ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
︽ᠬᠦᠬᠡᠮᠡᠢ︾ ᠭᠡᠳᠡᠭ ᠦᠭᠡ ᠶᠢᠨ ᠤᠳᠬ᠎ᠠ ᠪᠠ ᠢᠷᠠᠯ ᠭᠠᠷᠤᠯ ᠤᠨ ᠲᠤᠬᠠᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/7/16
        ᠤᠳᠬ᠎ᠠ ᠤᠬᠠᠭᠳᠠᠬᠤᠨ ᠨᠢ ᠲᠣᠳᠣ ᠦᠭᠡᠢ ᠦᠭᠡᠰ ᠨᠤᠲᠤᠭ ᠤᠨ ᠠᠶᠠᠯᠭᠤ ᠪᠤᠶᠤ ᠶᠠᠷᠢᠶᠠᠨ ᠤ ᠬᠡᠯᠡᠨ ᠳᠤ ᠬᠡᠯᠡᠭᠳᠡᠵᠦ ᠪᠠᠶᠢᠬᠤ᠂ ᠪᠠᠰᠠ ᠨᠣᠮ ᠰᠤᠳᠤᠷ ᠪᠣᠯᠣᠨ ᠲᠣᠯᠢ ᠪᠢᠴᠢᠭ ᠤᠳ ᠲᠤ ᠲᠡᠮᠳᠡᠭᠯᠡᠭᠳᠡᠵᠦ ᠢᠷᠡᠭᠰᠡᠨ ᠨᠢ ᠡᠳᠦᠢ ᠲᠡᠳᠦᠢ ᠬᠠᠷᠠᠭᠳᠠᠨ᠎ᠠ᠃       ᠡᠨᠡ ᠰᠡᠳᠦᠪ ᠲᠤ ᠳᠤᠷᠠᠳᠴᠤ ᠪᠣᠢ ︽ᠬᠥᠭᠡᠮᠡᠢ︾ ᠭᠡᠳᠡᠭ ᠦᠭᠡ ᠪᠣᠯ ᠢᠵᠠᠭᠤᠷ ᠮᠣᠩᠭᠤᠯ ᠦᠭᠡ ᠶᠢᠨ ᠰᠢᠨᠵᠢᠲᠡᠢ ᠪᠥᠭᠡᠳ ᠥᠪᠥᠷ ᠮᠣᠩᠭᠤᠯ᠂ ᠮᠣᠩᠭᠤᠯ ᠤᠯᠤᠰ᠂ ᠪᠦᠷᠢᠶᠡᠳ ᠤᠨ ᠵᠠᠷᠢᠮ ᠭᠠᠵᠠᠷ ᠣᠷᠣᠨ ᠤ ᠠᠷᠠᠳ ᠤᠨ ᠠᠮᠠᠨ ᠶᠠᠷᠢᠶ᠎ᠠ ᠪᠤᠶᠤ ᠨᠤᠲᠤᠭ ᠤᠨ ᠠᠶᠠᠯᠭᠤᠨ ᠳᠤ ᠬᠥᠭᠡᠮᠡᠢ᠂ ᠪᠤᠯᠠᠭᠠᠨ ᠤ ᠬᠥᠭᠡᠮᠡᠢ᠂ ᠳᠠᠰ ᠤᠨ ᠬᠥᠭᠡᠮᠡᠢ᠂ ᠬᠥᠬᠡ ᠪᠤᠬ᠎ᠠ ᠶᠢᠨ ᠬᠥᠭᠡᠮᠡᠢ᠂ ᠬᠦᠭᠡᠮᠡᠶᠢᠯᠡᠬᠦ ᠭᠡᠬᠦ ᠮᠡᠲᠦ ᠪᠠᠷ ᠬᠡᠯᠡᠭᠳᠡᠳᠡᠭ᠃ ᠲᠡᠭᠦᠨ ᠢ ᠠᠪᠢᠶ᠎ᠠ ᠪᠠᠷ ᠲᠡᠮᠳᠡᠭᠯᠡᠪᠡᠯ ᠪᠦᠷ ᠮᠣᠩᠭᠤᠯ ᠴᠠᠭᠠᠨ ᠲᠣᠯᠣᠭᠠᠢ ᠶᠢᠨ ᠬᠠ ᠶᠢᠨ ᠲᠥᠷᠥᠯ ᠤᠨ ᠵᠢᠷᠭᠤᠳᠤᠭᠠᠷ ᠦᠶ᠎ᠡ ᠶᠢᠨ ᠬᠥᠨᠳᠡᠢ ᠡᠭᠡᠰᠢᠭ ᠢ ᠤᠷᠲᠤᠳᠬᠠᠨ ᠳᠠᠭᠤᠳᠠᠵᠤ᠂ ᠮᠠ ᠶᠢᠨ ᠲᠥᠷᠥᠯ ᠤᠨ ᠬᠤᠶᠠᠳᠤᠭᠠᠷ ᠦᠶ᠎ᠡ ᠶᠢᠨ ᠬᠥᠨᠳᠡᠢ ᠡᠭᠡᠰᠢᠭ ᠲᠤ ︽᠎ ᠢ︾ ᠵᠠᠯᠭᠠᠵᠤ ᠬᠡᠯᠡᠳᠡᠭ ᠦᠭᠡ ᠪᠣᠯᠬᠤᠷ ᠯᠠᠲ᠋ᠢᠨ ᠦᠰᠦᠭ ᠢᠶᠠᠷ ᠠᠪᠢᠶᠠᠴᠢᠯᠠᠨ ᠭᠠᠯᠢᠭᠯᠠᠵᠤ ᠤᠩᠰᠢᠪᠠᠯ huomei ᠭᠡᠵᠦ ᠰᠣᠨᠣᠰᠳᠠᠵᠤ᠂ ᠮᠣᠩᠭᠤᠯ ᠦᠰᠦᠭ ᠤᠨ ᠳᠦᠷᠢᠮ ᠢᠶᠠᠷ ︽ᠬᠥᠭᠡᠮᠡᠢ︾ ᠭᠡᠵᠦ ᠪᠢᠴᠢᠭᠳᠡᠨ᠎ᠡ᠃ ᠬᠠᠷᠢᠨ ᠡᠨᠡ ᠦᠭᠡ ᠶᠢ 1717 ᠣᠨ ᠳᠤ ᠵᠣᠬᠢᠶᠠᠭᠳᠠᠨ ᠬᠡᠪᠯᠡᠭᠳᠡᠭᠰᠡᠨ ︽ᠬᠤᠷᠢᠨ ᠨᠢᠭᠡᠲᠦ ᠲᠠᠶᠢᠯᠪᠤᠷᠢ ᠲᠣᠯᠢ︾᠎ ᠲᠤ ᠬᠥᠬᠡᠮ᠎ᠠ ᠶᠢᠨ ᠭᠦᠨ᠂ ᠬᠥᠭᠡᠮᠡᠢ ᠬᠡᠮᠡᠨ ᠪᠢᠴᠢᠭ ᠤᠨ ᠬᠡᠯᠡ ᠪᠠᠷ ᠲᠡᠮᠳᠡᠭᠯᠡᠭᠳᠡᠵᠦ᠂ ᠮᠥᠨ 1742 ᠣᠨ ᠤ ᠬᠢᠷᠢ ᠳᠤ ᠭᠦᠦᠰᠢ ᠯᠠᠮᠠ ᠵᠠᠮᠶᠠᠩᠳᠠᠮᠫᠢᠯ ᠲᠥᠪᠡᠳ ᠲᠥᠪᠡᠳ ︽ᠳ᠋ᠠᠨᠵᠤᠤᠷ︾᠎ ᠲᠠᠬᠢ ᠣᠷᠴᠢᠭᠤᠯᠭ᠎ᠠ ᠶᠢᠨ ᠨᠡᠷ᠎ᠡ ᠲᠣᠮᠢᠶ᠎ᠠ ᠨᠤᠭᠤᠳ ᠢ ᠲᠥᠷᠥᠯ ᠬᠤᠪᠢᠶᠠᠵᠤ ᠪᠢᠴᠢᠭᠰᠡᠨ ᠰᠠᠨᠰᠺᠷᠢᠲ — ᠲᠥᠪᠡᠳ ᠲᠣᠯᠢ ᠶᠢ ᠣᠷᠴᠢᠭᠤᠯᠤᠨ ᠰᠠᠨᠰᠺᠷᠢᠲ — ᠲᠥᠪᠡᠳ — ᠮᠣᠩᠭᠤᠯ ᠲᠣᠯᠢ ᠪᠣᠯᠭᠠᠵᠤ ᠮᠣᠩᠭᠤᠯ ᠳ᠋ᠠᠨᠵᠤᠤᠷ ᠲᠤ ᠣᠷᠣᠭᠤᠯᠤᠭᠰᠠᠨ ︽ᠢᠯᠭᠠᠯ ᠢ ᠣᠨᠣᠭᠤᠯᠤᠭᠴᠢ︾ ᠬᠡᠮᠡᠬᠦ ᠰᠤᠳᠤᠷ ᠲᠤ ᠬᠦᠭᠡᠮᠢ ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠪᠠᠶᠢᠨ᠎ᠠ᠃       ᠢᠩᠭᠢᠵᠦ ᠶᠠᠷᠢᠶ᠎ᠠ ᠪᠣᠯᠣᠨ ᠪᠢᠴᠢᠭ ᠲᠤ ᠬᠡᠯᠡᠭᠳᠡᠵᠦ ᠪᠢᠴᠢᠭᠳᠡᠵᠦ ᠢᠷᠠᠶᠢᠭᠰᠠᠨ ᠬᠥᠭᠡᠮᠡᠢ ᠭᠡᠳᠡᠭ ᠦᠭᠡ ᠴᠣᠬᠤᠮ ᠬᠠᠮᠢᠭ᠎ᠠ ᠪᠠᠶᠢᠳᠠᠭ᠂ ᠶᠠᠭᠤ ᠶᠢ ᠨᠡᠷᠡᠯᠡᠵᠦ ᠵᠢᠭᠠᠭᠰᠠᠨ ᠨᠢ ᠲᠣᠳᠣᠷᠬᠠᠢ ᠲᠠᠶᠢᠯᠪᠤᠷᠢ ᠦᠭᠡᠢ ᠪᠠᠶᠢᠭᠰᠠᠭᠠᠷ ᠪᠠᠶᠢᠲᠠᠯ᠎ᠠ ᠣᠶᠢᠷ᠎ᠠ ᠳᠤ ᠮᠣᠩᠭᠤᠯ ᠳᠠᠭᠤᠨ ᠤ ᠢᠷᠠᠭᠤ ᠤᠷᠠᠯᠢᠭ ᠲᠤ ︽ᠬᠥᠭᠡᠮᠡᠢ︾ ᠭᠡᠳᠡᠭ ᠣᠷᠳᠣ ᠶᠢᠨ ᠳᠠᠭᠤᠤ ᠶᠢ ᠬᠥᠭᠡᠮᠡᠶᠢᠯᠡᠵᠦ ᠳᠠᠭᠤᠯᠠᠬᠤ ᠨᠢ ᠰᠣᠨᠣᠰᠳᠠᠬᠤ ᠪᠣᠯᠵᠠᠢ᠃ ᠶᠠᠷᠢᠶᠠᠨ ᠤ ᠬᠡᠯᠡᠨ ᠳᠠᠬᠢ ᠪᠤᠯᠠᠭᠠᠨ ᠤ ᠬᠥᠭᠡᠮᠡᠢ᠂ ᠬᠥᠬᠡ ᠪᠤᠬ᠎ᠠ ᠶᠢᠨ ᠬᠥᠭᠡᠮᠡᠢ ᠭᠡᠬᠦ ᠮᠡᠲᠦ ᠶᠢᠨ ᠬᠥᠭᠡᠮᠡᠢ ᠪᠣᠯ ᠦᠨᠡᠲᠦ ᠠᠩ ᠤᠨ ᠬᠤᠭᠤᠯᠠᠢ ᠶᠢᠨ ᠡᠮᠦᠨ᠎ᠡ ᠲᠠᠯ᠎ᠠ ᠲᠤᠰᠢᠶ᠎ᠠ ᠳᠠᠭᠤ ᠲᠠᠴᠢᠷ ᠦᠰᠦᠲᠡᠢ ᠬᠡᠰᠡᠭ ᠵᠤᠷᠪᠤᠰ ᠠᠷᠠᠰᠤ ᠶᠢ ᠵᠢᠭᠠᠵᠤ ᠨᠡᠷᠡᠯᠡᠭᠰᠡᠨ ᠦᠭᠡ ᠪᠥᠭᠡᠳ ᠲᠡᠷᠡᠶᠢᠨ᠎ᠡ ᠲᠤᠰ ᠬᠤᠭᠤᠯᠠᠢ ᠶᠢᠨ ᠳᠣᠲᠣᠭᠠᠳᠤ ᠣᠷᠴᠢᠨ ᠳᠤ ᠲᠡᠶᠢᠮᠦ ᠠᠩ ᠤᠨ ᠠᠷᠠᠰᠤ ᠶᠢ ᠡᠯᠳᠡᠵᠦ ᠡᠰᠬᠡᠳᠡᠭ ᠬᠥᠭᠰᠢᠳ ᠤᠨ ᠬᠡᠯᠡᠳᠡᠭ ᠦᠭᠡ ᠪᠠᠶᠢᠭᠰᠠᠨ ᠪᠣᠯ ᠣᠳᠣ ᠦᠶ᠎ᠡ ᠳᠤ ᠡᠶᠢᠮᠦ ᠦᠭᠡ ᠶᠢ ᠬᠡᠯᠡᠬᠦ ᠬᠥᠮᠥᠨ ᠪᠠᠷᠤᠭ ᠦᠭᠡᠢ ᠪᠣᠯᠣᠭᠰᠠᠨ ᠪᠢᠵᠡ ᠭᠡᠵᠦ ᠰᠠᠨᠠᠭᠳᠠᠬᠤ ᠪᠣᠯᠵᠠᠢ᠃ ᠮᠥᠨ ᠬᠥᠬᠡ ᠪᠤᠬ᠎ᠠ ᠶᠢᠨ ᠬᠥᠭᠡᠮᠡᠢ ᠭᠡᠳᠡᠭ ᠨᠢ ᠲᠠᠭᠲᠠᠭᠠᠨ ᠤ ᠬᠤᠭᠤᠯᠠᠢ ᠭᠡᠰᠡᠨ ᠲᠠᠢ ᠠᠳᠠᠯᠢ ᠤᠳᠬ᠎ᠠ ᠪᠦᠬᠦᠢ ᠬᠡᠯᠡᠯᠭᠡ ᠪᠣᠯᠣᠨ᠎ᠠ᠃       ᠡᠷᠲᠡᠨ ᠤ ᠮᠣᠩᠭᠤᠯᠴᠤᠳ ᠠᠭᠤᠯᠠ ᠣᠰᠣᠨ ᠤ ᠡᠵᠡᠨ ᠢ ᠲᠠᠬᠢᠵᠤ ᠪᠥᠬᠡ ᠪᠥᠭᠡᠯᠡᠬᠦ᠂ ᠬᠤᠷᠢᠮ ᠨᠠᠶᠢᠷ ᠬᠢᠵᠦ ᠢᠷᠦᠭᠡᠯ ᠮᠠᠭᠲᠠᠭᠠᠯ ᠥᠴᠢᠭᠯᠡᠨ ᠬᠡᠯᠡᠬᠦ ᠳᠤ ᠲᠡᠷᠡ ᠦᠶ᠎ᠡ ᠶᠢᠨ ᠶᠠᠷᠢᠶᠠᠨ ᠤ ᠬᠡᠯᠡ ᠪᠠᠷ ᠳᠠᠭᠤ ᠬᠤᠭᠤᠯᠠᠢ ᠶᠢᠨ ᠠᠪᠢᠶ᠎ᠠ ᠪᠠᠨ ᠬᠢᠴᠢᠶᠡᠩᠭᠦᠶᠢᠯᠡᠨ ᠡᠭᠡᠰᠢᠭᠯᠡᠵᠦ᠂ ᠣᠯᠠᠨ ᠢᠶᠠᠷ ᠢᠶᠠᠨ ᠲᠦᠷᠢᠯᠭᠡ ᠬᠢᠵᠦ ᠳᠠᠭᠤᠷᠢᠰᠬᠠᠨ ᠠᠶᠠᠯᠠᠳᠠᠭ ᠵᠤᠷᠰᠢᠯ ᠲᠠᠢ ᠪᠠᠶᠢᠵᠠᠢ᠃ ᠡᠶᠢᠮᠦ ᠳᠠᠭ᠎ᠠ ᠬᠤᠭᠤᠯᠠᠢ ᠶᠢᠨ ᠠᠪᠢᠶ᠎ᠠ ᠨᠢ ᠬᠤᠭᠤᠯᠠᠢ ᠶᠢᠨ ᠬᠠᠮᠢᠭ᠎ᠠ ᠠᠴᠠ ᠭᠠᠷᠴᠤ ᠢᠷᠡᠳᠡᠭ ᠢ ᠥᠯᠥ ᠮᠡᠳᠡᠬᠦ ᠪᠣᠯᠪᠠᠴᠤ ᠬᠥᠭᠡᠮᠡᠢ᠂ ᠬᠥᠭᠡᠮᠡᠶᠢᠯᠡᠬᠦ᠂ ᠡᠭᠡᠰᠢᠭᠯᠡᠨ ᠳᠠᠭᠤᠯᠠᠬᠤ ︽ᠪᠤᠷᠢᠶᠠᠳ ᠠᠮᠠᠨ ᠠᠶᠠᠯᠭᠤ︶᠂ ᠬᠥᠭᠡᠮᠡᠢ ᠨᠢ ᠬᠤᠭᠤᠯᠠᠢ ᠳᠤ ᠡᠭᠡᠰᠢᠭᠯᠡᠵᠦ ᠪᠠᠶᠢᠳᠠᠭ ︵ᠮᠣᠩᠭᠤᠯ ᠤᠯᠤᠰ ᠤᠨ ᠰᠢ᠊ · ᠰᠦᠷᠤᠩᠵᠠᠪ ᠤᠨ ᠰᠢᠯᠦᠭ︶ ᠭᠡᠬᠦ ᠮᠡᠲᠦ ᠶᠢᠨ ᠬᠡᠯᠡᠯᠭᠡ ᠨᠦᠭᠦᠳ ᠪᠣᠯ ᠬᠥᠭᠡᠮᠡᠢ ᠭᠡᠳᠡᠭ ᠨᠢ ᠳᠠᠭᠤᠨ ᠭᠠᠷᠬᠤ ᠦᠢᠯᠡᠳᠦᠯ ᠲᠠᠢ ᠨᠢᠭᠡᠨ ᠵᠦᠢᠯ ᠤᠨ ᠡᠷᠬᠡᠲᠡᠨ ᠢ ᠵᠢᠭᠠᠭᠰᠠᠨ ᠨᠡᠷ᠎ᠡ ᠪᠣᠯᠬᠤ ᠪᠥᠭᠡᠳ ᠮᠣᠩᠭᠤᠯ ᠬᠡᠯᠡᠨ ᠳᠤ ᠪᠠᠶᠢᠭᠰᠠᠨ ᠪᠠ ᠪᠠᠶᠢᠳᠠᠭ ᠢ ᠴᠥᠮ ᠭᠡᠷᠡᠴᠢᠯᠡᠵᠦ ᠪᠠᠶᠢᠭ᠎ᠠ ᠶᠤᠮ᠃       ᠴᠢᠩᠭᠢᠪᠡᠯ ᠳᠡᠭᠡᠷ᠎ᠡ ᠳᠤᠷᠠᠳᠤᠭᠰᠠᠨ ᠲᠠᠶᠢᠯᠪᠤᠷᠢ ᠲᠣᠯᠢ ᠪᠣᠯᠣᠨ ᠳ᠋ᠠᠨᠵᠤᠤᠷ ᠰᠤᠳᠤᠷ ᠲᠤ ᠪᠢᠴᠢᠭ ᠤᠨ ᠬᠡᠯᠡ ᠪᠠᠷ ᠪᠢᠴᠢᠭᠳᠡᠵᠦ ᠪᠠᠶᠢᠭ᠎ᠠ ᠬᠥᠬᠡᠮ᠎ᠠ ᠶᠢᠨ ᠭᠦᠨ᠂ ᠬᠦᠮᠡᠢ᠂ ᠬᠦᠭᠡᠮᠢ ᠭᠡᠳᠡᠭ ᠦᠭᠡᠰ ᠪᠣᠯ ᠮᠥᠨ ᠲᠡᠷᠡ ᠦᠶ᠎ᠡ ᠶᠢᠨ ᠨᠤᠲᠤᠭ ᠨᠤᠲᠤᠭ ᠤᠨ ᠢᠶᠠᠨ ᠠᠮᠠᠨ ᠠᠶᠠᠯᠭᠤ ᠪᠠᠷ ᠶᠠᠷᠢᠳᠠᠭ ᠮᠣᠩᠭᠤᠯᠴᠢ ᠡᠷᠳᠡᠮᠲᠡᠳ ᠨᠡᠶᠢᠯᠡᠵᠦ ᠪᠢᠴᠢᠭᠰᠡᠨ ᠪᠣᠯᠬᠤᠷ ᠬᠥᠭᠡᠮᠡᠢ ᠭᠡᠳᠡᠭ ᠦᠭᠡ ᠳᠤ ᠣᠷᠳᠣ ᠡᠭᠡᠰᠢᠭ ᠤᠨ ᠪᠢᠴᠢᠯᠭᠡ ᠶᠢᠨ ᠠᠰᠠᠭᠤᠳᠠᠯ ᠪᠠᠶᠢᠬᠤ ᠠᠴᠠ ᠪᠢᠰᠢ᠂ ᠶᠠᠷᠢᠶᠠᠨ ᠤ ᠦᠭᠡ ᠶᠢᠨ ᠤᠳᠬ᠎ᠠ ᠶᠢ ᠲᠤᠰᠬᠠᠭᠰᠠᠨ ᠪᠠᠶᠢᠨ᠎ᠠ ᠨᠢ ᠳᠠᠮᠵᠢᠭ ᠦᠭᠡᠢ᠃ ᠡᠭᠦᠨ ᠳᠤ ︽ᠬᠤᠷᠢᠨ ᠨᠢᠭᠡᠲᠦ ᠲᠠᠶᠢᠯᠪᠤᠷᠢ ᠲᠣᠯᠢ︾᠎ ᠲᠤ ᠬᠦᠭᠡᠮ᠎ᠡ ᠶᠢᠨ ᠭᠦᠨ ᠭᠡᠳᠡᠭ ᠦᠭᠡ ᠶᠢ ᠲᠠᠶᠢᠯᠪᠤᠷᠢᠯᠠᠬᠤ ᠳᠠᠭᠠᠨ ︽ᠬᠤᠭᠤᠯᠠᠢ ᠶᠢᠨ ᠳᠣᠲᠣᠭᠠᠳᠤ ᠬᠦᠨᠳᠦᠷᠤᠨ ᠣᠷᠣᠭᠰᠠᠨ ᠮᠢᠬ᠎ᠠ ᠶᠢ ᠬᠦᠭᠡᠮ᠎ᠡ ᠶᠢᠨ ᠭᠦᠨ ᠬᠡᠮᠡᠮᠦᠢ᠃ ᠪᠠᠰᠠ ᠬᠤᠭᠤᠯᠠ ᠶᠢᠨ ᠡᠵᠡᠨ ᠬᠡᠮᠡᠨ ᠬᠡᠯᠡᠯᠴᠡᠮᠦᠢ︾ ᠭᠡᠰᠡᠨ ᠪᠠᠶᠢᠨ᠎ᠠ᠃        ᠴᠢᠩᠭᠢᠪᠡᠯ ᠬᠤᠭᠤᠯᠠᠢ ᠶᠢᠨ ᠳᠣᠲᠣᠭᠠᠳᠤ ᠬᠥᠨᠲᠥᠷᠦᠨ ᠣᠷᠭᠤᠭᠰᠠᠨ ᠮᠢᠬ᠎ᠠ᠂ ᠬᠦᠭᠡᠮ᠎ᠡ ᠶᠢᠨ ᠬᠦᠨ᠂ ᠬᠤᠭᠤᠯᠠᠢ ᠶᠢᠨ ᠡᠵᠡᠨ ᠨᠢ ᠬᠤᠭᠤᠯᠠᠢ ᠶᠢᠨ ᠳᠣᠲᠣᠭᠠᠳᠤ ᠳᠤ ᠣᠷᠣᠰᠢᠵᠤ ᠪᠠᠶᠢᠭ᠎ᠠ ᠨᠢᠭᠡ ᠶᠠᠭᠤᠮ᠎ᠠ ᠶᠢᠨ ᠭᠤᠷᠪᠠᠨ ᠨᠡᠷ᠎ᠡ ᠭᠡᠵᠦ ᠣᠶᠢᠯᠠᠭᠠᠭᠳᠠᠨ᠎ᠠ᠃ ᠬᠠᠷᠢᠨ ᠬᠤᠭᠤᠯᠠᠢ ᠶᠢᠨ ᠳᠣᠲᠣᠭᠠᠳᠤ ᠬᠥᠨᠲᠥᠷᠦᠨ ᠣᠷᠭᠤᠭᠰᠠᠨ ᠮᠢᠬ᠎ᠠ ᠭᠡᠳᠡᠭ ᠨᠢ ᠨᠡᠷ᠎ᠡ ᠲᠣᠮᠢᠶ᠎ᠠ ᠪᠢᠰᠢ ᠲᠠᠶᠢᠯᠪᠤᠷᠢ ᠪᠣᠯᠬᠤ ᠪᠥᠭᠡᠳ ᠶᠡᠷᠦ ᠳᠡᠭᠡᠨ ᠠᠮᠠᠨ ᠬᠥᠨᠳᠡᠢ ᠶᠢᠨ ᠭᠦᠨ ᠳᠤ ᠣᠷᠣᠰᠢᠨ ᠬᠠᠷᠠᠭᠳᠠᠳᠠᠭ ᠬᠡᠦᠬᠡᠳ ᠬᠡᠯᠡ ᠶᠢ ᠵᠢᠭᠠᠵᠤ ᠬᠡᠯᠡᠭᠰᠡᠨ ᠦᠭᠡ ᠪᠣᠯᠣᠨ᠎ᠠ᠃ ᠬᠡᠦᠬᠡᠳ ᠬᠡᠯᠡ ᠶᠢ ᠬᠢᠲᠠᠳ ᠢᠶᠠᠷ 腭垂᠂ ᠣᠷᠣᠰ ᠢᠶᠠᠷ язычок ᠠᠩᠭ᠍ᠯᠢ ᠪᠠᠷ uvu-la᠂ ᠯᠠᠲ᠋ᠢᠨ ᠢᠶᠠᠷ uvula palatina ᠭᠡᠳᠡᠭ ᠪᠥᠭᠡᠳ ᠪᠦᠷ ᠯᠡ ᠲᠠᠩᠨᠠᠢ ᠶᠢᠨ ᠪᠢᠴᠢᠬᠠᠨ ᠮᠢᠬᠠᠨ ᠤᠨᠵᠢᠯᠭ᠎ᠠ ᠪᠤᠶᠤ ᠦᠵᠦᠮ ᠰᠢᠭ ᠶᠠᠭᠤᠮ᠎ᠠ ᠭᠡᠰᠡᠨ ᠤᠳᠬ᠎ᠠ ᠪᠠᠭᠲᠠᠵᠤ ᠪᠣᠢ ᠨᠡᠷ᠎ᠡ ᠲᠣᠮᠢᠶ᠎ᠠ ᠶᠤᠮ᠃ ᠬᠤᠭᠤᠯᠠ ᠭᠡᠳᠡᠭ ᠦᠭᠡ ᠪᠣᠯ ᠵᠠᠯᠭᠢᠬᠤᠢ ᠶᠢ ᠬᠡᠯᠡᠭᠰᠡᠨ ᠪᠢᠰᠢ ᠢᠳᠡᠬᠦ ᠶᠠᠭᠤᠮ᠎ᠠ ᠪᠤᠶᠤ ᠢᠳᠡᠭᠡᠨ ᠢ ᠵᠢᠭᠠᠵᠤ ᠬᠡᠯᠡᠭᠰᠡᠨ ᠦᠭᠡ ᠪᠥᠭᠡᠳ ᠬᠠᠷᠢᠶᠠᠯᠠᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠤᠨ ᠳᠠᠭᠠᠪᠤᠷᠢ ᠵᠠᠯᠭᠠᠵᠤ ᠢᠳᠡᠬᠦ ᠤᠯᠠᠭᠠᠨ ᠬᠤᠭᠤᠯᠠᠢ᠂ ᠠᠮᠢᠰᠬᠤᠯᠯᠠᠬᠤ ᠴᠠᠭᠠᠨ ᠬᠤᠭᠤᠯᠠᠢ᠂ ᠳᠠᠭᠤᠨ ᠤ ᠬᠤᠭᠤᠯᠠᠢ ᠎ ᠲᠠᠢ ᠬᠤᠳᠬᠤᠯᠳᠤᠵᠤ ᠬᠥᠭᠡᠮᠡᠢ᠂ ᠳᠠᠭᠤ᠂ ᠬᠤᠭᠤᠯᠠᠢ ᠶᠢᠨ ᠤᠳᠬ᠎ᠠ ᠤᠬᠠᠭᠳᠠᠬᠤᠨ ᠢ ᠦᠭᠡ ᠬᠡᠯᠡ ᠢᠶᠠᠷ ᠲᠣᠳᠣᠳᠬᠠᠨ ᠢᠯᠡᠳᠬᠡᠬᠦ ᠠᠷᠭ᠎ᠠ ᠦᠯᠦ ᠮᠡᠳᠡᠭᠳᠡᠬᠦ ᠲᠤᠯᠠ ᠬᠤᠭᠤᠯᠠ ᠶᠢᠨ ᠡᠵᠡᠨ ᠭᠡᠰᠡᠨ ᠨᠡᠷ᠎ᠡ ᠪᠠᠷ ᠣᠩᠭᠤᠨ ᠡᠵᠡᠨ ᠮᠡᠳᠡᠳᠦᠭᠡᠢ ᠭᠡᠵᠦ ᠳᠠᠭᠠᠳᠬᠠᠨ ᠳᠠᠯᠳᠠ ᠦᠭᠡ ᠪᠠᠷ ᠶᠤᠭᠳᠠᠯᠠᠵᠡᠢ᠃ ᠲᠥᠷᠥᠯ ᠳᠤ ᠪᠠᠭᠲᠠᠵᠤ ᠪᠠᠶᠢᠭ᠎ᠠ ᠤᠨᠵᠢᠢᠭᠰᠠᠨ ᠮᠢᠬ᠎ᠠ ᠭᠡᠰᠡᠨ ᠤᠳᠬ᠎ᠠ ᠲᠠᠢ ᠲᠥᠪᠡᠳ ᠦᠭᠡ ᠶᠢ ᠬᠥᠭᠡᠮᠡᠢ ᠭᠡᠵᠦ ᠮᠣᠩᠭᠤᠯᠴᠢᠯᠠᠨ ᠣᠷᠴᠢᠭᠤᠯᠤᠭᠰᠠᠨ ᠢ ᠬᠠᠷᠢᠨ ᠬᠢᠲᠠᠳ ᠢᠶᠠᠷ 垂胡᠂ 牛项下悬垂的肉皮 ᠭᠡᠵᠦ ᠦᠬᠡᠷ ᠤᠨ ᠬᠦᠵᠦᠭᠦᠨ ᠳᠣᠣᠷᠠᠬᠢ ᠤᠨᠵᠢᠢᠭᠰᠠᠨ ᠠᠷᠠᠰᠤ ᠪᠤᠶᠤ ᠪᠣᠶᠢᠨᠤᠭ ᠢ ᠵᠢᠭᠠᠵᠤ ᠭᠠᠵᠢᠭᠤᠳᠬᠠᠨ ᠲᠠᠶᠢᠯᠪᠤᠷᠢᠯᠠᠭᠰᠠᠨ ᠨᠢ ᠦᠵᠡᠭᠳᠡᠨ᠎ᠡ᠃ ᠡᠶᠢᠮᠦ ᠠᠴᠠ ᠬᠥᠭᠡᠮᠡᠢ ᠭᠡᠳᠡᠭ ᠢ ᠬᠥᠮᠥᠨ ᠤ ᠪᠡᠶ᠎ᠡ ᠶᠢᠨ ᠶᠠᠭᠤ ᠨᠡᠷᠡᠯᠡᠭᠰᠡᠨ᠂ ᠶᠠᠮᠠᠷ ᠪᠦᠲᠦᠴᠡ ᠪᠠ ᠦᠢᠯᠡᠳᠦᠯ ᠲᠠᠢ᠂ ᠳᠠᠭᠤᠨ ᠪᠠ ᠠᠪᠢᠶ᠎ᠠ ᠲᠠᠢ ᠶᠠᠮᠠᠷ ᠬᠤᠯᠪᠣᠭᠳᠠᠯ ᠲᠠᠢ ᠨᠢ ᠲᠣᠳᠣᠷᠬᠠᠢ ᠦᠭᠡᠢ ᠬᠡᠯᠡᠭᠳᠡᠵᠦ ᠪᠢᠴᠢᠭᠳᠡᠵᠦ ᠢᠷᠡᠭᠰᠡᠨ ᠦᠭᠡ ᠪᠣᠯᠣᠨ᠎ᠠ᠃       ᠡᠭᠦᠨ ᠢ ᠣᠳᠣ ᠦᠶ᠎ᠡ ᠶᠢᠨ ᠠᠨᠠᠭᠠᠬᠤ ᠤᠬᠠᠭᠠᠨ ᠳᠠᠬᠢ ᠬᠥᠮᠥᠨ ᠤ ᠪᠡᠶ᠎ᠡ ᠶᠢᠨ ᠠᠨᠠᠲ᠋ᠣᠮᠢ ︵ᠪᠦᠲᠦᠴᠡ︶ ᠪᠠ ᠹᠢᠽᠢᠣᠯᠣᠭᠢ ︵ᠠᠵᠢᠯᠯᠠᠭ᠎ᠠ︶᠎ ᠶᠢᠨ ᠨᠡᠷ᠎ᠡ ᠳᠤᠯᠠᠭᠠᠨ ᠨᠤᠲᠠᠯᠠᠵᠤ ᠲᠣᠮᠢᠶᠠᠯᠠᠬᠤ ᠨᠢ ᠴᠢᠬᠤᠯᠠ ᠠᠴᠢ ᠬᠤᠯᠪᠣᠭᠳᠠᠯ ᠲᠠᠢ ᠪᠠᠶᠢᠨ᠎ᠠ᠃ ᠲᠡᠶᠢᠮᠦ ᠶᠢᠨ ᠲᠤᠯᠠ ᠡᠨᠡ ᠬᠥᠭᠡᠮᠡᠢ ᠭᠡᠳᠡᠭ ᠢ ᠬᠥᠮᠥᠨ ᠤ ᠪᠡᠶ᠎ᠡ ᠳᠠᠬᠢ ᠳᠠᠭᠤ ᠰᠣᠨᠣᠰᠳᠠᠬᠤ ᠡᠷᠬᠡᠲᠡᠨ ᠴᠢᠬᠢ᠂ ᠶᠠᠭᠤᠮ᠎ᠠ ᠬᠠᠷᠠᠬᠤ ᠡᠷᠬᠡᠲᠡᠨ ᠨᠢᠳᠦ ᠲᠠᠢ ᠵᠡᠷᠭᠡᠴᠡᠭᠰᠡᠨ᠂ ᠳᠤᠤᠭᠠᠷᠬᠤ ᠦᠢᠯᠡᠳᠦᠯ ᠎ ᠲᠠᠢ ᠡᠷᠬᠡᠲᠡᠨ ᠪᠣᠯᠬᠤ ᠶᠢ ᠮᠡᠳᠡᠵᠦ ᠪᠣᠯᠣᠨ᠎ᠠ᠃ ᠡᠶᠢᠮᠦ ᠡᠷᠬᠡᠲᠡᠨ ᠬᠥᠭᠡᠮᠡᠢ ᠶᠢ ᠯᠠᠲ᠋ᠢᠨ ᠪᠣᠯᠣᠨ ᠠᠩᠭ᠍ᠯᠢ ᠬᠡᠯᠡ ᠪᠠᠷ glottis ᠭᠡᠵᠦ᠂ ᠬᠢᠲᠠᠳ ᠪᠣᠯᠣᠨ ᠶᠠᠫᠤᠨ ᠬᠡᠯᠡ ᠪᠠᠷ ᠥᠩᠭᠡᠷᠡᠭᠴᠢ ᠵᠠᠭᠤᠨ ᠤ ᠡᠬᠢᠨ ᠤ ᠦᠶ᠎ᠡ ᠳᠤ 声门 ᠭᠡᠵᠦ ᠪᠢᠴᠢᠵᠦ᠂ ᠨᠡᠷᠡᠯᠡᠬᠦ ᠪᠣᠯᠣᠭᠰᠠᠨ ᠪᠠ ᠡᠨᠡ ᠨᠢ ᠣᠷᠣᠰ ᠬᠡᠯᠡᠨ ᠤ голособая шель ᠭᠡᠰᠡᠨ ᠨᠡᠷ᠎ᠡ ᠲᠣᠮᠢᠶ᠎ᠠ ᠲᠠᠢ ᠣᠨᠣᠯᠳᠤᠨ ᠵᠣᠬᠢᠴᠠᠬᠤ ᠨᠢ ᠲᠣᠳᠣᠷᠬᠠᠢ᠃       ᠡᠨᠡ ᠳᠤᠤᠭᠠᠷᠬᠤ ᠡᠷᠬᠡᠲᠡᠨ ᠬᠥᠭᠡᠮᠡᠢ ᠶᠢᠨ ᠪᠦᠲᠦᠴᠡ ᠨᠢ ᠠᠮᠢᠰᠬᠤᠯ ᠤᠨ ᠵᠠᠮ ᠪᠣᠯᠬᠤ ᠮᠥᠭᠡᠷᠰᠦᠨ ᠬᠤᠭᠤᠯᠠᠢ ᠪᠤᠶᠤ ᠴᠠᠭᠠᠨ ᠬᠤᠭᠤᠯᠠᠢ ᠲᠠᠢ ᠵᠠᠯᠭᠠᠯᠳᠤᠨ ᠣᠷᠣᠰᠢᠵᠤ ᠭᠠᠳᠠᠭᠰᠢ ᠪᠠᠨ ᠳᠦᠪᠤᠶᠢᠨ ᠦᠵᠡᠭᠳᠡᠳᠡᠭ ᠪᠠᠮᠪᠠᠢ ᠮᠥᠭᠡᠷᠰᠦ ᠵᠡᠷᠭᠡ ᠲᠣᠮᠣ ᠵᠢᠵᠢᠭ ᠳᠣᠯᠣᠭᠠᠨ ᠵᠦᠢᠯ ᠤᠨ ᠮᠥᠭᠡᠷᠰᠦᠨ ᠪᠦᠲᠦᠴᠡ ᠪᠠᠷ ᠪᠦᠷᠢᠯᠳᠦᠭᠰᠡᠨ ᠲᠦᠪᠦᠩ ᠪᠤᠶᠤ ᠲᠦᠪᠦᠩᠬᠢ ᠶᠢᠨ ᠳᠣᠲᠣᠷ᠎ᠠ ᠬᠥᠨᠳᠡᠢ ᠶᠢ ᠬᠤᠶᠠᠷ ᠲᠠᠯ᠎ᠠ ᠠᠴᠠ ᠬᠠᠪᠴᠢᠨ ᠪᠢᠲᠡᠭᠦᠯᠡᠵᠦ ᠳᠤᠮᠳᠠᠭᠤᠷ ᠢᠶᠠᠨ ᠵᠤᠷᠪᠤᠰᠬᠠᠨ ᠭᠤᠯᠳᠤ ᠠᠩᠭᠠᠷᠬᠠᠢ ᠭᠡᠳᠡᠭ ᠪᠥᠭᠡᠳ ᠲᠡᠭᠦᠨ ᠤ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠬᠥᠪᠡᠭᠡ ᠳᠠᠭᠠᠤ ᠲᠤᠰ ᠪᠦᠷᠢ ᠨᠢᠭᠡ ᠵᠤᠷᠪᠤᠰ ᠰᠢᠨᠳᠠᠰᠤᠨ ᠬᠠᠯᠢᠰᠤ ᠪᠠᠶᠢᠬᠤ ᠶᠢ ᠳᠠᠭᠤᠨ ᠤ ᠬᠥᠪᠴᠢ ᠭᠡᠨ᠎ᠡ᠃ ᠳᠠᠭᠤᠨ ᠤ ᠠᠩᠭᠠᠷᠬᠠᠢ ᠨᠢ ᠶᠡᠷᠦ ᠶᠢᠨ ᠠᠮᠢᠰᠬᠤᠯ ᠤᠨ ᠦᠶ᠎ᠡ ᠳᠤ ᠮᠠᠶᠢᠬᠠᠨ ᠤ ᠡᠭᠦᠳᠡ ᠰᠢᠭ ᠬᠤᠶᠠᠷ ᠲᠡᠶᠢᠰᠢ ᠪᠠᠨ ᠠᠩᠭᠠᠶᠢᠵᠤ ᠪᠠᠶᠢᠳᠠᠭ᠂ ᠳᠤᠤᠭᠠᠷᠬᠤ ᠦᠦᠶ᠎ᠡ ᠳᠤ ᠬᠤᠶᠠᠷ ᠲᠠᠯ᠎ᠠ ᠠᠴᠠ ᠵᠢᠮᠢᠢᠵᠦ ᠠᠩᠭᠠᠷᠬᠠᠢ ᠶᠢᠨ ᠵᠠᠢ ᠨᠢ ᠨᠠᠷᠢᠰᠤᠨ ᠳᠠᠭᠤᠨ ᠤ ᠬᠥᠪᠴᠢ ᠨᠢ ᠠᠮᠢᠰᠬᠤᠯ ᠤᠨ ᠬᠡᠢ ᠭᠠᠳᠠᠭᠰᠢ ᠭᠠᠷᠬᠤ ᠬᠦᠴᠦᠨ ᠳᠤ ᠴᠡᠴᠡᠷᠡᠨ ᠬᠡᠯᠪᠡᠯᠵᠡᠵᠦ ᠳᠠᠭᠤᠨ ᠭᠠᠷᠤᠨ᠎ᠠ᠃ ᠡᠭᠦᠨ ᠳᠤ ᠬᠡᠦᠬᠡᠳ ᠡᠬᠡ ᠠᠴᠠ ᠲᠥᠷᠥᠵᠦ ᠭᠠᠷᠤᠩᠭᠤᠲᠠ ᠪᠠᠷᠬᠢᠷᠠᠬᠤ ᠳᠠᠭᠤᠨ ᠪᠣᠯ ᠬᠥᠮᠥᠨ ᠤ ᠬᠥᠭᠡᠮᠡᠢ ᠠᠴᠠ ᠭᠠᠷᠬᠤ ᠠᠩᠬᠠᠨ ᠤ ᠳᠠᠭᠤ ᠪᠣᠯᠣᠨ᠎ᠠ᠃ ᠬᠥᠮᠥᠨ ᠤ ᠬᠥᠭᠡᠮᠡᠢ ᠪᠣᠯ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠢ ᠳᠠᠭᠤᠨ ᠭᠠᠷᠭᠠᠵᠤ᠂ ᠦᠭᠡ ᠬᠡᠯᠡᠳᠡᠭ ᠣᠨᠴᠠᠯᠢᠭ ᠲᠠᠢ ᠪᠣᠯᠭᠠᠭᠰᠠᠨ ᠡᠷᠬᠡᠲᠡᠨ ᠪᠥᠭᠡᠳ ᠬᠥᠮᠥᠨ ᠤ ᠲᠠᠷᠢᠬᠢᠨ ᠤ ᠬᠥᠭᠵᠢᠯᠲᠡ ᠶᠢᠨ ᠳᠠᠭᠠᠤ ᠬᠡᠦᠬᠡᠳ ᠬᠡᠯᠡᠨ ᠳᠤ ᠣᠷᠣᠬᠤ᠂ ᠬᠥᠯ ᠳᠤ ᠣᠷᠣᠬᠤ ᠠᠴᠠ ᠡᠬᠢᠯᠡᠨ ᠬᠥᠮᠥᠨ ᠪᠣᠯᠬᠤ ᠪᠥᠬᠦ ᠶᠠᠪᠤᠴᠠ ᠳᠤ ᠲᠠᠷᠢᠬᠢᠨ ᠤ ᠬᠥᠷᠥᠰᠥᠨ ᠳᠠᠪᠬᠤᠷᠭ᠎ᠠ ᠶᠢᠨ ᠠᠵᠢᠯᠯᠠᠭᠠᠨ ᠳᠤ ᠬᠠᠮᠢᠶᠠᠷᠤᠭᠳᠠᠨ᠎ᠠ᠃ ᠬᠥᠮᠥᠨ ᠤ ᠬᠥᠭᠡᠮᠡᠢ ᠠᠴᠠ ᠭᠠᠷᠬᠤ ᠠᠩᠬᠠᠨ ᠤ ᠳᠠᠭᠤ ᠪᠣᠯ ᠡᠭᠡᠰᠢᠭ ᠤᠨ ᠰᠢᠨᠵᠢᠲᠡᠢ ᠪᠠᠷᠬᠢᠷᠠᠬᠤ ᠠᠪᠢᠶ᠎ᠠ ᠪᠠᠶᠢᠳᠠᠭ ᠪᠣᠯ ᠬᠤᠶᠢᠰᠢᠳᠠ ᠲᠡᠷᠡ ᠨᠢ ᠠᠪᠢᠶᠠᠯᠠᠪᠤᠷᠢ ᠶᠢᠨ ᠦᠢᠯᠡᠳᠦᠯ ᠢᠶᠠᠷ ᠭᠡᠶᠢᠭᠦᠯᠦᠭᠴᠢ ᠶᠢᠨ ᠰᠢᠨᠵᠢᠲᠡᠢ ᠠᠪᠢᠶ᠎ᠠ ᠨᠡᠮᠡᠭᠳᠡᠵᠦ ᠶᠠᠮᠠᠷ ᠨᠢᠭᠡ ᠬᠡᠯᠡ ᠪᠠᠷ ᠨᠢᠭᠤᠷ ᠴᠢᠷᠠᠢ ᠶᠢᠨ ᠢᠯᠡᠷᠡᠯ᠂ ᠭᠠᠷ ᠬᠥᠯ ᠤᠨ ᠬᠥᠳᠡᠯᠭᠡᠭᠡᠨ ᠤ ᠳᠦᠷᠢ ᠢᠶᠠᠨ ᠬᠠᠷᠠᠯᠴᠠᠨ ᠪᠠᠶᠢᠵᠤ ᠦᠭᠡ ᠬᠡᠯᠡᠯᠴᠡᠨ ᠳᠤᠤᠭᠠᠷᠠᠯᠳᠤᠵᠦ ᠴᠢᠳᠠᠳᠠᠭ ᠣᠶᠣᠨ ᠤ ᠬᠠᠷᠢᠯᠴᠠᠭᠠᠨ ᠤ ᠪᠠᠭᠠᠵᠢ ᠪᠣᠯᠳᠠᠭ ᠪᠠᠶᠢᠨ᠎ᠠ᠃       ᠬᠥᠮᠥᠨ ᠤ ᠬᠥᠭᠡᠮᠡᠢ ᠶᠢᠨ ᠳᠠᠭᠤ ᠶᠢ ᠦᠭᠡ ᠶᠠᠷᠢᠶᠠᠨ ᠤ ᠳᠠᠭᠤ ᠪᠣᠯᠣᠨ ᠳᠠᠭᠤᠤ ᠳᠠᠭᠤᠯᠠᠬᠤ ᠳᠠᠭᠤᠨ ᠭᠡᠵᠦ ᠬᠤᠶᠠᠷ ᠬᠤᠪᠢᠶᠠᠵᠤ ᠪᠣᠯᠣᠨ᠎ᠠ᠃ ᠳᠠᠭᠤᠨ ᠤ ᠰᠢᠨᠵᠢ ᠴᠢᠨᠠᠷ ᠨᠢ ᠳᠠᠭᠤᠨ ᠤ ᠬᠥᠪᠴᠢ ᠶᠢᠨ ᠤᠷᠲᠤ ᠪᠣᠭᠤᠨᠢ ᠶᠢᠨ ᠬᠡᠮᠵᠢᠶ᠎ᠡ᠂ ᠡᠷ᠎ᠡ ᠡᠮ᠎ᠡ ᠨᠠᠰᠤᠨ ᠤ ᠢᠯᠭᠠᠭ᠎ᠠ ᠵᠡᠷᠭᠡ ᠠᠴᠠ ᠪᠣᠯᠵᠤ ᠴᠢᠩᠭ᠎ᠠ ᠰᠤᠯᠠ᠂ ᠥᠳᠬᠡᠨ ᠰᠢᠩᠭᠡᠨ ᠪᠠ ᠳᠠᠭᠤᠨ ᠤ ᠥᠩᠭᠡ ᠨᠢ ᠠᠳᠠᠯᠢ ᠦᠭᠡᠢ ᠪᠣᠯᠣᠨ ᠬᠤᠪᠢᠷᠠᠳᠠᠭ᠃ ᠡᠷᠡᠭᠲᠡᠢ ᠶᠢᠨ ᠳᠠᠭᠤᠨ ᠤ ᠬᠡᠯᠪᠡᠯᠵᠡᠯᠲᠡ ᠰᠧᠺᠦ᠋ᠨᠲ ᠪᠥᠷᠢ ᠳᠤ 120 ᠣᠷᠴᠢᠮ ᠪᠠᠶᠢᠬᠤ ᠳᠤ ᠡᠮᠡᠭᠲᠡᠢ ᠶᠢᠨ ᠬᠢᠨᠢ 240 ᠬᠢᠷᠢᠲᠡᠢ ᠪᠠᠶᠢᠨ᠎ᠠ᠃ ᠶᠡᠷᠦᠩᠬᠡᠢ ᠳᠡᠭᠡᠨ ᠬᠥᠮᠥᠨ ᠤ ᠳᠠᠭᠤᠨ ᠤ ᠬᠡᠯᠪᠡᠯᠵᠡᠯᠲᠡ ᠨᠢ 1200᠎ ᠠᠴᠠ 80᠎ ᠶᠢᠨ ᠬᠤᠭᠤᠷᠣᠨᠳᠤ ᠪᠠᠶᠢᠳᠠᠭ ᠪᠠᠶᠢᠨ᠎ᠠ᠃ ᠴᠢᠬᠢᠨ ᠳᠤ ᠰᠣᠨᠣᠰᠳᠠᠵᠤ ᠪᠣᠯᠬᠤ ᠠᠯᠢᠪᠠ ᠳᠠᠭᠤᠨ ᠤ ᠬᠡᠯᠪᠡᠯᠵᠡᠯᠲᠡ ᠨᠢ ᠰᠧᠺᠦ᠋ᠨᠲ ᠪᠦᠷᠢ ᠳᠤ 20᠎ ᠠᠴᠠ 20000᠎ ᠶᠢᠨ ᠬᠤᠭᠤᠷᠣᠨᠳᠤ ᠪᠠᠶᠢᠳᠠᠭ᠃ ᠠᠭᠤᠰᠬᠢᠨ ᠠᠮᠢᠰᠬᠤᠯᠲᠤ ᠠᠳᠤᠭᠤᠰᠤᠨ ᠠᠮᠢᠲᠠᠨ ᠬᠡᠳᠦᠶᠢᠪᠡᠷ ᠬᠥᠭᠡᠮᠡᠢ ᠲᠠᠢ ᠪᠣᠯᠪᠠᠴᠤ ᠦᠭᠡ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠲᠤᠯᠠ ᠳᠤᠤᠭᠠᠷᠬᠤ ᠳᠠᠭᠤᠨ ᠤ ᠠᠪᠢᠶ᠎ᠠ ᠠᠳᠠᠯᠢ ᠦᠭᠡᠢ ᠪᠠᠶᠢᠨ᠎ᠠ᠃ ᠵᠢᠱᠢᠶᠡᠯᠡᠪᠡᠯ᠄ ᠦᠬᠡᠷ ᠮᠥᠭᠡᠷᠡᠬᠦ᠂ ᠠᠳᠤᠭᠤ ᠢᠨᠴᠠᠭᠠᠬᠤ᠂ ᠬᠤᠨᠢ ᠢᠮᠠᠭ᠎ᠠ ᠮᠠᠶᠢᠯᠠᠬᠤ᠂ ᠲᠡᠮᠡᠭᠡ ᠪᠣᠶᠢᠯᠠᠬᠤ᠂ ᠨᠣᠬᠠᠢ ᠬᠤᠴᠠᠬᠤ᠂ ᠴᠢᠨ᠋ᠸ᠎ᠠ ᠣᠯᠢᠬᠤ ᠭᠡᠵᠦ ᠮᠣᠩᠭᠤᠯ ᠢᠶᠠᠷ ᠢᠯᠭᠠᠭ᠎ᠠ ᠲᠠᠢ ᠬᠡᠯᠡᠳᠡᠭ ᠪᠢᠯᠡ᠃       ᠬᠥᠭᠡᠮᠡᠢ ᠪᠠᠷ ᠢᠶᠠᠨ ᠬᠥᠭᠡᠮᠡᠶᠢᠯᠡᠵᠦ ᠮᠣᠩᠭᠤᠯ ᠣᠷᠳᠣ ᠶᠢᠨ ᠳᠠᠭᠤᠤ᠂ ᠪᠡᠭᠡᠵᠢᠩ ᠰᠢ᠂ ᠡᠸᠦ᠋ᠷᠦᠫᠡ ᠶᠢᠨ ᠣᠫᠧᠷᠡ ᠳᠠᠭᠤᠷᠢ᠂ ᠶᠠᠫᠤᠨ ᠤ ᠺᠠᠷᠠ ᠤᠺᠧ ᠵᠡᠷᠭᠡ ᠶᠢ ᠶᠠᠮᠠᠷ ᠬᠡᠯᠡ ᠪᠠᠷ ᠳᠠᠭᠤᠯᠠᠭᠰᠠᠨ ᠴᠦ ᠳᠠᠭᠤ ᠠᠪᠢᠶ᠎ᠠ ᠪᠦᠬᠦᠨ ᠤ ᠣᠨᠴᠠᠯᠢᠭ ᠤᠳ ᠨᠢ ᠭᠤᠤᠯᠳᠠᠭᠤ ᠠᠮᠢᠰᠬᠤᠯ ᠤᠨ ᠬᠡᠢ ᠶᠢᠨ ᠲᠦᠷᠢᠯᠲᠡ ᠰᠢᠬᠠᠯᠲᠠ ᠶᠢᠨ ᠬᠦᠴᠦ᠂ ᠳᠠᠭᠤᠨ ᠤ ᠬᠥᠪᠴᠢ ᠶᠢᠨ ᠴᠡᠴᠡᠷᠡᠬᠦ ᠬᠡᠯᠪᠡᠯᠵᠡᠯᠲᠡ᠂ ᠥᠷᠥᠴᠡ᠂ ᠬᠠᠴᠠᠷ᠂ ᠠᠮᠠ᠂ ᠣᠷᠣᠭᠤᠯ᠂ ᠬᠡᠯᠡ᠂ ᠬᠡᠦᠬᠡᠨ ᠬᠡᠯᠡ᠂ ᠬᠤᠭᠤᠯᠠᠢ᠂ ᠬᠦᠵᠦᠭᠦᠦ᠂ ᠴᠡᠭᠡᠵᠢ᠂ ᠬᠠᠪᠢᠷᠭ᠎ᠠ᠂ ᠨᠢᠷᠤᠭᠤ᠂ ᠬᠥᠯ ᠬᠦᠷᠲᠡᠯᠡᠬᠢ ᠲᠣᠮᠣ ᠵᠢᠵᠢᠭ ᠣᠯᠠᠨ ᠪᠤᠯᠴᠢᠩ ᠰᠢᠷᠪᠦᠰᠦ ᠨᠦᠭᠦᠳ ᠤᠨ ᠰᠤᠩᠬᠤ ᠠᠭᠰᠢᠬᠤ᠂ ᠰᠤᠯᠠᠳᠬᠤ ᠶᠢᠨ ᠴᠢᠩᠭᠠᠷᠠᠬᠤ ᠬᠥᠳᠡᠯᠭᠡᠭᠡᠨ ᠪᠣᠯᠣᠨ ᠠᠮᠠ᠂ ᠬᠠᠮᠠᠷ᠂ ᠬᠤᠭᠤᠯᠠᠢ ᠶᠢᠨ ᠬᠥᠨᠳᠡᠢ ᠶᠢᠨ ᠴᠤᠤᠷᠢᠶᠠᠳᠤᠯᠭ᠎ᠠ ᠳᠤ ᠨᠥᠯᠥᠭᠡᠯᠡᠭᠳᠡᠳᠡᠭ ᠤᠴᠢᠷ ᠪᠦᠬᠦᠯᠢ ᠪᠡᠶ᠎ᠡ ᠶᠢᠨ ᠴᠢᠨᠠᠷᠲᠠᠢ ᠠᠵᠢᠯᠯᠠᠭ᠎ᠠ ᠣᠷᠣᠯᠴᠠᠭᠰᠠᠨ ᠳᠠᠭᠤ ᠭᠠᠷᠭᠠᠵᠤ ᠳᠠᠭᠤᠯᠠᠳᠠᠭ ᠪᠠᠶᠢᠨ᠎ᠠ᠃ ᠡᠭᠦᠨ ᠳᠤ ᠲᠠᠷᠢᠬᠢᠨ ᠤ ᠮᠡᠳᠡᠷᠡᠯ ᠤᠨ ᠰᠢᠰᠲ᠋ᠧᠮ ᠳᠠᠭᠤᠨ ᠤ ᠹᠢᠽᠢᠯᠤᠯᠤᠬᠢ ᠶᠢᠨ ᠲᠠᠯ᠎ᠠ ᠪᠠᠷ ᠬᠥᠭᠡᠮᠡᠢ ᠶᠢᠨ ᠡᠷᠡᠭᠦᠯ ᠠᠬᠤᠢ ᠶᠢᠨ ᠬᠢᠨᠠᠯᠲᠠ ᠲᠠᠢ ᠬᠤᠭᠤᠯᠠᠢ ᠶᠢᠨ ᠠᠶ᠎ᠠ ᠶᠢ ᠲᠣᠬᠢᠷᠠᠭᠤᠯᠤᠨ ᠵᠠᠰᠠᠵᠤ ᠳᠠᠭᠤᠯᠠᠬᠤ᠂ ᠶᠠᠷᠢᠬᠤ ᠤᠷ᠎ᠠ ᠮᠡᠷᠭᠡᠵᠢᠯ ᠢ ᠠᠰᠢᠭᠯᠠᠨ ᠬᠡᠷᠡᠭᠯᠡᠬᠦ ᠪᠣᠯᠪᠠᠰᠤᠷᠠᠯ ᠲᠠᠢ ᠪᠣᠯᠬᠤ ᠨᠢ ᠴᠢᠬᠤᠯᠠ ᠪᠠᠶᠢᠨ᠎ᠠ᠃         ᠨᠣᠮ ᠵᠣᠬᠢᠶᠠᠯ᠄       ① ︽ᠬᠤᠷᠢᠨ ᠨᠢᠭᠡᠲᠦ ᠲᠠᠶᠢᠯᠪᠤᠷᠢ ᠲᠣᠯᠢ︾᠂ ᠥ᠊ ᠮᠣ ᠶᠠ᠊ ᠰᠤ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ᠂ 1979 ᠣᠨ᠃       ② ᠭ᠊ · ᠷᠠᠰᠢᠰᠡᠷᠡᠩ᠄ ︽ᠣᠶᠣᠨ ᠢ ᠲᠣᠳᠣᠷᠠᠭᠤᠯᠤᠭᠴᠢ ᠡᠷᠳᠡᠨᠢ ᠲᠣᠯᠢ︾᠂ ᠥ᠊ ᠮᠣ ᠶᠠ᠊ ᠰᠤ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ᠃       ③ ︽人体解剖学名词︾ 科学出版社，一九九一年．       ④STEDMANS MEDICAL DICTIONARY ZNDEDITION.ENGLISH-JAPANESE.1958.MEDICALVIEW CO.TOKYO.       ⑤B.H.T оll к о B :Улебник Анатомии Человека,Т.1.1953,МЕД-гиз.ленинград.       ⑥ ᠢ᠊ · ᠴᠠᠪᠠᠯ᠄ ︽ᠮᠣᠩᠭᠤᠯ ᠬᠡᠯᠡᠨ ᠤ ᠲᠣᠪᠴᠢ ᠲᠠᠶᠢᠯᠪᠤᠷᠢ ᠲᠣᠯᠢ︾᠂ ᠤᠯᠠᠭᠠᠨᠪᠠᠭᠠᠲᠤᠷ᠂ 1966 ᠣᠨ᠃       ⑦ ︽ᠮᠣᠩᠭᠤᠯ ᠬᠡᠯᠡᠨ ᠤ ᠲᠣᠯᠢ︾᠂ ᠥ᠊ ᠮᠣ ᠠ᠊ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ᠂ 1999 ᠣᠨ ᠃       ⑧ ︽多变速器　对照语言学词汇（英法德俄汉）︾ 北京语言学院出版社，一九九八年．   
  
ᠢᠷᠡᠯᠲᠡ᠄ ︽ᠮᠤᠩᠭᠤᠯ ᠬᠡᠯᠡ ᠪᠢᠴᠢᠭ︾ ᠰᠡᠳᠬᠦᠯ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号