ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠲᠡᠤᠬᠡᠨ ᠦᠯᠢᠬᠡᠷ ︵ᠬᠤᠶᠠᠷ︶ — ᠠᠯᠤᠨ ᠭᠤᠸ᠎ᠠ ᠡᠬᠡ ᠲᠠᠪᠤᠨ ᠮᠦᠰᠤ ᠎ ᠪᠠᠷ ᠬᠡᠤᠬᠡᠳ ᠢᠶᠠᠨ ᠰᠤᠷᠭᠠᠭᠰᠠᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/5/13
        ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠲᠡᠤᠬᠡᠨ ᠲᠡᠭᠡᠷ᠎ᠡ ᠠᠯᠤᠨ ᠭᠤᠸ᠎ᠠ ᠬᠡᠳᠡᠭ ᠨᠢᠬᠡᠨ ᠠᠯᠳᠠᠷᠳᠤ ᠡᠮᠡᠭᠳᠠᠢ ᠪᠠᠶᠢᠵᠠᠢ᠃ ᠲᠠᠷᠠ ᠪᠤᠯ ᠴᠢᠩᠭᠢᠰ ᠬᠠᠭᠠᠨ ᠤ ᠲᠡᠭᠡᠳᠤᠰ ᠲᠤᠪᠤ ᠮᠡᠷᠬᠡᠨ ᠤ ᠬᠠᠳᠤᠨ ᠶᠤᠮ᠃       ᠲᠤᠪᠤ ᠮᠡᠷᠬᠡᠨ ᠤ ᠡᠴᠢᠬᠡ ᠲᠤᠷᠭᠤᠯᠵᠢᠨ ᠪᠠᠶᠠᠨ᠂ ᠡᠬᠡ ᠪᠤᠷᠤᠭᠴᠢᠠ ᠭᠤᠸ᠎ᠠ ᠠᠯᠢ ᠬᠡᠳᠦᠶᠢᠨ ᠦᠭᠡᠢ ᠪᠤᠯᠵᠤ᠂ ᠲᠠᠷᠠ ᠠᠬ᠎ᠠ ᠲᠤᠸᠠ ᠰᠤᠬᠤᠷ ᠤᠨ ᠬᠠᠮᠳᠤ ᠠᠮᠢᠳᠤᠷᠠᠳᠠᠭ᠃ ᠲᠤᠸᠠ ᠰᠤᠬᠤᠷ ᠦᠪᠡᠷ ᠤᠨ ᠲᠡᠬᠦᠦ ᠎ ᠳᠡᠭᠡᠨ ᠲᠤᠩ ᠬᠠᠶᠢᠷᠠᠳᠠᠢ᠂ ᠲᠠᠷᠠ ᠬᠠᠮᠢᠭ᠎ᠠ ᠶᠠᠪᠤᠪᠠᠴᠤ ᠲᠡᠬᠦᠦ ᠪᠠᠨ ᠲᠠᠭᠠᠭᠤᠯᠤᠨ ᠶᠠᠪᠤᠳᠠᠭ᠃       ᠨᠢᠬᠡᠨ ᠡᠳᠤᠷ᠂ ᠲᠤᠸᠠ ᠰᠤᠬᠤᠷ ᠲᠡᠬᠦᠦ ᠪᠠᠨ ᠲᠠᠭᠠᠭᠤᠯᠤᠨ ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠᠨ ᠎ ᠳᠤ ᠬᠦᠷᠦᠬᠡᠯᠡᠷ᠎ᠡ ᠭᠠᠷᠪᠠ᠃ ᠡᠨᠡ ᠦᠶ᠎ᠡ ᠳᠤ ᠶᠠᠭ ᠰᠠᠶᠢᠬᠠᠨ ᠵᠤᠨ ᠤ ᠡᠬᠢᠨ ᠰᠠᠷ᠎ᠠ ᠪᠠᠶᠢᠭᠰᠠᠨ ᠲᠤᠯᠠ ᠡᠪᠡᠰᠤ ᠮᠤᠳᠤ ᠬᠦᠬᠡᠷᠡᠨ᠂ ᠤᠨᠢᠶᠠᠷ ᠬᠦᠳᠡᠩ ᠵᠡᠷᠬᠡᠯᠬᠡᠳᠡᠨ᠂ ᠪᠤᠯᠵᠤᠮᠤᠷ ᠰᠢᠪᠠᠭᠤ ᠲᠤᠩᠭᠤᠳᠤᠨ᠂ ᠪᠤᠯᠠᠭ ᠭᠤᠷᠤᠬ᠎ᠠ ᠭᠤᠷᠴᠢᠬᠢᠨᠠᠨ᠂ ᠬᠦᠮᠦᠨ ᠤ ᠰᠡᠳᠬᠢᠯ ᠢ ᠠᠷᠭ᠎ᠠ ᠦᠭᠡᠢ ᠪᠤᠯᠢᠶᠠᠨ᠎ᠠ᠃ ᠠᠬ᠎ᠠ ᠲᠡᠬᠦᠦ ᠬᠤᠶᠠᠭᠤᠯᠠ ᠠᠩ ᠬᠦᠷᠦᠬᠡ ᠬᠢᠬᠦ ᠪᠠᠨ ᠪᠠᠶᠢᠵᠤ᠂ ᠪᠤᠷᠬᠠᠨ ᠬᠠᠯᠳᠤᠨ ᠤ ᠤᠷᠤᠢ ᠲᠠᠭᠡᠷ᠎ᠡ ᠭᠠᠷᠴᠤ ᠪᠠᠶᠢᠭᠠᠯᠢ ᠶᠢᠨ ᠦᠵᠡᠮᠵᠢ ᠶᠢ ᠪᠠᠭ᠋ᠠᠳᠤᠨ ᠰᠠᠭᠤᠪᠠ᠃ ᠲᠤᠪᠤ ᠮᠡᠷᠬᠡᠨ ᠰᠠᠶ᠋ᠢ ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠᠨ ᠳᠤ ᠭᠠᠷᠤᠭᠰᠠᠨ ᠮᠡᠳᠤ᠄       ︽ᠠᠬ᠎ᠠ ᠡ᠂ ᠪᠢ ᠤᠷᠢᠳᠤ ᠪᠤᠷᠬᠠᠨ ᠬᠠᠯᠳᠤᠨ ᠳᠤ ᠭᠠᠷᠴᠤ ᠪᠠᠶᠢᠭᠰᠠᠨ ᠪᠤᠯᠪᠠᠴᠤ ᠬᠠᠯᠳᠤᠨ ᠠᠭᠤᠯᠠᠨ ᠤ ᠡᠶᠢᠮᠤ ᠰᠠᠶᠢᠬᠠᠨ ᠦᠵᠡᠮᠵᠢ ᠶᠢ ᠶᠡᠷᠦ ᠠᠩᠬᠠᠷᠤᠭᠰᠠᠨ ᠦᠭᠡᠢ᠂ ᠠᠶ᠎ᠠ᠂ ᠶᠠᠮᠠᠷ ᠰᠠᠶᠢᠬᠠᠨ ᠬᠡᠭᠴᠢ ᠪᠤᠢ︕︾ ᠬᠡᠵᠤ ᠱᠠᠭᠰᠢᠨ ᠲᠠᠭᠤᠰᠬᠤ ᠦᠭᠡᠢ ᠪᠠᠶᠢᠳᠠᠯ᠎ᠠ᠂ ᠲᠤᠸᠠ ᠰᠤᠬᠤᠷ ᠠᠯᠤᠰ ᠲᠡᠰᠢ ᠬᠠᠷᠠᠵᠤ ᠪᠠᠶᠢᠭᠰᠠᠨ ᠢᠶᠠᠨ᠄       ︽ᠲᠡᠬᠦᠦ ᠮᠢᠨᠢ᠂ ᠲᠡᠷᠡ ᠬᠤᠯᠠ ᠠᠴᠠ ᠨᠢᠬᠡᠨ ᠪᠦᠯᠦᠭ ᠢᠷᠬᠡᠨ ᠲᠦᠩᠭᠡᠯᠢᠭ ᠭᠤᠷᠤᠬ᠎ᠠ ᠤᠷᠤᠭᠤ ᠨᠡᠬᠦᠵᠤ ᠠᠶᠢᠰᠤᠢ᠃ ᠲᠡᠷᠡ ᠨᠡᠬᠦᠳᠠᠯ ᠢᠷᠬᠡᠨ ᠤ ᠬᠠᠷᠭᠤᠳᠠᠢ ᠲᠡᠷᠬᠡᠨ ①᠎ ᠤ ᠮᠤᠬᠤᠯᠠᠭ ᠤᠨ ᠡᠮᠤᠨ᠎ᠠ ᠨᠢᠬᠡᠨ ᠭᠤᠸ᠎ᠠ ᠦᠵᠡᠰᠬᠦᠯᠡᠩᠳᠤ ᠦᠬᠢᠨ ᠰᠠᠭᠤᠵᠤ ᠪᠠᠶᠢᠨ᠎ᠠ᠃ ᠲᠡᠬᠦᠨ ᠤ ᠵᠢᠰᠤ ᠠᠳᠠ ᠠᠴᠠ ᠬᠡᠷᠡᠯᠳᠦᠨ ᠬᠠᠷᠠᠭᠳᠠᠵᠤ ᠪᠠᠶᠢᠨ᠎ᠠ᠃ ᠬᠡᠷᠪᠡ ᠬᠦᠮᠦᠨ ᠤ ᠬᠡᠷᠬᠡᠢ ᠪᠤᠯᠤᠭᠠᠳᠤᠢ ᠪᠤᠯ ᠲᠡᠬᠦᠦ ᠴᠢᠮ᠎ᠠ ᠳᠤ ᠭᠤᠶᠤᠵᠤ ᠦᠭᠬᠦᠶ᠎ᠡ᠂ ᠴᠢ ᠤᠴᠢᠵᠤ ᠦᠵᠡᠬᠡᠳ ᠢᠷᠡᠬᠡᠷᠠᠢ︾ ᠬᠡᠵᠤ ᠲᠤᠪᠤ ᠮᠡᠷᠬᠡᠨ ᠳᠤ ᠬᠡᠯᠡᠪᠠ᠃ ᠲᠤᠪᠤ ᠮᠡᠷᠬᠡᠨ ᠤᠳᠠᠳᠠᠯ᠎ᠠ ᠰᠢᠷᠳᠡᠬᠡᠳ ᠶᠠᠭᠤ ᠴᠦ ᠤᠯᠵᠤ ᠦᠵᠡᠭᠰᠡᠨ ᠦᠭᠡᠢ ᠲᠤᠯᠠ ᠢᠳᠡᠬᠡᠬᠦ ᠲᠠᠢ ᠦᠭᠡᠢ ᠲᠠᠢ ᠪᠤᠰᠴᠤ ᠠᠬ᠎ᠠ ᠶᠢᠨ ᠢᠶᠠᠨ ᠵᠢᠭᠠᠭᠰᠠᠨ ᠵᠦᠭ ᠲᠤ ᠮᠤᠷᠳᠠᠭᠠᠳ᠂ ᠬᠠᠭᠠᠰ ᠡᠳᠤᠷ ᠶᠠᠪᠤᠵᠤ ᠰᠠᠶ᠋ᠢ ᠨᠢᠬᠡᠨ ᠪᠦᠯᠦᠭ ᠢᠷᠬᠡᠨ ᠲᠠᠢ ᠤᠴᠠᠷᠠᠪᠠ᠃ ᠲᠠᠳᠠ ᠶᠠᠭ ᠠᠬ᠎ᠠ ᠶᠢᠨ ᠬᠢᠨᠢ ᠤᠯᠵᠤ ᠦᠵᠡᠭᠰᠡᠨ ᠨᠡᠬᠦᠳᠠᠯ ᠢᠷᠬᠡᠨ ᠪᠠᠶᠢᠭᠰᠠᠨ ᠪᠦᠬᠡᠳ ᠲᠡᠷᠬᠡᠨ ᠤ ᠮᠤᠬᠤᠯᠠᠭ ᠤᠨ ᠡᠮᠤᠨ᠎ᠠ ᠦᠨᠡᠬᠡᠷ ᠨᠢᠬᠡᠨ ᠭᠤᠸ᠎ᠠ ᠦᠵᠡᠰᠬᠦᠯᠡᠩᠳᠤ ᠦᠬᠢᠨ ᠰᠠᠭᠤᠵᠤ ᠪᠠᠶᠢᠵᠠᠢ᠃ ᠲᠤᠸᠠ ᠰᠤᠬᠤᠷ ᠶᠠᠭᠠᠬᠢᠨ ᠡᠶᠢᠮᠤ ᠲᠤᠳᠤᠷᠬᠠᠢ ᠤᠯᠵᠤ ᠦᠵᠡᠪᠠ︖ ᠬᠡᠪᠡᠯ ᠲᠡᠷᠡ ᠪᠤᠯ ᠶᠡᠷᠤ ᠶᠢᠨ ᠬᠦᠮᠦᠨ ᠲᠠᠢ ᠠᠳᠠᠯᠢ ᠦᠭᠡᠢ᠂ ᠮᠠᠩᠨᠠᠢ ᠲᠤᠮᠳᠠ ᠎ ᠪᠠᠨ ᠬᠡᠷᠡᠯᠳᠦᠭᠰᠡᠨ ᠭᠠᠭᠴᠠ ᠨᠢᠳᠤ ᠲᠠᠢ᠂ ᠭᠤᠷᠪᠠᠨ ᠨᠡᠬᠦᠳᠠᠯ ᠤᠨ ᠭᠠᠵᠠᠷ ᠬᠠᠷᠠᠬᠤ ᠬᠡᠳᠦᠶᠢᠳᠦᠭᠰᠡᠨ ᠬᠠᠷᠠᠭ᠎ᠠ ᠲᠠᠢ ᠬᠦᠮᠦᠨ ᠶᠤᠮ᠃ ᠲᠡᠭᠡᠭᠡᠳ ᠲᠤᠪᠤ ᠮᠡᠷᠬᠡᠨ ᠠᠬ᠎ᠠ ᠶᠢᠨ ᠢᠶᠠᠨ ᠨᠢᠳᠤᠨ ᠤ ᠬᠤᠷᠴᠠ ᠶᠢ ᠠᠷᠭ᠎ᠠ ᠦᠭᠡᠢ ᠭᠠᠶᠢᠬᠠᠨ ᠪᠢᠰᠢᠷᠡᠵᠤ᠂ ᠤᠷᠤᠭᠰᠢ ᠲᠠᠪᠰᠢᠨ ᠳᠡᠳᠡ ᠢᠷᠬᠡᠨ ᠤ ᠬᠡᠨ ᠶᠠᠭᠤᠨ ᠬᠦᠮᠦᠨ ᠪᠤᠯᠬᠤ ᠶᠢ ᠠᠰᠠᠭᠤᠪᠠᠯ᠂ ᠲᠡᠳᠡ ᠪᠤᠯ ᠬᠤᠷᠢ ᠲᠦᠮᠡᠳ ᠤᠨ ᠨᠤᠶᠠᠨ᠂ ᠬᠤᠷᠢᠯᠠᠷᠳᠠᠢ ᠮᠡᠷᠬᠡᠨ ᠤ ᠬᠢ ᠪᠠᠶᠢᠵᠠᠢ᠃ ᠬᠤᠷᠢᠯᠠᠷᠳᠠᠢ ᠮᠡᠷᠬᠡᠨ ᠤ ᠬᠤᠷᠢ ᠲᠦᠮᠡᠳ ᠎ ᠤᠨ ᠭᠠᠵᠠᠷ ᠲᠤ ᠪᠤᠯᠠᠭ᠎ᠠ᠂ ᠬᠡᠷᠡᠮᠤ ᠵᠡᠷᠬᠡ ᠠᠩ ᠬᠦᠷᠦᠬᠡᠰᠤ ᠪᠤᠯᠢᠶᠠᠯᠳᠤᠨ ᠮᠠᠭᠤᠳᠠᠯᠴᠠᠭᠠᠳ᠂ ᠬᠤᠷᠢᠯᠠᠷ ᠤᠪᠤᠭᠳᠠᠨ ᠪᠤᠯᠵᠤ ᠰᠠᠯᠵᠤ ᠭᠠᠷᠴᠤ ᠢᠷᠡᠬᠡᠳ᠂ ᠪᠤᠷᠬᠠᠨ ᠬᠠᠯᠳᠤᠨ ᠤ ᠠᠭᠤᠯᠠᠨ ᠳᠤ ᠠᠩ ᠬᠦᠷᠦᠬᠡᠰᠤ ᠡᠯᠪᠡᠭ ᠬᠡᠵᠤ ᠰᠤᠨᠤᠰᠴᠤ ᠪᠤᠷᠬᠠᠨ ᠬᠠᠯᠳᠤᠨ ᠤ ᠡᠵᠡᠨ ᠪᠤᠷᠬᠠᠨ ᠪᠤᠰᠬᠠᠭᠰᠠᠨ ② ᠤᠷᠢᠶᠠᠩᠬᠠᠢ ᠠᠶᠢᠮᠠᠭ ᠤᠨ ᠰᠢᠨᠴᠢ ᠪᠠᠶᠠᠨ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠨᠡᠬᠦᠵᠤ ᠠᠶᠢᠰᠤᠢ ᠠᠵᠢ᠃ ᠲᠡᠷᠡ ᠲᠡᠷᠬᠡᠨ ᠤ ᠮᠤᠬᠤᠯᠠᠭ ᠤᠨ ᠡᠮᠤᠨ᠎ᠡ ᠰᠠᠭᠤᠵᠤ ᠪᠠᠶᠢᠭ᠎ᠠ ᠭᠤᠸ᠎ᠠ ᠦᠵᠡᠰᠬᠦᠯᠡᠩᠳᠤ ᠦᠬᠢᠨ ᠪᠤᠯ ᠬᠤᠷᠢᠯᠠᠷᠳᠠᠢ ᠮᠡᠷᠬᠡᠨ ᠤ ᠬᠡᠷᠬᠡᠢ ᠪᠠᠷᠠᠭᠤᠵᠢᠨ ᠭᠤᠸ᠎ᠠ ᠠᠴᠠ ᠠᠷᠢᠭ ᠤᠰᠤᠨ ᠬᠡᠬᠦ ᠭᠠᠵᠠᠷ ᠲᠤ ᠲᠦᠷᠦᠭᠰᠡᠨ ᠠᠯᠤᠨ ᠭᠤᠸ᠎ᠠ ᠨᠡᠷᠡᠳᠤ ᠦᠬᠢᠨ ᠪᠢᠯᠡ᠃ ᠲᠤᠪᠤ ᠮᠡᠷᠬᠡᠨ ᠲᠡᠷᠬᠡᠴᠢ ᠡᠪᠦᠬᠡᠨ ᠠᠴᠠ ᠠᠯᠤᠨ ᠭᠤᠸ᠎ᠠ ᠦᠬᠢᠨ ᠤ ᠬᠠᠷᠢ ᠳᠤ ᠮᠤᠷᠳᠠᠭ᠎ᠠ ᠦᠭᠡᠢ ᠶᠢ ᠠᠰᠠᠭᠤᠵᠤ ᠮᠡᠳᠡᠬᠡᠳ ᠲᠦᠷᠬᠡᠬᠡᠨ ᠬᠠᠷᠢᠵᠤ ᠠᠬ᠎ᠠ ᠳᠠᠭᠠᠨ ᠬᠡᠯᠡᠵᠤ ᠦᠭᠪᠡ᠃       ᠮᠠᠷᠭᠠᠰᠢ ᠨᠢ ᠲᠤᠸᠠ ᠰᠤᠬᠤᠷ ᠪᠤᠯᠠᠭ᠎ᠠ᠂ ᠬᠡᠷᠡᠮᠤ ᠶᠢᠨ ᠠᠷᠠᠰᠤ ᠵᠡᠷᠬᠡ ᠪᠡᠯᠡᠭ ᠰᠡᠯᠳᠠ ᠠᠪᠴᠤ᠂ ᠲᠤᠪᠤ ᠮᠡᠷᠬᠡᠨ ᠲᠡᠬᠦᠦ ᠪᠠᠨ ᠲᠠᠭᠠᠭᠤᠯᠤᠨ ᠬᠤᠷᠢᠯᠠᠷᠳᠠᠢ ᠮᠡᠷᠬᠡᠨ ᠢ ᠡᠷᠢᠨ ᠵᠤᠯᠭᠠᠵᠤ᠂ ᠲᠡᠬᠦᠨ ᠤ ᠦᠬᠢᠨ ᠠᠯᠤᠨ ᠭᠤᠸ᠎ᠠ ᠶᠢ ᠭᠤᠶᠤᠵᠤ ᠲᠡᠬᠦᠦ ᠳᠡᠭᠡᠨ ᠬᠡᠷᠬᠡᠢ ᠪᠤᠯᠭᠠᠨ ᠠᠪᠴᠤ ᠦᠭᠪᠠ᠃       ᠠᠯᠤᠨ ᠭᠤᠸ᠎ᠠ ᠲᠤᠪᠤ ᠮᠡᠷᠬᠡᠨ ᠤ ᠳᠤ ᠢᠷᠡᠵᠤ ᠡᠷ᠎ᠡ ᠡᠮ᠎ᠡ ᠬᠤᠶᠠᠭᠤᠯᠠ ᠡᠶ᠎ᠡ ᠨᠠᠶᠢᠷᠳᠠᠢ ᠠᠵᠤ ᠲᠦᠷᠦᠨ ᠰᠠᠭᠤᠵᠤ ᠬᠡᠳᠦᠨ ᠵᠢᠯ ᠪᠤᠯᠤᠯ ᠦᠭᠡᠢ ᠪᠦᠬᠦᠨᠤᠳᠠᠢ᠂ ᠪᠡᠯᠬᠦᠨᠤᠳᠠᠢ ᠬᠡᠬᠦ ᠬᠤᠶᠠᠷ ᠬᠦᠦ ᠲᠦᠷᠦᠪᠡ᠃ ᠲᠡᠭᠡᠵᠤ ᠪᠠᠶᠢᠳᠠᠯ᠎ᠠ ᠲᠤᠪᠤ ᠮᠡᠷᠬᠡᠨ ᠵᠠᠭᠤᠷᠠᠳᠤ ᠪᠠᠷ ᠦᠭᠡᠢ ᠪᠤᠯᠪᠠ᠃ ᠲᠤᠪᠤ ᠮᠡᠷᠬᠡᠨ ᠢ ᠦᠬᠡᠢ ᠪᠤᠯᠤᠭᠰᠠᠨ ᠬᠤᠶᠢᠨ᠎ᠠ᠂ ᠠᠯᠤᠨ ᠭᠤᠸ᠎ᠠ ᠪᠡᠯᠪᠡᠰᠤᠨ ᠪᠠᠶᠢᠳᠠᠯ᠎ᠠ ᠪᠠᠰᠠ ᠪᠤᠬ᠎ᠠ ᠬᠠᠳᠠᠬᠢ᠂ ᠪᠤᠭᠳᠤ ᠰᠠᠯᠵᠢ᠂ ᠪᠤᠳᠠᠨᠴᠠᠷ ᠮᠤᠩᠬᠠᠭ ᠬᠡᠬᠦ ᠭᠤᠷᠪᠠᠨ ᠬᠦᠦ ᠲᠦᠷᠦᠪᠡ᠃ ᠡᠬᠦᠨ ᠳᠤ ᠪᠦᠬᠦᠨᠤᠳᠠᠢ᠂ ᠪᠡᠯᠬᠦᠨᠤᠳᠠᠢ ᠬᠤᠶᠠᠷ ᠬᠦᠦ ᠨᠢ᠄ ︽ᠪᠢᠳᠠᠨ ᠤ ᠡᠬᠡ ᠪᠡᠯᠪᠡᠰᠤᠨ ᠪᠠᠶᠢᠳᠠᠯ᠎ᠠ ᠡᠨᠡ ᠭᠤᠷᠪᠠᠨ ᠬᠦᠦ ᠶᠢ ᠲᠦᠷᠦᠪᠡ᠃ ᠠᠳᠠ ᠯᠠᠪ ᠪᠢᠳᠠᠨ ᠤ ᠬᠡᠷ ᠲᠤᠳᠤᠷ᠎ᠠ ᠵᠠᠷᠤᠴᠠᠯᠠᠭᠳᠠᠵᠤ ᠪᠠᠶᠢᠭ᠎ᠠ ᠲᠡᠷᠡ ᠮᠠᠯᠢᠭ ᠪᠠᠶᠠᠭᠤᠳ ᠤᠪᠤᠭ ᠤᠨ ᠬᠦᠮᠦᠨ ᠤ ᠬᠡᠤᠬᠡᠳ ᠪᠢᠵᠠ︾ ᠬᠡᠵᠤ ᠡᠬᠡ ᠶᠢᠨ ᠲᠠᠯᠳᠠ ᠢᠪᠢᠷ ᠰᠢᠪᠢᠷ ᠬᠡᠯᠡᠯᠴᠠᠨ᠂ ᠭᠤᠷᠪᠠᠨ ᠲᠡᠬᠦᠦ ᠪᠠᠨ ᠲᠠᠷᠤᠯᠠᠨ ᠲᠤᠷᠤᠮᠵᠢᠯᠠᠬᠤ ᠪᠤᠯᠪᠠ᠃ ᠠᠯᠤᠨ ᠭᠤᠸ᠎ᠠ ᠡᠬᠡ ᠶᠢᠨ ᠬᠡᠷ ᠲᠤ ᠵᠠᠷᠤᠴᠠᠯᠠᠭᠳᠠᠵᠤ ᠪᠠᠶᠢᠭ᠎ᠠ ᠮᠠᠯᠢᠭ ᠪᠠᠶᠠᠭᠤᠳ ᠤᠪᠤᠭ ᠤᠨ ᠬᠦᠮᠦᠨ ᠬᠡᠭᠴᠢ ᠪᠤᠯ᠂ ᠲᠤᠪᠤ ᠮᠡᠷᠬᠡᠨ ᠠᠮᠢᠳᠤ ᠪᠠᠶᠢᠬᠤ ᠎ ᠳᠠᠭᠠᠨ ᠭᠤᠨᠵᠢᠨ ᠪᠤᠭᠤ ᠶᠢᠨ ᠦᠷᠦᠬᠡᠰᠤᠨ ᠭᠤᠶ᠎ᠠ ᠪᠠᠷ ᠰᠤᠯᠢᠵᠤ ᠠᠪᠤᠭᠰᠨ ᠬᠦᠮᠦᠨ ᠢ ᠬᠡᠯᠡᠵᠤ ᠪᠠᠶᠢᠭ᠎ᠠ ᠶᠤᠮ᠃ ᠲᠤᠪᠤ ᠮᠡᠷᠬᠡᠨ ᠨᠢᠬᠡᠨ ᠡᠳᠤᠷ ᠲᠤᠭᠤᠴᠠᠭ ᠦᠨᠳᠤᠷ ᠲᠡᠭᠡᠷ᠎ᠡ ᠬᠦᠷᠦᠬᠡᠯᠡᠷ᠎ᠡ ᠭᠠᠷᠤᠭᠠᠳ ᠶᠠᠪᠤᠵᠤ ᠪᠠᠶᠢᠳᠠᠯ᠎ᠠ᠂ ᠤᠢ ᠲᠤᠳᠤᠷ᠎ᠠ ᠨᠢᠬᠡᠨ ᠤᠷᠢᠶᠠᠩᠬᠠᠢ ᠬᠦᠮᠦᠨ ③ ᠭᠤᠨᠵᠢᠨ ᠪᠤᠭᠤ ᠠᠯᠠᠭᠠᠳ ᠰᠢᠷᠠᠵᠤ ᠢᠳᠡᠵᠤ ᠪᠠᠶᠢᠬᠤ ᠲᠠᠢ ᠲᠠᠭᠠᠷᠠᠯᠳᠤᠪᠠ᠃ ᠲᠤᠪᠤ ᠮᠡᠷᠬᠡᠨ ᠲᠡᠷᠡ ᠤᠷᠢᠶᠠᠩᠬᠠᠢ ᠬᠦᠮᠦᠨ ᠤ ᠪᠤᠭᠤ ᠶᠢᠨ ᠮᠢᠬ᠎ᠠ ᠠᠴᠠ ᠰᠢᠷᠤᠯᠠᠭᠳᠠ ④ ᠬᠡᠵᠤ ᠭᠤᠶᠤᠵᠤ ᠠᠪᠤᠭᠠᠳ ᠮᠤᠷᠢᠨ ᠳᠠᠭᠠᠨ ᠠᠴᠢᠵᠤ ᠶᠠᠪᠤᠳᠠᠯ᠎ᠠ ᠡᠰᠡᠷᠬᠦ ᠠᠴᠠ ᠨᠢ ᠬᠡᠤᠬᠡᠳ ᠬᠦᠳᠦᠯᠦᠭᠰᠡᠨ ᠨᠢᠬᠡᠨ ᠶᠠᠳᠠᠭᠤ ᠬᠦᠮᠦᠨ ᠬᠦᠷᠴᠤ ᠢᠷᠡᠪᠠ᠃ ᠲᠤᠪᠤ ᠮᠡᠷᠬᠡᠨ ᠲᠡᠬᠦᠨ ᠠᠴᠠ᠄       ︽ᠴᠢ ᠶᠠᠭᠤᠨ ᠬᠦᠮᠦᠨ ᠪᠤᠢ︖︾ ᠬᠡᠵᠤ ᠠᠰᠠᠭᠤᠪᠠᠯ᠂       ︽ᠪᠢ ᠮᠠᠯᠢᠭ ᠪᠠᠶᠠᠭᠤᠳ ᠤᠨ ᠬᠦᠮᠦᠨ᠂ ᠪᠢ ᠤᠳᠤ ᠶᠠᠳᠠᠷᠠᠵᠤ ᠶᠠᠪᠤᠨ᠎ᠠ᠃ ᠴᠢ ᠲᠡᠷᠡ ᠬᠦᠷᠦᠬᠡᠰᠤᠨ ᠤ ᠮᠢᠬ᠎ᠠ ᠠᠴᠠ ᠨᠠᠳᠠ ᠦᠭ᠂ ᠪᠢ ᠡᠨᠡ ᠬᠦᠦ ᠪᠠᠨ ᠴᠢᠮᠠᠳᠤ ᠦᠭᠬᠦᠶ᠎ᠡ︾ ᠬᠡᠪᠡ᠃ ᠲᠤᠪᠤ ᠮᠡᠷᠬᠡᠨ ᠲᠠᠷᠤᠢ ᠵᠦᠪᠰᠢᠶᠡᠷᠡᠵᠤ᠂ ᠭᠤᠨᠵᠨ ᠪᠤᠭᠤ ᠶᠢᠨ ᠦᠷᠦᠬᠡᠰᠤᠨ ᠭᠤᠶ᠎ᠠ ᠪᠠᠷ ᠲᠠᠷᠡ ᠮᠠᠯᠢᠭ ᠪᠠᠶᠠᠭᠤᠳ ᠤᠪᠤᠭ ᠤᠨ ᠶᠠᠳᠠᠭᠤ ᠬᠦᠮᠦᠨ ᠤ ᠬᠦᠦ ᠶᠢ ᠰᠤᠯᠢᠵᠤ ᠠᠪᠤᠭᠠᠳ ᠬᠡᠷ ᠲᠡᠭᠡᠨ ᠠᠪᠴᠢᠷᠠᠵᠤ ᠵᠠᠷᠤᠴᠠᠯᠠᠭᠰᠠᠨ ᠪᠢᠯᠡ᠂ ᠪᠦᠬᠦᠨᠤᠳᠠᠢ᠂ ᠪᠡᠯᠬᠦᠨᠤᠳᠠᠢ ᠬᠤᠶᠠᠷ ᠡᠨᠡ ᠮᠠᠯᠢᠭ ᠪᠠᠶᠠᠭᠤᠳ ᠤᠪᠤᠭ ᠤᠨ ᠬᠦᠮᠦᠨ ᠤ ᠬᠦᠦ ᠶᠢ ᠵᠢᠭᠠᠵᠤ ᠬᠡᠯᠡᠪᠡ᠃       ᠠᠯᠤᠨ ᠭᠤᠸ᠎ᠠ ᠡᠬᠡ ᠡᠬᠦᠨ ᠢ ᠤᠯᠵᠤ ᠮᠡᠳᠡᠬᠡᠳ ᠲᠡᠳᠠ ᠠᠬ᠎ᠠ ᠲᠡᠬᠦᠦ ᠨᠠᠷ ᠤᠨ ᠬᠤᠭᠤᠷᠤᠨᠳᠤ ᠪᠠᠨ ᠡᠶ᠎ᠡ ᠡᠪ ᠦᠬᠡᠢ ᠶᠠᠪᠤᠳᠠᠯ ᠳᠤ ᠶᠡᠬᠡᠳᠠ ᠰᠡᠳᠬᠢᠯ ᠵᠤᠪᠠᠨᠢᠬᠤ ᠪᠤᠯᠪᠠ᠃       ᠠᠯᠤᠨ ᠭᠤᠸ᠎ᠠ ᠡᠬᠡ ᠲᠡᠳᠠ ᠠᠬ᠎ᠠ ᠲᠡᠬᠦᠦ ᠲᠠᠪᠤᠭᠤᠯᠠ ᠶᠢ ᠴᠤᠬᠤᠮ ᠶᠠᠭᠠᠬᠢᠵᠤ ᠡᠶᠡᠳᠦᠬᠦᠯᠬᠦ ᠪᠢᠯᠡ︖ ᠬᠡᠵᠤ ᠬᠡᠴᠢᠨᠡᠨ ᠡᠳᠤᠷ ᠪᠤᠳᠤᠭᠠᠳ ᠰᠠᠶ᠋ᠢ ᠨᠢᠬᠡᠨ ᠠᠷᠭ᠎ᠠ ᠪᠤᠳᠤᠵᠤ ᠤᠯᠪᠠ᠃       ᠬᠠᠪᠤᠷ ᠤᠨ ᠨᠢᠬᠡᠨ ᠡᠳᠤᠷ᠂ ᠠᠯᠤᠨ ᠭᠤᠸ᠎ᠠ ᠡᠬᠡ ᠬᠠᠳᠠᠭᠰᠠᠨ ᠬᠤᠨᠢᠨ ᠮᠢᠬ᠎ᠠ ᠴᠢᠨᠠᠵᠤ ᠪᠦᠬᠦᠨᠤᠳᠠᠢ᠂ ᠪᠡᠯᠬᠦᠨᠤᠳᠠᠢ᠂ ᠪᠤᠬ᠎ᠠ ᠬᠠᠳᠠᠬᠢ᠂ ᠪᠤᠭᠳᠤ ᠰᠠᠯᠵᠢ᠂ ᠪᠤᠳᠠᠨᠴᠠᠷ ᠮᠤᠩᠬᠠᠭ ᠲᠠᠪᠤᠨ ᠬᠦᠦ ᠪᠠᠨ ᠲᠠᠭᠤᠳᠠᠨ ᠠᠪᠴᠢᠷᠠᠵᠤ ᠢᠳᠡᠬᠦᠯᠪᠡ᠃ ᠢᠳᠡᠵᠤ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠠᠯᠤᠨ ᠭᠤᠸ᠎ᠠ ᠡᠬᠡ ᠲᠠᠪᠤᠨ ᠬᠦᠦ ᠪᠠᠨ ᠵᠡᠷᠬᠡᠴᠡᠬᠦᠯᠦᠨ ᠰᠠᠭᠤᠯᠭᠠᠵᠤ᠂ ᠬᠦᠮᠦᠨ ᠪᠦᠷᠢ ᠳᠤ ᠨᠢᠵᠡᠬᠡᠳ ᠮᠦᠰᠤ ⑤ ᠦᠭᠴᠤ ︽ᠬᠤᠭᠤᠯ︾ ᠬᠡᠰᠡᠨ ᠳᠤ᠂ ᠲᠠᠪᠤᠨ ᠬᠦᠦ ᠨᠢ ︽ᠲᠠᠰ᠂ ᠲᠠᠰ︾ ᠬᠢᠳᠡᠯ᠎ᠡ ᠪᠦᠷ ᠬᠤᠭᠤᠴᠢᠵᠤ ᠤᠷᠬᠢᠪᠠ᠃ ᠠᠯᠤᠨ ᠭᠤᠸ᠎ᠠ ᠡᠬᠡ ᠲᠠᠬᠢᠨ ᠲᠠᠪᠤᠨ ᠮᠦᠰᠤ ᠠᠪᠴᠤ ᠬᠠᠮᠳᠤ ᠪᠠᠭᠯᠠᠭᠠᠳ ︽ᠬᠤᠭᠤᠯ︾ ᠬᠡᠵᠤ ᠦᠭᠬᠦᠭᠰᠡᠨ ᠳᠤ᠂ ᠠᠬ᠎ᠠ ᠲᠡᠬᠦᠦ ᠲᠠᠪᠤᠭᠤᠯᠠ ᠲᠠᠷᠠᠭᠠᠯᠠᠨ ᠤᠷᠤᠯᠳᠤᠭᠠᠳ ᠬᠡᠨ ᠴᠦ ᠬᠤᠭᠤᠴᠢᠵᠤ ᠡᠰᠡ ᠴᠢᠳᠠᠪᠠ᠃       ᠡᠬᠦᠨ ᠳᠤ ᠠᠯᠤᠨ ᠭᠤᠸ᠎ᠠ ᠡᠬᠡ᠄ ︽ᠪᠦᠬᠦᠨᠤᠳᠠᠢ᠂ ᠪᠡᠯᠬᠦᠨᠤᠳᠠᠢ ᠲᠠ ᠬᠤᠶᠠᠷ ᠨᠠᠮᠠᠢᠢ ᠡᠶᠢᠨ ᠳᠡᠶᠢᠨ ᠬᠡᠵᠤ ᠬᠡᠯᠡᠯᠴᠡᠬᠦ ᠴᠦ ᠶᠠᠭᠠᠬᠢᠪ᠂ ᠭᠤᠷᠪᠠᠨ ᠳᠡᠬᠦᠦ ᠪᠠᠨ ᠬᠠᠷᠢᠨ ᠪᠤᠰᠤᠴᠢᠯᠠᠨ ᠦᠵᠡᠵᠤ ᠲᠠᠷᠤᠯᠠᠨ ᠲᠤᠷᠤᠮᠵᠢᠯᠠᠬᠤ ᠴᠢᠨᠢ ᠵᠤᠬᠢᠬᠤ ᠦᠭᠡᠢ᠃ ᠲᠠ ᠨᠠᠷ ᠤᠴᠢᠷ ᠢ ᠦᠯᠤ ᠮᠡᠳᠡᠨ᠎ᠡ᠃ ᠡᠴᠢᠬᠡ ᠴᠢᠨᠢ ᠦᠭᠡᠢ ᠪᠤᠯᠤᠭᠰᠠᠨ ᠬᠤᠶᠢᠨ᠎ᠠ᠂ ᠮᠢᠨᠤ ᠵᠡᠬᠦᠳᠤᠨ ᠳᠤ ᠰᠦᠨᠢ ᠪᠦᠷᠢ ᠨᠢᠬᠡᠨ ᠴᠠᠭᠠᠨ ᠰᠢᠷ᠎ᠠ ᠵᠢᠰᠤᠳᠠᠢ ᠬᠦᠮᠦᠨ ᠡᠷᠦᠬᠡ ᠲᠤᠳᠤᠭᠤ ᠪᠠᠷ ⑥ ᠬᠡᠶᠢᠬᠦᠯᠦᠨ ᠤᠷᠤᠵᠤ ᠢᠷᠡᠬᠡᠳ ᠬᠡᠪᠡᠯᠢ ᠶᠢ ᠢᠯᠢᠬᠦ ᠳᠤ ᠲᠡᠬᠦᠨ ᠤ ᠬᠡᠷᠡᠯ ᠮᠢᠨᠤ ᠬᠡᠪᠡᠯᠢ ᠳᠤ ᠰᠢᠩᠬᠡᠬᠦ ᠪᠢᠯᠡ᠃ ᠲᠡᠷᠡ ᠬᠦᠮᠦᠨ ᠨᠠᠷᠠᠨ ᠰᠠᠷᠠᠨ ᠤ ᠵᠠᠪᠰᠠᠷ ᠢᠶᠠᠷ ᠰᠢᠷ᠎ᠠ ᠨᠤᠬᠠᠢ ᠮᠡᠳᠤ ᠰᠢᠷᠪᠡᠯᠵᠠᠭᠰᠠᠭᠠᠷ ᠭᠠᠷᠴᠤ ᠤᠳᠤᠨ᠎ᠠ᠂ ᠲᠡᠭᠡᠭᠡᠳ ᠡᠨᠡ ᠭᠤᠷᠪᠠᠨ ᠲᠡᠬᠦᠦ ᠶᠢ ᠴᠢᠨᠢ ᠤᠯᠪᠠ᠃ ᠲᠡᠬᠦᠨ ᠠᠴᠠ ᠦᠵᠡᠪᠠᠯ ᠲᠡᠭᠷᠢ ᠠᠴᠠ ᠵᠠᠶᠠᠭᠠᠭᠰᠠᠨ ᠬᠡᠤᠬᠡᠳ ᠪᠢᠵᠡ᠂ ᠲᠡ ᠨᠠᠷ ᠲᠡᠮᠡᠢ ᠬᠡᠯᠡᠯᠴᠡᠬᠦ ᠶᠠᠭᠤᠨ︖       ᠬᠠᠷ᠎ᠠ ᠲᠦᠷᠦᠬᠦᠳᠤ ᠬᠦᠮᠦᠨ ᠲᠠᠢ       ᠬᠠᠮᠢᠶ᠎ᠠ ᠦᠭᠡᠢ ᠠᠳᠠᠯᠢᠳᠬᠠᠵᠤ ᠶᠠᠭᠠᠬᠢᠵᠤ ᠪᠤᠯᠤᠨ᠎ᠠ       ᠬᠠᠮᠤᠭ ᠤᠨ ᠬᠠᠭᠠᠳ ᠪᠤᠯᠬᠤ ᠴᠠᠭ ᠲᠤ       ᠬᠠᠷᠠᠴᠤ ᠬᠦᠮᠦᠨ ᠰᠠᠶ᠋ᠢ ᠤᠴᠢᠷ ᠢ ᠮᠡᠳᠡᠨ᠎ᠡ ᠬᠡᠳ︾ ᠠᠯᠤᠨ ᠭᠤᠸ᠎ᠠ ᠡᠬᠡ ᠲᠡᠪᠤᠨ ᠬᠡᠤᠬᠡᠳ ᠎ ᠢᠶᠠᠨ ᠨᠢᠭᠡ ᠨᠢᠭᠡ ᠪᠠᠷ ᠰᠢᠷᠳᠡᠨ ᠪᠠᠶᠢᠵᠤ᠄       ︽ᠲᠠ ᠠᠬ᠎ᠠ ᠲᠡᠬᠦᠦ ᠲᠠᠪᠤᠭᠤᠯᠠ ᠴᠦᠮ ᠮᠢᠨᠤ ᠬᠡᠪᠡᠯᠢ ᠠᠴᠠ ᠲᠦᠷᠦᠭᠰᠡᠨ ᠪᠢᠰᠢ ᠤᠤ︖ ᠵᠦᠢ ᠨᠢ ᠪᠦᠬᠦᠨᠤᠳᠠᠢ᠂ ᠪᠡᠯᠬᠦᠨᠤᠳᠠᠢ ᠲᠠ ᠬᠤᠶᠠᠷ ᠪᠢᠴᠢᠬᠠᠨ ᠲᠡᠬᠦᠦ ᠨᠠᠷ ᠢᠶᠠᠨ ᠬᠠᠶᠢᠷᠠᠯᠠᠨ ᠬᠠᠷᠭᠠᠯᠵᠠᠵᠤ ᠲᠠᠮᠵᠢᠨ ᠲᠤᠰᠠᠯᠠᠬᠤ ᠶᠤᠰᠤᠳᠠᠢ ᠪᠠᠶᠢᠳᠠᠯ᠎ᠠ᠂ ᠶᠠᠭᠤᠨ ᠳᠤ ᠦᠷᠬᠦᠯᠵᠢ ᠲᠠᠷᠤᠯᠠᠨ ᠲᠤᠷᠤᠮᠵᠢᠯᠠᠵᠤ ᠮᠢᠨᠤ ᠰᠡᠳᠬᠢᠯ ᠢ ᠵᠤᠪᠠᠭᠠᠬᠤ ᠪᠢᠯᠡ︖ ᠲᠠ ᠨᠠᠷ ᠬᠡᠷᠪᠡ ᠬᠠᠷᠢᠯᠴᠠᠨ ᠪᠤᠰᠤᠴᠢᠯᠠᠨ ᠭᠠᠭᠴᠠ ᠭᠠᠭᠴᠠ ᠪᠠᠷ ᠰᠠᠯᠪᠠᠯ᠂ ᠶᠠᠭ ᠲᠤᠭᠠᠷ ᠤᠨ ⑦ ᠨᠢᠵᠡᠬᠡᠳ ᠮᠦᠰᠤᠨ ᠮᠡᠳᠤ ᠬᠡᠨ ᠬᠦᠮᠦᠨ ᠳᠤ ᠬᠢᠯᠪᠠᠷᠬᠠᠨ ᠲᠡᠶᠢᠯᠦᠭᠳᠡᠨ᠎ᠡ᠃ ᠬᠡᠷᠪᠡ ᠡᠶ᠎ᠡ ᠡᠪ ᠢᠶᠠᠨ ᠨᠢᠭᠡᠳᠤᠨ ᠬᠠᠷᠢᠯᠴᠠᠨ ᠲᠤᠰᠠᠯᠠᠵᠤ ᠶᠠᠪᠤᠪᠠᠯ᠂ ᠬᠠᠷᠢᠨ ᠡᠨᠡ ᠬᠠᠮᠳᠤ ᠪᠠᠭᠯᠠᠭᠰᠠᠨ ᠲᠠᠪᠤᠨ ᠮᠦᠰᠤ ᠮᠡᠳᠤ ᠬᠡᠨ ᠬᠦᠮᠦᠨ ᠳᠤ ᠴᠦ ᠬᠢᠯᠪᠠᠷ ᠲᠡᠶᠢᠯᠦᠭᠳᠡᠬᠦ ᠦᠭᠡᠢ ᠪᠤᠯᠤᠨ᠎ᠠ︾ ᠬᠡᠵᠤ ᠬᠤᠯᠠ ᠪᠤᠳᠤᠵᠤ ᠬᠤᠵᠢᠮ ᠢ ᠰᠠᠨᠠᠭᠠᠯᠵᠠᠨ ᠰᠤᠷᠭᠠᠵᠤ ᠬᠡᠯᠡᠵᠠᠢ᠃         ᠲᠠᠶᠢᠯᠪᠤᠷᠢ᠄       ① ᠬᠠᠷᠭᠤᠳᠠᠢ ᠲᠡᠷᠭᠡ — ᠲᠡᠷᠬᠡᠨ ᠤ ᠮᠤᠬᠤᠯᠠᠭ ᠲᠤ ᠪᠦᠷᠬᠦᠬᠦᠯ ᠲᠠᠭᠠᠷᠠᠭᠤᠯᠤᠭᠰᠠᠨ ᠲᠡᠷᠬᠡ ᠶᠢ ᠬᠡᠯᠡᠨ᠎ᠡ᠃       ② ᠪᠤᠷᠬᠠᠨ ᠪᠤᠰᠬᠠᠭᠰᠠᠨ — ᠪᠤᠷᠬᠠᠨ ᠬᠠᠯᠳᠤᠨ ᠤ ᠨᠤᠳᠤᠭ ᠢ ᠠᠩᠬ᠎ᠠ ᠡᠬᠦᠳᠴᠤ ᠨᠡᠬᠡᠬᠡᠭᠰᠡᠨ᠃       ③ ᠤᠷᠢᠶᠠᠩᠬᠠᠢ ᠬᠦᠮᠦᠨ — ᠤᠷᠢᠶᠠᠩᠬᠠᠢ ᠠᠶᠢᠮᠠᠭ ᠤᠨ ᠬᠦᠮᠦᠨ᠃       ④ ᠰᠢᠷᠤᠯ ᠠᠳᠠ ︵ᠠᠳᠠᠷᠠ᠂ ᠠᠪᠴᠢᠷᠠ︶ ᠬᠡᠰᠡᠨ ᠬᠤᠶᠠᠷ ᠦᠭᠡ ᠶᠢ ᠢᠩᠬᠢᠵᠤ ᠨᠡᠶᠢᠯᠡᠬᠦᠯᠦᠨ ᠪᠢᠴᠢᠵᠠᠢ᠂ ︽ᠠᠩ ᠤᠨ ᠬᠡᠰᠢᠭ ᠠᠴᠠ ᠦᠭ︾ ᠬᠡᠰᠡᠨ ᠤᠳᠬ᠎ᠠ ᠲᠠᠢ ᠪᠤᠶᠤ᠃       ⑤ ᠰᠤᠮᠤᠨ ᠤ ᠡᠰᠢ᠃       ⑥ ᠬᠡᠷ ᠤᠨ ᠡᠬᠦᠳᠠᠨ ᠤ ᠲᠡᠭᠡᠳᠤ ᠲᠠᠯ᠎ᠠ᠃       ⑦ ᠰᠠᠶ᠋ᠢ ᠶᠢᠨ         ᠡᠮᠤᠨᠡᠬᠢ ᠦᠯᠢᠬᠡᠷ᠄ ᠬᠦᠳᠡᠷ ᠬᠠᠶᠢᠯᠤᠭᠤᠯᠵᠤ ᠡᠷᠬᠢᠨ ᠤ ᠬᠦᠨ ᠠᠴᠠ ᠭᠠᠷᠤᠭᠰᠠᠨ       ᠬᠤᠶᠢᠨᠠᠬᠢ ᠦᠯᠢᠬᠡᠷ᠄ ᠪᠤᠳᠠᠨᠴᠠᠷ ᠮᠤᠩᠬᠠᠭ ᠤᠨ ᠪᠤᠴᠠᠵᠤ ᠢᠷᠡᠭᠰᠡᠨ 
  
ᠢᠷᠡᠯᠲᠡ᠄ ︽ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠰᠤᠩᠭᠤᠳᠠᠭ ᠵᠤᠬᠢᠶᠠᠯ ᠤᠨ ᠰᠤᠩᠭᠤᠮᠠᠯ︾
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号