢ ᠭᠤᠣᠯ ᠮᠦᠷᠡᠨ᠂ ᠠᠭᠤᠯᠠ᠂ ᠬᠠᠷᠠᠴᠢᠨ ᠬᠤᠰᠢᠭᠤᠨ ᠤ ᠲᠣᠲᠣᠭᠠᠲᠣ ᠳᠤ ᠪᠣᠢ  ᠭᠤᠣᠯ ᠮᠦᠷᠡᠨ᠂ ᠠᠭᠤᠯᠠ᠂ ᠬᠤᠰᠢᠭᠤᠨ ᠤ ᠴᠠᠭ ᠠᠭᠠᠷ ᠤᠨ ᠪᠠᠶᠢᠳᠠᠯ᠂ ᠡᠳ᠋ ᠪᠠᠶᠠᠯᠢᠭ᠂ ᠬᠤᠰᠢᠭᠤᠨ ᠤ ᠵᠠᠰᠠᠭ ᠵᠠᠬᠢᠷᠭᠠᠨ ᠤ  ᠢᠷᠡᠯᠲᠡ᠂ ᠰᠦᠮ᠎ᠡ ᠭᠡᠶᠢᠳ᠂ ᠠᠮᠣ ᠪᠣᠲᠠᠭ᠎ᠠ᠂ ᠬᠤᠲᠠ ᠰᠠᠭᠤᠷᠢᠨ᠂ ᠲᠠᠷᠢᠶᠠᠯᠠᠩ ᠠᠭᠤᠷᠬᠠᠢ᠂ ᠬᠤᠲᠠᠯᠳᠤᠭ᠎ᠠ ᠵᠡᠷᠭᠡ ᠶᠢ  ᠲᠠᠨᠢᠯᠴᠠᠭᠤᠯᠵᠡᠢ᠃ ᠬᠠᠷᠠᠴᠢᠨ ᠬᠤᠰᠢᠭᠤᠨ ᠤ ᠲᠡᠣᠬᠡ ᠶᠢᠨ ᠲᠠᠯ᠎ᠠ ᠪᠠᠷ ᠬᠠᠷᠠᠴᠢᠨ ᠸᠠᠩ ᠤᠨ ᠣᠭ ᠴᠢᠩᠭᠡᠰ ᠤᠨ ᠨᠦᠬᠦᠷ  ᠣᠷᠢᠶᠠᠩᠬᠠᠨ ᠤ ᠵᠡᠯᠮ᠎ᠡ ᠪᠣᠯᠬᠤ᠂ ᠣᠷᠢᠶᠠᠩᠬᠠᠨ ᠤ ᠵᠠᠯᠮ᠎ᠠ ᠲᠠᠪᠣᠨᠠᠩ ᠪᠣᠯᠣᠭᠰᠠᠨ᠂ ᠵᠠᠯᠮ᠎ᠠ ᠶᠢᠨ ᠲᠣᠯᠣᠳᠣᠭᠠᠷ ᠦᠶ᠎ᠡ ᠠᠴᠠ ᠡᠵᠡᠨ  ᠭᠤᠣᠯ ᠳᠤ ᠨᠣᠲᠣᠭᠯᠠᠭᠰᠠᠨ᠂ ᠵᠠᠯᠮ᠎ᠠ ᠠᠴᠠ ᠮᠢᠩ ᠤᠨ ᠰᠡᠭᠦᠯ ᠪᠣᠯᠲᠠᠯᠠᠬᠢ ᠠᠷᠪᠠᠨ ᠳᠦᠷᠪᠡᠨ ᠦᠶ᠎ᠡ ᠶᠢᠨ ᠪᠠᠶᠢᠳᠠᠯ᠂ ᠠᠷᠪᠠᠨ  ᠳᠦᠷᠪᠡᠳᠦᠭᠡᠷ ᠦᠶ᠎ᠡ ᠰᠣᠪᠠᠳᠢ ᠠᠴᠠ ᠮᠦᠭᠲᠡᠨ ᠳᠤ ᠮᠠᠨᠵᠦ ᠶᠢᠨ ᠬᠠᠭᠠᠨ ᠳᠤ ᠪᠠᠷᠠᠭᠠᠯᠠᠭᠰᠠᠨ ᠪᠠ ᠲᠡᠭᠦᠨ ᠢ ᠬᠠᠷᠠᠴᠢᠨ ᠤ ᠵᠠᠰᠠᠭ  ᠨᠣᠶᠠᠨ ᠪᠣᠯᠭᠠᠭᠰᠠᠨ᠂ ᠰᠣᠪᠠᠳᠢ ᠶᠢᠨ ᠬᠤᠶᠢᠴᠢᠰ ᠤᠨ ᠦᠶ᠎ᠡ ᠵᠠᠯᠭᠠᠮᠵᠢ ᠪᠠ ᠡᠩᠬᠡ ᠠᠮᠣᠭᠤᠯᠠᠩ ᠤᠨ ᠲᠣᠯᠣᠳᠣᠭᠠᠷ ᠣᠨ ᠳᠤ ᠬᠠᠷᠠᠴᠢᠨ  ᠬᠤᠰᠢᠭᠤ ᠮᠠᠨᠵᠦ ᠳᠤ ᠳᠠᠭᠠᠭᠰᠠᠨ ᠵᠢᠴᠢ ᠬᠤᠶᠢᠴᠢ ᠦᠶ᠎ᠡ ᠶᠢᠨ ᠬᠠᠷᠠᠴᠢᠨ ᠸᠠᠩ ᠤᠨ ᠵᠡᠷᠭᠡ ᠭᠡᠷᠬᠢᠮ ᠵᠠᠯᠭᠠᠮᠵᠢᠯᠠᠭᠰᠠᠨ ᠲᠣᠬᠠᠢ᠂  ᠬᠠᠮᠤᠭ ᠰᠡᠭᠦᠯ ᠳᠤ ᠢᠯᠡᠷᠭᠡᠶᠢᠲᠣ ᠸᠠᠩ ᠨᠣᠶᠠᠨ ᠵᠢᠶᠦ᠋ᠨ ᠸᠠᠩ ᠤᠨ ᠵᠡᠷᠭᠡ ᠵᠠᠯᠭᠠᠮᠵᠢᠯᠠᠵᠦ ᠴᠢᠭᠤᠯᠭᠠᠨ ᠳᠠᠷᠤᠭ᠎ᠠ ᠪᠣᠯᠵᠦ ᠪᠠᠳᠠᠷᠠᠭᠤᠯᠲᠣ  ᠲᠦᠷᠦ ᠶᠢᠨ ᠴᠠᠭᠠᠨ ᠨᠣᠬᠠᠢ ᠵᠢᠯ ᠨᠠᠰᠣ ᠪᠠᠷᠠᠭᠰᠠᠨ ᠬᠦᠷᠲᠡᠯ᠎ᠡ ᠲᠡᠮᠳᠡᠭᠯᠡᠵᠡᠢ᠃            ᠲᠡᠶᠢᠮᠦ ᠠᠴᠠ ︽ᠣᠩᠰᠢᠬᠤ ᠪᠢᠴᠢᠭ︾᠎ ᠨᠢ  ᠬᠠᠷᠠᠴᠢᠨ ᠬᠤᠰᠢᠭᠤᠨ ᠤ ᠡᠷᠲᠡᠨ ᠪᠠ ᠡᠳᠦᠭᠡᠬᠢ ᠪᠠᠶᠢᠳᠠᠯ ᠢ ᠨᠠᠯᠢᠶᠡᠳ ᠪᠦᠬᠦ ᠲᠠᠯ᠎ᠠ ᠪᠠᠷ ᠲᠠᠨᠢᠯᠴᠠᠭᠤᠯᠣᠭᠰᠠᠨ ᠠᠭᠤᠯᠭ᠎ᠠ ᠪᠠᠷ ᠪᠠᠶᠠᠯᠢᠭ  ᠰᠣᠷᠬᠤ ᠪᠢᠴᠢᠭ ᠪᠣᠯᠵᠦ ᠴᠢᠳᠠᠭᠰᠠᠨ ᠪᠠᠶᠢᠨ᠎ᠠ᠃                          ᠬᠤᠶᠠᠷ᠂ ︽ᠣᠩᠰᠢᠬᠤ ᠪᠢᠴᠢᠭ︾᠎ ᠤᠨ ᠵᠣᠬᠢᠶᠠᠭᠳᠠᠵᠦ ᠬᠡᠪᠯᠡᠭᠳᠡᠭᠰᠡᠨ ᠪᠠᠶᠢᠳᠠᠯ ᠪᠠ ᠬᠠᠷᠠᠴᠢᠨ ᠸᠠᠩ ᠤᠨ  ᠪᠢᠴᠢᠭᠰᠡᠨ ᠣᠷᠣᠰᠢᠯ          ︽ᠣᠩᠰᠢᠬᠤ ᠪᠢᠴᠢᠭ︾ ᠪᠦᠷᠢ ᠶᠢᠨ ᠲᠡᠭᠦᠰᠭᠡᠯ ᠳᠤ ᠬᠢᠲᠠᠳ ᠢᠶᠠᠷ ︽喀喇沁王府 蒙文读本卷 ×××︾ ︵ᠬᠠᠷᠠᠴᠢᠨ ᠸᠠᠩ ᠤᠨ ᠣᠷᠳᠣᠨ ᠤ ᠮᠣᠩᠭᠤᠯ ᠣᠩᠰᠢᠬᠤ ᠨᠣᠮ ᠪᠣᠳᠢ×××︶ ᠭᠡᠵᠦ ᠪᠣᠢ ᠪᠠ ︽中华民国 五年十二月再版︾ ︵ᠳᠣᠮᠲᠠᠳᠣ ᠢᠷᠭᠡᠨ ᠣᠯᠣᠰ ᠤᠨ ᠲᠠᠪᠣᠳᠣᠭᠠᠷ ᠣᠨ ᠤ ᠠᠷᠪᠠᠨ ᠬᠤᠶᠠᠳᠣᠭᠠᠷ ᠰᠠᠷ᠎ᠠ ᠳᠤ  ᠲᠠᠬᠢᠨ ᠬᠡᠪᠯᠡᠪᠡ︶᠂ ︽发行所商务印书馆︾ ︵ᠬᠡᠪᠯᠡᠨ ᠲᠠᠷᠬᠠᠭᠴᠢ ᠱᠠᠩ ᠡᠣ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ︶ ᠭᠡᠵᠦ  ᠪᠣᠢ ᠦᠵᠡᠬᠦ ᠳᠤ ᠣᠭ ︽ᠣᠩᠰᠢᠬᠤ ᠪᠢᠴᠢᠭ︾᠎ ᠢ ᠢᠷᠭᠡᠨ ᠣᠯᠣᠰ ᠤᠨ ᠲᠠᠪᠣᠳᠣᠭᠠᠷ ᠣᠨ ᠪᠣᠶᠣ 1916 ᠣᠨ ᠳᠤ ᠱᠠᠩ ᠡᠣ  ᠬᠡᠪᠯᠡᠯ ᠤᠨ ᠭᠠᠵᠠᠷ ᠠᠴᠠ ᠲᠠᠬᠢᠨ ᠬᠡᠪᠯᠡᠭᠰᠡᠨ ᠭᠡᠳᠡᠭ ᠨᠢ ᠲᠣᠳᠣᠷᠬᠠᠢ ᠪᠠᠶᠢᠨ᠎ᠠ᠃            ᠲᠡᠭᠡᠪᠡᠯ ︽ᠣᠩᠰᠢᠬᠤ ᠪᠢᠴᠢᠭ︾᠎ ᠤᠨ ᠠᠩᠬᠠᠨ ᠤ ᠡᠬᠡ ᠨᠢ ᠬᠡᠵᠢᠶ᠎ᠡ ᠵᠣᠬᠢᠶᠠᠭᠳᠠᠪᠠ︖ ᠡᠨᠡ ᠲᠣᠬᠠᠢ ︽ᠣᠩᠰᠢᠬᠤ ᠪᠢᠴᠢᠭ  ︾᠎ ᠤᠨ ᠳᠡᠳ᠋ ᠲᠡᠪᠳᠡᠷ ᠤᠨ ᠲᠡᠭᠦᠰᠭᠡᠯ ᠳᠤ ᠰᠣᠨᠢᠷᠬᠠᠯᠲᠠᠢ ᠮᠡᠳᠡᠭᠡ ᠪᠣᠢ᠃ ᠲᠡᠷᠡ ᠲᠡᠮᠳᠡᠭᠯᠡᠯ ᠳᠤ ︽ᠪᠠᠲᠠᠷᠠᠭᠤᠯᠲᠣ ᠲᠦᠷᠦ ᠶᠢᠨ  ᠭᠤᠴᠢᠨ ᠬᠤᠶᠠᠳᠣᠭᠠᠷ ᠣᠨ ᠡᠪᠣᠯᠦᠨ ᠳᠣᠮᠲᠠᠳᠣ ᠰᠠᠷᠠᠶᠢᠨ ᠰᠠᠶᠢᠨ ᠡᠳᠦᠷ᠎ᠠ ᠬᠠᠷᠠᠴᠢᠨ ᠸᠠᠩ ᠤᠨ ᠬᠤᠱᠢᠭᠤᠨ ᠤ ᠲᠦᠪ ᠢ ᠡᠷᠬᠢᠯᠡᠭᠰᠡᠨ  ᠰᠣᠷᠭᠠᠭᠤᠯᠢ ᠶᠢᠨ ᠲᠠᠩᠬᠢᠮ ᠳᠤᠷ ᠵᠣᠬᠢᠶᠠᠪᠠᠢ︾ ﹇19 ﹈ ᠭᠡᠵᠡᠢ᠃ ᠡᠭᠦᠨᠴᠡ ᠦᠵᠡᠬᠦ ᠳᠤ ︽ᠪᠠᠲᠠᠷᠠᠭᠤᠯᠲᠣ ᠲᠦᠷᠦ ᠶᠢᠨ ᠭᠤᠴᠢᠨ  ᠬᠤᠶᠠᠳᠣᠭᠠᠷ ᠣᠨ︾ ᠪᠣᠶᠣ 1906 ᠣᠨ ᠤ ᠡᠪᠦᠯ ᠤᠨ ᠳᠣᠮᠲᠠᠳᠣ ᠰᠠᠷ᠎ᠠ ᠳᠤ ᠲᠣᠰ ︽ᠣᠩᠰᠢᠬᠤ ᠪᠢᠴᠢᠭ︾᠎ ᠢ ᠬᠠᠷᠠᠴᠢᠨ  ᠬᠤᠰᠢᠭᠤᠨ ᠤ ᠭᠦᠩ ᠸᠠᠩ ᠤᠨ ᠪᠠᠶᠢᠭᠤᠯᠣᠭᠰᠠᠨ ᠲᠦᠪ ᠢ ᠡᠷᠬᠢᠮᠯᠡᠬᠦ ᠰᠣᠷᠭᠠᠭᠤᠯᠢ ᠳᠤ ᠵᠣᠬᠢᠶᠠᠭᠳᠠᠭᠰᠠᠨ ᠪᠠᠶᠢᠨ᠎ᠠ᠃ ᠲᠡᠶᠢᠮᠦ ᠠᠴᠠ  ᠡᠨᠡᠬᠦ ︽ᠣᠩᠰᠢᠬᠤ ᠪᠢᠴᠢᠭ︾ ᠪᠣᠯ 1906 ᠣᠨ ᠳᠤ ᠵᠣᠬᠢᠶᠠᠭᠳᠠᠭᠰᠠᠨ ᠣᠩᠰᠢᠬᠤ ᠪᠢᠴᠢᠭ ᠢ ᠠᠷᠪᠠᠨ ᠵᠢᠯ ᠤᠨ ᠳᠠᠷᠠᠭ᠎ᠠ ᠪᠣᠶᠣ  1916 ᠣᠨ ᠳᠤ ᠲᠠᠬᠢᠨ ᠬᠡᠪᠯᠡᠭᠰᠡᠨ ᠪᠠᠶᠢᠨ᠎ᠠ᠃            ᠲᠣᠰ ︽ᠣᠩᠰᠢᠬᠤ ᠪᠢᠴᠢᠭ︾᠎ ᠤᠨ ᠪᠠᠰᠠ ᠨᠢᠭᠡ ᠰᠣᠨᠢᠷᠬᠠᠯᠲᠠᠢ ᠵᠦᠢᠯ ᠪᠣᠯ ᠬᠠᠷᠠᠴᠢᠨ ᠸᠠᠩ ᠤᠨ ᠪᠢᠴᠢᠭᠰᠡᠨ ᠣᠷᠣᠰᠢᠯ  ᠪᠣᠯᠣᠨ᠎ᠠ᠃ ᠲᠡᠷᠡ ᠣᠷᠣᠰᠢᠯ ᠢ ᠰᠡᠶᠢᠷᠡᠭᠦᠯᠪᠡᠯ ︽ᠠᠯᠢᠪᠠ ᠬᠡᠷᠡᠭ ᠢ ᠪᠦᠲᠦᠭᠡᠬᠦ ᠳᠤ᠂ ᠠᠯᠢ ᠬᠡᠷᠡᠭ ᠤᠨ ᠡᠳᠡᠯᠪᠦ᠋ᠷᠢ ᠬᠡᠷᠡᠭᠲᠡᠢ᠃  ᠣᠷᠠᠴᠣᠳ ᠶᠠᠪᠣᠳᠠᠯ ᠶᠢᠠᠨ ᠰᠠᠶᠢᠵᠢᠷᠠᠭᠤᠯᠰᠣᠭᠠᠢ ᠬᠡᠮᠡᠪᠡᠰᠦ᠂ ᠡᠷᠬᠡᠪᠢᠱᠢ ᠰᠠᠪᠠ ᠬᠡᠷᠡᠭᠯᠡᠯ ᠶᠢᠠᠨ ᠬᠤᠷᠴᠠ ᠪᠣᠯᠭᠠᠮᠣᠢ᠃ ᠪᠢᠴᠢᠭ  ᠰᠣᠷᠭᠠᠬᠤ ᠲᠤ ᠮᠦᠨ ᠠᠳᠠᠯᠢ᠂ ᠮᠠᠨ ᠤ ᠮᠣᠩᠭᠤᠯ ᠲᠤᠷ ᠬᠡᠳᠦᠢ ᠎ ᠪᠠᠷ ᠪᠢᠴᠢᠭ ᠣᠳᠬ᠎ᠠ ᠪᠠᠶᠢᠪᠠᠴᠤ ᠲᠣᠰᠬᠠᠢ ᠰᠣᠷᠭᠠᠬᠤ ᠪᠢᠴᠢᠭ ᠠᠨᠣ  ᠮᠠᠱᠢ ᠴᠦᠬᠡᠨ ᠨᠡᠩᠲᠡ ᠪᠠᠭ᠎ᠠ ᠬᠡᠣᠬᠡᠳ ᠳᠤ ᠰᠣᠷᠭᠠᠬᠤᠢ ᠲᠤᠷ ᠳ᠋ᠡᠰ ᠳᠠᠷᠠᠭ᠎ᠠ ᠪᠠᠶᠢᠬᠤ ᠬᠡᠷᠡᠭᠲᠡᠢ ᠶᠢᠨ ᠲᠣᠯᠠ᠂ ᠡᠳᠦᠭᠡ ᠲᠦᠪ ᠢ  ᠡᠷᠬᠢᠯᠡᠭᠰᠡᠨ ᠰᠣᠷᠭᠠᠭᠤᠯᠢ ᠶᠢᠨ ᠲᠠᠩᠬᠢᠮ ᠲᠤᠷ᠂ ᠵᠠᠬᠢᠢᠦ ᠠᠩᠬ᠎ᠠ ᠰᠣᠷᠬᠤ ᠲᠤ ᠰᠣᠷᠭᠠᠬᠤ᠂ ᠰᠠᠰᠳᠢᠷ᠂ ᠭᠠᠢᠠᠷᠣᠨ ᠵᠦᠢ᠂ ᠪᠡᠶ᠎ᠡ ᠶᠢ  ᠵᠠᠰᠠᠬᠤ᠂ ᠳᠠᠭᠤᠯᠠᠯ ᠶᠢᠨ ᠪᠢᠴᠢᠭ ᠤᠳ ᠢ ᠭᠦᠶᠦᠬᠡᠨ ᠠᠴᠠ ᠡᠬᠢᠯᠡᠨ ᠵᠣᠬᠢᠶᠠᠯᠭᠠᠪᠠ᠂ ᠡᠨᠡ ᠠᠨᠣ ᠭᠦᠶᠦᠬᠡᠨ ᠠᠴᠠ ᠡᠬᠢᠯᠡᠨ ᠭᠦᠨ᠎ᠡ ᠳᠤ  ᠬᠦᠷᠬᠦ ᠰᠠᠨᠠᠭ᠎ᠠ ᠪᠦᠭᠡᠳ ᠪᠠᠴᠢᠬᠠᠨ ᠬᠡᠣᠬᠡᠳ ᠤᠨ ᠣᠶᠣᠨ ᠯᠤᠭ᠎ᠠ ᠲᠡᠩᠴᠡᠭᠦᠯᠦᠨ᠂ ᠣᠯᠠᠮ ᠣᠯᠠᠮ ᠶᠢᠠᠷ ᠣᠬᠠᠭᠠᠨ ᠯᠤᠭ᠎ᠠ ᠴᠣᠭᠠᠷ  ᠲᠡᠪᠱᠢᠭᠦᠯᠬᠦ ᠶᠢᠨ ᠠᠷᠭ᠎ᠠ ᠪᠦᠯᠦᠭᠡ᠃ ᠰᠣᠷᠭᠠᠭᠤᠯᠢ ᠲᠤᠷ ᠰᠠᠨᠠᠭ᠎ᠠ ᠲᠠᠯᠪᠢᠬᠤ ᠡᠷᠳᠡᠮᠲᠡᠨ ᠨᠠᠷ ᠡᠷᠬᠡᠪᠢᠱᠢ ᠡᠨᠡ ᠦᠭᠡᠰ ᠢ ᠦᠯᠦ  ᠬᠦᠩᠭᠡᠨ ᠦᠶ᠋ᠢᠭᠦᠶᠡᠢ ᠬᠡᠮᠡᠨ ᠬᠡᠲᠣᠨ ᠦᠭᠡᠰ ᠶᠢᠠᠷ ᠰᠣᠶᠣᠯ ᠪᠣᠯᠭᠠᠪᠠᠢ᠂ ᠪᠠᠲᠠᠷᠠᠭᠤᠯᠲᠣ ᠲᠦᠷᠦ ᠶᠢᠨ ᠭᠤᠴᠢᠨ ᠬᠤᠶᠠᠳᠣᠭᠠᠷ ᠣᠨ  ᠠᠷᠪᠠᠨ ᠨᠢᠭᠡᠨ ᠰᠠᠷᠠᠶᠢᠨ ᠰᠠᠶᠢᠨ ᠡᠳᠦᠷ᠎ᠠ᠂ ᠬᠠᠷᠠᠴᠢᠨ ᠸᠠᠩ ᠣᠷᠣᠱᠢᠯ ᠨᠡᠮᠡᠪᠡᠢ︾ ﹇20﹈᠃            ᠲᠣᠰ ᠣᠷᠣᠰᠢᠯ ᠠᠴᠠ ᠮᠡᠳᠡᠵᠦ ᠪᠣᠯᠬᠤ ᠵᠦᠢᠯᠡᠰ ᠭᠡᠪᠡᠯ᠄            1᠂ ᠮᠣᠩᠭᠤᠯ ᠳᠤ ᠲᠣᠰᠬᠠᠢ ᠰᠣᠷᠭᠠᠬᠤ ᠪᠢᠴᠢᠭ ᠴᠥᠬᠡᠨ᠂ ᠨᠡᠩᠲᠡ ᠪᠠᠭ᠎ᠠ ᠬᠡᠣᠬᠡᠳ ᠤᠨ ᠰᠣᠷᠬᠤ ᠪᠢᠴᠢᠭ ᠥᠪᠡᠷ ᠤᠨ  ᠵᠠᠷᠴᠢᠮ ᠪᠣᠢ ᠲᠣᠯᠠ ᠬᠠᠷᠠᠴᠢᠨ ᠸᠠᠩ ᠲᠦᠪ ᠢ ᠡᠷᠬᠢᠯᠡᠭᠰᠡᠨ ᠰᠣᠷᠭᠠᠭᠤᠯᠢ ᠶᠢᠨ ᠲᠠᠩᠬᠢᠮ ᠳᠤ ᠵᠠᠬᠢᠵᠦ ᠠᠩᠬᠠᠨ ᠰᠣᠷᠬᠤ ︽ᠰᠠᠰᠳᠢᠷ᠂  ᠭᠠᠢᠠᠷᠣᠨ ᠵᠦᠢ᠂ ᠪᠡᠷ᠎ᠡ ᠶᠢ ᠵᠠᠰᠠᠬᠤ᠂ ᠳᠠᠭᠤᠯᠠᠯ︾ ᠵᠡᠷᠭᠡ ᠰᠣᠷᠬᠤᠢ ᠳᠤ ᠳᠦᠭᠦᠮ ᠬᠢᠯᠪᠡᠷ ᠪᠢᠴᠢᠭ ᠢ ᠵᠣᠬᠢᠶᠠᠯᠭᠠᠪᠠ᠃ ᠭᠡᠪᠡᠴᠦ ᠡᠨᠡᠬᠦ  ᠪᠢᠴᠢᠭ ᠨᠢ ᠳᠦᠭᠦᠮ ᠬᠢᠯᠪᠠᠷ ᠪᠣᠯᠪᠠᠴᠤ ︽ᠭᠦᠶᠦᠬᠡᠨ ᠠᠴᠠ ᠡᠬᠢᠯᠡᠨ ᠭᠦᠨ᠎ᠡ ᠳᠤ ᠬᠦᠷᠬᠦ ᠰᠠᠨᠠᠭ᠎ᠠ︾ ᠪᠦᠭᠡᠳ ᠡᠭᠦᠨ ᠢ ᠦᠯᠦ  ᠬᠦᠩᠭᠡᠪᠴᠢᠯᠡᠬᠦ ᠶᠢ ᠬᠦᠰᠡᠵᠦ ᠸᠠᠩ ᠦᠪᠡᠷ ᠢᠶᠠᠨ ᠣᠷᠣᠰᠢᠯ ᠪᠢᠴᠢᠪᠡᠢ᠃            2᠂ ᠪᠠᠳᠠᠷᠠᠭᠤᠯᠲᠣ ᠲᠦᠷᠦ ᠶᠢᠨ ᠭᠤᠴᠢᠨ ᠬᠤᠶᠠᠳᠣᠭᠠᠷ ᠣᠨ ᠤ ᠠᠷᠪᠠᠨ ᠨᠢᠭᠡᠨ ᠰᠠᠷ᠎ᠠ ᠪᠣᠶᠣ 1906 ᠣᠨ ᠤ 11  ᠰᠠᠷ᠎ᠠ ᠳᠤ ᠬᠠᠷᠠᠴᠢᠨ ᠸᠠᠩ ᠣᠷᠣᠰᠢᠯ ᠪᠢᠴᠢᠵᠡᠢ᠃ 1906 ᠣᠨ ᠤ ᠦᠶ᠎ᠡ ᠳᠤ ᠬᠠᠷᠠᠴᠢᠨ ᠸᠠᠩ ᠤᠨ ᠰᠢᠷᠡᠭᠡᠨ ᠳᠤ ᠭᠦᠩᠰᠠᠩᠨᠣᠷᠪᠤ  ᠪᠠᠶᠢᠭᠰᠠᠨ ᠲᠣᠯᠠ ᠣᠭ ᠣᠷᠣᠰᠢᠯ ᠢ ᠭᠦᠩ ᠸᠠᠩ ᠪᠢᠴᠢᠭᠰᠡᠨ ᠭᠡᠳᠡᠭ ᠨᠢ ᠴᠤ ᠲᠣᠳᠣᠷᠬᠠᠢ ᠪᠠᠶᠢᠨ᠎ᠠ᠃             ︽ᠣᠩᠰᠢᠬᠤ ᠪᠢᠴᠢᠭ︾᠎ ᠲᠤ ᠲᠣᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠬᠠᠷᠠᠴᠢᠨ ᠬᠤᠰᠢᠭᠤᠨ ᠤ ᠬᠡᠯᠡ ᠠᠪᠢᠶ᠎ᠠ ᠪᠠ ᠦᠭᠡ ᠬᠡᠯᠡ ᠦᠰᠦᠭ  ᠪᠢᠴᠢᠭ ᠢ ᠬᠡᠷᠡᠭᠯᠡᠵᠦ ᠪᠠᠶᠢᠭᠰᠠᠨ ᠪᠠᠶᠢᠳᠠᠯ᠂ ᠬᠠᠷᠠᠴᠢᠨ ᠬᠤᠰᠢᠭᠤᠨ ᠤ ᠭᠠᠵᠠᠷ ᠵᠦᠢ ᠪᠠ ᠲᠡᠣᠬᠡ ᠶᠢᠨ ᠶᠡᠷᠦᠩᠭᠡᠢ ᠪᠠᠶᠢᠳᠠᠯ ᠤᠨ ᠲᠣᠬᠠᠢ  ᠨᠡᠯᠢᠶᠡᠳ ᠵᠦᠢᠯ ᠲᠡᠮᠳᠡᠭᠯᠡᠭᠳᠡᠭᠰᠡᠨ ᠲᠣᠯᠠ ᠲᠡᠷᠡ ᠨᠢ ᠵᠦᠪᠬᠡᠨ ᠰᠣᠷᠬᠤ ᠪᠢᠴᠢᠭ ᠲᠡᠳᠦᠢ ᠪᠢᠰᠢ᠂ ᠬᠤᠷᠢᠳᠣᠭᠠᠷ ᠵᠠᠭᠤᠨ ᠤ ᠡᠬᠢᠨ ᠤ  ᠦᠶ᠎ᠡ ᠶᠢᠨ ᠬᠠᠷᠠᠴᠢᠨ ᠬᠤᠰᠢᠭᠤᠨ ᠤ ᠰᠣᠶᠣᠯ ᠲᠡᠣᠬᠡ ᠶᠢ ᠰᠣᠳᠣᠯᠬᠤ ᠳᠤ ᠴᠢᠬᠤᠯᠠ ᠴᠢᠬᠤᠯᠠ ᠮᠠᠲ᠋ᠧᠷᠢᠶᠠᠯ ᠤᠳ ᠢ  ᠬᠠᠩᠭᠠᠭᠰᠠᠨ ᠢᠶᠠᠷ ᠢᠶᠠᠨ ᠦᠨ᠎ᠡ ᠴᠡᠨ᠎ᠡ ᠲᠠᠢ ᠶᠣᠮ᠃       ᠵᠡᠭᠦᠯᠲᠡ ᠲᠠᠶᠢᠯᠪᠣᠷᠢ᠄       ﹇1﹈ ᠰᠢᠤ ᠱᠧᠨ — ᠪᠡᠶ᠎ᠡ ᠶᠢ ᠵᠠᠰᠠᠬᠤ ᠬᠡᠮᠡᠬᠦ ᠣᠳᠬ᠎ᠠ ᠲᠠᠢ 修身 ᠭᠡᠳᠡᠭ ᠬᠢᠲᠠᠳ ᠦᠭᠡ ᠶᠢᠨ ᠠᠪᠢᠶᠠᠴᠢᠯᠠᠭᠰᠠᠨ  ᠪᠢᠴᠢᠯᠭᠡ᠃       ﹇2﹈ ᠳ᠋ᠢ ᠯᠢ — ᠭᠠᠵᠠᠷ ᠵᠦᠢ ᠬᠡᠮᠡᠬᠦ ᠣᠳᠬ᠎ᠠ ᠲᠠᠢ 地理 ᠭᠡᠳᠡᠭ ᠬᠢᠲᠠᠳ ᠦᠭᠡ ᠶᠢᠨ ᠠᠪᠢᠶᠠᠴᠢᠯᠠᠭᠰᠠᠨ ᠪᠢᠴᠢᠯᠭᠡ᠃       ﹇3﹈ ᠯᠢᠢ ᠱᠢ — ᠲᠡᠣᠬᠡ ᠬᠡᠮᠡᠬᠦ ᠣᠳᠬ᠎ᠠ ᠲᠠᠢ 历史ᠭᠡᠳᠡᠭ ᠬᠢᠲᠠᠳ ᠦᠭᠡ ᠶᠢᠨ ᠠᠪᠢᠶᠠᠴᠢᠯᠠᠭᠰᠠᠨ ᠪᠢᠴᠢᠯᠭᠡ᠃       ﹇4﹈ ᠴᠠᠩ ᠭᠧ — ᠳᠠᠭᠤᠣ ᠬᠡᠮᠡᠬᠦ ᠣᠳᠬ᠎ᠠ ᠲᠠᠢ 唱歌ᠭᠡᠳᠡᠭ ᠬᠢᠲᠠᠳ ᠦᠭᠡ ᠶᠢᠨ ᠠᠪᠢᠶᠠᠴᠢᠯᠠᠭᠰᠠᠨ ᠪᠢᠴᠢᠯᠭᠡ᠃       ﹇5﹈ ᠠᠪᠠ — ᠠᠪᠤ᠃       ﹇6﹈ ᠰᠠᠨᠠ ᠨᠠ — ᠰᠠᠨᠠᠨ᠎ᠠ᠃       ﹇7﹈ ﹇10﹈ ﹇12﹈ ﹇15﹈ ﹇18﹈ ﹇19﹈ ︽ᠠᠩᠬ᠎ᠠ ᠰᠣᠷᠭᠠᠭᠤᠯᠢ ᠶᠢᠨ ᠣᠩᠱᠢᠬᠤ ᠪᠢᠴᠢᠭ︾ ︵ᠳᠡᠳ᠋  ᠲᠡᠪᠲᠡᠷ︶᠂ ᠴᠢᠯᠠᠭᠤᠨ ᠪᠠᠷ᠂ ᠣᠯᠣᠰ ᠤᠨ ᠨᠣᠮ ᠤᠨ ᠰᠠᠩ᠂ p 3,3,3-4,8,15,17-18᠃        ﹇8﹈ ᠬᠦᠨ — ᠬᠦᠮᠦᠨ᠃       ﹇9﹈ ᠬᠤᠱᠤ ᠨᠢ — ᠬᠤᠰᠢᠭᠤᠨ ᠤ᠃       ﹇11﹈ ᠭᠡᠢᠦ — ᠭᠡᠵᠦ᠃       ﹇13﹈ ᠴᠢᠴᠢᠭ — ᠴᠡᠴᠡᠭ᠃         ﹇14﹈ ᠬᠤᠷᠢᠶᠠᠢᠦ — ᠬᠤᠷᠢᠶᠠᠵᠦ᠃        ﹇16﹈ ᠣᠨᠣᠶᠢᠲᠠᠢ- ᠣᠨᠤᠭ᠎ᠠ ᠲᠠᠢ᠃        ﹇17﹈ ᠣᠷᠲᠠᠢ — ᠣᠷᠲᠣ᠃       ﹇20﹈ ︽ᠠᠩᠬ᠎ᠠ ᠰᠣᠷᠭᠠᠭᠤᠯᠢ ᠶᠢᠨ ᠣᠩᠱᠢᠬᠤ ᠪᠢᠴᠢᠭ︾ ︵ᠲᠡᠷᠢᠭᠦᠨ ᠲᠡᠪᠲᠡᠷ︶᠂ ᠴᠢᠯᠠᠭᠤᠨ ᠪᠠᠷ᠂ ᠣᠯᠣᠰ ᠤᠨ  ᠨᠣᠮ ᠤᠨ ᠰᠠᠩ᠂ p 1-2᠃    
 
ᠢᠷᠡᠯᠲᠡ᠄ ᠬᠡᠰᠢᠭᠳᠡᠨ ᠮᠣᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
 
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号