ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠬᠡᠰᠢᠭᠳᠡᠨ ᠤ ᠭᠠᠵᠠᠷ ᠤᠨ ᠨᠡᠷ᠎ᠡ ᠶᠢᠨ ᠳᠤᠮᠤᠭ ᠶᠠᠷᠢᠶ᠎ᠠ ᠶᠢᠨ ᠰᠢᠳᠤᠯᠭᠡ ᠪᠢᠰᠢᠷᠡᠯ ᠤᠨ ᠳᠤᠬᠠᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/4/26
        ᠮᠤᠩᠭᠤᠯᠴᠤᠳ ᠠᠭᠤᠯᠠ ᠬᠠᠶᠢᠷᠬᠠᠨ᠂ ᠭᠤᠤᠯ ᠮᠦᠷᠡᠨ᠂ ᠪᠤᠯᠠᠭ ᠱᠠᠩᠳᠠ᠂ ᠤᠪᠤᠭ᠎ᠠ ᠬᠠᠶᠢᠷᠬᠠᠨ᠂ ᠮᠤᠳᠤ ᠰᠢᠭᠤᠢ ᠵᠡᠷᠭᠡ ᠠᠯᠢᠪᠠ ᠪᠤᠳᠠᠰ ᠲᠤ ᠴᠦᠮ ᠡᠵᠡᠨ ᠰᠠᠬᠢᠭᠤᠯᠰᠤᠨ ᠲᠠᠢ ᠭᠡᠵᠤ ᠦᠵᠡᠳᠡᠭ ᠤᠴᠢᠷ ᠠᠴᠠ ᠦᠪᠡᠷ ᠤᠨ ᠤᠷᠤᠰᠢᠨ ᠰᠠᠭᠤᠭ᠎ᠠ ᠨᠤᠳᠤᠭ ᠤᠰᠤᠨ ᠤ ᠪᠠᠨ ᠳᠤᠬᠠᠢ ᠭᠤᠶᠢᠳᠠ ᠰᠠᠶᠢᠬᠠᠨ ᠦᠯᠢᠭᠡᠷ ᠳᠤᠮᠤᠭ ᠵᠤᠬᠢᠶᠠᠵᠤ᠂ ᠦᠶ᠎ᠡ ᠳᠠᠮᠵᠢᠨ ᠤᠯᠠᠮᠵᠢᠯᠠᠭᠰᠠᠭᠠᠷ ᠢᠷᠡᠵᠠᠢ᠃ ᠳᠤᠰ ᠦᠭᠦᠯᠡᠯ ᠳᠤ ᠬᠡᠰᠢᠭᠳᠡᠨ ᠤ ᠭᠠᠵᠠᠷ ᠤᠨ ᠨᠡᠷ᠎ᠡ ᠶᠢᠨ ᠳᠤᠮᠤᠭ ᠶᠠᠷᠢᠶ᠎ᠠ ᠳᠤ ᠢᠯᠡᠷᠡᠭᠰᠡᠨ ᠰᠢᠳᠤᠯᠭᠡ ᠪᠢᠰᠢᠷᠡᠯ ᠤᠨᠴᠠᠯᠢᠭ ᠢ ᠭᠤᠷᠪᠠᠨ ᠳᠠᠯ᠎ᠠ ᠪᠠᠷ ᠬᠤᠷᠢᠶᠠᠩᠭᠤᠶᠢᠯᠠᠨ ᠦᠭᠦᠯᠡᠵᠠᠢ᠃        ᠨᠢᠭᠡ  ᠳᠡᠤᠬᠡᠳᠤ ᠪᠠᠭᠠᠳᠤᠷ ᠢ ᠠᠭᠤᠯᠠ ᠤᠰᠤᠨ ᠤ ᠡᠵᠡᠨ ᠰᠢᠳᠤᠭᠡᠨ ᠪᠤᠯᠭᠠᠨ ᠰᠢᠳᠢᠴᠢᠯᠡᠵᠠᠢ᠃ ᠳᠤᠮᠤᠭ ᠶᠠᠷᠢᠶ᠎ᠠ ᠨᠢ ᠳᠡᠤᠭᠡᠳᠤ ᠬᠦᠮᠤᠨ᠂ ᠳᠡᠤᠭᠡᠳᠤ ᠦᠢᠯᠡ ᠶᠠᠪᠤᠳᠠᠯ᠂ ᠳᠡᠤᠬᠡᠨ ᠳᠤᠷᠠᠰᠬᠠᠯᠳᠤ ᠵᠦᠢᠯᠡᠰ᠂ ᠠᠭᠤᠯᠠ ᠤᠰᠤᠨ ᠤ ᠦᠩᠭᠡ ᠦᠵᠡᠮᠵᠢ ᠪᠠᠷ ᠬᠦᠤᠷᠨᠢᠭ᠍ᠳᠡᠭᠦᠨ ᠢᠶᠠᠨ ᠪᠤᠯᠭᠠᠳᠠᠭ ᠮᠦᠷᠳᠡᠭᠡᠨ ᠳᠡᠤᠬᠡᠳᠤ ᠬᠦᠮᠤᠰ ᠢ ᠰᠢᠳᠤᠭᠡᠨᠴᠢᠯᠡᠨ ᠳᠤᠮᠤᠭᠯᠠᠳᠠᠭ ᠪᠠᠶᠢᠨ᠎ᠠ᠃ ᠬᠡᠰᠢᠭᠳᠡᠨ ᠤ ᠭᠠᠵᠠᠷ ᠤᠨ ᠨᠡᠷ᠎ᠡ ᠶᠢᠨ ᠳᠤᠮᠤᠭ ᠶᠠᠷᠢᠶᠠᠨ ᠳᠤ ᠴᠢᠩᠭᠢᠰ ᠬᠠᠭᠠᠨ᠂ ᠭᠠᠯᠳᠠᠨ ᠪᠤᠱᠤᠭᠳᠤ ᠵᠡᠷᠭᠡ ᠳᠡᠤᠭᠡᠳᠤ ᠬᠦᠮᠤᠰ ᠰᠢᠳᠢᠴᠢᠯᠡᠨ ᠳᠤᠮᠤᠭᠯᠠᠭᠳᠠᠵᠤ ᠪᠠᠶᠢᠳᠠᠭ᠃ ︽ᠠᠰᠬᠠᠳᠤ ᠬᠠᠳᠠ︾ ﹇1﹈᠎ ᠶᠢᠨ ᠳᠤᠮᠤᠭ ᠶᠠᠷᠢᠶ᠎ᠠ ᠳᠤ ᠴᠢᠩᠭᠢᠰ ᠬᠠᠭᠠᠨ ᠠᠯᠳᠠᠨ ᠤᠯᠤᠰ ᠢ ᠳᠠᠶᠢᠯᠠᠨ ᠳᠠᠭᠠᠭᠤᠯᠤᠭᠰᠠᠨ ᠳᠡᠤᠬᠡᠳᠤ ᠬᠡᠷᠡᠭ ᠤᠴᠢᠷ ᠢᠶᠠᠷ ᠰᠡᠳᠤᠪᠯᠡᠵᠠᠢ᠃ ︽ᠡᠭᠡᠴᠢ ᠳᠡᠭᠦᠦ ᠭᠤᠷᠪᠠᠨ ᠬᠠᠳᠠ︾ ﹇2﹈᠂ ︽ᠰᠡᠨᠵᠢᠳᠤ ᠬᠠᠳᠠ︾ ﹇3﹈ ᠵᠡᠷᠭᠡ ᠬᠤᠶᠠᠷ ᠬᠠᠳᠠ ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ ᠰᠡᠯᠡᠮ᠎ᠡ ᠪᠠᠷ ᠴᠠᠪᠴᠢᠭᠰᠠᠨ ᠪᠠ ᠠᠶᠤᠯ ᠤᠨ ᠬᠠᠷ᠎ᠠ ᠬᠦᠷᠦᠭᠡᠰᠦ ᠶᠢ ᠬᠠᠷᠪᠤᠭᠰᠠᠨ ᠠᠴᠠ ᠪᠦᠳᠦᠯ᠎ᠡ ᠭᠡᠵᠤ ᠳᠤᠮᠤᠭᠯᠠᠵᠠᠢ᠃ ᠳᠡᠭᠡᠬᠦᠯᠡᠷ ᠢᠶᠠᠨ ᠳᠤᠰ ᠬᠠᠳᠠ ᠤᠷᠴᠢᠮ ᠠᠮᠢᠳᠤᠷᠠᠵᠤ ᠪᠠᠶᠢᠭ᠎ᠠ ᠮᠠᠯᠴᠢᠨ ᠳᠦᠮᠡᠨ ᠠᠮᠤᠷ ᠳᠠᠶᠢᠪᠤᠩ ᠠᠵᠤ ᠳᠦᠷᠦᠨ ᠵᠢᠷᠭᠠᠵᠤ ᠶᠠᠪᠤᠭ᠎ᠠ ᠶᠤᠮ ᠭᠡᠨ᠎ᠡ᠃ ︽ᠰᠢᠨ᠎ᠡ ᠰᠢᠨ᠎ᠡ ᠳᠠᠯ᠎ᠠ︾ ﹇4﹈ ᠭᠡᠳᠡᠭ ᠳᠤᠮᠤᠭ ᠶᠠᠷᠢᠶ᠎ᠠ ᠨᠢ ᠭᠠᠯᠳᠠᠨ ᠪᠤᠱᠤᠭᠳᠤ ᠶᠢᠨ ᠴᠢᠩ ᠤᠯᠤᠰ ᠎ ᠢ ᠡᠰᠡᠷᠭᠦᠴᠡᠭᠰᠡᠨ ᠪᠠᠶᠢᠯᠳᠤᠭᠰᠠᠨ ᠳᠡᠤᠬᠡᠳᠤ ᠬᠡᠷᠡᠭ ᠠᠴᠠ ᠦᠨᠳᠤᠰᠤᠯᠡᠵᠤ᠂ ᠭᠠᠯᠳᠠᠨ ᠪᠤᠱᠤᠭᠳᠤ ᠶᠢᠨ ᠳᠡᠮᠡᠴᠡᠯ ᠢ ᠦᠨᠢ ᠡᠭᠦᠷᠢᠳᠡ ᠶᠢᠨ ᠴᠢᠨᠠᠷᠳᠠᠢ ᠪᠤᠯᠭᠠᠵᠤ᠂ ᠮᠠᠯᠴᠢᠨ ᠳᠦᠮᠡᠨ ᠦᠪᠡᠷ ᠤᠨ ᠦᠵᠡᠯ ᠰᠡᠳᠭᠢᠯᠭᠡ ᠪᠠᠨ ᠠᠭᠤᠰᠬᠠᠨ ᠳᠤᠮᠤᠭᠯᠠᠵᠠᠢ᠃ ᠳᠤᠰ ᠬᠤᠶᠠᠷ ᠳᠤᠮᠤᠭ ᠶᠠᠷᠢᠶ᠎ᠠ ᠳᠤ ᠭᠠᠷᠴᠦ ᠪᠠᠶᠢᠭ᠎ᠠ ᠴᠢᠩᠭᠢᠰ ᠬᠠᠭᠠᠨ ᠪᠠ ᠭᠠᠯᠳᠠᠨ ᠪᠤᠱᠤᠭᠳᠤ ᠴᠦᠮ ᠳᠡᠤᠬᠡᠳᠤ ᠪᠠᠭᠠᠳᠤᠷ ᠪᠤᠯᠬᠤ ᠶᠤᠮ᠃ ᠳᠡᠤᠬᠡᠳᠤ ᠪᠠᠭᠠᠳᠤᠷ ᠠᠴᠠ ᠡᠰᠢᠳᠡᠢ ᠡᠳᠡᠭᠡᠷ ᠭᠤᠷᠪᠠᠨ ᠬᠠᠳᠠ ᠶᠢᠨ ᠳᠤᠭᠤᠷᠢᠨ ᠳᠤ ᠰᠠᠭᠤᠭ᠎ᠠ ᠮᠠᠯᠴᠢᠨ ᠳᠦᠮᠡᠨ ᠳᠡᠤᠬᠡᠳᠤ ᠪᠠᠭᠠᠳᠤᠷ ᠤᠨ ᠰᠤᠶᠤᠷᠬᠠᠯ ᠪᠠ ᠦᠷᠦᠰᠢᠶᠡᠯ ᠢᠶᠠᠷ ᠠᠮᠤᠷ ᠳᠠᠶᠢᠪᠤᠩ ᠵᠢᠷᠭᠠᠵᠤ ᠶᠠᠪᠤᠭ᠎ᠠ᠃ ᠳᠤᠰ ᠳᠤᠮᠤᠭ ᠶᠠᠷᠢᠶ᠎ᠠ ᠠᠴᠠ ᠰᠢᠨᠵᠢᠯᠡᠬᠦ ᠳᠤ ᠳᠡᠤᠬᠡᠳᠤ ᠪᠠᠭᠠᠳᠤᠷ ᠢᠶᠠᠨ ᠦᠪᠡᠷ ᠎ ᠤᠨ ᠢᠶᠠᠨ ᠤᠶᠤᠨ ᠤᠬᠠᠭᠠᠨ ᠤ ᠦᠮᠦᠭ ᠳᠦᠰᠢᠭ ᠪᠤᠯᠭᠠᠭᠰᠠᠨ ᠮᠦᠷᠲᠡᠭᠡᠨ ᠨᠡᠩ ᠴᠢᠨᠠᠭᠰᠢᠯᠠᠪᠠᠯ ᠳᠡᠤᠬᠡᠳᠤ ᠪᠠᠭᠠᠳᠤᠷ ᠨᠢ ᠨᠤᠳᠤᠭ ᠤᠰᠤᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠤᠨ ᠳᠦᠷᠢ ᠪᠠᠷ ᠰᠢᠳᠤᠨ ᠳᠠᠬᠢᠭᠳᠠᠵᠤ ᠪᠠᠶᠢᠨ᠎ᠠ᠃ ᠡᠨᠡ ᠨᠢ ᠭᠠᠭᠴᠠ ᠬᠦ ᠬᠡᠰᠢᠭᠳᠡᠨ ᠤ ᠭᠠᠵᠠᠷ ᠤᠨ ᠨᠡᠷ᠎ᠡ ᠶᠢᠨ ᠳᠤᠮᠤᠭ ᠶᠠᠷᠢᠶᠠᠨ ᠳᠤ ᠯᠡ ᠢᠯᠡᠷᠡᠳᠡᠭ ᠪᠢᠰᠢ᠂ ᠪᠤᠰᠤᠳ ᠤᠷᠤᠨ ᠨᠤᠳᠤᠭ ᠤᠨ ᠳᠤᠮᠤᠭ ᠶᠠᠷᠢᠶ᠎ᠠ ᠳᠤ ᠨᠡᠶᠢᠳᠡᠮ ᠳᠤᠬᠢᠶᠠᠯᠳᠤᠨ᠎ᠠ᠃ ᠵᠢᠷᠢᠮ ᠤᠨ ᠭᠠᠵᠠᠷ ᠤᠨ ᠨᠡᠷ᠎ᠡ ᠶᠢᠨ ᠳᠤᠮᠤᠭ ᠶᠠᠷᠢᠶ᠎ᠠ ᠳᠤ ᠠᠭᠤᠯᠠ ᠤᠰᠤ ᠪᠠᠨ ᠪᠤᠷᠨᠠᠢ ᠴᠢᠨ ᠸᠠᠩ᠂ ᠳᠤᠭᠤᠨᠳᠡᠮᠤᠷ ᠬᠠᠭᠠᠨ᠂ ᠯᠢᠭᠳᠡᠨ ᠬᠤᠳᠤᠭᠳᠤ ᠬᠠᠭᠠᠨ ᠲᠠᠢ ᠬᠤᠯᠪᠤᠵᠤ᠂ ᠳᠡᠳᠡᠨ ᠤ ᠦᠢᠯᠡ ᠤᠴᠠᠷᠠᠯ ᠢ ᠬᠠᠯᠠᠮᠵᠢᠯᠠᠨ ᠰᠢᠳᠢᠴᠢᠯᠡᠬᠦ ᠪᠤᠶᠤ ᠰᠠᠬᠢᠭᠤᠯᠰᠤᠨᠴᠢᠯᠡᠨ ᠳᠤᠮᠤᠭᠯᠠᠳᠠᠭ ᠪᠠᠶᠢᠨ᠎ᠠ᠃        ᠬᠤᠶᠠᠷ  ᠬᠤᠨᠢ ᠪᠠ ᠳᠡᠮᠡᠭᠡ ᠶᠢ ᠨᠤᠳᠤᠭ ᠤᠰᠤᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠪᠤᠯᠭᠠᠨ ᠰᠢᠳᠢᠴᠢᠯᠡᠵᠠᠢ ᠮᠤᠩᠭᠤᠯᠴᠤᠳ ᠠᠯᠢ ᠤᠵᠠᠭᠤᠷ ᠠᠴᠠ ᠪᠠᠨ ᠠᠭᠤᠯᠠ ᠬᠠᠶᠢᠷᠬᠠᠨ᠂ ᠭᠤᠤᠯ ᠮᠦᠷᠡᠨ᠂ ᠪᠤᠯᠠᠭ ᠱᠠᠩᠳᠠ᠂ ᠳᠤᠪᠤ ᠳᠤᠯᠤᠭᠠᠳ᠂ ᠤᠪᠤᠭ᠎ᠠ ᠱᠠᠩᠰᠢ ᠵᠡᠷᠭᠡ ᠳᠤ ᠴᠦᠮ ᠡᠵᠡᠨ ᠰᠢᠳᠤᠭᠡᠨ ᠲᠠᠢ ᠢᠳᠡᠭᠡᠨ ᠳᠠᠭᠠᠳᠬᠠᠵᠤ ᠳᠤᠮᠤᠭᠯᠠᠳᠠᠭ ᠪᠠᠶᠢᠪᠠ᠃ ᠡᠵᠡᠨ ᠰᠢᠳᠤᠭᠡᠨ ᠢ ᠨᠢ ᠨᠠᠪᠳᠠᠭ ᠰᠠᠪᠳᠠᠭ ᠭᠡᠵᠤ ᠪᠠᠰᠠ ᠶᠠᠷᠢᠳᠠᠭ᠃ ᠨᠠᠪᠳᠠᠭ ᠰᠠᠪᠳᠠᠭ ᠎ ᠨᠢ ᠰᠢᠳᠤᠭᠡᠨᠳᠤ ᠠᠮᠢᠳᠠᠨ ᠪᠤᠶᠤ ᠡᠪᠤᠭᠡᠨ ᠰᠠᠬᠢᠭᠤᠯᠰᠤᠨ ᠬᠡᠬᠦ ᠵᠡᠷᠭᠡ ᠪᠠᠷ ᠨᠡᠶᠢᠭᠡᠮᠴᠢᠯᠡᠭᠰᠡᠨ᠂ ᠬᠦᠮᠤᠨᠴᠢᠯᠡᠭᠳᠡᠭᠰᠡᠨ ᠰᠢᠨᠵᠢᠳᠠᠢ ᠪᠠᠷ ᠢᠯᠡᠷᠡᠳᠡᠭ᠃ ᠬᠡᠰᠢᠭᠳᠡᠨ ᠤ ︽ᠪᠤᠷᠬᠠᠨ ᠬᠠᠳᠠ︾ ﹇5﹈ ᠭᠡᠬᠦ ᠳᠤᠮᠤᠭ ᠶᠠᠷᠢᠶ᠎ᠠ ᠳᠤ ᠳᠤᠯᠤᠭᠠᠨ ᠪᠤᠷᠤ ᠬᠤᠨᠢ ᠨᠢ ᠪᠤᠷᠬᠠᠨ ᠬᠠᠳᠠᠨ ᠤ ᠪᠤᠶᠠᠨ ᠬᠡᠰᠢᠭ ᠤᠨ ᠪᠦᠷᠢᠯᠸ᠎ᠠ ᠪᠠᠷ ᠢᠯᠡᠷᠡᠵᠤ ᠪᠠᠶᠢᠨ᠎ᠠ᠃ ︽ᠳᠡᠮᠡᠭᠡ ᠬᠠᠳᠠ︾ ﹇6﹈᠎ ᠶᠢᠨ ᠰᠢᠳᠤᠭᠡᠨ ᠠᠮᠢᠳᠠᠨ ᠨᠢ ᠠᠯᠳᠠᠨ ᠵᠤᠭᠳᠤᠷᠳᠤ ᠠᠪᠤᠷᠭᠤ ᠪᠤᠤᠷ᠎ᠠ ᠪᠠᠶᠢᠵᠤ᠂ ︽ᠭᠠᠭᠴᠠ ᠴᠠᠭᠠᠨ ᠬᠤᠰᠦ ᠮᠤᠳᠤ︾ ﹇7﹈ ᠭᠡᠬᠦ ᠳᠤᠮᠤᠭ ᠶᠠᠷᠢᠶ᠎ᠠ ᠶᠢᠨ ᠰᠢᠳᠤᠭᠡᠨ ᠠᠮᠢᠳᠠᠨ ᠨᠢ ᠰᠢᠳᠢᠳᠤ ᠪᠤᠭᠤ ᠪᠤᠯᠤᠨ᠎ᠠ᠃ ᠬᠤᠨᠢ᠂ ᠳᠡᠮᠡᠭᠡ᠂ ᠪᠤᠭᠤ ᠨᠢ ᠴᠦᠮ ᠰᠢᠳᠤᠭᠡᠨ ᠠᠮᠢᠳᠠᠨ ᠪᠤᠯᠬᠤ ᠮᠦᠷᠳᠡᠭᠡᠨ ᠠᠭᠤᠯᠠ ᠬᠠᠶᠢᠷᠬᠠᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠤᠨ ᠳᠦᠷᠢ ᠪᠠᠷ ᠢᠯᠡᠷᠡᠵᠤ ᠪᠤᠢ᠃ ︽ᠪᠤᠷᠬᠠᠨ ᠬᠠᠳᠠ︾ ﹇8﹈ ᠪᠠ ︽ᠳᠡᠮᠡᠭᠡ ᠬᠠᠳᠠ︾ ﹇9﹈᠎ ᠶᠢᠨ ᠳᠤᠮᠤᠭ ᠶᠠᠷᠢᠶ᠎ᠠ ᠳᠤ ᠨᠠᠨᠮᠠᠨᠽᠢ ︵ᠳᠤᠰ ᠬᠤᠶᠠᠷ ᠳᠤᠮᠤᠭ ᠶᠠᠷᠢᠶ᠎ᠠ ᠳᠤ ᠬᠦᠶᠦᠭᠡᠷ ᠭᠡᠵᠤ ᠪᠤᠢ︶ ᠠᠭᠤᠯᠠ ᠬᠠᠶᠢᠷᠬᠠᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠢ ᠮᠡᠬᠡᠯᠡᠵᠤ ᠪᠠᠷᠢᠬᠤ ᠪᠠᠷ ᠤᠷᠤᠯᠳᠤᠭᠠᠳ ᠪᠦᠷ ᠢᠯᠠᠭᠳᠠᠳᠠᠭ ᠪᠠᠶᠢᠨ᠎ᠠ᠃ ᠳᠤᠯᠤᠭᠠᠨ ᠪᠤᠷᠤ ᠬᠤᠨᠢ ᠭᠡᠬᠦ ᠪᠠᠷ ᠨᠢ ︽ᠳᠤᠯᠤᠭᠠᠨ ᠡᠪᠤᠭᠡᠨ ᠤᠳᠤᠨ ᠤ ᠳᠤᠮᠤᠭ︾᠎ ᠢ ᠰᠠᠨᠠᠭᠳᠠᠭᠤᠯᠵᠤ ᠪᠠᠶᠢᠨ᠎ᠠ᠃ ︽ᠳᠤᠯᠤᠭᠠᠨ ᠪᠤᠷᠤ ᠬᠤᠨᠢ︾ ᠭᠡᠳᠡᠭ ᠤᠨ ᠳᠤᠯᠤᠭ᠎ᠠ ᠨᠢ ︽ᠳᠤᠯᠤᠭᠠᠨ ᠡᠪᠤᠭᠡᠨ ᠤᠳᠤᠨ ᠤ ᠳᠤᠮᠤᠭ︾᠎ ᠲᠠᠬᠢ ᠳᠤᠯᠤᠭ᠎ᠠ ᠠᠴᠠ ᠡᠭᠦᠰᠦᠯ ᠲᠠᠢ ᠪᠠᠶᠢᠵᠤ ᠮᠡᠳᠡᠨ᠎ᠡ᠃ ᠨᠤᠳᠤᠭ ᠤᠰᠤᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠨᠢ ᠶᠠᠮᠠᠷ ᠨᠢᠭᠡᠨ ᠳᠤᠲ᠋ᠧᠮ ᠤᠨ ᠰᠢᠳᠤᠭᠡᠨ ᠠᠮᠢᠳᠠᠨ ︵ᠠᠯᠳᠠᠨ ᠤᠨᠠᠭ᠎ᠠ᠂ ᠴᠢᠨ᠋ᠸ᠎ᠠ᠂ ᠪᠤᠭᠤ᠂ ᠪᠤᠬ᠎ᠠ᠂ ᠮᠤᠭᠠᠢ᠂ ᠯᠤᠤ᠂ ᠬᠤᠨ ᠭᠠᠯᠠᠭᠤ ᠁︶ ᠪᠠ ᠬᠦᠮᠤᠨᠴᠢ ᠰᠢᠨᠵᠢᠳᠠᠢ ᠰᠠᠬᠢᠭᠤᠯᠰᠤᠨ ︵ᠮᠦᠩᠭᠦᠨ ᠴᠠᠭᠠᠨ ᠰᠠᠬᠠᠯ ᠲᠠᠢ ᠡᠪᠤᠭᠡᠨ ᠭᠡᠬᠦ ᠮᠡᠳᠤ︶᠎ ᠤ ᠳᠦᠷᠢ ᠪᠠᠷ ᠢᠯᠡᠷᠡᠬᠦ ᠨᠢ ᠵᠦᠩᠳᠡᠭᠡᠨ ᠳᠤᠬᠢᠶᠠᠯᠳᠤᠨ᠎ᠠ᠃ ᠭᠡᠪᠡᠴᠦ ᠬᠡᠰᠢᠭᠳᠡᠨᠴᠤᠳ ᠰᠢᠭ ᠠᠭᠤᠯᠠ ᠬᠠᠶᠢᠷᠬᠠᠨ ᠤ ᠪᠠᠨ ᠨᠠᠪᠳᠠᠭ ᠰᠠᠪᠳᠠᠭ ᠢ ᠬᠤᠨᠢ᠂ ᠳᠡᠮᠡᠭᠡ ᠪᠤᠯᠭᠠᠨ ᠳᠤᠮᠤᠭᠯᠠᠬᠤ ᠨᠢ ᠳᠤᠩ ᠴᠦᠬᠡᠨ ᠪᠠᠶᠢᠳᠠᠭ᠃ ᠡᠨᠡ ᠨᠢ ᠪᠤᠰᠤᠳ ᠨᠤᠳᠤᠭ ᠎ ᠠᠴᠠ ᠳᠤᠩ ᠤᠨᠴᠠᠯᠢᠭᠳᠠᠵᠤ ᠪᠠᠶᠢᠨ᠎ᠠ᠃ ᠪᠤᠰᠤᠳ ᠨᠤᠳᠤᠭ ᠤᠨ ᠳᠤᠮᠤᠭ ᠶᠠᠷᠢᠶᠠᠨ ᠳᠤ ᠳᠡᠮᠡᠭᠡ ᠨᠢ ᠵᠦᠩ ᠪᠢᠯᠢᠭ ᠎ ᠤᠨ ᠪᠡᠯᠭᠡ ᠰᠢᠨᠵᠢᠳᠠᠢ ᠠᠮᠢᠳᠠᠨ ᠢᠶᠠᠷ ᠵᠦᠩᠳᠡᠭᠡᠨ ᠢᠯᠡᠷᠡᠨ᠎ᠡ᠃ ᠵᠢᠱᠢᠶᠡᠯᠡᠪᠡᠯ᠄ ᠴᠠᠭᠠᠨ ᠳᠡᠮᠡᠭᠡ ᠬᠡᠪᠳᠡᠭᠰᠡᠨ ᠤᠷᠤᠨ ᠎ ᠳᠤ ᠡᠪᠡᠰᠦ ᠪᠡᠯᠴᠢᠭᠡᠷ ᠰᠠᠶᠢᠳᠠᠢ ᠦᠯᠵᠡᠢ ᠬᠡᠶᠢᠮᠤᠷᠢ ᠲᠠᠢ ᠭᠠᠵᠠᠷ ᠬᠡᠮᠡᠨ ᠳᠡᠷᠡ ᠭᠠᠵᠠᠷ ᠲᠤ ᠨᠤᠳᠤᠭᠯᠠᠬᠤ ᠶᠢ ᠡᠷᠬᠢᠮᠡᠯᠡᠳᠡᠭ᠃ ᠮᠠᠯᠵᠢᠬᠤ ᠠᠮᠢᠳᠤᠷᠠᠯ ᠤᠨ ᠳᠦᠰᠢᠭ ᠳᠤᠯᠭᠠᠭᠤᠷᠢ ᠪᠤᠯᠤᠭᠰᠠᠨ ᠠᠳᠤᠭᠤ᠂ ᠦᠬᠡᠷ ᠨᠢ ᠨᠤᠳᠤᠭ ᠤᠰᠤᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠤᠨ ᠳᠦᠷᠢ ᠪᠤᠶᠤ ᠳᠤᠲ᠋ᠧᠮ ᠤᠨ ᠳᠦᠷᠢ ᠪᠠᠷ ᠢᠯᠡᠷᠡᠵᠤ ᠪᠠᠶᠢᠬᠤ ᠨᠢ ᠮᠤᠩᠭᠤᠯᠴᠤᠳ ᠳᠡᠷᠡᠴᠢᠯᠡᠨ ᠬᠡᠰᠢᠭᠳᠡᠨᠴᠤᠳ ᠤᠨ ᠤᠶᠤᠨ ᠰᠠᠨᠠᠭ᠎ᠠ ᠪᠤᠶᠤ ᠬᠦᠰᠡᠯ ᠢ ᠬᠠᠩᠭᠠᠵᠤ ᠴᠢᠳᠠᠬᠤ ᠪᠠᠨ ᠪᠤᠯᠢᠵᠤ᠂ ᠳᠡᠮᠡᠭᠡ ᠪᠠ ᠬᠤᠨᠢ ᠨᠢ ᠴᠦ ᠨᠤᠳᠤᠭ ᠤᠰᠤᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠤᠨ ᠳᠦᠷᠢ ᠪᠠᠷ ᠢᠯᠡᠷᠡᠬᠦ ᠪᠤᠯᠵᠤ᠂ ᠳᠠᠪᠤᠨ ᠬᠤᠰᠢᠭᠤ ᠮᠠᠯ ᠢᠶᠠᠨ ᠴᠦᠮ ᠰᠢᠳᠤᠭᠡᠨᠴᠢᠯᠡᠬᠦ ᠭᠡᠰᠡᠨ ᠮᠠᠯᠴᠢᠨ ᠳᠦᠮᠡᠨ ᠤ ᠦᠵᠡᠯ ᠪᠤᠳᠤᠯ ᠤᠨ ᠯᠡᠪᠡᠷᠡᠯ ᠮᠦᠨ ᠭᠡᠵᠤ ᠰᠢᠨᠵᠢᠯᠡᠵᠤ ᠪᠤᠯᠤᠨ᠎ᠠ᠃        ᠭᠤᠷᠪᠠ  ᠳᠡᠭᠷᠢ᠂ ᠯᠤᠤᠰ ᠤᠨ ᠰᠢᠳᠤᠯᠭᠡ ᠪᠦᠭᠡ ᠮᠦᠷᠭᠦᠯ ᠤᠨ ᠭᠤᠷᠪᠠᠨ ᠶᠢᠷᠳᠢᠨᠴᠦ ᠶᠢᠨ ᠦᠵᠡᠯᠳᠡ ᠳᠤ ᠳᠡᠭᠷᠢ ᠪᠤᠯ ᠳᠡᠭᠡᠳᠤ ᠶᠢᠷᠳᠢᠨᠴᠦ ᠶᠢᠨ ᠰᠢᠳᠤᠭᠡᠨ ᠪᠠᠶᠢᠵᠤ᠂ ᠯᠤᠤᠰ ᠪᠤᠯ ᠳᠤᠤᠷᠠᠳᠤ ᠶᠢᠷᠳᠢᠨᠴᠦ ᠶᠢᠨ ᠰᠢᠳᠤᠭᠡᠨ ᠪᠤᠯᠤᠨ᠎ᠠ᠃ ᠬᠡᠰᠢᠭᠳᠡᠨᠴᠤᠳ ᠦᠵᠡᠮᠵᠢᠳᠤ ᠰᠠᠶᠢᠬᠠᠨ ᠨᠤᠳᠤᠭ ᠤᠰᠦ ᠪᠠᠨ ᠳᠡᠭᠷᠢ ᠨᠠᠷᠠ ᠪᠤᠶᠤ ᠯᠤᠤᠰ ᠎ ᠲᠠᠢ ᠬᠤᠯᠪᠤᠨ ᠳᠤᠮᠤᠭᠯᠠᠵᠤ᠂ ᠦᠪᠡᠷ ᠤᠨ ᠨᠤᠳᠤᠭ ᠤᠰᠦ ᠪᠠᠨ ᠨᠡᠩ ᠷᠢᠳᠢ ᠰᠢᠳᠢ ᠲᠠᠢ ᠠᠷᠢᠭᠤᠨ ᠳᠠᠷᠬᠠᠨ ᠪᠤᠯᠭᠠᠵᠤ ᠴᠢᠳᠠᠵᠠᠢ᠃ ︽ᠰᠢᠷᠠᠮᠦ᠋ᠷᠡᠨ︾ ﹇10﹈ ᠭᠡᠬᠦ ᠳᠤᠮᠤᠭ ᠶᠠᠷᠢᠶ᠎ᠠ ᠳᠤ ᠰᠢᠷᠠᠮᠦ᠋ᠷᠡᠨ ᠭᠤᠤᠯ ᠤᠨ ᠡᠭᠦᠰᠦᠯ ᠭᠦᠭᠵᠢᠯ ᠢ ᠨᠢᠥᠢ ᠸᠠ᠂ ᠳᠡᠭᠷᠢ ᠶᠢᠨ ᠬᠠᠭᠠᠨ᠂ ᠨᠢᠥᠢ ᠸᠠ ᠶᠢᠨ ᠦᠬᠢᠨ ᠰᠢᠷᠠᠮᠦ᠋ᠷᠡᠨ ᠪᠠ ᠬᠤᠨᠢᠴᠢᠨ ᠵᠠᠯᠠᠭᠤ ᠲᠠᠢ ᠠᠮᠢᠳᠤᠯᠢᠭ ᠬᠤᠯᠪᠤᠨ ᠦᠯᠢᠭᠡᠷᠴᠢᠯᠡᠵᠠᠢ᠃ ︽ᠳᠠᠯᠠᠢ ᠨᠠᠭᠤᠷ︾ ﹇11﹈ ᠭᠡᠬᠦ ᠳᠤᠮᠤᠭ ᠶᠠᠷᠢᠶ᠎ᠠ ᠨᠢ ᠯᠤᠤᠰ ᠤᠨ ᠬᠠᠭᠠᠨ᠂ ᠡᠷᠯᠢᠭ ᠨᠤᠮᠤᠨ ᠬᠠᠭᠠᠨ ᠠᠴᠠ ᠬᠡᠰᠢᠭᠳᠡᠨ ᠨᠤᠳᠤᠭ ᠤᠨ ᠬᠠᠷᠬᠢᠰ ᠪᠠᠶᠠᠨ ᠢ ᠤᠷᠤᠰᠬᠠᠨ ᠳᠠᠷᠤᠵᠤ ᠬᠦᠮᠤᠨ ᠮᠠᠯ ᠢ ᠭᠠᠴᠢᠭ ᠠᠴᠠ ᠠᠪᠤᠷᠠᠯ᠎ᠠ ᠬᠡᠮᠡᠨ ᠬᠠᠭᠤᠴᠢᠯᠠᠵᠠᠢ᠃ ︽ᠪᠠᠶᠠᠨᠵᠢᠷᠦᠬᠡ᠂ ᠤᠯᠠᠭᠠᠨ ᠭᠠᠴᠤᠷ᠎ᠠ︾ ﹇12﹈᠎ ᠶᠢᠨ ᠳᠤᠮᠤᠭ ᠶᠠᠷᠢᠶ᠎ᠠ ᠳᠤ ᠤᠯᠠᠭᠠᠨ ᠭᠠᠴᠤᠷ᠎ᠠ ᠶᠢᠨ ᠤᠢ ᠨᠢ ᠬᠠᠷ᠎ᠠ ᠯᠤᠤᠰ ᠵᠤᠨ ᠤ ᠪᠦᠭᠴᠢᠮ ᠬᠠᠯᠠᠭᠤᠨ ᠳᠤ ᠬᠡᠰᠢᠭᠳᠡᠨ ᠨᠤᠳᠤᠭ ᠲᠤ ᠵᠤᠭᠠᠴᠠᠬᠤ ᠳᠤ ᠪᠠᠨ ᠰᠡᠷᠢᠭᠦᠴᠡᠬᠦ ᠭᠠᠵᠠᠷ ᠦᠬᠡᠢ ᠰᠠᠨᠳᠤᠷᠠᠬᠤ ᠳᠤ ᠪᠠᠨ ᠰᠠᠬᠠᠯ ᠠᠴᠠ ᠪᠠᠨ ᠬᠡᠳᠤ ᠶᠢ ᠦᠭᠳᠡᠭᠡᠨ ᠠᠪᠴᠦ ᠰᠠᠴᠤᠨ ᠶᠠᠪᠤᠭᠤᠯᠤᠭᠰᠠᠨ ᠠᠴᠠ ᠪᠤᠢ ᠪᠤᠯᠤᠯ᠎ᠠ ᠭᠡᠵᠤ ᠶᠠᠷᠢᠭᠳᠠᠳᠠᠭ᠃ ᠮᠤᠩᠭᠤᠯᠴᠤᠳ ᠤᠰᠤᠨ ᠤᠷᠤᠨ ᠤ ᠡᠵᠡᠯᠡᠭᠴᠢ ᠶᠢ ᠯᠤᠤᠰ ᠬᠡᠮᠡᠨ ᠰᠢᠳᠤᠵᠤ ᠪᠠᠶᠢᠳᠠᠭ᠃ ᠳᠤᠮᠤᠭ ᠶᠠᠷᠢᠶ᠎ᠠ ᠳᠤ ᠭᠠᠷᠳᠠᠭ ᠯᠤᠤᠰ ᠨᠢ ᠭᠤᠤᠯᠳᠠᠭᠤ ᠡᠬᠦᠯᠡ ᠡᠭᠦᠰᠭᠡᠵᠤ ᠬᠤᠷ᠎ᠠ ᠪᠤᠷᠤᠭᠠᠨ ᠤᠷᠤᠭᠤᠯᠬᠤ ᠷᠢᠳᠢ ᠰᠢᠳᠢ ᠲᠠᠢ ᠪᠠᠶᠢᠵᠤ᠂ ᠬᠦᠮᠤᠰ ᠳᠡᠭᠦᠨ ᠎ ᠠᠴᠠ ᠳᠡᠩᠳᠠ ᠠᠪᠤᠷᠠᠯ ᠦᠷᠦᠰᠢᠶᠡᠯ ᠬᠦᠷᠳᠡᠬᠦ ᠪᠠᠷ ᠵᠤᠷᠢᠵᠤ ᠰᠢᠳᠤᠨ ᠪᠢᠰᠢᠷᠡᠳᠡᠭ᠃ ᠡᠶᠢᠮᠤ ᠠᠴᠠ ᠦᠵᠡᠮᠵᠢᠳᠤ ᠰᠠᠶᠢᠨᠬᠠᠨ ᠤᠯᠠᠭᠠᠨ ᠭᠠᠴᠤᠷ᠎ᠠ ᠶᠢᠨ ᠤᠢ ᠪᠠ ᠳᠠᠯᠠᠢ ᠨᠠᠭᠤᠷ ᠢ ᠯᠤᠤᠰ ᠠᠴᠠ ᠬᠡᠰᠢᠭᠳᠡᠨ ᠳᠦᠮᠡᠨ ᠳᠤ ᠰᠤᠶᠤᠷᠬᠠᠯ᠎ᠠ ᠬᠡᠮᠡᠨ ᠳᠤᠮᠤᠭᠯᠠᠵᠤ᠂ ᠤᠯᠠᠭᠠᠨ ᠭᠠᠴᠤᠷ᠎ᠠ ᠶᠢᠨ ᠤᠢ ᠪᠠ ᠳᠠᠯᠠᠢ ᠨᠠᠭᠤᠷ ᠢ ᠤᠯᠠᠮ ᠷᠢᠳᠢ ᠰᠢᠳᠢ ᠲᠠᠢ ᠠᠷᠢᠭᠤᠨ ᠳᠠᠷᠬᠠᠨ ᠤᠷᠤᠨ ᠪᠤᠯᠭᠠᠵᠤ ᠴᠢᠳᠠᠵᠠᠢ᠃ ︽ᠰᠢᠷᠠᠮᠦ᠋ᠷᠡᠨ︾ ᠭᠡᠬᠦ ᠳᠤᠮᠤᠭ ᠶᠠᠷᠢᠶ᠎ᠠ ᠨᠢ ᠬᠡᠳᠤᠶᠢᠪᠡᠷ ᠬᠢᠳᠡᠳ ᠤᠨ ᠳᠤᠮᠤᠭ ᠦᠯᠢᠭᠡᠷ ᠲᠤ ᠭᠠᠷᠳᠠᠭ ᠨᠢᠥᠢ ᠸᠠ᠂ ᠳᠡᠭᠷᠢ ᠶᠢᠨ ᠬᠠᠭᠠᠨ ᠭᠡᠬᠦ ᠮᠡᠳᠤ ᠶᠢᠨ ᠳᠦᠷᠢ ᠶᠢ ᠠᠰᠢᠭᠯᠠᠭᠰᠠᠨ ᠪᠤᠯᠪᠠᠴᠦ ᠳᠡᠭᠦᠨ ᠳᠤ ᠮᠤᠩᠭᠤᠯᠴᠤᠳ ᠤᠨ ᠳᠡᠭᠷᠢ ᠶᠢᠨ ᠰᠢᠳᠤᠯᠭᠡ ᠵᠤᠬᠢᠬᠤ ᠬᠡᠮᠵᠢᠶ᠎ᠡ ᠪᠠᠷ ᠢᠯᠡᠷᠡᠵᠤ ᠪᠤᠢ᠃        ᠬᠤᠷᠢᠶᠠᠩᠭᠤᠶᠢᠯᠠᠪᠠᠯ᠂ ᠬᠡᠰᠢᠭᠳᠡᠨ ᠤ ᠭᠠᠵᠠᠷ ᠤᠨ ᠨᠡᠷ᠎ᠡ ᠶᠢᠨ ᠳᠤᠮᠤᠭ ᠶᠠᠷᠢᠶ᠎ᠠ ᠶᠢᠨ ᠰᠢᠳᠤᠯᠭᠡ ᠪᠢᠰᠢᠷᠡᠯ ᠤᠨ ᠵᠠᠩ ᠦᠢᠯᠡ ᠨᠢ ᠶᠡᠷᠤᠩᠬᠡᠢ ᠳᠤ ᠪᠠᠨ ᠪᠤᠰᠤᠳ ᠨᠤᠳᠤᠭ ᠤᠨ ᠵᠠᠩ ᠭᠠᠵᠠᠷ ᠤᠨ ᠨᠡᠷ᠎ᠡ ᠶᠢᠨ ᠳᠤᠮᠤᠭ ᠶᠠᠷᠢᠶ᠎ᠠ ᠳᠤ ᠢᠯᠡᠷᠡᠭᠰᠡᠨ ᠰᠢᠳᠤᠯᠭᠡ ᠶᠢᠨ ᠵᠠᠩ ᠦᠢᠯᠡ ᠲᠠᠢ ᠠᠳᠠᠯᠢᠬᠠᠨ ᠪᠠᠶᠢᠨ᠎ᠠ᠃ ᠭᠡᠪᠡᠴᠦ ᠳᠡᠮᠡᠭᠡ ᠪᠠ ᠬᠤᠨᠢ ᠶᠢ ᠨᠤᠳᠤᠭ ᠤᠰᠤᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠪᠤᠯᠭᠠᠨ ᠰᠢᠳᠢᠴᠢᠯᠡᠨ ᠳᠤᠮᠤᠭᠯᠠᠭᠰᠠᠨ ᠨᠢ ᠳᠤᠩ ᠤᠨᠴᠠᠯᠢᠭ ᠲᠠᠢ ᠪᠤᠯᠵᠤ᠂ ᠬᠡᠰᠢᠭᠳᠡᠨ ᠤ ᠭᠠᠵᠠᠷ ᠤᠨ ᠨᠡᠷ᠎ᠡ ᠶᠢᠨ ᠳᠤᠮᠤᠭ ᠶᠠᠷᠢᠶ᠎ᠠ ᠶᠢ ᠨᠡᠩ ᠶᠡᠬᠡᠪᠡᠷ ᠦᠨᠳᠤᠰᠤᠳᠡᠨ ᠤ ᠤᠨᠴᠠᠯᠢᠭ ᠎ ᠲᠠᠢ ᠪᠤᠯᠭᠠᠵᠤ᠂ ᠮᠠᠯᠵᠢᠬᠤ ᠠᠮᠢᠳᠤᠷᠠᠯ ᠤᠨ ᠦᠨᠤᠷ ᠠᠮᠳᠠ ᠪᠠᠷ ᠦᠳᠭᠡᠨ ᠪᠤᠯᠭᠠᠵᠤ ᠴᠢᠳᠠᠵᠠᠢ᠃          ᠵᠡᠭᠦᠯᠳᠡ᠄ ﹇1﹈ ﹇2﹈ ﹇3﹈ ﹇4﹈ ﹇5﹈ ﹇6﹈ ﹇7﹈ ﹇8﹈ ﹇9﹈ ﹇10﹈ ﹇11﹈ ﹇12﹈ ᠴᠦᠯᠳᠦᠮ ᠨᠠᠶᠢᠷᠠᠭᠤᠯᠪᠠ᠂ ︽ᠵᠤᠤ ᠤᠳᠠ ᠶᠢᠨ ᠭᠠᠵᠠᠷ ᠤᠨ ᠨᠡᠷ᠎ᠡ ᠶᠢᠨ ᠳᠤᠮᠤᠭ︾᠂ ᠦᠪᠤᠷ ᠮᠤᠩᠭᠤᠯ ᠤᠨ ᠰᠤᠶᠤᠯ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ᠂ 2010 ᠤᠨ ᠤ 4 ᠰᠠᠷ᠎ᠠ᠃ 
  
ᠢᠷᠡᠯᠲᠡ᠄ ᠬᠤᠯᠪᠤᠭ᠎ᠠ ᠪᠦᠷᠭᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号