ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠲᠡᠤᠬᠡᠨ ᠦᠯᠢᠬᠡᠷ ︵ᠨᠠᠢᠮᠠ︶ — ᠦᠬᠡᠯᠦᠨ ᠦᠵᠢᠨ ᠤ ᠬᠠᠳᠠᠭᠤᠵᠢᠨ ᠲᠡᠮᠡᠴᠡᠭᠰᠡᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/5/21
        ᠶᠢᠰᠦᠬᠡᠢ ᠪᠠᠭᠠᠳᠤᠷ ᠲᠡᠲ᠋ᠠᠷ ᠢᠷᠬᠡᠨ ᠳᠤ ᠬᠤᠤᠷᠯᠠᠭᠳᠠᠨ ᠦᠬᠦᠭᠰᠡᠨ ᠤ ᠲᠠᠷᠠᠭ᠎ᠠ᠂ ᠠᠮᠪᠠᠭᠠᠢ ᠬᠠᠭᠠᠨ ᠤ ᠤᠭᠰᠠᠭ᠎ᠠ ᠲᠦᠷᠦᠯ ᠠᠴᠠ ᠲᠠᠶᠢᠴᠢᠭᠤᠳ ᠨᠠᠷ ᠪᠡᠯᠪᠡᠰᠤᠨ ᠦᠬᠡᠯᠦᠨ ᠦᠵᠢᠨ ᠪᠤᠯᠤᠨ ᠲᠡᠬᠦᠨ ᠤ ᠦᠨᠦᠴᠢᠨ ᠬᠡᠤᠬᠡᠳ ᠢ ᠤᠶᠢᠰᠢᠶᠡᠬᠤ ᠦᠭᠡᠢ ᠪᠤᠯᠤᠭᠰᠠᠨ ᠢᠶᠠᠷ ᠦᠯᠤ ᠪᠠᠷᠠᠨ᠂ ᠪᠠᠰᠠ ᠡᠯᠳᠡᠪ ᠰᠢᠯᠳᠠᠭ ᠡᠷᠢᠨ ᠲᠠᠷᠤᠯᠠᠨ ᠲᠤᠷᠤᠮᠵᠢᠯᠠᠨ᠎ᠠ᠃       ᠨᠢᠬᠡᠨ ᠬᠠᠪᠤᠷ᠂ ᠠᠮᠪᠠᠭᠠᠢ ᠬᠠᠭᠠᠨ ᠤ ᠤᠷᠪᠠᠢ᠂ ᠰᠤᠬᠠᠳᠠᠢ ᠬᠤᠶᠠᠷ ᠬᠠᠳᠤᠨ ᠶᠡᠬᠡᠰ ᠤᠨ ᠭᠠᠵᠠᠷ ①᠎ ᠲᠤ ᠲᠠᠶᠢᠯᠭ᠎ᠠ ᠶᠢᠨ ᠢᠳᠡᠬᠡᠨ ᠡᠷᠬᠦᠬᠦ ᠪᠠᠷ ᠶᠠᠪᠤᠬᠤ ᠳᠠᠭᠠᠨ ᠦᠬᠡᠯᠦᠨ ᠦᠵᠢᠨ ᠳᠤ ᠬᠡᠯᠡᠭᠰᠡᠨ ᠦᠭᠡᠢ ᠲᠤᠯᠠ ᠲᠡᠬᠦᠨ ᠢ ᠮᠡᠳᠡᠬᠡᠳ ᠬᠦᠷᠳᠡᠯ᠎ᠡ ᠲᠠᠶᠢᠯᠭ᠎ᠠ ᠨᠢᠬᠡᠨᠳᠠ ᠲᠠᠭᠤᠰᠤᠭᠰᠠᠨ ᠪᠠᠶᠢᠪᠠ᠃ ᠡᠬᠦᠨ ᠳᠤ ᠤᠷᠪᠠᠢ᠂ ᠰᠤᠬᠠᠳᠠᠢ ᠬᠤᠶᠠᠷ ᠬᠠᠳᠤᠨ᠄       ︽ᠶᠢᠰᠦᠬᠡᠢ ᠶᠢ ᠦᠬᠡᠢ ᠪᠤᠯᠤᠮᠠᠭᠴᠠ ᠦᠬᠡᠯᠦᠨ ᠤ ᠵᠤᠷᠢᠭ ᠶᠡᠬᠡᠳᠴᠤ ᠶᠡᠬᠡᠰ ᠤᠨ ᠭᠠᠵᠠᠷ ᠎ ᠲᠤ ᠲᠠᠶᠢᠯᠭ᠎ᠠ ᠶᠢᠨ ᠢᠳᠡᠬᠡᠨ ᠴᠦ ᠡᠷᠬᠦᠬᠦ ᠲᠤᠷ᠎ᠠ ᠦᠭᠡᠢ ᠪᠤᠯᠪᠠ᠂ ᠲᠠᠶᠢᠯᠭ᠎ᠠ ᠶᠢᠨ ᠢᠳᠡᠬᠡᠨ ᠡᠷᠬᠦᠬᠦ ᠲᠤᠷ᠎ᠠ ᠦᠭᠡᠢ ᠬᠦᠮᠦᠨ ᠳᠤ ᠢᠳᠡᠬᠡᠨ ᠤ ᠬᠤᠪᠢ ᠬᠠᠮᠢᠭ᠎ᠠ ᠪᠠᠶᠢᠬᠤ ᠪᠤᠢ︖︾ ᠬᠡᠵᠤ ᠡᠰᠡ ᠦᠭᠪᠡ᠃ ᠦᠬᠡᠯᠦᠨ ᠦᠵᠢᠨ ᠠᠭᠤᠷ ᠢᠶᠠᠨ ᠲᠠᠷᠤᠵᠤ ᠶᠠᠳᠠᠨ᠄       ︽ᠲᠠ ᠨᠠᠷ ᠶᠢᠰᠦᠬᠡᠢ ᠪᠠᠭᠠᠳᠤᠷ ᠢ ᠦᠬᠦᠪᠡ ᠬᠡᠵᠤ ᠦᠨᠦᠴᠢᠨ ᠬᠡᠤᠬᠡᠳ ᠢ ᠮᠢᠨᠢ ᠪᠠᠯᠴᠢᠷ ᠬᠡᠵᠤ ᠦᠬᠡᠯᠦᠨ ᠨᠠᠮᠠᠢᠢ ᠲᠤᠷᠤᠮᠵᠢᠯᠡᠨ ᠶᠡᠬᠡᠰ ᠤᠨ ᠲᠠᠶᠢᠯᠭ᠎ᠠ ᠶᠢᠨ ᠬᠡᠰᠢᠭ ᠤᠨ ᠢᠳᠡᠬᠡᠨ ᠰᠠᠷᠬᠤᠳ ᠠᠴᠠ ᠦᠯᠦ ᠦᠭᠬᠦ ᠪᠠᠷ ᠪᠠᠷᠠᠬᠤ ᠦᠭᠡᠢ ᠪᠠᠰᠠ ᠦᠭᠡ ᠪᠠᠷ ᠲᠠᠭᠠᠷᠢᠭᠤᠯᠬᠤ ᠨᠢ ᠲᠠᠩᠴᠤ ᠬᠡᠳᠤᠷᠴᠤ ᠪᠠᠶᠢᠨ᠎ᠠ︕︾ ᠬᠡᠰᠡᠨ ᠳᠤ᠂ ᠤᠷᠪᠠᠢ᠂ ᠰᠤᠬᠠᠳᠠᠢ ᠬᠤᠶᠠᠷ ᠬᠠᠳᠤᠨ ᠤᠯᠠᠮ ᠬᠢᠯᠢᠩᠨᠡᠨ᠄       ︽ᠤᠷᠢᠵᠤ ᠴᠢᠮ᠎ᠡ ᠳᠤ ᠦᠭᠬᠦ ᠶᠤᠰᠤ ᠦᠭᠡᠢ       ᠤᠴᠠᠷᠠᠪᠠᠯ ᠴᠢ ᠦᠪᠡᠷ ᠢᠶᠠᠨ ᠠᠪᠴᠤ ᠢᠳᠡ       ᠬᠦᠷᠬᠡᠵᠤ ᠴᠢᠮ᠎ᠡ ᠳᠤ ᠦᠭᠬᠦ ᠶᠤᠰᠤ ᠦᠭᠡᠢ       ᠬᠦᠷᠳᠡᠪᠡᠯ ᠴᠢ ᠦᠪᠡᠷ ᠢᠶᠠᠨ ᠠᠪᠴᠤ ᠢᠳᠡ︕ ᠠᠮᠪᠠᠭᠠᠢ ᠬᠠᠭᠠᠨ ᠦᠬᠦᠭᠰᠡᠨ ᠴᠦ ᠠᠪᠠᠭ᠎ᠠ ᠪᠢᠵᠡ᠂ ᠴᠢ ᠶᠠᠭᠠᠬᠢᠨ ᠢᠩᠬᠢᠵᠤ ᠶᠤᠰᠤ ᠦᠭᠡᠢ ᠠᠭᠠᠰᠢᠯᠠᠨ᠎ᠡ︖︾ ᠬᠡᠵᠤ ᠭᠠᠷ ᠢᠶᠠᠨ ᠬᠠᠶᠠᠯᠠᠨ ᠪᠤᠴᠠᠪᠠ ᠃ ᠲᠡᠳᠡ ᠵᠠᠮ ᠳᠠᠭᠠᠨ ᠦᠬᠡᠯᠦᠨ ᠦᠵᠢᠨ ᠢ ᠦᠨᠦᠴᠢᠨ ᠬᠡᠤᠬᠡᠳ ᠤᠨ ᠬᠢᠨᠢ ᠬᠠᠮᠳᠤ ᠤᠷᠬᠢᠵᠤ ᠨᠡᠬᠦᠬᠦ ᠪᠠᠷ ᠬᠡᠯᠡᠯᠴᠡᠨ ᠲᠤᠭᠳᠠᠪᠠ᠃       ᠮᠠᠷᠭᠠᠰᠢ ᠨᠢ᠂ ᠲᠠᠶᠢᠴᠢᠭᠤᠳ ᠤᠨ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ᠂ ᠲᠤᠳᠤᠶᠢᠨ ᠬᠢᠷᠳᠤ ᠨᠠᠷ ᠠᠶᠢᠮᠠᠭ ᠲᠦᠷᠦᠯ ᠤᠨ ᠤᠯᠠᠨ ᠢᠶᠠᠨ ᠲᠠᠭᠠᠭᠤᠯᠤᠨ ᠤᠨᠤᠨ ᠮᠦᠷᠡᠨ ᠦᠬᠡᠳᠡ ᠨᠡᠬᠦᠨ ᠤᠳᠪᠠ᠃ ᠦᠬᠡᠯᠦᠨ ᠦᠵᠢᠨ ᠲᠡᠳᠡᠨ ᠢ ᠲᠠᠭᠤᠳᠠᠷ᠎ᠠ ᠢᠷᠡᠬᠦ ᠪᠤᠯᠪᠠ ᠤᠤ︖ ᠬᠡᠵᠤ ᠬᠡᠳᠤᠢ ᠬᠠᠷᠠᠭᠰᠠᠨ ᠴᠦ ᠬᠡᠨ ᠴᠦ ᠢᠷᠡᠭᠰᠡᠨ ᠦᠭᠡᠢ᠂ ᠬᠠᠷᠢᠨ ᠨᠡᠬᠦᠨ ᠤᠳᠬᠤ ᠢᠷᠬᠡᠳ ᠨᠡᠮᠡᠭᠳᠡᠭᠰᠡᠬᠡᠷ ᠪᠠᠶᠢᠪᠠ᠃ ᠡᠬᠦᠨ ᠳᠤ ᠶᠢᠰᠦᠬᠡᠢ ᠪᠠᠭᠠᠳᠤᠷ ᠤᠨ ᠬᠡᠷ ᠤᠨ ᠵᠠᠷᠤᠴᠠ ᠬᠤᠩᠬᠤᠳᠠᠨ ᠤ ᠴᠢᠷᠬ᠎ᠠ ᠡᠪᠦᠬᠡᠨ ᠲᠠᠶᠢᠴᠢᠭᠤᠳ ᠠᠬ᠎ᠠ ᠲᠡᠬᠦᠦ ᠨᠠᠷ ᠤᠨ ᠢᠩᠬᠢᠵᠤ ᠪᠡᠯᠪᠡᠰᠤᠨ ᠦᠨᠦᠴᠢᠨ ᠢ ᠤᠷᠬᠢᠵᠤ ᠨᠡᠬᠦᠬᠦ ᠳᠤ ᠰᠡᠳᠬᠢᠯ ᠦᠯᠦ ᠲᠦᠪᠳᠡᠨ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ᠂ ᠲᠤᠳᠤᠶᠢᠨ ᠬᠢᠷᠳᠤ ᠨᠠᠷ ᠢ ᠨᠡᠬᠡᠨ ᠬᠦᠷᠴᠤ᠄       ︽ᠲᠠ ᠨᠠᠷ ᠪᠡᠯᠪᠡᠰᠤᠨ ᠡᠬᠡᠨᠡᠷ ᠦᠨᠦᠴᠢᠨ ᠬᠡᠤᠬᠡᠳ ᠢ ᠶᠠᠭᠠᠬᠢᠨ ᠤᠷᠬᠢᠵᠤ ᠨᠡᠬᠦᠬᠦ ᠪᠤᠢ᠂ ᠪᠤᠴᠠᠳᠤᠭᠠᠢ︕︾ ᠬᠡᠵᠤ ᠢᠳᠬᠠᠭᠰᠠᠨ ᠳᠤ᠂ ᠲᠤᠳᠤᠶᠢᠨ ᠬᠢᠷᠳᠤ᠄       ︽ᠴᠡᠬᠡᠯ ᠤᠨ ᠤᠰᠤ ᠰᠢᠷᠬᠢᠪᠡ       ᠴᠡᠬᠡᠨ ᠴᠢᠯᠠᠭᠤ ᠬᠠᠭᠠᠷᠠᠪᠠ ②᠃ ᠠᠳᠠ ᠶᠠᠭᠤ ᠬᠢᠵᠤ ᠰᠠᠭᠤᠬᠤ ᠪᠤᠢ︕︾ ᠬᠡᠵᠤ ᠲᠡᠬᠦᠨ ᠤ ᠦᠬᠡ ᠶᠢ ᠦᠯᠦ ᠤᠶᠢᠰᠢᠶᠠᠨ ᠴᠢᠨᠠᠭᠰᠢ ᠶᠠᠪᠤᠪᠠ᠃ ᠴᠢᠷᠬ᠎ᠠ ᠡᠪᠦᠬᠡᠨ ᠶᠢᠰᠦᠬᠡᠢ ᠪᠠᠭᠠᠳᠤᠷ ᠤᠨ ᠦᠬᠦᠬᠦ ᠎ ᠶᠢᠨ ᠢᠶᠠᠨ ᠡᠮᠤᠨ᠎ᠡ ᠦᠨᠦᠴᠢᠨ ᠪᠡᠯᠪᠡᠰᠤᠨ ᠢᠶᠠᠨ ᠲᠡᠬᠦᠨ ᠤ ᠬᠦᠦ ᠳᠤ ᠲᠤᠰᠢᠶᠠᠵᠤ ᠪᠠᠶᠢᠭᠰᠠᠨ ᠢ ᠰᠠᠨᠠᠵᠤ᠂ ᠦᠪᠡᠷ ᠎ ᠤᠨ ᠠᠮᠢᠨ ᠳᠤ ᠠᠶᠤᠯ ᠤᠴᠠᠷᠠᠬᠤ ᠶᠢ ᠬᠠᠶᠢᠬᠤᠷᠤᠯ ᠦᠭᠡᠢ ᠬᠤᠶᠢᠨ᠎ᠡ ᠠᠴᠠ ᠨᠢ ᠲᠠᠭᠠᠵᠤ ᠬᠦᠴᠦᠯᠡᠨ ᠢᠳᠬᠠᠭᠰᠠᠨ ᠎ ᠳᠤ᠂ ᠲᠤᠳᠤᠶᠢᠨ ᠬᠢᠷᠳᠤ ᠠᠭᠤᠷᠯᠠᠵᠤ᠄       ︽ᠬᠦᠭᠰᠢᠨ ᠵᠤᠯᠢᠭ ᠠᠮᠢᠨ ᠠᠴᠠ ᠪᠠᠨ ᠤᠶᠢᠳᠴᠤ ᠪᠠᠶᠢᠭ᠎ᠠ ᠶᠤᠮ ᠤᠤ︖ ᠴᠢ ᠪᠢᠳᠠᠨ ᠢ ᠢᠳᠬᠠᠬᠤ ᠪᠤᠶᠤ︖︾ ᠬᠡᠵᠤ ᠴᠢᠷᠬ᠎ᠠ ᠡᠪᠦᠬᠡᠨ ᠤ ᠵᠤ ᠶᠢ ᠵᠢᠳᠠᠯᠠᠨ ᠬᠦᠬᠡᠬᠡᠪᠡ᠃       ᠴᠢᠷᠬ᠎ᠠ ᠡᠪᠦᠬᠡᠨ ᠬᠦᠨᠳᠤ ᠰᠢᠷᠬᠠᠳᠤᠵᠤ᠂ ᠬᠡᠷ ᠲᠡᠭᠡᠨ ᠢᠷᠡᠬᠡᠳ ᠵᠤᠪᠠᠭᠤᠷᠢᠯᠠᠨ ᠬᠡᠪᠳᠡᠪᠡ᠃ ᠦᠬᠡᠯᠦᠨ ᠦᠵᠢᠨ ᠲᠡᠮᠦᠵᠢᠨ ᠢ ᠵᠠᠷᠤᠵᠤ ᠦᠵᠡᠬᠦᠯᠦᠷ᠎ᠡ ᠤᠴᠢᠭᠰᠠᠨ ᠳᠤ᠂ ᠴᠢᠷᠬ᠎ᠠ ᠡᠪᠦᠬᠡᠨ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠵᠤ᠄       ︽ᠬᠦᠦ ᠮᠢᠨᠢ ᠴᠡᠬᠡᠵᠢᠯᠡᠵᠤ ᠶᠠᠪᠤ᠂ ᠰᠠᠶᠢᠨ ᠡᠴᠢᠬᠡ ᠶᠢᠨ ᠴᠢᠨᠢ ᠬᠤᠷᠢᠶᠠᠭᠰᠠᠨ ᠤᠯᠤᠰ ᠢ ᠪᠤᠳᠠᠷᠠᠨ ᠰᠠᠷᠨᠢᠬᠤ ᠳᠤ ᠢᠳᠬᠠᠬᠤ ᠪᠠᠷ ᠶᠠᠪᠤᠭᠠᠳ ᠢᠩᠬᠢᠵᠤ ᠵᠢᠳᠠᠯᠠᠭᠳᠠᠪᠠ ᠪᠢ︾ ᠬᠡᠪᠡ᠃ ᠲᠠᠮᠦᠵᠢᠨ ᠲᠡᠰᠬᠡᠯ ᠦᠭᠡᠢ ᠤᠬᠢᠯᠠᠨ ᠭᠠᠷᠴᠤ ᠢᠷᠡᠬᠡᠳ ᠴᠢᠷᠬ᠎ᠠ ᠡᠪᠦᠬᠡᠨ ᠤ ᠦᠬᠡ ᠶᠢ ᠡᠬᠡ ᠳᠡᠭᠡᠨ ᠬᠡᠯᠡᠪᠡ᠃       ᠦᠬᠡᠯᠦᠨ ᠦᠵᠢᠨ ᠤᠳᠤ ᠰᠠᠶ᠋ᠢ ᠦᠪᠡᠷ ᠤᠨ ᠪᠡᠯᠪᠡᠰᠤᠨ ᠪᠡᠶ᠎ᠡ᠂ ᠪᠢᠴᠢᠬᠠᠨ ᠬᠡᠤᠬᠡᠳ ᠤᠨ ᠬᠠᠮᠳᠤ ᠲᠠᠶᠢᠴᠢᠭᠤᠳ ᠨᠠᠷ ᠲᠤ ᠤᠷᠬᠢᠭᠳᠠᠵᠤ ᠪᠠᠶᠢᠭ᠎ᠠ ᠪᠠᠨ ᠮᠡᠳᠡᠵᠤ᠂ ᠨᠢᠬᠡ ᠭᠱᠠᠨ᠎ᠡ ᠬᠢᠯᠢᠩ ᠤᠨ ᠭᠠᠯ ᠪᠠᠳᠠᠷᠠᠵᠤ᠄       ︽ᠲᠠᠶᠢᠴᠢᠭᠤᠳ ᠠᠬ᠎ᠠ ᠲᠡᠬᠦᠦ ᠨᠠᠷ ᠶᠢᠰᠦᠬᠡᠢ ᠪᠠᠭᠠᠳᠤᠷ ᠤᠨ ᠠᠴᠢ ᠶᠢ ᠲᠡᠷᠰᠯᠡᠵᠤ᠂ ᠦᠨᠦᠴᠢᠨ ᠪᠡᠯᠪᠡᠰᠤᠨ ᠪᠢᠳᠠᠨ ᠢ ᠤᠷᠬᠢᠵᠤ ᠨᠡᠬᠦᠬᠦ ᠪᠤᠯᠪᠡ ᠤᠤ︖︾ ᠬᠡᠵᠤ ᠦᠪᠴᠢ ᠬᠤᠶᠠᠭᠯᠠᠨ᠂ ᠶᠢᠰᠦᠬᠡᠢ ᠪᠠᠭᠠᠳᠤᠷ ᠤᠨ ᠲᠤᠭ ᠢ ᠪᠠᠷᠢᠵᠤ ᠲᠠᠶᠢᠴᠢᠭᠤᠳ ᠨᠠᠷ ᠤᠨ ᠬᠤᠶᠢᠨ᠎ᠡ ᠠᠴᠠ ᠨᠡᠬᠡᠪᠡ᠃ ᠡᠨᠡ ᠦᠶ᠎ᠡ ᠳᠤ ᠲᠠᠶᠢᠴᠢᠭᠤᠳ ᠨᠠᠷ ᠪᠦᠷ ᠬᠤᠯᠠ ᠭᠠᠷᠤᠭᠰᠠᠨ ᠲᠤᠯᠠ᠂ ᠦᠬᠡᠯᠦᠨ ᠦᠵᠢᠨ ᠵᠦᠪᠬᠡᠨ ᠬᠤᠵᠢᠭᠤ ᠬᠦᠳᠡᠯᠦᠭᠰᠡᠨ ᠨᠢᠬᠡᠨ ᠪᠦᠯᠦᠭ ᠢᠷᠬᠡᠨ ᠢ ᠬᠦᠬᠡᠬᠡᠵᠤ ᠬᠦᠢᠴᠡᠪᠡ᠃ ᠦᠬᠡᠯᠦᠨ ᠦᠵᠢᠨ ᠵᠠᠮ ᠬᠦᠨᠳᠡᠯᠢᠰᠤᠨ ᠵᠤᠭᠰᠤᠵᠤ᠄       ︽ᠲᠠ ᠨᠠᠷ ᠡᠨᠡ ᠲᠤᠭ ᠢ ᠲᠠᠨᠢᠵᠤ ᠪᠠᠶᠢᠨ᠎ᠠ ᠤᠤ︖ ᠶᠢᠰᠦᠬᠡᠢ ᠪᠠᠭᠠᠳᠤᠷ ᠦᠭᠡᠢ ᠪᠤᠯᠤᠭᠰᠠᠨ ᠴᠦ ᠡᠨᠡ ᠲᠤᠭ ᠢ ᠡᠷᠬᠦᠬᠦ ᠬᠦᠮᠦᠨ ᠪᠤᠢ︕︾ ᠬᠡᠨ ᠤᠯᠠᠨ ᠢ ᠨᠢᠬᠡᠨ ᠵᠡᠷᠬᠡ ᠰᠢᠷᠳᠡᠵᠤ᠄       ︽ᠬᠡᠨ ᠠᠶᠤᠮᠰᠢᠭ ᠦᠭᠡᠢ ᠲᠡᠬᠢᠨ ᠴᠢᠨᠠᠭᠰᠢ ᠶᠠᠪᠤᠪᠠᠯ ᠮᠢᠨᠤ ᠵᠢᠳᠠ ᠬᠠᠷᠢᠨ ᠨᠠᠶᠢᠷ ᠲᠠᠯᠪᠢᠬᠤ ᠦᠭᠡᠢ ᠰᠢᠤ︕︾ ᠬᠡᠵᠤ ᠦᠨᠳᠤᠷ ᠲᠠᠭᠤᠨ ᠢᠶᠠᠷ ᠬᠠᠰᠬᠢᠷᠤᠭᠰᠠᠨ ᠳᠤ᠂ ᠲᠡᠳᠡ ᠦᠬᠡᠯᠦᠨ ᠦᠵᠢᠨ ᠤ ᠪᠠᠷᠤᠶᠢᠭᠰᠠᠨ ᠴᠢᠷᠠᠢ ᠶᠢ ᠬᠠᠷᠠᠵᠤ ᠴᠢᠨᠠᠭᠰᠢ ᠶᠠᠪᠤᠬᠤ ᠠᠴᠠ ᠵᠢᠷᠦᠬᠡᠰᠢᠨ ᠬᠡᠳᠡᠷᠬᠦ ᠪᠤᠴᠠᠪᠠ᠃ ᠬᠡᠪᠡᠴᠤ ᠪᠤᠴᠠᠵᠤ ᠢᠷᠡᠭᠰᠡᠨ ᠢᠷᠬᠡᠳ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ᠂ ᠲᠤᠳᠤᠶᠢᠨ ᠬᠢᠷᠳᠤ ᠨᠠᠷ ᠤᠨ ᠰᠦᠷ ᠠᠴᠠ ᠠᠶᠤᠵᠤ ᠤᠪᠤᠨ ᠴᠤᠪᠤᠨ ᠨᠡᠬᠦᠨ ᠤᠳᠪᠠ᠃ ᠡᠬᠦᠨ ᠳᠤ ᠦᠬᠡᠯᠦᠨ ᠦᠵᠢᠨ       ᠤᠮᠳᠠᠭᠠᠰᠬᠤ ᠴᠠᠭ ᠲᠤᠨᠢ       ᠤᠮᠳᠠ ᠪᠤᠯᠤᠭᠰᠠᠨ ᠤᠨᠤᠨ ᠮᠦᠷᠡᠨ ᠳᠡᠭᠡᠨ       ᠦᠯᠦᠰᠬᠦ ᠴᠠᠭ ᠲᠤᠨᠢ       ᠦᠯ ᠵᠤᠯᠭᠠᠭᠤᠯᠳᠠᠭ ᠪᠤᠷᠬᠠᠨ ᠠᠭᠤᠯᠠᠨ ᠳᠠᠭᠠᠨ       ᠦᠪᠡᠷ ᠤᠨ ᠵᠤᠪᠠᠭᠤᠷᠢ ᠶᠢ ᠲᠤᠭᠠᠴᠢᠨ ᠶᠠᠷᠢᠵᠤ᠂ ᠬᠡᠬᠡᠷ᠎ᠡ ᠶᠢᠨ ᠵᠢᠮᠢᠰ ᠲᠡᠬᠦᠨ ᠡᠪᠡᠰᠤᠨ ᠦᠨᠳᠤᠰᠤ ᠤᠬᠤᠵᠤ᠂ ᠦᠨᠦᠴᠢᠨ ᠬᠡᠤᠬᠡᠳ ᠢᠶᠠᠨ ᠲᠡᠵᠢᠬᠡᠨ ᠬᠠᠳᠠᠭᠤᠵᠢᠨ ᠠᠮᠢᠳᠤᠷᠠᠬᠤ ᠠᠴᠠ ᠦᠬᠡᠷ᠎ᠡ ᠵᠠᠮ ᠦᠭᠡᠢ ᠪᠤᠯᠪᠠ᠃        ᠤᠶᠤᠨ ᠲᠠᠢ ᠲᠦᠷᠦᠭᠰᠡᠨ ᠦᠬᠡᠯᠦᠨ ᠡᠬᠡ       ᠤᠭᠤᠳᠤᠷ ᠬᠤᠷᠮᠤᠢ ᠶᠢ ᠰᠢᠭᠤᠨ ᠪᠦᠰᠡᠯᠡᠵᠤ       ᠤᠨᠤᠨ ᠮᠦᠷᠡᠨ ᠢ ᠦᠭᠰᠤᠨ ᠤᠷᠤᠭᠤᠳᠠᠵᠤ       ᠤᠯᠢᠶᠠᠷᠠᠰᠤ ᠮᠤᠶᠢᠯᠠᠰᠤ ③ ᠲᠡᠬᠦᠨ ᠶᠠᠪᠤᠵᠤ       ᠦᠴᠦᠬᠡᠨ ᠬᠡᠤᠬᠡᠳ ᠢᠶᠠᠨ ᠡᠩᠬᠦᠷᠡᠶᠢᠯᠡᠨ ᠲᠡᠵᠢᠬᠡᠵᠤ       ᠡᠳᠤᠷ ᠰᠦᠨᠢ ᠶᠢ ᠬᠠᠳᠠᠭᠤᠵᠢᠨ ᠦᠩᠬᠡᠷᠡᠬᠦᠯᠪᠡ᠃        ᠴᠢᠳᠠᠯ ᠲᠠᠢ ᠲᠦᠷᠦᠭᠰᠡᠨ ᠦᠬᠡᠯᠦᠨ ᠡᠬᠡ       ᠴᠢᠬᠢᠷᠰᠤᠨ ④ ᠱᠤᠷᠤ ᠪᠠᠷᠢᠨ ᠶᠠᠪᠤᠵᠤ       ᠴᠠᠪᠴᠢᠮ᠎ᠡ ᠭᠠᠵᠠᠷ ᠢ ᠦᠭᠰᠦᠨ ᠤᠷᠤᠭᠤᠳᠠᠵᠤ       ᠰᠦᠳᠦᠨ ᠬᠢᠴᠢᠬᠢᠨ᠎ᠡ ⑤᠎ ᠢᠶᠠᠷ ᠦᠨᠳᠤᠰᠤ ᠮᠠᠯᠳᠠᠵᠤ       ᠰᠦᠯᠳᠡᠳᠤ ᠬᠡᠤᠬᠡᠳ ᠢᠶᠠᠨ ᠲᠡᠵᠢᠬᠡᠨ ᠦᠰᠬᠡᠵᠤ       ᠰᠦᠨᠢ ᠡᠳᠤᠷ ᠢ ᠠᠷᠭᠠᠴᠠᠭᠠᠨ ᠦᠩᠬᠡᠷᠡᠬᠦᠯᠪᠡ᠃        ᠬᠠᠳᠤᠨ ᠲᠦᠷᠦᠭᠰᠡᠨ ᠦᠬᠡᠯᠦᠨ ᠡᠬᠡ       ᠬᠠᠶᠢᠯᠠᠰᠤᠨ ᠱᠤᠷᠤ ᠪᠠᠷᠢᠨ ᠶᠠᠪᠤᠵᠤ       ᠬᠠᠯᠳᠤᠨ ᠠᠭᠤᠯᠠ ᠶᠢ ᠦᠭᠰᠦᠨ ᠤᠷᠤᠭᠤᠳᠠᠵᠤ       ᠬᠠᠯᠠᠭᠠᠢ ᠲᠠᠭᠠᠨ᠎ᠠ ᠶᠢ ᠲᠡᠬᠦᠨ ᠮᠠᠯᠳᠠᠵᠤ       ᠬᠠᠳ ᠬᠡᠤᠬᠡᠳ ᠢᠶᠠᠨ ᠬᠠᠶᠢᠷᠠᠯᠠᠨ ᠲᠡᠵᠢᠬᠡᠵᠤ       ᠬᠠᠳᠠᠭᠤ ᠪᠡᠷᠬᠡ ᠶᠢ ᠲᠠᠪᠠᠨ ᠲᠤᠭᠤᠯᠪᠠ᠃        ᠭᠤᠸ᠎ᠠ ᠲᠦᠷᠦᠭᠰᠡᠨ ᠦᠵᠢᠨ ᠡᠬᠡ       ᠭᠤᠬ᠎ᠠ ᠲᠡᠭᠡᠭᠡ ᠪᠠᠷᠢᠨ ᠶᠠᠪᠤᠵᠤ       ᠭᠤᠤᠯ ᠵᠡᠪᠡ ᠶᠢ ᠦᠭᠰᠤᠨ ᠤᠷᠤᠭᠤᠳᠠᠵᠤ       ᠭᠤᠭᠤᠳ ᠮᠠᠩᠬᠢᠷ ᠢ ᠮᠠᠯᠳᠠᠨ ᠲᠡᠬᠦᠵᠤ       ᠬᠤᠳᠤᠭᠳᠤ ᠬᠡᠤᠬᠡᠳ ᠢᠶᠠᠨ ᠲᠡᠵᠢᠬᠡᠨ ᠦᠰᠬᠡᠵᠤ       ᠬᠤᠨᠤᠭ ᠡᠳᠤᠷ ᠢ ᠠᠷᠭᠠᠴᠠᠭᠠᠨ ᠦᠩᠬᠡᠷᠡᠬᠦᠯᠪᠡ᠃       ᠦᠬᠡᠯᠦᠨ ᠡᠬᠡ ᠶᠢᠨ ᠠᠴᠢ ᠭᠠᠪᠢᠶ᠎ᠠ ᠪᠠᠷ᠂ ᠦᠴᠦᠬᠡᠨ ᠬᠡᠤᠬᠡᠳ ᠨᠢ ᠦᠰᠦᠨ ᠲᠤᠷᠨᠢᠵᠤ᠂ ᠠᠩ ᠠᠩᠨᠠᠵᠤ ᠵᠢᠭᠠᠰᠤ ᠬᠦᠬᠢᠳᠠᠨ᠂ ᠠᠯᠳᠠᠷᠳᠤ ᠡᠬᠡ ᠪᠠᠨ ᠠᠰᠠᠷᠠᠬᠤ ᠪᠤᠯᠤᠯ᠎ᠠ᠃        ᠡᠨᠡᠷᠢᠯᠳᠤ ᠲᠦᠷᠦᠭᠰᠡᠨ ᠦᠬᠡᠯᠦᠨ ᠡᠬᠡ ᠪᠠᠨ       ᠡᠬᠡᠮᠳᠡᠨ ᠲᠠᠳᠠᠵᠤ ᠦᠰᠬᠡᠭᠰᠡᠨ ᠬᠡᠤᠬᠡᠳ ᠨᠢ       ᠡᠷᠬᠡ ᠤᠮᠤᠭ ᠲᠡᠬᠦᠰ ᠪᠤᠯᠵᠤ       ᠡᠷᠡᠰ ᠰᠠᠶᠢᠳ ᠪᠤᠯᠤᠨ ᠦᠰᠴᠤ       ᠡᠬᠡ ᠤᠨᠤᠨ ᠤ ᠡᠷᠬᠢ ᠳᠤ ᠰᠠᠭᠤᠵᠤ       ᠡᠯᠬᠦᠬᠦᠷ ᠭᠤᠭ᠎ᠠ ᠤᠰᠤᠨ ᠳᠤ ᠬᠠᠶᠠᠵᠤ       ᠡᠷᠡᠮᠳᠡᠭ ᠵᠢᠭᠠᠰᠤ ᠶᠢ ᠱᠦᠬᠦᠨ ᠪᠠᠷᠢᠵᠤ ᠡᠬᠡ ᠦᠬᠡᠯᠦᠨ ᠢ ᠲᠡᠵᠢᠬᠡᠬᠦ ᠪᠤᠯᠪᠠ᠃        ᠵᠠᠷᠴᠢᠮᠳᠤ ᠲᠦᠷᠦᠭᠰᠡᠨ ᠦᠵᠢᠨ ᠡᠬᠡ ᠶᠢᠨ       ᠵᠠᠳᠬᠠᠰᠤ ⑥ ᠲᠦᠮᠤᠰᠤ ᠪᠠᠷ ᠲᠡᠵᠢᠭᠡᠭᠰᠡᠨ ᠬᠡᠤᠬᠡᠳ ᠨᠢ       ᠵᠠᠩ ᠠᠪᠤᠷᠢ ᠲᠡᠬᠦᠯᠳᠡᠷ ᠪᠤᠯᠵᠤ       ᠵᠠᠰᠠᠭᠳᠠᠨ ᠰᠠᠶᠢᠳ ᠪᠤᠯᠤᠨ ᠦᠰᠴᠤ       ᠵᠠᠮᠠᠭᠳᠤ ᠤᠰᠤ ᠶᠢ ᠰᠠᠬᠢᠨ ᠰᠠᠭᠤᠵᠤ       ᠵᠠᠩᠭᠤ ᠦᠬᠡᠰᠢ ᠬᠠᠶᠠᠯᠠᠨ ᠪᠠᠶᠢᠵᠤ       ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠲᠤᠤᠷᠯᠠᠨ ᠪᠠᠷᠢᠵᠤ       ᠵᠠᠶᠠᠭᠠᠳᠤ ᠡᠬᠡ ᠪᠠᠨ ᠲᠠᠵᠢᠬᠡᠬᠦ ᠪᠤᠯᠪᠠ᠃         ᠲᠠᠶᠢᠯᠪᠤᠷᠢ       ① ᠶᠡᠬᠡᠰ ᠤᠨ ᠭᠠᠵᠠᠷ — ᠲᠡᠬᠡᠳᠦᠰ ᠤᠨ ᠬᠡᠬᠦ ᠤᠷᠤᠰᠢᠭᠤᠯᠬᠤ ᠭᠠᠵᠠᠷ᠃       ② ᠴᠡᠬᠡᠯ ᠤᠨ ᠤᠰᠤ ᠰᠢᠷᠬᠢᠪᠡ᠂ ᠴᠡᠬᠡᠨ ᠴᠢᠯᠠᠭᠤ ᠬᠠᠭᠠᠷᠠᠪᠠ — ᠬᠡᠷᠡᠭ ᠶᠠᠪᠤᠳᠠᠯ ᠨᠢᠬᠡᠨᠳᠠ ᠵᠦᠭᠰᠢᠷᠡᠪᠡ ᠬᠡᠰᠡᠨ ᠤᠳᠬ᠎ᠠ ᠲᠠᠢ ᠪᠤᠶᠤ       ③ ᠤᠯᠢᠶᠠᠷᠠᠰᠤ ᠮᠤᠶᠢᠯᠠᠰᠤ — ᠤᠯᠢᠷᠰᠤ ᠮᠤᠶᠢᠯ᠂ ᠴᠦᠮ ᠵᠡᠷᠯᠢᠭ ᠵᠢᠮᠢᠰ ᠤᠨ ᠨᠡᠷ᠎ᠡ᠃       ④ ᠴᠢᠬᠢᠷᠰᠤᠨ — ᠴᠠᠷᠠᠰᠤᠨ ᠮᠤᠳᠤ᠃       ⑤ ᠰᠦᠳᠦᠨ ᠬᠢᠴᠢᠬᠢᠨ᠎ᠡ — ᠴᠦᠮ ᠡᠪᠡᠰᠤᠨ ᠤ ᠨᠡᠷ᠎ᠡ᠂ ᠦᠨᠳᠤᠰᠤ ᠶᠢ ᠢᠳᠡᠵᠤ ᠪᠤᠯᠤᠨ᠎ᠡ᠃       ⑥ ᠵᠠᠳᠬᠠᠰᠤ — ᠰᠠᠷᠠᠨ᠎ᠠ ᠶᠢᠨ ᠦᠨᠳᠤᠰᠤ᠃         ᠡᠮᠤᠨᠡᠬᠢ ᠦᠯᠢᠬᠡᠷ᠄ ᠶᠢᠰᠦᠬᠡᠢ ᠪᠠᠭᠠᠳᠤᠷ ᠲᠠᠲ᠋ᠠᠷ ᠲᠤ ᠬᠤᠤᠷᠯᠠᠭᠳᠠᠭᠰᠠᠨ       ᠬᠤᠶᠢᠨᠡᠬᠢ ᠦᠯᠢᠬᠡᠷ᠄ ᠦᠬᠡᠯᠦᠨ ᠡᠬᠡ ᠶᠢᠨ ᠰᠤᠷᠭᠠᠯ 
  
ᠢᠷᠡᠯᠲᠡ᠄ ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠰᠤᠩᠭᠤᠳᠠᠭ ᠵᠤᠬᠢᠶᠠᠯ ᠤᠨ ᠰᠤᠩᠭᠤᠮᠠᠯ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号