ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠬᠠᠶᠢᠷᠬᠠᠨ ᠤ ᠬᠤᠪᠢᠯᠭᠠᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/12/29
        ︽ᠨᠠᠮᠠᠢᠢ ᠭᠤᠴᠢᠭᠠᠳ ᠨᠠᠰᠤ ᠲᠠᠢ ᠪᠠᠶᠢᠭᠰᠠᠨ ᠲᠡᠷᠡ ᠵᠢᠯ ᠪᠢᠯᠡ᠂ ᠵᠢᠷᠭᠤᠭᠠᠨ ᠰᠠᠷ᠎ᠠ ᠶᠢᠨ ᠤᠷᠴᠢᠮ ᠢᠶᠠᠷ ᠪᠢᠳᠠ ᠲᠦᠴᠢᠬᠡᠳ ᠦᠬᠡᠷ ᠲᠡᠷᠬᠡ ᠪᠠᠷ ᠡᠵᠢ ᠨᠠᠭᠤᠷ ᠠᠴᠠ ᠲᠠᠪᠤᠰᠤ ᠵᠠᠯᠠᠬᠤ ᠪᠠᠷ ᠶᠠᠪᠤᠭᠰᠠᠨ ᠶᠤᠮ᠃ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠪᠢ ᠬᠠᠮᠳᠤ ᠶᠠᠪᠤᠭ᠎ᠠ ᠠᠶᠠᠨᠴᠢᠳ ᠤᠨ ᠢᠶᠠᠨ ᠲᠤᠳᠤᠷ᠎ᠠ ᠭᠠᠯ ᠤᠨ ᠠᠬ᠎ᠠ ᠨᠢ ᠪᠠᠶᠢᠭᠰᠠᠨ ᠲᠤᠯᠠ ᠠᠶᠠᠨ ᠬᠦᠬᠡᠬᠡᠬᠦ ᠶᠤᠰᠤ ᠲᠦᠷᠢᠮ᠂ ᠵᠠᠩ ᠲᠠᠳᠬᠠᠯ ᠢ ᠬᠠᠮᠢᠶᠠᠷᠤᠨ ᠬᠡᠷᠡᠭᠵᠢᠬᠦᠯᠵᠤ᠂ ᠶᠡᠭᠡ ᠯᠡ ᠶᠤᠰᠤ ᠲᠠᠢ ᠎ ᠪᠠᠷ ᠠᠶᠠᠯᠠᠵᠤ᠂ ᠬᠠᠮᠢᠭ᠎ᠠ ᠬᠦᠷᠴᠤ ᠬᠦᠯᠦᠰᠢᠨ ᠦᠭᠡᠷ ᠢᠶᠠᠨ ᠠᠮᠠᠷᠠᠭᠤᠯᠬᠤ ᠵᠡᠷᠬᠡ ᠶᠢ ᠴᠦ ᠲᠤᠬᠢᠷᠠᠭᠤᠯᠳᠠᠭ ᠪᠠᠶᠢᠯ᠎ᠠ ᠃      ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠬᠤᠷ᠎ᠠ ᠪᠤᠷᠤᠭᠠᠨ ᠡᠯᠪᠡᠭ᠂ ᠡᠪᠡᠰᠤ ᠨᠤᠭᠤᠭ᠎ᠠ ᠢᠭ᠌ᠴᠢ ᠰᠠᠬᠤᠯᠢᠭ᠂ ᠠᠭᠤᠷ ᠠᠮᠢᠰᠬᠤᠯ ᠪᠦᠭᠴᠢᠮ ᠬᠠᠯᠠᠭᠤᠨ ᠪᠠᠶᠢᠭᠰᠠᠨ ᠲᠤᠯᠠ ᠢᠯᠠᠭ᠎ᠠ ᠪᠠᠳᠠᠭᠠᠨ᠎ᠠ᠂ ᠬᠡᠳᠡᠭᠡᠨ᠎ᠡ ᠤᠯᠠᠨ ᠪᠠᠶᠢᠵᠤ ᠠᠶᠠᠨ ᠎ ᠤ ᠦᠬᠡᠷ ᠤᠳ ᠬᠡᠳᠡᠬᠡᠨ᠎ᠡ ᠳᠤ ᠬᠠᠳᠬᠤᠭᠳᠠᠵᠤ ᠤᠭᠤᠳᠤᠩᠨᠠᠳᠠᠭ ᠶᠤᠮ᠃ ᠨᠢᠭᠡ ᠤᠳᠠᠭ᠎ᠠ ᠠᠶᠠᠨ ᠤ ᠦᠬᠡᠷ ᠤᠳ ᠎ ᠢᠶᠠᠨ ᠢᠳᠡᠭᠦᠯᠵᠤ ᠪᠠᠶᠢᠳᠠᠯ᠎ᠠ ᠭᠡᠨᠡᠳᠳᠠ ᠦᠬᠡᠷ ᠤᠳ ᠬᠠᠯᠠᠭᠤᠨ ᠳᠤ ᠤᠭᠤᠳᠤᠩᠨᠠᠨ ᠬᠦᠶᠦᠯᠳᠤᠵᠤ᠂ ᠶᠠᠭᠠᠬᠢᠵᠤ ᠡᠶᠢᠬᠦ ᠶᠢᠨ ᠵᠠᠪ ᠦᠭᠡᠢ ᠪᠠᠷ᠎ᠠ ᠲᠠᠰᠤᠷᠠᠵᠤ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠤᠯᠪᠠ᠃      ᠪᠢ ᠪᠠᠴᠢᠮᠳᠠᠨ ᠰᠠᠨᠳᠤᠷᠴᠤ᠄ ︿ᠬᠠᠶᠢᠷᠬᠠᠨ ᠡ᠂ ᠨᠠᠳᠠ ᠶᠢ ᠠᠪᠤᠷᠠ᠂ ᠦᠬᠡᠷ ᠤᠳ ᠮᠢᠨᠢ ᠬᠡᠭᠡᠭᠳᠡᠴᠢᠬᠡᠯ᠎ᠡ﹀ ᠭᠡᠳ ᠶᠠᠪᠠᠭᠠᠨ ᠢᠶᠠᠷ ᠬᠡᠳᠤᠨ ᠠᠷᠪᠠᠨ ᠭᠠᠵᠠᠷ ᠨᠠᠰᠢ ᠴᠠᠰᠢ ᠭᠦᠶᠦᠨ ᠡᠷᠢᠵᠤ ᠪᠠᠶᠢᠳᠠᠯ᠎ᠠ ᠭᠡᠨᠡᠳᠳᠠ ᠮᠢᠨᠤ ᠡᠮᠤᠨᠡᠬᠦᠷ ᠨᠢᠭᠡᠨ ᠴᠠᠭᠠᠨ ᠡᠷᠢᠶᠡᠨ ᠮᠤᠭᠠᠢ ᠲᠤᠷ᠎ᠠ ᠮᠠᠭᠤᠳᠠᠶᠢᠬᠠᠨ ᠭᠤᠯᠭᠤᠵᠤ ᠪᠠᠶᠢᠬᠤ ᠬᠠᠷᠠᠭᠳᠠᠯ᠎ᠠ᠃      ᠪᠢ ᠲᠤᠤᠷ᠎ᠠ ᠨᠢ ᠭᠠᠷ ᠠᠯᠴᠢᠭᠤᠷ ᠢᠶᠠᠨ ᠲᠡᠯᠭᠡᠨ ᠲᠠᠭᠠᠳᠬᠠᠨ ᠮᠦᠷᠬᠦᠵᠤ᠄ ︿ᠬᠠᠶᠢᠷᠬᠠᠨ ᠡ︕ ᠲᠠ ᠦᠨᠡᠬᠡᠷ ᠬᠠᠶᠢᠷᠬᠠᠨ ᠪᠤᠯ ᠮᠢᠨᠤ ᠡᠨᠡ ᠠᠯᠴᠢᠭᠤᠷ ᠲᠡᠭᠡᠷ᠎ᠡ ᠬᠡᠪᠳᠡᠭᠡᠷᠡᠢ᠂ ᠪᠢ ᠭᠡᠷ ᠲᠤ ᠪᠠᠨ ᠡᠬᠦᠷᠴᠤ ᠬᠠᠷᠢᠭᠠᠳ ᠲᠠᠨ ᠢ ᠰᠢᠳᠤᠨ ᠲᠠᠬᠢᠶ᠎ᠠ᠃ ᠪᠢ ᠲᠦᠴᠢᠨ ᠬᠡᠳᠤᠨ ᠦᠭᠡᠷ ᠢᠶᠠᠨ ᠠᠯᠳᠠᠴᠢᠬᠠᠯ᠎ᠠ᠂ ᠨᠠᠳᠠ ᠶᠢ ᠦᠷᠦᠰᠢᠶᠡᠭᠡᠷᠡᠢ︕﹀ ᠬᠡᠵᠤ ᠪᠠᠶᠢᠨ ᠲᠠᠬᠢᠨ ᠲᠠᠭᠠᠳᠬᠠᠨ ᠮᠦᠷᠬᠦᠭᠰᠡᠨ ᠳᠤ ᠭᠠᠷ ᠤᠨ ᠠᠯᠴᠢᠭᠤᠷ ᠳᠡᠭᠡᠷ᠎ᠡ ᠭᠤᠯᠭᠤᠨ ᠢᠷᠡᠵᠤ ᠲᠤᠭᠤᠶᠢᠯᠠᠨ ᠬᠡᠪᠳᠡᠪᠡ᠃ ᠲᠠᠮᠠᠢ ᠤᠳᠠᠭᠰᠠᠨ ᠦᠭᠡᠢ ᠪᠢ ᠦᠨᠡᠬᠡᠷ ᠦᠬᠡᠷ ᠢᠶᠠᠨ ᠪᠦᠬᠦᠨ ᠢ ᠤᠯᠵᠤ ᠠᠶᠠᠨ ᠢᠶᠠᠨ ᠬᠦᠬᠡᠬᠡᠵᠤ᠂ ᠬᠠᠶᠢᠷᠬᠠᠨ ᠤ ᠬᠤᠪᠢᠯᠭᠠᠨ ᠴᠠᠭᠠᠨ ᠡᠷᠢᠶᠡᠨ ᠮᠤᠭᠠᠢ ᠪᠠᠨ ᠡᠬᠦᠷᠤᠨ ᠬᠡᠳᠤᠨ ᠵᠠᠭᠤᠨ ᠭᠠᠵᠠᠷ ᠢ ᠶᠠᠪᠠᠭᠠᠨ ᠢᠶᠠᠷ ᠠᠶᠠᠯᠠᠨ ᠬᠠᠷᠢᠵᠤ ᠢᠷᠡᠬᠦ ᠳᠤ ᠠᠯᠴᠢᠭᠤᠷ ᠤᠨ ᠲᠤᠳᠤᠷ᠎ᠠ ᠵᠦᠪᠬᠡᠨ ᠴᠠᠭᠠᠨ ᠡᠷᠢᠶᠡᠨ ᠮᠤᠭᠠᠢ ᠶᠢᠨ ᠬᠠᠯᠢᠰᠤ ᠯᠡ ᠦᠯᠡᠳᠡᠭᠰᠡᠨ ᠪᠠᠶᠢᠪᠠ᠃      ᠪᠢ ᠲᠤᠩ ᠰᠢᠳᠦᠨ ᠰᠦᠰᠦᠭᠯᠡᠵᠤ᠂ ᠨᠤᠳᠤᠭ ᠤᠨ ᠢᠶᠠᠨ ᠠᠭᠤᠯᠠᠨ ᠳᠤ ᠪᠠᠶᠢᠳᠠᠭ ᠤᠯᠠᠨ ᠶᠠᠩᠵᠤ ᠶᠢᠨ ᠲᠦᠷᠰᠤ ᠲᠠᠢ ᠮᠤᠳᠤᠨ ᠤ ᠦᠨᠳᠤᠰᠤ ᠶᠢ ᠴᠤᠭᠯᠠᠭᠤᠯᠵᠤ᠂ ᠭᠡᠷ ᠠᠴᠠ ᠪᠠᠨ ᠪᠠᠷᠠᠭᠤᠨ ᠬᠤᠶᠢᠰᠢ ᠶᠢᠨ ᠢᠭ᠌ᠴᠢ ᠰᠠᠬᠤᠯᠢᠭ ᠦᠨᠳᠤᠷ ᠬᠠᠶᠢᠯᠠᠰᠤᠨ ᠮᠤᠳᠤᠨ ᠤ ᠲᠤᠮᠳᠠ ᠤᠪᠤᠭᠠᠯᠠᠵᠤ ᠮᠤᠭᠠᠢ ᠶᠢᠨ ᠬᠠᠯᠢᠰᠤ ᠪᠠᠨ ᠬᠢᠵᠤ ᠲᠠᠬᠢᠭᠰᠠᠨ ᠶᠤᠮ᠃      ᠲᠡᠬᠦᠨ ᠠᠴᠠ ᠬᠤᠶᠢᠰᠢ᠂ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠰᠢᠨ᠎ᠡ ᠶᠢᠨ ᠨᠢᠭᠡᠨ᠂ ᠠᠷᠪᠠᠨ ᠲᠠᠪᠤᠨ ᠳᠤ ᠬᠦᠵᠢ ᠡᠷᠬᠦᠨ᠂ ᠠᠭᠤᠯᠠ ᠤᠰᠤ᠂ ᠨᠤᠳᠤᠭ ᠤᠨ ᠰᠢᠷᠤᠢ᠂ ᠠᠮᠢᠳᠠᠨ ᠭᠤᠤᠯᠳᠠᠨ ᠢ ᠳᠠᠭᠠᠳᠬᠠᠨ ᠰᠠᠶᠢᠨ ᠰᠠᠶᠢᠬᠠᠨ ᠎ ᠤ ᠰᠦᠵᠢᠭ ᠢᠶᠠᠨ ᠬᠦᠢᠴᠡᠳᠬᠡᠳᠡᠭ︾ ᠭᠡᠵᠤ ᠡᠪᠦᠭᠡ ᠮᠢᠨᠢ ᠦᠨᠡᠨ ᠪᠤᠳᠠᠳᠠᠢ ᠦᠯᠢᠭᠡᠷ ᠢᠶᠠᠨ ᠶᠠᠷᠢᠵᠤ ᠪᠠᠶᠢᠭᠰᠠᠨ ᠨᠢ ᠦᠨᠡᠬᠡᠷ ᠰᠡᠳᠬᠢᠬᠦᠰᠢᠳᠠᠢ ᠶᠤᠮ᠃      ᠨᠠᠮᠠᠢᠢ ᠲᠦᠬᠦᠭᠡ ᠤᠷᠤᠭᠰᠠᠨ ᠠᠴᠠ ᠠᠪᠤᠭᠠᠳ᠂ ᠡᠪᠦᠭᠡ᠂ ᠡᠮᠡᠭᠡ ᠮᠢᠨᠢ ᠬᠡᠵᠢᠶᠡᠳᠠ ᠠᠯᠢᠪᠠ ᠪᠠᠨ ᠰᠢᠳᠤᠨ ᠲᠠᠭᠠᠳᠬᠠᠵᠤ ᠪᠠᠶᠢᠳᠠᠭ ᠨᠢ ᠤᠳᠤ ᠪᠤᠯᠳᠠᠯ᠎ᠠ ᠰᠡᠳᠬᠢᠯ ᠳᠤ ᠬᠠᠳᠠᠩᠰᠢᠭᠰᠠᠨ ᠶᠤᠮ᠃ ᠨᠢᠭᠡ ᠤᠳᠠᠭ᠎ᠠ ᠠᠪᠤ ᠮᠢᠨᠢ ᠦᠨᠡᠭᠡ ᠲᠠᠭᠤᠵᠤ ᠡᠭᠦᠷ ᠲᠤ ᠨᠢ ᠤᠷᠤᠭᠤᠯᠵᠤ ᠨᠥᠬᠡᠳᠡᠬᠦᠯᠦᠭᠡᠳ ᠨᠢᠭᠡ ᠬᠦᠯ ᠢ ᠨᠢ ᠬᠤᠭᠤᠯᠵᠤ ᠮᠤᠰᠬᠢᠭᠠᠳ ᠭᠠᠷᠭᠠᠭᠰᠠᠨ ᠶᠤᠮ᠃ ᠮᠢᠨᠤ ᠲᠡᠭᠦᠦ ᠲᠡᠷᠡ ᠦᠶᠡᠰ ᠤᠢ ᠬᠦᠷᠦᠭᠡᠳᠤᠢ ᠪᠠᠶᠢᠭᠰᠠᠨ᠂ ᠭᠡᠨᠡᠳᠳᠠ ᠨᠢᠭᠡ ᠡᠳᠤᠷ ᠲᠡᠬᠦᠦ ᠮᠢᠨᠢ᠄ ︽ᠮᠢᠨᠤ ᠭᠠᠷ ᠡᠪᠡᠳᠴᠤ ᠪᠠᠶᠢᠨ᠎ᠠ︾ ᠭᠡᠳ ᠠᠷᠭ᠎ᠠ ᠠᠭᠠᠰᠢ ᠨᠢ ᠪᠠᠷᠠᠭᠳᠠᠵᠤ ᠰᠠᠨᠳᠤᠷᠤᠭᠰᠠᠨ ᠳᠤ ᠡᠮᠡᠭᠡ ᠄ ︽ᠴᠢ ᠦᠨᠡᠭᠡ ᠲᠠᠭᠤᠵᠤ ᠨᠦᠬᠡᠳᠡᠬᠦᠯᠦᠯ᠎ᠡ ᠬᠡᠰᠡᠨ᠂ ᠯᠠᠪ ᠬᠦᠯ ᠢ ᠨᠢ ᠬᠤᠭᠤᠯᠤᠭᠰᠠᠨ ᠪᠠᠶᠢᠬ᠎ᠠ᠂ ᠬᠠᠷᠢᠭᠤ ᠨᠢ ᠢᠷᠡᠵᠤ ᠪᠠᠶᠢᠬᠤ ᠨᠢ ᠡᠨᠡ᠃ ᠲᠦᠷᠬᠡᠨ ᠤᠴᠢᠵᠤ ᠬᠠᠶᠢᠷᠬᠠᠨ ᠳᠤ ᠲᠠᠭᠠᠳᠬᠠᠵᠤ᠂ ᠡᠨᠡ ᠨᠠᠰᠤᠨ ᠳᠤ ᠪᠠᠨ ᠠᠮᠢ ᠲᠠᠢ ᠠᠮᠢᠳᠠᠨ ᠤ ᠠᠮᠢ ᠶᠢ ᠨᠢ ᠬᠤᠷᠤᠭᠠᠬᠤ ᠦᠭᠡᠢ ᠬᠡᠵᠤ ᠠᠮᠠᠯᠳᠠ︕︾ ᠬᠡᠵᠤ ᠠᠪᠤ ᠳᠤ ᠠᠭᠤᠷᠯᠠᠵᠤ ᠪᠠᠶᠢᠯ᠎ᠠ᠂ ᠲᠡᠬᠦᠨ ᠠᠴᠠ ᠬᠤᠶᠢᠰᠢ ᠠᠪᠤ ᠮᠢᠨᠢ ᠠᠪᠠ ᠬᠢᠵᠤ ᠠᠮᠢᠳᠠᠨ ᠠᠯᠠᠬᠤ ᠶᠢ ᠲᠤᠩ ᠴᠡᠭᠡᠷᠯᠡᠵᠠᠢ᠃      ᠤᠳᠤ ᠴᠦ ᠭᠡᠰᠡᠨ ᠲᠡᠷᠡ ᠨᠤᠳᠤᠭ ᠤᠨ ᠤᠢ ᠮᠤᠳᠤ᠂ ᠡᠪᠡᠰᠤ ᠤᠷᠭᠤᠮᠠᠯ ᠢ ᠪᠤᠰᠤᠳ ᠬᠦᠮᠦᠰ ᠲᠤᠷ᠎ᠠ ᠪᠠᠷ ᠢᠶᠠᠨ ᠬᠠᠳᠤᠵᠤ ᠤᠭᠳᠤᠯᠪᠠᠯ ᠬᠠᠷᠢᠭᠤ ᠲᠠᠢ ᠪᠠᠶᠢᠳᠠᠭ ᠶᠤᠮ᠃        ᠵᠤᠬᠢᠶᠠᠭᠴᠢ ᠶᠢᠨ ᠲᠠᠨᠢᠯᠴᠠᠭᠤᠯᠭ᠎ᠠ᠄      ᠬᠦᠦᠳᠠᠭᠤᠯᠠ᠂ ᠬᠡᠰᠢᠭᠳᠡᠨ ᠬᠤᠰᠢᠭᠤᠨ ᠤ ᠲᠠᠯᠠᠶᠢᠨᠠᠭᠤᠷ ᠪᠠᠯᠭᠠᠰᠤ ᠶᠢᠨ ᠬᠠᠨᠳᠤᠬᠤ ᠭᠠᠴᠠᠭ᠎ᠠ ᠎ ᠳᠤ ᠨᠤᠳᠤᠭ ᠲᠠᠢ᠃ 1981 ᠤᠨ ᠳᠤ ᠯᠢᠨᠳᠦ᠋ᠩ ᠳᠠᠬᠢ ᠪᠠᠭᠰᠢ ᠶᠢᠨ ᠰᠤᠷᠭᠠᠭᠤᠯᠢ ᠠᠴᠠ ᠲᠡᠭᠦᠰᠴᠤ᠂ ᠪᠠᠶᠠᠨᠴᠠᠭᠠᠨ ᠰᠤᠮᠤᠨ ᠤ ᠪᠦᠷᠢᠨ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠳᠤ ᠪᠠᠭᠰᠢᠯᠠᠵᠤ᠂ ᠬᠢᠴᠢᠶᠡᠯ ᠬᠦᠮᠦᠵᠢᠯ ᠤᠨ ᠡᠷᠬᠢᠯᠡᠭᠴᠢ᠂ ᠲᠡᠳ᠋ ᠵᠠᠬᠢᠷᠤᠯ ᠤᠨ ᠲᠤᠰᠢᠶᠠᠯ ᠢ ᠬᠠᠷᠢᠭᠤᠴᠠᠵᠤ ᠪᠠᠶᠢᠪᠠ᠃ 2012 ᠣᠨ ᠳᠤ ᠠᠵᠢᠯ ᠤᠨ ᠠᠮᠠᠷᠠᠯᠳᠠ ᠪᠠᠨ ᠠᠪᠤᠪᠠ ᠃  
  
ᠢᠷᠡᠯᠲᠡ᠄ ᠬᠡᠰᠢᠭᠲᠡᠨ ᠮᠣᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号