ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠲᠡᠤᠬᠡᠨ ᠦᠯᠢᠬᠡᠷ ︵ᠠᠷᠪᠠᠨ ᠬᠤᠶᠠᠷ︶ — ᠭᠤᠷᠪᠠᠨ ᠮᠡᠷᠬᠢᠳ ᠤᠨ ᠲᠤᠪᠳᠤᠯᠤᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/5/29
        ᠲᠡᠮᠦᠵᠢᠨ ᠪᠦᠷᠳᠠ ᠦᠵᠢᠨ ᠢ ᠠᠪᠤᠭᠠᠳ ᠲᠠᠮᠠᠢ ᠤᠳᠠᠯ ᠦᠭᠡᠢ ᠪᠤᠷᠬᠠᠨ ᠬᠠᠯᠳᠤᠨ ᠤ ᠦᠪᠤᠷ ᠤᠷᠤᠰᠢᠬᠤ ᠰᠡᠩᠬᠦᠷ ᠭᠤᠷᠤᠬᠠᠨ ᠤ ᠬᠠᠷ᠎ᠠ ᠵᠢᠷᠦᠬᠡᠨ ᠳᠠᠬᠢ ᠬᠦᠬᠡ ᠠᠭᠤᠷ ᠠᠴᠠ ᠬᠡᠷᠦᠯᠦᠨ ᠮᠦᠷᠡᠨ ᠤ ᠡᠷᠬᠢ ᠳᠠᠬᠢ ᠪᠦᠷᠬᠢ ᠡᠷᠬᠢ ᠬᠡᠬᠦ ᠭᠠᠵᠠᠷ ᠨᠡᠬᠦᠵᠤ ᠪᠠᠭᠤᠪᠠ᠃       ᠨᠢᠬᠡᠨ ᠡᠳᠤᠷ᠂ ᠲᠡᠮᠦᠵᠢᠨ᠂ ᠡᠴᠢᠬᠡ ᠶᠢᠨ ᠢᠶᠠᠨ ᠬᠠᠭᠤᠴᠢᠨ ᠠᠨᠳᠠ ᠬᠡᠷᠡᠶᠢᠳ ᠠᠶᠢᠮᠠᠭ ᠤᠨ ᠲᠤᠭᠤᠷᠢᠯ ᠬᠠᠨ ᠢ ᠰᠠᠨᠠᠭᠠᠯᠵᠠᠨ᠂ ᠪᠦᠷᠳᠠ ᠶᠢ ᠪᠠᠭᠤᠯᠭᠠᠵᠤ ᠠᠪᠬᠤ ᠦᠶ᠎ᠡ ᠳᠤ ᠬᠠᠳᠠᠮ ᠡᠬᠡ ᠴᠤᠳᠠᠨ ᠡᠬᠡ ᠶᠢᠨ ᠡᠮᠤᠰᠬᠡᠯ ᠬᠡᠵᠤ ᠠᠪᠴᠢᠷᠠᠭᠰᠠᠨ ᠬᠠᠷ᠎ᠠ ᠪᠤᠯᠠᠭᠠᠨ ᠲᠠᠬᠤ ᠶᠢ ᠠᠪᠴᠤ ᠲᠤᠭᠤᠷᠢᠯ ᠬᠠᠨ ᠢ ᠦᠵᠡᠬᠦ ᠪᠠᠷ ᠬᠠᠰᠠᠷ᠂ ᠪᠡᠯᠬᠦᠳᠠᠢ ᠬᠤᠶᠠᠷ ᠲᠡᠬᠦᠦ ᠪᠠᠨ ᠲᠠᠭᠠᠭᠤᠯᠤᠨ ᠲᠤᠤᠯᠠ ᠭᠤᠤᠯ ᠤᠨ ᠬᠠᠷ᠎ᠠ ᠰᠢᠭᠤᠢ ᠶᠢ ᠵᠤᠷᠢᠨ ᠤᠳᠪᠠ᠃ ᠲᠡᠮᠦᠵᠢᠨ ᠲᠡᠨᠳᠡ ᠬᠦᠷᠴᠤ ᠲᠤᠭᠤᠷᠢᠯ ᠬᠠᠨ ᠳᠤ ᠵᠤᠯᠭᠠᠨ᠄       ︽ᠡᠴᠢᠬᠡ ᠶᠢᠨ ᠬᠠᠭᠤᠴᠢᠨ ᠠᠨᠳᠠ ᠲᠠᠨ ᠢ ᠡᠴᠢᠬᠡ ᠮᠢᠨᠢ ᠠᠳᠠᠯᠢ ᠪᠤᠶᠤ ᠬᠡᠵᠤ ᠪᠢ ᠡᠮᠤᠰᠬᠡᠯ ᠬᠠᠷ᠎ᠠ ᠪᠤᠯᠠᠭᠠᠨ ᠲᠠᠬᠤ ᠶᠢ ᠲᠠᠨ ᠳᠤ ᠠᠪᠴᠢᠷᠠᠪᠠ︾ ᠬᠡᠵᠤ ᠪᠤᠯᠠᠭᠠᠨ ᠲᠠᠬᠤ ᠪᠠ ᠪᠤᠰᠤᠳ ᠪᠡᠯᠡᠭ ᠢᠶᠠᠨ ᠪᠠᠷᠢᠵᠤ ᠮᠦᠷᠬᠦᠪᠡ᠃ ᠲᠤᠭᠤᠷᠢᠯ ᠬᠠᠨ ᠮᠠᠰᠢ ᠪᠠᠶᠠᠰᠴᠤ᠂ ᠲᠠᠮᠦᠵᠢᠨ ᠢ ᠡᠷᠬᠦᠨ ᠪᠤᠰᠬᠠᠵᠤ ᠬᠡᠯᠡᠭᠰᠡᠨ ᠨᠢ᠄       ︽ᠬᠠᠷ᠎ᠠ ᠪᠤᠯᠠᠭᠠᠨ ᠲᠠᠬᠤ ᠶᠢᠨ ᠴᠢᠨᠢ ᠬᠠᠷᠢᠭᠤ ᠳᠤ       ᠬᠠᠭᠠᠴᠠᠭᠰᠠᠨ ᠤᠯᠤᠰ ᠢ ᠴᠢᠨᠢ       ᠬᠠᠮᠳᠤᠳᠬᠠᠵᠤ ᠦᠭᠬᠦᠶ᠎ᠡ᠃       ᠪᠤᠯᠠᠭᠠᠨ ᠲᠠᠬᠤ ᠶᠢᠨ ᠴᠢᠨᠢ ᠬᠠᠷᠢᠭᠤ ᠳᠤ       ᠪᠤᠳᠠᠷᠠᠭᠰᠠᠨ ᠤᠯᠤᠰ ᠢ ᠴᠢᠨᠢ       ᠴᠤᠭᠯᠠᠭᠤᠯᠵᠤ ᠦᠭᠬᠦᠶ᠎ᠡ᠃       ᠪᠦᠬᠡᠷ᠎ᠡ ᠨᠢ ᠪᠦᠭᠰᠡᠨ ᠳᠤ ᠪᠠᠶᠢᠭ       ᠴᠡᠷ ᠨᠢ ᠴᠡᠬᠡᠵᠢᠨ ᠳᠤ ᠪᠠᠶᠢᠭ①       ᠠᠬ᠎ᠠ ᠵᠠᠬ᠎ᠠ ᠲᠠᠢ ᠪᠤᠯᠤᠭ︾ ᠬᠡᠪᠡ᠃       ᠲᠠᠮᠤᠵᠢᠨ ᠨᠠᠷ ᠲᠤᠭᠤᠷᠢᠯ ᠬᠠᠨ ᠤ ᠲᠡᠨᠳᠡ ᠨᠢᠬᠡ ᠬᠤᠨᠤᠭᠠᠳ᠂ ᠮᠠᠷᠭᠠᠰᠢ ᠨᠢ ᠪᠤᠴᠠᠵᠤ ᠢᠷᠡᠬᠡᠳ ᠮᠦᠨ ᠪᠦᠷᠬᠢ ᠡᠷᠬᠢ ᠳᠡᠭᠡᠨ ᠨᠤᠳᠤᠭᠯᠠᠨ ᠰᠠᠭᠤᠪᠠ᠃ ᠲᠡᠷᠡ ᠵᠠᠭᠤᠷ᠎ᠠ ᠪᠤᠷᠬᠠᠨ ᠬᠠᠯᠳᠤᠨ ᠠᠴᠠ ᠤᠷᠢᠶᠠᠩᠬᠠᠢ ᠤᠪᠤᠭ ᠤᠨ ᠵᠠᠷᠴᠢᠭᠤᠳᠠᠢ ᠡᠪᠤᠬᠡᠨ ᠬᠦᠬᠡᠷᠬᠡ ᠡᠬᠦᠷᠴᠤ᠂ ᠵᠠᠯᠮ᠎ᠠ ᠨᠡᠷᠡᠳᠤ ᠬᠦᠦ ᠪᠠᠨ ᠲᠠᠭᠠᠭᠤᠯᠤᠨ ᠢᠷᠡᠪᠡ᠃ ᠵᠠᠷᠴᠢᠭᠤᠳᠠᠢ ᠡᠪᠤᠬᠡᠨ ᠦᠬᠡᠯᠦᠨ ᠡᠬᠡ ᠶᠢᠨ ᠠᠮᠤᠷ ᠮᠡᠨᠳᠤ ᠶᠢ ᠠᠰᠠᠭᠤᠭᠠᠳ᠂ ᠬᠦᠦ ᠪᠠᠨ ᠲᠡᠮᠦᠵᠢᠨ ᠳᠤ ᠲᠤᠰᠢᠶᠠᠨ ᠦᠭᠴᠤ᠄       ︽ᠠᠩᠬ᠎ᠠ ᠤᠨᠤᠨ ᠮᠦᠷᠡᠨ ᠤ ᠲᠡᠯᠢᠬᠦᠨ ᠪᠤᠯᠳᠠᠭ ᠬᠡᠬᠦ ᠭᠠᠵᠠᠷ ᠲᠡᠮᠦᠵᠢᠨ ᠴᠢᠮᠠᠢᠢ ᠲᠦᠷᠦᠬᠦ ᠎ ᠳᠤ ᠪᠤᠯᠠᠭᠠᠨ ᠦᠯᠦᠬᠡᠢ ᠦᠭᠬᠦᠭᠰᠡᠨ ᠪᠠ ᠡᠨᠡ ᠵᠠᠯᠮ᠎ᠠ ᠬᠦᠦ ᠶᠢ ᠬᠤᠵᠢᠮ ᠴᠢᠮ᠎ᠡ ᠳᠤ ᠦᠭᠬᠦᠶ᠎ᠡ ᠬᠡᠵᠤ ᠠᠮᠠᠯᠠᠭᠰᠠᠨ ᠪᠢᠯᠡ᠃ ᠤᠳᠤ ᠴᠢ ᠡᠷ᠎ᠡ ᠶᠢᠨ ᠴᠡᠬᠡᠯ ᠳᠤ ᠬᠦᠷᠴᠤ ᠡᠷᠬᠡ ᠮᠡᠳᠡᠬᠦ ᠪᠤᠯᠪᠠ᠂ ᠪᠢ ᠬᠦᠦ ᠪᠠᠨ ᠴᠢᠮ᠎ᠠ ᠳᠤ ᠠᠪᠴᠢᠷᠠᠵᠤ ᠦᠭᠬᠦᠪᠡ᠃ ᠴᠢ ᠲᠡᠬᠦᠨ ᠢᠶᠠᠷ       ᠡᠬᠦᠳᠠ ᠪᠠᠨ ᠡᠷᠬᠦᠬᠦᠯ       ᠡᠮᠡᠬᠡᠯ ᠢᠶᠠᠨ ᠲᠤᠬᠤᠭᠤᠯ︾ ᠬᠡᠪᠡ᠃       ᠢᠩᠬᠢᠬᠡᠳ ᠲᠡᠮᠦᠵᠢᠨ ᠤᠷᠢᠳ ᠬᠠᠨᠢᠯᠠᠭᠰᠠᠨ ᠪᠤᠭᠤᠷᠴᠢ᠂ ᠤᠳᠤ ᠤᠯᠤᠭᠰᠠᠨ ᠵᠠᠯᠮ᠎ᠡ ᠲᠠᠢ ᠬᠦᠴᠤ ᠬᠠᠮᠳᠤᠳᠠᠨ ᠮᠦᠨ ᠭᠠᠵᠠᠷ ᠨᠤᠳᠤᠭᠯᠠᠨ ᠰᠠᠭᠤᠵᠤ ᠲᠦᠷ ᠵᠠᠭᠤᠷ᠎ᠠ ᠠᠮᠤᠷ ᠲᠠᠶᠢᠪᠤᠭᠤ ᠪᠠᠶᠢᠯ᠎ᠠ᠃ ᠬᠡᠳᠡᠯ᠎ᠡ ᠲᠡᠷᠡ ᠦᠶ᠎ᠡ ᠶᠢᠨ ᠮᠤᠩᠭᠤᠯ ᠤᠨ ᠲᠠᠯ᠎ᠠ ᠨᠤᠳᠤᠭ ᠨᠢ       ᠤᠳᠤᠳᠠᠢ ᠲᠡᠭᠷᠢ ᠤᠷᠴᠢᠵᠤ       ᠤᠯᠠᠨ ᠤᠯᠤᠰ ᠪᠠᠶᠢᠯᠳᠤᠵᠤ       ᠤᠷᠤᠨ ᠳᠠᠭᠠᠨ ᠤᠨᠳᠠᠬᠤ ᠵᠠᠪ ᠦᠭᠡᠢ       ᠤᠯᠵᠠᠯᠠᠯᠳᠤᠨ ᠪᠤᠯᠢᠶᠠᠯᠳᠤᠵᠤ       ᠬᠦᠷᠦᠰᠤᠳᠤ ᠲᠡᠯᠡᠬᠡᠢ ᠬᠦᠷᠪᠡᠵᠤ       ᠬᠦᠪᠴᠢᠨ ᠤᠯᠤᠰ ᠬᠢᠮᠤᠷᠠᠯᠳᠤᠵᠤ       ᠬᠦᠨᠵᠢᠯᠡ ᠳᠡᠭᠡᠨ ᠤᠨᠳᠠᠬᠤ ᠵᠠᠪ ᠦᠭᠡᠢ       ᠬᠦᠨᠦᠬᠡᠯᠳᠤᠨ ᠲᠡᠮᠡᠴᠡᠵᠤ ᠪᠠᠶᠢᠭᠰᠠᠨ ᠴᠠᠭ ᠲᠤᠯᠠ ᠠᠮᠤᠷ ᠵᠢᠮᠤᠷ ᠰᠠᠭᠤᠬᠤ ᠴᠠᠭ ᠬᠡᠵᠤ ᠬᠠᠮᠢᠭ᠎ᠠ ᠠᠴᠠ ᠤᠯᠳᠠᠬᠤ ᠪᠤᠢ᠃       ᠨᠢᠬᠡᠨ ᠦᠷᠯᠦᠬᠡ᠂ ᠦᠬᠡᠯᠦᠨ ᠡᠬᠡ ᠶᠢᠨ ᠬᠡᠷ ᠤᠨ ᠵᠠᠷᠤᠴᠠ ᠬᠤᠸᠠᠭᠴᠢᠨ ᠡᠮᠡᠬᠡᠨ ᠡᠷᠳᠡ ᠪᠤᠰᠤᠭᠠᠳ ᠭᠠᠳᠠᠨ᠎ᠠ ᠭᠠᠷᠳᠠᠯ᠎ᠠ ᠠᠯᠤᠰ ᠲᠡᠷᠳᠡᠭᠡ ᠭᠠᠵᠠᠷ ᠲᠡᠯᠪᠡᠷᠡᠬᠦ ᠮᠡᠳᠤ ᠴᠢᠮᠡᠭᠡ ᠭᠠᠷᠴᠤ ᠮᠤᠷᠢᠨ ᠤ ᠲᠦᠪᠡᠷᠬᠡᠨ ᠰᠤᠨᠤᠰᠳᠠᠪᠠ᠃ ᠬᠤᠸᠠᠭᠴᠢᠨ ᠡᠮᠡᠬᠡᠨ ᠦᠬᠡᠯᠦᠨ ᠡᠬᠡ ᠶᠢᠨ ᠬᠡᠷ ᠲᠤ ᠬᠦᠶᠦᠨ ᠤᠷᠤᠵᠤ᠄       ︽ᠡᠬᠡ ᠡ᠂ ᠡᠬᠡ ᠡ︕ ᠦᠳᠳᠡᠷ ᠪᠤᠰ᠂ ᠭᠠᠵᠠᠷ ᠲᠡᠯᠪᠡᠷᠡᠬᠦ ᠮᠡᠳᠤ ᠮᠤᠷᠢᠨ ᠤ ᠲᠦᠪᠡᠷᠬᠡᠨ ᠰᠤᠨᠤᠰᠳᠠᠵᠤ ᠪᠠᠶᠢᠨ᠎ᠠ᠂ ᠤᠷᠰᠢᠭᠳᠤ ᠲᠠᠶᠢᠰᠤᠨ ᠢᠷᠡᠬᠦ ᠨᠢ ᠪᠤᠯᠤᠯᠳᠠᠢ︾ ᠬᠡᠵᠤ ᠦᠬᠡᠯᠦᠨ ᠡᠬᠡ ᠶᠢ ᠰᠡᠷᠢᠬᠡᠪᠡ᠃       ᠦᠬᠡᠯᠦᠨ ᠡᠬᠡ ︽ᠬᠡᠤᠬᠡᠳ ᠢ ᠰᠡᠷᠢᠬᠦᠯᠦᠭᠳᠤᠨ︾ ᠬᠡᠳ ᠦᠪᠡᠷ ᠢᠶᠠᠨ ᠲᠠᠷᠤᠢ ᠪᠤᠰᠪᠠ᠃ ᠲᠡᠮᠦᠵᠢᠨ ᠪᠤᠰᠴᠤ ᠭᠠᠷᠤᠭᠠᠳ ᠲᠠᠶᠢᠰᠤᠨ ᠤ ᠪᠠᠷ᠎ᠠ ᠶᠢ ᠬᠠᠷᠠᠪᠠᠯ ᠲᠤᠩ ᠤᠯᠠᠨ ᠬᠦᠮᠦᠨ ᠢᠷᠡᠬᠦ ᠨᠢ ᠪᠤᠯᠤᠯᠳᠠᠢ᠂ ᠦᠷ᠎ᠡ ᠴᠠᠶᠢᠬᠤ ᠶᠢᠨ ᠡᠮᠤᠨᠡᠬᠢ ᠪᠦᠷᠦᠭ ᠪᠠᠷᠤᠭ ᠤᠨ ᠲᠤᠮᠳᠠ ᠬᠦᠮᠦᠰ ᠤᠨ ᠬᠠᠰᠬᠢᠷᠦᠯᠳᠤᠬᠤ ᠲᠠᠭᠤ ᠬᠢᠬᠡᠳ ᠮᠤᠷᠢᠨ ᠎ ᠤ ᠲᠠᠪᠬᠢᠯᠳᠤᠬᠤ ᠲᠠᠭᠤ ᠲᠠᠢ ᠨᠡᠶᠢᠯᠡᠨ ᠠᠭᠤᠯᠠ ᠶᠡᠬᠦᠷᠡᠵᠤ ᠭᠠᠵᠠᠷ ᠴᠦᠮᠦᠷᠡᠵᠤ ᠪᠠᠶᠢᠬᠤ ᠮᠡᠳᠤ ᠲᠦᠷᠬᠢᠷᠡᠯᠳᠤᠵᠤ ᠪᠠᠶᠢᠯ᠎ᠠ᠃ ᠲᠡᠮᠦᠵᠢᠨ ᠡᠨᠡ ᠴᠤᠴᠢᠮᠠᠭ ᠢᠷᠡᠭᠰᠡᠨ ᠲᠠᠶᠢᠰᠤᠨ ᠢ ᠡᠰᠡᠷᠬᠦᠴᠡᠨ ᠲᠠᠶᠢᠯᠬᠦ ᠦᠭᠡᠢ ᠶᠢ ᠮᠡᠳᠡᠵᠤ᠂ ᠲᠦᠷ ᠵᠠᠶᠢᠯᠠᠬᠤ ᠪᠠᠷ ᠲᠤᠭᠳᠠᠵᠤ ᠲᠡᠮᠦᠵᠢᠨ᠂ ᠦᠬᠡᠯᠦᠨ ᠡᠬᠡ᠂ ᠬᠠᠰᠠᠷ᠂ ᠬᠠᠴᠢᠭᠤᠨ᠂ ᠲᠡᠮᠦᠬᠡ ᠤᠳᠴᠢᠬᠡᠨ᠂ ᠪᠡᠯᠬᠦᠳᠠᠢ ᠂ ᠪᠤᠭᠤᠷᠴᠢ᠂ ᠵᠠᠯᠮ᠎ᠠ ᠨᠡᠷ ᠲᠤᠰᠪᠤᠷᠢ ᠨᠢᠬᠡ ᠮᠤᠷᠢ ᠤᠨᠤᠵᠤ᠂ ᠲᠡᠮᠦᠯᠦᠨ ᠢ ᠦᠬᠡᠯᠦᠨ ᠡᠬᠡ ᠲᠡᠬᠦᠷᠪᠡ᠃ ᠪᠠᠰᠠ ᠨᠢᠬᠡ ᠮᠤᠷᠢ ᠪᠠᠶᠢᠭᠰᠠᠨ ᠳᠤ ᠪᠠᠭ᠎ᠠ ᠰᠠᠭ᠎ᠠ ᠶᠠᠭᠤᠮ᠎ᠠ ᠬᠡᠤᠮ᠎ᠠ ᠠᠴᠢᠵᠤ ᠬᠦᠳᠦᠯᠪᠡ᠃ ᠪᠦᠷᠳᠡ ᠦᠵᠢᠨ ᠪᠡᠶ᠎ᠡ ᠰᠢᠯᠳᠠᠭᠠᠳᠠᠢ② ᠪᠠᠶᠢᠭᠰᠠᠨ ᠲᠤᠯᠠ ᠮᠤᠷᠢ ᠤᠨᠤᠬᠤ ᠠᠴᠠ ᠪᠡᠷᠬᠡᠰᠢᠶᠡᠵᠤ᠂ ᠲᠡᠷᠬᠡᠨ ᠳᠤ ᠰᠠᠭᠤᠬᠤ ᠠᠴᠠ ᠦᠬᠡᠷ᠎ᠡ ᠠᠷᠭ᠎ᠠ ᠦᠭᠡᠢ ᠪᠤᠯᠪᠠ᠃       ᠲᠡᠮᠦᠵᠢᠨ ᠨᠠᠷ ᠮᠤᠷᠳᠠᠵᠤ ᠪᠤᠷᠬᠠᠨ ᠬᠠᠯᠳᠤᠨ ᠤ ᠵᠦᠭ ᠤᠳᠪᠠ᠃ ᠬᠤᠸᠠᠭᠴᠢᠨ ᠡᠮᠡᠬᠡᠨ ᠪᠦᠷᠳᠠ ᠦᠵᠢᠨ ᠢ ᠬᠠᠷᠭᠤᠳᠠᠢ ᠲᠡᠷᠬᠡᠨ ᠳᠤ ᠤᠷᠤᠭᠤᠯᠵᠤ ᠨᠢᠭᠤᠭᠠᠳ᠂ ᠲᠡᠭᠡᠬᠦᠷ ᠨᠢ ᠡᠳ᠋ ᠪᠠᠷᠠᠭ᠎ᠠ ᠪᠠᠨ ᠤᠪᠤᠭᠠᠯᠠᠨ ᠲᠡᠭᠡᠭᠡᠵᠤ᠂ ᠪᠦᠬᠡᠷ᠎ᠡ ᠠᠯᠠᠭ ᠦᠬᠡᠷ ᠢᠶᠠᠨ ᠬᠦᠯᠯᠡᠵᠤ ᠲᠦᠩᠬᠡᠯᠢᠭ ᠭᠤᠷᠤᠬᠠᠨ ᠤᠷᠤᠭᠤ ᠬᠦᠳᠡᠯᠪᠡ᠃ ᠲᠡᠳᠡᠨ ᠢ ᠠᠭᠤᠯᠠ ᠦᠭᠰᠤᠵᠤ ᠲᠦᠩᠬᠡᠯᠢᠭ ᠭᠤᠷᠤᠬᠠᠨ᠎ᠠ ᠬᠦᠷᠬᠦ ᠳᠤ ᠰᠠᠶ᠋ᠢ ᠦᠷ ᠴᠠᠶᠢᠵᠤ ᠪᠠᠶᠢᠪᠠ᠃ ᠡᠨᠡ ᠦᠶ᠎ᠡ ᠎ ᠳᠤ ᠲᠡᠳᠡᠨ ᠤ ᠡᠰᠡᠷᠬᠦ ᠠᠴᠠ ᠬᠡᠨᠡᠳᠳᠠ ᠲᠠᠶᠢᠰᠤᠨ ᠤ ᠴᠡᠷᠢᠭ ᠤᠳ ᠭᠠᠷᠴᠤ ᠢᠷᠡᠬᠡᠳ᠄       ︽ᠴᠢ ᠶᠠᠭᠤᠨ ᠬᠦᠮᠦᠨ ᠪᠤᠢ︖ ᠡᠶᠢᠮᠤ ᠡᠷᠳᠡ ᠬᠠᠮᠢᠭ᠎ᠠ ᠶᠠᠪᠤᠵᠤ ᠪᠠᠶᠢᠭ᠎ᠠ ᠶᠤᠮ︖︾ ᠬᠡᠵᠤ ᠠᠰᠠᠭᠤᠪᠠ᠃ ᠬᠤᠸᠠᠭᠴᠢᠨ ᠡᠮᠡᠬᠡᠨ ᠲᠡᠪᠡᠳᠡᠵᠤ ᠰᠠᠨᠳᠤᠷᠤᠭᠰᠠᠨ ᠪᠤᠯᠪᠠᠴᠤ ᠲᠡᠷᠡ ᠲᠤᠤᠷ᠎ᠠ ᠪᠠᠨ ᠤᠬᠠᠭᠠᠨ ᠤᠷᠤᠵᠤ᠄       ︽ᠪᠢ ᠲᠡᠮᠦᠵᠢᠨ ᠤ ᠬᠡᠷ ᠤᠨ ᠵᠠᠷᠤᠴᠠ᠂ ᠶᠡᠭᠡ ᠬᠡᠷ ᠲᠤ ᠬᠤᠨᠢ ᠬᠢᠷᠭᠠᠬᠤ ᠪᠠᠷ ᠢᠷᠡᠭᠰᠡᠨ ᠪᠢᠯᠡ᠃ ᠤᠳᠤ ᠦᠷᠯᠦᠬᠡ ᠶᠢᠨ ᠰᠡᠷᠢᠬᠦᠨ ᠳᠤ ᠵᠠᠪᠳᠤᠵᠤ ᠬᠡᠷ ᠲᠡᠭᠡᠨ ᠤᠩᠭᠠᠰᠤ ᠲᠡᠭᠡᠭᠡᠵᠤ ᠶᠠᠪᠤᠨ᠎ᠠ︾ ᠬᠡᠪᠡ᠃ ᠲᠡᠷᠡ ᠴᠡᠷᠢᠭ ᠤᠳ᠄       ︽ᠲᠡᠮᠦᠵᠢᠨ ᠬᠡᠷ ᠲᠡᠭᠡᠨ ᠪᠠᠶᠢᠨ᠎ᠠ ᠤᠤ︖ ᠬᠡᠷ ᠨᠢ ᠬᠠᠮᠢᠭ᠎ᠠ ᠪᠤᠢ︖︾ ᠬᠡᠪᠡ᠃ ᠬᠤᠸᠠᠭᠴᠢᠨ ᠡᠮᠡᠬᠡᠨ ᠤᠳᠤ ᠪᠠᠭ᠋ᠠᠨ ᠲᠠᠶᠢᠪᠤᠰᠢᠷᠡᠨ᠄       ︽ᠬᠡᠷ ᠨᠢ ᠡᠨᠡᠬᠡᠨ ᠤᠶᠢᠷ᠎ᠠ ᠪᠠᠶᠢᠨ᠎ᠠ᠃ ᠲᠡᠮᠦᠵᠢᠨ ᠤ ᠬᠡᠷ ᠲᠡᠭᠡᠨ ᠪᠠᠶᠢᠬᠤ ᠡᠰᠡᠬᠦ ᠶᠢ ᠪᠢ ᠮᠡᠳᠡᠬᠦ ᠦᠭᠡᠢ᠂ ᠪᠢ ᠦᠷᠯᠦᠬᠡ ᠡᠷᠳᠡ ᠠᠷᠤ ᠬᠡᠷ ᠠᠴᠠ ᠭᠠᠷᠴᠤ ᠢᠷᠡᠪᠡ︾ ᠬᠡᠪᠡ᠃       ᠲᠡᠷᠡ ᠴᠡᠷᠢᠭ ᠤᠳ ᠲᠠᠷᠤᠢ ᠲᠡᠮᠦᠵᠢᠨ ᠤ ᠬᠡᠷ ᠵᠦᠭ ᠲᠠᠪᠬᠢᠯᠳᠤᠨ ᠤᠳᠪᠠ᠃ ᠬᠤᠸᠠᠭᠴᠢᠨ ᠡᠮᠡᠬᠡᠨ ᠪᠦᠬᠡᠷ᠎ᠡ ᠠᠯᠠᠭ ᠦᠬᠡᠷ ᠢᠶᠠᠨ ᠲᠠᠰ ᠨᠢᠰ ᠭᠤᠶᠠᠳᠠᠵᠤ ᠲᠦᠷᠬᠡᠨ ᠵᠠᠶᠢᠯᠠᠬᠤ ᠬᠡᠳᠡᠯ᠎ᠡ᠂ ᠭᠠᠢ ᠭᠠᠵᠠᠷ ᠲᠤᠤᠷ᠎ᠠ ᠎ ᠠᠴᠠ ᠬᠡᠭᠴᠢ ᠪᠠᠷ ᠲᠡᠷᠬᠡᠨ ᠤ ᠬᠢᠨᠢ ᠲᠡᠩᠬᠡᠯᠢᠭ ᠬᠤᠭᠤᠷᠠᠪᠠ᠃ ᠲᠡᠳᠡ ᠤᠳᠤ ᠶᠠᠪᠠᠭᠠᠨ ᠪᠤᠯᠵᠤ ᠤᠢ ᠳᠤ ᠲᠤᠳᠠᠭᠠᠵᠤ ᠤᠷᠤᠬᠤ ᠠᠴᠠ ᠦᠬᠡᠷ᠎ᠡ ᠠᠷᠭ᠎ᠠ ᠦᠭᠡᠢ ᠪᠤᠯᠵᠤ᠂ ᠬᠤᠸᠠᠭᠴᠢᠨ ᠡᠮᠡᠬᠡᠨ ᠰᠠᠶ᠋ᠢ ᠲᠡᠷᠬᠡᠨ ᠲᠡᠭᠡᠷᠡᠬᠢ ᠡᠳ᠋ ᠪᠠᠷᠠᠭ᠎ᠠ ᠶᠢ ᠪᠠᠭᠤᠯᠭᠠᠨ ᠪᠦᠷᠳᠡ ᠦᠵᠢᠨ ᠢ ᠭᠠᠷᠭᠠᠬᠤ ᠬᠡᠵᠤ ᠪᠠᠶᠢᠳᠠᠯ᠎ᠠ ᠬᠤᠶᠢᠨ᠎ᠡ ᠠᠴᠠ ᠤᠯᠠᠨ ᠴᠡᠷᠢᠭ ᠲᠠᠪᠬᠢᠯᠳᠤᠨ ᠢᠷᠡᠪᠡ᠃ ᠬᠤᠸᠠᠭᠴᠢᠨ ᠡᠮᠡᠬᠡᠨ ᠶᠠᠭᠠᠬᠢᠬᠤ ᠪᠠᠨ ᠤᠯᠬᠤ ᠦᠭᠡᠢ ᠲᠡᠷᠬᠡ ᠪᠠᠨ ᠬᠠᠯᠬᠠᠯᠠᠨ ᠵᠤᠭᠰᠤᠳᠠᠯ᠎ᠠ ᠂ ᠲᠡᠳᠡ ᠪᠡᠯᠬᠦᠳᠠᠢ ᠶᠢᠨ ᠡᠬᠡ ᠰᠤᠴᠢᠬᠡᠯ ᠡᠬᠡ ᠶᠢ ᠮᠤᠷᠢᠨ ᠲᠡᠭᠡᠷ᠎ᠡ ᠰᠤᠨᠳᠠᠯᠠᠨ ᠬᠦᠷᠴᠤ ᠢᠷᠡᠬᠡᠳ᠄       ︽ᠡᠨᠡ ᠲᠡᠷᠬᠡᠨ ᠲᠤᠳᠤᠷ᠎ᠠ ᠶᠠᠭᠤ ᠪᠤᠢ︖︾ ᠬᠡᠰᠡᠨ ᠳᠤ ᠬᠤᠸᠠᠭᠴᠢᠨ ᠡᠮᠡᠬᠡᠨ᠄       ︽ᠤᠩᠭᠠᠰᠤ ᠪᠤᠢ︾ ᠬᠡᠪᠡ᠃ ᠲᠡᠷᠡ ᠴᠡᠷᠢᠭ ᠤᠳ ᠤᠨ ᠠᠬᠠᠮᠠᠳ ᠮᠠᠶ᠋ᠢᠭ ᠲᠠᠢ ᠨᠢᠬᠡᠨ ᠲᠤᠮᠤ ᠡᠷ᠎ᠡ᠄       ︽ᠲᠡᠬᠦᠦ ᠨᠠᠷ ᠪᠠᠭᠤᠵᠤ ᠨᠡᠩᠵᠢ︕︾ ᠬᠡᠪᠡ᠃ ᠬᠡᠳᠤᠨ ᠴᠡᠷᠢᠭ ᠮᠤᠷᠢᠨ ᠠᠴᠠ ᠪᠠᠭᠤᠵᠤ ᠬᠠᠷᠭᠤᠳᠠᠢ ᠲᠡᠷᠬᠡᠨ ᠤ ᠬᠠᠭᠠᠯᠭ᠎ᠠ ᠶᠢ ᠨᠡᠬᠡᠬᠡᠪᠡᠯ ᠬᠠᠷᠢᠨ ᠨᠢᠬᠡᠨ ᠬᠠᠳᠤᠨ ᠬᠦᠮᠦᠨ ᠰᠠᠭᠤᠵᠤ ᠪᠠᠶᠢᠵᠠᠢ᠃ ᠲᠡᠳᠡ ᠪᠦᠷᠳᠡ ᠦᠵᠢᠨ ᠢ ᠶᠠᠭᠤᠨ ᠠᠨᠳᠠᠬᠤ ᠪᠢᠯᠡ᠂ ᠲᠡᠬᠦᠨ ᠢ ᠦᠬᠡ ᠲᠠᠭᠤᠨ ᠦᠭᠡᠢ ᠴᠢᠷᠦᠨ ᠭᠠᠷᠭᠠᠵᠤ᠂ ᠬᠤᠸᠠᠭᠴᠢᠨ ᠡᠮᠡᠬᠡᠨ ᠤ ᠬᠠᠮᠳᠤ ᠮᠤᠷᠢᠨ ᠳᠠᠭᠠᠨ ᠰᠤᠨᠳᠠᠯᠠᠨ ᠠᠪᠴᠤ ᠤᠳᠪᠠ᠃       ᠡᠨᠡ ᠦᠶ᠎ᠡ ᠳᠤ ᠨᠠᠷᠠᠨ ᠨᠢᠬᠡᠨᠳᠠ ᠲᠡᠭᠡᠷ᠎ᠡ ᠲᠡᠭᠳᠡᠭᠰᠡᠨ ᠲᠤᠯᠠ᠂ ᠲᠡᠳᠡ ᠲᠡᠮᠦᠵᠢᠨ ᠤ ᠬᠤᠶᠢᠨ᠎ᠡ ᠠᠴᠠ ᠡᠪᠡᠰᠤᠨ ᠤ ᠨᠠᠯᠤᠷᠬᠠᠢ ᠪᠠᠷ ᠮᠦᠰᠬᠢᠨ ᠪᠤᠷᠬᠠᠨ ᠬᠠᠯᠳᠤᠨ ᠦᠭᠡᠳᠡ ᠭᠠᠷᠪᠠ᠃ ᠲᠡᠳᠡ ᠪᠤᠷᠬᠠᠨ ᠬᠠᠯᠳᠤᠨ ᠢ ᠭᠤᠷᠪᠡ ᠲᠤᠭᠤᠷᠢᠨ ᠨᠡᠩᠵᠢᠭᠰᠡᠨ ᠪᠤᠯᠪᠠᠴᠤ ᠡᠨᠡ ᠦᠶ᠎ᠡ ᠳᠤ ᠶᠠᠭ ᠵᠤᠨ ᠤ ᠰᠡᠬᠦᠯ ᠪᠤᠯᠵᠤ᠂ ᠤᠰᠤ ᠰᠢᠪᠡᠷ ᠪᠡᠷᠬᠡ ᠶᠢᠨ ᠲᠡᠭᠡᠷ᠎ᠡ ᠪᠢᠳᠡᠬᠦᠦ ᠤᠢ ᠶᠢᠨ ᠲᠤᠳᠤᠷ᠎ᠠ ᠴᠠᠳᠬᠤᠯᠠᠩ ᠮᠤᠭᠠᠢ ᠰᠢᠷᠭᠤᠬᠤ ᠵᠠᠪᠰᠠᠷ ᠦᠭᠡᠢ ᠲᠤᠯᠠ ᠶᠠᠭᠤ ᠴᠦ ᠤᠯᠤᠭᠰᠠᠨ ᠦᠭᠡᠢ ᠪᠤᠴᠠᠪᠠ᠃       ᠪᠡᠯᠬᠦᠳᠠᠢ᠃ ᠪᠤᠭᠤᠷᠴᠢ᠂ ᠵᠠᠯᠮ᠎ᠠ ᠭᠤᠷᠪᠠ ᠶᠢ ᠲᠡᠮᠦᠵᠢᠨ ᠲᠠᠭᠤᠳᠠᠨ ᠢᠷᠡᠬᠦᠯᠵᠤ᠄       ︽ᠡᠳᠡ ᠴᠤᠬᠤᠮ ᠬᠡᠨ ᠪᠤᠯᠪᠠ︖ ᠤᠳᠤ ᠬᠡᠷ ᠲᠡᠭᠡᠨ ᠬᠠᠷᠢᠭᠰᠠᠨ ᠤᠤ︖ ᠡᠰᠡᠬᠦᠯ᠎ᠡ ᠠᠭᠤᠯᠠᠨ ᠳᠤ ᠪᠦᠭᠬᠦᠵᠤ ᠪᠠᠶᠢᠨ᠎ᠠ ᠤᠤ︖ ᠭᠤᠷᠪᠠ ᠬᠤᠨᠤᠭ ᠲᠤᠳᠤᠷ᠎ᠠ ᠲᠤᠳᠤᠯᠠᠵᠤ ᠢᠷ᠎ᠡ︾ ᠬᠡᠵᠤ ᠢᠯᠡᠬᠡᠪᠡ᠃ ᠲᠡᠳᠡᠨ ᠢ ᠶᠠᠪᠤᠭᠰᠠᠨ ᠤ ᠲᠠᠷᠠᠭ᠎ᠠ ᠲᠡᠮᠦᠵᠢᠨ ᠪᠤᠷᠬᠠᠨ ᠬᠠᠯᠳᠤᠨ ᠲᠡᠭᠡᠷ᠎ᠡ ᠠᠴᠠ ᠪᠠᠭᠤᠵᠤ ᠢᠷᠡᠨ᠄       ︽ᠰᠤᠯᠤᠩᠭ᠎ᠠ ᠮᠡᠳᠤ ᠰᠤᠨᠤᠰᠬᠤ       ᠰᠤᠷᠭᠤᠭ ᠬᠤᠸᠠᠭᠴᠢᠨ ᠤ       ᠰᠤᠨᠤᠭ ᠤᠨ ᠬᠦᠴᠦ ᠪᠠᠷ       ᠦᠨᠡᠨ③ ᠮᠡᠳᠤ ᠦᠵᠡᠬᠦ       ᠦᠨᠡᠨᠴᠢ ᠬᠤᠸᠠᠭᠴᠢᠨ ᠤ       ᠦᠵᠡᠭᠰᠡᠨ ᠤ ᠠᠴᠢ ᠪᠠᠷ       ᠪᠦᠳᠦᠨ ᠪᠡᠶ᠎ᠡ ᠪᠠᠨ ᠪᠦᠭᠬᠦᠨ       ᠪᠦᠳᠡᠬᠢ ᠵᠠᠮ ᠢ ᠮᠦᠷᠳᠡᠨ       ᠪᠤᠭᠤ ᠶᠢᠨ ᠮᠦᠷ ᠢ ᠮᠦᠰᠬᠢᠨ       ᠪᠤᠷᠭᠠᠰᠤᠨ ᠬᠡᠷᠯᠡᠨ④ ᠨᠢᠭᠤᠭᠳᠠᠵᠤ       ᠪᠤᠷᠬᠠᠨ ᠬᠠᠯᠳᠤᠨ ᠳᠤ       ᠠᠮᠢ ᠪᠠᠨ ᠬᠤᠷᠭᠤᠳᠠᠯ᠎ᠠ᠃       ᠭᠠᠭᠴᠠ ᠪᠡᠶ᠎ᠡ ᠪᠠᠨ ᠪᠦᠯᠵᠢᠬᠦᠯᠵᠤ⑤       ᠬᠠᠪᠴᠢᠯ ᠰᠦᠪᠡ ᠶᠢ ᠪᠠᠷᠢᠨ       ᠬᠠᠨᠳᠠᠭᠠᠢ ᠶᠢᠨ ᠮᠦᠷ ᠢ ᠲᠠᠭᠠᠵᠤ       ᠬᠠᠯᠢᠰᠤᠨ ᠬᠡᠷᠯᠡᠨ ᠨᠢᠭᠤᠭᠳᠠᠵᠤ       ᠬᠠᠯᠳᠤᠨ ᠠᠭᠤᠯᠠᠨ ᠳᠤ       ᠬᠠᠯᠠᠭᠤᠨ ᠠᠮᠢ ᠪᠠᠨ ᠰᠢᠷᠭᠤᠪᠠ᠃       ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠ ᠮᠢᠨᠢ       ᠪᠦᠬᠡᠰᠦᠨ ᠴᠢᠨᠡᠭᠡ ᠠᠮᠢ ᠶᠢ       ᠪᠦᠬᠡᠴᠠᠶᠢᠯᠠᠨ ᠠᠪᠤᠷᠠᠯ᠎ᠠ       ᠬᠠᠯᠳᠤᠨ ᠶᠡᠭᠡ ᠠᠭᠤᠯᠠ ᠮᠢᠨᠢ       ᠬᠢᠯᠭᠠᠰᠤᠨ ᠲᠡᠳᠤᠢ ᠠᠮᠢ ᠶᠢ       ᠬᠠᠭᠠᠴᠠᠶᠢᠯᠠᠨ ᠦᠯᠡᠳᠡᠬᠡᠯ᠎ᠡ︕       ᠦᠰᠢᠶᠡᠳᠤ ᠲᠠᠶᠢᠰᠤᠨ ᠠᠴᠠ       ᠦᠷᠦᠰᠢᠶᠡᠨ ᠠᠪᠤᠷᠠᠭᠰᠠᠨ       ᠦᠨᠳᠤᠷ ᠲᠡᠭᠡᠳᠤ       ᠪᠤᠷᠬᠠᠨ ᠬᠠᠯᠳᠤᠨ ᠴᠢᠮᠠᠢᠢ       ᠦᠷᠯᠦᠬᠡ ᠪᠦᠷᠢ ᠮᠢᠯᠢᠶᠡᠵᠤ       ᠡᠳᠤᠷ ᠪᠦᠷᠢ ᠲᠠᠬᠢᠨ       ᠦᠶ᠎ᠡ ᠶᠢᠨ ᠦᠶ᠎ᠡ ᠳᠤ ᠰᠢᠳᠤᠵᠤ       ᠦᠨᠢ ᠡᠬᠦᠷᠢᠳᠠ ᠲᠤᠷᠠᠰᠬᠠᠨ᠎ᠠ︾ ᠬᠡᠵᠤ ᠠᠯᠳᠠᠨ ᠪᠦᠰᠡ ᠪᠠᠨ ᠬᠦᠵᠦᠬᠦᠨ ᠳᠡᠭᠡᠨ ᠡᠯᠬᠦᠨ᠂ ᠮᠠᠯᠠᠭᠠᠢ ᠪᠠᠨ ᠭᠠᠷ ᠲᠠᠭᠠᠨ ᠰᠡᠬᠡᠯᠳᠤᠷᠬᠡᠯᠡᠵᠤ᠂ ᠬᠤᠶᠠᠷ ᠠᠯᠠᠭ᠎ᠠ ᠪᠠᠨ ᠬᠠᠪᠰᠤᠷᠤᠨ ᠨᠠᠷᠠᠨ ᠵᠦᠭ ᠬᠠᠨᠳᠤᠵᠤ ᠪᠤᠷᠬᠠᠨ ᠬᠠᠯᠳᠤᠨ ᠳᠤ ᠶᠢᠰᠦᠨᠳᠠ ᠮᠦᠷᠬᠦᠵᠤ᠂ ᠦᠴᠢᠯ ᠢ ᠦᠴᠢᠨ ᠰᠠᠴᠤᠯᠢ ᠶᠢ ᠰᠠᠴᠤᠪᠠ⑥᠃       ᠭᠤᠷᠪᠠ ᠬᠤᠨᠤᠭ ᠤᠨ ᠲᠠᠷᠠᠭ᠎ᠠ᠂ ᠪᠡᠯᠬᠦᠳᠠᠢ᠂ ᠪᠤᠭᠤᠷᠴᠢ᠂ ᠵᠠᠯᠮ᠎ᠠ ᠭᠤᠷᠪᠠᠭᠤᠯᠠ ᠪᠤᠴᠠᠵᠤ ᠢᠷᠡᠭᠡᠳ᠂ ᠲᠡᠮᠦᠵᠢᠨ ᠳᠤ᠄       ︽ᠪᠢᠳᠠᠨ ᠢ ᠲᠤᠪᠳᠤᠯᠤᠭᠰᠠᠨ ᠲᠠᠶᠢᠰᠤᠨ ᠪᠤᠯ ᠭᠠᠷᠴᠠᠭ᠎ᠠ ᠦᠭᠡᠢ ᠭᠤᠷᠪᠠᠨ ᠮᠡᠷᠬᠢᠳ ᠪᠠᠶᠢᠪᠠ ᠃ ᠤᠳᠦᠶᠢᠳ ᠮᠡᠷᠬᠢᠳ ᠤᠨ ᠲᠤᠭᠳᠤᠭ᠎ᠠ᠂ ᠤᠸᠠᠰ ᠮᠡᠷᠬᠡᠳ ᠤᠨ ᠲᠠᠶᠢᠷ ᠤᠰᠤᠨ᠂ ᠬᠠᠭᠠᠨ ᠮᠡᠷᠬᠢᠳ ᠤᠨ ᠬᠠᠭᠠᠳᠠᠢ ᠲᠠᠷᠮᠠᠯᠠ ᠭᠤᠷᠪᠠ ᠨᠡᠶᠢᠯᠡᠵᠤ᠂ ᠲᠡᠳᠡ᠄ ︿ᠶᠡᠭᠡ ᠴᠢᠯᠡᠳᠤ ᠠᠴᠠ ᠶᠢᠰᠦᠬᠡᠢ ᠪᠠᠭᠠᠳᠤᠷ ᠦᠬᠡᠯᠦᠨ ᠦᠵᠢᠨ ᠢ ᠪᠤᠯᠢᠶᠡᠵᠤ ᠠᠪᠤᠭᠰᠠᠨ ᠤᠷᠢᠳᠤ ᠶᠢᠨ ᠦᠰᠢᠶ᠎ᠡ ᠶᠢ ᠨᠡᠬᠡᠬᠦ ᠪᠠᠷ ᠢᠷᠡᠭᠰᠡᠨ﹀ ᠬᠡᠵᠤ ᠪᠠᠷᠬᠢᠷᠡᠯᠳᠤᠵᠤ ᠪᠠᠶᠢᠭᠰᠠᠨ ᠪᠠ ᠪᠠᠰᠠ᠄ ︿ᠦᠬᠡᠯᠦᠨ ᠦᠵᠢᠨ ᠢ ᠪᠤᠯᠢᠶᠠᠭᠳᠠᠭᠰᠠᠨ ᠤ ᠦᠰᠢᠶ᠎ᠡ ᠶᠢ ᠠᠪᠬᠤ ᠪᠠᠷ ᠢᠷᠡᠬᠡᠳ᠂ ᠶᠢᠰᠦᠬᠡᠢ ᠶᠢᠨ ᠨᠦᠬᠦᠬᠡ ᠬᠡᠷᠬᠡᠢ ᠶᠢ ᠤᠯᠵᠠᠯᠠᠭᠰᠠᠨ ᠪᠠ ᠲᠡᠮᠦᠵᠢᠨ ᠤ ᠬᠠᠶᠢᠷᠠᠳᠤ ᠬᠡᠷᠬᠡᠢ ᠪᠦᠷᠳᠡ ᠶᠢ ᠤᠯᠵᠠᠯᠠᠨ ᠦᠰᠢᠶ᠎ᠡ ᠪᠠᠨ ᠠᠪᠤᠪᠠ﹀ ᠬᠡᠳ ᠬᠡᠷ ᠲᠡᠭᠡᠨ ᠪᠤᠴᠠᠭᠰᠠᠨ ᠬᠡᠨ᠎ᠡ︾ ᠬᠡᠵᠤ ᠬᠡᠯᠡᠵᠤ ᠦᠭᠪᠡ᠃ ᠲᠡᠮᠦᠵᠢᠨ᠄       ︽ᠰᠤᠴᠢᠬᠡᠯ ᠡᠬᠡ ᠬᠢᠬᠡᠳ ᠪᠦᠷᠳᠡ ᠶᠢ ᠶᠠᠭᠠᠬᠢᠪᠠ︖︾ ᠬᠡᠰᠡᠨ ᠳᠤ᠄       ︽ᠰᠤᠴᠢᠬᠡᠯ ᠡᠬᠡ ᠶᠢ ᠬᠠᠭᠠᠳᠠᠢ ᠲᠠᠷᠮᠠᠯᠠ ᠠᠪᠤᠪᠠ᠂ ᠪᠦᠷᠳᠡ ᠦᠵᠢᠨ ᠢ ᠴᠢᠯᠡᠳᠤ ᠶᠢᠨ ᠲᠡᠬᠦᠦ ᠴᠢᠯᠡᠬᠡᠷ ᠪᠦᠬᠡ ᠳᠤ ᠦᠭᠴᠤ ᠠᠰᠠᠷᠠᠭᠤᠯᠵᠤ ᠪᠠᠶᠢᠨ᠎ᠠ ᠬᠡᠨ᠎ᠡ︾ ᠬᠡᠪᠡ᠃       ᠲᠡᠮᠦᠵᠢᠨ ᠤ ᠲᠤᠳᠤᠷ᠎ᠠ ᠨᠢᠬᠡ ᠯᠡ ᠠᠳᠬᠤ ᠪᠤᠯᠵᠤ ᠶᠠᠭᠤ ᠴᠦ ᠲᠤᠤᠭᠤᠷᠤᠯ ᠦᠭᠡᠢ ᠭᠠᠷᠴᠤ ᠤᠳᠪᠠ᠃         ᠲᠠᠶᠢᠯᠪᠤᠷᠢ       ① ︽ᠪᠦᠬᠡᠷ᠎ᠡ ᠨᠢ ᠪᠦᠭᠰᠡᠨ ᠳᠤ ᠪᠠᠶᠢᠭ᠂ ᠴᠡᠷ ᠨᠢ ᠴᠡᠬᠡᠵᠢᠨ ᠳᠤ ᠪᠠᠶᠢᠭ︾ — ᠡᠮᠬᠢ ᠲᠦᠷᠢᠮ ᠲᠠᠢ ᠪᠠᠶᠢᠭ ᠬᠡᠰᠡᠨ ᠰᠠᠨᠠᠭ᠎ᠠ ᠪᠤᠶᠤ᠃       ② ᠪᠡᠶ᠎ᠡ ᠰᠢᠯᠳᠠᠭᠠᠳᠠᠢ — ᠵᠢᠷᠮᠤᠰᠤᠨ᠃       ③ ᠦᠨᠡᠨ — ᠦᠶᠠᠩ ︵ᠬᠤᠯᠤᠭᠠᠨ᠎ᠠ︶᠃       ④ ᠬᠡᠷᠯᠡᠨ — ᠬᠡᠷ ᠪᠠᠷᠢᠵᠤ᠃       ⑤ ᠪᠦᠯᠵᠢᠬᠦᠯᠵᠤ — ᠨᠢᠭᠤᠭᠳᠠᠭᠤᠯᠵᠤ᠃       ⑥ ᠦᠴᠢᠯ ᠢ ᠦᠴᠢᠨ ᠰᠠᠴᠤᠯᠢ ᠶᠢ ᠰᠠᠴᠤᠪᠠ — ᠲᠠᠩᠭᠠᠷᠢᠭ ᠦᠭᠬᠦᠨ ᠲᠠᠬᠢᠬᠤ ᠶᠢ ᠬᠡᠯᠡᠵᠤ ᠪᠠᠶᠢᠨ᠎ᠠ᠃         ᠡᠮᠤᠨᠡᠬᠢ ᠦᠯᠢᠬᠡᠷ᠄ ᠲᠡᠮᠦᠵᠢᠨ ᠬᠢᠬᠡᠳ ᠪᠤᠭᠤᠷᠴᠢ ᠶᠢᠨ ᠨᠦᠬᠦᠷᠯᠡᠭᠰᠡᠨ       ᠬᠤᠶᠢᠨᠡᠬᠢ ᠦᠯᠢᠬᠡᠷ᠄ ᠲᠡᠮᠦᠵᠢᠨ ᠪᠦᠷᠳᠡ ᠦᠵᠢᠨ ᠲᠠᠢ ᠪᠠᠨ ᠤᠴᠠᠷᠠᠭᠰᠠᠨ 
  
ᠢᠷᠡᠯᠲᠡ᠄ ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠰᠤᠩᠭᠤᠳᠠᠭ ᠵᠤᠬᠢᠶᠠᠯ ᠤᠨ ᠰᠤᠩᠭᠤᠮᠠᠯ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号