ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠲᠡᠤᠬᠡᠨ ᠦᠯᠢᠬᠡᠷ ︵ᠨᠢᠭᠡ︶ — ᠬᠦᠳᠡᠷ ᠬᠠᠶᠢᠯᠤᠭᠤᠯᠵᠤ ᠡᠷᠬᠢᠨ ᠤ ᠬᠦᠨ ᠎ ᠠᠴᠠ ᠭᠠᠷᠤᠭᠰᠠᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/5/12
        ᠡᠷᠳᠡ ᠤᠷᠢᠳᠤ ᠴᠠᠭ ᠲᠤ ᠶᠤᠮᠰᠠᠨᠵᠠᠢ᠃ ᠤᠮᠠᠷᠠᠳᠤ ᠵᠦᠭ ᠤᠨ ᠦᠷᠬᠡᠨ ᠠᠭᠤᠳᠠᠮ ᠲᠠᠯ᠎ᠠ ᠨᠤᠳᠤᠭ ᠲᠤ ᠤᠯᠠᠨ ᠨᠡᠬᠦᠳᠡᠯᠴᠢᠨ ᠠᠶᠢᠮᠠᠭ ᠨᠤᠳᠤᠭᠯᠠᠵᠤ ᠪᠠᠶᠢᠵᠠᠢ᠃ ᠲᠡᠳᠠ ᠭᠤᠤᠯᠳᠠᠭᠤ ᠪᠡᠯᠴᠢᠬᠡᠷ ᠤᠰᠤ ᠶᠢ ᠎ ᠲᠠᠭᠠᠨ᠂ ᠨᠡᠬᠦᠳᠡᠯᠯᠡᠨ ᠠᠮᠢᠳᠤᠷᠠᠳᠠᠭ ᠶᠤᠮ᠃ ᠲᠡᠷᠡ ᠦᠶ᠎ᠡ ᠶᠢᠨ ᠨᠢᠭᠡᠨ ᠠᠷᠠᠳ ᠤᠨ ᠲᠠᠭᠤᠤ ᠳᠤ᠄       ︽ᠬᠦᠬᠡ ᠲᠡᠭᠷᠢ ᠴᠡᠯᠮᠠᠶᠢᠵᠤ       ᠬᠦᠷᠦᠰᠤᠳᠤ ᠲᠡᠯᠡᠬᠡᠢ ᠨᠡᠯᠦᠶᠢᠬᠡᠳ       ᠦᠯᠢᠶᠡᠬᠦ ᠰᠠᠯᠬᠢ       ᠡᠪᠡᠰᠤᠨ ᠤ ᠲᠤᠯᠤᠭᠠᠢ ᠶᠢ ᠢᠯᠪᠢᠬᠦᠶ᠎ᠡ       ᠦᠬᠡᠷ ᠬᠤᠨᠢᠳ ᠢᠷᠡᠯᠵᠠᠨ ᠬᠠᠷᠠᠭᠳᠠᠨ᠎ᠠ︾ ① ᠬᠡᠵᠤ ᠲᠠᠭᠤᠯᠠᠳᠠᠭ᠃ ᠡᠨᠡ ᠲᠠᠭᠤᠤ ᠶᠢᠨ ᠦᠬᠡ ᠠᠴᠠ ᠲᠠᠳᠠ ᠴᠤᠬᠤᠮ ᠶᠠᠮᠠᠷ ᠦᠶ᠎ᠡ ᠳᠤ ᠠᠮᠢᠳᠤᠷᠠᠵᠤ ᠪᠠᠶᠢᠭᠰᠠᠨ ᠢ ᠲᠦᠰᠦᠪᠯᠡᠨ ᠮᠡᠳᠡᠵᠤ ᠪᠤᠯᠤᠨ᠎ᠠ᠃       ᠲᠡᠳᠡᠬᠡᠷ ᠨᠡᠬᠦᠳᠡᠯᠴᠢᠨ ᠠᠶᠢᠮᠠᠭ ᠤᠨ ᠲᠤᠳᠤᠷ᠎ᠠ᠂ ᠮᠠᠨ ᠤ ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠡᠪᠦᠭᠡ ᠲᠡᠭᠡᠳᠤᠰ ᠴᠦ ᠪᠠᠶᠢᠵᠤ ᠪᠠᠶᠢᠭᠰᠠᠨ ᠪᠠᠶᠢᠨ᠎ᠠ᠃ ᠬᠡᠬᠦ ᠳᠡᠭᠡᠨ ᠲᠡᠷᠡ ᠦᠶ᠎ᠡ ᠳᠤ ᠮᠤᠩᠭᠤᠯ ② ᠬᠡᠳᠡᠭ ᠨᠡᠷ᠎ᠡ ᠬᠠᠷᠠᠬᠠᠨ ᠪᠠᠶᠢᠭ᠎ᠠ ᠦᠭᠡᠢ᠃ ᠡᠨᠡ ᠨᠡᠷ᠎ᠡ ᠪᠤᠯ ᠮᠠᠨ ᠤ ᠤᠯᠤᠰ ᠤᠨ ᠲᠠᠩ ᠤᠯᠤᠰ ᠤᠨ ᠦᠶ᠎ᠡ ᠠᠴᠠ ᠰᠠᠶ᠋ᠢ ᠪᠢᠴᠢᠭ ᠰᠤᠳᠤᠷ ᠲᠤ ᠦᠵᠡᠭᠳᠡᠭᠰᠡᠨ ᠶᠤᠮ᠃ ᠬᠡᠪᠡᠴᠤ᠂ ᠡᠨᠡ ᠲᠤᠮᠤᠭ ᠲᠤ ᠲᠡᠳᠡᠬᠡᠷ ᠨᠡᠬᠦᠳᠡᠯᠴᠢᠨ ᠠᠶᠢᠮᠠᠭ ᠤᠨ ᠲᠤᠳᠤᠷ᠎ᠠ ᠮᠤᠩᠭᠤᠯ ᠬᠡᠳᠡᠭ ᠨᠢᠬᠡᠨ ᠪᠠᠭᠤᠷᠠᠢ ᠠᠶᠢᠮᠠᠭ ᠪᠠᠶᠢᠵᠠᠢ ᠬᠡᠵᠤ ᠶᠠᠷᠢᠳᠠᠭ᠃       ᠨᠢᠬᠡᠨ ᠤᠳᠠᠭ᠎ᠠ᠂ ᠲᠡᠷᠡ ᠮᠤᠩᠭᠤᠯ ᠠᠶᠢᠮᠠᠭ ᠲᠡᠬᠦᠨ ᠤ ᠵᠡᠷᠬᠡᠯᠳᠡᠭᠡ ᠤᠷᠤᠰᠢᠬᠤ ᠦᠬᠡᠷ᠎ᠡ ᠨᠢᠬᠡᠨ ᠠᠶᠢᠮᠠᠭ ᠲᠠᠢ ᠪᠠᠨ ᠡᠪᠳᠡᠷᠡᠨ ᠮᠠᠭᠤᠳᠠᠯᠴᠠᠵᠤ ᠶᠡᠭᠡ ᠠᠯᠠᠯᠳᠤᠭᠠᠨ ᠪᠤᠯᠪᠠ᠃ ᠲᠠᠷᠡ ᠦᠶ᠎ᠡ ᠶᠢᠨ ᠠᠯᠠᠯᠳᠤᠭᠠᠨ ᠪᠤᠯ ᠲᠤᠩ ᠬᠡᠴᠡᠬᠦᠦ ᠶᠤᠮ᠂ ᠵᠠᠷᠢᠮ ᠳᠠᠭᠠᠨ ᠨᠢᠬᠡ ᠤᠳᠠᠭᠠᠨ ᠤ ᠠᠯᠠᠯᠳᠤᠭᠠᠨ ᠢᠶᠠᠷ ᠨᠢᠬᠡ ᠠᠶᠢᠮᠠᠭ ᠪᠤᠶᠤ ᠬᠡᠳᠤᠨ ᠠᠶᠢᠮᠠᠭ ᠤᠨ ᠭᠠᠯ ᠢ ᠨᠢ ᠤᠨᠳᠠᠷᠠᠭᠠᠨ ᠭᠤᠯᠤᠮᠳᠠ ᠶᠢ ᠨᠢ ᠬᠠᠷᠠᠯᠠᠭᠤᠯᠳᠠᠭ ᠴᠦ ᠪᠤᠢ᠃ ᠲᠠᠷᠠ ᠤᠳᠠᠭᠠᠨ ᠤ ᠠᠯᠠᠯᠳᠤᠭᠠᠨ ᠤ ᠡᠴᠤᠰ ᠲᠤ ᠮᠤᠩᠭᠤᠯ ᠠᠶᠢᠮᠠᠭ ᠪᠠᠷᠤᠭ ᠯᠡ ᠡᠨᠡ ᠪᠠᠶᠢᠳᠠᠯ ᠳᠤ ᠬᠦᠷᠴᠤ᠂ ᠪᠦᠬᠦ ᠠᠶᠢᠮᠠᠭ ᠠᠴᠠ ᠵᠦᠪᠬᠡᠨ ᠬᠤᠶᠠᠷ ᠬᠤᠤᠰ ᠡᠷᠡᠭᠳᠠᠢ ᠡᠮᠡᠭᠳᠠᠢ ᠵᠠᠯᠠᠭᠤ ᠦᠯᠡᠳᠡᠵᠤ ᠪᠤᠰᠤᠳ ᠨᠢ ᠪᠦᠷ ᠬᠢᠳᠤᠭᠳᠠᠪᠠ᠃       ᠲᠡᠷᠡ ᠠᠮᠢᠳᠤ ᠭᠠᠷᠤᠭᠰᠠᠨ ᠮᠤᠩᠭᠤᠯ ᠠᠶᠢᠮᠠᠭ ᠤᠨ ᠬᠤᠶᠠᠷ ᠬᠤᠤᠰ ᠡᠷᠡᠭᠳᠠᠢ ᠡᠮᠡᠭᠳᠠᠢ ᠵᠠᠯᠠᠭᠤ ᠠᠮᠢ ᠴᠦᠯᠡᠨ ᠵᠢᠭᠤᠳᠠᠨ ᠲᠤᠳᠠᠭᠠᠭᠰᠠᠭᠠᠷ᠂ ᠬᠦᠮᠦᠨ ᠠᠮᠢᠳᠠᠨ ᠬᠦᠷᠬᠦᠶ᠎ᠡ ᠪᠡᠷᠬᠡ ᠨᠢᠬᠡᠨ ᠠᠭᠯᠠᠭ ᠠᠭᠤᠯᠠᠨ ᠎ ᠳᠤ ᠲᠤᠳᠠᠭᠠᠨ ᠤᠷᠤᠪᠠ᠃ ᠲᠡᠷᠡ ᠠᠭᠤᠯᠠ ᠲᠡᠭᠷᠢ ᠲᠤᠯᠤᠮ᠎ᠠ ᠰᠡᠬᠦᠶᠢᠨ ᠰᠦᠨᠳᠡᠷᠯᠡᠵᠤ᠂ ᠲᠦᠷᠪᠡᠨ ᠲᠠᠯ᠎ᠠ ᠪᠠᠷ ᠨᠢ ᠬᠠᠯᠢᠯ ᠬᠠᠳᠠ ᠲᠠᠪᠬᠤᠴᠠᠨ ᠬᠠᠭᠳᠠ ᠤᠢ ᠪᠦᠷᠬᠦᠬᠡᠳ ᠠᠭᠤᠯᠠᠨ ᠳᠤ ᠤᠷᠤᠬᠤ ᠵᠠᠮ ᠮᠦᠷ ᠤᠭᠳᠤ ᠦᠭᠡᠢ ᠪᠠᠶᠢᠵᠠᠢ ᠃ ᠲᠡᠳᠠ ᠲᠦᠷᠪᠡᠬᠦᠯᠡ ᠠᠮᠢ ᠵᠤᠯᠪᠠᠭ᠋ᠤ ᠶᠢᠨ ᠲᠦᠯᠦᠬᠡ᠂ ᠬᠠᠳᠠ ᠴᠢᠯᠠᠭᠤ ᠶᠢ ᠰᠢᠯᠵᠢᠬᠦᠯᠦᠨ ᠬᠠᠷᠭᠠᠨ᠎ᠠ ᠰᠤᠨᠳᠤᠤ ᠎ ᠶᠢ ᠲᠠᠰᠤᠳᠠᠵᠤ᠂ ᠲᠠᠪᠤᠨ ᠬᠤᠷᠤᠭᠤ ᠪᠠᠨ ᠲᠠᠮᠳᠤᠷᠠᠳᠠᠯ᠎ᠠ ᠠᠷᠪᠠᠨ ᠬᠤᠷᠤᠭᠤ ᠪᠠᠨ ᠪᠠᠷᠠᠭᠳᠠᠳᠠᠯ᠎ᠠ᠂ ᠲᠤᠭᠠᠯᠠᠰᠢ ᠦᠭᠡᠢ ᠰᠠᠭᠠᠳ ᠲᠤᠳᠬᠠᠷ ᠢ ᠲᠠᠪᠠᠨ ᠲᠤᠭᠤᠯᠵᠤ᠂ ᠠᠷᠠᠢ ᠴᠢᠮᠠᠢ ᠨᠢᠬᠡᠨ ᠨᠠᠷᠢᠨ ᠵᠤᠪᠠ ᠭᠠᠷᠭᠠᠨ ᠠᠭᠤᠯᠠᠨ ᠳᠤ ᠲᠤᠳᠠᠭᠠᠨ ᠤᠷᠤᠪᠠ᠃ ᠠᠭᠤᠯᠠᠨ ᠳᠤ ᠤᠷᠤᠪᠠᠯ᠂ ᠦᠵᠡᠰᠠ︕ ᠠᠭᠤᠯᠠᠨ ᠤ ᠲᠤᠮᠳᠠ ᠬᠠᠷᠢᠨ ᠨᠢᠭᠡᠨ ᠦᠩ ᠰᠢᠮ᠎ᠡ ᠪᠠᠷ ᠵᠤᠵᠠᠭᠠᠨ ᠦᠨᠢᠷ ᠰᠠᠶᠢᠬᠠᠨ ᠲᠦᠪᠰᠢᠨ ᠲᠠᠯ᠎ᠠ ᠪᠠᠶᠢᠭᠰᠠᠨ ᠠᠵᠢ᠃ ᠡᠨᠡ ᠭᠠᠵᠠᠷ ᠢ ᠬᠤᠵᠢᠮ ᠤᠨ ᠬᠦᠮᠦᠰ ᠡᠷᠬᠢᠨ ᠤ ᠬᠦᠨ ③ ᠬᠡᠳᠡᠭ᠂ ᠲᠡᠳᠡ ᠲᠦᠷᠪᠡᠬᠦᠯᠡ᠄ ᠡᠨᠡ ᠭᠠᠵᠠᠷ ᠢ ᠮᠦᠩᠬᠡ ᠲᠡᠭᠷᠢ ᠪᠢᠳᠠᠨ ᠳᠤ ᠬᠠᠶᠢᠷᠠᠯᠠᠪᠠ ᠬᠡᠵᠤ ᠰᠦᠰᠦᠭᠯᠡᠨ ᠪᠠᠶᠠᠷᠯᠠᠵᠤ᠂ ᠲᠠᠷᠤᠢ ᠬᠤᠶᠠᠷ ᠬᠤᠤᠰ ᠠᠶᠢᠯ ᠬᠡᠷ ᠪᠤᠯᠤᠯᠴᠠᠨ᠂ ᠡᠷᠬᠢᠨ ᠤ ᠬᠦᠨ ᠎ ᠳᠤ ᠨᠤᠳᠤᠭᠰᠢᠨ ᠰᠠᠭᠤᠪᠠ᠃       ᠲᠡᠭᠡᠭᠡᠳ ᠲᠡᠷᠡ ᠬᠤᠶᠠᠷ ᠡᠷᠦᠬᠡ ᠠᠶᠢᠯ ᠤᠨ ᠨᠢᠭᠡ ᠨᠢ ᠨᠡᠬᠦ ᠤᠪᠤᠭᠳᠤ᠂ ᠨᠦᠬᠦᠬᠡ ᠨᠢ ᠬᠢᠶᠡᠨ ᠤᠪᠤᠭᠳᠤ ᠪᠤᠯᠪᠠ᠃ ᠲᠡᠷᠡ ᠬᠢᠶᠡᠨ ᠤᠪᠤᠭᠳᠤ ᠢᠳᠠ ᠬᠦᠴᠦ ᠶᠡᠬᠡᠳᠠᠢ᠂ ᠬᠠᠷᠪᠤᠵᠤ ᠨᠠᠮᠨᠠᠬᠤ ᠳᠠᠭᠠᠨ ᠭᠠᠷᠮᠠᠭᠠᠢ᠃ ᠶᠠᠮᠠᠷ ᠴᠦ ᠵᠡᠷᠯᠢᠭ ᠲᠤᠭᠰᠢᠨ ᠮᠤᠷᠢ ᠲᠡᠬᠦᠨ ᠤ ᠭᠠᠷ ᠲᠤ ᠤᠷᠤᠮᠠᠭᠴᠠ ᠲᠤᠤᠷ᠎ᠠ ᠪᠠᠨ ᠨᠤᠮᠤᠬᠠᠷᠠᠵᠤ᠂ ᠶᠠᠮᠠᠷ ᠴᠦ ᠬᠠᠳᠠᠭᠤ ᠨᠤᠮᠤ ᠲᠡᠬᠦᠨ ᠤ ᠭᠠᠷ ᠲᠤ ᠤᠷᠤᠮᠠᠭᠴᠠ ᠠᠯᠠᠮᠠᠩ ᠰᠠᠷᠠᠨ ᠮᠡᠳᠤ ᠪᠤᠯᠳᠠᠨ᠎ᠠ ᠲᠠᠳᠠᠭᠳᠠᠳᠠᠭ᠃ ᠲᠡᠷᠡ ᠦᠷᠬᠦᠯᠵᠢ ᠨᠤᠮᠤ ᠰᠠᠭᠠᠳᠠᠭ ᠠᠭᠰᠠᠨ᠂ ᠪᠠᠯᠠᠷ ᠤᠢ ᠪᠠᠷᠳᠠᠭᠠᠳᠤ ᠬᠠᠪᠴᠢᠯ ᠢᠶᠠᠷ ᠪᠠᠷᠰ ᠴᠢᠨ᠋ᠸ᠎ᠠ ᠠᠩᠨᠠᠨ᠂ ᠪᠠᠭᠠᠪᠠᠭᠠᠢ ᠦᠳᠡᠭᠡ ᠲᠠᠭᠤᠨ ᠶᠠᠪᠤᠳᠠᠭ ᠲᠤᠯᠠ ᠬᠢᠶᠠᠨ ᠤᠪᠤᠭᠳᠤ ᠰᠦᠰᠤ ᠬᠠᠳᠠᠭᠤ ᠡᠷᠡᠯᠬᠡᠭ ᠪᠠᠭᠠᠳᠤᠷ ᠬᠡᠵᠤ ᠠᠯᠳᠠᠷᠰᠢᠪᠠ᠃       ᠤᠨ ᠴᠠᠭ ᠤᠯᠠᠷᠢᠬᠤ ᠶᠢ ᠲᠠᠭᠠᠯᠳᠤᠨ᠂ ᠲᠠᠷᠠ ᠬᠤᠶᠠᠷ ᠤᠪᠤᠭ ᠢᠷᠬᠡᠨ ᠤ ᠬᠤᠶᠢᠴᠢ ᠦᠶ᠎ᠡ ᠦᠷᠡᠵᠢᠨ ᠦᠷᠡᠵᠢᠭᠰᠡᠬᠡᠷ ᠪᠠᠰᠠ ᠤᠯᠠᠨ ᠠᠶᠢᠮᠠᠭ ᠤᠭᠰᠠᠭ᠎ᠠ ᠪᠤᠯᠤᠨ ᠰᠠᠯᠪᠤᠷᠢᠯᠠᠵᠤ᠂ ᠤᠯᠠᠮ ᠢᠶᠠᠷ ᠡᠷᠬᠢᠨ ᠤ ᠬᠦᠨ ᠎ ᠳᠤ ᠪᠠᠭᠳᠠᠵᠤ ᠶᠠᠳᠠᠬᠤ ᠳᠤ ᠬᠦᠷᠪᠡ᠃ ᠡᠬᠦᠨ ᠳᠤ ᠲᠡᠳᠡ ᠡᠨᠡ ᠪᠤᠶᠢᠳᠠ ᠪᠦᠭᠯᠡᠬᠦᠦ ᠠᠭᠤᠯᠠ ᠬᠠᠪᠴᠢᠯ ᠠᠴᠠ ᠭᠠᠷᠴᠤ ᠦᠷᠬᠡᠨ ᠠᠭᠤᠳᠠᠮ ᠲᠠᠯ᠎ᠠ ᠨᠤᠳᠤᠭ ᠲᠠᠭᠠᠨ ᠪᠤᠴᠠᠬᠤ ᠶᠢ ᠬᠦᠰᠡᠪᠡ᠃ ᠲᠡᠳᠡ ᠡᠪᠦᠭᠡ ᠲᠡᠭᠡᠳᠤᠰ ᠤᠨ ᠢᠶᠠᠨ ᠠᠩᠬ᠎ᠠ ᠠᠭᠤᠯᠠᠨ ᠳᠤ ᠤᠷᠤᠵᠤ ᠢᠷᠡᠭᠰᠡᠨ ᠤᠴᠢᠷ ᠢ ᠴᠡᠬᠡᠵᠢᠯᠡᠭᠰᠡᠬᠡᠷ ᠪᠤᠯᠪᠠᠴᠤ᠂ ᠡᠪᠦᠭᠡ ᠲᠡᠭᠡᠳᠤᠰ ᠤᠨ ᠬᠢᠨᠢ ᠲᠠᠪᠤᠨ ᠬᠤᠷᠤᠭᠤ ᠶᠢ ᠲᠠᠮᠳᠤᠷᠠᠳᠠᠯ᠎ᠠ᠂ ᠠᠷᠪᠠᠨ ᠬᠤᠷᠤᠭᠤ ᠪᠠᠨ ᠪᠠᠷᠠᠭᠳᠠᠳᠠᠯ᠎ᠠ ᠲᠡᠮᠡᠴᠡᠵᠤ ᠭᠠᠷᠭᠠᠭᠰᠠᠨ ᠨᠠᠷᠢᠨ ᠵᠤᠪᠠ ᠎ ᠨᠢ ᠠᠯᠢ ᠬᠡᠳᠦᠶᠢᠨ ᠡᠪᠡᠰᠤ ᠮᠤᠳᠤ ᠪᠠᠷ ᠬᠤᠴᠢᠭᠳᠠᠨ ᠬᠠᠭᠠᠭᠳᠠᠪᠠ᠃ ᠪᠦᠬᠦᠳᠡᠬᠡᠷ ᠤᠳᠤ ᠶᠠᠭᠠᠬᠢᠨ ᠠᠭᠤᠯᠠ ᠠᠴᠠ ᠭᠠᠷᠬᠤ ᠲᠤᠬᠠᠢ ᠵᠤᠪᠠᠨᠢᠯᠳᠤᠵᠤ ᠡᠬᠢᠯᠡᠪᠡ᠃       ᠲᠡᠭᠡᠵᠤ ᠪᠠᠶᠢᠳᠠᠯ᠎ᠠ᠂ ᠵᠤᠨ ᠤ ᠨᠢᠬᠡᠨ ᠡᠳᠤᠷ᠂ ᠬᠢᠶᠡᠨ ᠤᠪᠤᠭ ᠤᠨ ᠨᠢᠬᠡᠨ ᠬᠦᠭᠰᠢᠨ ᠠᠩᠴᠢᠨ ᠠᠩ ᠬᠢᠵᠤ ᠶᠠᠪᠤᠵᠤ ᠪᠠᠶᠢᠭᠠᠳ ᠠᠭᠤᠯᠠᠨ ᠤ ᠲᠤᠮᠳᠠᠬᠢ ᠨᠢᠬᠡᠨ ᠰᠢᠭᠤᠢ ᠠᠴᠠ ᠬᠠᠭᠠᠰ ᠲᠤᠳᠠᠭᠤ ᠬᠠᠶᠢᠯᠤᠭᠰᠠᠨ ᠬᠡᠳᠤᠨ ᠬᠡᠰᠡᠭ ᠬᠦᠳᠡᠷ ᠴᠢᠯᠠᠭᠤ ᠤᠯᠵᠤ ᠠᠪᠤᠪᠠ᠃ ᠬᠦᠭᠰᠢᠨ ᠠᠩᠴᠢᠨ ᠶᠡᠬᠡᠯ᠎ᠡ ᠪᠠᠶᠠᠷᠯᠠᠨ᠄ ᠠᠳᠠ ᠤᠤᠯ ᠠᠴᠠ ᠬᠦᠮᠦᠨ ᠠᠮᠢᠳᠠᠨ ᠠᠮᠢᠳᠤᠷᠠᠵᠤ ᠪᠠᠶᠢᠭᠰᠠᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ᠂ ᠪᠠᠰᠠ ᠬᠦᠳᠡᠷ ᠬᠠᠶᠢᠯᠤᠭᠤᠯᠵᠤ ᠴᠢᠳᠠᠳᠠᠭ ᠪᠠᠶᠢᠵᠠᠢ ᠬᠡᠵᠤ ᠪᠤᠳᠤᠪᠠ᠃ ᠲᠡᠭᠡᠭᠡᠳ ᠬᠦᠭᠰᠢᠨ ᠠᠩᠴᠢᠨ ᠮᠠᠩᠳᠡ ᠰᠠᠩᠳᠠ ᠪᠤᠴᠠᠨ ᠢᠷᠡᠵᠤ᠂ ᠤᠯᠠᠨ ᠢ ᠦᠨᠦᠬᠢ ᠠᠭᠤᠢ ᠶᠢᠨ ᠲᠡᠷᠬᠡᠳᠡ ᠲᠠᠭᠠᠭᠤᠯᠤᠨ ᠠᠪᠠᠴᠢᠪᠠ᠃ ᠤᠯᠠᠨ ᠢᠶᠠᠷ ᠢᠶᠠᠨ ᠲᠡᠷᠡ ᠬᠦᠳᠡᠷ ᠬᠠᠶᠢᠯᠤᠭᠤᠯᠵᠤ ᠪᠠᠶᠢᠭᠰᠠᠨ ᠠᠭᠤᠢ ᠶᠢ ᠰᠢᠨᠵᠢᠵᠤ ᠦᠵᠡᠭᠰᠡᠬᠡᠷ᠂ ᠬᠡᠨᠡᠳᠳᠠ ᠨᠢᠬᠡᠨ ᠠᠷᠭ᠎ᠠ ᠪᠤᠳᠤᠵᠤ ᠤᠯᠪᠠ᠄ ᠡᠷᠳᠡᠨ ᠤ ᠬᠦᠮᠦᠨ ᠬᠦᠳᠡᠷ ᠬᠠᠶᠢᠯᠤᠭᠤᠯᠵᠤ ᠴᠢᠳᠠᠵᠤ ᠪᠠᠶᠢᠳᠠᠯ᠎ᠠ᠂ ᠪᠢᠳᠠ ᠶᠠᠭᠠᠬᠢᠨ ᠠᠭᠤᠯᠠᠨ ᠤ ᠬᠦᠳᠡᠷ ᠢ ᠬᠠᠶᠢᠯᠤᠭᠤᠯᠵᠤ ᠠᠭᠤᠯᠠ ᠶᠢ ᠶᠡᠬᠦᠷᠡᠬᠦᠯᠦᠨ ᠭᠠᠷᠴᠤ ᠪᠤᠯᠳᠠᠭ ᠦᠭᠡᠢ ᠪᠤᠢ︖ ᠲᠠᠶᠢᠮᠤ᠂ ᠡᠨᠡ ᠬᠠᠷᠢᠨ ᠰᠠᠶᠢᠨ ᠠᠷᠭ᠎ᠠ ᠮᠦᠨ᠃ ᠲᠡᠭᠡᠭᠡᠳ ᠪᠦᠬᠦᠳᠡᠬᠡᠷ ᠬᠦᠳᠡᠷ ᠬᠠᠶᠢᠯᠤᠭᠤᠯᠤᠨ ᠠᠭᠤᠯᠠ ᠶᠢ ᠶᠡᠬᠦᠷᠡᠬᠦᠯᠵᠤ ᠭᠠᠷᠬᠤ ᠪᠠᠷ ᠵᠤᠷᠢᠭ ᠰᠢᠭᠤᠳᠴᠤ᠂ ᠬᠢᠶᠠᠨ ᠤᠪᠤᠭ ᠎ ᠤᠨ ᠬᠦᠭᠰᠢᠨ ᠠᠩᠴᠢᠨ ᠤ ᠤᠳᠤᠷᠢᠳᠤᠯᠭ᠎ᠠ ᠪᠠᠷ᠂ ᠤᠢ ᠲᠤᠳᠤᠷ᠎ᠠ ᠠᠴᠠ ᠲᠦᠯᠡᠭᠡ ᠴᠤᠭᠯᠠᠭᠤᠯᠤᠨ ᠨᠡᠬᠦᠷᠡᠰᠤ ᠰᠢᠳᠠᠭᠠᠪᠠ᠃ ᠲᠡᠬᠢᠨ ᠪᠠᠰᠠ ᠲᠠᠯᠠᠨ ᠪᠦᠳᠦᠬᠦᠨ ᠦᠬᠡᠷ ᠠᠯᠠᠵᠤ ᠠᠷᠠᠰᠤ ᠶᠢ ᠨᠢ ᠪᠢᠳᠡᠬᠦᠦ ᠪᠠᠷ ᠦᠪᠴᠢᠬᠡᠳ᠂ ᠲᠠᠯᠠᠨ ᠠᠷᠠᠰᠤᠨ ᠬᠦᠬᠡᠷᠬᠡ ᠬᠢᠪᠠ᠃       ᠬᠡᠳᠤᠨ ᠡᠳᠤᠷ ᠤᠨ ᠲᠠᠷᠠᠭ᠎ᠠ᠂ ᠪᠦᠬᠦᠳᠡᠬᠡᠷ ᠪᠤᠯᠵᠤᠭᠠᠯᠠᠭᠰᠠᠨ ᠶᠤᠰᠤᠭᠠᠷ ᠬᠤᠷᠠᠨ ᠢᠷᠡᠵᠤ᠂ ᠤᠷᠢᠳᠤ ᠰᠢᠳᠠᠭᠠᠭᠰᠠᠨ ᠨᠡᠬᠦᠷᠡᠰᠤ ᠪᠠᠨ ᠴᠦᠮ ᠢ ᠲᠡᠷᠡ ᠬᠦᠳᠡᠷ ᠬᠠᠶᠢᠯᠤᠭᠤᠯᠵᠤ ᠪᠠᠶᠢᠭᠰᠠᠨ ᠠᠭᠤᠢ ᠶᠢᠨ ᠠᠮᠠᠰᠠᠷ ᠎ ᠲᠤ ᠤᠪᠤᠭᠠᠯᠠᠨ ᠲᠠᠯᠪᠢᠵᠤ᠂ ᠰᠠᠪᠳᠠᠭ ᠨᠠᠪᠳᠠᠭ ④᠎ ᠢ ᠲᠠᠬᠢᠵᠤ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠨᠡᠬᠦᠷᠡᠰᠦᠨ ᠳᠡᠭᠡᠨ ᠭᠠᠯ ᠨᠤᠴᠤᠭᠠᠪᠠ᠃ ᠲᠡᠭᠡᠭᠡᠳ ᠢᠳᠡ ᠬᠦᠴᠦ ᠲᠠᠢ ᠬᠡᠳᠦᠨ ᠵᠠᠭᠤᠨ ᠡᠷᠡᠰ ᠢ ᠰᠤᠩᠭᠤᠨ ᠭᠠᠷᠭᠠᠵᠤ᠂ ᠲᠠᠯᠠᠨ ᠠᠷᠠᠰᠤᠨ ᠬᠦᠬᠡᠷᠬᠡ ᠶᠢ ᠡᠬᠡᠯᠵᠢᠯᠡᠨ ᠬᠦᠬᠡᠷᠬᠡᠳᠡᠪᠡ᠃ ᠤᠳᠠᠯ ᠦᠭᠡᠢ ᠭᠠᠯ ᠬᠦᠭᠵᠢᠨ᠂ ᠤᠯᠠᠭᠠᠨ ᠬᠡᠷᠡᠯ ᠲᠡᠭᠷᠢ ᠲᠤᠯᠤᠮ᠎ᠠ ᠮᠠᠨᠳᠤᠪᠠ᠃ ᠡᠷᠬᠢᠨ ᠤ ᠬᠦᠨ ᠤ ᠬᠦᠮᠦᠰ ᠠᠭᠤᠢ ᠶᠢᠨ ᠲᠡᠷᠬᠡᠳᠡ ᠲᠤᠭᠤᠷᠢᠨ ᠵᠤᠭᠰᠤᠵᠤ᠂ ᠬᠦᠳᠡᠷ ᠴᠢᠯᠠᠭᠤ ᠶᠢ ᠲᠦᠷᠬᠡᠨ ᠬᠠᠶᠢᠯᠤᠭᠠᠰᠠᠢ ᠬᠡᠵᠤ ᠴᠤᠷᠬᠢᠨ ᠰᠢᠷᠳᠡᠵᠤ ᠪᠠᠶᠢᠯ᠎ᠠ᠃ ᠬᠡᠯᠡᠪᠡᠯ ᠪᠠᠰᠠ ᠰᠤᠨᠢᠨ᠂ ᠲᠤᠯᠤᠭᠠᠨ ᠲᠤᠯᠤᠭ᠎ᠠ ᠲᠦᠴᠢ ᠶᠢᠰᠦᠨ ᠬᠤᠨᠤᠭ ᠵᠤᠭᠰᠤᠯ ᠦᠭᠡᠢ ᠬᠦᠬᠡᠷᠬᠡᠳᠡᠭᠰᠡᠨ ᠴᠢᠨᠢ ᠬᠦᠳᠡᠷ ᠴᠢᠯᠠᠭᠤ ᠬᠠᠶᠢᠯᠤᠨ ᠡᠬᠦᠰᠬᠡᠵᠤ᠂ ᠡᠴᠤᠰ ᠰᠡᠬᠦᠯ ᠳᠡᠭᠡᠨ ᠬᠦᠷᠬᠢᠷᠡᠭᠰᠡᠨ ᠲᠡᠮᠤᠷ ᠤᠨ ᠤᠷᠤᠰᠬᠠᠯ ᠪᠤᠯᠤᠨ ᠲᠠᠪᠠᠯᠭᠠᠯᠠᠵᠤ᠂ ᠬᠦᠬᠡ ᠠᠭᠤᠯᠠ ᠶᠡᠬᠦᠷᠡᠨ ᠤᠶᠢᠴᠢᠭᠠᠳ᠂ ᠤᠳᠠᠭᠠᠨ ᠡᠳᠤᠷ ᠵᠤᠵᠠᠭᠠᠨ ᠬᠤᠨᠤᠭ ᠮᠦᠷᠦᠬᠡᠳᠴᠤ ᠪᠠᠶᠢᠭᠰᠠᠨ ᠲᠠᠯ᠎ᠠ ᠨᠤᠳᠤᠭ ᠨᠢᠳᠤᠨ ᠡᠮᠤᠨ᠎ᠡ ᠨᠢ ᠢᠯᠡᠷᠡᠨ ᠭᠠᠷᠪᠠ᠃ ᠪᠦᠬᠦᠳᠡᠬᠡᠷ ᠲᠡᠰᠬᠡᠯ ᠦᠭᠡᠢ ᠪᠠᠶᠠᠷᠯᠠᠵᠤ᠂ ᠤᠯᠠᠮᠵᠢᠯᠠᠯᠳᠤ ᠵᠠᠩᠰᠢᠯ ᠢᠶᠠᠷ ᠡᠬᠡᠰᠢᠭᠯᠡᠨ ᠲᠠᠭᠤᠯᠠᠵᠤ ᠲᠠᠪᠬᠡᠴᠨ ᠪᠦᠵᠢᠭᠯᠡᠭᠰᠡᠬᠡᠷ ᠡᠷᠬᠢᠨ ᠤ ᠬᠦᠨ ᠠᠴᠠ ᠨᠡᠬᠦᠨ ᠭᠠᠷᠴᠤ᠂ ᠡᠪᠦᠭᠡ ᠲᠡᠭᠡᠳᠤᠰ ᠤᠨ ᠢᠶᠠᠨ ᠤᠭ ᠨᠤᠳᠤᠭ ᠎ ᠲᠤ ᠪᠤᠴᠠᠨ ᠢᠷᠡᠵᠤ ᠲᠠᠪᠠᠳᠠᠢ ᠰᠠᠶᠢᠬᠠᠨ ᠠᠮᠢᠳᠤᠷᠠᠨ ᠰᠠᠭᠤᠵᠠᠢ᠃ ᠬᠡᠪᠡᠴᠤ ᠲᠡᠳᠠ ᠢᠳᠡᠬᠡᠰᠢᠵᠤ ᠲᠠᠰᠤᠭᠰᠠᠨ ᠡᠷᠬᠢᠨ ᠤ ᠬᠦᠨ ᠢᠶᠠᠨ ᠶᠡᠷᠤ ᠮᠠᠷᠳᠠᠭ᠎ᠠ ᠦᠭᠡᠢ᠂ ᠦᠶ᠎ᠡ ᠶᠢᠨ ᠦᠶ᠎ᠡ ᠳᠡᠭᠡᠨ ᠤᠯᠠᠮᠵᠢᠯᠠᠨ ᠬᠡᠯᠡᠵᠤ ᠦᠭᠬᠦᠭᠰᠡᠬᠡᠷ ᠪᠠᠶᠢᠵᠠᠢ᠃         ᠲᠠᠶᠢᠯᠪᠤᠷᠢ᠄       ① ᠡᠨᠡ ᠪᠤᠯ ᠬᠤᠶᠢᠳᠤ ᠴᠢ ︵ᠨᠡᠶᠢᠳᠠ ᠶᠢᠨ ᠤᠨ ᠲᠤᠭᠠᠯᠠᠯ ᠤᠨ 479 — 502︶ ᠎ ᠶᠢᠨ ᠲᠦᠷᠦ ᠶᠢᠨ ᠦᠶ᠎ᠡ ᠶᠢᠨ ᠨᠢᠬᠡᠨ ᠠᠷᠠᠳ ᠤᠨ ᠲᠠᠭᠤᠤ ᠶᠢᠨ ᠦᠬᠡ ᠪᠤᠯᠤᠨ᠎ᠠ᠃       ② ︽ᠮᠤᠩᠭᠤᠯ︾ ᠬᠡᠳᠡᠭ ᠦᠬᠡ ᠴᠤᠬᠤᠮ ᠶᠠᠮᠠᠷ ᠤᠳᠬ᠎ᠠ ᠲᠠᠢ ᠪᠤᠯᠬᠤ ᠶᠢ ᠤᠳᠤ ᠬᠢᠷᠢ ᠪᠠᠳᠤ ᠲᠤᠳᠤᠯᠠᠵᠤ ᠴᠢᠳᠠᠭ᠎ᠠ ᠦᠭᠡᠢ ᠪᠠᠶᠢᠨ᠎ᠠ᠃ ᠬᠡᠪᠡᠴᠤ ︽ᠮᠤᠩ︾ ᠪᠤᠶᠤ ︽ᠮᠤᠩᠭᠤᠯ︾ ᠬᠡᠵᠤ ᠨᠢᠬᠡᠨ ᠠᠶᠢᠮᠠᠭ ᠎ ᠤᠨ ᠨᠡᠷ᠎ᠡ ᠪᠠᠶᠢᠭᠰᠠᠨ ᠨᠢ ᠭᠠᠷᠴᠠᠭ᠎ᠠ ᠦᠭᠡᠢ ᠬᠡᠷᠡᠭ᠃ ᠡᠨᠡ ᠨᠢ ᠡᠬᠢᠯᠡᠬᠡᠳ ᠶᠠᠮᠠᠷ ᠨᠢᠬᠡᠨ ᠭᠠᠵᠠᠷ ᠨᠤᠳᠤᠭ ᠪᠤᠶᠤ ᠠᠭᠤᠯᠠ ᠤᠰᠤᠨ ᠤ ᠨᠡᠷ᠎ᠡ ᠠᠴᠠ ᠡᠬᠦᠰᠤᠯ ᠲᠠᠢ ᠪᠠᠶᠢᠵᠤ ᠪᠤᠯᠬᠤ ᠶᠤᠮ᠃       ③ ᠡᠷᠬᠢᠨ ᠤ ᠬᠦᠨ — ᠹᠧᠩ ᠴᠧᠩ ᠵᠢᠶᠦ᠋ᠨ ᠬᠡᠳᠡᠭ ᠬᠦᠮᠦᠨ ᠡᠨᠡ ᠭᠠᠵᠠᠷ ᠢ ᠡᠷᠬᠦᠨ᠎ᠡ ᠭᠤᠤᠯ ᠤᠨ ᠬᠠᠪᠢ ᠳᠠᠬᠢ ᠨᠢᠬᠡᠨ ᠠᠭᠤᠯᠠ ᠬᠠᠳᠠᠨ ᠤ ᠨᠡᠷ᠎ᠡ ᠪᠤᠶᠤ ᠬᠡᠵᠡᠢ ︵︽ᠴᠢᠩᠬᠢᠰ ᠬᠠᠭᠠᠨ ᠤ ᠨᠠᠮᠳᠠᠷ︾᠎ ᠲᠤ ︶       ④ ᠰᠠᠪᠳᠠᠭ ᠨᠠᠪᠳᠠᠭ — ᠠᠭᠤᠯᠠ ᠤᠰᠤᠨ ᠤ ᠡᠵᠡᠳ ᠰᠠᠬᠢᠭᠤᠯᠰᠤᠨ᠃         ᠬᠤᠶᠢᠨᠠᠬᠢ ᠦᠯᠢᠬᠡᠷ᠄ ᠠᠯᠤᠨ ᠭᠤᠸ᠎ᠠ ᠡᠬᠡ ᠲᠠᠪᠤᠨ ᠮᠦᠰᠤ ᠪᠠᠷ ᠬᠡᠤᠬᠡᠳ ᠢᠶᠠᠨ ᠰᠤᠷᠭᠠᠭᠰᠠᠨ 
  
ᠢᠷᠡᠯᠲᠡ᠄ ︽ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠰᠤᠩᠭᠤᠳᠠᠭ ᠵᠤᠬᠢᠶᠠᠯ ᠤᠨ ᠰᠤᠩᠭᠤᠮᠠᠯ︾
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号