ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠲᠡᠤᠬᠡᠨ ᠦᠯᠢᠬᠡᠷ ︵ᠠᠷᠪᠠ︶ — ᠰᠤᠷᠬᠠᠨ ᠰᠢᠷ᠎ᠠ ᠶᠢᠨ ᠬᠢᠨ ᠲᠡᠮᠦᠵᠢᠨ ᠎ ᠢ ᠠᠪᠤᠷᠠᠭᠰᠠᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/5/26
        ᠡᠪᠡᠰᠤ ᠮᠤᠳᠤ ᠬᠦᠬᠡᠷᠡᠬᠡᠳ ᠪᠠᠰᠠ ᠰᠢᠷᠠᠯᠠᠨ᠎ᠠ᠂ ᠰᠢᠷᠠᠯᠠᠭᠠᠳ ᠪᠠᠰᠠ ᠬᠦᠬᠡᠷᠡᠨ᠎ᠡ᠃ ᠦᠬᠡᠯᠦᠨ ᠡᠬᠡ ᠶᠢᠨ ᠦᠨᠦᠴᠢᠨ ᠬᠡᠤᠬᠡᠳ ᠤᠳᠠᠯ ᠦᠭᠡᠢ ᠦᠰᠴᠤ ᠪᠤᠶᠢᠵᠢᠪᠠ᠃ ᠡᠬᠦᠨ ᠳᠤ ᠲᠠᠶᠢᠴᠢᠭᠤᠳ ᠤᠨ ᠲᠦᠷᠦᠬᠦᠦ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ ᠰᠢᠳᠠᠷ ᠨᠦᠬᠦᠳ ᠢᠶᠠᠨ ᠴᠤᠭᠯᠠᠭᠤᠯᠵᠤ᠄       ︽ᠬᠤᠷᠠᠭᠠᠨ ᠤ ᠦᠰᠤ ᠭᠤᠤᠵᠢᠪᠠ᠂ ᠲᠦᠯᠦᠬᠡᠨ ᠤ ᠪᠡᠶ᠎ᠡ ᠲᠦᠯᠦᠵᠢᠪᠡ᠂ ᠦᠬᠡᠯᠦᠨ ᠤ ᠬᠡᠤᠬᠡᠳ ᠦᠰᠴᠤ ᠪᠤᠶᠢᠵᠢᠪᠠ᠂ ᠦᠰᠢᠶ᠎ᠡ ᠪᠠᠨ ᠠᠪᠬᠤ ᠴᠠᠭ ᠪᠤᠯᠤᠭᠰᠠᠨ ᠪᠢᠰᠢ ᠤᠤ︖︾ ᠬᠡᠵᠤ ᠲᠡᠮᠦᠵᠢᠨ ᠠᠬ᠎ᠠ ᠲᠡᠬᠦᠦ ᠨᠠᠷ ᠢ ᠲᠤᠪᠳᠤᠯᠬᠤ ᠪᠠᠷ ᠵᠦᠪᠯᠡᠨ ᠲᠤᠭᠳᠠᠪᠠ᠃       ᠨᠢᠬᠡᠨ ᠦᠷᠯᠦᠬᠡ᠂ ᠲᠡᠮᠦᠵᠢᠨ ᠠᠬ᠎ᠠ ᠲᠡᠬᠦᠦ ᠨᠠᠷ ᠠᠩ ᠬᠦᠷᠦᠬᠡᠨ ᠳᠤ ᠭᠠᠷᠬᠤ ᠬᠡᠵᠤ ᠪᠡᠯᠡᠳᠬᠡᠵᠤ ᠪᠠᠶᠢᠳᠠᠯ᠎ᠠ᠂ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ ᠠᠶᠢᠮᠠᠭ ᠤᠨ ᠤᠯᠠᠨ ᠢᠶᠠᠨ ᠲᠠᠭᠠᠭᠤᠯᠤᠨ ᠬᠡᠨᠡᠳᠳᠠ ᠲᠤᠪᠳᠤᠯᠵᠤ ᠢᠷᠡᠪᠡ᠃ ᠲᠡᠳᠡ ᠵᠠᠶᠢᠯᠠᠨ ᠵᠠᠪᠳᠤᠬᠤ ᠦᠭᠡᠢ ᠪᠤᠯᠵᠤ᠂ ᠴᠢᠳᠠᠨ ᠶᠠᠳᠠᠨ ᠡᠰᠡᠷᠬᠦᠴᠡᠪᠡ᠃ ᠪᠡᠯᠬᠦᠳᠠᠢ ᠪᠢᠷ᠎ᠡ ᠶᠡᠬᠡᠳᠠᠢ ᠪᠤᠯᠬᠤᠷ ᠬᠤᠭᠤᠴᠢᠨ ᠲᠠᠰᠤᠯᠵᠤ ᠰᠢᠪᠡᠭᠡ ᠪᠠᠷᠢᠵᠤ ᠬᠤᠷᠢᠭᠯᠠᠪᠠ᠃ ᠬᠠᠰᠠᠷ ᠮᠡᠷᠬᠡᠨ ᠬᠠᠷᠪᠤᠭᠠᠴᠢ ᠲᠤᠯᠠ ᠨᠢᠬᠡ ᠲᠠᠯ᠎ᠠ ᠎ ᠪᠠᠷ ᠬᠠᠷᠪᠤᠨ ᠪᠠᠶᠢᠯᠳᠤᠵᠤ᠂ ᠨᠢᠬᠡ ᠲᠠᠯ᠎ᠠ ᠪᠠᠷ ᠬᠠᠴᠢᠭᠤᠨ ᠲᠠᠮᠦᠬᠡ ᠲᠡᠮᠦᠯᠦᠨ ᠭᠤᠷᠪᠡᠨ ᠲᠡᠬᠦᠦ ᠪᠠᠨ ᠠᠭᠤᠯᠠᠨ ᠤ ᠵᠠᠪᠠ ᠳᠤ ᠨᠢᠭᠤᠨ ᠲᠠᠯᠳᠠᠯᠠᠪᠠ᠃ ᠲᠠᠶᠢᠴᠢᠭᠤᠳ ᠨᠠᠷ ᠬᠠᠰᠠᠷ ᠤᠨ ᠰᠤᠮᠤᠨ ᠠᠴᠠ ᠲᠠᠶᠢᠵᠢᠨ ᠵᠢᠷᠦᠬᠡᠰᠢᠵᠤ᠄       ︽ᠲᠠᠮᠦᠵᠢᠨ ᠠᠬ᠎ᠠ ᠪᠠᠨ ᠭᠠᠷᠭᠠᠵᠤ ᠦᠭᠪᠡᠯ ᠪᠤᠰᠤᠳ ᠲᠤ ᠴᠢᠨᠢ ᠬᠡᠮ ᠬᠢᠬᠦ ᠦᠭᠡᠢ᠂ ᠪᠢᠳᠡᠬᠡᠢ ᠬᠠᠷᠪᠤ︕︾ ᠬᠡᠵᠤ ᠪᠠᠷᠬᠢᠷᠡᠯᠳᠤᠪᠠ᠃       ᠲᠡᠮᠦᠵᠢᠨ ᠰᠤᠨᠤᠰᠤᠭᠠᠳ ᠰᠠᠨᠳᠤᠷᠤᠨ ᠮᠤᠷᠢᠨ ᠳᠠᠭᠠᠨ ᠮᠤᠷᠳᠠᠵᠤ ᠰᠠᠮ ᠢᠶᠠᠷ ᠲᠡᠷᠢᠬᠦᠨ ᠦᠨᠳᠤᠷ ᠤᠨ ᠰᠢᠭᠤᠢ ᠳᠤ ᠰᠢᠷᠭᠤᠨ ᠤᠷᠤᠪᠠ᠃ ᠲᠠᠶᠢᠴᠢᠭᠤᠳ ᠨᠠᠷ ᠲᠡᠮᠦᠵᠢᠨ ᠲᠤᠳᠠᠭᠠᠭᠰᠠᠨ ᠢ ᠦᠵᠡᠬᠡᠳ ᠲᠡᠷᠢᠬᠦᠨ ᠦᠨᠳᠤᠷ ᠵᠦᠭ ᠢᠪᠠᠭᠠᠨᠠᠵᠤ ᠤᠴᠢᠭᠠᠳ᠂ ᠲᠠᠪᠬᠤᠷ ᠲᠠᠪᠬᠤᠷ ᠬᠦᠷᠢᠶᠡᠯᠡᠨ ᠰᠠᠬᠢᠪᠠ᠃       ᠲᠡᠮᠦᠵᠢᠨ ᠰᠢᠭᠤᠢ ᠶᠢᠨ ᠲᠤᠳᠤᠷ᠎ᠠ ᠭᠤᠷᠪᠠ ᠬᠤᠨᠤᠭᠠᠳ᠂ ︽ᠲᠠᠶᠢᠴᠢᠭᠤᠳ ᠨᠠᠷ ᠪᠤᠴᠠᠭᠰᠠᠨ ᠪᠠᠶᠢᠬ᠎ᠠ᠂ ᠤᠳᠤ ᠬᠠᠷᠢᠶ᠎ᠠ︾ ᠬᠡᠵᠤ ᠮᠤᠷᠢ ᠪᠠᠨ ᠬᠦᠳᠦᠯᠵᠤ ᠶᠠᠪᠤᠬᠤ ᠳᠤ ᠮᠤᠷᠢᠨ ᠤ ᠡᠮᠡᠬᠡᠯ ᠨᠢ ᠬᠦᠯᠪᠡᠷᠢᠨ ᠤᠨᠠᠪᠠ ᠃ ᠡᠷᠬᠢᠵᠤ ᠬᠠᠷᠠᠵᠤ ᠦᠵᠡᠪᠡᠯ ᠤᠯᠤᠩ ᠬᠦᠮᠦᠯᠳᠦᠷᠬᠡ ᠨᠢ ᠬᠡᠪ ᠢᠶᠠᠷ ᠪᠠᠶᠢᠯ᠎ᠠ᠃ ᠡᠬᠦᠨ ᠳᠤ ᠲᠡᠷᠡ᠄       ︽ᠤᠯᠤᠩ ᠬᠦᠮᠦᠯᠳᠦᠷᠬᠡ ᠬᠡᠪ ᠢᠶᠠᠷ ᠪᠠᠶᠢᠳᠠᠯ᠎ᠠ ᠡᠮᠡᠬᠡᠯ ᠶᠠᠭᠠᠬᠢᠨ ᠬᠦᠯᠪᠡᠷᠢᠪᠡ︖ ᠮᠦᠩᠬᠡ ᠲᠡᠭᠷᠢ ᠢᠳᠬᠠᠵᠤ ᠪᠠᠶᠢᠬᠤ ᠪᠤᠯᠪᠡ ᠤᠤ︾ ᠬᠡᠵᠤ ᠭᠠᠷᠬᠤ ᠶᠢ ᠪᠠᠶᠢᠵᠤ ᠮᠦᠨ ᠠᠭᠤᠯᠠᠨ ᠳᠠᠭᠠᠨ ᠰᠢᠷᠭᠤᠵᠤ ᠰᠠᠭᠤᠪᠠ ᠃ ᠪᠠᠰᠠ ᠭᠤᠷᠪᠠ ᠬᠤᠨᠤᠭᠠᠳ ᠤᠳᠤ ᠬᠠᠷᠢᠶ᠎ᠠ ᠬᠡᠵᠤ ᠶᠠᠪᠤᠳᠠᠯ᠎ᠠ ᠲᠡᠬᠦᠨ ᠤ ᠭᠠᠷᠬᠤ ᠵᠠᠮ ᠢ ᠬᠡᠷ ᠤᠨ ᠴᠢᠨᠡᠬᠡᠨ ᠴᠠᠭᠠᠨ ᠴᠢᠯᠠᠭᠤ ᠪᠦᠭᠯᠡᠨ ᠬᠡᠪᠳᠡᠵᠤ ᠪᠠᠶᠢᠪᠠ᠃ ᠲᠡᠮᠦᠵᠢᠨ᠄ ︽ᠮᠦᠨ ᠮᠦᠩᠬᠡ ᠲᠡᠭᠷᠢ ᠢᠳᠬᠠᠵᠤ ᠪᠠᠶᠢᠬᠤ ᠪᠤᠯᠪᠠ ᠤᠤ︾ ᠬᠡᠵᠤ ᠪᠤᠴᠠᠵᠤ ᠪᠠᠰᠠ ᠭᠤᠷᠪᠠ ᠬᠤᠨᠤᠪᠠ᠃ ᠲᠠᠮᠦᠵᠢᠨ ᠢᠩᠬᠢᠵᠤ ᠶᠢᠰᠤ ᠬᠤᠨᠤᠭ ᠦᠯ ᠬᠤᠭᠤᠯᠠ ᠦᠭᠡᠢ ᠰᠠᠭᠤᠵᠤ ᠲᠡᠰᠬᠦ ᠦᠭᠡᠢ ᠪᠤᠯᠤᠨ ︽ᠢᠩᠬᠢᠵᠤ ᠨᠠᠷ᠎ᠡ ᠦᠭᠡᠢ ᠦᠬᠦᠬᠦ ᠪᠠᠷ ᠭᠠᠷᠴᠤ ᠦᠵᠡᠯᠴᠡᠵᠤ ᠪᠠᠶᠢᠨ ᠮᠡᠳᠡᠶ᠎ᠡ︕ ︾ ᠬᠡᠵᠤ ᠮᠤᠷᠢ ᠪᠠᠨ ᠬᠦᠳᠦᠯᠦᠨ ᠬᠡᠷ ᠤᠨ ᠴᠢᠨᠡᠬᠡᠨ ᠴᠠᠭᠠᠨ ᠴᠢᠯᠠᠭᠤ ᠶᠢ ᠲᠤᠭᠤᠷᠢᠨ ᠭᠠᠷᠴᠤ ᠰᠤᠮᠤᠴᠢ ᠬᠢᠳᠤᠭ᠎ᠠ ᠎ ᠪᠠᠷ ᠰᠠᠭᠠᠳ ᠪᠤᠯᠬᠤ ᠮᠤᠳᠤ ᠶᠢ ᠤᠭᠳᠤᠯᠤᠨ ᠶᠠᠪᠤᠪᠠ᠃ ᠴᠢᠩᠬᠢᠬᠡᠳ ᠲᠡᠮᠦᠵᠢᠨ ᠲᠦᠩᠬᠡᠵᠢ ᠰᠢᠭᠤᠢ ᠠᠴᠠ ᠭᠠᠷᠤᠮᠠᠭᠴᠠ᠂ ᠲᠠᠶᠢᠴᠢᠭᠤᠳ ᠨᠠᠷ ᠪᠤᠴᠠᠭ᠎ᠠ ᠦᠭᠡᠢ ᠰᠠᠬᠢᠵᠤ ᠪᠠᠶᠢᠭᠰᠠᠨ ᠲᠤᠯᠠ ᠲᠡᠬᠦᠨ ᠢ ᠪᠠᠷᠢᠵᠤ ᠬᠦᠯᠢᠬᠡᠳ ᠠᠪᠴᠤ ᠤᠳᠪᠠ᠃       ᠬᠠᠰᠠᠷ ᠨᠠᠷ ᠬᠦᠮᠦᠨ ᠴᠦᠬᠡᠨ ᠬᠦᠴᠦ ᠨᠢᠮᠬᠡᠨ ᠲᠤᠯᠠ ᠠᠬ᠎ᠠ ᠪᠠᠨ ᠲᠤᠰᠠᠯᠠᠵᠤ ᠴᠢᠳᠠᠯ ᠦᠭᠡᠢ ᠬᠠᠷᠠᠭᠰᠠᠭᠠᠷ ᠬᠤᠴᠤᠷᠪᠠ᠃ ᠬᠠᠰᠠᠷ ᠬᠡᠳᠦᠢ ᠪᠠᠷ ᠬᠠᠷᠪᠤᠬᠤ ᠬᠡᠰᠡᠨ ᠪᠤᠯᠪᠠᠴᠤ ᠦᠬᠡᠯᠦᠨ ᠡᠬᠡ ᠬᠤᠷᠢᠭᠯᠠᠨ ᠵᠤᠭᠰᠤᠭᠠᠪᠠ᠃ ᠪᠡᠯᠬᠦᠳᠠᠢ ᠪᠦᠳᠦᠬᠦᠨ ᠴᠢᠯᠠᠭᠤ ᠶᠢ ᠨᠢᠳᠤᠷᠭᠠᠳᠤᠬᠤ ᠠᠴᠠ ᠦᠬᠡᠷ᠎ᠡ ᠠᠷᠭ᠎ᠠ ᠦᠭᠡᠢ᠃ ᠬᠠᠴᠢᠭᠤᠨ᠂ ᠲᠡᠮᠦᠬᠡ᠂ ᠲᠡᠮᠦᠯᠦᠨ ᠨᠠᠷ ᠨᠠᠰᠤ ᠪᠠᠭ᠎ᠠ ᠪᠤᠯᠬᠤᠷ ᠦᠬᠡ ᠲᠠᠭᠤᠨ ᠦᠭᠡᠢ ᠬᠠᠷᠠᠵᠤ ᠵᠤᠭᠰᠤᠬᠤ ᠠᠴᠠ ᠦᠬᠡᠷ᠎ᠡ ᠴᠢᠳᠠᠯ ᠦᠭᠡᠢ ᠁       ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ ᠲᠡᠮᠦᠵᠢᠨ ᠢ ᠪᠠᠷᠢᠵᠤ ᠠᠪᠤᠭᠠᠳ ᠶᠡᠬᠡᠳᠠ ᠪᠠᠶᠠᠷᠯᠡᠵᠤ᠂ ᠠᠶᠢᠮᠠᠭ ᠎ ᠲᠠᠭᠠᠨ ᠠᠪᠠᠴᠢᠵᠤ ᠠᠶᠢᠯ ᠪᠦᠷᠢ ᠳᠤ ᠨᠢᠵᠢᠬᠡᠳ ᠬᠤᠨᠤᠭᠤᠯᠤᠨ ᠬᠡᠰᠦᠬᠦᠯᠦᠨ ᠵᠠᠰᠠᠭᠯᠠᠵᠤ ① ᠰᠢᠳᠬᠡᠪᠡ᠃       ᠬᠡᠳᠤ ᠬᠤᠨᠤᠯ ᠦᠭᠡᠢ ᠶᠠᠭ ᠰᠠᠶᠢᠬᠠᠨ ᠵᠤᠨ ᠤ ᠲᠡᠷᠢᠬᠦᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠤ ᠲᠡᠷᠬᠡᠯ ᠡᠳᠤᠷ ᠪᠤᠯᠤᠭᠰᠠᠨ ᠲᠤᠯᠠ ᠲᠠᠶᠢᠴᠢᠭᠤᠳ ᠨᠠᠷ ᠤᠨᠤᠨ ᠮᠦᠷᠡᠨ ᠤ ᠡᠷᠬᠢ ᠲᠡᠭᠡᠷ᠎ᠡ ᠦᠪᠡᠳᠡᠭᠰᠢ ᠶᠡᠭᠡ ᠬᠤᠷᠢᠮ ᠬᠢᠵᠤ ᠨᠢᠬᠡᠨ ᠡᠳᠤᠷ ᠴᠡᠩᠬᠡᠯᠳᠤᠪᠡ᠃ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ᠄       ︽ᠲᠠ ᠨᠠᠷ ᠲᠡᠮᠦᠵᠢᠨ ᠢ ᠢᠳᠡ ᠬᠦᠴᠦ ᠡᠷᠳᠡᠮ ᠴᠢᠳᠠᠯ ᠲᠠᠢ ᠬᠡᠳᠡᠭ ᠪᠢᠰᠢ ᠤᠤ︖ ᠤᠳᠤ ᠲᠡᠷᠡ ᠮᠢᠨᠤ ᠭᠠᠷ ᠲᠤ ᠤᠷᠤᠵᠤ ᠦᠬᠦᠬᠦ ᠴᠠᠭ ᠢᠶᠠᠨ ᠬᠦᠯᠢᠶᠡᠬᠦ ᠪᠤᠯᠪᠠ᠃ ᠠᠶᠢᠯ ᠬᠡᠰᠦᠬᠦᠯᠵᠤ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ ᠲᠡᠬᠦᠨ ᠢ ᠠᠯᠠᠵᠤ ᠦᠰᠢᠶ᠎ᠡ ᠪᠠᠨ ᠠᠪᠤᠨ᠎ᠠ︕ ᠪᠢᠳᠡᠬᠡᠢ ᠠᠯᠳᠠᠵᠤ ᠶᠠᠪᠤᠭᠤᠯ᠂ ᠴᠢᠩᠭ᠎ᠠ ᠰᠠᠬᠢᠭᠳᠤᠨ︕︾ ᠬᠡᠵᠤ ᠲᠤᠰᠢᠶᠠᠭᠠᠳ ᠬᠤᠷᠢᠮ ᠲᠠᠷᠬᠠᠪᠠ᠃       ᠲᠡᠷᠡ ᠡᠳᠤᠷ ᠲᠡᠮᠦᠵᠢᠨ ᠢ ᠨᠢᠭᠡ ᠬᠦᠴᠦ ᠲᠤᠷᠪᠢ ᠮᠠᠭᠤᠳᠠᠢ ᠬᠦᠦ ᠰᠠᠬᠢᠵᠤ ᠪᠠᠶᠢᠭᠰᠠᠨ ᠠᠵᠢ ᠃ ᠬᠤᠷᠢᠮ ᠤᠨ ᠠᠷᠠᠳ ᠪᠦᠵᠢᠭ ᠲᠡᠪᠰᠡᠨ ᠶᠠᠳᠠᠷᠠᠵᠤ᠂ ᠰᠠᠷᠬᠤᠳ ᠤᠤᠭᠤᠨ ᠰᠤᠭᠳᠤᠨ ᠲᠠᠷᠬᠠᠭᠰᠠᠨ ᠢ ᠲᠠᠯᠢᠮᠳᠠᠭᠤᠯᠤᠨ᠂ ᠲᠡᠮᠦᠵᠢᠨ ᠰᠠᠬᠢᠵᠤ ᠪᠠᠶᠢᠭᠰᠠᠨ ᠬᠦᠦ ᠶᠢᠨ ᠲᠤᠯᠤᠭᠠᠢ ᠶᠢ ᠪᠠᠭᠤ ②᠎ ᠪᠠᠷ ᠲᠡᠯᠡᠳᠦᠨ ᠮᠠᠨᠠᠷᠠᠭᠤᠯᠤᠭᠠᠳ ᠤᠨᠤᠨ ᠤ ᠡᠷᠬᠢ ᠳᠠᠬᠢ ᠰᠢᠭᠤᠢ ᠳᠤ ᠲᠤᠳᠠᠭᠠᠵᠤ ᠤᠯᠪᠠ᠃ ᠲᠡᠷᠡ ᠬᠦᠯᠢᠶᠡᠰᠤ ᠲᠦᠩᠬᠡ ᠲᠠᠢ ᠪᠤᠯᠬᠤᠷ ᠬᠤᠯᠠ ᠶᠠᠪᠤᠵᠤ ᠲᠡᠶᠢᠯᠬᠦ ᠦᠭᠡᠢ᠂ ᠤᠰᠤᠨ ᠤ ᠬᠠᠷᠬᠢ ③᠎ ᠳᠤ ᠤᠷᠤᠵᠤ ᠨᠢᠭᠤᠷ ᠢᠶᠠᠨ ᠢᠯᠡ ᠭᠠᠷᠭᠠᠵᠤ ᠬᠡᠪᠳᠡᠪᠡ᠃       ᠲᠡᠮᠦᠵᠢᠨ ᠢ ᠰᠠᠬᠢᠵᠤ ᠪᠠᠶᠢᠭᠰᠠᠨ ᠬᠦᠦ ᠠᠭᠠᠵᠢᠮ ᠢᠶᠠᠷ ᠰᠡᠷᠬᠦᠵᠤ᠄       ︽ᠪᠠᠷᠢᠭᠳᠠᠭᠰᠠᠨ ᠬᠦᠮᠦᠨ ᠲᠤᠳᠠᠭᠠᠪᠠ︕︾ ᠬᠡᠵᠤ ᠶᠡᠭᠡ ᠲᠠᠭᠤᠨ ᠢᠶᠠᠷ ᠬᠠᠰᠬᠢᠷᠪᠠ᠃ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ ᠲᠡᠷᠡ ᠲᠠᠷᠤᠢ ᠳᠤ ᠲᠠᠷᠬᠠᠭᠰᠠᠨ ᠬᠦᠮᠦᠰ ᠢᠶᠠᠨ ᠴᠤᠭᠯᠠᠭᠤᠯᠵᠤ᠂ ᠤᠨᠤᠨ ᠤ ᠤᠶᠢᠷ᠎ᠠ ᠬᠠᠪᠢ ᠎ ᠶᠢ ᠨᠡᠩᠵᠢᠪᠡ᠃       ᠲᠠᠶᠢᠴᠢᠭᠤᠳ ᠠᠶᠢᠮᠠᠭ ᠲᠤ ᠪᠠᠭᠳᠠᠯᠴᠠᠨ ᠪᠦᠬᠦᠢ ᠨᠢᠬᠡᠨ ᠬᠡᠰᠡᠭ ᠬᠦᠮᠦᠰ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ ᠤᠨ ᠬᠡᠷᠴᠡᠬᠡᠶᠢᠯᠡᠯ ᠳᠤ ᠲᠤᠩ ᠲᠤᠷ᠎ᠠ ᠦᠬᠡᠶᠢᠴᠡᠵᠤ ᠪᠠᠶᠢᠳᠠᠭ ᠪᠢᠯᠡ᠃ ᠲᠡᠳᠡ ᠲᠡᠮᠦᠵᠢᠨ ᠢ ᠠᠶᠢᠯ ᠬᠡᠰᠦᠬᠦᠯᠦᠨ ᠵᠠᠰᠠᠭᠯᠠᠬᠤ ᠶᠢ ᠲᠡᠮᠡᠢ ᠯᠡ ᠲᠠᠭᠠᠯᠠᠬᠤ ᠦᠭᠡᠢ ᠪᠠᠶᠢᠪᠠ᠃ ᠰᠦᠯᠳᠡᠰᠤᠨ ᠤ ᠰᠤᠷᠬᠠᠨ ᠰᠢᠷ᠎ᠠ ᠬᠡᠳᠡᠭ ᠡᠪᠤᠬᠡᠨ ᠴᠦ ᠬᠡᠳᠦᠶᠢᠨ ᠢᠩᠬᠢᠵᠤ ᠲᠠᠭᠠᠯᠬᠤ ᠦᠭᠡᠢ ᠪᠠᠶᠢᠭᠰᠠᠨ ᠲᠤᠯᠠ ᠤᠳᠤ ᠠᠶ᠎ᠠ ᠶᠢ ᠲᠠᠭᠠᠵᠤ ᠠᠶᠠᠰ ᠨᠡᠶᠢᠯᠡᠬᠦᠯᠦᠨ ᠲᠡᠮᠦᠵᠢᠨ ᠢ ᠨᠡᠩᠵᠢᠵᠤ ᠶᠠᠪᠤᠭᠰᠠᠭᠠᠷ ᠤᠰᠤᠨ ᠤ ᠬᠠᠷᠬᠢ ᠳᠤ ᠨᠢᠭᠤᠷ ᠢᠶᠠᠨ ᠢᠯᠡ ᠭᠠᠷᠭᠠᠭᠠᠳ ᠬᠡᠪᠳᠡᠵᠤ ᠪᠠᠶᠢᠭᠰᠠᠨ ᠲᠡᠮᠦᠵᠢᠨ ᠲᠠᠢ ᠠᠰ ᠲᠤᠬᠢᠶᠠᠯᠳᠤᠨ ᠤᠴᠠᠷᠠᠪᠠ᠃ ᠲᠡᠮᠦᠵᠢᠨ ᠠᠷᠭ᠎ᠠ ᠦᠭᠡᠢ ᠪᠠᠷᠢᠭᠳᠠᠬᠤ ᠪᠠᠨ ᠬᠦᠯᠢᠶᠡᠵᠤ ᠬᠡᠪᠳᠡᠳᠡᠯ᠎ᠡ᠂ ᠰᠤᠷᠬᠠᠨ ᠰᠢᠷ᠎ᠠ ᠲᠠᠶᠢᠴᠢᠭᠤᠳ ᠨᠠᠷ ᠢ ᠬᠤᠯᠠ ᠶᠠᠪᠤᠭᠰᠠᠨ ᠬᠤᠶᠢᠨ᠎ᠠ᠂ ᠬᠠᠷᠬᠢ ᠳᠤ ᠤᠶᠢᠷᠠᠳᠤᠨ ᠤᠴᠢᠵᠤ᠄       ︽ᠶᠢᠰᠦᠬᠡᠢ ᠪᠠᠭᠠᠳᠤᠷ ᠤᠨ ᠤᠤᠭᠠᠨ ᠬᠦᠦ ᠲᠠᠮᠦᠵᠢᠨ ᠬᠡᠭᠴᠢ ᠨᠢᠳᠤᠨ ᠳᠡᠭᠡᠨ ᠭᠠᠯ ᠲᠠᠢ᠂ ᠨᠢᠭᠤᠷ ᠲᠠᠭᠠᠨ ᠬᠡᠷᠡᠯ ᠲᠠᠢ ᠪᠦᠬᠡᠳ ᠡᠶᠢᠮᠤ ᠠᠷᠭ᠎ᠠ ᠲᠠᠢ ᠬᠦᠮᠦᠨ ᠲᠤᠯᠠ ᠲᠠᠶᠢᠴᠢᠭᠤᠳ ᠠᠬ᠎ᠠ ᠲᠡᠬᠦᠦ ᠨᠠᠷ ᠠᠳᠠᠭᠠᠷᠬᠠᠵᠤ ᠪᠤᠢ ᠠᠵᠢ᠃ ᠤᠰᠤᠨ ᠳᠤ ᠤᠷᠤᠮ ᠦᠭᠡᠢ ᠤᠭᠳᠠᠷᠭᠤᠢ ᠳᠤ ᠮᠦᠷ ᠦᠭᠡᠢ ᠲᠤᠯᠠ ᠴᠢᠨᠤ ᠢᠩᠬᠢᠵᠤ ᠬᠡᠪᠳᠡᠬᠦ ᠵᠦᠪ᠂ ᠪᠢ ᠴᠢᠮᠠᠢᠢ ᠵᠢᠭᠠᠵᠤ ᠦᠭᠬᠦ ᠦᠭᠡᠢ᠂ ᠰᠡᠳᠬᠢᠯ ᠢᠶᠠᠨ ᠠᠮᠤᠷ ᠪᠠᠢ︾ ᠬᠡᠳ ᠦᠩᠬᠡᠷᠡᠨ ᠭᠠᠷᠪᠠ᠃ ᠲᠡᠮᠦᠵᠢᠨ ᠡᠨᠡ ᠰᠤᠷᠬᠠᠨ ᠰᠢᠷ᠎ᠠ ᠢ ᠲᠠᠨᠢᠳᠠᠭ ᠤᠴᠢᠷ ᠨᠢ᠂ ᠲᠦᠷᠦᠬᠦᠦ ᠬᠡᠳᠤᠨ ᠡᠳᠤᠷ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ ᠲᠡᠮᠦᠵᠢᠨ ᠢ ᠠᠶᠢᠯ ᠬᠡᠰᠦᠬᠦᠯᠦᠨ ᠬᠤᠨᠤᠭᠤᠯᠵᠤ ᠵᠠᠰᠠᠭᠯᠠᠨ ᠰᠢᠢᠳᠬᠡᠵᠤ ᠪᠠᠶᠢᠬᠤ ᠳᠤ᠂ ᠰᠤᠷᠬᠠᠨ ᠰᠢᠷ᠎ᠠ ᠡᠪᠤᠬᠡᠨ ᠤ ᠎ ᠳᠤ ᠬᠤᠨᠤᠵᠤ ᠦᠩᠬᠡᠷᠡᠭᠰᠡᠨ ᠪᠢᠯᠡ᠃ ᠲᠡᠷᠡ ᠰᠦᠨᠢ ᠲᠡᠬᠦᠨ ᠤ ᠴᠢᠮᠪᠠᠢ᠂ ᠴᠢᠯᠠᠭᠤᠨ ᠬᠡᠬᠦ ᠬᠤᠶᠠᠷ ᠬᠦᠦ ᠲᠡᠮᠦᠵᠢᠨ ᠎ ᠤ ᠬᠢᠨᠵᠢ ᠲᠦᠩᠬᠡ ᠶᠢ ᠰᠤᠯᠠᠯᠠᠨ ᠬᠤᠨᠤᠭᠤᠯᠤᠭᠰᠠᠨ ᠪᠠ ᠪᠠᠰᠠ ᠮᠢᠬ᠎ᠠ ᠲᠠᠢ ᠱᠦᠯᠤ ᠤᠤᠭᠤᠯᠭᠠᠭᠰᠠᠨ ᠪᠠᠶᠢᠵᠠᠢ᠃ ᠲᠡᠭᠡᠭᠡᠳ ᠰᠤᠷᠬᠠᠨ ᠰᠢᠷ᠎ᠠ ᠶᠢᠨ ᠦᠨᠡᠨ ᠭᠤᠤᠯ ᠠᠴᠠ ᠬᠡᠯᠡᠵᠤ ᠪᠠᠶᠢᠭ᠎ᠠ ᠶᠢ ᠢᠳᠡᠬᠡᠵᠤ᠂ ᠲᠤᠳᠤᠷ᠎ᠠ ᠨᠢ ᠪᠠᠭ᠋ᠠᠨ ᠠᠭᠤᠵᠢᠭᠤ ᠪᠤᠯᠵᠤ ᠤᠭ ᠤᠷᠤᠨ ᠳᠠᠭᠠᠨ ᠬᠦᠳᠡᠯᠦᠯ ᠦᠭᠡᠢ ᠬᠡᠪᠳᠡᠪᠡ᠃ ᠤᠳᠠᠯ ᠦᠭᠡᠢ ᠰᠤᠷᠬᠠᠨ ᠰᠢᠷ᠎ᠠ ᠶᠢᠨ ᠤᠳᠤᠭᠰᠠᠨ ᠵᠦᠭ ᠠᠴᠠ ᠬᠠᠷᠬᠢ ᠶᠢ ᠴᠢᠭᠯᠡᠬᠡᠳ ᠪᠠᠰᠠ ᠨᠢᠬᠡ ᠬᠦᠮᠦᠨ ᠢᠷᠡᠯ᠎ᠡ᠃ ᠲᠡᠮᠦᠵᠢᠨ᠂ ᠡᠨᠡ ᠤᠳᠠᠭ᠎ᠠ ᠯᠠᠪ ᠪᠠᠷᠢᠭᠳᠠᠯ᠎ᠠ ᠬᠡᠵᠤ ᠰᠠᠨᠳᠤᠷᠴᠤ ᠪᠠᠶᠢᠳᠠᠯ᠎ᠠ᠂ ᠤᠶᠢᠷᠠᠳᠤᠨ ᠢᠷᠡᠬᠦ ᠳᠤ ᠮᠦᠨ ᠰᠤᠷᠬᠠᠨ ᠰᠢᠷ᠎ᠠ ᠡᠪᠤᠬᠡᠨ ᠪᠠᠶᠢᠯ᠎ᠠ᠃ ᠲᠡᠷᠡ ᠡᠪᠦᠬᠡᠨ᠄       ︽ᠲᠠᠶᠢᠴᠢᠭᠤᠳ ᠠᠬ᠎ᠠ ᠲᠡᠬᠦᠦ ᠨᠠᠷ ᠠᠷᠠᠭ᠎ᠠ ᠰᠢᠳᠤ ᠪᠠᠨ ᠪᠢᠯᠡᠬᠦᠳᠡᠵᠤ ᠶᠠᠪᠤᠨ᠎ᠠ᠃ ᠴᠢ ᠬᠠᠳᠠᠭᠤᠵᠢᠨ ᠬᠡᠪᠳᠡᠵᠤ ᠪᠠᠢ᠂ ᠪᠢᠳᠠ ᠶᠠᠪᠤᠭᠰᠠᠨ ᠮᠦᠷ ᠢᠶᠠᠷ ᠢᠶᠠᠨ ᠬᠡᠳᠡᠷᠬᠦ ᠶᠠᠪᠤᠵᠤ ᠤᠷᠴᠢᠮ ᠤᠨ ᠭᠠᠵᠠᠷ ᠢ ᠲᠠᠬᠢᠨ ᠨᠡᠩᠵᠢᠵᠤ ᠪᠠᠶᠢᠨ᠎ᠠ︾ ᠬᠡᠳ ᠪᠠᠰᠠ ᠦᠩᠬᠡᠷᠡᠨ ᠤᠳᠪᠠ᠃       ᠲᠡᠮᠦᠵᠢᠨ ᠲᠤᠳᠤᠷ᠎ᠠ ᠪᠠᠨ᠂ ᠤᠳᠤ ᠠᠮᠢ ᠭᠠᠷᠬᠤ ᠪᠤᠯᠪᠠ ᠤᠤ︖ ᠬᠡᠵᠤ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠨ ᠬᠡᠪᠳᠡᠪᠡ᠃ ᠬᠡᠳᠡᠯ᠎ᠡ ᠲᠠᠮᠠᠢ ᠬᠤᠯᠠ ᠦᠭᠡᠢ ᠭᠠᠵᠠᠷ ᠠᠴᠠ ᠲᠠᠶᠢᠴᠢᠭᠤᠳ ᠤᠨ ᠲᠦᠷᠦᠬᠦᠦ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ ᠤᠨ ᠬᠠᠷᠢᠶᠠᠵᠤ ᠵᠠᠩᠨᠠᠬᠤ ᠲᠠᠭᠤᠨ ᠰᠤᠨᠤᠰᠳᠠᠪᠠ᠃ ᠤᠳᠤ ᠶᠠᠭᠠᠬᠢᠬᠤ ᠪᠢᠯᠡ︖ ᠡᠨᠡ ᠬᠠᠷᠬᠢ ᠳᠤ ᠬᠡᠪᠳᠡᠵᠤ ᠪᠠᠶᠢᠭᠠᠳ ᠪᠠᠷᠢᠭᠳᠠᠬᠤ ᠶᠤᠮ ᠤᠤ᠂ ᠡᠰᠡᠬᠦᠯ᠎ᠡ ᠭᠠᠷᠴᠤ ᠲᠤᠳᠠᠭᠠᠬᠤ ᠶᠤᠮ ᠤᠤ︖ ᠬᠡᠳᠡᠯ᠎ᠡ ᠡᠨᠡ ᠰᠠᠷᠠᠭᠤᠯ ᠰᠦᠨᠢ ᠬᠠᠮᠢᠭᠠᠰᠢ ᠲᠤᠳᠠᠭᠠᠬᠤ ᠪᠢᠯᠡ︖ ᠬᠡᠵᠤ ᠪᠠᠶᠢᠳᠠᠯ᠎ᠠ᠂ ᠰᠤᠷᠬᠠᠨ ᠰᠢᠷ᠎ᠠ ᠶᠢᠨ ᠲᠠᠭᠤᠨ ᠰᠤᠨᠤᠰᠳᠠᠪᠠ᠄       ︽ᠲᠠᠶᠢᠴᠢᠭᠤᠳ ᠤᠨ ᠲᠦᠷᠦᠬᠦᠦ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ ᠮᠢᠨᠢ᠂ ᠪᠢᠳᠠ ᠬᠡᠬᠡᠨ ᠴᠠᠭᠠᠨ ᠡᠳᠤᠷ ᠠᠮᠢᠳᠤ ᠬᠦᠮᠦᠨ ᠢ ᠠᠯᠳᠠᠭᠠᠳ ᠤᠳᠤ ᠰᠦᠨᠢ ᠤᠷᠤᠢ ᠶᠠᠭᠠᠬᠢᠨ ᠡᠷᠢᠵᠤ ᠤᠯᠬᠤ ᠪᠢᠯᠡ︖ ᠬᠦᠮᠦᠨ ᠪᠦᠷᠢ ᠶᠠᠪᠤᠭᠰᠠᠨ ᠮᠦᠷ ᠢᠶᠠᠷ ᠢᠶᠠᠨ ᠲᠠᠬᠢᠨ ᠨᠢᠬᠡ ᠤᠳᠠᠭ᠎ᠠ ᠨᠠᠷᠢᠨ ᠪᠠᠳᠠᠷᠢᠶ᠎ᠠ ④᠂ ᠬᠡᠷᠪᠡ ᠤᠯᠬᠤ ᠦᠭᠡᠢ ᠪᠤᠯ ᠡᠨᠡ ᠰᠦᠨᠢ ᠲᠠᠷᠬᠠᠭᠠᠳ ᠮᠠᠷᠭᠠᠰᠢ ᠡᠷᠢᠶ᠎ᠡ᠂ ᠲᠦᠩᠬᠡᠳᠤ ᠬᠦᠮᠦᠨ ᠬᠠᠮᠢᠭᠠᠰᠢ ᠶᠠᠪᠤᠬᠤ ᠪᠤᠢ︖︾ ᠬᠡᠰᠡᠨ ᠳᠤ ᠪᠦᠬᠦᠳᠡᠬᠡᠷ ︽ᠵᠠ︾ ᠬᠡᠵᠤ ᠪᠤᠴᠠᠵᠤ ᠢᠷᠡᠬᠦ ᠴᠢᠮᠡᠭᠡ ᠭᠠᠷᠤᠯ᠎ᠠ᠃       ᠲᠡᠮᠦᠵᠢᠨ ᠮᠦᠨ ᠰᠤᠷᠬᠠᠨ ᠰᠢᠷ᠎ᠠ ᠲᠠᠭᠠᠷᠢᠯᠳᠤᠬᠤ ᠪᠤᠯᠤᠭᠠᠰᠠᠢ ᠬᠡᠵᠤ ᠰᠡᠮᠡᠬᠡᠷ ᠬᠡᠪᠳᠡᠵᠤ ᠪᠠᠶᠢᠳᠠᠯ᠎ᠡ᠂ ᠦᠨᠡᠬᠡᠷ ᠰᠤᠷᠬᠠᠨ ᠰᠢᠷ᠎ᠠ ᠲᠡᠬᠦᠨ ᠳᠤ ᠤᠶᠢᠷᠠᠳᠤᠵᠤ ᠢᠷᠡᠬᠡᠳ᠄       ︽ᠲᠠᠶᠢᠴᠢᠭᠤᠳ ᠠᠬ᠎ᠠ ᠲᠡᠬᠦᠦ ᠨᠠᠷ ᠤᠳᠤ ᠨᠢᠬᠡ ᠤᠳᠠᠭ᠎ᠠ ᠡᠷᠢᠵᠤ ᠲᠠᠷᠬᠠᠭᠠᠳ ᠮᠠᠷᠭᠠᠰᠢ ᠡᠷᠢᠬᠦ ᠪᠠᠷ ᠪᠤᠯᠪᠠ᠃ ᠪᠢᠳᠠᠨ ᠢ ᠲᠠᠷᠬᠠᠮᠠᠭᠴᠠ ᠴᠢ ᠲᠦᠷᠬᠡᠨ ᠡᠬᠡ ᠪᠠ ᠲᠡᠬᠦᠦ ᠨᠠᠷ ᠤᠨ ᠢᠶᠠᠨ ᠵᠦᠭ ᠶᠠᠪᠤ᠂ ᠬᠡᠷᠪᠡ ᠬᠦᠮᠦᠨ ᠲᠤᠬᠢᠶᠠᠯᠳᠤᠪᠠᠯ ᠨᠠᠳᠠ ᠲᠠᠢ ᠤᠴᠠᠷᠠᠯ᠎ᠠ ᠬᠡᠵᠤ ᠪᠤᠤ ᠬᠡᠯᠡ︾ ᠬᠡᠳ ᠶᠠᠪᠤᠪᠠ᠃       ᠲᠠᠶᠢᠴᠢᠭᠤᠳ ᠨᠠᠷ ᠤᠷᠮ᠎ᠠ ᠠᠯᠳᠠᠷᠠᠨ ᠬᠡᠷ ᠬᠡᠷ ᠲᠡᠭᠡᠨ ᠪᠤᠴᠠᠭᠰᠠᠨ ᠬᠤᠶᠢᠨ᠎ᠠ᠂ ᠲᠡᠮᠦᠵᠢᠨ ᠬᠠᠷᠬᠢ ᠶᠢᠨ ᠲᠤᠳᠤᠷ᠎ᠠ ᠠᠴᠠ ᠭᠠᠷᠴᠤ ᠢᠷᠡᠬᠡᠳ᠂ ᠤᠳᠤ ᠶᠠᠭᠠᠬᠢᠳᠠᠭ ᠪᠢᠯᠡ︖ ᠪᠠᠭᠤ ᠲᠦᠩᠬᠡᠳᠠᠢ ᠪᠢ ᠮᠤᠷᠢ ᠤᠨᠤᠭ᠎ᠠ ᠦᠭᠡᠢ ᠪᠠᠷ ᠲᠠᠶᠢᠴᠢᠭᠤᠳ ᠨᠠᠷ ᠤᠨ ᠭᠠᠷ ᠠᠴᠠ ᠶᠠᠭᠠᠬᠢᠨ ᠮᠤᠯᠳᠤᠷᠠᠨ ᠭᠠᠷᠬᠤ ᠪᠢᠯᠡ︖ ᠬᠡᠵᠤ ᠪᠠᠭ᠋ᠠᠨ ᠪᠤᠳᠤᠰᠬᠢᠭᠰᠠᠨ ᠢᠶᠠᠨ᠄ ︽ᠲᠦᠷᠦᠬᠦᠦ ᠬᠡᠳᠦᠨ ᠡᠳᠤᠷ ᠨᠠᠮᠠᠢᠢ ᠠᠶᠢᠯ ᠬᠡᠰᠦᠬᠦᠯᠦᠨ ᠵᠠᠰᠠᠭᠯᠠᠬᠤ ᠳᠤ᠃ ᠰᠤᠷᠬᠠᠨ ᠰᠢᠷ᠎ᠠ ᠶᠢᠨ ᠬᠡᠷ ᠲᠤ ᠬᠤᠨᠤᠭᠰᠠᠨ ᠳᠤ ᠲᠡᠬᠦᠨ ᠤ ᠬᠦᠦ ᠴᠢᠮᠪᠠᠢ᠂ ᠴᠢᠯᠠᠭᠤᠨ ᠬᠤᠶᠠᠷ ᠨᠠᠮᠠᠢᠢ ᠦᠷᠦ ᠡᠪᠡᠳᠤᠨ ᠰᠦᠨᠢ ᠬᠢᠨᠵᠢ ᠲᠦᠩᠬᠡ ᠶᠢ ᠮᠢᠨᠢ ᠰᠤᠯᠠᠯᠠᠨ ᠬᠤᠨᠤᠭᠤᠯᠪᠠ᠃ ᠤᠳᠤ ᠪᠠᠰᠠ ᠰᠤᠷᠬᠠᠨ ᠰᠢᠷ᠎ᠠ ᠡᠪᠤᠬᠡᠨ ᠨᠠᠮᠠᠢᠢ ᠲᠠᠶᠢᠴᠢᠭᠤᠳ ᠨᠠᠷ ᠲᠤ ᠵᠢᠭᠠᠵᠤ ᠦᠭᠬᠦᠭᠰᠡᠨ ᠦᠭᠡᠢ ᠦᠩᠬᠡᠷᠡᠬᠦᠯᠪᠡ᠃ ᠪᠤᠳᠤᠪᠠᠯ ᠲᠡᠳᠡ ᠨᠠᠮᠠᠢᠢ ᠠᠪᠤᠷᠠᠬᠤ ᠶᠤᠮ ᠪᠠᠶᠢᠨ᠎ᠠ᠂ ᠵᠠ ᠲᠡᠳᠡᠨ ᠢ ᠡᠷᠢᠶ᠎ᠡ︾ ᠬᠡᠵᠤ ᠰᠢᠭᠤᠳ ᠰᠤᠷᠬᠠᠨ ᠰᠢᠷ᠎ᠠ ᠶᠢᠨ ᠬᠡᠷ ᠢ ᠴᠢᠭᠯᠡᠨ ᠤᠨᠤᠨ ᠮᠦᠷᠡᠨ ᠢ ᠲᠠᠭᠠᠵᠤ ᠶᠠᠪᠤᠪᠠ᠃       ᠰᠤᠷᠬᠠᠨ ᠰᠢᠷ᠎ᠠ ᠶᠢᠨ ᠬᠡᠷ ᠢ ᠤᠯᠬᠤ ᠳᠤ ᠠᠮᠠᠷ ᠪᠠᠶᠢᠯ᠎ᠠ᠂ ᠲᠡᠳᠡᠨ ᠤ ᠬᠢ ᠦᠷ ᠴᠠᠶᠢᠳᠠᠯ᠎ᠠ ᠠᠶᠢᠷᠠᠭ ᠪᠦᠯᠢᠬᠦ ᠠᠵᠢ᠃ ᠲᠡᠮᠦᠵᠢᠨ ᠪᠦᠯᠢᠬᠦᠷ ᠤᠨ ᠴᠢᠮᠡᠭᠡ ᠶᠢ ᠴᠢᠭᠯᠡᠵᠤ ᠤᠳᠠᠭᠰᠠᠨ ᠦᠭᠡᠢ ᠰᠤᠷᠬᠠᠨ ᠰᠢᠷ᠎ᠠ ᠶᠢᠨ ᠬᠡᠷ ᠲᠤ ᠬᠦᠷᠪᠡ᠃ ᠰᠤᠷᠬᠠᠨ ᠰᠢᠷ᠎ᠠ ᠶᠡᠬᠡᠳᠡ ᠰᠤᠴᠢᠨ᠄       ︽ᠪᠢ ᠴᠢᠮ᠎ᠡ ᠳᠤ ᠡᠬᠡ ᠪᠡ ᠲᠡᠬᠦᠦ ᠨᠠᠷ ᠢᠶᠠᠨ ᠡᠷᠢᠨ ᠲᠦᠷᠬᠡᠨ ᠶᠠᠪᠤ ᠬᠡᠵᠤ ᠬᠡᠯᠡᠭᠰᠡᠨ ᠪᠢᠰᠢ ᠤᠤ︖ ᠴᠢ ᠠᠳᠠ ᠶᠠᠭᠤᠨ ᠳᠤ ᠢᠷᠡᠪᠡ︖︾ ᠬᠡᠪᠡ᠃ ᠲᠡᠮᠦᠵᠢᠨ ᠶᠠᠭᠤ ᠬᠡᠯᠡᠬᠦ ᠪᠠᠨ ᠤᠯᠵᠤ ᠶᠠᠳᠠᠨ ᠪᠠᠶᠢᠳᠠᠯ᠎ᠠ ᠂ ᠰᠤᠷᠬᠠᠨ ᠰᠢᠷ᠎ᠠ ᠶᠢᠨ ᠴᠢᠮᠪᠠᠢ᠂ ᠴᠢᠯᠠᠭᠤᠨ ᠬᠤᠶᠠᠷ ᠬᠦᠦ ᠨᠢ ᠭᠠᠷᠴᠤ ᠢᠷᠡᠬᠡᠳ᠄       ︽ᠪᠤᠯᠵᠤᠮᠤᠷ ᠰᠢᠪᠠᠭᠤᠨ ᠤ ᠵᠤᠯᠵᠠᠭ᠎ᠠ       ᠪᠤᠷᠤ ᠬᠠᠷᠴᠠᠭᠠᠢ ᠠᠴᠠ ᠲᠤᠳᠠᠭᠠᠵᠤ       ᠪᠤᠳᠠᠨ ᠤ ᠢᠷᠤᠭᠠᠷ ᠲᠤ ᠰᠢᠷᠭᠤᠪᠠᠯ       ᠪᠤᠳᠠ ᠲᠡᠬᠦᠨ ᠢ ᠬᠠᠮᠠᠭᠠᠯᠠᠨ᠎ᠠ ᠬᠡᠳᠡᠭ ᠪᠢᠰᠢ ᠤᠤ︖ ᠤᠳᠤ ᠪᠢᠳᠠᠨ ᠳᠤ ᠬᠦᠮᠦᠨ ᠠᠮᠢ ᠪᠠᠨ ᠬᠤᠷᠭᠤᠳᠠᠬᠤ ᠪᠠᠷ ᠢᠷᠡᠵᠤ ᠪᠠᠶᠢᠬᠤ ᠳᠤ ᠪᠢᠳᠠ ᠶᠠᠭᠠᠬᠢᠨ ᠲᠤᠰᠠᠯᠠᠬᠤ ᠦᠭᠡᠢ ᠪᠠᠶᠢᠵᠤ ᠪᠤᠯᠤᠨ᠎ᠠ ᠪᠤᠢ︾ ᠬᠡᠵᠤ ᠲᠡᠮᠦᠵᠢᠨ ᠢ ᠬᠡᠷ ᠲᠡᠭᠡᠨ ᠤᠷᠤᠭᠤᠯᠵᠤ ᠪᠠᠭᠤ ᠲᠦᠩᠬᠡ ᠶᠢ ᠨᠢ ᠡᠪᠳᠡᠨ ᠬᠠᠭᠠᠯᠵᠤ ᠭᠠᠯ ᠳᠤ ᠲᠦᠯᠡᠵᠤ ᠤᠷᠬᠢᠪᠠ᠂ ᠪᠠᠰᠠ ᠲᠡᠮᠦᠵᠢᠨ ᠳᠤ ᠬᠤᠭᠤᠯᠠ ᠦᠭᠴᠤ ᠢᠳᠡᠬᠦᠯᠦᠨ ᠬᠡᠷ ᠲᠡᠭᠡᠨ ᠠᠪᠴᠤ ᠬᠤᠨᠤᠪᠠ᠃       ᠮᠠᠷᠭᠠᠰᠢ ᠨᠢ ᠦᠷ ᠴᠠᠶᠢᠮᠠᠭᠴᠠ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ ᠠᠶᠢᠮᠠᠭ ᠤᠨ ᠤᠯᠠᠨ ᠢᠶᠠᠨ ᠴᠤᠭᠯᠠᠭᠤᠯᠵᠤ᠂ ᠤᠨᠤᠨ ᠮᠦᠷᠡᠨ ᠤ ᠤᠶᠢᠷ᠎ᠠ ᠬᠠᠪᠢ ᠭᠠᠵᠠᠷ ᠢ ᠨᠢᠬᠡ ᠴᠦ ᠦᠯᠡᠳᠡᠬᠡᠯ ᠦᠭᠡᠢ ᠨᠡᠩᠵᠢᠨ ᠪᠠᠶᠢᠴᠠᠭᠠᠭᠠᠳ ᠶᠠᠭᠤ ᠴᠦ ᠤᠯᠤᠯ ᠦᠭᠡᠢ᠂ ᠨᠠᠷᠠᠨ ᠰᠢᠩᠬᠡᠭᠰᠡᠨ ᠬᠤᠶᠢᠨ᠎ᠠ ᠰᠠᠶ᠋ᠢ ᠬᠠᠷᠢᠵᠠᠭᠠᠪᠠ᠃       ᠭᠤᠷᠪᠠᠳᠤᠭᠠᠷ ᠡᠳᠤᠷ ᠨᠢ᠂ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ᠄       ︽ᠲᠦᠩᠬᠡᠳᠤ ᠬᠦᠮᠦᠨ ᠬᠠᠮᠢᠭ᠎ᠠ ᠬᠤᠯᠠᠳᠬᠤ ᠪᠢᠯᠡ︖ ᠯᠠᠪ ᠮᠠᠨ ᠤ ᠬᠢᠨ ᠨᠢᠭᠤᠨ ᠲᠠᠯᠳᠠᠯᠠᠵᠤ ᠪᠠᠶᠢᠭ᠎ᠠ ᠪᠢᠵᠡ᠂ ᠠᠶᠢᠯ ᠲᠠᠷᠠᠭᠠᠯᠠᠨ ᠨᠡᠩᠵᠢᠶ᠎ᠠ︾ ᠬᠡᠪᠡ᠃ ᠡᠨᠡ ᠴᠢᠮᠡᠭᠡ ᠶᠢ ᠰᠤᠨᠤᠰᠤᠭᠠᠳ ᠴᠢᠮᠪᠠᠢ᠂ ᠴᠢᠯᠠᠭᠤᠨ ᠬᠤᠶᠠᠷ ᠲᠡᠮᠦᠵᠢᠨ ᠢ ᠤᠩᠭᠠᠰᠤᠳᠤ ᠲᠡᠷᠬᠡᠨ ᠳᠤ ᠤᠷᠤᠭᠤᠯᠵᠤ᠂ ᠭᠠᠳᠠᠨ᠎ᠠ ᠠᠴᠠ ᠨᠢ ᠲᠦᠬᠦᠷᠳᠡᠯ᠎ᠡ ᠤᠩᠭᠠᠰᠤ ᠴᠢᠬᠢᠬᠡᠳ ᠬᠠᠳᠠᠭᠠᠨ ᠨᠡᠷ᠎ᠡ ᠲᠠᠢ ᠪᠢᠴᠢᠬᠠᠨ ᠦᠬᠢᠨ ᠲᠡᠬᠦᠦ ᠳᠡᠭᠡᠨ ᠲᠤᠰᠢᠶᠠᠨ ᠦᠭᠴᠤ᠄       ︽ᠰᠠᠶᠢᠬᠠᠨ ᠠᠰᠠᠷᠠ᠂ ᠪᠤᠰᠤᠳ ᠬᠦᠮᠦᠨ ᠳᠤ ᠪᠤᠤ ᠬᠡᠯᠡ︾ ᠬᠡᠳ ᠨᠡᠩᠵᠢᠬᠦᠯ ᠢ ᠬᠦᠯᠢᠶᠡᠵᠤ ᠪᠠᠶᠢᠳᠠᠯ᠎ᠠ᠂ ᠲᠠᠶᠢᠴᠢᠭᠤᠳ ᠨᠠᠷ ᠠᠶᠢᠯ ᠲᠠᠷᠠᠭᠠᠯᠠᠨ ᠨᠡᠩᠵᠢᠭᠰᠡᠬᠡᠷ ᠲᠡᠳᠡᠨ ᠤ ᠳᠤ ᠬᠦᠷᠴᠤ ᠢᠷᠡᠪᠡ᠃ ᠲᠠᠶᠢᠴᠢᠭᠤᠳ ᠨᠠᠷ ᠰᠤᠷᠬᠠᠨ ᠰᠢᠷ᠎ᠠ ᠶᠢᠨ ᠬᠡᠷ ᠲᠡᠷᠬᠡ ᠪᠠ ᠢᠰᠠᠷᠢ ⑤᠎ ᠶᠢᠨ ᠲᠤᠳᠤᠷ᠎ᠠ ᠬᠦᠷᠳᠡᠯ᠎ᠡ ᠨᠡᠩᠵᠢᠬᠡᠳ ᠶᠠᠭᠤ ᠳᠤ ᠤᠯᠤᠭᠰᠠᠨ ᠦᠭᠡᠢ᠂ ᠲᠡᠳᠡ ᠬᠡᠨᠡᠳᠳᠡ ᠬᠡᠷ ᠤᠨ ᠠᠷᠤ ᠳᠠᠬᠢ ᠤᠩᠭᠠᠰᠤ ᠲᠠᠢ ᠲᠡᠷᠬᠡ ᠶᠢ ᠤᠯᠵᠤ ᠦᠵᠡᠬᠡᠳ᠄       ︽ᠡᠬᠦᠨ ᠤ ᠲᠤᠳᠤᠷ᠎ᠠ ᠨᠢᠭᠤᠵᠤ ᠪᠠᠶᠢᠬᠤ ᠪᠢᠵᠡ︖︾ ᠬᠡᠵᠤ ᠲᠡᠷᠬᠡᠨ ᠲᠡᠭᠡᠷ᠎ᠡ ᠭᠠᠷᠴᠤ ᠤᠩᠭᠠᠰᠤ ᠶᠢ ᠪᠦᠬᠡᠮ ᠪᠦᠬᠡᠮ ᠢᠶᠠᠷ ᠭᠠᠳᠠᠭᠰᠢ ᠴᠢᠷᠴᠤ ᠭᠠᠷᠭᠠᠪᠠ᠃ ᠪᠢᠴᠢᠬᠠᠨ ᠬᠠᠳᠠᠭᠠᠨ ᠦᠬᠢᠨ ᠤ ᠵᠢᠷᠦᠬᠡ ᠨᠢ ᠴᠤᠬᠢᠯᠠᠬᠤ ᠪᠠᠨ ᠵᠤᠭᠰᠤᠮᠠᠷ ᠪᠤᠯᠵᠤ᠂ ᠨᠢᠳᠤ ᠪᠠᠨ ᠬᠦᠯᠦᠯᠵᠡᠬᠦᠯᠦᠨ ᠠᠮᠠ ᠪᠠᠨ ᠪᠢᠳᠡᠬᠦᠯᠡᠨ ᠲᠠᠭᠵᠢᠨ ᠪᠠᠶᠢᠳᠠᠯ᠎ᠠ ᠰᠤᠷᠬᠠᠨ ᠰᠢᠷ᠎ᠠ ᠲᠡᠬᠦᠨ ᠢ ᠲᠡᠪᠡᠷᠢᠨ ᠠᠪᠴᠤ᠄        ︽ᠡᠶᠢᠮᠤ ᠬᠠᠯᠠᠭᠤᠨ ᠡᠳᠤᠷ ᠤᠩᠭᠠᠰᠤᠨ ᠲᠤᠳᠤᠷ᠎ᠠ ᠠᠮᠢᠳᠤ ᠬᠦᠮᠦᠨ ᠪᠠᠶᠢᠵᠤ ᠲᠡᠰᠬᠦ ᠤᠤ︖ ᠰᠡᠳᠬᠢᠯ ᠢᠶᠠᠨ ᠬᠠᠨᠳᠠᠯ᠎ᠠ ᠡᠷᠢ︾ ᠬᠡᠵᠤ ᠬᠡᠯᠡᠭᠰᠡᠨ ᠳᠤ᠂ ᠲᠠᠶᠢᠴᠢᠭᠤᠳ ᠨᠠᠷ ᠰᠠᠶ᠋ᠢ ᠨᠡᠩᠵᠢᠬᠦ ᠪᠠᠨ ᠪᠠᠶᠢᠵᠤ᠂ ᠦᠬᠡᠷ᠎ᠡ ᠠᠶᠢᠯ ᠢ ᠨᠡᠩᠵᠢᠷ᠎ᠡ ᠤᠳᠪᠠ᠃       ᠨᠡᠩᠵᠢᠬᠦᠯ ᠤᠨ ᠬᠦᠮᠦᠰ ᠬᠤᠯᠠ ᠶᠠᠪᠤᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠰᠤᠷᠬᠠᠨ ᠰᠢᠷ᠎ᠠ ᠡᠪᠤᠬᠡᠨ ᠲᠡᠮᠦᠵᠢᠨ ᠢ ᠤᠩᠭᠠᠰᠤᠳᠤ ᠲᠡᠷᠬᠡᠨ ᠠᠴᠠ ᠪᠠᠭᠤᠯᠭᠠᠵᠤ᠄       ︽ᠨᠠᠮᠠᠢᠢ ᠦᠨᠡᠰᠤ ᠪᠠᠷ ᠬᠡᠶᠢᠰᠬᠡᠬᠦ ᠠᠯᠳᠠᠪᠠ ᠴᠢ᠂ ᠤᠳᠤ ᠲᠦᠷᠬᠡᠨ ᠡᠬᠡ ᠪᠠ ᠲᠡᠬᠦᠦ ᠨᠠᠷ ᠎ ᠢᠶᠠᠨ ᠡᠷᠢᠨ ᠶᠠᠪᠤ︾ ᠬᠡᠵᠤ ᠲᠡᠬᠦᠨ ᠳᠤ ᠠᠮᠠ ᠴᠠᠭᠠᠨ ᠡᠷᠡᠮᠡᠭ ᠬᠤᠯᠠᠭᠴᠢ ᠬᠡᠬᠦᠦ ᠪᠠᠨ ᠤᠨᠤᠭᠤᠯᠵᠤ᠂ ᠲᠡᠯᠡᠭᠡ ᠬᠤᠷᠠᠭ᠎ᠠ ᠴᠢᠨᠠᠵᠤ ᠪᠠᠰᠠ ᠬᠦᠬᠦᠦᠷ᠂ ᠨᠢᠭᠡ ᠨᠤᠮᠤ ᠬᠤᠶᠠᠷ ᠰᠤᠮᠤ ᠦᠭᠴᠤ ᠡᠮᠡᠬᠡᠯ ᠪᠠ ᠬᠡᠳᠡ ᠦᠭᠡᠢ ᠪᠠᠷ ᠶᠠᠪᠤᠭᠤᠯᠪᠠ᠃ ⑥       ᠲᠡᠮᠦᠵᠢᠨ ᠢᠩᠬᠢᠬᠡᠳ ᠲᠠᠶᠢᠴᠢᠭᠤᠳ ᠤᠨ ᠭᠠᠷ ᠠᠴᠠ ᠮᠤᠯᠳᠤᠷᠠᠪᠠ᠃         ᠲᠠᠶᠢᠯᠪᠤᠷᠢ       ① ᠵᠠᠰᠠᠭᠯᠠᠬᠤ — ᠶᠠᠯᠠᠯᠠᠨ ᠰᠢᠢᠳᠬᠡᠬᠦ᠃       ② ᠪᠠᠭᠤ — ᠶᠠᠯᠠᠳᠠᠨ ᠤ ᠭᠠᠷ ᠲᠤ ᠵᠡᠬᠦᠯᠬᠡᠳᠡᠭ ᠮᠤᠳᠤ ᠪᠠᠷ ᠬᠢᠭᠰᠡᠨ ᠭᠠᠪᠠ᠃       ③ ᠬᠠᠷᠬᠢ — ᠭᠤᠤᠯ ᠤᠷᠤᠰᠬᠠᠯ ᠤᠨ ᠬᠠᠵᠠᠭᠤ ᠳᠠᠬᠢ ᠲᠤᠭᠳᠠᠮᠠᠯ ᠤᠰᠤ᠃       ④ ᠪᠠᠳᠠᠷᠢᠶ᠎ᠠ — ᠡᠷᠢᠶ᠎ᠠ᠃       ⑤ ᠢᠰᠠᠷᠢ — ᠤᠷᠤ       ⑥ ᠡᠮᠡᠬᠡᠯ ᠪᠠ ᠬᠡᠳᠡ ᠦᠭᠡᠢ ᠶᠠᠪᠤᠭᠤᠯᠪᠠ — ᠡᠮᠡᠬᠡᠯ ᠦᠭᠡᠢ ᠵᠠᠶᠢᠳᠠᠩ ᠮᠤᠷᠢ ᠶᠢ ᠬᠤᠯᠠ ᠤᠨᠤᠵᠤ ᠲᠡᠶᠢᠯᠬᠦ ᠦᠭᠡᠢ᠂ ᠬᠡᠳᠡ ᠦᠭᠡᠢ ᠪᠤᠯ ᠭᠠᠯ ᠨᠤᠴᠤᠭᠠᠨ ᠬᠤᠭᠤᠯᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠲᠦᠷᠬᠡᠨ ᠶᠠᠪᠤᠵᠤ ᠬᠤᠷᠳᠤᠨ ᠬᠦᠷ ᠬᠡᠰᠡᠨ ᠰᠠᠨᠠᠭ᠎ᠠ᠃         ᠡᠮᠤᠨᠡᠬᠢ ᠦᠯᠢᠬᠡᠷ᠄ ᠦᠬᠡᠯᠦᠨ ᠡᠬᠡ ᠶᠢᠨ ᠰᠤᠷᠭᠠᠯ       ᠬᠤᠶᠢᠨᠡᠬᠢ ᠦᠯᠢᠬᠡᠷ᠄ ᠲᠡᠮᠦᠵᠢᠨ ᠬᠢᠬᠡᠳ ᠪᠤᠭᠤᠷᠴᠢ ᠶᠢᠨ ᠨᠦᠬᠦᠷᠯᠡᠭᠰᠡᠨ 
  
ᠢᠷᠡᠯᠲᠡ᠄ ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠰᠤᠩᠭᠤᠳᠠᠭ ᠦᠯᠢᠬᠡᠷ ᠤᠨ ᠰᠤᠩᠭᠤᠮᠠᠯ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号