ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠬᠡᠥᠬᠡᠥᠨ ᠤᠨ ᠬᠦᠮᠦᠵᠢᠯ ᠳᠤ ᠭᠡᠷ ᠤᠨ ᠠᠬᠠᠮᠠᠳ ᠤᠨ ᠠᠩᠬᠠᠷᠬᠤ ᠵᠦᠢᠯ ᠤᠳ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/12/8
         ᠪᠠᠭ᠎ᠠ ᠪᠤᠰᠤ ᠰᠠᠶᠢᠬᠠᠨ ᠵᠠᠯᠠᠭᠤᠴᠤᠤᠨ ᠨᠡᠶᠢᠭᠡᠮ ᠲᠡᠭᠡᠷ᠎ᠡ ᠭᠠᠷᠤᠭᠰᠠᠨ ᠬᠤᠶᠢᠨ᠎ᠠ ᠪᠤᠶᠤ ᠠᠶᠢᠯ ᠭᠡᠷ ᠪᠤᠯᠤᠭᠰᠠᠨ ᠤ ᠲᠠᠷᠠᠭ᠎ᠠ ᠠᠮᠢᠳᠤᠷᠠᠯ ᠢᠶᠠᠨ ᠦᠭᠡᠳᠡ ᠨᠢ ᠲᠠᠳᠠᠵᠤ ᠴᠢᠳᠠᠬᠤ ᠦᠭᠡᠢ ᠤᠷᠤᠭᠤᠳᠠᠵᠤ ᠶᠠᠪᠤᠬᠤ ᠨᠢ ᠬᠠᠷᠠᠭᠳᠠᠨ᠎ᠠ᠂ ᠪᠦᠷ ᠯᠡ ᠠᠵᠢᠯ ᠠᠮᠢᠳᠤᠷᠠᠯ ᠤᠨ ᠰᠤᠷᠳᠠᠯ ᠠᠵᠢᠯᠴᠢ ᠪᠤᠷᠤᠭᠵᠢᠭᠤᠨ ᠪᠢᠰᠢ᠂ ᠯᠠᠷᠵᠢᠶ᠎ᠠ ᠶᠠᠩᠪᠠ ᠲᠠᠳᠠᠭᠰᠠᠭᠠᠷ ᠪᠠᠶᠢᠵᠤ ᠠᠮᠢᠳᠤᠷᠠᠯ ᠢᠶᠠᠨ ᠦᠭᠡᠶᠢᠬᠢᠵᠦ ᠪᠠᠶᠢᠨ᠎ᠠ᠂ ᠡᠨᠡ ᠪᠤᠯ ᠶᠤᠰᠤᠳᠠᠢ ᠠᠶᠢᠯ ᠭᠡᠷ ᠤᠨ ᠬᠦᠮᠦᠵᠢᠯ ᠰᠤᠷᠳᠠᠯ ᠠᠴᠠ ᠯᠡ ᠪᠤᠯᠤᠨ᠎ᠠ᠃ ᠲᠡᠭᠡᠬᠦ ᠠᠴᠠ ︽ᠰᠠᠶᠢᠨ ᠬᠦᠮᠦᠵᠢᠯ ᠤᠷᠤᠯᠭ᠎ᠠ ᠪᠤᠯᠵᠤ᠂ ᠮᠠᠭᠤ ᠬᠦᠮᠦᠵᠢᠯ ᠵᠠᠷᠤᠯᠭ᠎ᠠ ᠪᠤᠯᠳᠠᠭ︾ ᠭᠡᠰᠡᠨ ᠬᠠᠪᠤᠳᠤ ᠦᠭᠡ ᠭᠠᠷᠤᠭᠰᠠᠨ᠃ ᠮᠠᠨ ᠤ ᠬᠦᠮᠦᠵᠢᠯ ᠤᠨ ᠠᠷᠭ᠎ᠠ ᠠᠪᠳᠠᠯ ᠪᠤᠷᠤᠭᠤᠳᠠᠬᠤ ᠳᠤ ᠬᠦᠷᠪᠡᠯ ᠭᠡᠷ ᠪᠦᠯᠢ᠂ ᠨᠡᠶᠢᠭᠡᠮ᠂ ᠰᠤᠷᠭᠠᠭᠤᠯᠢ ᠶᠢᠨ ᠴᠢᠷᠮᠠᠶᠢᠯᠭ᠎ᠠ ᠵᠠᠷᠤᠯᠭ᠎ᠠ ᠪᠦᠷ ᠬᠤᠭᠤᠰᠤᠳᠠᠵᠤ᠂ ᠨᠢᠭᠡ ᠠᠶᠢᠯ ᠭᠡᠷ ᠤᠨ ᠦᠶ᠎ᠠ ᠵᠠᠯᠭᠠᠮᠵᠢ ᠲᠤᠷᠤᠶᠢᠳᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ︽ᠨᠦᠬᠦᠥᠨ ᠤᠨ ᠮᠠᠭᠤ ᠪᠠᠷ ᠨᠦᠬᠡᠨ ᠳᠤ ᠤᠨᠠᠨ᠎ᠠ︾ ᠭᠡᠭᠴᠢ ᠪᠤᠯᠵᠤ᠂ ᠲᠡᠷᠡ ᠬᠡᠥᠬᠡᠥᠨ ᠲᠠᠢ ᠨᠦᠬᠦᠷᠯᠡᠵᠦ ᠶᠠᠪᠤᠭᠰᠠᠨ ᠤᠯᠠᠨ ᠬᠡᠥᠬᠡᠥᠨ ᠪᠠᠰᠠ ᠬᠦᠯ ᠠᠯᠳᠠᠬᠤ ᠪᠤᠯᠤᠨ᠎ᠠ᠂ ᠨᠢᠭᠡ ᠠᠶᠢᠯ ᠭᠡᠷ ᠦᠷ᠎ᠡ ᠬᠡᠥᠬᠡᠥᠨ ᠢᠶᠠᠨ ᠰᠢᠯᠢᠳᠡᠭ ᠬᠦᠮᠦᠵᠢᠬᠦᠯᠵᠦ ᠴᠢᠳᠠᠪᠠᠯ ᠲᠡᠷᠡ ᠠᠶᠢᠯ ᠭᠡᠷ ᠢ ᠦᠭᠡᠳᠡ ᠨᠢ ᠲᠠᠳᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠨᠢᠭᠡ ᠨᠤᠳᠤᠭ ᠤᠰᠤᠨ ᠤ ᠨᠡᠷ᠎ᠡ ᠬᠦᠨᠳᠦ ᠎ ᠶᠢ ᠴᠦ ᠮᠠᠨᠳᠤᠭᠤᠯᠵᠤ ᠴᠢᠳᠠᠨ᠎ᠠ᠃ ᠶᠡᠷᠦ ᠨᠢ ᠨᠡᠶᠢᠭᠡᠮ ᠤᠨ ᠬᠦᠭᠵᠢᠯ ᠤᠨ ᠦᠨᠳᠦᠰᠦᠨ ᠠᠰᠠᠭᠤᠳᠠᠯ ᠪᠤᠯ ᠭᠡᠷ ᠪᠦᠯᠢ ᠎ ᠶᠢᠨ ᠬᠦᠭᠵᠢᠯ ᠪᠠᠶᠢᠭ᠎ᠠ᠂ ᠤᠭᠰᠠᠭ᠎ᠠ ᠶᠠᠰᠤᠳᠠᠨ ᠤ ᠰᠤᠶᠤᠯ ᠪᠤᠯᠪᠠᠰᠤᠨ ᠢ ᠠᠴᠢᠶᠠᠯᠠᠵᠤ ᠪᠠᠶᠢᠭ᠎ᠠ ᠬᠠᠮᠤᠭ ᠵᠢᠵᠢᠭ ᠨᠢᠭᠡᠴᠡ ᠪᠤᠯ ᠮᠥᠨ ᠴᠦ ᠭᠡᠷ ᠪᠦᠯᠢ ᠪᠠᠶᠢᠭ᠎ᠠ᠃ ᠲᠡᠭᠡᠬᠦ ᠪᠠᠷ ᠪᠢᠳᠡ ᠪᠦᠬᠦᠨ ᠡᠭᠡᠯ ᠪᠤᠷᠤᠭᠵᠢᠭᠤᠨ ᠠᠮᠢᠳᠤᠷᠠᠯ ᠤᠨ ᠲᠠᠥᠠᠬᠠᠯ᠂ ᠡᠷᠡᠭᠦᠯ ᠰᠠᠷᠠᠭᠤᠯ ᠠᠶᠢᠯ ᠪᠦᠯᠢ ᠶᠢᠨ ᠠᠭᠠᠷ ᠢ ᠡᠷᠬᠢᠮᠯᠡᠵᠦ ᠶᠠᠪᠤᠪᠠᠯ ᠰᠠᠶ᠋ᠢ ᠦᠷ᠎ᠡ ᠬᠡᠥᠬᠡᠥᠨ ᠮᠠᠨᠢ ᠡᠷᠡᠭᠦᠯ ᠲᠡᠭᠵᠢᠨ ᠦᠰᠦᠨ ᠪᠤᠶᠢᠵᠢᠨ᠎ᠠ ᠭᠡᠳᠡᠭ ᠲᠤ ᠢᠳᠡᠭᠡᠬᠦ ᠶᠤᠰᠤᠳᠠᠢ᠃ ᠠᠳᠡ ᠪᠢ ᠮᠠᠨ ᠤ ᠠᠮᠢᠳᠤᠷᠠᠯ ᠤᠨ ᠤᠷᠴᠢᠨ ᠳᠤ ᠬᠠᠷᠠᠭᠳᠠᠵᠤ ᠪᠠᠶᠢᠭ᠎ᠠ ᠲᠦᠬᠡᠮᠡᠯ ᠠᠰᠠᠭᠤᠳᠠᠯ ᠠᠴᠠ ᠵᠢᠱᠢᠶ᠎ᠡ ᠲᠤᠷᠠᠳᠤᠵᠤ ᠰᠠᠨᠠᠭᠤᠯᠭ᠎ᠠ ᠪᠤᠯᠭᠠᠶ᠎ᠠ᠃           ᠨᠢᠭᠡ᠂ ᠰᠤᠯᠠ ᠢᠳᠡᠭᠡᠨ        ᠤᠳᠤ ᠶᠢᠨ ᠵᠠᠬ᠎ᠠ ᠵᠡᠭᠡᠯᠢ ᠲᠡᠭᠡᠷ᠎ᠡ ᠬᠡᠥᠬᠡᠥᠨ ᠤᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠲᠠᠩᠴᠤ ᠡᠯᠪᠡᠭ ᠪᠤᠯᠵᠠᠢ᠂ ᠡᠨᠡ ᠪᠤᠯ ᠨᠡᠶᠢᠭᠡᠮ ᠤᠨ ᠬᠦᠭᠵᠢᠯᠳᠡ ᠶᠢᠨ ᠭᠠᠪᠢᠶ᠎ᠠ᠃ ᠭᠡᠳᠡᠯ᠎ᠡ ᠬᠡᠥᠬᠡᠥᠨ ᠰᠤᠯᠠ ᠢᠳᠡᠭᠡᠨ ᠶᠡᠭᠡ ᠢᠳᠡᠬᠦ ᠎ ᠨᠢ ᠴᠠᠭ ᠤᠨ ᠬᠤᠭᠤᠯᠠ ᠪᠠᠨ ᠢᠳᠡᠬᠦ ᠦᠭᠡᠢ ᠪᠤᠯᠵᠤ ᠪᠡᠶ᠎ᠡ ᠶᠢᠨ ᠡᠷᠡᠭᠦᠯ ᠮᠡᠨᠳᠦ ᠪᠠ ᠬᠡᠪ ᠴᠢᠨᠠᠷ ᠢ ᠨᠢ ᠶᠡᠭᠡ ᠮᠠᠭᠤ ᠎ ᠪᠠᠷ ᠨᠦᠯᠦᠭᠡᠯᠡᠬᠦ ᠮᠦᠷᠳᠡᠭᠡᠨ ᠠᠮᠠᠷᠬᠠᠨ ᠬᠤᠭᠤᠯᠠ ᠭᠤᠯᠤᠬᠤ ᠭᠡᠮ ᠲᠠᠢ ᠪᠤᠯᠳᠠᠭ᠃ ᠨᠡᠩ ᠠᠶᠤᠯᠳᠠᠢ ᠨᠢ ᠲᠡᠯᠡᠭᠡᠢ ᠳ᠋ᠠᠬᠢᠨ ᠢᠶᠠᠷ ᠢᠶᠠᠨ ᠰᠠᠨᠠᠭ᠎ᠠ ᠵᠤᠪᠠᠵᠤ ᠪᠠᠶᠢᠭ᠎ᠠ ᠠᠷᠪᠠᠨ ᠲᠦᠷᠦᠯ ᠤᠨ ᠬᠤᠭ ᠤᠨ ᠢᠳᠡᠭᠡᠨ ᠶᠠᠭ ᠮᠠᠨ ᠤ ᠬᠡᠥᠬᠡᠥᠨ ᠎ ᠤᠨ ᠡᠳᠦᠷᠵᠢᠨ ᠡᠳ᠋ᠯᠠᠵᠦ ᠪᠠᠶᠢᠭ᠎ᠠ ᠢᠳᠡᠭᠡᠨ ᠤᠮᠳᠠᠭᠠᠨ ᠲᠤᠮᠳᠠ ᠭᠤᠤᠯᠯᠠᠵᠤ ᠪᠠᠶᠢᠨ᠎ᠠ᠃ ᠡᠳᠡᠭᠡᠷ ᠬᠤᠭ ᠤᠨ ᠢᠳᠡᠭᠡᠨ ᠨᠢ ᠬᠡᠥᠬᠡᠥᠨ ᠪᠠᠭᠠᠴᠤᠤᠨ ᠤᠨ ᠡᠷᠡᠭᠦᠯ ᠮᠡᠨᠳᠦ ᠶᠢ ᠬᠦᠨᠳᠦ ᠨᠤᠴᠢᠳᠠᠢ ᠨᠦᠯᠦᠭᠡᠯᠡᠵᠦ ᠪᠡᠶ᠎ᠡ ᠮᠠᠬᠠᠪᠤᠤᠨ ᠤᠨ ᠬᠡᠪ ᠴᠢᠨᠠᠷ ᠢ ᠨᠢ ᠲᠦᠢᠯ ᠤᠨ ᠲᠤᠷᠤᠢ ᠰᠤᠯᠠᠬᠠᠨ ᠪᠤᠯᠭᠠᠵᠦ ᠪᠤᠢ᠃ ᠭᠦᠢᠵᠸᠦ ᠶᠡᠭᠡ ᠰᠤᠷᠭᠠᠭᠤᠯᠢ 2010 ᠤᠨ ᠤ ᠨᠠᠮᠤᠷ ᠤᠨ ᠰᠤᠷᠤᠯᠭ᠎ᠠ ᠡᠬᠢᠯᠡᠬᠦ ᠶᠤᠰᠤᠯᠠᠯ ᠲᠡᠭᠡᠷ᠎ᠡ ᠰᠢᠨ᠎ᠡ ᠤᠶᠤᠳᠠᠥᠨ ᠤᠨ ᠴᠡᠷᠢᠭ ᠤᠨ ᠪᠤᠯᠪᠠᠰᠤᠷᠠᠯ ᠤᠨ ᠲᠠᠶᠢᠴᠢᠯᠠᠯᠳᠠ ᠬᠢᠵᠦ᠂ ᠬᠤᠷᠠᠯ ᠡᠬᠢᠯᠡᠬᠡᠥᠨ ᠬᠠᠭᠠᠰ ᠴᠠᠭ ᠪᠤᠯᠬᠤ ᠬᠢᠷᠢ ᠳᠤ ᠲᠦᠴᠢ ᠭᠠᠷᠤᠢ ᠤᠶᠤᠳᠠᠨ ᠵᠤᠭᠰᠤᠵᠤ ᠲᠡᠶᠢᠯᠬᠦ ᠦᠭᠡᠢ ᠮᠠᠨᠠᠷᠠᠵᠤ ᠤᠶᠢᠴᠢᠭᠰᠠᠨ ᠢ ᠲᠦᠪ ᠲᠧᠯᠸᠢᠰ ᠢᠶᠠᠷ ᠮᠡᠳᠡᠭᠡᠯᠡᠵᠦ ᠪᠠᠶᠢᠭᠰᠠᠨ᠂ ᠡᠭᠦᠨ ᠳᠤ ᠦᠨᠦ ᠶᠢᠨ ᠬᠡᠥᠬᠡᠥᠨ ᠠᠵᠢᠯ ᠬᠦᠳᠡᠯᠮᠦᠷᠢ ᠲᠠᠮᠢᠷ ᠤᠨ ᠬᠦᠳᠡᠯᠭᠡᠭᠡᠨ ᠳᠤ ᠤᠷᠤᠯᠴᠠᠬᠤ ᠨᠢ ᠲᠤᠳᠠᠭᠳᠠᠵᠤ ᠪᠠᠶᠢᠬᠤ ᠠᠴᠠ ᠭᠠᠳᠠᠨ᠎ᠠ ᠰᠤᠯᠠ ᠢᠳᠡᠭᠡᠨ ᠶᠡᠭᠡ ᠢᠳᠡᠵᠦ ᠪᠠᠶᠢᠬᠤ ᠲᠠᠢ ᠰᠢᠭᠤᠤᠨ ᠬᠤᠯᠪᠤᠭ᠎ᠠ ᠲᠠᠢ ᠶᠤᠮ᠃ ᠰᠤᠯᠠ ᠢᠳᠡᠬᠡᠨ ᠨᠢ ᠬᠡᠦᠬᠡᠳ ᠎ ᠤᠨ ᠡᠷᠡᠬᠦᠯ ᠮᠡᠨᠳᠤ ᠶᠢ ᠨᠦᠯᠦᠬᠡᠯᠡᠵᠦ ᠪᠠᠶᠢᠭ᠎ᠠ ᠬᠠᠮᠤᠭ ᠤᠨ ᠬᠡᠴᠡᠬᠦᠦ ᠨᠡᠶᠢᠬᠡᠮ ᠤᠨ ᠠᠰᠠᠭᠤᠳᠠᠯ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠢᠯᠠᠩᠭᠤᠶ᠎ᠡ ᠭᠠᠭᠴᠠ ᠠᠰᠢᠭ ᠤᠨ ᠬᠤᠶᠢᠨ᠎ᠠ ᠠᠴᠠ ᠨᠢᠳᠦ ᠤᠯᠠᠶᠢᠵᠤ᠂ ᠬᠦᠮᠦᠨ ᠮᠦᠰᠦ ᠪᠠᠨ ᠭᠡᠭᠡᠭᠰᠡᠨ ᠮᠠᠶᠢᠮᠠᠶᠢᠴᠢᠨ ᠬᠤᠳᠠᠯᠳᠤᠭᠠᠴᠢᠨ ᠨᠠᠷ ᠢᠳᠡᠬᠡᠨ ᠤᠮᠳᠠᠭᠠᠨ ᠳᠤ ᠶᠠᠩᠵᠦ ᠪᠦᠷᠢ ᠶᠢᠨ ᠬᠤᠤᠷᠳᠤ ᠡᠳ᠋ ᠢ ᠬᠤᠯᠢᠵᠦ᠂ ᠨᠢᠯᠬ᠎ᠠ ᠬᠡᠦᠬᠡᠳ ᠤᠨ ᠰᠦᠨ ᠲᠠᠯᠬ᠎ᠠ ᠠᠴᠠ ᠨᠠᠰᠤᠳᠠᠨ ᠡᠪᠡᠥᠡᠴᠢᠳᠡᠨ ᠳᠤ ᠵᠤᠷᠢᠭᠤᠯᠤᠭᠰᠠᠨ ᠰᠢᠮ᠎ᠡ ᠲᠡᠵᠢᠭᠡᠯ ᠤᠨ ᠵᠦᠢᠯ᠂ ᠡᠮ ᠲᠠᠩ ᠳᠤ ᠬᠦᠷᠳᠡᠯ᠎ᠡ ᠬᠠᠭᠤᠷᠮᠠᠭ ᠶᠠᠭᠤᠮ᠎ᠠ ᠦᠢᠯᠡᠥᠡᠪᠦᠷᠢᠯᠡᠬᠦ ᠪᠤᠯᠵᠠᠢ᠃ ᠬᠦᠳᠡᠭᠡ ᠵᠤᠳ ᠭᠠᠮᠰᠢᠭ ᠎ ᠲᠤ ᠦᠬᠦᠭᠰᠠᠨ ᠮᠠᠯ ᠠᠳᠤᠭᠤᠰᠤᠨ ᠤ ᠦᠬᠦᠳᠡᠯ ᠵᠤᠪᠠᠯᠭ᠎ᠠ ᠶᠢ ᠲᠡᠬᠦᠬᠦ ᠪᠤᠶᠤ ᠬᠢᠮᠳᠠ ᠦᠨ᠎ᠡ ᠪᠠᠷ ᠬᠤᠳᠠᠯᠳᠣᠨ ᠠᠪᠴᠦ ᠪᠠᠶᠢᠭ᠎ᠠ ᠨᠢ ᠶᠠᠭᠤ ᠬᠢᠵᠦ ᠪᠠᠶᠢᠬᠤ ᠪᠤᠢ︖ ᠪᠦᠷ ᠯᠡ ᠬᠤᠭᠤᠯᠠᠨ ᠭᠡᠷ ᠲᠤ ᠵᠠᠷᠤᠬᠤ ᠪᠤᠶᠤ ᠬᠤᠭ ᠤᠨ ᠢᠳᠡᠬᠡᠨ ᠬᠢᠵᠦ ᠪᠠᠶᠢᠭ᠎ᠠ᠃ ᠤᠬᠢᠶᠠᠳᠠᠰᠤᠨ ᠲᠤᠰᠤ ᠭᠡᠵᠦ ᠪᠦᠷ ᠠᠶᠤᠯ ᠤᠨ ᠶᠠᠭᠤᠮ᠎ᠠ ᠶᠢ ᠵᠡᠭᠡᠯᠢ ᠶᠢᠨ ᠰᠢᠷᠠᠮᠠᠯ ᠡᠨᠡ ᠲᠡᠷᠡ ᠬᠢᠬᠦ ᠳᠤ ᠬᠡᠷᠡᠭᠯᠡᠵᠦ ᠪᠠᠶᠢᠨ᠎ᠠ᠃ ᠡᠳᠡᠭᠡᠷ ᠠᠶᠤᠯᠳᠠᠢ ᠬᠤᠭ ᠤᠨ ᠢᠳᠡᠭᠡᠨ ᠨᠢ ᠬᠡᠥᠬᠡᠥᠨ ᠪᠠᠭᠠᠴᠤᠤᠨ ᠤᠨ ᠡᠷᠡᠭᠦᠯ ᠮᠡᠨᠳᠦ ᠶᠢ ᠶᠡᠬᠡᠪᠡᠷ ᠨᠦᠯᠦᠭᠡᠯᠡᠵᠦ᠂ ᠴᠢᠰᠣ ᠴᠠᠶᠢᠬᠤ ᠡᠪᠡᠳᠴᠢᠨ᠂ ᠬᠠᠷᠰᠢᠬᠤ ᠴᠢᠨᠠᠷᠲᠠᠢ ᠪᠤᠷᠤ ᠲᠤᠯᠪᠤ ᠮᠡᠳᠦ ᠴᠢᠰᠤᠨ ᠤ ᠬᠤᠤᠷᠳᠠᠯ ᠤᠨ ᠠᠶᠤᠯᠳᠤ ᠡᠪᠡᠥᠡᠴᠢᠨ ᠬᠡᠥᠬᠡᠥᠨ ᠤᠨ ᠲᠤᠮᠳᠠ ᠢᠯᠡᠷᠡᠬᠦ ᠪᠤᠯᠵᠠᠢ᠃ ᠵᠠᠯᠠᠭᠤᠴᠤᠤᠨ ᠪᠠᠭᠠᠴᠤᠤᠯ ᠰᠢᠬᠢᠷ ᠰᠢᠵᠢᠩ ᠡᠪᠡᠥᠴᠢᠨ᠂ ᠰᠢᠬᠡᠰᠤᠨ ᠵᠠᠮ ᠤᠨ ᠬᠤᠤᠷᠳᠠᠯ ᠤᠯᠵᠤ᠂ ᠬᠡᠷ ᠪᠦᠯᠢ ᠪᠤᠯᠤᠨ ᠨᠡᠶᠢᠬᠡᠮ ᠎ ᠳᠤ ᠬᠦᠨᠳᠤ ᠶᠡᠭᠡ ᠲᠠᠷᠤᠭᠠᠰᠤ ᠠᠪᠴᠢᠷᠠᠵᠦ ᠪᠠᠶᠢᠨ᠎ᠠ᠃       ᠡᠷᠡᠭᠦᠯ ᠪᠡᠶ᠎ᠡ ᠠᠴᠠ ᠰᠠᠷᠠᠭᠤᠯ ᠤᠬᠠᠭᠠᠨ ᠭᠡᠳᠡᠭ᠃ ᠮᠠᠨ ᠤ ᠬᠡᠥᠬᠡᠥᠨ ᠡᠷᠡᠭᠦᠯ ᠴᠢᠬᠢᠷᠠᠭ ᠪᠡᠶ᠎ᠡ ᠮᠠᠬᠠᠪᠤᠤᠨ ᠲᠠᠢ ᠪᠠᠶᠢᠵᠤ ᠴᠢᠳᠠᠪᠠᠯ ᠰᠠᠶ᠋ᠢ ᠤᠬᠠᠭᠠᠨ ᠰᠠᠨᠠᠭ᠎ᠠ ᠨᠢ ᠨᠡᠩ ᠬᠤᠷᠴᠠ ᠰᠡᠷᠭᠡᠭ ᠴᠤᠭ ᠵᠢᠪᠬᠤᠭ᠎ᠠ ᠎ ᠲᠠᠢ ᠪᠠᠶᠢᠵᠤ ᠴᠢᠳᠠᠨ᠎ᠠ᠃ ᠮᠠᠨᠤᠰ ᠬᠡᠦᠬᠡᠳ ᠤᠨ ᠢᠶᠠᠨ ᠬᠡᠪ ᠤᠨ ᠡᠷᠡᠬᠦᠯ ᠴᠢᠬᠢᠷᠠᠭ ᠢ ᠪᠠᠳᠣᠯᠠᠵᠦ ᠲᠡᠶᠢᠯᠬᠦ ᠦᠬᠡᠢ ᠪᠠᠶᠢᠭᠠᠳ ᠢᠷᠡᠬᠡᠳᠦᠢ ᠳᠤ ᠲᠡᠳᠡᠨ ᠢ ᠪᠠᠰᠠ ᠶᠠᠭᠤᠨ ᠤ ᠬᠤᠰᠢᠭᠤ ᠲᠠᠷᠤᠭ᠎ᠠ᠂ ᠡᠷᠳᠡᠮᠳᠡᠨ᠂ ᠢᠨᠵᠢᠨᠧᠷ ᠪᠤᠯᠭᠠᠬᠤ ᠬᠡᠵᠦ ᠶᠡᠭᠡ ᠶᠢ ᠰᠠᠨᠠᠭᠠᠳ ᠴᠦ ᠶᠠᠭᠤ ᠬᠢᠬᠦ ᠪᠤᠢ︖ ᠰᠤᠯᠠ ᠢᠳᠡᠬᠡᠨ ᠤ ᠬᠤᠤᠷ ᠢ ᠡᠷᠳᠡ ᠠᠴᠠ ᠰᠡᠷᠡᠮᠵᠢᠯᠡᠵᠦ᠂ ᠬᠡᠦᠬᠡᠳ ᠲᠤ ᠪᠠᠨ ᠠᠩᠬᠠᠷᠤᠭᠤᠯᠵᠦ᠂ ᠬᠤᠤᠷ ᠨᠦᠯᠦᠭᠡ ᠶᠢ ᠨᠢ ᠬᠦᠢᠴᠡᠳ ᠲᠠᠨᠢᠭᠤᠯᠬᠤ ᠶᠢᠨ ᠬᠠᠮᠳᠤ ᠠᠷᠢᠭᠤᠨ ᠴᠡᠪᠡᠷ ᠢᠳᠡᠭᠡᠨ ᠤᠮᠳᠠᠭᠠᠨ ᠤ ᠪᠤᠷᠤᠭᠵᠢᠭᠤᠨ ᠵᠠᠩᠰᠢᠯ ᠳᠤ ᠬᠡᠪᠰᠢᠭᠦᠯᠬᠦ ᠪᠤᠯ ᠬᠡᠷ ᠤᠨ ᠠᠬᠠᠮᠠᠳ ᠤᠨ ᠴᠢᠬᠤᠯᠠ ᠠᠵᠢᠯ ᠪᠤᠯᠤᠭᠠᠳ ᠪᠠᠶᠢᠨ᠎ᠠ᠃       ᠵᠠᠷᠢᠮ ᠬᠡᠷ ᠤᠨ ᠠᠬᠠᠮᠠᠳ ᠪᠠᠯᠭᠠᠰᠤᠨ ᠳᠤ ᠬᠡᠷ ᠲᠦᠷᠢᠶᠡᠰᠤᠯᠡᠵᠦ ᠬᠡᠦᠬᠡᠳ ᠢᠶᠠᠨ ᠬᠠᠷᠠᠬᠤ ᠎ ᠪᠠᠷ ᠬᠦᠳᠡᠭᠡ ᠠᠴᠠ ᠲᠠᠭᠠᠵᠦ ᠢᠷᠡᠬᠡᠳ ᠬᠢᠳᠡᠯ ᠦᠬᠡᠶᠢᠳᠡᠵᠦ᠂ ᠡᠳᠦᠷᠵᠢᠨ ᠨᠡᠶᠢᠷ ᠬᠤᠷᠢᠮ ᠤᠨ ᠰᠢᠷᠡᠭᠡ᠂ ᠮᠠᠵᠢᠶᠠᠩ ᠎ ᠤᠨ ᠰᠢᠷᠡᠭᠡ ᠲᠠᠢ ᠨᠦᠬᠦᠷᠯᠡᠭᠰᠠᠨ ᠠᠴᠠ ᠡᠴᠦᠰ ᠲᠤ ᠪᠠᠨ ᠨᠠᠭᠠᠳᠣᠮ ᠳᠤ ᠰᠢᠨᠣᠯ ᠲᠠᠢ ᠪᠤᠯᠵᠦ᠂ ᠬᠡᠦᠬᠡᠳ ᠨᠢ ᠢᠷᠡᠬᠦ ᠳᠤ ᠬᠤᠭᠤᠯᠠ ᠬᠤᠰᠢ ᠴᠦ ᠬᠢᠬᠦ ᠦᠬᠡᠢ᠂ ᠬᠠᠷᠢᠨ ᠮᠠᠵᠢᠶᠠᠩ ᠤᠬᠢᠶᠠᠵᠦ ᠪᠤᠬᠢᠷᠳᠤᠭᠰᠠᠨ ᠭᠠᠷ ᠢᠶᠠᠷ ᠢᠶᠠᠨ ᠭᠭᠢᠷ ᠲᠤ ᠨᠤᠬᠤᠴᠢᠭᠳᠠᠭᠰᠠᠨ ᠬᠤᠶᠠᠷ ᠵᠤᠭᠤᠰ ᠬᠠᠶᠠᠵᠦ ︽ᠮᠠᠢ︕ ᠠᠪᠠᠴᠢᠭᠠᠳ ᠲᠦᠭᠦᠮ ᠭᠤᠯᠢᠷ ᠠᠪᠤᠭᠠᠥᠨ ᠢᠳᠡᠴᠢᠭᠡ︾ ᠬᠡᠳᠡᠭ᠃ ᠡᠨᠡ ᠴᠢᠨᠢ ᠬᠡᠦᠬᠡᠳ ᠢᠶᠠᠨ ᠬᠤᠭ ᠤᠨ ᠤᠪᠤᠭ᠎ᠠ ᠵᠦᠭ ᠠᠯᠪᠠ ᠪᠠᠷ ᠲᠦᠯᠬᠢᠵᠦ ᠪᠠᠶᠢᠭ᠎ᠠ ᠬᠡᠷᠡᠭ ᠪᠢᠰᠢ ᠤᠤ︖ ᠢᠩᠭᠢᠵᠦ ᠲᠦᠯᠭᠢᠭᠰᠡᠨ ᠠᠴᠠ ᠪᠤᠯᠵᠦ ᠠᠳᠡᠯ ᠬᠡᠨᠡᠳᠡᠯ ᠭᠠᠷᠤᠭᠰᠠᠨ ᠵᠢᠱᠢᠶ᠎ᠡ ᠪᠠᠭ᠎ᠠ ᠪᠤᠰᠤ ᠰᠢᠦ︕ ᠬᠡᠦᠬᠡᠳ ᠲᠤ ᠬᠤᠭᠤᠯᠠ ᠬᠢᠬᠦ ᠴᠠᠭ ᠲᠤ ᠪᠠᠨ ᠬᠤᠭᠤᠯᠠ ᠶᠢ ᠨᠢ ᠬᠢᠵᠦ ᠲᠤᠷ᠎ᠠ ᠲᠠᠢ ᠵᠦᠢᠯ ᠢ ᠨᠢ ᠴᠠᠳᠳᠠᠯ᠎ᠠ ᠢᠳᠡᠬᠦᠯᠵᠦ ᠬᠡᠵᠢᠶᠡᠳᠡ ᠬᠡᠳᠡᠰᠤ ᠴᠠᠳᠬᠤᠯᠠᠩ᠂ ᠰᠡᠳᠬᠢᠯ ᠦᠶᠦᠭ ᠶᠠᠪᠤᠭᠤᠯᠬᠤ ᠪᠣᠯ ᠬᠡᠦᠬᠡᠳ ᠤᠨ ᠦᠰᠦᠨ ᠪᠤᠶᠢᠵᠢᠯᠳᠠ ᠳᠤ ᠬᠤᠯᠪᠤᠭᠳᠠᠬᠤ ᠶᠡᠭᠡ ᠶᠠᠪᠤᠳᠠᠯ ᠮᠦᠷᠳᠡᠬᠡᠨ ᠬᠡᠷ ᠪᠦᠯᠢ ᠶᠢᠨ ᠬᠢᠨ ᠤ ᠬᠠᠷᠢᠭᠤᠴᠠᠯᠭ᠎ᠠ ᠪᠤᠯᠬᠤ ᠶᠤᠮ᠃ ᠡᠬᠦᠨ ᠤ ᠡᠰᠡᠷᠬᠦ ᠪᠠᠷ ᠵᠠᠷᠢᠮ ᠭᠡᠷ ᠤᠨ ᠠᠬᠠᠮᠠᠥᠨ ᠬᠤᠭᠤᠯᠠᠨ ᠤ ᠴᠠᠭ ᠪᠤᠯᠤᠮᠠᠭᠴᠠ ᠬᠡᠥᠬᠡᠥᠨ ᠤᠨ ᠎ ᠢᠶᠠᠨ ᠬᠤᠶᠢᠨ᠎ᠠ ᠠᠴᠠ ᠠᠶᠠᠭ᠎ᠠ ᠬᠠᠯᠪᠠᠭ᠎ᠠ ᠪᠠᠷᠢᠭᠠᠥᠨ ᠬᠤᠭᠤᠯᠠ ᠢᠳᠡᠭᠦᠯᠦᠨ᠎ᠡ ᠬᠡᠮᠡᠨ ᠲᠠᠭᠤᠵᠤ ᠪᠠᠶᠢᠳᠠᠭ᠂ ᠶᠡᠷᠦ ᠎ ᠶᠢᠨ ᠴᠠᠭ ᠲᠤ ᠰᠤᠯᠠ ᠢᠳᠡᠭᠡᠨ ᠢ ᠨᠢ ᠬᠢᠵᠠᠭᠠᠷᠯᠠᠭᠰᠠᠨ ᠦᠭᠡᠢ ᠪᠠᠶᠢᠵᠤ ᠬᠤᠭᠤᠯᠠᠨ ᠤ ᠴᠠᠭ ᠪᠤᠯᠬᠤ ᠳᠤ ᠦᠯᠦᠰᠦᠭᠰᠡᠨ ᠦᠭᠡᠢ ᠬᠡᠥᠬᠡᠥᠨ ᠲᠤ ᠠᠯᠪᠠ ᠪᠠᠷ ᠢᠳᠡᠭᠦᠯᠦᠨ᠎ᠡ ᠬᠡᠮᠡᠨ ᠲᠠᠮᠤᠯᠠᠵᠤ ᠪᠠᠶᠢᠭᠰᠠᠭᠠᠷ ᠠᠮᠠᠷᠬᠠᠨ ᠬᠤᠭᠤᠯᠠ ᠭᠤᠯᠤᠬᠤ ᠭᠡᠮ ᠲᠠᠢ ᠪᠤᠯᠭᠠᠵᠤ ᠪᠠᠶᠢᠨ᠎ᠠ᠃       ᠲᠡᠶᠢᠮᠦ ᠠᠴᠠ ᠬᠡᠥᠬᠡᠥᠨ ᠲᠤ ᠪᠠᠨ ᠴᠠᠭ ᠤᠨ ᠬᠤᠭᠤᠯᠠ ᠶᠢ ᠴᠠᠭ ᠲᠤ ᠨᠢ ᠢᠳᠡᠭᠦᠯᠵᠦ ᠰᠤᠷᠭᠠᠶ᠎ᠠ᠂ ᠴᠠᠭ ᠤᠨ ᠬᠤᠭᠤᠯᠠᠨ ᠠᠴᠠ ᠭᠠᠳᠠᠭᠤᠷ ᠰᠤᠯᠠ ᠢᠳᠡᠭᠡᠨ ᠪᠢᠳᠡᠭᠡᠢ ᠢᠳᠡᠭᠦᠯᠵᠦ ᠮᠠᠭᠤ ᠰᠤᠷᠭᠠᠶ᠎ᠠ᠂ ᠠᠶᠢᠯ ᠤᠨ ᠬᠡᠥᠬᠡᠥᠨ ᠲᠤ ᠲᠡᠯ ᠰᠤᠯᠠ ᠢᠳᠡᠬᠦ ᠢᠳᠡᠭᠡᠨ ᠤᠮᠳᠠᠭᠠᠨ ᠤ ᠪᠡᠯᠡᠭ ᠪᠢᠳᠡᠭᠡᠢ ᠦᠭᠬᠦᠶ᠎ᠡ᠂ ᠵᠢᠯ ᠴᠠᠭᠠᠨ ᠰᠠᠷ᠎ᠠ ᠬᠡᠥᠬᠡᠥᠨ ᠲᠤ ᠨᠤᠮ ᠤᠨ ᠪᠡᠯᠡᠭ ᠭᠠᠷᠳᠠᠭᠤᠯᠬᠤ ᠪᠤᠯᠪᠠᠰᠤᠨ ᠰᠤᠷᠳᠠᠯ ᠢ ᠲᠡᠯᠭᠡᠷᠡᠭᠦᠯᠦᠶ᠎ᠠ︕ ᠪᠢᠳᠡ ᠪᠦᠬᠦᠨ ᠬᠤᠭ ᠤᠨ ᠢᠳᠡᠭᠡᠨ ᠠᠴᠠ ᠬᠤᠯᠠᠬᠠᠨ ᠪᠠᠶᠢᠶ᠎ᠠ᠂ ᠬᠤᠭᠤᠯᠠᠨ ᠭᠡᠷ ᠲᠤ ᠲᠤᠳᠠᠭᠤ ᠤᠷᠤᠶ᠎ᠠ᠂ ᠭᠡᠷ ᠤᠨ ᠬᠤᠭᠤᠯᠠ ᠭᠠᠷ ᠤᠨ ᠬᠤᠭᠤᠯᠠ ᠰᠢᠮ᠎ᠡ ᠱᠦᠯᠦ ᠲᠠᠢ ᠮᠤᠩᠭᠤᠯ ᠬᠤᠭᠤᠯᠠ ᠪᠠᠨ ᠡᠷᠬᠢᠮᠯᠡᠵᠦ ᠶᠠᠪᠤᠶ᠎ᠠ︕           ᠬᠤᠶᠠᠷ᠂ ᠰᠤᠯᠠ ᠵᠤᠭᠤᠰ        ᠬᠡᠥᠬᠡᠥᠨ ᠲᠤ ᠰᠤᠯᠠ ᠵᠤᠭᠤᠰ ᠬᠡᠳᠦᠷᠬᠡᠢ ᠵᠠᠷᠤᠭᠤᠯᠬᠤ ᠪᠤᠯ ᠬᠡᠥᠬᠡᠥᠨ ᠤᠨ ᠵᠠᠩ ᠰᠤᠷᠳᠠᠯ ᠎ ᠤᠨ ᠬᠡᠪᠰᠢᠯ᠂ ᠡᠷᠡᠭᠦᠯ ᠮᠡᠨᠳᠦ᠂ ᠠᠵᠢᠯ ᠰᠤᠷᠤᠯᠭ᠎ᠠ ᠳᠤ ᠴᠦᠮ ᠨᠠᠵᠠᠭᠠᠢ ᠨᠦᠯᠦᠬᠡ ᠦᠵᠡᠭᠦᠯᠵᠦ ᠪᠠᠶᠢᠭ᠎ᠠ ᠶᠢ ᠭᠡᠷ ᠎ ᠤᠨ ᠠᠬᠠᠮᠠᠥᠨ ᠠᠩᠬᠠᠷᠤᠯ ᠳᠤ ᠪᠠᠨ ᠠᠪᠤᠯᠳᠠᠢ ᠪᠠᠶᠢᠨ᠎ᠠ᠃ ᠦᠩᠭᠡᠷᠡᠭᠰᠡᠨ ᠳᠤ ᠰᠠᠳᠤᠨ ᠲᠦᠷᠦᠯ ᠳᠤ ᠪᠠᠨ ᠠᠶᠢᠯᠴᠢᠯᠠᠬᠤ ᠪᠤᠶᠤ ᠠᠶᠢᠯ ᠭᠡᠷ ᠲᠤ ᠨᠢ ᠬᠡᠥᠬᠡᠥᠨ ᠤᠷᠤᠵᠤ ᠢᠷᠡᠪᠡᠯ ᠪᠤᠤᠪᠤ ᠰᠢᠬᠢᠷ ᠦᠭᠳᠡᠭ ᠰᠠᠶᠢᠬᠠᠨ ᠵᠠᠩᠰᠢᠯ ᠎ ᠲᠠᠢ ᠪᠠᠶᠢᠭᠰᠠᠨ᠃ ᠤᠳᠤ ᠪᠦᠷ ᠮᠦᠩᠬᠦ ᠦᠭᠬᠦ ᠪᠤᠯᠵᠠᠢ᠂ ᠴᠠᠭᠠᠨ ᠰᠠᠷ᠎ᠠ ᠪᠠᠰᠠ ᠲᠠᠷᠢᠶᠠᠴᠢᠨ ᠤ ᠰᠤᠶᠤᠯ ᠠᠴᠠ ᠢᠷᠡᠯ ᠲᠠᠢ ︽ᠨᠠᠰᠤ ᠲᠠᠷᠤᠬᠤ︾ ᠮᠦᠩᠬᠦ ᠭᠡᠭᠴᠢ ᠶᠢ ᠦᠭᠳᠡᠭ ᠪᠤᠯᠵᠤ ᠪᠠᠶᠢᠨ᠎ᠠ᠃ ᠡᠳᠡᠭᠡᠷ ᠨᠢ ᠬᠡᠥᠬᠡᠥᠨ ᠢ ᠵᠤᠭᠤᠰ ᠮᠦᠩᠬᠦᠨ ᠤ ᠲᠤᠬᠠᠢ ᠡᠷᠡᠭᠦᠯ ᠪᠤᠰᠤ ᠤᠶᠢᠯᠠᠭᠠᠯᠳᠠ ᠲᠠᠢ ᠪᠤᠯᠭᠠᠨ᠎ᠠ᠃ ᠬᠡᠥᠬᠡᠥᠨ ᠬᠡᠳᠦ ᠡᠷᠳᠡ ᠵᠤᠭᠤᠰ ᠮᠦᠩᠬᠦᠨ ᠳᠤ ᠬᠡᠳᠦᠷᠬᠡᠢ ᠮᠠᠳᠡᠷᠡᠮᠡᠳᠡᠬᠡᠢ ᠪᠤᠯᠵᠤ᠂ ᠲᠠᠪᠤ ᠵᠢᠷᠭᠤᠭᠠᠨ ᠨᠠᠰᠤᠳᠠᠢ ᠴᠡᠴᠡᠷᠯᠢᠭ ᠤᠨ ᠬᠡᠥᠬᠡᠥᠨ ᠬᠦᠷᠳᠡᠯ᠎ᠡ ᠬᠤᠭᠤᠷᠤᠨᠳᠤ ᠪᠠᠨ ᠵᠤᠭᠤᠰ ᠮᠦᠩᠬᠦᠨ ᠤ ᠪᠡᠯᠡᠭ ᠦᠭᠴᠦ ᠪᠠᠶᠢᠨ᠎ᠠ ᠬᠡᠮᠡᠨ ᠨᠠᠭᠠᠳᠬᠤ ᠪᠤᠯᠵᠠᠢ᠃ ᠵᠠᠷᠢᠮ ᠡᠷᠬᠡ ᠲᠤᠰᠢᠶᠠᠯᠳᠠᠨ ᠤ ᠬᠡᠥᠬᠡᠥᠨ ᠵᠤᠭᠤᠰ ᠮᠦᠩᠬᠦᠨ ᠤ ᠪᠡᠯᠡᠭ ᠲᠤᠰᠤᠭᠰᠠᠭᠠᠷ ᠪᠠᠶᠢᠵᠤ᠂ ᠵᠤᠭᠤᠰ ᠮᠦᠩᠬᠦ ᠬᠡᠳᠡᠭ ᠢ ᠵᠦᠳᠡᠷᠡᠬᠦ ᠦᠭᠡᠢ ᠪᠠᠷ ᠵᠦᠭᠡᠷ ᠤᠯᠵᠤ ᠪᠤᠯᠬᠤ ᠮᠡᠳᠦ ᠨᠠᠵᠠᠭᠠᠢ ᠤᠶᠢᠯᠠᠭᠠᠯᠳᠠ ᠲᠠᠢ ᠪᠤᠯᠵᠤ᠂ ᠮᠦᠩᠬᠦ ᠵᠤᠭᠤᠰ ᠢ ᠤᠰᠤ ᠴᠠᠰᠤ ᠰᠢᠭ᠋ ᠵᠠᠷᠤᠳᠠᠭ ᠲᠠᠩᠬᠠᠢ ᠰᠤᠷᠳᠠᠯ ᠲᠠᠢ ᠪᠤᠯᠵᠤ ᠪᠠᠶᠢᠨ᠎ᠠ᠃ ᠵᠠᠩ ᠰᠤᠷᠳᠠᠯ ᠤᠨ ᠬᠤᠪᠢ ᠳᠤ ᠰᠤᠯᠠ ᠮᠦᠩᠬᠦ ᠬᠡᠳᠦ ᠲᠤᠷ᠎ᠠ ᠲᠠᠪᠠ ᠪᠠᠷ ᠨᠢ ᠵᠠᠷᠤᠭᠤᠯᠬᠤ ᠨᠢ ᠭᠠᠷ ᠰᠤᠯᠠ ᠬᠦᠮᠦᠨ ᠪᠤᠯᠭᠠᠵᠦ᠂ ᠬᠠᠷᠮᠠᠨ ᠳᠤ ᠨᠢ ᠮᠦᠩᠬᠦ ᠤᠷᠤᠮᠠᠭᠴᠠ ᠬᠦᠪᠢᠭᠡᠥᠨ ᠬᠠᠶᠠᠴᠢᠬᠠᠳᠠᠭ ᠰᠤᠯᠠ ᠵᠠᠳᠠᠭᠠᠢ ᠵᠠᠩᠰᠢᠯ ᠬᠡᠪᠰᠢᠵᠦ᠂ ᠬᠤᠵᠢᠮ ᠨᠢᠭᠡ ᠨᠠᠰᠤᠨ ᠳᠤ ᠪᠠᠨ ᠮᠦᠩᠬᠦ ᠵᠤᠭᠤᠰ ᠢᠶᠠᠷ ᠭᠠᠴᠢᠭᠳᠠᠬᠤ ᠮᠠᠭᠤ ᠲᠠᠪᠢᠯᠠᠩ ᠲᠠᠢ ᠪᠤᠯᠵᠤ ᠮᠡᠳᠡᠨ᠎ᠡ᠃ ᠪᠠᠭ᠎ᠠ ᠠᠴᠠ ᠪᠠᠨ ᠮᠦᠩᠬᠦ ᠶᠢ ᠴᠡᠪᠡᠷ ᠵᠠᠷᠤᠵᠤ ᠰᠤᠷᠤᠭᠰᠠᠨ ᠬᠡᠥᠬᠡᠥᠨ ᠨᠢᠭᠡ ᠨᠠᠰᠤᠨ ᠳᠤ ᠪᠠᠨ ᠮᠦᠩᠬᠦ ᠲᠤᠳᠠᠬᠤ ᠦᠭᠡᠢ ᠪᠤᠯᠤᠨ᠎ᠠ᠂ ᠡᠨᠡ ᠪᠤᠯ ᠪᠦᠷ ᠰᠡᠥᠡᠬᠢᠴᠡ ᠠᠴᠠ ᠪᠤᠯᠵᠤ ᠪᠠᠶᠢᠭ᠎ᠠ ᠠᠰᠠᠭᠤᠳᠠᠯ᠃ ᠮᠦᠩᠬᠦ ᠵᠠᠷᠤᠬᠤ ᠳᠤ ᠰᠢᠨᠤᠯ ᠲᠠᠢ ᠪᠤᠯᠤᠭᠰᠠᠨ ᠬᠡᠥᠬᠡᠥᠨ ᠎ ᠤᠨ ᠪᠤᠳᠤᠯ ᠳᠤ ᠡᠳᠦᠷᠵᠢᠨ ᠶᠠᠭᠠᠬᠢᠵᠤ ᠮᠦᠩᠬᠦ ᠤᠯᠵᠤ ᠵᠠᠷᠤᠬᠤ ᠲᠤᠬᠠᠢ ᠰᠡᠥᠡᠬᠢᠴᠡ ᠤᠷᠤᠬᠤ ᠠᠴᠠ ᠪᠢᠰᠢ ᠶᠠᠭᠤ ᠬᠢᠵᠦ ᠶᠠᠭᠤ ᠪᠦᠳᠦᠬᠡᠬᠦ ᠲᠤᠬᠠᠢ ᠰᠡᠥᠡᠬᠢᠴᠡ ᠨᠢ ᠲᠦᠵᠢᠷᠡᠭᠰᠡᠨ ᠪᠠᠶᠢᠳᠠᠭ᠃ ᠲᠡᠶᠢᠮᠦ ᠠᠴᠠ ᠬᠡᠥᠬᠡᠥᠨ ᠲᠤ ᠪᠠᠨ ᠮᠦᠩᠬᠦ ᠲᠤᠷ᠎ᠠ ᠪᠠᠷ ᠵᠠᠷᠤᠭᠤᠯᠵᠤ ᠮᠦᠩᠬᠦᠨ ᠳᠤ ᠰᠤᠯᠠ ᠵᠠᠳᠠᠭᠠᠢ ᠵᠠᠩᠰᠢᠯ ᠲᠠᠢ ᠪᠤᠯᠭᠠᠪᠠᠯ ᠬᠡᠥᠬᠡᠥᠨ ᠲᠤ ᠪᠠᠨ ᠨᠢᠭᠦᠯ ᠬᠢᠵᠦ ᠪᠠᠶᠢᠨ᠎ᠠ᠂ ᠡᠬᠦᠨ ᠤ ᠡᠰᠡᠷᠬᠦ ᠪᠠᠷ ᠪᠤᠯ ᠪᠤᠶᠠᠨ ᠬᠢᠵᠦ ᠪᠠᠶᠢᠨ᠎ᠠ ᠭᠡᠵᠦ ᠪᠤᠳᠤᠭᠠᠷᠠᠢ᠃ ᠰᠤᠯᠠ ᠮᠦᠩᠬᠦ ᠶᠡᠭᠡ ᠵᠠᠷᠤᠳᠠᠭ ᠬᠡᠥᠬᠡᠥᠨ ᠤᠨ ᠤᠴᠢᠷ ᠶᠠᠪᠤᠳᠠᠯ ᠠᠷᠪᠢᠳᠴᠦ᠂ ᠭᠠᠳᠠᠭᠤᠷ ᠲᠤᠳᠤᠭᠤᠷ ᠨᠠᠭᠠᠳᠤᠮ ᠲᠤᠭᠯᠠᠭᠠᠮ ᠤᠨ ᠭᠠᠵᠠᠷ ᠡᠷᠬᠢᠴᠡᠬᠦ ᠨᠢ ᠤᠯᠠᠨ ᠪᠤᠯᠵᠤ ᠬᠢᠴᠢᠶᠡᠯ ᠰᠤᠷᠤᠯᠭ᠎ᠠ ᠠᠴᠠ ᠰᠠᠨᠠᠭ᠎ᠠ ᠰᠡᠥᠡᠬᠢᠯ ᠨᠢ ᠬᠤᠯᠠᠳᠠᠵᠤ᠂ ᠠᠰᠠᠭᠤᠳᠠᠯ ᠎ ᠲᠠᠢ ᠬᠡᠥᠬᠡᠥᠨ ᠪᠤᠯᠬᠤ ᠳᠤ ᠤᠶᠢᠷᠠᠬᠠᠨ᠃ ᠬᠡᠥᠬᠡᠥᠨ ᠤᠨ ᠬᠠᠷᠮᠠᠨ ᠳᠤ ᠰᠤᠯᠠ ᠮᠦᠩᠬᠦ ᠶᠡᠭᠡ ᠪᠠᠶᠢᠨ᠎ᠠ ᠭᠡᠳᠡᠭ ᠴᠢᠨᠢ ᠬᠡᠥᠬᠡᠥᠨ ᠤᠨ ᠰᠡᠥᠡᠬᠢᠯ ᠳᠤ ︽ᠴᠢᠥᠡᠭᠦᠷ︾ ᠪᠠᠶᠢᠨ᠎ᠠ ᠭᠡᠰᠡᠨ ᠦᠭᠡ᠃ ᠬᠢᠴᠢᠶᠡᠯ ᠲᠡᠭᠡᠷ᠎ᠡ ᠴᠦ ᠰᠡᠥᠡᠬᠢᠯ ᠲᠦᠪᠯᠡᠷᠡᠬᠦ ᠦᠭᠡᠢ ᠪᠠᠶᠢᠵᠤ ᠬᠢᠴᠢᠶᠡᠯ ᠪᠠᠭᠤᠪᠠᠯ ᠶᠠᠭᠤ ᠠᠪᠴᠤ ᠢᠳᠡᠬᠦ ᠶᠠᠮᠠᠷ ᠭᠠᠵᠠᠷ ᠤᠴᠢᠵᠤ ᠶᠠᠭᠤ ᠨᠠᠭᠠᠥᠠᠬᠤ ᠭᠡᠥᠨ ᠪᠦᠷ ᠬᠡᠳᠦᠨ ᠮᠦᠩᠬᠦ ᠰᠡᠥᠡᠬᠢᠯ ᠢ ᠨᠢ ᠡᠵᠡᠮᠳᠡᠵᠦ ᠪᠠᠶᠢᠳᠠᠭ᠃ ᠰᠤᠯᠠ ᠵᠤᠭᠤᠰ ᠶᠡᠭᠡ ᠵᠠᠷᠤᠳᠠᠭ ᠬᠡᠥᠬᠡᠥᠨ ᠤᠨ ᠤᠯᠠᠩᠬᠢ ᠨᠢ ᠰᠤᠯᠠ ᠢᠳᠡᠭᠡᠨ ᠶᠡᠭᠡ ᠢᠳᠡᠨ᠎ᠡ᠃ ᠡᠴᠦᠰ ᠲᠤ ᠨᠢ ᠶᠠᠮᠠᠷ ᠴᠦ ᠬᠤᠭᠤᠯᠠᠨ ᠤ ᠲᠤᠷᠠᠰᠢᠯ ᠦᠭᠡᠢ ᠪᠤᠯᠵᠤ᠂ ᠡᠳᠦᠷᠵᠢᠨ ᠬᠡᠳᠦᠨ ᠲᠠᠬᠢᠶᠠᠨ ᠭᠤᠶ᠎ᠠ ᠰᠢᠬᠢᠷᠯᠢᠭ ᠤᠮᠳᠠᠭᠠᠨ ᠪᠤᠶᠤ ᠪᠤᠷᠳᠤᠭᠰᠠᠨ ᠬᠡᠳᠡᠰᠤ ᠮᠡᠳᠦ ᠬᠤᠭ ᠤᠨ ᠢᠳᠡᠭᠡᠨ ᠢᠶᠠᠷ ᠬᠤᠭᠤᠯᠠᠯᠠᠬᠤ ᠪᠤᠯᠵᠤ ᠪᠠᠶᠢᠨ᠎ᠠ᠃ ᠡᠶᠢᠮᠦᠷᠬᠦ ᠬᠡᠥᠬᠡᠥᠨ ᠨᠢᠭᠡᠨᠳᠡ ᠬᠤᠭᠤᠯᠠ ᠭᠤᠯᠤᠬᠤ ᠰᠡᠥᠡᠬᠢᠴᠡ ᠎ ᠶᠢᠨ ᠠᠰᠠᠭᠤᠳᠠᠯ ᠲᠠᠢ ᠬᠡᠥᠬᠡᠥᠨ ᠤᠨ ᠬᠠᠷᠢᠶᠠᠨ ᠳᠤ ᠤᠷᠤᠬᠤ ᠪᠤᠯᠵᠠᠢ᠃ ᠡᠳᠡᠭᠡᠷ ᠬᠡᠥᠬᠡᠥᠨ ᠤᠨ ᠪᠡᠶ᠎ᠡ ᠮᠠᠬᠠᠪᠤᠤᠨ ᠎ ᠤᠨ ᠡᠷᠡᠭᠦᠯ ᠮᠡᠨᠳᠦ ᠬᠦᠨᠳᠦ ᠰᠢᠯᠭᠠᠯᠳᠠ ᠳᠤ ᠤᠴᠠᠷᠠᠵᠤ ᠪᠠᠶᠢᠨ᠎ᠠ᠃       ᠰᠤᠯᠠ ᠵᠤᠭᠤᠰ ᠪᠠᠭ᠎ᠠ ᠠᠴᠠ ᠪᠠᠨ ᠶᠡᠭᠡ ᠵᠠᠷᠤᠵᠤ ᠰᠤᠷᠤᠭᠰᠠᠨ ᠬᠡᠥᠬᠡᠥᠨ ᠵᠤᠭᠤᠰ ᠮᠦᠩᠬᠦᠨ ᠎ ᠳᠤ ᠬᠡᠳᠦ ᠰᠢᠨᠤᠯ ᠲᠠᠢ ᠪᠤᠯᠵᠤ᠂ ᠭᠡᠷ ᠤᠨ ᠠᠬᠠᠮᠠᠥᠨ ᠢᠶᠠᠨ ᠬᠦᠷᠳᠡᠯ᠎ᠡ ᠬᠢᠴᠢᠶᠡᠯ ᠨᠦᠬᠦᠬᠦ ᠭᠡᠳᠡᠯ᠎ᠡ ᠠᠩᠬᠢ ᠶᠢᠨ ᠵᠠᠷᠤᠳᠠᠯ ᠬᠤᠷᠢᠶᠠᠵᠤ ᠪᠠᠶᠢᠨ᠎ᠠ ᠬᠡᠮᠡᠨ ᠬᠤᠳᠠᠯ ᠬᠡᠯᠡᠵᠦ ᠪᠠᠶᠢᠭᠠᠥᠨ ᠢᠯᠡᠬᠦᠦ ᠮᠦᠩᠬᠦ ᠠᠪᠬᠤ ᠡᠰᠡᠭᠦᠯ᠎ᠡ ᠨᠡᠶᠢᠭᠡᠮ ᠲᠡᠭᠡᠷᠡᠬᠢ ᠡᠰᠡᠨ ᠪᠤᠰᠤᠨ ᠦᠭᠡᠢ ᠬᠦᠮᠦᠨ ᠠᠴᠠ ᠵᠤᠭᠤᠰ ᠮᠦᠩᠬᠦ ᠵᠢᠬᠡᠯᠡᠨ ᠡᠯᠳᠡᠪ ᠤᠨ ᠤᠴᠢᠷ ᠲᠤ ᠤᠷᠢᠶᠠᠴᠠᠯᠳᠤᠬᠤ ᠪᠤᠯᠵᠤ ᠪᠠᠶᠢᠨ᠎ᠠ᠃ ᠲᠠ ᠨᠠᠷ ᠤᠳᠤ ᠴᠠᠰᠢ ᠪᠠᠨ ᠲᠦᠰᠦᠭᠡᠯᠡᠨ ᠪᠤᠳᠤᠵᠤ ᠤᠯᠤᠨ᠎ᠠ ᠪᠢᠵᠠ ᠳ᠋ᠡ︕ ᠡᠶᠢᠮᠦᠷᠬᠦ ᠬᠡᠪ ᠰᠤᠷᠳᠠᠯ ᠲᠠᠢ ᠪᠤᠯᠤᠭᠰᠠᠨ ᠬᠡᠥᠬᠡᠥᠨ ᠬᠤᠳᠠᠯ ᠬᠡᠯᠡᠬᠦ᠂ ᠮᠡᠬᠡᠯᠡᠬᠦ᠂ ᠬᠤᠯᠠᠭᠠᠶᠢᠯᠠᠬᠤ᠂ ᠪᠤᠯᠢᠶᠠᠬᠤ ᠳᠤ ᠤᠶᠢᠷᠠᠳᠤᠭᠰᠠᠨ ᠰᠢᠦ᠃ ᠮᠠᠨ ᠤ ᠲᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶᠢᠨ ᠬᠡᠥᠬᠡᠥᠨ ᠤᠨ ᠲᠤᠮᠳᠠ ᠦᠨᠳᠦᠷ ᠬᠦᠥ ᠲᠠᠢ ᠵᠢᠭᠡᠯᠡᠯᠭᠡ ᠲᠠᠯᠪᠢᠬᠤ᠂ ᠮᠦᠷᠦᠢ ᠲᠠᠢ ᠲᠤᠭᠯᠠᠭᠠᠮ ᠨᠠᠭᠠᠳᠬᠤ ᠶᠠᠪᠤᠳᠠᠯ ᠪᠠᠭ᠎ᠠ ᠪᠤᠰᠤ ᠭᠠᠷᠴᠦ ᠪᠠᠶᠢᠭ᠎ᠠ ᠨᠢ ᠠᠶᠤᠯ ᠎ ᠤᠨ ᠲᠤᠬᠢᠶ᠎ᠠ ᠪᠢᠰᠢ ᠤᠤ︕ ᠮᠠᠨ ᠤ ᠮᠠᠯᠴᠢᠨ ᠠᠷᠠᠥᠨ ᠬᠦᠷᠳᠡᠯ᠎ᠡ ᠬᠤᠨᠵᠢᠶ᠎ᠠ ᠲᠠᠢ ᠲᠤᠭᠯᠠᠭᠠᠮ ᠳᠤ ᠬᠠᠴᠢᠨ ᠰᠤᠨᠢᠷᠬᠠᠯ ᠲᠠᠢ ᠪᠤᠯᠵᠤ᠂ ᠵᠤᠭᠤᠰ ᠲᠠᠢ ᠮᠠᠵᠢᠶᠠᠩ᠂ ᠱᠠᠩᠨᠠᠯᠳᠤ ᠰᠤᠭᠤᠯᠠᠭ᠎ᠠ ᠲᠠᠳᠠᠬᠤ ᠬᠦᠮᠦᠰ ᠤᠯᠠᠰᠢᠷᠠᠵᠤ᠂ ᠵᠠᠷᠢᠮ ᠨᠢ ᠪᠦᠷ ᠮᠠᠯ ᠰᠦᠷᠦᠭ ᠢᠶᠠᠨ ᠪᠠᠷᠠᠵᠤ ᠬᠤᠳᠠ ᠪᠠᠨ ᠬᠤᠷᠢᠶᠠᠭᠰᠠᠨ ᠪᠠᠶᠢᠨ᠎ᠠ᠃ ᠡᠨᠡ ᠪᠤᠯ ᠨᠡᠶᠢᠭᠡᠮ ᠤᠨ ᠬᠡᠪ ᠰᠤᠷᠳᠠᠯ ᠬᠦᠮᠦᠨ ᠤ ᠬᠠᠷᠢᠴᠠᠭ᠎ᠠ ᠶᠢ ᠪᠤᠬᠢᠷᠳᠤᠭᠤᠯᠬᠤ ᠬᠠᠷ᠎ᠠ ᠲᠠᠮᠠᠬᠢ ᠭᠡᠵᠦ ᠮᠡᠳᠡᠭᠡᠷᠡᠢ᠃ ᠲᠠ ︽ᠠᠵᠠ︾ ᠲᠠᠭᠠᠷᠠᠵᠤ ᠲᠠᠪᠤᠨ ᠵᠠᠭᠤᠨ ᠲᠦᠮᠡ ᠶᠢᠨ ᠱᠠᠩᠨᠠᠯᠳᠤ ᠰᠤᠭᠤᠯᠠᠭ᠎ᠠ ᠪᠠᠷᠢᠭᠰᠠᠨ ᠭᠡᠵᠦ ᠲᠦᠰᠦᠭᠡᠯᠡᠶ᠎ᠡ᠂ ᠶᠠᠭᠤ ᠪᠤᠯᠤᠨ᠎ᠠ ᠪᠤᠢ︖ ᠡᠨᠡ ᠠᠶᠢᠯ ᠭᠡᠷ ᠲᠢᠭ ᠢᠶᠠᠨ ᠠᠯᠳᠠᠵᠤ ︽ᠰᠤᠯᠢᠶᠠᠷᠠᠵᠤ︾ ᠮᠡᠳᠡᠨ᠎ᠡ ᠰᠢᠦ᠂ ᠭᠤᠶᠤ ᠮᠠᠰᠢᠨ ᠰᠤᠩᠭᠤᠳᠠᠯ᠎ᠠ ᠰᠢᠨ᠎ᠡ ᠪᠠᠶᠢᠰᠢᠩ ᠭᠡᠥᠨ ᠡᠳᠦᠷ ᠪᠤᠯᠭᠠᠨ ᠪᠠᠶᠠᠷ ᠨᠠᠶᠢᠷ ᠦᠷᠭᠦᠯᠵᠢᠯᠡᠵᠦ᠂ ᠡᠴᠦᠰ ᠲᠤ ᠨᠢ ᠨᠢᠭᠡ ᠠᠶᠢᠯ ᠭᠡᠷ ᠤᠨ ᠨᠠᠮ ᠵᠢᠮ ᠪᠤᠷᠤᠭᠵᠢᠭᠤᠨ ᠠᠮᠢᠳᠤᠷᠠᠯ ᠤᠨ ᠲᠢᠭ ᠠᠯᠳᠠᠷᠠᠵᠤ᠂ ᠬᠡᠥᠬᠡᠥᠨ ᠤᠨ ᠵᠠᠩ ᠡᠪᠳᠡᠷᠡᠨ ᠲᠠᠩᠬᠠᠢ ᠶᠠᠭᠤᠮ᠎ᠠ ᠪᠤᠯᠴᠢᠬᠠᠭᠰᠠᠨ ᠪᠠᠶᠢᠵᠤ ᠮᠡᠳᠡᠨ᠎ᠡ᠃ ᠲᠡᠭᠡᠭᠦ ᠠᠴᠠ ᠬᠠᠭᠤᠴᠢ ᠦᠭᠡᠨ ᠳᠤ ︽ᠪᠤᠷᠤᠭᠤ ᠵᠠᠮ ᠢᠶᠠᠷ ᠢᠷᠡᠭᠰᠡᠨ ᠮᠦᠩᠬᠦ ᠵᠦᠪ ᠵᠠᠮ ᠢᠶᠠᠷ ᠵᠠᠷᠤᠭᠳᠠᠬᠤ ᠦᠭᠡᠢ︾ ᠭᠡᠵᠦ ᠤᠴᠢᠷᠳᠠᠶᠢᠬᠠᠨ ᠰᠠᠨᠠᠭᠤᠯᠤᠭᠰᠠᠨ ᠪᠠᠶᠢᠳᠠᠭ᠃ ᠲᠡᠯᠡᠭᠡᠢ ᠲᠡᠭᠡᠷ᠎ᠡ ᠬᠠᠮᠤᠭ ᠤᠨ ᠡᠭᠡᠯ ᠪᠤᠷᠤᠭᠵᠢᠭᠤᠨ ᠡᠷᠬᠢᠮᠰᠦᠭ ᠠᠮᠢᠳᠤᠷᠠᠯ ᠤᠨ ᠰᠤᠷᠳᠠᠯ ᠲᠠᠢ ᠪᠢᠳᠠ ᠲᠡᠭᠦᠨ ᠢᠶᠠᠨ ᠡᠷᠬᠢᠮᠯᠡᠵᠦ ᠶᠠᠪᠤᠬᠤ ᠶᠢ ᠬᠢᠴᠢᠶᠡᠶ᠎ᠡ᠃ ᠡᠳ᠋ ᠬᠦᠷᠦᠩᠭᠡ ᠵᠤᠭᠤᠰ ᠮᠦᠩᠬᠦᠨ ᠤ ᠲᠤᠬᠠᠢ ᠤᠯᠠᠮᠵᠢᠯᠠᠯᠳᠤ ᠬᠦᠮᠦᠵᠢᠯ ᠭᠡᠭᠡᠭᠳᠡᠭᠰᠡᠨ ᠎ ᠠᠴᠠ ᠵᠠᠷᠢᠮ ᠪᠡᠯᠴᠢᠭᠡᠷ ᠡᠯᠪᠡᠭ ᠮᠠᠯ ᠰᠦᠷᠦᠭ ᠪᠠᠶᠠᠨ ᠠᠶᠢᠯ ᠤᠨ ᠬᠡᠥᠬᠡᠥᠨ ᠬᠤᠳᠠ ᠳᠤ ᠢᠷᠡᠵᠦ ᠰᠤᠷᠭᠠᠭᠤᠯᠢ ᠳᠤ ᠰᠠᠭᠤᠭᠠᠥᠨ ᠡᠷᠳᠡᠮ ᠢ ᠨᠢ ᠰᠠᠶᠢᠨ ᠰᠤᠷᠤᠭᠰᠠᠨ ᠦᠭᠡᠢ ᠴᠦ ᠨᠠᠭᠠᠳᠴᠦ ᠴᠡᠩᠬᠡᠭᠦ ᠶᠢ ᠨᠢ ᠬᠠᠷᠢᠨ ᠮᠠᠭᠤ ᠦᠭᠡᠢ ᠰᠤᠷᠴᠤ᠂ ᠲᠡᠷᠡ ᠤᠯᠠᠨ ᠮᠠᠯ ᠰᠦᠷᠦᠭ ᠴᠢᠨᠢ ᠪᠦᠷ ᠮᠢᠨᠤᠬᠢ ᠬᠡᠮᠡᠨ ᠲᠠᠩᠬᠠᠶᠢᠷᠠᠨ᠂ ᠨᠡᠶᠢᠭᠡᠮ ᠲᠡᠭᠡᠷᠡᠬᠢ ᠬᠢᠳᠡᠯ ᠦᠭᠡᠢ ᠲᠠᠩᠬᠠᠢ ᠵᠠᠯᠠᠭᠤᠰ ᠲᠠᠢ ᠨᠡᠶᠢᠯᠡᠭᠰᠡᠭᠡᠷ ᠪᠠᠶᠢᠵᠤ ᠨᠢᠭᠡ ᠮᠡᠳᠡᠬᠦ ᠳᠤ ᠠᠶᠢᠯ ᠭᠡᠷ ᠤᠨ ᠢᠶᠠᠨ ᠮᠠᠯ ᠬᠦᠷᠦᠩᠬᠡ ᠶᠢ ᠬᠤᠭᠤᠰᠤᠯᠠᠭᠰᠠᠨ ᠬᠠᠷᠠᠮᠰᠠᠯᠳᠤ ᠤᠴᠢᠷ ᠴᠦᠭᠡᠨ ᠪᠤᠰᠤ ᠭᠠᠷᠤᠭᠰᠠᠨ ᠰᠢᠦ᠃ ᠢᠪᠡᠷᠢ ᠬᠦᠮᠦᠨ ᠬᠡᠥᠬᠡᠥᠨ ᠲᠤ ᠪᠠᠨ ᠮᠦᠩᠬᠦ ᠵᠤᠭᠤᠰ ᠤᠨ ᠲᠤᠬᠠᠢ ᠬᠦᠮᠦᠵᠢᠯ ᠢ ᠪᠠᠭ᠎ᠠ ᠠᠴᠠ ᠨᠢ ᠬᠢᠳᠡᠭ ᠭᠡᠨ᠎ᠡ᠂ ᠵᠤᠭᠤᠰ ᠨᠢ ᠶᠠᠮᠠᠷᠪᠠ ᠲᠤᠷᠠᠳᠠᠢ ᠵᠦᠢᠯ ᠎ ᠢᠶᠠᠨ ᠪᠦᠬᠦᠨ ᠢ ᠠᠪᠴᠤ ᠲᠡᠶᠢᠯᠬᠦ ᠰᠢᠳᠢ ᠶᠢᠨ ᠡᠳ᠋᠂ ᠲᠡᠭᠡᠬᠦ ᠳᠤ ᠪᠠᠨ ᠲᠡᠭᠦᠨ ᠢ ᠵᠠᠪᠠᠯ ᠬᠦᠳᠡᠯᠮᠦᠷᠢ ᠤᠬᠠᠭᠠᠨ ᠎ ᠢᠶᠠᠨ ᠭᠠᠷᠭᠠᠵᠤ ᠪᠠᠶᠢᠮᠠᠨ ᠤᠯᠵᠤ ᠪᠤᠯᠤᠨ᠎ᠠ ᠭᠡᠵᠦ ᠵᠤᠭᠤᠰ ᠮᠦᠩᠬᠦ ᠶᠢ ᠭᠡᠷᠬᠢᠨ ᠤᠯᠬᠤ ᠲᠤᠬᠠᠢ ᠵᠦᠪ ᠬᠦᠮᠦᠵᠢᠯ ᠬᠦᠷᠳᠡᠭᠡᠳᠡᠭ ᠭᠡᠨ᠎ᠡ᠃ ᠡᠨᠡ ᠨᠢ ᠮᠠᠨ ᠤ ᠮᠠᠯᠴᠢᠨ ᠠᠷᠠᠥᠨ ᠤᠨ ᠬᠡᠥᠬᠡᠥᠨ ᠤᠨ ᠢᠶᠠᠨ ᠤᠢ ᠶᠢᠨ ᠪᠠᠶᠠᠷ ᠲᠡᠭᠡᠷ᠎ᠡ ᠦᠬᠢᠨ ᠬᠤᠷᠠᠭ᠎ᠠ ᠢᠰᠢᠭᠡ ᠦᠭᠴᠦ ᠬᠡᠥᠬᠡᠥᠨ ᠪᠠᠭ᠎ᠠ ᠠᠴᠠ ᠪᠠᠨ ᠦᠪᠡᠷ ᠤᠨ ᠭᠡᠰᠡᠨ ᠦᠮᠴᠢ ᠮᠠᠯ ᠦᠰᠭᠡᠬᠦ ᠤᠬᠠᠭᠠᠨ ᠢ ᠰᠤᠷᠭᠠᠵᠤ ᠪᠠᠶᠢᠭᠰᠠᠨ ᠲᠠᠢ ᠠᠳᠠᠯᠢᠬᠠᠨ ᠬᠦᠮᠦᠵᠢᠯ ᠤᠨ ᠤᠬᠠᠭᠠᠨ ᠪᠠᠶᠢᠭᠰᠠᠨ᠂ ᠭᠡᠪᠡᠴᠦ ᠮᠠᠨᠤᠰ ᠦᠪ ᠤᠯᠠᠮᠵᠢᠯᠠᠯ ᠢᠶᠠᠨ ᠲᠤᠩ ᠬᠢᠯᠪᠠᠷᠬᠠᠨ ᠭᠡᠭᠡᠵᠦ ᠪᠠᠶᠢᠬᠤ ᠨᠢ ᠲᠤᠩ ᠶᠡᠭᠡ ᠰᠤᠶᠤᠯ ᠤᠨ ᠬᠤᠬᠢᠷᠠᠯ ᠭᠡᠳᠡᠭ ᠢᠶᠠᠨ ᠮᠡᠳᠡᠬᠦ ᠶᠤᠰᠤᠳᠠᠢ ᠰᠢᠦ᠃       ᠠᠮᠧᠷᠢᠺᠠ ᠶᠢᠨ ᠶᠡᠷᠦᠩᠬᠡᠶᠢᠯᠡᠭᠴᠢ ᠤᠪᠠᠮᠠ ᠬᠤᠶᠠᠷ ᠦᠬᠢᠨ ᠳᠤ ᠪᠠᠨ ︽ᠤᠷᠤᠰᠢᠨ ᠲᠤᠭᠳᠠᠨᠢᠬᠤ︾ ᠰᠦᠢᠥᠡᠬᠡᠯ ᠯᠡ ᠬᠠᠩᠭᠠᠳᠠᠭ ᠭᠡᠨ᠎ᠡ᠃ ᠰᠤᠷᠪᠤᠯᠵᠢᠯᠠᠭᠴᠢ ᠠᠰᠠᠭᠤᠭᠰᠠᠨ ᠳᠤ᠄ ︽ᠡᠨᠡ ᠪᠤᠯ ᠮᠢᠨᠤ ᠬᠢᠨᠠᠨ ᠬᠠᠮᠢᠶᠠᠷᠤᠭᠴᠢ ᠶᠢᠨ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭ᠎ᠠ ᠶᠢᠨ ᠬᠡᠪᠴᠢᠶᠡᠨ ᠳᠤ ᠯᠡ ᠬᠡᠥᠬᠡᠥᠨ ᠤᠨ ᠡᠷᠭᠡ ᠠᠰᠢᠭ ᠢ ᠡᠳ᠋ᠯᠠᠭᠦᠯᠵᠦ ᠪᠠᠶᠢᠨ᠎ᠠ᠂ ᠬᠡᠥᠬᠡᠥᠨ ᠬᠤᠵᠢᠮ ᠶᠠᠮᠠᠷᠬᠠᠨ ᠠᠮᠢᠳᠤᠷᠠᠨ᠎ᠠ ᠬᠡᠳᠡᠭ ᠨᠢ ᠲᠡᠳᠡᠨ ᠤ ᠦᠪᠡᠷᠰᠡᠥᠨ ᠤᠨ ᠴᠢᠷᠮᠠᠶᠢᠯᠭ᠎ᠠ ᠠᠴᠠ ᠯᠡ ᠲᠤᠭᠳᠠᠭᠠᠭᠳᠠᠨ᠎ᠠ᠃ ᠠᠮᠧᠷᠢᠺᠠ ᠶᠢᠨ ᠢᠷᠭᠡᠨ ᠴᠦ ᠠᠳᠠᠯᠢᠬᠠᠨ᠂ ᠬᠦᠴᠢᠷᠳᠡᠯ ᠲᠠᠢ ᠦᠶ᠎ᠡ ᠎ ᠳᠤ ᠵᠠᠰᠠᠭ ᠤᠨ ᠭᠠᠵᠠᠷ ᠬᠠᠮᠤᠭ ᠤᠨ ᠲᠤᠤᠷᠠᠳᠤ ᠪᠠᠳᠤᠯᠠᠭ᠎ᠠ ᠯᠡ ᠬᠠᠩᠭᠠᠵᠤ ᠦᠭᠬᠦᠨ᠎ᠠ᠂ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠠᠮᠢᠳᠤᠷᠠᠶ᠎ᠠ ᠬᠡᠪᠡᠯ ᠦᠪᠡᠷᠰᠡᠥᠨ ᠢᠶᠠᠨ ᠯᠡ ᠴᠢᠷᠮᠠᠶᠢᠨ᠎ᠠ ᠳ᠋ᠠ᠂ ᠡᠨᠡ ᠬᠤᠶᠠᠷ ᠢᠵᠢᠯᠭᠡᠨ ᠠᠰᠠᠭᠤᠳᠠᠯ︾ ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠬᠡᠳᠡᠭ᠃ ᠭᠡᠷ ᠤᠨ ᠠᠬᠠᠮᠠᠥᠨ ᠮᠠᠨ ᠳᠤ ᠠᠪᠴᠤ ᠬᠡᠯᠡᠪᠡᠯ ᠤᠯᠤᠰ ᠤᠨ ᠡᠯ᠎ᠡ ᠲᠦᠷᠦᠯ ᠤᠨ ᠨᠦᠬᠦᠪᠦᠷᠢ ᠭᠡᠳᠡᠭ ᠴᠢᠨᠢ ᠰᠤᠯᠠ ᠵᠤᠭᠤᠰ ᠰᠢᠦ ᠳ᠋ᠠ᠂ ᠵᠠᠷᠢᠮᠠᠥᠨ ᠨᠢ ᠠᠪᠤᠮᠠᠭᠴᠠ ᠠᠷᠢᠬᠢ ᠤᠤᠭᠤᠵᠤ ᠯᠡ ᠪᠠᠶᠢᠬᠤ ᠪᠢᠰᠢ ᠤᠤ︕ ᠶᠠᠭᠠᠬᠢᠬᠤ ᠪᠤᠢ᠂ ᠬᠦᠴᠢᠷᠳᠡᠯ ᠲᠤᠯᠭᠠᠷᠠᠬᠤ ᠦᠶ᠎ᠡ ᠳᠤ ᠬᠠᠥᠯᠢ ᠶᠤᠰᠤᠨ ᠤ ᠡᠷᠬᠡ ᠠᠰᠢᠭ ᠢᠶᠠᠨ ᠡᠳ᠋ᠯᠠᠵᠦ᠂ ᠨᠡᠶᠢᠭᠡᠮ ᠤᠨ ᠲᠤᠰᠠᠯᠠᠮᠵᠢ ᠬᠠᠯᠠᠮᠵᠢ ᠶᠢ ᠠᠪᠬᠤ ᠦᠭᠡᠢ ᠶᠠᠭᠠᠬᠢᠨ᠎ᠠ ᠪᠤᠢ᠂ ᠭᠡᠳᠡᠯ᠎ᠡ ᠮᠢᠨᠤ ᠶᠠᠷᠢᠬᠤ ᠭᠡᠵᠦ ᠪᠠᠶᠢᠭ᠎ᠠ ᠪᠤᠯ ᠤᠯᠠᠩᠬᠢ ᠬᠦᠮᠦᠰ ︽ᠤᠯᠤᠰ︾᠎ ᠤᠨ ᠨᠦᠬᠦᠪᠦᠷᠢ ᠶᠢ ᠠᠪᠴᠢᠬᠠᠭᠠᠥᠨ ᠪᠠᠶᠠᠷᠯᠠᠵᠤ ᠲᠠᠯᠠᠷᠬᠠᠬᠤ ᠦᠭᠡᠢ ᠮᠦᠷᠳᠡᠭᠡᠨ ᠠᠬᠢᠭᠠᠥᠨ ᠢᠯᠡᠬᠦᠭᠡᠨ ᠦᠭᠬᠦ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠪᠤᠢ︕ ᠬᠡᠬᠦ ᠦᠯᠦᠨ ᠨᠢᠳᠦᠯᠡᠵᠦ ᠦᠷᠢ ᠨᠡᠬᠡᠭᠰᠡᠨ ᠴᠢᠷᠠᠢ ᠭᠠᠷᠭᠠᠬᠤ ᠪᠤᠯ ᠠᠶᠤᠯᠳᠠᠢ ᠰᠡᠥᠡᠬᠢᠴᠡ ᠪᠠᠶᠢᠭ᠎ᠠ᠂ ᠴᠠᠭᠠᠨ᠎ᠠ ᠨᠢ ᠬᠦᠳᠡᠯᠮᠦᠷᠢᠴᠢ ᠪᠤᠶᠠᠨᠰᠠᠭ ᠬᠦᠮᠦᠰ ᠤᠨ ᠭᠠᠶᠢᠯᠢ ᠠᠴᠠ ᠢᠷᠡᠯ ᠲᠠᠢ ᠭᠡᠳᠡᠭ ᠢ ᠪᠤᠳᠤᠯᠳᠠᠢ᠃ ᠦᠨᠡᠨ ᠢ ᠬᠡᠯᠡᠪᠡᠯ ᠨᠦᠬᠦᠪᠦᠷᠢ ᠭᠡᠳᠡᠭ ᠴᠢᠨᠢ ᠨᠦᠬᠦᠭᠡᠰᠦ ᠭᠡᠰᠡᠨ ᠦᠭᠡ ᠯᠡ ᠳ᠋ᠠ᠂ ᠢᠯᠡᠬᠦᠥ ᠲᠤᠳᠠᠭᠤ ᠪᠠᠨ ᠨᠦᠬᠦᠨ᠎ᠡ ᠰᠢᠳᠡ᠃ ᠦᠨᠡᠬᠡᠷ ᠪᠠᠶᠠᠨ ᠲᠠᠩᠰᠤᠭ ᠠᠮᠢᠳᠤᠷᠠᠶ᠎ᠠ ᠭᠡᠪᠡᠯ ᠦᠪᠡᠷᠰᠡᠥᠨ ᠤᠨ ᠬᠦᠳᠡᠯᠮᠦᠷᠢᠴᠢ ᠬᠤᠶᠠᠷ ᠭᠠᠷ᠂ ᠬᠦᠮᠦᠯᠢᠭ ᠤᠬᠠᠭᠠᠨ ᠳᠤ ᠪᠠᠨ ᠯᠡ ᠲᠦᠰᠢᠭᠯᠡᠨ᠎ᠡ ᠰᠢᠦ᠂ ᠬᠦᠳᠡᠯᠮᠦᠷᠢᠴᠢ ᠬᠦᠮᠦᠰ ᠤᠨ ᠪᠤᠶᠠᠨᠰᠠᠭ ᠲᠤᠰᠠᠯᠠᠮᠵᠢ ᠶᠢ ᠲᠤᠰᠴᠢᠬᠠᠭᠠᠥᠨ ᠪᠠᠶᠠᠷᠯᠠᠵᠤ ᠲᠠᠯᠠᠷᠬᠠᠬᠤ ᠰᠡᠥᠡᠬᠢᠯᠭᠡ ᠢᠪᠢᠯᠬᠦ ᠦᠭᠡᠢ ᠭᠡᠳᠡᠭ ᠴᠢᠨᠢ ᠪᠢᠳᠡ ᠪᠦᠬᠦᠨ ᠳᠤ ᠠᠴᠢᠯᠠᠯ ᠵᠢᠷᠦᠮ ᠤᠨ ᠰᠡᠥᠡᠬᠢᠯ ᠨᠢᠮᠭᠡᠷᠡᠵᠦ ᠪᠠᠶᠢᠨ᠎ᠠ ᠭᠡᠰᠡᠨ ᠦᠭᠡ ᠳ᠋ᠠ᠃ ᠡᠶᠢᠮᠦᠷᠬᠦ ᠨᠡᠶᠢᠭᠡᠮ ᠤᠨ ᠬᠡᠪᠰᠢᠯ ᠠᠴᠠ ᠶᠠᠮᠠᠷ ᠰᠠᠶᠢᠬᠠᠨ ᠬᠦᠮᠦᠯᠢᠭ ᠠᠴᠢᠯᠠᠯ ᠵᠢᠷᠦᠮ ᠲᠠᠢ ᠬᠡᠥᠬᠡᠥᠨ ᠲᠦᠷᠦᠬᠦ ᠪᠤᠢ᠂ ᠲᠡᠭᠡᠬᠦ ᠠᠴᠠ ᠲᠤᠮᠤᠴᠤᠤᠯ ᠮᠠᠨᠢ ᠰᠤᠯᠠ ᠵᠤᠭᠤᠰ ᠤᠨ ᠲᠤᠬᠠᠢ ᠵᠦᠪ ᠲᠠᠨᠢᠯᠳᠠ ᠲᠠᠢ ᠪᠠᠶᠢᠭᠠᠷᠠᠢ︕᠂ ᠰᠤᠯᠠ ᠵᠤᠭᠤᠰ ᠭᠡᠳᠡᠭ ᠴᠢᠨᠢ ᠰᠤᠯᠠ ᠭᠡᠰᠡᠨ ᠦᠭᠡᠨ ᠳᠤ ᠪᠠᠨ ᠯᠡ ᠪᠠᠶᠢᠨ᠎ᠠ ᠰᠢᠦ᠂ ᠪᠠᠶᠢᠪᠠᠯ ᠵᠠᠷᠤᠴᠢᠬᠠᠨ᠎ᠠ᠂ ᠦᠭᠡᠢ ᠪᠤᠯ ᠪᠠᠰᠠ ᠪᠤᠯᠴᠢᠬᠠᠨ᠎ᠠ᠃       ᠦᠨᠦ ᠶᠢᠨ ᠰᠤᠷᠭᠠᠭᠤᠯᠢ ᠪᠦᠷ ᠺᠡᠷᠲ ᠢᠶᠠᠷ ᠬᠤᠭᠤᠯᠠ ᠢᠳᠡᠭᠦᠯᠵᠦ ᠪᠠᠶᠢᠨ᠎ᠠ᠃ ᠬᠤᠭᠤᠯᠠᠨ ᠺᠡᠷᠲ ᠲᠠᠬᠢ ᠮᠦᠩᠬᠦ ᠨᠢ ᠲᠤᠳᠠᠬᠤ ᠦᠭᠡᠢ ᠪᠠᠶᠢᠭ᠎ᠠ ᠪᠠᠶᠢᠳᠠᠯ ᠲᠤᠤᠷ᠎ᠠ ᠬᠠᠷᠮᠠᠨ ᠳᠤ ᠪᠠᠨ ᠰᠤᠯᠠ ᠵᠤᠭᠤᠰ ᠦᠭᠡᠢ ᠶᠠᠪᠤᠵᠤ ᠴᠢᠳᠠᠪᠠᠯ ᠰᠠᠶ᠋ᠢ ᠰᠢᠯᠢᠳᠡᠭ ᠵᠠᠩ ᠰᠤᠷᠳᠠᠯ ᠲᠠᠢ ᠬᠡᠥᠬᠡᠥᠨ ᠪᠤᠯᠵᠤ ᠴᠢᠳᠠᠨ᠎ᠠ ᠭᠡᠳᠡᠭ ᠢ ᠭᠡᠷ ᠤᠨ ᠠᠬᠠᠮᠠᠥᠨ ᠤᠶᠢᠯᠠᠭᠠᠵᠦ᠂ ᠬᠡᠥᠬᠡᠥᠨ ᠲᠤ ᠪᠠᠨ ᠮᠦᠩᠬᠦᠨ ᠤ ᠲᠤᠬᠠᠢ ᠵᠦᠪ ᠤᠶᠢᠯᠠᠭᠠᠯᠳᠠ ᠲᠠᠢ᠂ ᠮᠦᠩᠬᠦ ᠵᠠᠷᠤᠬᠤ ᠡᠷᠡᠭᠦᠯ ᠲᠠᠥᠠᠬᠠᠯ ᠲᠠᠢ ᠪᠤᠯᠭᠠᠵᠤ ᠬᠡᠪᠰᠢᠭᠦᠯᠬᠦ ᠶᠢ ᠠᠩᠬᠠᠷᠤᠯ ᠳᠤ ᠪᠠᠨ ᠠᠪᠴᠦ ᠪᠠᠶᠢᠭᠠᠷᠠᠢ᠃           ᠭᠤᠷᠪᠠ᠂ ᠭᠠᠷ ᠤᠳᠠᠰᠤ        ᠮᠠᠨ ᠤ ᠠᠯᠢᠪᠠ ᠡᠷᠭᠡ ᠴᠢᠯᠦᠭᠡᠳᠦ ᠴᠠᠭ ᠮᠦᠴᠡ ᠰᠠᠨᠠᠭ᠎ᠠ ᠪᠤᠳᠤᠯ ᠪᠦᠷ ᠭᠠᠷ ᠤᠳᠠᠰᠤᠨ ᠎ ᠠᠴᠠ ᠠᠷᠭᠠᠮᠵᠢᠶ᠎ᠠ ᠲᠠᠢ ᠪᠤᠯᠵᠠᠢ᠃ ᠨᠢᠭᠡ ᠠᠶᠢᠯ ᠪᠦᠯᠢ ᠴᠠᠭ ᠤᠨ ᠬᠤᠭᠤᠯᠠ ᠪᠠᠨ ᠲᠦᠩᠭᠡᠵᠢ ᠪᠡᠯᠡᠨ ᠪᠤᠯᠭᠠᠭᠠᠥᠨ ᠰᠢᠷᠡᠭᠡ ᠪᠠᠨ ᠲᠤᠭᠤᠷᠢᠵᠤ ᠰᠠᠭᠤᠭᠠᠥᠨ ᠠᠶᠠᠭ᠎ᠠ ᠰᠠᠪᠬ᠎ᠠ ᠪᠠᠨ ᠪᠠᠷᠢᠳᠠᠯ᠎ᠠ ᠠᠯᠢ ᠨᠢᠭᠡ ᠨᠠᠶᠢᠵᠠ ᠶᠢᠨ ᠬᠢᠨ ᠤᠳᠠᠰᠤ ᠢᠷᠡᠪᠡᠯ ᠡᠷ᠎ᠡ ᠨᠦᠬᠦᠷ ᠢ ᠨᠢ ᠲᠠᠭᠤᠳᠠᠭᠠᠥᠨ ᠶᠠᠪᠤᠴᠢᠬᠠᠨ᠎ᠠ᠃ ᠲᠤᠷ᠎ᠠ ᠦᠬᠡᠶᠢᠴᠡᠭᠰᠡᠨ ᠪᠦᠰᠡᠭᠦᠢ ᠨᠢ ᠬᠡᠥᠬᠡᠥᠨ ᠲᠠᠢ ᠎ ᠪᠠᠨ ᠲᠡᠷᠡ ᠡᠷᠡᠨ ᠤ ᠬᠤᠭᠤᠯᠠ ᠶᠢ ᠲᠡᠭᠡᠭᠡᠥᠨ ᠯᠡ ᠢᠳᠡᠭᠰᠡᠨ ᠲᠠᠢ ᠦᠭᠡᠢ ᠲᠠᠢ ᠦᠩᠭᠡᠷᠡᠭᠡᠨ᠎ᠡ᠃ ᠡᠨᠡ ᠪᠤᠯ ᠭᠠᠷ ᠤᠳᠠᠰᠤᠨ ᠤ ᠴᠠᠭ ᠦᠶ᠎ᠡ ᠳᠠᠬᠢ ᠦᠪᠡᠷ ᠤᠨ ᠡᠷᠬᠡ ᠴᠢᠯᠦᠭᠡ ᠨᠠᠮ ᠰᠡᠯᠡᠭᠦᠥ ᠴᠠᠭ ᠵᠠᠢ ᠪᠠᠨ ᠠᠯᠳᠠᠭᠰᠠᠨ ᠮᠠᠨ ᠤ ᠠᠮᠢᠳᠤᠷᠠᠯ᠃ ᠠᠳᠡ ᠪᠢᠳᠡ ᠭᠠᠷ ᠤᠳᠠᠰᠤ ᠲᠦᠬᠡᠮᠡᠯᠵᠢᠭᠰᠡᠨ ᠠᠴᠠ ᠬᠡᠥᠬᠡᠥᠨ ᠪᠠᠭᠠᠴᠤᠤᠨ ᠤᠨ ᠪᠡᠶ᠎ᠡ ᠰᠡᠥᠡᠬᠢᠴᠡ ᠎ ᠶᠢᠨ ᠡᠷᠡᠭᠦᠯ ᠮᠡᠨᠳᠦ ᠶᠢ ᠬᠡᠷᠬᠢᠨ ᠨᠠᠵᠠᠭᠠᠢ ᠪᠠᠷ ᠨᠦᠯᠦᠭᠡᠯᠡᠵᠦ ᠪᠠᠶᠢᠬᠤ ᠲᠤᠬᠠᠢ ᠦᠵᠡᠶ᠎ᠡ᠃       ᠶᠠᠭᠤᠨ ᠤ ᠡᠮᠦᠨ᠎ᠡ ᠪᠡᠶ᠎ᠡ ᠮᠠᠬᠠᠪᠤᠤᠨ ᠤᠨ ᠡᠷᠡᠭᠦᠯ ᠮᠡᠨᠳᠦ ᠳᠤ ᠲᠤᠩ ᠶᠡᠭᠡ ᠬᠤᠬᠢᠷᠠᠯ ᠲᠠᠢ ᠎ ᠶᠢ ᠮᠡᠳᠡᠬᠦ ᠴᠢᠬᠤᠯᠠ ᠲᠠᠢ᠃ ᠭᠠᠷ ᠤᠳᠠᠰᠤᠨ ᠠᠴᠠ ᠰᠠᠴᠤᠷᠠᠭ ᠲᠤᠯᠬᠢᠶᠠᠨ ᠡᠬᠦᠰᠴᠦ ᠪᠠᠶᠢᠳᠠᠭ ᠢ ᠪᠢᠳᠡ ᠪᠦᠷ ᠮᠡᠳᠡᠨ᠎ᠡ᠂ ᠲᠡᠷᠡ ᠨᠢ ᠬᠦᠮᠦᠰ ᠤᠨ ᠡᠷᠡᠭᠦᠯ ᠮᠡᠨᠳᠦ ᠳᠤ ᠬᠤᠤᠷᠲᠠᠢ ᠪᠠᠶᠢᠳᠠᠭ᠃ ᠤᠨᠴᠠᠭᠠᠶᠢᠯᠠᠨ ᠪᠤᠶᠢᠵᠢᠯᠳᠠ ᠶᠢᠨ ᠨᠠᠰᠤᠨ ᠳᠤ ᠪᠠᠨ ᠪᠠᠶᠢᠬᠤ ᠬᠡᠥᠬᠡᠥᠨ ᠤᠨ ᠲᠡᠷᠢᠬᠢᠨ ᠳᠤ ᠲᠤᠩ ᠶᠡᠭᠡ ᠬᠤᠤᠷᠲᠠᠢ ᠪᠢᠯᠡ᠃ ᠦᠳᠡᠰᠢ ᠲᠡᠷ᠎ᠡ ᠲᠤᠤᠷ᠎ᠠ ᠎ ᠪᠠᠨ ᠲᠠᠷᠤᠵᠤ ᠤᠨᠳᠠᠬᠤ ᠨᠢ ᠪᠦᠷ ᠴᠦ ᠮᠠᠭᠤ ᠲᠠᠥᠠᠬᠠᠯ ᠰᠢᠦ᠃ ᠰᠤᠷᠤᠭᠴᠢ ᠬᠡᠥᠬᠡᠥᠨ ᠤᠷᠤᠢ ᠦᠳᠡᠰᠢ ᠤᠷᠤᠨ ᠲᠤᠳᠤᠷ᠎ᠠ ᠪᠠᠨ ᠭᠠᠷ ᠤᠳᠠᠰᠤ ᠤᠷᠤᠯᠳᠤᠬᠤ ᠨᠢ ᠤᠯᠠᠨ ᠪᠠᠶᠢᠳᠠᠭ᠂ ᠭᠠᠷ ᠤᠳᠠᠰᠤᠨ ᠤ ᠴᠡᠭᠡᠨ ᠭᠡᠷᠡᠯ ᠬᠦᠮᠦᠰ ᠤᠨ ᠨᠢᠳᠦᠨ ᠬᠠᠷᠠᠭ᠎ᠠ ᠶᠢ ᠠᠯᠳᠠᠭᠤᠯᠬᠤ ᠠᠶᠤᠯᠳᠠᠢ ᠶᠢ ᠮᠡᠳᠡᠬᠦ ᠶᠤᠰᠤᠳᠠᠢ᠃ ᠲᠠᠷᠠᠭ᠎ᠠ ᠨᠢ ᠬᠡᠥᠬᠡᠥᠨ ᠵᠠᠯᠠᠭᠤᠴᠤᠤᠨ ᠤᠨ ᠰᠡᠥᠡᠬᠢᠴᠡ ᠶᠢᠨ ᠡᠷᠡᠭᠦᠯ ᠮᠡᠨᠳᠦ ᠶᠢ ᠲᠤᠩ ᠮᠠᠭᠤ ᠪᠠᠷ ᠨᠦᠯᠦᠭᠡᠯᠡᠵᠦ ᠪᠠᠶᠢᠬᠤ ᠶᠢ ᠭᠡᠷ ᠤᠨ ᠠᠬᠠᠮᠠᠥᠨ ᠪᠤᠯᠤᠭᠰᠠᠥᠨ ᠠᠩᠬᠠᠷᠤᠯ ᠳᠤ ᠪᠠᠨ ᠠᠪᠤᠯᠳᠠᠢ᠃ ᠦᠨᠦ ᠶᠢᠨ ᠬᠡᠥᠬᠡᠥᠨ ᠭᠠᠷ ᠤᠳᠠᠰᠤ ᠶᠢ ᠶᠠᠭᠤᠨ ᠳᠤ ᠭᠤᠤᠯ ᠠᠰᠢᠭᠯᠠᠵᠤ ᠪᠠᠶᠢᠭ᠎ᠠ ᠪᠤᠢ︖ ᠠᠷᠤ ᠭᠡᠷ ᠤᠨ ᠢᠶᠠᠨ ᠠᠬᠤᠢ ᠪᠠᠶᠢᠳᠠᠯ ᠠᠪᠤ ᠡᠵᠢ ᠶᠢᠨ ᠢᠶᠠᠨ ᠠᠮᠤᠷ ᠮᠡᠨᠳᠦ ᠠᠨᠳᠠ ᠨᠦᠬᠦᠥᠨ ᠎ ᠤᠨ ᠢᠶᠠᠨ ᠰᠤᠷᠤᠯᠭ᠎ᠠ ᠠᠮᠢᠳᠤᠷᠠᠯ ᠢ ᠠᠰᠠᠭᠤᠵᠤ ᠬᠠᠯᠠᠮᠵᠢᠯᠠᠵᠤ ᠪᠠᠶᠢᠬᠤ ᠨᠢ ᠤᠯᠠᠨ ᠦᠦ︖ ᠲᠠᠶᠢᠮᠦ ︽ᠲᠡᠨᠡᠭ︾ ᠬᠡᠥᠬᠡᠥᠨ ᠪᠠᠶᠢᠬᠤ ᠦᠭᠡᠢ ᠰᠢᠦ᠂ ᠤᠯᠠᠩᠬᠢ ᠰᠤᠷᠤᠭᠴᠢ ᠡᠳᠦᠷᠵᠢᠨ ᠰᠦᠯᠵᠢᠶᠡᠨ ᠳᠤ ᠨᠠᠶᠢᠵᠠᠯᠠᠬᠤ᠂ ᠤᠬᠤᠷ ᠵᠠᠬᠢᠶ᠎ᠠ ᠪᠢᠴᠢᠬᠦ᠂ ᠰᠦᠯᠵᠢᠶᠡᠨ ᠳᠤ ᠭᠠᠷᠬᠤ᠂ ᠲᠤᠭᠯᠠᠭᠠᠮ ᠨᠠᠭᠠᠳᠬᠤ ᠳᠤ ᠭᠤᠤᠯ ᠠᠰᠢᠭᠯᠠᠵᠤ ᠪᠠᠶᠢᠳᠠᠭ᠃ ᠵᠤᠭᠤᠭᠳᠠᠵᠤ ᠪᠠᠶᠢᠭ᠎ᠠ ᠶᠠᠷᠢᠶ᠎ᠠ᠂ ᠪᠢᠴᠢᠵᠦ ᠪᠠᠶᠢᠭ᠎ᠠ ᠤᠬᠤᠷ ᠵᠠᠬᠢᠶ᠎ᠠ᠂ ᠰᠤᠨᠢᠷᠬᠠᠵᠤ ᠪᠠᠶᠢᠭ᠎ᠠ ᠰᠦᠯᠵᠢᠶ᠎ᠡ᠂ ᠨᠠᠭᠠᠳᠴᠦ ᠪᠠᠶᠢᠭ᠎ᠠ ᠲᠤᠭᠯᠠᠭᠠᠮ ᠵᠡᠷᠭᠡ ᠨᠢ ᠴᠦᠮ ᠬᠡᠥᠬᠡᠥᠨ ᠤᠨ ᠰᠡᠥᠡᠬᠢᠴᠡ ᠳᠤ ᠨᠠᠵᠠᠭᠠᠢ ᠨᠦᠯᠦᠬᠡ ᠪᠤᠯᠳᠠᠭ ᠵᠦᠢᠯᠡᠰ ᠲᠡᠶᠢᠯᠦᠩᠬᠢ ᠪᠠᠶᠢᠳᠠᠭ ᠠᠴᠠ ᠵᠠᠷᠢᠮ ᠬᠡᠥᠬᠡᠥᠨ ᠭᠠᠷ ᠤᠳᠠᠰᠤᠨ ᠠᠴᠠ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ ᠰᠢᠨᠤᠯ ᠲᠠᠢ ᠪᠤᠯᠳᠠᠭ᠂ ᠡᠨᠡ ᠪᠤᠯ ᠨᠢᠭᠡᠨᠳᠡ ᠰᠡᠥᠡᠬᠢᠴᠡ ᠶᠢᠨ ᠭᠡᠮ ᠠᠷᠬᠠᠭ ᠡᠬᠦᠰᠴᠦ ᠪᠠᠶᠢᠬᠤ ᠶᠢᠨ ᠢᠯᠡᠷᠡᠯ ᠪᠠᠶᠢᠭ᠎ᠠ ᠶᠤᠮ᠃ ᠵᠠᠷᠢᠮ ᠬᠡᠳᠦ ᠰᠢᠨᠤᠯ ᠎ ᠲᠠᠢ ᠪᠤᠯᠤᠭᠰᠠᠨ ᠬᠡᠥᠬᠡᠥᠨ ᠰᠦᠨᠢᠵᠢᠨ ᠤᠨᠳᠠᠬᠤ ᠦᠭᠡᠢ ᠭᠠᠷ ᠤᠳᠠᠰᠤ ᠨᠠᠭᠠᠳᠴᠦ᠂ ᠰᠦᠯᠵᠢᠶᠡᠨ ᠨᠠᠶᠢᠵᠠ ᠲᠠᠢ ᠎ ᠪᠠᠨ ᠬᠡᠳᠦᠷᠬᠡᠢ ᠰᠡᠳᠡᠯᠳᠡ ᠲᠠᠢ ᠶᠠᠷᠢᠶ᠎ᠠ ᠵᠤᠭᠤᠭ ᠡᠬᠦᠰᠬᠡᠬᠦ ᠪᠤᠶᠤ ᠲᠤᠭᠯᠠᠭᠠᠮ ᠳᠤ ᠰᠢᠨᠤᠭᠰᠠᠨ ᠠᠴᠠ ᠪᠤᠯᠵᠦ᠂ ᠲᠠᠷᠠᠭ᠎ᠠ ᠡᠳᠦᠷ ᠤᠨ ᠬᠢᠨ ᠬᠢᠴᠢᠶᠡᠯ ᠲᠡᠭᠡᠷ᠎ᠡ ᠨᠤᠶᠢᠷᠮᠤᠭ ᠵᠡᠭᠦᠷᠮᠡᠭ ᠰᠠᠭᠤᠵᠤ ᠪᠠᠶᠢᠳᠠᠭ᠃ ᠡᠳᠦᠷᠵᠢᠨ ᠬᠡᠳᠦᠷᠬᠡᠢ ᠭᠠᠷ ᠤᠳᠠᠰᠤ ᠨᠠᠭᠠᠳᠤᠭᠰᠠᠨ ᠠᠴᠠ ᠰᠠᠨᠠᠭ᠎ᠠ ᠪᠤᠳᠤᠯ ᠨᠢ ᠠᠵᠢᠯ ᠰᠤᠷᠤᠯᠭ᠎ᠠ ᠲᠡᠭᠡᠷ᠎ᠡ ᠪᠠᠨ ᠲᠦᠪᠯᠡᠷᠡᠬᠦ ᠦᠭᠡᠢ᠂ ᠪᠤᠳᠤᠯ ᠰᠡᠥᠡᠬᠢᠯ ᠨᠢ ᠡᠰᠡᠨ ᠪᠤᠰᠤᠨ ᠦᠭᠡᠢ ᠪᠤᠯᠵᠦ ᠦᠵᠡᠭᠰᠡᠨ ᠶᠠᠭᠤᠮ᠎ᠠ ᠨᠠᠭᠠᠳᠤᠭᠰᠠᠨ ᠲᠤᠭᠯᠠᠭᠠᠮ ᠪᠤᠶᠤ ᠬᠦᠮᠦᠨ ᠲᠠᠢ ᠶᠠᠷᠢᠭᠰᠠᠨ ᠵᠤᠭᠤᠭ ᠨᠢ ᠤᠷᠤᠵᠤ ᠢᠷᠡᠭᠡᠥᠨ ᠰᠡᠥᠡᠬᠢᠴᠡ ᠶᠢ ᠨᠢ ᠰᠠᠮᠠᠭᠤᠷᠠᠭᠤᠯᠵᠦ ᠪᠠᠶᠢᠳᠠᠭ᠃ ᠬᠡᠪ ᠤᠨ ᠠᠵᠢᠯ ᠰᠤᠷᠤᠯᠭ᠎ᠠ ᠠᠮᠢᠳᠤᠷᠠᠯ ᠲᠠᠢ ᠬᠦᠮᠦᠰ ᠶᠠᠮᠠᠷ ᠵᠠᠪ ᠢᠶᠠᠷ ᠢᠶᠠᠨ ᠡᠳᠦᠷᠵᠢᠨ ᠰᠦᠯᠵᠢᠶᠡᠨ ᠳᠤ ᠬᠦᠮᠦᠰ ᠲᠠᠢ ᠰᠤᠯᠠ ᠵᠤᠭᠤᠭᠳᠠᠭᠠᠳ ᠪᠠᠶᠢᠬᠤ ᠪᠤᠢ᠂ ᠬᠡᠥᠬᠡᠥᠨ ᠲᠠᠢ ᠡᠳᠦᠷᠵᠢᠨ ᠰᠦᠯᠵᠢᠶᠡᠨ ᠳᠤ ︽ᠨᠠᠶᠢᠵᠠᠯᠠᠳᠠᠭ︾ ᠬᠦᠮᠦᠰ ᠪᠤᠯ ᠯᠠᠪᠲᠠᠢ ᠰᠤᠷᠤᠯᠭ᠎ᠠ ᠬᠠᠶᠠᠭᠰᠠᠨ ᠰᠤᠷᠤᠭᠴᠢ᠂ ᠬᠢᠳᠡᠯ ᠦᠭᠡᠢ ᠨᠡᠶᠢᠭᠡᠮ ᠤᠨ ᠬᠦᠮᠦᠰ ᠪᠤᠶᠤ ᠲᠤᠰᠬᠠᠶᠢᠯᠠᠨ ᠰᠦᠯᠵᠢᠶᠡᠨ ᠳᠤ ᠬᠦᠮᠦᠨ ᠮᠡᠭᠡᠯᠡᠳᠡᠭ ᠦᠵᠡᠯ ᠪᠤᠷᠤᠭᠤ ᠡᠳᠡᠭᠡᠥᠨ ᠪᠠᠶᠢᠵᠤ ᠲᠠᠭᠠᠷᠠᠨ᠎ᠠ᠃ ᠵᠠᠷᠢᠮ ᠬᠡᠥᠬᠡᠥᠨ ᠭᠠᠷ ᠤᠳᠠᠰᠤ ᠪᠠᠶᠢᠬᠤ ᠦᠭᠡᠢ ᠪᠤᠯ ᠰᠡᠥᠡᠬᠢᠯ ᠳᠤ ᠨᠢ ᠨᠢᠭᠡ ᠶᠠᠭᠤᠮ᠎ᠠ ᠲᠤᠳᠠᠭᠠᠥᠨ᠂ ᠠᠪᠤ ᠡᠵᠢ ᠨᠢ ᠭᠠᠷ ᠤᠳᠠᠰᠤ ᠶᠢ ᠎ ᠨᠢ ᠬᠤᠷᠢᠶᠠᠵᠤ ᠠᠪᠤᠪᠠᠯ ᠵᠡᠭᠦᠳᠦ ᠪᠠᠷ ᠢᠶᠠᠨ ᠡᠷᠢᠵᠦ ᠲᠡᠮᠳᠡᠷᠢᠵᠦ ᠪᠠᠶᠢᠳᠠᠭ᠂ ᠡᠨᠡ ᠪᠤᠯ ᠭᠠᠷ ᠤᠳᠠᠰᠤᠨ ᠳᠤ ᠭᠦᠨ ᠰᠢᠨᠤᠯᠳᠠᠢ ᠪᠤᠯᠤᠭᠰᠠᠨ ᠰᠡᠥᠡᠬᠢᠴᠡ ᠶᠢᠨ ᠦᠵᠡᠭᠳᠡᠯ᠃       ᠲᠡᠶᠢᠮᠦ ᠠᠴᠠ ᠭᠡᠷ ᠤᠨ ᠠᠬᠠᠮᠠᠥᠨ ᠬᠡᠥᠬᠡᠥᠨ ᠲᠤ ᠪᠠᠨ ᠬᠡᠳᠦ ᠪᠠᠭ᠎ᠠ ᠠᠴᠠ ᠨᠢ ᠤᠳᠠᠰᠤ ᠵᠠᠷᠤᠭᠤᠯᠵᠤ ᠪᠤᠯᠬᠤ ᠦᠭᠡᠢ᠂ ᠤᠳᠠᠰᠤ ᠵᠠᠷᠤᠬᠤ ᠨᠠᠰᠤ ᠪᠤᠯᠤᠭᠰᠠᠨ ᠴᠦ ᠭᠠᠷ ᠤᠳᠠᠰᠤ ᠪᠠᠨ ᠵᠦᠪ ᠠᠰᠢᠭᠯᠠᠬᠤ ᠳᠤ ᠲᠦᠷᠢᠮ ᠪᠤᠯᠬᠤ ᠶᠢ ᠠᠩᠬᠠᠷᠤᠯ ᠲᠠᠢ᠃ ᠬᠦᠮᠦᠨ ᠤ ᠡᠮᠦᠨ᠎ᠡ ᠭᠠᠷ ᠤᠳᠠᠰᠤ ᠪᠠᠷ ᠪᠢᠳᠡᠭᠡᠢ ᠨᠠᠭᠠᠳᠤᠶ᠎ᠠ᠂ ᠬᠡᠥᠬᠡᠥᠨ ᠎ ᠲᠠᠢ ᠪᠠᠨ ᠵᠤᠭᠤᠭᠳᠠᠵᠤ ᠪᠠᠶᠢᠬᠤ ᠳᠤ ᠭᠠᠷ ᠤᠳᠠᠰᠤ ᠪᠠᠨ ᠪᠤᠤ ᠤᠷᠤᠯᠳᠤᠶ᠎ᠠ᠂ ᠤᠯᠠᠨ ᠤ ᠡᠮᠦᠨ᠎ᠡ ᠭᠠᠷ ᠤᠳᠠᠰᠤ ᠲᠤᠰᠬᠤ ᠳᠤ ᠪᠠᠨ ᠨᠠᠮ ᠲᠠᠭᠤ ᠪᠠᠷ ᠶᠠᠷᠢᠬᠤ ᠪᠤᠶᠤ ᠬᠦᠮᠦᠰ ᠠᠴᠠ ᠵᠠᠶᠢᠳᠠᠭᠤ ᠭᠠᠵᠠᠷ ᠤᠴᠢᠵᠤ ᠲᠤᠰᠬᠤ ᠮᠡᠳᠦ ᠪᠤᠯᠪᠠᠰᠤᠨ ᠵᠠᠩᠰᠢᠯ ᠲᠠᠢ ᠪᠠᠶᠢᠵᠤ ᠬᠡᠥᠬᠡᠥᠨ ᠲᠤ ᠪᠠᠨ ᠰᠠᠶᠢᠬᠠᠨ ᠲᠠᠭᠤᠷᠢᠶᠠᠯ ᠦᠵᠡᠭᠦᠯᠦᠶ᠎ᠡ᠃           ᠲᠦᠷᠪᠡ᠂ ᠨᠧᠲ ᠰᠦᠯᠵᠢᠶ᠎ᠡ        ᠨᠧᠲ ᠰᠦᠯᠵᠢᠶ᠎ᠠ ᠬᠡᠵᠦ ᠶᠠᠭᠤ ᠪᠤᠢ︖ ᠲᠤᠮᠤᠭ᠎ᠠ ᠲᠠᠢ ᠤᠬᠠᠭᠠᠨ ᠲᠠᠢ ᠬᠦᠮᠦᠰ ᠲᠤ ᠪᠣᠯ ᠨᠧᠲ ᠰᠦᠯᠵᠢᠶ᠎ᠡ ᠨᠢ ᠬᠢᠵᠠᠭᠠᠯᠠᠰᠢ ᠦᠬᠡᠢ ᠶᠡᠭᠡ ᠤᠶᠤᠨ ᠤᠬᠠᠭᠠᠨ ᠤ ᠤᠷᠤᠨ ᠵᠠᠢ᠂ ᠤᠷ᠎ᠠ ᠮᠡᠳᠡᠯᠬᠡ ᠶᠢᠨ ᠪᠠᠶᠠᠨ ᠰᠠᠩ ᠮᠥᠨ᠃ ᠬᠡᠳᠡᠯ᠎ᠡ ᠲᠤᠮᠤᠭ᠎ᠠ ᠤᠷᠤᠭ᠎ᠠ ᠦᠬᠡᠢ ᠬᠡᠦᠬᠡᠳ ᠪᠤᠶᠤ ᠪᠡᠶ᠎ᠡ ᠳᠤ ᠪᠠᠨ ᠬᠠᠷᠢᠭᠤᠴᠠᠯᠭ᠎ᠠ ᠦᠭᠡᠢ ᠬᠦᠮᠦᠰ ᠲᠤ ᠪᠣᠯ ᠲᠤᠯᠤᠭᠠᠢ ᠤᠨᠠᠬᠤ ᠭᠠᠢ ᠲᠠᠢ ᠠᠶᠤᠮᠰᠢᠭᠳᠤ ᠤᠷᠴᠢᠨ ᠪᠠᠶᠢᠭ᠎ᠠ᠃ ᠰᠦᠯᠵᠢᠶ᠎ᠡ ᠶᠢᠨ ᠴᠡᠩᠬᠡᠷ ᠲᠡᠯᠬᠡᠴᠡᠨ ᠲᠡᠭᠡᠷ᠎ᠡ ᠭᠡᠷᠡᠯ ᠭᠡᠭᠡ ᠲᠠᠢ ᠪᠤᠶᠠᠨ ᠤ ᠴᠠᠭᠠᠨ ᠮᠡᠳᠡᠭᠡᠯᠡᠯ ᠴᠦ ᠪᠠᠶᠢᠨ᠎ᠠ᠂ ᠬᠠᠷ᠎ᠠ ᠡᠷᠴᠢ ᠬᠦᠴᠦ ᠲᠠᠢ ᠭᠠᠵᠢᠭᠤ ᠰᠣᠯᠣᠭᠠᠢ ᠮᠡᠳᠡᠭᠡᠯᠡᠯ ᠴᠦ ᠪᠠᠶᠢᠳᠠᠭ᠂ ᠰᠦᠯᠵᠢᠶ᠎ᠡ ᠶᠢ ᠲᠦᠭᠦᠮᠭᠡᠨ ᠬᠡᠯᠡᠪᠡᠯ ᠦᠨᠦ ᠶᠢᠨ ᠠᠬᠤᠢ ᠨᠡᠶᠢᠭᠡᠮ ᠲᠡᠷᠡ ᠴᠢᠭ ᠢᠶᠠᠷ ᠢᠶᠠᠨ ᠬᠡᠶᠢᠰᠪᠦᠷᠢ ᠰᠦᠯᠵᠢᠶᠡᠨ ᠤ ᠶᠢᠷᠳᠢᠨᠴᠦ ᠳᠤ ᠤᠷᠤᠴᠢᠬᠠᠵᠠᠢ᠃ ᠰᠦᠯᠵᠢᠶᠡᠨ ᠲᠡᠬᠡᠷ᠎ᠡ ᠨᠤᠮ ᠦᠵᠡᠳᠡᠭ ᠨᠢ ᠨᠤᠮ ᠢᠶᠠᠨ ᠡᠷᠢᠵᠦ᠂ ᠵᠤᠬᠢᠶᠠᠯ ᠪᠢᠴᠢᠳᠡᠭ ᠨᠢ ᠵᠤᠬᠢᠶᠠᠯ ᠢᠶᠠᠨ ᠨᠡᠶᠢᠳᠡᠯᠡᠵᠦ᠂ ᠬᠦᠮᠦᠨ ᠮᠡᠬᠡᠯᠡᠳᠡᠭ ᠨᠢ ᠬᠦᠮᠦᠨ ᠮᠡᠬᠡᠯᠡᠵᠦ᠂ ᠶᠠᠯ᠎ᠠ ᠬᠢᠳᠡᠭ ᠨᠢ ᠶᠠᠯᠠᠳᠤ ᠠᠵᠢᠯᠯᠠᠭ᠎ᠠ ᠪᠠᠨ ᠦᠢᠯᠡᠳᠴᠦ᠂ ᠬᠤᠭ ᠨᠤᠪᠰᠢ ᠲᠠᠷᠬᠠᠭᠠᠳᠠᠭ ᠨᠢ ᠬᠤᠭ ᠨᠤᠪᠰᠢ ᠪᠠᠨ ᠲᠠᠷᠬᠠᠭᠠᠵᠤ ᠯᠡ ᠪᠠᠶᠢᠨ᠎ᠠ᠃ ︽ᠮᠠᠭᠤ ᠦᠭᠡ ᠮᠤᠳᠤᠨ ᠤᠯᠠᠭ᠎ᠠ ᠲᠠᠢ︾ ᠭᠡᠳᠡᠭ᠃ ᠬᠦᠮᠦᠰ ᠶᠠᠷᠦ ᠨᠢ ᠮᠠᠭᠤ ᠦᠭᠡ ᠮᠠᠭᠤᠬᠠᠢ ᠰᠤᠷᠠᠭ ᠢ ᠲᠠᠷᠬᠠᠭᠠᠬᠤ ᠨᠢ ᠰᠠᠶᠢᠨ ᠴᠢᠮᠡᠭᠡ ᠲᠠᠮᠵᠢᠭᠤᠯᠬᠤ ᠠᠴᠠ ᠲᠦᠷᠪᠡᠨ ᠲᠠᠬᠢᠨ ᠢᠯᠡᠬᠦᠥ ᠭᠡᠰᠡᠨ ᠰᠤᠳᠤᠯᠭᠠᠨ ᠪᠠᠶᠢᠳᠠᠭ᠃ ᠡᠭᠦᠨ ᠲᠠᠢ ᠠᠳᠠᠯᠢᠬᠠᠨ ᠬᠦᠮᠦᠰ ᠮᠠᠭᠤ ᠶᠢ ᠰᠤᠷᠬᠤ ᠳᠤ ᠮᠦᠨ ᠲᠦᠷᠭᠡᠨ ᠪᠠᠶᠢᠳᠠᠭ᠃ ᠲᠡᠶᠢᠮᠦ ᠪᠤᠯᠬᠤᠷ ᠰᠦᠯᠵᠢᠶ᠎ᠠ ᠪᠠᠷ ᠲᠠᠷᠬᠠᠵᠤ ᠪᠠᠶᠢᠭ᠎ᠠ ᠡᠷᠡᠭᠦᠯ ᠪᠤᠰᠤ ᠮᠡᠳᠡᠭᠡᠯᠡᠯ᠂ ᠠᠯᠠᠯᠭᠠᠨ ᠵᠤᠳᠤᠭᠠᠨ ᠎ ᠲᠠᠢ ᠨᠠᠭᠠᠳᠤᠮ ᠲᠤᠭᠯᠠᠭᠠᠮ ᠮᠡᠳᠦ ᠬᠠᠷ᠎ᠠ ᠡᠷᠴᠢ ᠬᠦᠴᠦ ᠲᠠᠢ ᠵᠦᠢᠯᠡᠰ ᠨᠢ ᠬᠦᠮᠦᠰ ᠢ ᠲᠤᠩ ᠬᠢᠯᠪᠠᠷᠬᠠᠨ ᠨᠦᠯᠦᠭᠡᠯᠡᠳᠡᠭ ᠢ ᠮᠡᠳᠡᠭᠦᠰᠢᠳᠠᠢ᠃ ᠬᠡᠦᠬᠡᠳ ᠪᠣᠯ ᠰᠤᠨᠢᠭᠤᠴᠢ ᠵᠠᠩ ᠲᠠᠢ᠂ ᠠᠰᠪᠤᠷᠢ ᠴᠠᠶᠢᠯᠭᠠᠨ ᠭᠡᠨᠡᠨ ᠨᠠᠰᠤᠨ ᠳᠤ ᠎ ᠪᠠᠨ ᠪᠠᠶᠢᠬᠤ ᠲᠤᠯᠠ ᠠᠯᠢ ᠪᠤᠯᠬᠤ ᠦᠭᠡᠢ ᠭᠡᠰᠡᠨ ᠬᠤᠷᠢᠭ ᠲᠠᠢ ᠡᠷᠡᠭᠦᠯ ᠪᠤᠰᠤ ᠵᠦᠢᠯ ᠢ ᠨᠢ ᠨᠡᠩ ᠢᠯᠡᠭᠦᠥ ᠰᠤᠨᠢᠷᠬᠠᠵᠤ᠂ ᠦᠵᠡᠯ ᠪᠤᠷᠤᠭᠤ ᠡᠳᠡᠭᠡᠥᠨ ᠲᠤ ᠬᠠᠮᠤᠭ ᠬᠢᠯᠪᠠᠷᠬᠠᠨ ᠮᠡᠬᠡᠯᠡᠭᠳᠡᠵᠦ ᠬᠠᠮᠤᠭ ᠶᠡᠭᠡ ᠬᠤᠬᠢᠷᠠᠯ ᠠᠮᠰᠠᠵᠤ ᠪᠠᠶᠢᠭ᠎ᠠ ᠨᠡᠶᠢᠭᠡᠮ ᠤᠨ ᠪᠠᠭᠤᠷᠠᠢ ᠪᠦᠯᠦᠭᠳᠦ ᠴᠤᠭᠴᠠ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃       ᠪᠦᠬᠦ ᠶᠠᠭᠤᠮ᠎ᠠ ᠰᠦᠯᠵᠢᠶᠡᠨ ᠤ ᠮᠠᠭᠤ ᠪᠢᠰᠢ᠂ ᠠᠰᠠᠭᠤᠳᠠᠯ ᠲᠠᠢ ᠭᠡᠷ ᠪᠦᠯᠢ ᠶᠢᠨ ᠤᠷᠴᠢᠨ ᠎ ᠳᠤ ᠦᠰᠴᠦ ᠪᠠᠶᠢᠭ᠎ᠠ ᠬᠡᠥᠬᠡᠥᠨ ᠠᠮᠠᠷᠬᠠᠨ ᠨᠧᠲ ᠰᠦᠯᠵᠢᠶᠡᠨ ᠤ ᠰᠢᠨᠤᠯᠳᠠᠨ ᠪᠤᠯᠵᠤ᠂ ᠡᠳᠦᠷᠵᠢᠨ ᠰᠦᠯᠵᠢᠶᠡᠨ ᠲᠤᠭᠯᠠᠭᠠᠮ ᠪᠤᠶᠤ ᠰᠦᠯᠵᠢᠶᠡᠨ ᠨᠠᠶᠢᠵᠠ ᠲᠠᠢ ᠪᠠᠨ ᠬᠠᠨᠢᠯᠠᠵᠤ᠂ ᠰᠦᠯᠵᠢᠶᠡᠨ ᠤ ᠶᠢᠷᠳᠢᠨᠴᠦ ᠶᠢᠨ ᠬᠤᠭ ᠨᠤᠪᠰᠢ ᠎ ᠲᠠᠢ ᠬᠠᠷᠠᠩᠭᠤᠢ ᠪᠤᠯᠤᠩ ᠳᠤ ᠠᠮᠢᠳᠤᠷᠠᠵᠤ ᠪᠠᠶᠢᠳᠠᠭ᠃ ᠢᠩᠭᠢᠵᠦ ᠰᠢᠨᠤᠯ ᠲᠠᠢ ᠪᠤᠯᠤᠭᠰᠠᠨ ᠬᠡᠦᠬᠡᠳ ᠲᠤ ᠠᠵᠢᠯ ᠰᠤᠷᠤᠯᠭ᠎ᠠ ᠶᠢᠨ ᠬᠠᠷᠢᠭᠤᠴᠠᠯᠭ᠎ᠠ ᠦᠭᠡᠢ ᠪᠤᠯᠵᠤ᠂ ᠰᠦᠯᠵᠢᠶᠡᠨ ᠠᠴᠠ ᠰᠠᠯᠪᠠᠯ ᠤᠶᠤᠨ ᠰᠠᠨᠠᠭ᠎ᠠ ᠨᠢ ᠬᠤᠭᠤᠰᠤᠷᠠᠵᠤ ᠂ ᠠᠮᠢᠳᠤᠷᠠᠬᠤ ᠢᠳᠡᠭᠡᠯ ᠴᠦ ᠦᠭᠡᠢ ᠪᠤᠯᠳᠠᠭ᠃ ᠡᠳᠡᠭᠡᠷ ᠬᠡᠥᠬᠡᠥᠨ ᠡᠳᠦᠷᠵᠢᠨ ᠰᠦᠯᠵᠢᠶᠡᠨ ᠳᠤ ᠬᠤᠷᠭᠤᠳᠠᠬᠤ ᠮᠦᠩᠬᠦ ᠤᠯᠬᠤ ᠶᠢᠨ ᠲᠦᠯᠦᠬᠡ ᠬᠤᠳᠠᠯ ᠬᠤᠯᠠᠭᠠᠢ ᠬᠢᠬᠦ ᠪᠤᠶᠤ ᠬᠤᠤᠷ ᠰᠠᠷᠢᠭᠠᠯᠠᠬᠤ ᠠᠴᠠ ᠴᠦ ᠪᠤᠴᠠᠬᠤ ᠦᠭᠡᠢ ᠪᠤᠯᠳᠠᠭ᠂ ᠲᠦᠬᠦᠮ ᠬᠤᠭᠤᠯᠠ ᠤᠮᠳᠠᠭᠠᠨ ᠢᠶᠠᠷ ᠦᠯ ᠲᠠᠷᠤᠵᠤ ᠬᠡᠴᠢᠨᠡᠨ ᠡᠳᠦᠷ ᠢᠶᠠᠷ ᠰᠦᠯᠵᠢᠶᠡᠨ ᠳᠤ ᠤᠶᠠᠭᠳᠠᠳᠠᠭ ᠠᠴᠠ ᠪᠤᠯᠵᠤ ᠪᠡᠶ᠎ᠡ ᠮᠠᠬᠠᠪᠤᠤᠨ ᠤᠬᠠᠭᠠᠨ ᠮᠡᠳᠡᠷᠡᠯ ᠨᠢ ᠴᠦᠮ ᠲᠤᠷᠤᠶᠢᠳᠠᠵᠤ ᠡᠬᠢᠯᠡᠳᠡᠭ᠃       ᠲᠠᠬᠢᠪᠠᠯ ᠨᠧᠲ ᠰᠦᠯᠵᠢᠶᠡᠨ ᠤ ᠭᠠᠵᠠᠷ ᠡᠳᠦᠷᠵᠢᠨ ᠰᠦᠨᠢᠵᠢᠨ ᠤᠯᠠᠨ ᠬᠦᠮᠦᠨ ᠴᠤᠭᠯᠠᠷᠠᠳᠠᠭ ᠮᠦᠷᠳᠡᠭᠡᠨ ᠭᠡᠷᠡᠯ ᠠᠭᠠᠷ ᠨᠡᠪᠳᠡᠷᠡᠬᠦ ᠨᠢ ᠮᠠᠭᠤ ᠪᠠᠶᠢᠳᠠᠭ ᠪᠤᠯᠬᠤᠷ ᠤᠯᠠᠨ ᠬᠦᠮᠦᠨ ᠤ ᠲᠠᠮᠠᠬᠢᠨ ᠤᠳᠤᠭ᠎ᠠ᠂ ᠬᠦᠯᠦᠰᠦᠨ ᠦᠨᠦᠷ᠂ ᠮᠠᠰᠢᠨ ᠠᠴᠠ ᠭᠠᠷᠬᠤ ᠮᠠᠭᠤ ᠠᠭᠠᠷ᠂ ᠰᠠᠴᠤᠷᠠᠭ ᠲᠤᠯᠬᠢᠶᠠᠨ ᠨᠡᠶᠢᠯᠡᠭᠡᠥᠨ ᠪᠦᠭᠴᠢᠮ᠎ᠡ ᠪᠤᠬᠢᠷ ᠠᠮᠢᠰᠬᠤᠯ ᠪᠤᠢ ᠪᠤᠯᠵᠦ ᠡᠪᠡᠥᠡᠴᠢᠨ ᠬᠠᠯᠳᠠᠪᠤᠷᠢᠯᠠᠵᠦ ᠡᠬᠦᠰᠬᠦ ᠳᠤ ᠪᠦᠷ ᠴᠦ ᠬᠢᠯᠪᠠᠷᠬᠠᠨ᠃ ᠤᠳᠤ ᠨᠧᠲ ᠰᠦᠯᠵᠢᠶ᠎ᠡ ᠠᠴᠠ ᠬᠦᠵᠦᠭᠦᠨ ᠦᠶ᠎ᠡ᠂ ᠮᠦᠷᠦ ᠲᠠᠯᠤ᠂ ᠵᠢᠷᠦᠭᠡᠨ ᠤ᠂ ᠮᠡᠳᠡᠷᠡᠯ ᠤᠨ᠂ ᠰᠡᠥᠡᠬᠢᠴᠡ ᠶᠢᠨ ᠬᠡᠬᠦ ᠮᠡᠳᠦ ᠬᠤᠷᠢ ᠢᠯᠡᠬᠦᠥ ᠲᠦᠷᠦᠯ ᠤᠨ ᠡᠪᠡᠳᠴᠢᠨ ᠢᠯᠡᠷᠡᠬᠦ ᠪᠤᠯᠤᠭᠰᠠᠨ ᠪᠦᠬᠡᠳ ᠲᠤᠰᠬᠠᠶᠢᠯᠠᠨ ᠨᠧᠲ ᠰᠦᠯᠵᠢᠶᠡᠨ ᠤ ᠶᠡᠷᠦᠩᠭᠡᠶᠢᠯᠡᠭᠰᠠᠨ ᠡᠪᠡᠳᠴᠢᠨ ᠬᠡᠳᠡᠭ ᠰᠢᠨ᠎ᠡ ᠡᠪᠳᠴᠢᠨ ᠤ ᠨᠡᠷᠡᠶᠢᠳᠦᠯ ᠪᠤᠢ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠨᠡᠩ ᠴᠢᠬᠤᠯᠠ ᠎ ᠨᠢ ᠬᠡᠦᠬᠡᠳ ᠤᠨ ᠰᠡᠳᠬᠢᠴᠡ ᠬᠦᠨᠳᠤ ᠨᠤᠴᠢᠳᠡᠢ ᠬᠤᠤᠷᠳᠡᠯ ᠳᠤ ᠤᠴᠠᠷᠠᠵᠦ ᠨᠡᠶᠢᠬᠡᠮ ᠤᠨ ᠬᠤᠭ ᠨᠤᠪᠰᠢ ᠲᠡᠷᠢᠬᠢ ᠲᠤᠯᠤᠭᠠᠢ ᠶᠢ ᠨᠢ ᠡᠵᠡᠯᠡᠨ ᠵᠠᠩ ᠠᠭᠠᠰᠢ ᠨᠢ ᠵᠤᠵᠢᠭ ᠵᠦᠷᠢᠬᠦᠳ ᠪᠤᠯᠵᠦ ᠬᠠᠮᠤᠭ ᠰᠡᠬᠦᠯ ᠳᠤᠨᠢ ᠪᠤᠷᠤᠭᠤ ᠵᠠᠮ ᠢᠶᠠᠷ ᠤᠷᠤᠵᠦ ᠶᠠᠯ᠎ᠠ ᠬᠢᠬᠦ ᠬᠡᠮᠵᠢᠶᠡᠨ ᠳᠤ ᠬᠦᠷᠴᠦ ᠪᠤᠢ᠃ ᠨᠧᠲ ᠰᠦᠯᠵᠢᠶ᠎ᠡ ᠶᠢᠨ ᠬᠡᠦᠬᠡᠳ ᠲᠤ ᠤᠴᠠᠷᠠᠭᠤᠯᠵᠦ ᠪᠠᠶᠢᠭ᠎ᠠ ᠬᠤᠤᠷ ᠬᠡᠮ ᠪᠣᠯ ᠲᠤᠩ ᠬᠦᠨᠳᠤ ᠨᠤᠴᠢᠳᠠᠢ ᠶᠤᠮ᠃ ᠣᠳᠣ ᠵᠠᠰᠠᠭ ᠤᠨ ᠣᠷᠳᠣᠨ ᠠᠴᠠ ᠨᠠᠰᠣᠨ ᠳᠤ ᠬᠦᠷᠦᠬᠡ ᠦᠬᠡᠢ ᠬᠡᠦᠬᠡᠳ ᠤᠨ ᠨᠧᠲ ᠰᠦᠯᠵᠢᠶᠡᠨ ᠳᠤ ᠤᠷᠤᠬᠤ ᠶᠢ ᠴᠠᠭᠠᠵᠠᠯᠠᠬᠤ ᠵᠠᠷᠯᠢᠭ ᠨᠡᠶᠢᠳᠡᠯᠡᠭᠰᠠᠨ ᠪᠦᠬᠡᠳ ᠰᠤᠷᠭᠠᠭᠤᠯᠢ ᠤᠶᠢᠷᠠᠯᠴᠠᠭ᠎ᠠ ᠨᠧᠲ ᠰᠦᠯᠵᠢᠶᠡᠨ ᠤ ᠭᠠᠵᠠᠷ ᠭᠠᠷᠭᠠᠵᠦ ᠪᠤᠯᠬᠤ ᠦᠬᠡᠢ ᠬᠡᠵᠦ ᠬᠤᠷᠢᠭᠯᠠᠵᠦ ᠪᠠᠶᠢᠭ᠎ᠠ ᠪᠤᠯᠪᠠᠴᠦ ᠬᠠᠤᠯᠢ ᠪᠤᠰᠤ ᠡᠳᠡᠬᠡᠳ ᠮᠥᠨ ᠯᠡ ᠬᠤᠯᠠᠭᠠᠢ ᠬᠤᠳᠠᠯ ᠢᠶᠠᠷ ᠦᠢᠯᠡᠳᠴᠦ ᠬᠢᠳᠡᠭ ᠢᠶᠠᠨ ᠬᠢᠭᠰᠡᠬᠡᠷ ᠪᠠᠶᠢᠨ᠎ᠠ ᠃ ᠡᠶᠢᠮᠤ ᠠᠴᠠ ᠬᠡᠷ ᠤᠨ ᠠᠬᠠᠮᠠᠳ ᠡᠨᠡ ᠲᠠᠯ᠎ᠠ ᠪᠠᠷ ᠬᠡᠦᠬᠡᠳ ᠢᠶᠠᠨ ᠴᠢᠩᠭ᠎ᠠ ᠬᠠᠮᠢᠶᠠᠷᠬᠤ ᠴᠢᠬᠤᠯᠠ ᠲᠠᠢ ᠪᠠᠶᠢᠨ᠎ᠠ᠃ ᠪᠠᠰᠠ ᠨᠧᠲ ᠰᠦᠯᠵᠢᠶᠡᠨ ᠤ ᠭᠠᠵᠠᠷ ᠭᠠᠷᠴᠦ ᠪᠠᠶᠢᠭ᠎ᠠ ᠲᠡᠳᠡᠬᠡᠷ ᠬᠠᠤᠯᠢ ᠪᠤᠰᠤ ᠡᠳᠡᠬᠡᠳ ᠤᠨ ᠮᠡᠬᠡᠯᠡᠬᠦ᠂ ᠰᠦᠷᠳᠡᠬᠦᠯᠬᠦ᠂ ᠪᠤᠯᠢᠶᠠᠬᠤ᠂ ᠵᠤᠳᠤᠯᠳᠤᠬᠤ᠂᠂᠂ ᠵᠡᠷᠬᠡ ᠪᠤᠯᠬᠢ ᠶᠠᠪᠤᠳᠠᠯ ᠤᠳ ᠬᠡᠦᠬᠡᠳ ᠤᠨ ᠪᠡᠶ᠎ᠡ ᠰᠡᠳᠬᠢᠴᠡ ᠳᠤ ᠶᠡᠭᠡ ᠬᠤᠤᠷᠳᠡᠯ ᠠᠪᠴᠢᠷᠠᠵᠦ ᠪᠠᠶᠢᠭ᠎ᠠ ᠶᠢ ᠵᠠᠪᠠᠯ ᠠᠩᠬᠠᠷᠬᠤ ᠬᠡᠷᠡᠭᠳᠡᠢ᠃ ᠶᠠᠯᠠᠳᠤ ᠡᠳᠡᠭᠡᠥᠨ ᠬᠡᠥᠬᠡᠥᠨ ᠤᠨ ᠪᠡᠶ᠎ᠡ ᠎ ᠶᠢᠨ ᠭᠠᠷᠤᠯ᠂ ᠭᠡᠷ ᠤᠨ ᠪᠠᠶᠢᠳᠠᠯ ᠢ ᠤᠶᠢᠯᠠᠭᠠᠵᠦ ᠠᠪᠤᠭᠠᠥᠨ᠂ ᠭᠡᠷ ᠤᠨ ᠬᠦᠮᠦᠰ ᠠᠴᠠ ᠨᠢ ᠵᠤᠭᠤᠰ ᠮᠡᠬᠡᠯᠡᠬᠦ᠂ ᠬᠡᠥᠬᠡᠥᠨ ᠢ ᠬᠠᠥᠯᠢ ᠪᠤᠰᠤ ᠠᠵᠢᠯᠯᠠᠭ᠎ᠠ ᠳᠤ ᠲᠠᠳᠠᠵᠤ ᠤᠷᠤᠭᠤᠯᠬᠤ ᠮᠡᠳᠦ ᠠᠯᠢ ᠪᠠᠶᠢᠭᠰᠠᠨ ᠮᠠᠭᠤᠬᠠᠢ ᠦᠢᠯᠡ ᠶᠢ ᠦᠢᠯᠡᠥᠡᠬᠦ ᠪᠤᠯᠵᠠᠢ᠃ ᠲᠠᠮᠠᠬᠢ ᠲᠠᠳᠠᠳᠠᠭ ᠦᠬᠡᠢ ᠬᠡᠦᠬᠡᠳ ᠲᠠᠮᠠᠬᠢ ᠲᠠᠳᠠᠵᠦ ᠡᠴᠦᠰ ᠲᠤ ᠪᠠᠨ ᠬᠤᠤᠷ ᠴᠦ ᠲᠠᠳᠠᠬᠤ ᠪᠤᠯᠵᠦ ᠪᠠᠰᠠ ᠦᠯᠦ ᠲᠠᠨᠢᠬᠤ ᠬᠦᠮᠦᠨ ᠲᠠᠢ ᠢᠨᠠᠭᠯᠠᠬᠤ᠂ ᠲᠡᠷᠡᠴᠢᠯᠡᠨ ᠲᠠᠭᠠᠵᠦ ᠶᠠᠪᠤᠬᠤ ᠦᠵᠡᠭᠳᠡᠯ ᠢᠯᠡᠷᠡᠵᠦ᠂ ᠵᠠᠷᠢᠮ ᠠᠶᠢᠯ ᠤᠨ ᠬᠡᠦᠬᠡᠳ ᠨᠢ ᠬᠡᠨᠡᠳᠳᠡ ᠪᠠᠷ ᠠᠯᠠᠭ᠎ᠠ ᠪᠤᠯᠵᠦ ᠪᠠᠶᠢᠭ᠎ᠠ ᠨᠢ ᠪᠦᠷ ᠯᠡ ᠨᠧᠲ ᠰᠦᠯᠵᠢᠶ᠎ᠡ ᠲᠠᠢ ᠬᠤᠯᠪᠤᠭ᠎ᠠ ᠲᠠᠢ᠃ ᠪᠠᠰᠠ ᠵᠠᠷᠢᠮ ᠬᠡᠦᠬᠡᠨᠴᠤᠳ ᠬᠠᠤᠯᠢ ᠪᠤᠰᠤ ᠡᠳᠡᠬᠡᠳ ᠲᠤ ᠮᠡᠬᠡᠯᠡᠭᠳᠡᠨ᠂ ᠪᠡᠶ᠎ᠡ ᠮᠠᠬᠠᠪᠤᠳ ᠤᠨ ᠲᠠᠯ᠎ᠠ ᠪᠠᠷ ᠲᠠᠮᠤᠯᠠᠭᠳᠠᠵᠦ᠂ ᠵᠠᠷᠢᠮ ᠨᠢ ᠠᠷᠭ᠎ᠠ ᠪᠤᠰᠤ ᠲᠤᠭᠯᠠᠭᠠᠮ ᠤᠨ ᠭᠠᠵᠠᠷ ᠢᠶᠠᠷ ᠨᠠᠭᠠᠳᠤᠮ ᠤᠨ ᠶᠠᠭᠤᠮ᠎ᠠ ᠪᠤᠯᠵᠦ ᠪᠤᠢ᠃       ᠰᠦᠯᠵᠢᠶᠡᠨ ᠠᠴᠠ ᠡᠬᠦᠰᠴᠦ ᠪᠠᠶᠢᠭ᠎ᠠ ᠡᠨᠡ ᠤᠯᠠᠨ ᠠᠰᠠᠭᠤᠳᠠᠯ ᠪᠤᠯ ᠰᠦᠯᠵᠢᠶ᠎ᠠ ᠭᠡᠳᠡᠭ ᠨᠢ ᠬᠠᠥᠯᠢ ᠪᠤᠰᠤ ᠡᠳᠡᠭᠡᠥᠨ ᠤᠨ ᠬᠦᠮᠦᠨ ᠮᠡᠬᠡᠯᠡᠵᠦ ᠶᠠᠯ᠎ᠠ ᠨᠢᠬᠦᠯ ᠬᠢᠬᠦ ᠳᠤ ᠨᠡᠩ ᠲᠠᠯᠳᠠ ᠨᠢᠭᠤᠴᠠᠭᠠᠢ ᠲᠦᠭᠦᠮ ᠨᠦᠬᠦᠴᠡᠯ ᠢ ᠬᠠᠩᠭᠠᠭᠰᠠᠨ ᠠᠴᠠ ᠪᠤᠯᠤᠭᠰᠠᠨ ᠶᠤᠮ᠃ ᠮᠡᠬᠡᠯᠡᠭᠴᠢᠥᠨ ᠶᠠᠭ ᠡᠨᠡᠬᠦ ᠨᠢᠭᠤᠴᠠᠬᠠᠨ ᠪᠠᠭ ᠤᠨ ᠴᠠᠭᠠᠨ᠎ᠠ ᠎ ᠠᠴᠠ ᠭᠡᠨᠡᠨ ᠴᠠᠶᠢᠯᠭᠠᠨ ᠬᠡᠥᠬᠡᠥᠨ ᠲᠤ ᠬᠠᠷ᠎ᠠ ᠰᠠᠪᠠᠷ ᠢᠶᠠᠨ ᠰᠤᠩᠭᠠᠵᠤ ᠪᠠᠶᠢᠳᠠᠭ᠃ ᠬᠦᠮᠦᠰ ᠤᠨ ᠮᠤᠷᠠᠯ ᠰᠤᠷᠳᠠᠯ ᠭᠠᠵᠢᠬᠤ ᠳᠤ ᠬᠦᠷᠪᠡᠯ ᠬᠡᠴᠢᠨᠡᠨ ᠦᠨᠳᠦᠷ ᠡᠷᠳᠡᠮ ᠮᠡᠷᠭᠡᠵᠢᠯ ᠡᠵᠡᠮᠰᠢᠯ᠎ᠡ ᠴᠦ ᠭᠡᠥᠨ ᠠᠯᠢ ᠲᠠᠪᠰᠢᠩᠭᠤᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠮᠡᠷᠭᠡᠵᠢᠯ ᠢ ᠠᠯᠢ ᠪᠤᠯᠢᠬᠠᠢ ᠮᠠᠭᠤᠬᠠᠢ ᠪᠠᠷ ᠠᠰᠢᠭᠯᠠᠳᠠᠭ ᠤᠨ ᠵᠢᠱᠢᠶ᠎ᠡ ᠡᠨᠡ ᠪᠠᠶᠢᠭ᠎ᠠ᠃ ᠰᠦᠯᠵᠢᠶᠡᠨ ᠎ ᠠᠴᠠ ᠠᠷᠠᠯᠵᠢᠶ᠎ᠠ ᠮᠠᠶᠢᠮᠠᠢ ᠶᠢᠨ ᠰᠤᠷᠠᠭ ᠵᠠᠩᠬᠢ᠂ ᠠᠵᠢᠯ ᠦᠢᠯᠡᠰ ᠤᠨ ᠠᠵᠠ ᠲᠤᠬᠢᠶᠠᠯ᠂ ᠰᠤᠷᠤᠯᠴᠠᠯᠭ᠎ᠠ ᠰᠤᠳᠤᠯᠭᠠᠨ ᠤ ᠮᠠᠲ᠋ᠧᠷᠢᠶᠠᠯ ᠪᠠᠷᠢᠮᠳᠠ᠂ ᠡᠷᠡᠭᠦᠯ ᠠᠭᠤᠯᠭ᠎ᠠ ᠲᠠᠢ ᠺᠢᠨᠤ᠋ ᠤᠷᠠᠯᠢᠭ ᠰᠤᠨᠢᠷᠬᠠᠵᠤ ᠪᠠᠶᠢᠪᠠᠯ ᠨᠧᠲ ᠶᠢᠷᠳᠢᠨᠴᠦ ᠶᠢᠨ ᠴᠡᠪᠡᠷ ᠠᠭᠠᠷ ᠲᠤ ᠠᠮᠢᠳᠤᠷᠠᠵᠤ ᠪᠠᠶᠢᠨ᠎ᠠ ᠭᠡᠰᠡᠨ ᠦᠭᠡ᠃ ᠲᠡᠭᠡᠬᠦ ᠠᠴᠠ ᠭᠡᠷ ᠤᠨ ᠠᠬᠠᠮᠠᠥᠨ ᠮᠠᠨᠢ ᠨᠧᠲ ᠰᠦᠯᠵᠢᠶ᠎ᠠ ᠶᠢᠨ ᠭᠡᠷᠡᠯ ᠰᠡᠭᠦᠳᠡᠷ ᠬᠤᠶᠠᠷ ᠲᠠᠯ᠎ᠠ ᠶᠢ ᠬᠦᠢᠴᠡᠥᠨ ᠲᠠᠨᠢᠵᠤ᠂ ᠦᠷ᠎ᠡ ᠬᠡᠥᠬᠡᠥᠨ ᠢᠶᠠᠨ ᠬᠠᠥᠯᠢ ᠪᠤᠰᠤ ᠡᠳᠡᠭᠡᠥᠨ ᠤᠨ ᠬᠠᠷ᠎ᠠ ᠰᠠᠪᠠᠷ ᠠᠴᠠ ᠦᠮᠦᠭᠯᠡᠨ ᠬᠠᠮᠠᠭᠠᠯᠠᠵᠤ ᠶᠠᠪᠤᠶ᠎ᠠ᠃           ︵ ︽ᠮᠤᠩᠭᠤᠯᠴᠤᠳ ᠤᠨ ᠬᠡᠷ ᠪᠦᠯᠢ ᠶᠢᠨ ᠰᠤᠷᠭᠠᠨ ᠬᠦᠮᠦᠵᠢᠯ︾᠎ ᠠᠴᠠ︶ 
  
ᠢᠷᠡᠯᠲᠡ᠄ ᠬᠡᠰᠢᠭᠳᠡᠨ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号