ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠮᠣᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠲᠡᠤᠬᠡᠨ ᠦᠯᠢᠬᠡᠷ ︵ᠠᠷᠪᠠᠨ ᠲᠠᠪᠤ︶ — ᠲᠡᠮᠦᠵᠢᠨ ᠢ ᠬᠠᠨ ᠪᠤᠯᠭᠠᠭᠰᠠᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/6/10
        ᠪᠢᠳᠠ ︽ᠪᠦᠷᠢ ᠪᠦᠬᠡ ᠠᠮᠢ ᠪᠠᠨ ᠠᠯᠳᠠᠭᠰᠠᠨ︾ ᠬᠡᠬᠦ ᠦᠯᠢᠬᠡᠷ ᠲᠤ ᠲᠡᠮᠦᠵᠢᠨ ᠬᠠᠨ ᠪᠤᠯᠪᠠ ᠬᠡᠵᠤ ᠬᠡᠯᠡᠭᠰᠡᠨ ᠪᠢᠯᠡ᠃ ᠲᠡᠳᠡ ᠴᠤᠬᠤᠮ ᠶᠠᠭᠠᠬᠢᠵᠤ ᠬᠠᠨ ᠪᠤᠯᠤᠭᠰᠠᠨ ᠪᠤᠢ︖       ᠲᠡᠮᠦᠵᠢᠨ᠂ ᠲᠤᠭᠤᠷᠢᠯ ᠬᠠᠨ᠂ ᠵᠠᠮᠤᠬ᠎ᠠ ᠠᠨᠳᠠ ᠭᠤᠷᠪᠠᠭᠤᠯᠠ ᠬᠦᠴᠦ ᠬᠠᠮᠳᠤᠷᠠᠵᠤ ᠮᠡᠷᠬᠢᠳ ᠎ ᠢ ᠰᠦᠨᠦᠬᠡᠬᠡᠳ ᠤᠷᠬᠤᠨ ᠰᠡᠯᠡᠩᠬᠡ ᠬᠤᠶᠠᠷ ᠤᠨ ᠤᠢ ᠲᠠᠯ᠎ᠠ ᠠᠴᠠ ᠪᠤᠴᠠᠪᠠ᠃ ᠲᠡᠮᠦᠵᠢᠨ ᠵᠠᠮᠤᠬ᠎ᠠ ᠠᠨᠳᠠ ᠬᠤᠶᠠᠷ ᠲᠠᠯᠠᠬᠤᠨ ᠠᠷᠠᠯ ᠠᠴᠠ ᠬᠦᠳᠡᠯᠵᠤ ᠬᠤᠷᠬᠤᠨᠠᠭ ᠵᠦᠪᠤᠷ ᠢ ᠴᠢᠭᠯᠡᠨ ᠶᠠᠪᠤᠪᠠ᠂ ᠲᠤᠭᠤᠷᠢᠯ ᠬᠠᠨ ᠮᠦᠨ ᠲᠤᠤᠯᠠ ᠭᠤᠤᠯ ᠤᠨ ᠬᠠᠷ᠎ᠠ ᠰᠢᠭᠤᠢ ᠳᠠᠭᠠᠨ ᠪᠤᠴᠠᠪᠠ᠃       ᠲᠡᠮᠦᠵᠢᠨ ᠵᠠᠮᠤᠬ᠎ᠠ ᠠᠨᠳᠠ ᠬᠤᠶᠠᠷ ᠬᠤᠷᠬᠤᠨᠠᠭ ᠵᠦᠪᠤᠷ ᠲᠤ ᠬᠦᠷᠦᠬᠡᠳ ᠬᠠᠮᠳᠤ ᠨᠢᠬᠡᠨ ᠭᠠᠵᠠᠷ ᠲᠤ ᠨᠡᠶᠢᠯᠡᠨ ᠪᠠᠭᠤᠪᠠ᠃ ᠲᠡᠳᠡ ᠬᠤᠶᠠᠷ ᠪᠤᠯ ᠤᠷᠢᠳᠤ ᠬᠤᠶᠠᠷ ᠤᠳᠠᠭ᠎ᠠ ᠠᠨᠳᠠ ᠪᠤᠯᠤᠯᠴᠠᠭᠰᠠᠨ ᠰᠠᠶᠢᠨ ᠨᠦᠬᠦᠷ ᠶᠤᠮ᠃ ᠡᠨᠡ ᠤᠳᠠᠭ᠎ᠠ ᠬᠠᠮᠳᠤ ᠨᠢᠬᠡᠨ ᠭᠠᠵᠠᠷ ᠲᠤ ᠨᠡᠶᠢᠯᠡᠨ ᠪᠠᠭᠤᠵᠤ᠂ ᠤᠷᠢᠳᠤ ᠶᠢᠨ ᠠᠨᠳᠠ ᠪᠤᠯᠤᠯᠴᠠᠭᠰᠠᠨ ᠢᠶᠠᠨ ᠲᠤᠷᠠᠳᠤᠨ ᠶᠠᠷᠢᠵᠤ᠂ ᠬᠤᠶᠢᠰᠢᠳᠠ ᠤᠯᠠᠮ ᠠᠮᠠᠷᠠᠭᠯᠠᠨ ᠶᠠᠪᠤᠶ᠎ᠠ ᠬᠡᠵᠤ᠂ ᠲᠡᠮᠦᠵᠢᠨ ᠤᠳᠤᠶᠢᠳ ᠮᠡᠷᠬᠢᠳ ᠤᠨ ᠲᠤᠭᠳᠤᠭ᠎ᠠ ᠠᠴᠠ ᠤᠯᠵᠠᠯᠠᠵᠤ ᠠᠪᠤᠭᠰᠠᠨ ᠠᠯᠳᠠᠨ ᠪᠦᠰᠠ ᠪᠠ ᠡᠰᠬᠡᠯ ① ᠬᠠᠯᠢᠭᠤᠨ ᠢ ᠵᠠᠮᠤᠬ᠎ᠠ ᠎ ᠳᠤ ᠪᠡᠯᠡᠭᠯᠡᠪᠡ᠃ ᠬᠠᠷᠢᠭᠤ ᠳᠤᠨᠢ ᠵᠠᠮᠤᠬ᠎ᠠ ᠤᠸᠠᠰ ᠮᠡᠷᠬᠢᠳ ᠤᠨ ᠲᠠᠶᠢᠷ ᠤᠰᠤᠨ ᠠᠴᠠ ᠤᠯᠵᠠᠯᠠᠵᠤ ᠠᠪᠤᠭᠰᠠᠨ ᠠᠯᠳᠠᠨ ᠪᠦᠰᠠ ᠪᠠ ᠦᠨᠡᠬᠡᠨ ᠴᠠᠭᠠᠨ ② ᠮᠤᠷᠢ ᠶᠢ ᠲᠡᠮᠦᠵᠢᠨ ᠳᠤ ᠬᠦᠷᠬᠡᠪᠡ᠃       ᠲᠡᠮᠦᠵᠢᠨ ᠵᠠᠮᠤᠬ᠎ᠠ ᠬᠤᠶᠠᠷ ᠢᠩᠬᠢᠵᠤ ᠨᠢᠬᠡ ᠵᠢᠯ ᠬᠠᠭᠠᠰ ᠬᠠᠮᠳᠤ ᠰᠠᠭᠤᠵᠤ ᠪᠡᠯᠴᠢᠬᠡᠷ ᠶᠡᠭᠡ ᠪᠠᠷᠠᠭᠳᠠᠭᠰᠠᠨ ᠲᠤᠯᠠ ᠨᠡᠬᠦᠬᠦ ᠪᠤᠯᠪᠠ᠃ ᠲᠡᠭᠡᠭᠡᠳ ᠵᠤᠨ ᠤ ᠲᠡᠷᠢᠬᠦᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠤ ᠤᠯᠠᠭᠠᠨ ᠲᠡᠷᠬᠡᠯ ᠡᠳᠤᠷ ᠨᠡᠬᠦᠪᠡ᠃ ᠲᠡᠮᠦᠵᠢᠨ ᠵᠠᠮᠤᠬ᠎ᠠ ᠬᠤᠶᠠᠷ ᠲᠡᠷᠬᠡᠨ ᠤ ᠡᠮᠤᠨ᠎ᠡ ᠵᠡᠷᠬᠡᠴᠡᠨ . ᠶᠠᠪᠤᠪᠠ ᠬᠠᠭᠠᠰ ᠨᠡᠬᠦᠳᠠᠯ ᠎ ᠤᠨ ᠭᠠᠵᠠᠷ ᠶᠠᠪᠤᠳᠠᠯ᠎ᠠ᠂ ᠵᠠᠮᠤᠬ᠎ᠠ᠄       ︽ᠲᠡᠮᠦᠵᠢᠨ ᠠᠨᠳᠠ ᠡ︕       ᠠᠭᠤᠯᠠᠨ ᠳᠤ ᠰᠢᠬᠠᠨ ᠪᠠᠭᠤᠶ᠎ᠠ       ᠠᠳᠤᠭᠤᠴᠢᠨ ᠳᠤ ᠬᠡᠷ ᠪᠤᠯᠳᠤᠭᠠᠢ       ᠭᠤᠤᠯ ᠳᠤ ᠰᠢᠬᠠᠨ ᠪᠠᠭᠤᠶ᠎ᠠ       ᠬᠤᠨᠢᠴᠢᠨ ᠬᠤᠷᠠᠭᠠᠴᠢᠨ ᠳᠤ       ᠬᠤᠭᠤᠯᠠ ᠪᠤᠯᠳᠤᠭᠠᠢ︕︾ ᠬᠡᠵᠤ ᠬᠡᠯᠡᠪᠡ᠃ ᠲᠡᠮᠦᠵᠢᠨ ᠵᠠᠮᠤᠬ᠎ᠠ ᠶᠢᠨ ᠡᠨᠡ ᠦᠬᠡ ᠶᠢ ᠤᠬᠠᠨ ᠶᠠᠳᠠᠵᠤ ᠬᠠᠷᠢᠭᠤ ᠶᠠᠭᠤ ᠴᠦ ᠲᠤᠤᠭᠠᠷᠤᠭᠰᠠᠨ ᠦᠭᠡᠢ ᠬᠤᠴᠤᠷᠤᠭᠠᠳ᠂ ᠦᠬᠡᠯᠤᠨ ᠡᠬᠡ ᠶᠢᠨ ᠲᠡᠷᠬᠡ ᠬᠦᠷᠴᠤ ᠢᠷᠡᠭᠰᠡᠨ ᠳᠤ᠂ ᠵᠠᠮᠤᠬ᠎ᠠ ᠶᠢᠨ ᠬᠡᠯᠡᠭᠰᠡᠨ ᠦᠭᠡ ᠶᠢ ᠡᠬᠡ ᠳᠡᠭᠡᠨ ᠬᠡᠯᠡᠵᠤ ︽ᠪᠢ ᠡᠨᠡ ᠦᠬᠡ ᠶᠢ ᠤᠬᠠᠨ ᠶᠠᠳᠠᠵᠤ ᠬᠠᠷᠢᠭᠤ ᠶᠠᠭᠤ ᠴᠦ ᠲᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠡᠬᠡ ᠠᠴᠠ ᠠᠰᠠᠭᠤᠷ᠎ᠠ ᠢᠷᠡᠪᠡ︾ ᠬᠡᠰᠡᠨ ᠳᠤ ᠦᠬᠡᠯᠤᠨ ᠡᠬᠡ ᠶᠢ ᠦᠬᠡ ᠲᠤᠤᠭᠠᠷᠴᠤ ᠠᠮᠵᠢᠬᠤ ᠠᠴᠠ ᠤᠷᠢᠳ ᠪᠦᠷᠳᠡ ᠦᠵᠢᠨ᠄       ︽ᠵᠠᠮᠤᠬ᠎ᠠ ᠠᠨᠳᠠ ᠠᠮᠠᠷᠬᠠᠨ ᠤᠶᠢᠳᠳᠠᠭ ᠵᠠᠩ ᠲᠠᠢ ᠬᠡᠳᠡᠭ ᠪᠢᠯᠡ᠃ ᠤᠳᠤ ᠪᠢᠳᠠᠨ ᠠᠴᠠ ᠤᠶᠢᠳᠬᠤ ᠴᠠᠭ ᠨᠢ ᠪᠤᠯᠤᠭᠰᠠᠨ ᠪᠢᠵᠠ᠃ ᠲᠤᠭᠠᠷ ᠤᠨ ᠵᠠᠮᠤᠬ᠎ᠠ ᠠᠨᠳᠠ ᠶᠢᠨ ᠬᠡᠯᠡᠭᠰᠡᠨ ᠨᠢ ᠪᠢᠳᠠᠨ ᠢ ᠵᠢᠭᠰᠢᠭᠰᠡᠨ ᠦᠬᠡ ᠪᠤᠶᠤ᠃ ᠪᠢᠳᠠ ᠪᠢᠳᠠᠬᠡᠢ ᠪᠠᠭᠤᠶ᠎ᠠ᠂ ᠪᠠᠭᠤᠪᠠᠯ ᠲᠡᠬᠦᠨ ᠤ ᠠᠷᠭᠠᠨ ᠳᠤ ᠤᠨᠠᠨ᠎ᠠ᠂ ᠬᠠᠷᠢᠨ ᠰᠢᠭᠤᠳ ᠶᠠᠪᠤᠵᠤ ᠵᠠᠮᠤᠬ᠎ᠠ ᠠᠨᠳᠠ ᠠᠴᠠ ᠰᠠᠶᠢᠬᠠᠨ ᠢᠶᠠᠷ ᠬᠠᠭᠠᠴᠠᠶ᠎ᠠ︾ ᠬᠡᠪᠡ᠃ ᠦᠬᠡᠯᠦᠨ ᠡᠬᠡ ᠦᠬᠡ ᠲᠤᠤᠭᠠᠷᠤᠭᠰᠠᠨ ᠦᠭᠡᠢ ᠲᠤᠯᠠ ᠲᠡᠮᠦᠵᠢᠨ᠂ ᠪᠦᠷᠳᠡ ᠦᠵᠢᠨ ᠤ ᠦᠬᠡ ᠶᠢ ᠲᠠᠭᠠᠵᠤ ᠲᠡᠨᠳᠡ ᠦᠯᠤ ᠪᠠᠭᠤᠨ ᠰᠦᠨᠢ ᠲᠤᠵᠢ ᠶᠠᠪᠤᠪᠠ᠃ ᠦᠷ ᠴᠠᠶᠢᠵᠤ ᠪᠠᠶᠢᠬᠤ ᠳᠤ ᠦᠵᠡᠪᠡᠯ᠂ ᠠᠷᠪᠠ ᠭᠠᠷᠤᠢ ᠠᠶᠢᠮᠠᠭ ᠤᠨ ᠬᠦᠮᠦᠰ ᠲᠡᠮᠦᠵᠢᠨ ᠢ ᠲᠠᠭᠠᠯᠳᠤᠨ ᠢᠷᠡᠪᠡ᠃ ᠲᠡᠳᠡᠨ ᠤ ᠲᠤᠳᠤᠷ᠎ᠠ ᠪᠤᠭᠤᠷᠴᠢ ᠶᠢᠨ ᠲᠡᠬᠦᠦ ᠦᠬᠡᠯᠡᠨ ᠴᠠᠷᠪᠢ᠂ ᠵᠠᠯᠮ᠎ᠠ ᠶᠢᠨ ᠲᠡᠬᠦᠦ ᠴᠠᠤᠷᠬᠠᠨ᠂ ᠰᠦᠪᠡᠬᠡᠳᠠᠢ ᠪᠠᠭᠠᠳᠤᠷ ᠨᠠᠷ ᠪᠠ ᠨᠤᠶᠠᠬᠠᠨ ᠠᠶᠢᠮᠠᠭ ᠤᠨ ᠵᠤᠩᠰᠤ᠂ ᠪᠠᠭᠠᠷᠢᠨ ᠠᠶᠢᠮᠠᠭ ᠤᠨ ᠬᠤᠷᠴᠢ᠂ ᠤᠰᠤᠨ ᠡᠪᠤᠬᠡᠨ᠂ ᠬᠦᠬᠡᠴᠤᠰ ᠨᠠᠷ ᠪᠠᠶᠢᠪᠠ᠃       ᠲᠡᠮᠦᠵᠢᠨ ᠢᠩᠬᠢᠵᠤ ᠵᠠᠮᠤᠬ᠎ᠠ ᠠᠴᠠ ᠰᠠᠯᠵᠤ ᠬᠦᠳᠡᠯᠦᠬᠡᠳ ᠬᠢᠮᠤᠷᠭ᠋ ᠭᠤᠷᠤᠬᠠᠨ ᠤ ᠠᠶᠢᠯ ᠬᠠᠷᠠᠭᠠᠨ᠎ᠠ ᠬᠡᠬᠦ ᠭᠠᠵᠠᠷ ᠬᠦᠷᠴᠤ ᠪᠠᠭᠤᠪᠠ᠃ ᠡᠨᠡ ᠦᠶ᠎ᠡ ᠳᠤ ᠬᠤᠨᠠᠨ ᠲᠡᠷᠢᠬᠦᠳᠡᠨ ᠨᠢᠬᠡᠨ ᠬᠦᠷᠢᠶ᠎ᠡ ③ ᠪᠤᠯᠵᠤ ᠢᠷᠡᠪᠡ᠂ ᠲᠡᠮᠦᠵᠢᠨ ᠤ ᠪᠠᠭ᠎ᠠ ᠠᠪᠠᠭ᠎ᠠ ᠲᠠᠷᠢᠳᠠᠢ ᠤᠳᠴᠢᠬᠢᠨ ᠨᠢᠬᠡᠨ ᠬᠦᠷᠢᠶ᠎ᠡ ᠪᠤᠯᠵᠤ ᠢᠷᠡᠪᠡ᠃ ᠵᠦᠷᠬᠢᠨ ᠤ ᠰᠤᠤᠷᠬᠠᠳᠤ ᠵᠦᠷᠬᠢ ᠶᠢᠨ ᠬᠦᠦ ᠰᠡᠴᠡ ᠪᠠᠬᠢ᠂ ᠲᠠᠶᠢᠴᠤ ᠬᠤᠶᠠᠷ ᠵᠠᠮᠤᠬ᠎ᠠ ᠠᠴᠠ ᠰᠠᠯᠵᠤ ᠨᠢᠬᠡᠨ ᠬᠦᠷᠢᠶ᠎ᠡ ᠪᠤᠯᠵᠤ ᠢᠷᠡᠪᠡ᠃ ᠲᠡᠮᠦᠵᠢᠨ ᠤ ᠬᠤᠶᠠᠳᠤᠭᠠᠷ ᠠᠪᠠᠭ᠎ᠠ ᠨᠡᠬᠦᠨ ᠲᠠᠶᠢᠵᠢ ᠶᠢᠨ ᠬᠦᠦ ᠬᠤᠴᠠᠷ ᠪᠠᠬᠢ ᠨᠢᠬᠡᠨ ᠬᠦᠷᠢᠶ᠎ᠡ ᠪᠤᠯᠵᠤ ᠢᠷᠡᠪᠡ᠂ ᠬᠤᠳᠠᠯᠠ ᠬᠠᠭᠠᠨ ᠤ ᠬᠦᠦ ᠠᠯᠳᠠᠨ ᠤᠳᠴᠢᠬᠢᠨ ᠵᠠᠮᠤᠬ᠎ᠠ ᠠᠴᠠ ᠰᠠᠯᠵᠤ ᠨᠢᠬᠡᠨ ᠬᠦᠷᠢᠶ᠎ᠡ ᠪᠤᠯᠵᠤ ᠢᠷᠡᠪᠡ ᠃ ᠬᠦᠮᠦᠨ ᠠᠮᠢᠳᠠᠨ ᠤᠯᠠᠨ ᠲᠤᠯᠠ ᠲᠡᠨᠳᠡ ᠠᠴᠠ ᠪᠠᠰᠠ ᠬᠦᠳᠡᠯᠵᠤ ᠰᠡᠩᠬᠦᠷ ᠭᠤᠷᠤᠬᠠᠨ ᠤ ᠬᠠᠷ᠎ᠠ ᠵᠢᠷᠦᠬᠡᠨ ᠳᠠᠬᠢ ᠬᠦᠬᠡ ᠨᠠᠭᠤᠷ ᠲᠤ ᠤᠴᠢᠵᠤ ᠪᠠᠭᠤᠪᠠ᠃       ᠡᠶᠢᠮᠤ ᠤᠯᠠᠨ ᠬᠦᠮᠦᠨ ᠠᠮᠢᠳᠠᠨ ᠶᠡᠭᠡ ᠪᠠᠭ᠎ᠠ᠂ ᠡᠬᠢ ᠠᠳᠠᠭ ᠦᠭᠡᠢ ᠶᠠᠭᠠᠬᠢᠨ ᠠᠮᠢᠳᠤᠷᠠᠬᠤ ᠪᠢᠯᠡ︖ ᠬᠡᠵᠤ ᠪᠠᠭᠠᠷᠢᠨ ᠤ ᠬᠤᠷᠴᠢ ᠶᠢᠨ ᠬᠡᠯᠡᠭᠰᠡᠨ ᠨᠢ᠄       ︽ᠪᠢᠳᠠ ᠤᠤᠯ ᠨᠢ ᠪᠤᠳᠠᠨᠴᠠᠷ ᠪᠤᠭᠳᠠ ᠶᠢᠨ ᠪᠠᠷᠢᠵᠤ ᠠᠪᠤᠭᠰᠠᠨ ᠡᠮ᠎ᠡ ᠠᠴᠠ ᠲᠦᠷᠦᠭᠰᠡᠨ ᠲᠤᠯᠠ ᠵᠠᠮᠤᠬ᠎ᠠ ᠲᠠᠢ ᠬᠡᠪᠡᠯᠢ ᠨᠢᠬᠡᠳᠠᠢ᠂ ᠬᠡᠯᠬᠢᠶ᠎ᠡ ᠪᠠᠬᠢᠳᠠᠢ ᠬᠦᠮᠦᠰ ᠪᠢᠯᠡ᠂ ᠵᠦᠢ ᠨᠢ ᠵᠠᠮᠤᠬ᠎ᠠ ᠠᠴᠠ ᠬᠠᠭᠠᠴᠠᠵᠤ ᠦᠯᠤ ᠪᠤᠯᠤᠨ᠎ᠠ᠃ ᠬᠡᠳᠡᠯ᠎ᠡ ᠵᠠᠶᠢᠷᠠᠩ ᠲᠡᠭᠷᠢ ④ ᠢᠷᠡᠵᠤ ᠨᠢᠳᠤᠨ ᠳᠤ ᠦᠵᠡᠬᠦᠯᠦᠭᠰᠡᠨ ᠨᠢ᠄ ᠬᠤᠸᠠᠭᠴᠢᠨ ᠦᠨᠢᠶ᠎ᠡ ᠢᠷᠡᠵᠤ ᠵᠠᠮᠤᠬ᠎ᠠ ᠶᠢ ᠲᠤᠭᠤᠷᠢᠨ ᠶᠠᠪᠤᠵᠤ᠂ ᠵᠠᠮᠤᠬ᠎ᠠ ᠪᠠ ᠲᠡᠬᠦᠨ ᠤ ᠬᠡᠷ ᠲᠡᠷᠬᠡ ⑤᠎ ᠶᠢ ᠮᠦᠷᠬᠦᠭᠰᠡᠬᠡᠷ ᠦᠷᠦᠬᠡᠰᠤᠨ ᠡᠪᠡᠷ ᠢᠶᠠᠨ ᠬᠤᠭᠤᠯᠵᠤ ᠰᠤᠯᠵᠢᠷ ᠡᠪᠡᠷ ᠲᠠᠢ ᠪᠤᠯᠤᠭᠠᠳ ︿ᠡᠪᠡᠷ ᠢ ᠮᠢᠨᠢ ᠦᠭ﹀ ᠬᠡᠵᠤ ᠵᠠᠮᠤᠬ᠎ᠠ ᠎ ᠶᠢᠨ ᠵᠦᠭ ᠮᠦᠬᠡᠷᠡᠨ ᠰᠢᠷᠤᠢ ᠰᠠᠴᠤᠨ ᠪᠠᠶᠢᠨ᠎ᠠ᠃ ᠪᠠᠰᠠ ᠮᠤᠬᠤᠷ ᠬᠤᠸᠠ ᠦᠬᠡᠷ ᠢ ᠶᠡᠭᠡ ᠬᠡᠷ ᠤᠨ ᠲᠡᠷᠬᠡᠨ ᠳᠤ ᠬᠦᠯᠯᠡᠭᠰᠡᠨ ᠳᠤ ᠲᠡᠷᠡ ᠦᠬᠡᠷ ᠶᠡᠭᠡ ᠲᠡᠷᠬᠡᠬᠦᠷ ⑥᠎ ᠢᠶᠠᠷ ᠲᠡᠮᠦᠵᠢᠨ ᠤ ᠬᠤᠶᠢᠨ᠎ᠠ ᠠᠴᠠ ᠵᠢᠳᠬᠦᠨ ᠶᠠᠪᠤᠵᠤ᠄       ︿ᠲᠡᠭᠷᠢ ᠭᠠᠵᠠᠷ ᠡᠶᠡᠯᠳᠤᠵᠤ       ᠲᠡᠮᠦᠵᠢᠨ ᠢ ᠤᠯᠤᠰ ᠤᠨ ᠡᠵᠡᠨ ᠪᠤᠯᠳᠤᠭᠠᠢ ᠬᠡᠵᠤ       ᠲᠡᠭᠡᠭᠡᠵᠤ ᠬᠦᠷᠬᠡᠵᠤ ᠶᠠᠪᠤᠨ᠎ᠠ﹀ ᠬᠡᠵᠤ       ᠮᠦᠬᠡᠷᠡᠨ ᠬᠡᠯᠡᠵᠤ ᠶᠠᠪᠤᠨ᠎ᠠ᠃ ᠵᠠᠶᠢᠷᠠᠩ ᠲᠡᠭᠷᠢ ᠨᠢᠳᠤᠨ ᠳᠤ ᠢᠩᠬᠢᠵᠤ ᠵᠢᠭᠠᠵᠤ ᠦᠵᠡᠬᠦᠯᠦᠭᠰᠡᠨ ᠲᠤᠯᠠ ᠲᠡᠮᠦᠵᠢᠨ ᠢ ᠬᠠᠨ ᠪᠤᠯᠭᠠᠶ᠎ᠠ︾ ᠬᠡᠪᠡ᠃ ᠠᠯᠳᠠᠨ ᠤᠳᠴᠢᠬᠢᠨ᠂ ᠬᠤᠴᠠᠷ ᠪᠠᠬᠢ᠂ ᠰᠡᠴᠡ ᠪᠠᠬᠢ ᠨᠠᠷ ᠵᠦᠪᠯᠡᠯᠳᠤᠵᠤ ᠲᠡᠮᠦᠵᠢᠨ ᠢ ᠬᠠᠨ ᠪᠤᠯᠭᠠᠬᠤ ᠪᠠᠷ ᠲᠤᠭᠳᠠᠵᠤ᠂ ᠲᠡᠮᠦᠵᠢᠨ ᠳᠤ ᠬᠡᠯᠡᠭᠰᠡᠨ ᠨᠢ᠄       ︽ᠲᠡᠮᠦᠵᠢᠨ ᠴᠢᠮ᠎ᠡ ᠶᠢ ᠪᠢᠳᠠ ᠪᠦᠬᠦᠳᠠ ᠶᠢ ᠵᠠᠬᠢᠷᠬᠤ ᠬᠠᠨ ᠪᠤᠯᠭᠠᠶ᠎ᠠ᠂ ᠴᠢᠮ᠎ᠠ ᠶᠢ ᠬᠠᠨ ᠪᠤᠯᠭᠠᠭᠠᠳ ᠪᠢᠳᠠ       ᠠᠯᠠᠯᠳᠤᠬᠤ ᠲᠠᠶᠢᠨ ᠳᠤ       ᠠᠯᠬᠢᠨᠴᠢ ⑦ ᠪᠤᠯᠵᠤ       ᠠᠪᠠᠯᠠᠬᠤ ᠴᠠᠭ ᠲᠤ       ᠤᠳᠤᠴᠢ ᠪᠤᠯᠵᠤ       ᠤᠯᠤᠭᠰᠠᠨ ᠪᠦᠬᠦᠳᠠ ᠶᠢ       ᠤᠨᠴᠠ ᠴᠢᠮ᠎ᠠ ᠳᠤ ᠦᠭᠬᠦᠶ᠎ᠡ       ᠬᠤᠷᠢᠶᠠᠭᠰᠠᠨ ᠪᠦᠬᠦᠳᠠ ᠶᠢ       ᠬᠠᠨ ᠴᠢᠮ᠎ᠠ ᠳᠤ ᠦᠭᠬᠦᠶ᠎ᠡ᠃       ᠡᠵᠡᠨ ᠴᠢᠨᠤ ᠵᠠᠷᠯᠢᠭ ᠢ       ᠡᠰᠡ ᠲᠠᠭᠠᠪᠠᠯ       ᠡᠨᠡ ᠪᠡᠶ᠎ᠡ ᠶᠢ ᠮᠢᠨᠢ       ᠡᠵᠡᠬᠦᠢ ᠬᠦᠬᠡᠬᠡᠵᠤ ᠤᠷᠬᠢ       ᠬᠠᠨ ᠴᠢᠨᠤ ᠵᠠᠷᠯᠢᠭ ᠢ       ᠬᠠᠶᠢᠬᠤᠷᠬᠤ ᠦᠭᠡᠢ ᠶᠠᠪᠤᠪᠠᠯ       ᠬᠠᠷ᠎ᠠ ᠲᠤᠯᠤᠭᠠᠢ ᠶᠢ ᠮᠢᠨᠢ       ᠬᠠᠶᠠᠵᠤ ᠤᠳᠤᠭᠳᠤᠨ︕︾ ᠬᠡᠪᠡ᠃       ᠡᠨᠡ ᠦᠬᠡ ᠶᠢ ᠪᠦᠬᠦᠳᠡᠬᠡᠷ ᠵᠦᠪᠰᠢᠶᠡᠷᠡᠵᠤ ᠲᠡᠮᠦᠵᠢᠨ ᠢ ᠬᠠᠨ ᠪᠤᠯᠭᠠᠪᠠ᠃       ᠲᠡᠮᠦᠵᠢᠨ᠂ ᠬᠠᠨ ᠪᠤᠯᠤᠭᠠᠳ ᠡᠳᠤᠢ ᠲᠡᠳᠤᠢ ᠬᠦᠮᠦᠰ ᠢ ᠵᠤᠬᠢᠬᠤ ᠠᠵᠢᠯ ᠲᠤᠰᠢᠶᠠᠯ ᠳᠤ ᠲᠤᠮᠢᠯᠠᠪᠠ᠃ ᠲᠡᠭᠡᠵᠤ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ ᠬᠡᠷᠡᠶᠢᠳ ᠤᠨ ᠲᠤᠭᠤᠷᠢᠯ ᠬᠠᠨ ᠡᠴᠢᠬᠡ ᠳᠤ ᠡᠯᠴᠢ ᠵᠠᠷᠤᠵᠤ ᠡᠨᠡ ᠤᠴᠢᠷ ᠢ ᠮᠡᠳᠡᠬᠦᠯᠦᠭᠰᠡᠨ ᠳᠤ᠂ ᠲᠤᠭᠤᠷᠢᠯ ᠬᠠᠨ ᠡᠴᠢᠬᠡ ᠶᠢᠨ ᠢᠷᠦᠬᠡᠵᠤ ᠬᠡᠯᠡᠭᠰᠡᠨ ᠨᠢ᠄       ︽ᠲᠡᠮᠦᠵᠢᠨ ᠬᠦᠦ ᠶᠢ ᠮᠢᠨᠢ ᠬᠠᠨ ᠪᠤᠯᠭᠠᠭᠰᠠᠨ ᠨᠢ ᠮᠠᠰᠢ ᠵᠦᠪ᠂ ᠲᠠ ᠨᠠᠷ ᠡᠨᠡ ᠰᠢᠢᠳᠪᠤᠷᠢ ᠪᠠᠨ ᠮᠠᠷᠳᠠᠬᠤ ᠦᠭᠡᠢ       ᠡᠶ᠎ᠡ ᠠᠭᠠᠰᠢ ᠪᠠᠨ ᠲᠠᠰᠤᠯᠬᠤ ᠦᠭᠡᠢ       ᠡᠬᠢ ᠵᠠᠶᠠᠭ᠎ᠠ ᠪᠠᠨ ᠠᠯᠳᠠᠬᠤ ᠦᠭᠡᠢ       ᠡᠬᠦᠷᠢᠳᠠ ᠪᠠᠳᠤ ᠵᠢᠷᠤᠮ ᠲᠠᠢ ᠶᠠᠪᠤ︕︾ ᠬᠡᠵᠠᠢ᠃         ᠲᠠᠶᠢᠯᠪᠤᠷᠢ       ① ᠡᠰᠬᠡᠯ — ᠡᠷᠡᠮᠡᠭ᠃       ② ᠦᠨᠡᠬᠡᠨ ᠴᠠᠭᠠᠨ — ᠢᠰᠢᠬᠡ ᠮᠡᠳᠤ ᠴᠠᠭᠠᠨ ᠦᠰᠦᠳᠠᠢ᠃       ③ ᠬᠦᠷᠢᠶ᠎ᠡ — ᠬᠠᠮᠳᠤ ᠬᠦᠷᠢᠶᠡᠯᠡᠨ ᠪᠠᠭᠤᠵᠤ ᠨᠤᠳᠤᠭᠯᠠᠬᠤ ︵ᠡᠷᠳᠡᠨ ᠤ ᠨᠡᠬᠦᠳᠠᠯ ᠠᠮᠢᠳᠤᠷᠠᠯ ᠤᠨ ᠨᠢᠬᠡᠴᠠ︶᠎ ᠶᠢ ᠬᠡᠯᠡᠵᠤ ᠪᠤᠢ᠃       ④ ᠵᠠᠶᠢᠷᠠᠩ ᠲᠡᠭᠷᠢ — ᠪᠦᠬᠡ ᠮᠦᠷᠬᠦᠯ ᠤᠨ ᠲᠡᠭᠡᠳᠤ ᠤᠩᠭᠤᠳ ᠰᠢᠳᠦᠬᠡᠨ ᠤ ᠨᠡᠷ᠎ᠡ᠃       ⑤ ᠬᠡᠷ ᠲᠡᠷᠬᠡ — ᠤᠯᠠᠨ ᠲᠡᠷᠬᠡ ᠶᠢ ᠬᠠᠮᠳᠤ ᠬᠡᠯᠬᠢᠨ ᠬᠤᠯᠪᠤᠵᠤ ᠲᠡᠭᠡᠷ᠎ᠡ ᠨᠢ ᠬᠡᠷ ᠪᠠᠶᠢᠷᠢᠯᠠᠭᠤᠯᠤᠭᠰᠠᠨ ᠨᠡᠬᠦᠳᠠᠯ ᠤᠨ ᠬᠡᠷᠡᠭᠰᠡᠯ᠃       ⑥ ︵ᠶᠡᠭᠡ︶ ᠲᠡᠷᠬᠡᠬᠦᠷ — ︵ᠶᠡᠭᠡ︶ ᠲᠡᠷᠬᠡᠨ ᠤ ᠵᠠᠮ᠃       ⑦ ᠠᠯᠬᠢᠨᠴᠢ — ᠬᠤᠰᠢᠭᠤᠴᠢ᠃         ᠡᠮᠤᠨᠡᠬᠢ ᠦᠯᠢᠬᠡᠷ᠄ ᠪᠦᠷᠢ ᠪᠦᠬᠡ ᠠᠮᠢ ᠪᠠᠨ ᠠᠯᠳᠠᠭᠰᠠᠨ               ︵ᠲᠤᠰ ᠪᠦᠯᠦᠭ ᠦᠯᠢᠬᠡᠷ ᠲᠡᠬᠦᠰᠪᠡ︶ 
  
ᠢᠷᠡᠯᠲᠡ᠄ ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠰᠤᠩᠭᠤᠳᠠᠭ ᠵᠤᠬᠢᠶᠠᠯ ᠤᠨ ᠰᠤᠩᠭᠤᠮᠠᠯ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号