ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠰᠠᠶᠢᠬᠠᠨ ᠬᠠᠶᠢᠷᠬᠠᠨ ︵ᠶᠡᠭᠡ ᠰᠠᠬᠢᠭᠤᠯᠰᠤᠨ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/4/25
        ᠬᠡᠰᠢᠭᠳᠡᠨ ᠬᠤᠰᠢᠭᠤᠨ ᠤ ᠡᠮᠤᠨ᠎ᠠ ᠪᠡᠶ᠎ᠡ ᠪᠠᠷ ᠵᠠᠬ᠎ᠠ ᠨᠡᠶᠢᠯᠡᠨ ᠨᠤᠳᠤᠭᠯᠠᠵᠤ ᠪᠠᠶᠢᠭ᠎ᠠ ᠾᠧᠪᠸᠢ ᠮᠤᠵᠢ ᠶᠢᠨ ᠸᠧᠢᠢᠴᠠᠩ ᠰᠢᠶᠠᠨ ᠪᠤᠯᠬᠤ ᠮᠠᠨᠵᠤ᠂ ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠦᠪᠡᠷᠳᠡᠬᠡᠨ ᠵᠠᠰᠠᠬᠤ ᠰᠢᠶᠠᠨ ᠪᠤᠯᠤᠨ ᠬᠡᠰᠢᠭᠳᠡᠨ ᠬᠤᠰᠢᠭᠤᠨ ᠤ ᠵᠠᠭᠠᠭ ᠬᠢᠯᠢ ᠶᠢᠨ ᠲᠤᠳᠤᠷ᠎ᠠ ᠪᠢᠭ᠎ᠠ ᠰᠠᠶᠢᠬᠠᠨ ᠬᠠᠶᠢᠷᠬᠠᠨ ᠵᠤ ᠬᠡᠳᠡᠭ ᠠᠭᠤᠯᠠ ᠶᠢᠨ ᠤᠷᠤᠢ ᠲᠡᠭᠡᠷ᠎ᠡ ᠡᠷᠳᠡ ᠤᠷᠢᠳᠤ ᠴᠠᠭ ᠴᠢᠯᠠᠭᠤ ᠪᠠᠷ ᠤᠪᠤᠭ᠎ᠠ ᠪᠤᠰᠠᠬᠵᠤ ᠲᠦᠪ ᠲᠤᠮᠳᠠ ᠨᠢ ᠰᠦᠯᠳᠡ ᠰᠢᠳᠦᠬᠡᠨ — ᠳ᠋ᠤᠭ ᠮᠤᠳᠤ ᠶᠢ ᠪᠤᠯᠠᠵᠤ ᠪᠤᠷᠭᠠᠰᠤ ᠮᠤᠳᠤ ᠪᠠᠷ ᠬᠦᠷᠢᠶᠡᠯᠡᠨ ᠴᠢᠮᠡᠵᠤ᠂ ᠤᠪᠤᠭᠠᠨ ᠤ ᠪᠠᠨ ᠵᠡᠬᠦᠨ ᠡᠮᠤᠨ᠎ᠡ ᠪᠠ ᠪᠠᠷᠠᠭᠤᠨ ᠡᠮᠤᠨ᠎ᠠ ᠨᠢ ᠵᠡᠷᠬᠡᠴᠡᠭᠰᠡᠨ ᠬᠤᠶᠠᠷ ᠪᠠᠭᠠᠨ᠎ᠠ ᠪᠤᠰᠬᠠᠨ ᠪᠤᠯᠠᠵᠤ ᠬᠤᠰᠢᠭᠤ ᠵᠠᠰᠠᠭ ᠨᠤᠶᠠᠨ ᠤ ᠲᠡᠬᠢᠯ ᠤᠨ ᠡᠬᠦᠳᠠᠨ ᠲᠡᠮᠳᠡᠭ ᠪᠤᠯᠭᠠᠭᠰᠠᠨ ᠶᠤᠮ᠃ ᠬᠠᠶᠢᠷᠬᠠᠨ ᠤᠪᠤᠭᠠᠨ ᠤ ᠵᠡᠬᠦᠨ᠂ ᠪᠠᠷᠠᠭᠤᠨ ᠲᠠᠯ᠎ᠠ ᠳᠤᠨᠢ ᠲᠤᠰ ᠪᠦᠷᠢ ᠵᠢᠷᠭᠤᠭᠠᠨ ᠵᠢᠵᠢᠭ ᠱᠢᠪᠢ ᠤᠪᠤᠭ᠎ᠠ ᠤᠪᠤᠭᠠᠯᠠᠵᠤ᠂ ᠭᠤᠤᠯ ᠤᠪᠤᠭ᠎ᠠ ᠲᠠᠢ ᠪᠠᠨ ᠠᠷᠪᠠᠨ ᠭᠤᠷᠪᠠᠨ ᠤᠪᠤᠭ᠎ᠠ ᠪᠤᠯᠭᠠᠨ ᠬᠤᠰᠢᠭᠤ ᠲᠠᠶᠠᠭᠠᠷ ᠢᠶᠠᠨ ᠰᠦᠰᠦᠭᠯᠡᠨ ᠲᠠᠬᠢᠳᠠᠭ ᠪᠠᠶᠢᠨ᠎ᠠ᠃ ︽ᠰᠠᠶᠢᠬᠠᠨ ᠬᠠᠶᠢᠷᠬᠠᠨ︾᠎ ᠨᠢ ᠲᠠᠯᠠᠢ ᠶᠢᠨ ᠲᠦᠪᠰᠢᠨ ᠠᠴᠠ ᠨᠢᠬᠡ ᠮᠢᠩᠭ᠎ᠠ ᠲᠤᠯᠤᠭᠠᠨ ᠵᠠᠭᠤ ᠲᠠᠯᠠᠨ ᠶᠢᠰᠦᠨ ᠮᠧᠲᠷ ᠦᠨᠳᠤᠷ ᠲᠤ ᠰᠦᠨᠳᠡᠷᠯᠡᠵᠤ ᠪᠠᠶᠢᠬᠤ ᠪᠦᠬᠡᠳ ᠡᠮᠤᠨ᠎ᠠ ᠵᠠᠬ᠎ᠠ ᡁᠢ ᠿᠦᠢ ᠰᠢᠶᠠᠩ ᠤᠨ ᠬᠡᠪᠴᠢᠶᠡᠨ ᠳᠤ ᠪᠠᠶᠢᠨ᠎ᠠ᠃       ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤ ᠨᠦᠯᠦᠬᠡᠯᠡᠯ ᠢᠶᠠᠷ ᠬᠤᠵᠢᠮ ᠨᠢ ︽ᠰᠠᠶᠢᠬᠠᠨ ᠬᠠᠶᠢᠷᠬᠠᠨ︾᠎ ᠳᠤ ᠰᠠᠬᠢᠭᠤᠰᠤ ᠲᠦᠷᠢ ᠵᠢᠷᠤᠭᠯᠠᠨ ᠪᠦᠳᠦᠬᠡᠵᠤ ᠦᠨᠡᠮᠰᠢᠬᠦᠯᠦᠨ ᠰᠢᠳᠦᠬᠦ ᠪᠤᠯᠵᠠᠢ᠃ ᠲᠡᠷᠡ ᠨᠢ ᠨᠢᠬᠡᠨ ᠰᠠᠷᠠᠯ ᠮᠤᠷᠢ ᠤᠨᠤᠭᠠᠳ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠮᠦᠩᠬᠦᠨ ᠴᠠᠭᠠᠨ ᠰᠡᠯᠡᠮ᠎ᠡ ᠪᠠᠷᠢᠵᠤ᠂ ᠵᠡᠬᠦᠨ ᠭᠠᠷ ᠲᠠᠭᠠᠨ ᠡᠷᠳᠡᠨᠢ ᠶᠢᠨ ᠤᠯᠠᠭᠠᠨ ᠲᠡᠭᠡᠰᠤ ᠠᠳᠬᠤᠭᠰᠠᠨ ᠪᠡᠶ᠎ᠡ ᠳᠡᠭᠡᠨ ᠲᠡᠷᠯᠢᠭ ᠡᠮᠤᠰᠴᠤ᠂ ᠬᠦᠯ ᠳᠡᠭᠡᠨ ᠤᠯᠭᠠᠨ ᠪᠤᠯᠢᠭᠠᠷᠢ ᠭᠤᠳᠤᠯ ᠡᠮᠦᠰᠦᠭᠰᠡᠨ ᠰᠦᠷ ᠵᠢᠪᠬᠤᠯᠠᠩᠳᠤ ᠲᠦᠷᠢ ᠲᠠᠢ᠃ ᠭᠠᠷ ᠲᠠᠭᠠᠨ ᠪᠠᠷᠢᠭᠰᠠᠨ ᠵᠢᠳᠠ ᠨᠢ ᠠᠯᠢᠪᠠ ᠠᠳᠠ ᠴᠢᠳᠬᠦᠷ ᠢ ᠪᠠᠶᠢᠯᠳᠤᠨ ᠲᠠᠷᠤᠩᠭᠤᠶᠢᠯᠠᠵᠤ᠂ ᠡᠷᠳᠡᠨᠢ ᠶᠢᠨ ᠤᠯᠠᠭᠠᠨ ᠲᠡᠭᠡᠰᠤ ᠪᠠᠷ ᠮᠠᠭᠤ ᠡᠳᠡᠬᠡᠳ ᠬᠤᠯᠠᠭᠠᠢ ᠲᠡᠭᠡᠷᠡᠮ ᠢ ᠪᠠᠷᠢᠵᠤ ᠠᠪᠤᠭᠠᠳ ᠤᠶᠠᠳᠠᠭ ᠬᠡᠨ᠎ᠡ᠃       ᠬᠡᠰᠢᠭᠳᠡᠨ ᠤ ᠠᠷᠠᠳ ᠤᠨ ᠲᠤᠮᠤᠭ ᠶᠠᠷᠢᠶᠠᠨ ᠳᠤ᠂ ᠴᠢᠩ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠤᠯᠤᠰ ᠎ ᠤᠨ ᠡᠵᠡᠨ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠨᠢᠬᠡ ᠵᠢᠯ ᠤᠨ ᠨᠠᠮᠤᠷ ᠤᠨ ᠰᠡᠬᠦᠯᠴᠢ ᠪᠠᠷ ᠠᠪᠠ ᠶᠢᠨ ᠠᠭᠤᠯᠠ ︵ᠾᠧᠪᠸᠢ ᠮᠤᠵᠢ ᠶᠢᠨ ᠸᠧᠢᠢᠴᠠᠩ ᠰᠢᠶᠠᠨ ᠤ ᠬᠡᠪᠴᠢᠶᠡᠨ ᠳᠤ ᠪᠠᠶᠢᠨ᠎ᠠ︶᠎ ᠳᠠᠭᠠᠨ ᠭᠠᠷᠴᠤ ᠠᠩ ᠠᠩᠨᠠᠵᠤ ᠪᠠᠶᠢᠭᠠᠳ ᠵᠠᠬ᠎ᠠ ᠨᠡᠶᠢᠯᠡᠵᠤ ᠪᠠᠶᠢᠭ᠎ᠠ ᠬᠡᠰᠢᠭᠳᠡᠨ ᠤ ᠰᠠᠶᠢᠬᠠᠨ ᠵᠤ ᠬᠠᠶᠢᠷᠬᠠᠨ ᠠᠭᠤᠯᠠ ᠪᠠᠷ ᠠᠪᠠ ᠬᠦᠷᠦᠬᠡ ᠬᠢᠵᠤ ᠪᠠᠶᠢᠳᠠᠯ᠎ᠠ ᠬᠡᠨᠡᠳᠳᠡ ᠲᠡᠭᠷᠢ ᠪᠦᠷᠬᠦᠶᠢᠵᠤ᠂ ᠰᠠᠯᠬᠢᠨ ᠰᠠᠯᠬᠢᠯᠠᠵᠤ ᠴᠠᠰᠤ ᠬᠠᠶᠠᠯᠠᠵᠠᠢ ᠬᠡᠨ᠎ᠡ᠃ ᠲᠠᠭᠠᠯᠳᠤᠨ ᠶᠠᠪᠤᠭ᠎ᠠ ᠰᠢᠳᠠᠷ ᠲᠦᠰᠢᠮᠡᠳ ᠎ ᠨᠢ ᠡᠵᠡᠨ ᠬᠠᠭᠠᠨ ᠳᠠᠭᠠᠨ᠄ ︽ᠰᠠᠯᠬᠢᠨ ᠭᠠᠷᠴᠤ ᠴᠠᠰᠤ ᠤᠷᠤᠯ᠎ᠠ᠂ ᠤᠳᠤ ᠠᠪᠠᠯᠠᠬᠤ ᠪᠠᠨ ᠪᠠᠶᠢᠵᠤ᠂ ᠦᠷᠳᠡᠭᠡ ᠪᠠᠭᠤᠳᠠᠯ ᠪᠡᠯᠡᠳᠬᠡᠬᠦ ᠤᠤ︖︾ ᠬᠡᠵᠤ ᠵᠠᠷᠯᠢᠭ ᠵᠢᠭᠠᠪᠤᠷᠢ ᠬᠦᠯᠢᠶᠡᠵᠠᠢ᠃ ᠬᠠᠭᠠᠨ ᠡᠵᠡᠨ᠄ ︽ᠶᠠᠮᠠᠷ ᠴᠠᠰᠤ ᠤᠷᠤᠵᠤ ᠪᠠᠶᠢᠨ᠎ᠠ︖︾ ᠬᠡᠵᠤ ᠬᠠᠮ ᠲᠡᠷᠬᠡᠨ ᠲᠤᠳᠤᠷ᠎ᠠ ᠠᠴᠠ ᠠᠰᠠᠭᠤᠵᠠᠢ᠃ ᠰᠢᠳᠠᠷ ᠲᠦᠰᠢᠮᠡᠳ ᠨᠢ᠄ ︽ᠴᠠᠭᠠᠨ ᠴᠠᠰᠤ ᠤᠷᠤᠵᠤ ᠪᠠᠶᠢᠨ᠎ᠠ︾ ᠬᠡᠵᠠᠢ᠃ ᠬᠠᠭᠠᠨ ᠡᠵᠡᠨ᠄ ︽ᠤᠯᠠᠭᠠᠨ ᠦᠩᠬᠡ ᠲᠠᠢ ᠴᠠᠰᠤ ᠤᠷᠤᠵᠤ ᠦᠭᠡᠢ ᠪᠤᠯ ᠦᠷᠬᠦᠯᠵᠢᠯᠠᠨ ᠤᠷᠤᠭᠰᠢᠯᠠᠵᠤ ᠠᠪᠠᠯᠠᠬᠤ ᠬᠡᠷᠡᠭᠳᠠᠢ︾ ᠬᠡᠵᠤ ᠵᠠᠷᠯᠢᠭ ᠪᠤᠯᠵᠠᠢ ᠬᠡᠨ᠎ᠡ᠃ ᠲᠡᠮᠡᠢ ᠤᠳᠠᠯ ᠦᠬᠡᠢ ᠠᠭᠤᠷ ᠠᠮᠢᠰᠬᠤᠯ ᠬᠦᠢᠳᠡᠷᠡᠨ᠂ ᠬᠤᠶᠢᠳᠤ ᠵᠦᠭ ᠠᠴᠠ ᠶᠡᠭᠡ ᠰᠠᠯᠬᠢᠨ ᠰᠠᠯᠬᠢᠯᠠᠵᠤ᠂ ᠴᠠᠭᠠᠨ ᠴᠠᠰᠤ ᠨᠢ ᠬᠤᠪᠢᠷᠠᠨ ᠤᠯᠠᠭᠠᠪᠳᠤᠷ ᠦᠩᠬᠡ ᠶᠢᠨ ᠴᠠᠰᠤ ᠬᠠᠶᠠᠯᠠᠨ ᠪᠤᠷᠠᠵᠤ ᠨᠢᠳᠤ ᠨᠡᠬᠡᠬᠡᠬᠦ ᠶᠢᠨ ᠠᠷᠭ᠎ᠠ ᠦᠭᠡᠢ ᠶᠡᠭᠡ ᠰᠢᠭᠤᠷᠭᠠᠨ ᠭᠠᠷᠪᠠ ᠃ ᠡᠨᠡᠬᠦ ᠪᠠᠶᠢᠳᠠᠯ ᠢ ᠲᠤᠤᠷᠠᠬᠢ ᠰᠢᠳᠠᠷ ᠲᠦᠰᠢᠮᠡᠳ ᠨᠢ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠳᠤ ᠮᠡᠳᠡᠬᠦᠯᠬᠦ ᠳᠤ ᠬᠠᠭᠠᠨ ᠡᠵᠡᠨ᠄ ︽ᠡᠨᠡ ᠭᠠᠵᠠᠷ ᠤᠨ ᠠᠭᠤᠯᠠ ᠬᠠᠶᠢᠷᠬᠠᠨ ᠤ ᠡᠵᠡᠳ ᠰᠠᠬᠢᠭᠤᠯᠰᠤᠨ ᠬᠢᠯᠢᠩᠨᠡᠭᠰᠡᠨ ᠲᠤᠯᠠ ᠲᠠᠷᠤᠢ ᠲᠦᠷᠬᠡᠨ ᠠᠪᠠᠯᠠᠬᠤ ᠪᠠᠨ ᠵᠤᠭᠰᠤᠵᠤ᠂ ᠠᠪᠠ ᠶᠢᠨ ᠠᠭᠤᠯᠠ ᠵᠦᠭ ᠢᠶᠠᠨ ᠪᠤᠴᠠᠵᠤ ᠦᠷᠳᠡᠭᠡ ᠪᠠᠭᠤᠳᠠᠯ ᠪᠡᠯᠡᠳᠬᠡᠵᠤ ᠪᠠᠭᠤᠳᠤᠭᠠᠢ︾ ᠬᠡᠵᠤ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠬᠡᠨ᠎ᠡ᠃ ᠡᠬᠦᠨ ᠠᠴᠠ ᠬᠤᠶᠢᠰᠢ ᠬᠡᠰᠢᠭᠳᠡᠨ ᠮᠤᠩᠭᠤᠯᠴᠤᠳ ᠤᠨ ᠲᠤᠮᠳᠠ ︽ᠬᠡᠰᠢᠭᠳᠡᠨ ᠤ ᠶᠡᠭᠡ ᠬᠠᠶᠢᠷᠬᠠᠨ ᠷᠢᠳᠢ ᠰᠢᠳᠢ ᠪᠠᠨ ᠭᠠᠷᠭᠠᠵᠤ᠂ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠢ ᠰᠤᠴᠢᠭᠠᠭᠰᠠᠨ ᠪᠦᠬᠡᠳ ᠪᠢᠰᠢᠷᠡᠬᠦᠯᠦᠭᠰᠡᠨ ᠬᠡᠨ᠎ᠡ︾ ᠬᠡᠬᠦ ᠤᠯᠠᠮᠵᠢᠯᠠᠯᠳᠤ ᠲᠤᠮᠤᠭ ᠶᠠᠷᠢᠶ᠎ᠠ ᠲᠡᠯᠬᠡᠷᠡᠭᠰᠡᠨ ᠪᠠᠶᠢᠨ᠎ᠠ᠃       ᠬᠡᠰᠢᠭᠳᠡᠨ ᠠᠷᠠᠳ ᠤᠨ ᠪᠠᠰᠠ ᠨᠢᠬᠡᠨ ᠤᠯᠠᠮᠵᠢᠯᠠᠯᠳᠤ ᠲᠤᠮᠤᠭ ᠶᠠᠷᠢᠶᠠᠨ ᠳᠤ᠂ ︽ᠰᠠᠶᠢᠬᠠᠨ ᠬᠠᠶᠢᠷᠬᠠᠨ︾᠎ ᠤ ᠰᠠᠴᠤᠯᠢ ᠡᠷᠬᠦᠯᠳᠠ ᠶᠢᠨ ᠴᠢᠯᠠᠭᠤᠨ ᠤᠩᠭᠤᠴᠠ ᠳᠤ ᠤᠯᠠᠨ ᠦᠭᠯᠢᠬᠡ ᠶᠢᠨ ᠡᠵᠡᠳ ᠮᠦᠷᠬᠦᠯᠴᠢᠨ ᠎ ᠠᠴᠠ ᠤᠯᠠᠨ ᠵᠢᠯ ᠤᠯᠵᠠ ᠤᠷᠤᠯᠭ᠎ᠠ ᠶᠢᠨ ᠮᠦᠩᠬᠦ ᠵᠤᠭᠤᠰ ᠠᠴᠠ ᠲᠡᠭᠡᠵᠢᠯᠡᠨ ᠡᠷᠬᠦᠭᠰᠡᠬᠡᠷ ᠪᠠᠶᠢᠭᠠᠳ ᠨᠡᠯᠢᠶᠡᠳ ᠠᠷᠪᠢᠨ ᠮᠦᠩᠬᠦᠨ ᠵᠤᠭᠤᠰ᠂ ᠬᠦᠷᠡᠯ ᠵᠤᠭᠤᠰ᠂ ᠭᠠᠤᠯᠢᠨ ᠵᠤᠭᠤᠰ ᠬᠤᠷᠠᠮᠳᠤᠵᠠᠢ᠃ ᠨᠢᠬᠡᠨ ᠡᠳᠤᠷ ᠡᠳ᠋ ᠮᠦᠩᠬᠦᠨ ᠎ ᠳᠤ ᠰᠢᠨᠤᠬᠠᠢ ᠬᠤᠪᠳᠤᠭ ᠬᠦᠮᠦᠨ ᠲᠡᠷᠡᠬᠦ ᠵᠤᠭᠤᠰ ᠢ ᠤᠯᠵᠤ ᠦᠵᠡᠬᠡᠳ ᠬᠤᠪᠳᠤᠭ ᠰᠠᠨᠠᠭ᠎ᠠ ᠡᠬᠦᠰᠬᠡᠨ ᠬᠤᠯᠠᠭᠠᠶᠢᠯᠠᠨ ᠠᠪᠤᠭᠠᠳ ᠬᠤᠪᠢ ᠶᠢᠨ ᠠᠮᠢᠳᠤᠷᠠᠯ ᠳᠠᠭᠠᠨ ᠵᠠᠷᠤᠵᠤ ᠬᠡᠨ᠎ᠡ᠃ ᠵᠤᠭᠤᠰ ᠤᠯᠵᠤ ᠪᠠᠶᠠᠵᠢᠯ᠎ᠠ ᠬᠡᠵᠤ ᠪᠠᠶᠠᠷᠯᠠᠵᠤ ᠪᠠᠶᠢᠭᠰᠠᠨ ᠡᠨᠡ ᠬᠦᠮᠦᠨ ᠬᠡᠳᠤᠬᠡᠨ ᠰᠠᠷ᠎ᠠ ᠶᠢᠨ ᠬᠤᠭᠤᠷᠤᠨᠳᠤ ᠬᠡᠷ ᠪᠦᠯᠢ ᠶᠢᠨ ᠬᠦᠮᠦᠰ ᠨᠢ ᠡᠪᠡᠳᠴᠢᠨ ᠲᠠᠬᠤᠯ ᠲᠤᠰᠴᠤ ᠠᠮᠢ ᠨᠠᠰᠤ ᠪᠠᠨ ᠠᠯᠳᠠᠵᠤ᠂ ᠠᠳᠤᠭᠤ ᠮᠠᠯ ᠨᠢ ᠦᠬᠦᠨ ᠰᠦᠢᠳᠴᠤ᠂ ᠮᠠᠰᠢ ᠶᠡᠭᠡ ᠭᠠᠢ ᠭᠠᠮᠰᠢᠭ ᠪᠤᠯᠤᠭᠠᠳ᠂ ᠪᠤᠳᠠᠭ᠎ᠠ ᠭᠤᠶᠤᠬᠤ ᠬᠡᠮᠵᠢᠶᠡᠨ ᠳᠤ ᠬᠦᠷᠴᠤ ᠬᠡᠨ᠎ᠡ᠃ ᠪᠠᠰᠠ ᠨᠢᠬᠡᠨ ᠭᠠᠴᠢᠭᠳᠠᠵᠤ ᠲᠦᠪᠡᠭᠳᠡᠭᠰᠡᠨ ᠶᠠᠳᠠᠭᠤ ᠬᠦᠮᠦᠨ ︽ᠰᠠᠶᠢᠬᠠᠨ ᠬᠠᠶᠢᠷᠬᠠᠨ︾᠎ ᠳᠤ ᠮᠦᠷᠬᠦᠨ ᠰᠦᠬᠦᠳᠴᠤ᠂ ᠰᠠᠴᠤᠯᠢ ᠡᠷᠬᠦᠭᠰᠡᠨ ᠮᠦᠩᠬᠦ ᠵᠤᠭᠤᠰ ᠢ ᠲᠤᠭᠳᠠᠭᠰᠠᠨ ᠰᠠᠷ᠎ᠠ᠂ ᠡᠳᠤᠷ ᠲᠡᠭᠡᠨ ᠲᠤᠭ᠎ᠠ ᠶᠤᠰᠤᠭᠠᠷ ᠪᠤᠴᠠᠭᠠᠨ ᠦᠭᠬᠦ ᠪᠠᠷ ᠠᠮᠠᠯᠠᠭᠠᠳ ᠵᠢᠬᠡᠯᠡᠵᠤ ᠵᠠᠷᠤᠵᠤ ᠬᠡᠨ᠎ᠡ᠃ ᠲᠡᠷᠡᠬᠦ ᠦᠨᠡᠨᠴᠢ ᠰᠡᠳᠬᠢᠯ ᠲᠠᠢ ᠶᠠᠳᠠᠭᠤ ᠬᠦᠮᠦᠨ ︽ᠰᠠᠶᠢᠬᠠᠨ ᠬᠠᠶᠢᠷᠬᠠᠨ︾᠎ ᠤ ᠬᠡᠰᠢᠭ ᠵᠤᠭᠤᠰ ᠢᠶᠠᠷ ᠠᠮᠢᠳᠤᠷᠠᠯ ᠤᠨ ᠭᠠᠴᠢᠭ ᠢᠶᠠᠨ ᠰᠢᠢᠳᠪᠤᠷᠢᠯᠡᠭᠰᠡᠨ ᠪᠦᠬᠡᠳ ᠬᠤᠶᠠᠷ ᠵᠢᠯ ᠪᠤᠯᠤᠭᠰᠠᠨ ᠦᠭᠡᠢ ᠪᠠᠷ ᠠᠳᠤᠭᠤ ᠮᠠᠯ ᠨᠢ ᠦᠷᠡᠵᠢᠨ᠂ ᠡᠮᠤᠰᠴᠤ ᠢᠳᠡᠬᠦ ᠳᠡᠭᠡᠨ ᠭᠠᠴᠢᠭᠳᠠᠬᠤ ᠦᠭᠡᠢ ᠪᠤᠯᠤᠭᠠᠳ ᠲᠤᠭᠳᠠᠭᠰᠠᠨ ᠰᠠᠷ᠎ᠠ ᠡᠳᠤᠷ ᠲᠡᠭᠡᠨ ︽ᠰᠠᠶᠢᠬᠠᠨ ᠬᠠᠶᠢᠷᠬᠠᠨ︾᠎ ᠤ ᠬᠡᠰᠢᠭ ᠵᠤᠭᠤᠰ ᠢ ᠲᠤᠭ᠎ᠠ ᠶᠤᠰᠤᠭᠠᠷ ᠪᠤᠴᠠᠭᠠᠨ ᠦᠭᠴᠤ᠂ ᠤᠯᠵᠠ ᠤᠷᠤᠯᠭ᠎ᠠ ᠠᠴᠠ ᠎ ᠪᠠᠨ ᠲᠡᠭᠡᠵᠢᠯᠡᠨ ᠰᠠᠴᠤᠯᠢ ᠡᠷᠬᠦᠨ᠂ ᠦᠨᠡᠨ ᠰᠡᠳᠬᠢᠯ ᠠᠴᠠ ᠪᠠᠨ ᠰᠦᠰᠦᠭᠯᠡᠨ ᠮᠦᠷᠬᠦᠵᠤ᠂ ᠵᠢᠯ ᠪᠦᠷᠢ ᠲᠠᠬᠢᠳᠠᠭ ᠪᠤᠯᠵᠤ ᠬᠡᠨ᠎ᠡ᠃ ᠬᠤᠵᠢᠮ ᠨᠢ ᠡᠨᠡ ᠬᠦᠮᠦᠨ ᠪᠠᠶᠠᠨ ᠡᠯᠪᠡᠭ ᠠᠮᠢᠳᠤᠷᠠᠯ ᠲᠠᠢ ᠪᠤᠯᠵᠤ᠂ ᠨᠡᠷ᠎ᠡ ᠠᠯᠳᠠᠷᠰᠢᠭᠰᠠᠨ ︽ᠪᠠᠶᠠᠨ︾ ᠪᠤᠯᠤᠭᠰᠠᠨ ᠬᠡᠬᠦ ᠮᠡᠳᠤ ᠶᠢᠨ ᠲᠤᠮᠤᠭ ᠶᠠᠷᠢᠶ᠎ᠠ ᠪᠠᠶᠢᠳᠠᠭ᠃       ᠬᠡᠰᠢᠭᠳᠡᠨ ᠮᠤᠩᠭᠤᠯᠴᠤᠳ ᠶᠡᠭᠡ ᠰᠠᠬᠢᠭᠤᠯᠰᠤᠨ ᠬᠠᠶᠢᠷᠬᠠᠨ — ᠰᠠᠶᠢᠬᠠᠨ ᠬᠠᠶᠢᠷᠬᠠᠨ ᠢ ᠬᠠᠮᠤᠭ ᠠᠴᠠ ᠢᠯᠡᠬᠦᠦ ᠪᠢᠰᠢᠷᠡᠨ ᠰᠢᠳᠦᠳᠡᠭ ᠤᠨ ᠤᠴᠢᠷ ᠨᠢ ᠬᠠᠭᠠᠨ ᠡᠵᠡᠨ ᠠᠴᠠ ᠠᠶᠤᠳᠠᠭ ᠦᠭᠡᠢ᠂ ᠬᠤᠪᠳᠤᠭ ᠰᠢᠨᠤᠬᠠᠶᠢᠳᠠᠨ ᠢ ᠵᠠᠨᠤᠵᠤ᠂ ᠦᠨᠡᠨᠴᠢ ᠠᠷᠠᠳ ᠢ ᠬᠠᠶᠢᠷᠠᠯᠠᠨ ᠲᠤᠰᠠᠯᠠᠵᠤ᠂ ᠠᠳᠠ ᠴᠢᠳᠬᠦᠷ᠂ ᠬᠤᠯᠠᠭᠠᠢ ᠲᠡᠭᠡᠷᠡᠮ ᠢ ᠲᠠᠷᠤᠩᠭᠤᠶᠢᠯᠠᠳᠠᠭ ᠬᠡᠵᠤ ᠰᠦᠰᠦᠭᠯᠡᠨ ᠲᠠᠬᠢᠳᠠᠭ ᠪᠠᠶᠢᠨ᠎ᠠ᠃ ᠰᠠᠶᠢᠬᠠᠨ ᠬᠠᠶᠢᠷᠬᠠᠨ ᠢ ᠵᠢᠯ ᠪᠦᠷᠢ ᠶᠢᠨ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠵᠢᠷᠭᠤᠳᠤᠭᠠᠷ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠭᠤᠷᠪᠠᠨ ᠤ ᠡᠳᠤᠷ ᠬᠤᠰᠢᠭᠤ ᠵᠠᠰᠠᠭ ᠨᠤᠶᠠᠨ ᠠᠴᠠ ᠲᠠᠬᠢᠯᠭ᠎ᠠ ᠶᠢ ᠡᠷᠬᠢᠯᠡᠨ ᠨᠠᠷ᠎ᠡ ᠬᠦᠨᠳᠤᠳᠤ ᠳ᠋ᠠ ᠯᠠᠮᠠ ᠪᠤᠶᠤ ᠱᠠᠪᠷᠦᠩ ᠬᠤᠪᠢᠯᠭᠠᠨ ᠲᠠᠬᠢᠯᠭ᠎ᠠ ᠶᠢᠨ ᠨᠤᠮ ᠰᠤᠳᠤᠷ ᠤᠩᠰᠢᠵᠤ᠂ ᠬᠤᠰᠢᠭᠤ ᠲᠠᠶᠠᠭᠠᠷ ᠢᠶᠠᠨ ᠲᠠᠬᠢᠳᠠᠭ ᠵᠠᠩᠰᠢᠯ ᠲᠠᠢ᠃ ᠪᠤᠷᠵᠢᠬᠢᠨ ᠤᠪᠤᠭᠳᠠᠨ ᠤ ᠨᠠᠯᠢᠶᠡᠳ ᠲᠤᠭᠠᠨ ᠤ ᠡᠷᠦᠬᠡ ᠨᠢ ᠪᠠᠰᠠ ︽ᠰᠠᠶᠢᠬᠠᠨ ᠬᠠᠶᠢᠷᠬᠠᠨ︾᠎ ᠳᠠᠭᠠᠨ ᠠᠳᠤᠭᠤ ᠮᠠᠯ ᠵᠢᠰᠤᠯᠠᠨ ᠡᠷᠬᠦᠵᠤ᠂ ᠬᠠᠶᠢᠷᠬᠠᠨ ᠤ ᠰᠠᠳᠠᠷ ᠵᠡᠬᠦᠯᠬᠡᠵᠤ᠂ ᠮᠠᠯ ᠰᠦᠷᠦᠭ ᠲᠡᠭᠡᠨ ᠤᠩᠭᠤᠯᠠᠨ ᠲᠠᠯᠪᠢᠳᠠᠭ ᠴᠦ ᠪᠤᠢ᠃ 
  
ᠢᠷᠡᠯᠲᠡ᠄ ︽ᠬᠡᠰᠢᠭᠳᠡᠨ ᠤ ᠰᠦᠮ᠎ᠡ ᠬᠡᠶᠢᠳ ᠬᠠᠶᠢᠷᠬᠠᠨ ᠤᠪᠤᠭᠠᠳ︾
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号