ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/5/6
        ᠮᠤᠩᠭᠤᠯ ᠨᠤᠳᠤᠭ ᠲᠤ ᠤᠪᠤᠭ᠎ᠠ ᠬᠠᠶᠢᠷᠬᠠᠳ ᠤᠯᠠᠨ ᠪᠠᠶᠢᠳᠠᠭ ᠴᠦ ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠬᠡᠵᠤ ᠲᠡᠳᠦᠢ ᠯᠡ ᠤᠯᠠᠨ ᠪᠠᠶᠢᠳᠠᠭ ᠦᠭᠡᠢ᠃ ᠬᠡᠰᠢᠭᠳᠡᠨ ᠬᠤᠰᠢᠭᠤᠨ ᠤ ᠲᠠᠷᠬᠠᠬᠠᠭᠤᠯᠠ ᠰᠤᠮᠤᠨ ᠤ ᠪᠠᠶᠠᠨᠰᠢᠯᠢ ᠭᠠᠴᠠᠭᠠᠨ ᠳᠤ ︵ᠤᠤᠯ ᠤᠨ ᠪᠠᠶᠠᠨᠪᠤᠯᠠᠭ ᠭᠠᠴᠠᠭ᠎ᠠ︶ ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠬᠡᠳᠡᠭ ᠰᠤᠨᠢᠷᠬᠠᠯᠳᠠᠢ ᠨᠢᠬᠡᠨ ᠤᠪᠤᠭ᠎ᠠ ᠪᠤᠢ᠃ ᠡᠨᠡᠬᠦ ᠤᠪᠤᠭ᠎ᠠ ᠭᠠᠩᠭᠠᠨ ᠨᠠᠭᠤᠷ ᠤᠨ ᠪᠠᠷᠠᠭᠤᠨ ᠬᠦᠪᠡᠬᠡᠨ ᠳᠤ᠂ ᠱᠠᠷ ᠤᠨ ᠭᠤᠤᠯ ᠤᠨ ᠡᠮᠤᠨ᠎ᠡ ᠲᠡᠨᠵᠢᠨ ᠳᠤ ᠪᠤᠢ᠃ ᠵᠠᠩ ᠦᠢᠯᠡ ᠰᠤᠳᠤᠯᠤᠭᠰᠠᠨ ᠡᠷᠳᠡᠮᠳᠡᠳ ᠤᠨ ᠶᠠᠷᠢᠬᠤ ᠪᠠᠷ ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠮᠤᠩᠭᠤᠯ ᠤᠷᠤᠨ ᠳᠤ ᠴᠦᠬᠡᠨ ᠪᠠᠶᠢᠳᠠᠭ ᠬᠡᠨ᠎ᠡ᠃ ᠲᠠᠶᠢᠮᠤ ᠠᠴᠠ ᠬᠡᠰᠢᠭᠳᠡᠨ ᠤ ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠨᠢ ᠨᠢᠬᠡ ᠵᠦᠢᠯ ᠤᠨ ᠤᠨᠴᠠᠭᠠᠢ ᠤᠪᠤᠭ᠎ᠠ ᠳᠤ ᠲᠤᠭᠠᠯᠠᠭᠳᠠᠨ᠎ᠠ᠃ ᠡᠨᠡᠬᠦ ᠤᠪᠤᠭ᠎ᠠ ᠶᠢᠨ ᠤᠷᠤᠰᠢᠬᠤᠢ ᠨᠢ ᠬᠡᠰᠢᠭᠳᠡᠨ ᠨᠤᠳᠤᠭ ᠤᠨ ᠵᠠᠩ ᠦᠢᠯᠡ ᠨᠢ ᠦᠷᠦᠬᠡᠯ ᠮᠤᠩᠭᠤᠯ ᠨᠤᠳᠤᠭ ᠠᠴᠠ ᠦᠰᠤᠳ ᠠᠰᠳᠠᠭᠠᠨ ᠪᠠᠶᠢᠳᠠᠭ ᠢ ᠨᠡᠩ ᠶᠡᠭᠡ ᠦᠨᠳᠤᠰᠤ ᠪᠠᠷᠢᠮᠳᠠ ᠎ ᠲᠠᠢ ᠪᠠᠷ ᠢᠯᠡᠷᠡᠬᠦᠯᠵᠤ ᠪᠠᠶᠢᠨ᠎ᠠ᠃ ᠡᠨᠡ ᠪᠤᠯ ᠬᠦᠨ ᠵᠤᠵᠠᠭᠠᠨ ᠤᠯᠠ ᠰᠠᠭᠤᠷᠢ ᠲᠠᠢ ᠮᠤᠩᠭᠤᠯ ᠤᠨ ᠡᠵᠡᠨᠳᠤ ᠬᠦᠷᠦᠨ ᠤ ᠦᠶ᠎ᠡ ᠶᠢᠨ ᠤᠷᠳᠤᠨ ᠤ ᠰᠤᠶᠤᠯ᠂ ᠠᠯᠳᠠᠨ ᠤᠷᠤᠭᠳᠠᠨ ᠪᠤᠯᠬᠤ ᠬᠤᠩᠬᠢᠷᠠᠳ ᠶᠠᠰᠤᠳᠠᠨ ᠤ ᠡᠰᠢ ᠰᠤᠶᠤᠯ ᠤᠨ ᠤᠯᠠᠮᠵᠢᠯᠠᠯ ᠪᠤᠯᠬᠤ ᠠᠵᠢ᠃       ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠨᠢ ᠬᠡᠤᠬᠡᠳ ᠤᠨ ᠢᠶᠠᠨ ᠰᠠᠶᠢᠨ ᠰᠠᠶᠢᠬᠠᠨ᠂ ᠡᠷᠡᠬᠦᠯ ᠡᠩᠬᠡ᠂ ᠢᠷᠡᠬᠡᠳᠤᠢ ᠶᠢᠨ ᠬᠢᠨᠢ ᠦᠬᠡᠳᠠ ᠦᠩᠬᠡ ᠶᠢ ᠨᠢ ᠪᠡᠯᠬᠡᠳᠡᠵᠤ ᠲᠠᠬᠢᠳᠠᠭ ᠤᠪᠤᠭ᠎ᠠ ᠶᠤᠮ᠃       ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠪᠤᠰᠬᠠᠭᠳᠠᠭᠰᠠᠨ ᠲᠤᠬᠠᠢ ᠬᠡᠰᠢᠭᠳᠡᠨ ᠤ ᠨᠠᠰᠤᠳᠠᠶᠢᠴᠤᠤᠯ ᠢᠩᠬᠢᠵᠤ ᠶᠠᠷᠢᠳᠠᠭ᠃ ᠡᠷᠳᠡ ᠲᠡᠭᠡᠳᠤ ᠦᠶ᠎ᠡ ᠳᠤ ᠱᠠᠷ ᠤᠨ ᠭᠤᠤᠯ ᠤᠨ ᠯᠤᠤᠰ ᠲᠤᠭᠰᠢᠨ ᠪᠠᠶᠢᠵᠤ᠂ ᠬᠦᠪᠡᠬᠡᠨ ᠳᠠᠬᠢ ᠠᠶᠢᠯ ᠎ ᠤᠨ ᠬᠡᠤᠬᠡᠳ ᠤᠳ ᠢ ᠤᠷᠤᠰᠬᠠᠨ ᠠᠪᠠᠴᠢᠳᠠᠭ ᠪᠠᠶᠢᠭᠰᠠᠨ ᠠᠴᠠ ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠪᠤᠰᠬᠠᠨ ᠲᠠᠬᠢᠵᠠᠭᠠᠭᠰᠠᠨ ᠬᠡᠨ᠎ᠡ᠃ ᠪᠡᠰᠡ ᠨᠢᠬᠡ ᠬᠡᠯᠡᠯᠬᠡ ᠨᠢ ᠱᠠᠷ ᠤᠨ ᠭᠤᠤᠯ ᠤᠨ ᠬᠦᠪᠡᠬᠡᠨ ᠳᠤ ᠬᠡᠤᠬᠡᠳ ᠤᠳ ᠴᠢᠯᠠᠭᠤ ᠤᠪᠤᠭᠠᠯᠠᠨ ᠨᠠᠭᠠᠳᠴᠤ ᠪᠠᠶᠢᠬᠤ ᠳᠤ ᠴᠢᠯᠠᠭᠤ ᠶᠢ ᠨᠢ ᠴᠠᠭᠠᠨ ᠡᠷᠢᠶᠡᠨ ᠮᠤᠭᠠᠢ ᠢᠷᠡᠵᠤ ᠤᠷᠢᠶᠠᠨ ᠬᠡᠪᠳᠡᠵᠠᠢ᠃ ᠢᠨᠵᠠᠮᠰᠤ ᠬᠡᠳᠡᠭ ᠪᠯᠠᠮ᠎ᠠ ᠡᠨᠡᠬᠦ ᠮᠤᠭᠠᠢ ᠤᠷᠢᠶᠠᠭᠰᠠᠨ ᠴᠢᠯᠠᠭᠤᠨ ᠤ ᠲᠡᠷᠬᠡᠳᠡ ᠢᠷᠡᠵᠤ ᠰᠦ ᠡᠷᠬᠦᠬᠦ ᠳᠤ ᠮᠤᠭᠠᠢ ᠱᠠᠷ ᠤᠨ ᠭᠤᠤᠯ ᠵᠦᠭ ᠢᠶᠠᠨ ᠪᠤᠴᠠᠵᠠᠢ᠃ ᠲᠡᠬᠦᠨ ᠠᠴᠠ ᠬᠤᠶᠢᠰᠢ ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠪᠤᠰᠬᠠᠨ ᠲᠠᠬᠢᠭᠰᠠᠨ ᠬᠡᠨ᠎ᠡ᠃ ᠨᠦᠬᠦᠬᠡ ᠨᠢᠬᠡ ᠬᠡᠯᠡᠯᠬᠡ ᠨᠢ ᠬᠡᠤᠬᠡᠳ ᠲᠤᠭᠳᠠᠬᠤ ᠦᠭᠡᠢ ᠠᠶᠢᠯ ᠨᠢ ᠰᠦᠮ᠎ᠠ ᠰᠤᠪᠤᠷᠭ᠎ᠠ ᠳᠤ ᠤᠴᠢᠭᠠᠳ ᠦᠵᠡᠯᠬᠡ ᠠᠪᠤᠭᠠᠳ ᠲᠠᠷᠤᠯᠭ᠎ᠠ ᠲᠤᠮ ᠬᠢᠯᠬᠡᠨ ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠪᠤᠰᠬᠠᠨ ᠲᠠᠬᠢᠵᠠᠢ᠃ ᠡᠳᠡᠬᠡᠷ ᠬᠡᠯᠡᠯᠬᠡ ᠶᠢ ᠨᠢᠭᠳᠠᠯᠠᠨ ᠰᠢᠬᠦᠵᠤ ᠦᠵᠡᠪᠡᠯ ᠬᠡᠰᠢᠭᠳᠡᠨ ᠤ ᠱᠠᠷ ᠤᠨ ᠭᠤᠤᠯ ᠤᠨ ᠬᠦᠪᠡᠬᠡᠨ ᠳᠠᠬᠢ ᠮᠠᠯᠴᠢᠳ ᠨᠢ ᠭᠤᠤᠯ ᠳᠤ ᠬᠡᠤᠬᠡᠳ ᠢᠶᠠᠨ ᠠᠯᠳᠠᠭᠰᠠᠨ ᠶᠤᠮ ᠤᠤ᠂ ᠡᠰᠡᠬᠦᠯ᠎ᠡ ᠬᠡᠤᠬᠡᠳ ᠲᠤᠭᠳᠠᠬᠤ ᠦᠭᠡᠢ ᠠᠶᠢᠯ ᠤᠳ ᠤᠪᠤᠭ᠎ᠠ ᠪᠤᠰᠬᠠᠨ ᠲᠠᠬᠢᠭᠰᠠᠨ ᠪᠠ ᠡᠴᠢᠬᠡ ᠡᠬᠡ ᠪᠤᠯᠤᠭᠰᠠᠳ ᠦᠵᠡᠬᠦ ᠨᠢᠳᠤᠨ ᠤ ᠴᠡᠴᠡᠬᠡᠢ᠂ ᠦᠨᠦᠰᠬᠦ ᠬᠠᠮᠠᠷ ᠤᠨ ᠵᠠᠭᠠᠷ ᠪᠤᠯᠤᠭᠰᠠᠨ ᠠᠯᠠᠭ ᠦᠷ᠎ᠡ ᠎ ᠪᠠᠨ ᠡᠪᠡᠳᠴᠢᠨ ᠲᠠᠬᠤᠯ ᠦᠭᠡᠢ᠂ ᠡᠩᠬᠡ ᠮᠡᠨᠳᠤ ᠶᠠᠪᠤᠬᠤ ᠶᠢ ᠨᠢ ᠪᠡᠯᠬᠡᠰᠢᠶᠠᠨ ᠵᠦᠩᠨᠡᠵᠤ ᠪᠤᠰᠬᠠᠭᠰᠠᠨ ᠪᠠᠶᠢᠵᠤ ᠮᠡᠳᠡᠨ᠎ᠡ᠃       ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠬᠡᠵᠢᠶ᠎ᠡ ᠪᠤᠰᠬᠠᠭᠳᠠᠭᠰᠠᠨ ᠢ ᠲᠤᠳᠤᠯᠬᠤ ᠳᠤ ᠪᠡᠷᠬᠡ ᠪᠤᠯᠵᠠᠢ᠃ ᠨᠤᠳᠤᠭ ᠤᠨ ᠪᠤᠭᠤᠷᠤᠯᠴᠤᠳ ᠤᠨ ᠶᠠᠷᠢᠬᠤ ᠪᠠᠷ 1947 ᠤᠨ ᠤ ᠪᠠᠷᠤᠭ ᠢᠶᠠᠷ ᠲᠠᠬᠢᠯᠭ᠎ᠠ ᠵᠤᠭᠰᠤᠭᠰᠠᠨ ᠶᠤᠮ ᠬᠡᠨ᠎ᠡ᠃ 1982 ᠤᠨ ᠳᠤ ᠰᠡᠷᠬᠦᠬᠡᠨ ᠲᠠᠬᠢᠵᠤ ᠡᠳᠦᠬᠡ ᠪᠤᠯᠵᠤ ᠪᠠᠶᠢᠨ᠎ᠠ᠃ ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠨᠢ ᠬᠡᠤᠬᠡᠳ ᠎ ᠲᠠᠢ ᠬᠦᠮᠦᠨ ᠪᠦᠬᠦᠨ ᠪᠦᠷ ᠲᠠᠬᠢᠵᠠᠭᠠᠳᠠᠭ᠃ ᠠᠩᠬᠠᠨ ᠳᠠᠭᠠᠨ ᠶᠡᠷᠤ ᠶᠢᠨ ᠦᠶ᠎ᠡ ᠳᠤ ᠬᠡᠤᠬᠡᠳ ᠠᠶᠠᠬᠦᠶᠢᠳᠠᠨ ᠬᠠᠯᠠᠭᠤ ᠤᠷᠤᠵᠤ᠂ ᠲᠠᠭᠰᠢᠭᠤᠷ ᠬᠦᠷᠪᠡᠯ ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠵᠦᠭ ᠵᠤᠭᠤᠰ ᠡᠷᠬᠦᠨ᠂ ᠬᠡᠤᠬᠡᠳ ᠡᠪ ᠦᠭᠡᠢ ᠤᠬᠢᠯᠠᠵᠤ ᠤᠨᠵᠢᠪᠠᠯ ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠵᠦᠭ ᠰᠦ ᠡᠷᠬᠦᠨ᠎ᠡ᠂ ᠢᠩᠬᠢᠪᠠᠯ ᠵᠦᠬᠡᠷ ᠪᠤᠯᠴᠢᠬᠠᠳᠠᠭ ᠬᠡᠳᠡᠭ᠃ ᠬᠡᠤᠬᠡᠳ ᠢᠶᠠᠨ ᠠᠯᠳᠠᠪᠠᠯ ᠨᠠᠭᠠᠳᠴᠤ ᠪᠠᠶᠢᠭᠰᠠᠨ ᠨᠠᠭᠠᠳᠤᠮ᠂ ᠡᠮᠤᠰᠴᠤ ᠵᠡᠬᠦᠵᠤ ᠡᠳ᠋ᠯᠠᠵᠤ ᠬᠡᠷᠡᠭᠯᠡᠵᠤ ᠪᠠᠶᠢᠭᠰᠠᠨ ᠶᠠᠭᠤᠮ᠎ᠠ ᠶᠢ ᠨᠢ ᠬᠡᠤᠬᠡᠳ ᠤᠨ ᠤᠪᠤᠭᠠᠨ ᠳᠤ ᠠᠪᠠᠴᠢᠵᠤ ᠡᠷᠬᠦᠨ᠎ᠡ᠃ ᠨᠡᠩ ᠢᠯᠠᠩᠭᠤᠶ᠎ᠠ ᠵᠢᠯ ᠪᠦᠷᠢ ᠶᠢᠨ ᠪᠢᠯᠢᠭ ᠎ ᠤᠨ ᠤᠯᠠᠷᠢᠯ ᠤᠨ 5 ᠰᠠᠷ᠎ᠠ ᠶᠢᠨ 25᠎ ᠤ ᠡᠳᠤᠷ ᠬᠡᠤᠬᠡᠳ ᠤᠨ ᠤᠪᠤᠭᠠᠨ ᠲᠠᠬᠢᠯᠭ᠎ᠠ ᠶᠢᠨ ᠦᠶ᠎ᠡ ᠳᠤ ᠬᠡᠤᠬᠡᠳ ᠎ ᠢᠶᠠᠨ ᠠᠪᠠᠴᠢᠨ ᠤᠪᠤᠭᠠᠨ ᠳᠤ ᠵᠠᠪᠠᠯ ᠮᠦᠷᠬᠦᠬᠦᠯᠳᠡᠭ᠃ ᠲᠠᠶᠢᠮᠤ ᠠᠴᠠ ᠲᠤᠬᠠᠢ ᠶᠢᠨ ᠵᠢᠯ ᠬᠡᠤᠬᠡᠳ ᠤᠨ ᠤᠪᠤᠭᠠᠨ ᠲᠡᠭᠡᠷ᠎ᠡ ᠬᠡᠤᠬᠡᠳ ᠤᠨ ᠡᠳ᠋ᠯᠡᠳᠡᠭ ᠶᠠᠭᠤᠮ᠎ᠠ ᠤᠯᠠᠨ ᠪᠠᠶᠢᠭᠰᠠᠨ ᠪᠠᠶᠢᠵᠠᠢ᠃       ᠬᠡᠤᠬᠡᠳ ᠤᠨ ᠤᠪᠤᠭᠠᠨ ᠲᠤᠤᠷ᠎ᠠ ᠨᠢ ᠤᠭᠤᠷ ᠮᠠᠨᠴᠤ ᠶᠢᠨ ᠬᠢᠷᠢ ᠬᠦᠬᠦᠨ ᠴᠢᠯᠠᠭᠤ ᠲᠠᠢ᠂ ᠲᠡᠷᠡ ᠨᠢ ᠤᠭᠤᠷ ᠮᠠᠨᠴᠤ ᠶᠢᠨ ᠬᠢᠷᠢ ᠪᠦᠳᠦᠬᠦᠨ ᠤᠷᠳᠤ ᠲᠦᠷᠪᠡᠯᠵᠢᠨ ᠴᠢᠯᠠᠭᠤᠨ ᠤ ᠨᠢᠭᠡ ᠦᠵᠦᠬᠦᠷ ᠲᠤ ᠡᠵᠢ ᠬᠦᠮᠦᠨ ᠤ ᠬᠦᠬᠦ ᠶᠢ ᠰᠡᠶᠢᠯᠤᠨ ᠵᠠᠰᠠᠭᠠᠳ ᠱᠦᠩᠰᠢᠭ ᠪᠤᠯᠭᠠᠨ ᠲᠠᠷᠤᠵᠠᠢ᠃ ᠬᠡᠰᠢᠭᠳᠡᠨᠴᠤᠳ ᠤᠨ ᠲᠤᠮ ᠳᠤ᠂ ᠬᠡᠤᠬᠡᠳ ᠠᠶᠤᠵᠤ ᠰᠤᠴᠢᠬᠤ ᠠᠴᠠ ᠪᠤᠯᠵᠤ ᠬᠡᠪ ᠤᠨ ᠪᠠᠶᠢᠳᠠᠯ ᠢᠶᠠᠨ ᠠᠯᠳᠠᠪᠠᠯ ᠰᠦᠨᠡᠰᠤ ᠪᠠᠨ ᠬᠡᠬᠡᠴᠢᠬᠡᠯ᠎ᠡ ᠬᠡᠳ ᠡᠬᠡ ᠬᠦᠮᠦᠨ ᠬᠡᠤᠬᠡᠳ ᠢᠶᠠᠨ ᠲᠡᠷᠬᠡᠳᠡ ᠪᠠᠨ ᠵᠤᠭᠰᠤᠭᠠᠨ ᠦᠷᠯᠦᠬᠡ᠂ ᠦᠳᠠ᠂ ᠤᠷᠤᠢ ᠬᠡᠵᠤ ᠡᠳᠤᠷ ᠤᠨ ᠭᠤᠷᠪᠠᠨ ᠴᠠᠭ ᠢᠶᠠᠷ ᠰᠦᠨᠡᠰᠤ ᠶᠢ ᠨᠢ ᠲᠠᠭᠤᠳᠠᠨ᠎ᠠ᠃ ᠢᠩᠬᠢᠬᠦ ᠳᠡᠭᠡᠨ ᠡᠬᠡ ᠬᠦᠮᠦᠨ ᠪᠠᠷᠠᠭᠤᠨ ᠬᠦᠬᠦ ᠪᠠᠨ ᠪᠠᠷᠢᠵᠤ ᠬᠤᠷᠤᠶᠢᠯᠠᠬᠤ ᠶᠢᠨ ᠲᠠᠭᠠᠤ ᠠᠮᠠᠨ ᠳᠠᠭᠠᠨ ︽︵ᠬᠡᠤᠬᠡᠳ ᠤᠨ ᠢᠶᠠᠨ ᠨᠡᠷ᠎ᠡ ᠪᠠᠷ︶ ᠮᠢᠨᠤ ᠬᠦᠦ ᠡᠮᠧ ᠳᠡᠭᠡᠨ ᠢᠷ᠎ᠡ ᠡ︕ ᠡᠮᠧ ᠳᠡᠭᠡᠨ ᠢᠷ᠎ᠡ︕︾ ᠬᠡᠵᠤ ᠬᠤᠷᠤᠶᠢᠯᠠᠨ ᠭᠤᠷᠪᠠᠨ ᠡᠳᠤᠷ ᠳᠠᠭᠤᠳᠠᠪᠠᠯ ᠮᠢᠩᠭᠠᠨ ᠭᠠᠵᠠᠷ ᠤᠨ ᠬᠤᠯᠠ ᠪᠠᠶᠢᠭᠰᠠᠨ ᠴᠦ ᠬᠡᠤᠬᠡᠳ ᠤᠨ ᠰᠦᠨᠡᠰᠤ ᠡᠷᠬᠢᠵᠤ ᠢᠷᠡᠨ᠎ᠡ ᠬᠡᠳᠡᠭ᠃ ᠬᠡᠤᠬᠡᠳ ᠰᠦᠨᠡᠰᠤ ᠪᠠᠨ ᠬᠡᠬᠡᠪᠡᠯ ᠢᠩᠬᠢᠳᠡᠭ ᠎ ᠢᠶᠠᠷ ᠪᠠᠷᠠᠬᠤ ᠦᠭᠡᠢ ᠶᠡᠭᠡ ᠬᠦᠮᠦᠨ ᠴᠦ ᠰᠦᠨᠡᠰᠤ ᠪᠠᠨ ᠬᠡᠬᠡᠪᠡᠯ ᠡᠵᠢ ᠪᠤᠯᠤᠭᠰᠠᠳ ᠨᠢ ᠮᠦᠨ ᠲᠠᠭᠡᠷᠡᠬᠢ ᠲᠠᠢ ᠠᠳᠠᠯᠢᠬᠠᠨ ᠰᠦᠨᠡᠰᠤ ᠶᠢ ᠨᠢ ᠲᠠᠯᠠᠯᠤᠨ ᠲᠠᠭᠤᠳᠠᠳᠠᠭ᠃ ᠡᠬᠦᠨ ᠠᠴᠠ ᠦᠵᠡᠪᠠᠯ᠂ ᠡᠵᠢ ᠶᠢᠨ ᠬᠢᠨᠢ ᠠᠩᠬᠢᠷ ᠤᠭᠤᠷᠠᠭ ᠢᠪᠢᠯᠳᠡᠭ ︽ᠬᠦᠬᠦ︾᠎ ᠨᠢ ᠬᠡᠤᠬᠡᠳ ᠤᠨ ᠤᠪᠤᠭᠠᠨ ᠲᠤᠤᠷ᠎ᠠ ᠪᠠᠶᠢᠳᠠᠭ ᠤᠴᠢᠷ ᠠᠴᠠ ᠬᠡᠤᠬᠡᠳ ᠤᠨ ᠰᠦᠨᠡᠰᠤ ᠨᠢ ᠶᠠᠷᠢᠶᠠᠨ ᠦᠭᠡᠢ ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ︽ᠡᠵᠢ︾᠎ ᠳᠡᠭᠡᠨ ᠬᠤᠷᠭᠤᠳᠠᠨ ᠡᠷᠬᠢᠴᠡᠬᠦ ᠨᠢ ᠲᠠᠮᠵᠢᠭ ᠦᠭᠡᠢ᠃ ︽ᠤᠪᠤᠭ᠎ᠠ ᠡᠵᠢ︾᠎ ᠨᠢ ᠦᠪᠡᠷ ᠤᠨ ᠠᠯᠠᠭ ᠦᠷᠡᠰ ᠢᠶᠠᠨ ᠡᠪᠡᠳᠴᠢᠨ ᠲᠠᠬᠤᠯ ᠦᠭᠡᠢ ᠰᠠᠶᠢᠨ ᠰᠠᠶᠢᠬᠠᠨ ᠎ ᠤ ᠵᠦᠭ ᠲᠠᠮᠠᠤᠯᠤᠨ ᠬᠦᠳᠦᠯᠵᠤ ᠦᠷᠦᠰᠢᠶᠡᠨ ᠢᠪᠡᠬᠡᠬᠦ ᠨᠢ ᠴᠦ ᠲᠠᠮᠵᠢᠭ ᠦᠭᠡᠢ᠃       ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠨᠢ ᠮᠤᠩᠭᠤᠯᠴᠤᠳ ᠤᠨ ᠤᠪᠤᠭᠠᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠶᠤᠯ ᠤᠨ ᠤᠯᠠᠷᠢᠯ ᠬᠤᠪᠢᠷᠠᠯ ᠬᠡᠵᠤ ᠦᠵᠡᠵᠤ ᠪᠤᠯᠤᠮᠠᠷ᠃ ᠮᠤᠩᠭᠤᠯ ᠬᠦᠮᠦᠨ ᠪᠦᠬᠡ ᠮᠦᠷᠬᠦᠯ ᠤᠨ ᠶᠤᠰᠤ ᠪᠠᠷ ᠮᠦᠩᠬᠡ ᠲᠡᠭᠷᠢ ᠪᠠᠨ ᠲᠡᠭᠡᠳᠤᠯᠠᠨ ᠰᠢᠳᠤᠵᠤ᠂ ︽ᠲᠡᠭᠷᠢ ᠠᠪᠤ ᠦᠷᠦᠰᠢᠶᠠ︕︾ ᠬᠡᠵᠤ ᠠᠯᠢᠪᠠ ᠪᠦᠬᠦᠨ ᠢᠶᠠᠨ ᠬᠠᠮᠤᠭ ᠤᠨ ᠦᠨᠳᠤᠷ ᠠᠭᠤᠯᠠ ᠶᠢᠨ ᠤᠷᠤᠢ ᠳᠤ᠂ ᠲᠡᠭᠷᠢ ᠲᠠᠢ ᠬᠠᠮᠤᠭ ᠠᠴᠠ ᠤᠶᠢᠷᠠᠬᠠᠨ ᠭᠠᠵᠠᠷ ᠤᠴᠢᠨ ᠲᠠᠭᠠᠳᠬᠠᠨ ᠮᠦᠷᠬᠦᠳᠡᠭ᠃ ᠬᠡᠬᠦ ᠳᠤ ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠨᠢ ᠡᠵᠢ ᠬᠦᠮᠦᠨ ᠢ ︽ᠮᠦᠩᠬᠡ ᠲᠡᠭᠷᠢ︾᠎ ᠲᠠᠢ ᠵᠡᠷᠬᠡᠴᠡᠬᠦᠯᠦᠨ ᠰᠢᠳᠤᠵᠤ᠂ ︽ᠡᠵᠢ ᠮᠢᠨᠢ ᠬᠡᠤᠬᠡᠳ ᠢᠶᠠᠨ ᠦᠷᠦᠰᠢᠶᠡ︕︾ ᠬᠡᠳᠡᠭ ᠰᠠᠨᠠᠭ᠎ᠠ ᠲᠠᠢ ᠪᠤᠯᠭᠠᠨ ᠰᠢᠳᠦᠬᠡᠨᠴᠢᠯᠡᠵᠠᠢ᠃ ᠲᠠᠶᠢᠮᠤ ᠠᠴᠠ ᠬᠡᠰᠢᠭᠳᠡᠨ ᠤ ᠬᠡᠤᠬᠡᠳ ᠤᠨ ᠤᠪᠤᠭ᠎ᠠ ᠨᠢ ᠮᠤᠩᠭᠤᠯᠴᠤᠳ ᠤᠨ ᠤᠵᠤᠭᠤᠷ ᠡᠷᠳᠡᠨ ᠤ ᠵᠠᠩ ᠠᠭᠠᠯᠢ᠂ ᠠᠮᠢᠳᠤᠷᠠᠯ ᠠᠬᠤᠢ᠂ ᠰᠤᠶᠤᠯ ᠰᠡᠳᠬᠢᠬᠦᠢ ᠶᠢ ᠰᠤᠳᠤᠯᠬᠤ ᠳᠤ ᠦᠨ᠎ᠡ ᠴᠡᠨ᠎ᠡ ᠲᠠᠢ ᠰᠤᠳᠤᠯᠤᠭᠳᠠᠬᠤᠨ ᠪᠤᠯᠬᠤ ᠨᠢ ᠲᠠᠮᠵᠢᠭ ᠦᠭᠡᠢ᠃        ︵ᠲᠤᠰ ᠵᠤᠬᠢᠶᠠᠯ ᠢ ᠲᠠᠷᠬᠠᠬᠠᠭᠤᠯᠠ ᠰᠤᠮᠤᠨ ᠤ ᠪᠠᠶᠠᠨᠰᠢᠯᠢ ᠭᠠᠴᠠᠭᠠᠨ ᠤ ᠬᠦᠨᠳᠤᠳᠤ ᠪᠠᠭᠰᠢ ᠲᠤᠭᠳᠠᠬᠤ ᠵᠢᠴᠢ ᠲᠡᠬᠦᠨ ᠤ ᠬᠡᠷᠬᠡᠢ ᠠᠴᠠ ᠠᠰᠠᠭᠤᠨ ᠲᠡᠮᠳᠡᠭᠯᠡᠵᠤ ᠡᠮᠬᠢᠳᠬᠡᠵᠤ ᠨᠠᠶᠢᠷᠠᠭᠤᠯᠪᠠ᠃ ᠠᠳᠠ ᠨᠤᠳᠤᠭ ᠎ ᠤᠨ ᠢᠶᠠᠨ ᠦᠪ ᠰᠤᠶᠤᠯ ᠢ ᠲᠠᠭᠡᠳᠦᠯᠡᠵᠤ ᠶᠠᠪᠤᠳᠠᠭ ᠲᠡᠳᠡᠨ ᠳᠡᠭᠡᠨ ᠬᠦᠨ ᠲᠠᠯᠠᠷᠬᠠᠯ ᠢᠶᠠᠨ ᠲᠡᠪᠰᠢᠬᠦᠯᠦᠶ᠎ᠡ︕︶ 
  
ᠢᠷᠡᠯᠲᠡ᠄ ︽ᠬᠡᠰᠢᠭᠳᠡᠨ ᠤ ᠠᠶᠠᠯᠠᠯ ᠵᠢᠭᠤᠯᠴᠢᠯᠠᠯ ᠤᠨ ᠰᠤᠶᠤᠯ︾
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号