ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠹ᠊᠂ ᠴᠢᠮᠡᠭ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/6/9
        ᠦᠪᠤᠷ ᠮᠤᠩᠭᠤᠯ ᠤᠨ ᠤᠳᠬ᠎ᠠ ᠵᠤᠬᠢᠶᠠᠯ ᠤᠨ ᠲᠠᠶᠢᠵᠠᠨ ᠲᠡᠭᠡᠷ᠎ᠡ ᠴᠤᠯᠭᠤᠷᠠᠨ ᠭᠠᠷᠤᠭᠰᠠᠨ ᠰᠢᠯᠦᠭᠴᠢᠨ ᠤ ᠨᠢᠬᠡ ᠪᠤᠯᠬᠤ ᠹ᠊᠂ ᠴᠢᠮᠡᠭ 1943 ᠤᠨ ᠳᠤ ᠬᠡᠰᠢᠭᠳᠡᠨ ᠬᠤᠰᠢᠭᠤᠨ ᠤ ᠵᠡᠬᠦᠨ ᠠᠷᠤ ᠨᠤᠳᠤᠭ ᠤᠨ ᠬᠤᠰᠤᠳᠠᠢ ᠠᠶᠢᠯ ᠤᠨ ᠮᠠᠯᠴᠢᠨ ᠹᠦᠮᠢᠩᠬᠡ ᠶᠢᠨ ᠤᠤᠭᠠᠨ ᠦᠬᠢᠨ ᠨᠢ ᠪᠤᠯᠤᠨ ᠵᠠᠶᠠᠭᠠᠵᠠᠢ᠃ ᠬᠠᠷᠠᠬᠠᠨ ᠪᠠᠭ᠎ᠠ ᠨᠠᠰᠤᠨ ᠳᠤᠨᠢ ᠬᠡᠰᠢᠭᠳᠡᠨ ᠬᠤᠰᠢᠭᠤᠨ ᠤ ᠲᠠᠮᠠᠭᠠᠨ ᠵᠠᠯᠠᠨ ᠪᠠᠶᠢᠭᠰᠠᠨ ᠨᠠᠭᠠᠴᠤ ᠡᠪᠦᠭᠡ ᠬᠠᠰᠪᠠᠽᠠᠷ᠂ ᠨᠠᠭᠠᠴᠤ ᠡᠵᠢ ᠬᠡᠷᠡᠯ᠎ᠡ ᠨᠢ ᠦᠷᠡᠴᠢᠯᠡᠨ ᠲᠡᠵᠢᠬᠡᠵᠠᠢ᠃       ᠹ᠊᠂ ᠴᠢᠮᠡᠭ ᠪᠠᠭ᠎ᠠ ᠠᠴᠠ ᠪᠠᠨ ᠨᠠᠭᠠᠴᠤ ᠡᠵᠢ ᠪᠤᠯᠤᠨ ᠨᠠᠭᠠᠴᠤ ᠡᠪᠦᠭᠡ ᠶᠢᠨ ᠢᠶᠠᠨ ᠶᠠᠷᠢᠭᠰᠠᠨ ᠠᠯᠢ ᠤᠯᠠᠨ ᠰᠤᠨᠢᠨ ᠭᠠᠶᠢᠬᠠᠮᠰᠢᠭᠳᠤ ᠦᠯᠢᠬᠡᠷ ᠲᠤᠮᠤᠭ᠂ ᠠᠷᠠᠳ ᠤᠨ ᠲᠠᠭᠤᠤ᠂ ᠤᠨᠢᠰᠤᠭ᠎ᠠ ᠁  ᠎ ᠨᠤᠭᠤᠳ ᠢ ᠴᠡᠬᠡᠵᠢᠯᠡᠨ ᠠᠪᠳᠠᠭ ᠪᠠᠶᠢᠵᠠᠢ᠃ ︽ᠮᠢᠨᠤ ᠮᠠᠭᠤ ᠦᠬᠢᠨ ᠨᠢᠬᠡ ᠶᠠᠭᠤᠮ᠎ᠠ ᠪᠤᠯᠬᠤ ᠶᠤᠮ ᠳ᠋ᠠ︾ ᠬᠡᠵᠤ ᠨᠠᠭᠠᠴᠤ ᠡᠵᠢ ᠨᠢ ᠦᠷᠬᠦᠯᠵᠢ ᠶᠠᠷᠢᠳᠠᠭ ᠪᠠᠶᠢᠭᠰᠠᠨ ᠪᠦᠬᠡᠳ ᠴᠢᠳᠠᠯ ᠢᠶᠠᠨ ᠰᠢᠪᠬᠠᠨ ᠴᠢᠮᠡᠭ ᠢ ᠰᠤᠶᠤᠯ ᠡᠷᠳᠡᠮ ᠤᠨ ᠵᠠᠮ ᠤᠷᠤᠭᠤ ᠬᠦᠳᠦᠯᠵᠠᠢ᠃       ᠬᠦᠳᠡᠭᠡ ᠨᠤᠳᠤᠭ ᠲᠤ ᠲᠦᠷᠦᠵᠤ ᠦᠰᠦᠭᠰᠡᠨ ᠹ᠊᠂ ᠴᠢᠮᠡᠭ ᠬᠦᠴᠢᠷ ᠪᠡᠷᠬᠡᠰᠢᠶᠡᠯ ᠢ ᠲᠠᠰᠪᠤᠷᠢᠯᠡᠨ ᠬᠠᠳᠠᠭᠤᠵᠢᠯᠳᠠᠢ ᠰᠤᠷᠤᠯᠴᠠᠵᠤ᠂ 1968 ᠤᠨ ᠳᠤ ᠦᠪᠤᠷ ᠮᠤᠩᠭᠤᠯ ᠤᠨ ᠪᠠᠭᠰᠢ ᠶᠢᠨ ᠲᠠᠭᠡᠳᠤ ᠰᠤᠷᠭᠠᠭᠤᠯᠢ ᠶᠢᠨ ᠮᠤᠩᠭᠤᠯ ᠬᠡᠯᠡ ᠤᠳᠬ᠎ᠠ ᠵᠤᠬᠢᠶᠠᠯ ᠤᠨ ᠰᠠᠯᠪᠤᠷᠢ ᠠᠴᠠ ᠰᠤᠷᠤᠯᠭ᠎ᠠ ᠲᠡᠬᠦᠰᠴᠠᠢ᠃       ᠹ᠊᠂ ᠴᠢᠮᠡᠭ ᠬᠤᠷᠢᠨ ᠬᠡᠳᠤᠨ ᠵᠢᠯ ᠤᠨ ᠲᠤᠳᠤᠷ᠎ᠠ ᠦᠪᠡᠷᠮᠢᠴᠠ ᠤᠨᠴᠠᠯᠢᠭ ᠪᠦᠬᠦᠢ ᠰᠢᠯᠦᠭ᠂ ᠨᠠᠶᠢᠷᠠᠭᠤᠯᠤᠯ ᠤᠳ ᠢ ᠪᠢᠴᠢᠵᠤ ᠨᠡᠶᠢᠳᠡᠯᠡᠬᠡᠳ᠂ ᠤᠯᠤᠰ ᠤᠨ ᠲᠤᠳᠤᠭᠠᠳᠤ ᠭᠠᠳᠠᠭᠠᠳᠤ ᠶᠢᠨ ᠤᠩᠰᠢᠭᠴᠢᠳ ᠤᠨ ᠰᠤᠨᠢᠷᠬᠠᠯ ᠪᠠᠭ᠋ᠠᠷᠬᠠᠯ ᠢ ᠲᠠᠳᠠᠭᠰᠠᠨ ᠶᠤᠮ᠃ ᠲᠡᠬᠦᠨ ᠤ ᠪᠢᠴᠢᠭᠰᠡᠨ ᠬᠤᠶᠠᠷ ᠵᠠᠭᠤ ᠭᠠᠷᠤᠢ ᠰᠢᠯᠦᠭ ᠤᠨ ᠬᠠᠭᠠᠰ ᠨᠢ ᠨᠤᠳᠤᠭ ᠤᠰᠤ — ᠮᠤᠩᠭᠤᠯ ᠡᠬᠡ ᠤᠷᠤᠨ ᠢᠶᠠᠨ ᠪᠢᠯᠬᠠᠮ᠎ᠠ ᠴᠠᠯᠬᠢᠮ᠎ᠠ ᠰᠡᠳᠬᠢᠯᠬᠡ ᠪᠠᠷ ᠤᠶᠠᠩᠭᠠᠯᠠᠨ ᠲᠠᠭᠤᠯᠠᠭᠰᠠᠨ ᠠᠭᠤᠯᠭ᠎ᠠ ᠲᠠᠢ ᠪᠠᠶᠢᠨ᠎ᠠ᠃       ᠲᠡᠷᠡ ︽ᠲᠠᠯᠠᠢ — ᠨᠠᠭᠤᠷ︾ ᠬᠡᠬᠦ ᠰᠢᠯᠦᠭ ᠲᠡᠭᠡᠨ᠄       ᠰᠠᠶᠢᠬᠠᠨ ᠲᠤᠩᠭᠠᠯᠠᠭ ᠬᠡᠰᠢᠭᠳᠡᠨ ᠲᠠᠯᠠᠢ       ᠰᠦ ᠪᠠᠷ ᠢᠪᠢᠯᠦᠭᠰᠡᠨ ᠡᠵᠢ ᠮᠢᠨᠢ ᠳ᠋ᠠ       ᠡᠷᠳᠡᠨᠢ ᠪᠢᠯᠬᠠᠮ᠎ᠠ ᠡᠨᠡ ᠨᠠᠭᠤᠷ       ᠡᠬᠡ ᠨᠤᠳᠤᠭ ᠤᠨ ᠮᠢᠨᠢ ᠬᠡᠰᠢᠭ ᠨᠢ ᠳ᠋ᠠ       ᠲᠦᠪᠰᠢᠨ ᠵᠢᠷᠭᠠᠯᠳᠤ ᠲᠠᠯ᠎ᠠ ᠶᠢᠨ ᠢᠶᠠᠨ       ᠬᠡᠷᠡᠯ ᠰᠠᠳᠠᠷᠠᠭᠰᠠᠨ ᠰᠤᠪᠤᠳ ᠨᠢ ᠶᠤᠮ       ᠲᠦᠮᠡᠨ ᠤᠯᠠᠨ ᠠᠷᠠᠳ ᠤᠨ ᠢᠶᠠᠨ       ᠦᠷᠯᠦᠭ ᠲᠠᠬᠢᠨᠢ ᠡᠬᠡ ᠨᠢ ᠶᠤᠮ       ᠪᠤᠰᠤᠭ᠎ᠠ ᠮᠦᠩᠬᠦᠨ ᠲᠠᠪᠠᠯᠭᠠᠨ ᠨᠢ       ᠪᠤᠶᠠᠨ ᠬᠤᠷᠢᠶᠠᠭᠰᠠᠨ ᠲᠠᠯᠠᠯᠭ᠎ᠠ ᠶᠤᠮ       ᠪᠤᠴᠠᠭᠠᠳ ᠱᠤᠤᠬᠢᠬᠤ ᠲᠠᠪᠢᠷᠠᠭᠠᠨ ᠨᠢ       ᠪᠦᠤᠪᠠᠢ ᠶᠢᠨ ᠲᠠᠭᠤᠨ ᠤ ᠡᠬᠡᠰᠢᠭ ᠶᠤᠮ       ᠠᠳᠠ ᠪᠢ ᠡᠰᠨᠢᠨ ᠲᠦᠷᠦᠵᠤ       ᠡᠯᠡᠰᠤ ᠶᠢ ᠨᠢ ᠬᠢᠰᠬᠢᠵᠤ ᠬᠦᠯ ᠳᠤ ᠤᠷᠤᠭᠰᠠᠨ       ᠁  ᠁  ᠁       ᠬᠡᠵᠤ ᠲᠠᠯᠠᠢ ᠨᠠᠭᠤᠷ ᠤᠨ ᠢᠶᠠᠨ ᠬᠠᠵᠠᠭᠤ ᠡᠷᠬᠢ ᠳᠤᠨᠢ ᠪᠠᠶᠢᠭ᠎ᠠ ᠰᠢᠭ᠋ ᠬᠦᠭᠵᠢᠮᠯᠢᠭ᠂ ᠤᠶᠠᠷᠠᠭᠤᠨ ᠪᠦᠰᠡᠬᠦᠢ ᠬᠦᠮᠦᠨ ᠤ ᠰᠡᠳᠬᠢᠯ ᠢᠶᠠᠷ ᠪᠢᠴᠢᠵᠠᠢ᠃       ᠹ᠊᠂ ᠴᠢᠮᠡᠭ ᠨᠢᠯᠬ᠎ᠠ ᠨᠢᠷᠠᠢ ᠤᠶᠤᠨ ᠢᠶᠠᠨ ᠨᠤᠳᠤᠭ ᠤᠨ ᠰᠠᠶᠢᠬᠠᠨ ᠦᠵᠡᠰᠬᠦᠯᠡᠩ ᠢᠶᠠᠷ ᠢᠶᠠᠨ ᠴᠢᠮᠠᠵᠤ᠂ ᠪᠠᠯᠴᠢᠷ ᠪᠠᠭ᠎ᠠ ᠨᠠᠰᠤ ᠪᠠᠨ ᠨᠤᠳᠤᠭ ᠤᠨ ᠰᠢᠮ᠎ᠡ᠂ ᠵᠢᠮᠢᠰ ᠭᠤᠭᠤᠳ ᠢᠶᠠᠷ ᠢᠶᠠᠨ ᠲᠡᠵᠢᠬᠡᠵᠤ ᠦᠰᠦᠭᠰᠡᠨ ᠎ ᠢᠶᠠᠨ ᠲᠤᠶᠢᠯ ᠤᠨ ᠵᠤᠯ ᠵᠠᠪᠰᠢᠶᠠᠨ ᠬᠡᠵᠤ ᠦᠵᠡᠨ ᠵᠤᠷᠢᠭᠵᠢᠳᠠᠭ᠃       ᠹ᠊᠂ ᠴᠢᠮᠡᠭ ︽ᠦᠨᠳᠤᠰᠤᠳᠠᠨ ᠤ ᠪᠦᠯᠬᠦᠮᠳᠠᠯ︾ ᠰᠡᠳᠬᠦᠯ ᠳᠤ ᠨᠡᠶᠢᠳᠡᠯᠡᠬᠦᠯᠦᠭᠰᠡᠨ ᠨᠢᠬᠡ ᠨᠠᠶᠢᠷᠠᠭᠤᠯᠤᠯ ᠳᠠᠭᠠᠨ ︽᠁ ᠪᠢ ᠲᠡᠷᠡᠬᠦ ᠬᠢᠵᠠᠭᠠᠷ ᠦᠭᠡᠢ ᠨᠤᠭᠤᠭᠠᠨ ᠲᠠᠩᠬᠢᠰ ᠰᠢᠭ᠋ ᠬᠦᠩᠬᠡᠷ ᠤᠨ ᠲᠠᠯ᠎ᠠ ᠪᠠᠨ ᠪᠠᠷᠠᠯᠠᠵᠤ ᠠᠩᠬᠠᠨ ᠤ ᠬᠠᠷᠠᠭ᠎ᠠ ᠪᠠᠨ ᠲᠡᠯᠡᠭᠰᠡᠨ ᠶᠤᠮ᠃ ᠲᠡᠷᠡᠬᠦ ᠰᠠᠶᠢᠬᠠᠨ ᠬᠡᠬᠡᠨᠴᠢᠷ ᠨᠤᠪ ᠨᠤᠭᠤᠭᠠᠨ ᠦᠩᠬᠡ ᠨᠠᠮᠠᠢᠢ ᠬᠦᠳᠦᠯᠦᠨ ᠠᠮᠢᠳᠤᠷᠠᠯ ᠢ ᠲᠠᠨᠢᠯᠴᠠᠭᠤᠯᠵᠤ ᠰᠤᠷᠭᠤᠭ ᠰᠡᠴᠡᠨ ᠤᠬᠠᠭᠠᠨ ᠰᠠᠨᠠᠭ᠎ᠠ᠂ ᠠᠯᠤᠰ ᠬᠡᠳᠤ ᠶᠢᠨ ᠵᠤᠷᠢᠯᠳᠠ᠂ ᠠᠮᠢᠯᠠᠯ ᠮᠠᠨᠳᠤᠯ ᠤᠨ ᠲᠡᠯᠬᠡᠷ ᠰᠠᠶᠢᠬᠠᠨ ᠢᠷᠡᠬᠡᠳᠤᠢ ᠶᠢ ᠲᠡᠯᠬᠡᠨ ᠬᠦᠮᠦᠨ ᠤ ᠦᠷ᠎ᠡ ᠶᠢᠨ ᠬᠢᠵᠠᠭᠠᠷ ᠦᠭᠡᠢ ᠶᠡᠭᠡ ᠬᠦᠰᠡᠯᠡᠩ ᠵᠦᠭ ᠬᠦᠳᠦᠯᠳᠡᠭ ᠪᠠᠶᠢᠭᠰᠠᠨ ᠡ ᠁︾ ᠬᠡᠵᠤ ᠦᠪᠡᠷ ᠤᠨ ᠠᠯᠢᠪᠠ ᠪᠠᠨ ᠪᠦᠷ ᠡᠬᠡ ᠨᠤᠳᠤᠭ ᠤᠨ ᠢᠪᠡᠬᠡᠯ ᠠᠴᠢᠯᠠᠯ ᠬᠡᠵᠤ ᠰᠢᠭᠤᠳ ᠲᠤᠷᠠᠳᠬᠤ ᠬᠡᠯᠪᠡᠷᠢ ᠪᠠᠷ ᠪᠢᠴᠢᠭᠰᠡᠨ ᠨᠢ ᠲᠡᠬᠦᠨ ᠤ ᠲᠦᠷᠦᠭᠰᠡᠨ ᠨᠤᠳᠤᠭ ᠲᠠᠭᠠᠨ ᠬᠡᠴᠢᠨᠡᠨ ᠬᠦᠨ ᠬᠦᠨᠵᠡᠬᠡᠢ ᠬᠠᠶᠢᠷ᠎ᠠ ᠰᠡᠳᠬᠢᠯᠬᠡ ᠲᠠᠢ ᠬᠡᠭᠴᠢ ᠶᠢ ᠲᠤᠳᠤ ᠬᠠᠷᠠᠭᠤᠯᠵᠠᠢ᠃       ᠹ᠊᠂ ᠴᠢᠮᠡᠭ ᠬᠦᠯᠦᠨ ᠪᠦᠢᠷ ᠨᠤᠳᠤᠭ ᠠᠴᠠ ︽ᠨᠤᠳᠤᠭ ᠤᠨ ᠰᠤᠯᠤᠩᠭ᠎ᠠ︾᠂ ︽ᠨᠤᠳᠤᠭ ᠎ ᠤᠨ ᠦᠳᠡᠰᠢ︾᠂ ︽ᠨᠤᠳᠤᠭ ᠤᠨ ᠦᠷᠯᠦᠬᠡ︾᠂ ︽ᠨᠤᠳᠤᠭ ᠤᠨ ᠰᠢᠬᠦᠳᠡᠷᠢ︾᠂ ︽ᠭᠤᠪᠢ ᠮᠢᠨᠢ︾᠂ ︽ᠪᠠᠶᠠᠨᠵᠢᠷᠦᠬᠡ ᠤᠪᠤᠭ᠎ᠠ︾᠂ ︽ᠲᠠᠷᠬᠠᠨ ᠠᠭᠤᠯᠠ ᠮᠢᠨᠢ︾᠂ ︽ᠲᠠᠯᠠᠢ ᠨᠠᠭᠤᠷ︾᠂ ︽ᠨᠤᠳᠤᠭ ᠲᠠᠭᠠᠨ ᠬᠦᠷᠬᠡᠬᠦ ᠲᠠᠭᠤᠤ︾᠂ ︽ᠨᠤᠳᠤᠭ ᠤᠨ ᠬᠦᠪᠡᠬᠦᠳ ᠲᠡᠭᠡᠨ︾᠂ ︽ᠮᠦᠩᠬᠡ ᠬᠦᠬᠡ ᠢᠷᠭᠤᠢ︾᠂ ︽ᠰᠢᠷ᠎ᠠ ᠶᠢᠨ ᠭᠤᠤᠯ ᠎ ᠤᠨ ᠪᠦᠰᠡᠬᠦᠢ︾ ᠬᠡᠬᠦ ᠮᠡᠳᠤ ᠲᠦᠷᠦᠭᠰᠡᠨ ᠨᠤᠳᠤᠭ ᠤᠨ ᠢᠶᠠᠨ ᠠᠭᠤᠯᠠ ᠤᠰᠤ ᠶᠢ ᠲᠤᠷᠠᠰᠤᠨ ᠰᠠᠨᠠᠵᠤ ᠪᠢᠴᠢᠭᠰᠡᠨ ᠰᠢᠯᠦᠭ ᠤᠳ ᠢ ᠨᠤᠳᠤᠭ ᠤᠰᠤ ᠪᠤᠯᠤᠨ ᠨᠤᠳᠤᠭ ᠤᠨ ᠠᠷᠠᠳ ᠲᠦᠮᠡᠨ ᠳᠡᠭᠡᠨ ᠪᠡᠯᠡᠭᠯᠡᠵᠡᠢ᠃       ᠹ᠊᠂ ᠴᠢᠮᠡᠭ ᠤᠨ ᠰᠢᠯᠦᠭ ᠤᠨ ᠤᠨᠴᠠᠯᠢᠭ ᠬᠡᠪᠡᠯ ᠤᠷᠤᠰᠤᠮ᠎ᠠ ᠢᠷᠡᠭᠤ ᠬᠡᠯᠡ ᠬᠡᠯᠡᠯᠬᠡ ᠲᠠᠢ᠂ ᠤᠶᠠᠷᠠᠭᠤᠨ᠂ ᠬᠦᠭᠵᠢᠮᠯᠢᠭ ᠠᠶᠢᠵᠢᠮ ᠴᠤᠬᠢᠯᠭ᠎ᠠ ᠲᠠᠢ᠂ ᠤᠳᠬ᠎ᠠ ᠰᠠᠨᠠᠭ᠎ᠠ ᠬᠤᠷᠴᠠ ᠲᠤᠳᠤ᠂ ᠰᠤᠳᠤᠨ ᠰᠠᠶᠢᠬᠠᠨ ᠪᠦᠬᠡᠳ ᠤᠩᠰᠢᠭᠴᠢ ᠶᠢᠨ ᠠᠩᠬᠠᠷᠤᠯ ᠢ ᠲᠠᠳᠠᠬᠤ ᠬᠦᠴᠦᠨ ᠲᠠᠢ ᠪᠠᠶᠢᠳᠠᠭ ᠶᠤᠮ᠃ ᠡᠶᠢᠮᠤ ᠴᠦ ᠤᠴᠢᠷ ᠠᠴᠠ ᠦᠷᠦᠴᠡ ᠵᠢᠷᠦᠬᠡᠨ ᠠᠴᠠ ᠨᠢ ᠠᠰᠬᠠᠯ ᠪᠤᠯᠠᠭ ᠰᠢᠭ᠋ ᠤᠨᠳᠤᠷᠴᠤ ᠪᠠᠶᠢᠭ᠎ᠠ ᠡᠨᠡᠬᠦ ᠡᠮᠡᠭᠳᠡᠢ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠰᠢᠯᠦᠭ ᠤᠩᠰᠢᠭᠴᠢᠳ ᠲᠤ ᠬᠦᠨ ᠬᠦᠨᠵᠡᠬᠡᠢ ᠰᠠᠭᠤᠭᠳᠠᠯ ᠦᠯᠡᠳᠡᠬᠡᠬᠦ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠴᠢᠨᠠᠭᠰᠢ ᠤᠷᠭᠤᠭᠤᠯᠤᠨ ᠪᠤᠳᠤᠬᠤ ᠤᠷᠤᠨ ᠵᠠᠢ ᠲᠠᠢ ᠪᠠᠶᠢᠳᠠᠭ ᠪᠢᠯᠡ᠃ ᠠᠳᠡ ᠨᠢᠬᠡ ᠵᠢᠱᠢᠶ᠎ᠠ ᠲᠠᠳᠠᠪᠠᠯ ︽ᠡᠵᠢ ᠶᠢᠨ ᠪᠤᠯᠠᠰᠢᠨ ᠲᠡᠭᠡᠷ᠎ᠡ︾ ᠬᠡᠬᠦ ᠤᠶᠠᠩᠭ᠎ᠠ ᠶᠢᠨ ᠤᠬᠤᠷ ᠰᠢᠯᠦᠭ ᠲᠡᠭᠡᠨ᠄       ᠠᠷᠪᠠᠨ ᠵᠢᠯ ᠤᠨ ᠰᠠᠮᠠᠭᠤᠷᠠᠯ ᠲᠤᠮᠳᠠ       ᠠᠳᠠᠭᠠᠳᠤᠨ ᠳᠤ ᠠᠳᠡᠭᠰᠡᠨ ᠡᠵᠢ ᠮᠢᠨᠢ       ᠮᠢᠬᠠᠰᠢᠵᠤ ᠪᠠᠶᠢᠭᠰᠠᠨ ᠮᠠᠩᠭᠤᠰ ᠤᠳ ᠤᠨ       ᠮᠦᠬᠦᠵᠤ ᠰᠦᠨᠦᠭᠰᠡᠨ ᠢ ᠮᠡᠳᠡᠭᠡ ᠪᠢᠵᠡ ᠁       ᠬᠡᠵᠤ ᠭᠠᠭᠴᠠᠬᠠᠨ ᠪᠠᠳᠠᠭ ᠢᠶᠠᠷ ᠠᠷᠪᠠᠨ ᠵᠢᠯ ᠤᠨ ᠭᠠᠮᠰᠢᠭ ᠤᠨ ᠭᠠᠢ ᠵᠤᠪᠠᠯᠠᠩ᠂ ᠡᠴᠤᠰ ᠎ ᠤᠨ ᠢᠯᠠᠭᠳᠠᠯ ᠢ ᠳ᠋ᠦᠩᠨᠡᠨ ᠴᠢᠳᠠᠵᠠᠢ᠃ ᠮᠦᠨ ᠴᠢᠨᠠᠭᠰᠢ ︽ᠴᠡᠴᠡᠭ ᠨᠠᠪᠴᠢ ᠶᠢᠨ ᠲᠡᠪᠢᠰᠬᠡᠷ ᠲᠠᠢ᠂ ᠴᠢᠨᠳᠠᠮᠤᠨᠢ ᠡᠷᠳᠡᠨᠢ ᠶᠢᠨ ᠲᠡᠷ᠎ᠡ ᠲᠠᠢ᠂ ᠨᠠᠷᠠᠨ ᠰᠠᠷᠠᠨ ᠬᠦᠨᠵᠢᠯᠠ ᠲᠠᠢ᠂ ᠨᠠᠯᠠᠭᠠᠷ ᠬᠦᠳᠡᠭᠡ ᠪᠠᠭᠤᠷᠢ ᠲᠠᠢ᠂ ᠡᠯᠳᠡᠩ ᠴᠡᠩᠬᠡᠷ ᠨᠤᠳᠤᠭ ᠤᠨ ᠢᠶᠠᠨ᠂ ᠠᠲᠺᠠᠷ ᠨᠠᠷᠠᠭᠤᠯ ᠭᠠᠵᠠᠷ ᠲᠤ᠂ ᠦᠷᠦᠬᠡᠰᠤᠨ ᠨᠢᠳᠤ ᠲᠠᠢ ᠯᠤᠶᠢᠪᠠᠷᠴᠢᠨ ᠢ᠂ ᠦᠯᠮᠡᠢ ᠲᠤᠤᠷ᠎ᠠ ᠎ ᠪᠠᠨ ᠲᠡᠪᠢᠰᠤᠨ ᠪᠠᠶᠢᠵᠤ ᠁︾ ᠬᠡᠵᠤ ᠤᠮᠤᠭ ᠰᠦᠷ᠂ ᠠᠭᠤᠷ ᠬᠢᠯᠢᠩ ᠲᠠᠢ ᠰᠢᠯᠦᠭᠯᠡᠨ ᠪᠢᠴᠢᠭᠰᠡᠨ ᠢᠶᠠᠨ ᠲᠡᠷᠡ ᠲᠤᠤᠷ᠎ᠠ ᠨᠢ ᠰᠢᠯᠦᠭ ᠤᠨ ᠦᠰᠦᠷᠤᠯᠳᠠ ᠭᠠᠷᠭᠠᠵᠤ᠄ ︽᠁ ᠬᠠᠨᠠᠭᠠᠷ ᠨᠤᠳᠤᠭ ᠤᠨ ᠢᠶᠠᠨ ᠢᠷᠭᠤᠢ ᠰᠢᠭ᠋ ᠂ ᠬᠠᠪᠤᠷ ᠬᠠᠪᠤᠷ ᠲᠡᠯᠬᠡᠷᠡᠨ ᠪᠠᠢ ᠡᠵᠢ ᠡ᠂ ᠬᠠᠳᠠᠭᠤ ᠵᠤᠷᠢᠭᠳᠤ ︿ᠲᠠᠯᠠᠨ ᠬᠡᠯᠡ﹀ ᠰᠢᠭ᠂ ᠬᠤᠷᠸ᠎ᠠ ᠳᠤ ᠲᠠᠩᠳᠠ ᠲᠤᠩᠭᠤᠳᠤᠨ ᠪᠠᠢ︕︾ ᠬᠡᠵᠤ ᠡᠵᠢ ᠪᠠᠨ ᠰᠠᠨᠠᠨ ᠮᠦᠷᠦᠬᠡᠳᠴᠤ ᠭᠠᠰᠢᠭᠤᠳᠠᠨ ᠬᠠᠷᠠᠤᠰᠠᠵᠤ ᠪᠠᠶᠢᠭ᠎ᠠ ᠬᠦᠮᠦᠨ ᠤ ᠦᠷ᠎ᠡ ᠶᠢᠨ ᠶᠡᠭᠡ ᠬᠠᠶᠢᠷ᠎ᠠ ᠪᠠᠨ ᠤᠶᠠᠩᠭᠠᠯᠠᠨ ᠪᠢᠴᠢᠵᠠᠢ᠃ ᠡᠨᠡ ᠰᠢᠯᠦᠭ ᠡᠳᠤᠢ ᠲᠡᠳᠤᠢ ᠤᠯᠠᠨ ᠬᠦᠮᠦᠨ ᠤ ᠰᠡᠳᠬᠢᠯ ᠤᠶᠤᠨ᠂ ᠰᠡᠷᠡᠯ ᠮᠡᠳᠡᠷᠡᠯ ᠳᠤ ᠬᠦᠨ ᠬᠦᠨᠵᠡᠬᠡᠢ ᠰᠠᠭᠤᠭᠳᠠᠯ ᠦᠭᠴᠤ ᠪᠤᠢ᠃ ᠡᠨᠡ ᠰᠢᠯᠦᠭ ᠪᠤᠯ ᠲᠡᠤᠬᠡᠨ ᠴᠠᠭ ᠦᠶ᠎ᠡ ᠶᠢ ᠲᠤᠰᠬᠠᠭᠰᠠᠨ᠂ ᠮᠤᠩᠭᠤᠯ ᠨᠤᠳᠤᠭ ᠤᠨ ᠨᠢᠬᠡ ᠪᠠᠳᠠᠭ ᠤᠶᠠᠷᠠᠯ ᠤᠨ ᠲᠠᠭᠤᠤ ᠪᠢᠯᠡ᠃       ᠹ᠊᠂ ᠴᠢᠮᠡᠭ ᠰᠢᠯᠦᠭ ᠨᠠᠶᠢᠷᠠᠭ ᠢ ᠤᠷᠠᠨ ᠤᠶᠠᠩᠭᠠᠯᠢᠭ ᠴᠢᠳᠠᠮᠠᠭᠠᠢ ᠰᠠᠶᠢᠬᠠᠨ ᠪᠢᠴᠢᠳᠡᠭ ᠢᠶᠠᠷ ᠦᠯᠤ ᠪᠠᠷᠠᠨ ᠦᠬᠦᠯᠡᠯᠬᠡ᠂ ᠨᠠᠶᠢᠷᠠᠭᠤᠯᠤᠯ᠂ ᠲᠧᠯᠸᠢᠰ ᠵᠦᠴᠦᠬᠡ ᠶᠢ ᠴᠦ ᠪᠢᠴᠢᠳᠡᠭ ᠶᠤᠮ᠃       ᠨᠢᠬᠡᠨ ᠵᠤᠬᠢᠶᠠᠯᠴᠢ ᠬᠦᠮᠦᠨ᠂ ᠦᠪᠡᠷ ᠤᠨ ᠰᠡᠳᠬᠢᠨ ᠪᠢᠴᠢᠭᠰᠡᠨ ᠵᠤᠬᠢᠶᠠᠯ ᠢᠶᠠᠨ ᠡᠬᠡ ᠤᠷᠤᠨ ᠤ ᠪᠠᠨ ᠡᠯᠢᠬᠡᠨ ᠲᠡᠭᠡᠷ᠎ᠡ ᠲᠡᠯᠬᠡᠬᠦ ᠪᠤᠯ ᠬᠠᠮᠤᠭ ᠤᠨ ᠪᠠᠶᠠᠷ ᠪᠠᠶᠠᠰᠤᠯ ᠲᠠᠢ ᠬᠡᠷᠡᠭ ᠪᠢᠯᠡ᠃       1989 ᠤᠨ ᠳᠤ ᠹ᠊᠂ ᠴᠢᠮᠡᠭ ᠤᠨ ᠤᠤᠭᠠᠨ ᠰᠢᠯᠦᠭ ᠤᠨ ᠲᠡᠬᠦᠪᠦᠷᠢ ᠪᠤᠯᠬᠤ ︽ᠨᠤᠭᠤᠭᠠᠨ ᠲᠤᠷᠠᠳᠬᠠᠯ︾᠎ ᠢ ᠨᠢ ᠦᠨᠳᠤᠰᠤᠳᠠᠨ ᠤ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ ᠬᠡᠪᠯᠡᠬᠦᠯᠦᠨ ᠲᠠᠷᠬᠠᠭᠠᠪᠠ᠃ ᠡᠨᠡ ᠪᠤᠯ ᠦᠪᠤᠷ ᠮᠤᠩᠭᠤᠯ ᠤᠨ ᠪᠦᠰᠡᠬᠦᠢ ᠰᠢᠯᠦᠭᠴᠢ ᠶᠢᠨ ᠠᠩᠬᠠᠳᠠᠭᠴᠢ ᠰᠢᠯᠦᠭ ᠤᠨ ᠲᠡᠬᠦᠪᠤᠷᠢ ᠪᠤᠯᠤᠨ᠎ᠡ᠃ ᠬᠦᠯᠦᠨ ᠪᠤᠶᠢᠷ ᠠᠶᠢᠮᠠᠭ ᠤᠨ ᠨᠠᠮ ᠵᠠᠰᠠᠭ ᠤᠨ ᠬᠠᠷᠠᠭᠠᠯᠵᠠᠯ ᠲᠤᠤᠷ᠎ᠠ᠂ ᠬᠦᠯᠦᠨ ᠪᠤᠶᠢᠷ ᠤᠨ ᠦᠨᠳᠤᠰᠤᠳᠠᠨ ᠤ ᠬᠡᠷᠡᠭ ᠡᠷᠬᠢᠯᠡᠬᠦ ᠭᠠᠵᠠᠷ ᠠᠴᠠ 1989 ᠤᠨ ᠤ 5 ᠳ᠋ᠤᠭᠠᠷ ᠰᠠᠷ᠎ᠠ ᠳᠤ ︽ᠹ᠊᠂ ᠴᠢᠮᠡᠭ ᠤᠨ ᠵᠤᠬᠢᠶᠠᠯ ᠪᠦᠳᠦᠬᠡᠯ ᠢ ᠶᠠᠷᠢᠯᠴᠠᠬᠤ ᠲᠤᠰᠬᠠᠢ ᠬᠤᠷᠠᠯ︾᠎ ᠢ ᠡᠷᠬᠢᠯᠡᠨ ᠬᠤᠷᠠᠯᠳᠤᠭᠤᠯᠵᠠᠢ᠃ ᠬᠦᠯᠦᠨ ᠪᠤᠶᠢᠷ ᠤᠨ ᠲᠧᠯᠸᠢᠰ ᠬᠤᠷᠢᠶ᠎ᠠ ᠴᠦ ︽ᠪᠦᠰᠡᠬᠦᠢ ᠰᠢᠯᠦᠭᠴᠢ — ᠹ᠊᠂ ᠴᠢᠮᠡᠭ︾ ᠬᠡᠮᠡᠬᠦ ᠲᠤᠰᠬᠠᠢ ᠰᠡᠳᠤᠪ ᠢᠶᠠᠷ ᠰᠡᠬᠦᠳᠡᠷᠯᠡᠨ ᠨᠡᠪᠳᠡᠷᠡᠬᠦᠯᠵᠡᠢ᠃ ᠹ᠊᠂ ᠴᠢᠮᠡᠭ ᠤᠨ ᠵᠤᠬᠢᠶᠠᠯ ᠤᠨ ᠤᠯᠠᠩᠬᠢ ᠨᠢ ᠤᠯᠠᠨ ᠪᠠᠷ ᠬᠡᠪᠯᠡᠯ ᠤᠨ ᠲᠡᠬᠦᠪᠦᠷᠢ ᠳᠤ ᠰᠢᠯᠢᠭᠳᠡᠨ ᠤᠷᠤᠭᠰᠠᠨ ᠪᠠᠶᠢᠨ᠎ᠠ᠃       ᠹ᠊᠂ ᠴᠢᠮᠡᠭ ᠤᠨ ᠰᠢᠯᠦᠭ᠂ ᠢᠯᠠᠩᠭᠤᠶ᠎ᠠ ᠬᠡᠤᠬᠡᠳ ᠤᠨ ᠤᠷᠠᠨ ᠵᠤᠬᠢᠶᠠᠯ ᠨᠢ ᠤᠯᠤᠰ ᠤᠨ ᠭᠠᠳᠠᠭᠠᠳᠤ ᠳᠤ ᠴᠦ ᠵᠤᠬᠢᠬᠤ ᠨᠦᠯᠦᠬᠡ ᠲᠤᠰᠬᠠᠯ ᠪᠠᠶᠢᠵᠤ᠂ ᠮᠤᠩᠭᠤᠯ ᠤᠯᠤᠰ ᠪᠠ ᠤᠷᠤᠰ ᠤᠨ ᠵᠠᠷᠢᠮ ᠰᠤᠨᠢᠨ ᠰᠡᠳᠬᠦᠯ ᠲᠡᠭᠡᠷ᠎ᠡ ᠴᠦ ᠨᠡᠯᠢᠶᠡᠳ ᠢ ᠰᠤᠩᠭᠤᠨ ᠨᠡᠶᠢᠳᠡᠯᠡᠵᠤ ᠪᠢᠯᠡ᠃                  ᠴᠦᠯᠳᠤᠮ ᠤᠨ ︽ᠪᠠᠶᠠᠨᠵᠢᠷᠦᠬᠡ ᠶᠢᠨ ᠵᠡᠷᠬᠡᠯᠬᠡᠨ ᠠᠴᠠ︾ ᠬᠡᠰᠡᠭᠯᠡᠪᠡ 
  
ᠢᠷᠡᠯᠲᠡ᠄ ᠬᠡᠰᠢᠭᠳᠡᠨ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号