ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠪᠤᠲᠤᠭ ᠠᠷᠢᠯᠳᠠᠭ ᠦᠭᠡᠢ ᠤᠲᠤᠮ ᠲᠠᠰᠤᠷᠠᠳᠠᠭ ᠦᠭᠡᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2014/10/21
  — ᠪᠤᠯᠤᠴᠢᠯᠠᠭᠤ ᠶᠢᠨ ︽ᠮᠤᠩᠭᠤᠯᠴᠤᠤᠨ ᠤᠨ ᠤᠯᠠᠮᠵᠢᠯᠠᠯᠲᠤ ᠭᠡᠷ ᠪᠦᠯᠢ ᠶᠢᠨ        ᠬᠦᠮᠦᠵᠢᠯ ᠪᠤᠯᠤᠨ ᠰᠡᠳᠭᠢᠴᠨ᠎ ᠎ ᠶᠢᠨ ᠡᠷᠡᠭᠦᠯ ᠮᠠᠨᠲᠤ ︾᠎ ᠎ ᠶᠢᠨ ᠲᠤᠬᠠᠢ ᠲᠠᠶᠢᠯᠤᠮᠵᠢ                                                   ● ᠰᠤᠷᠪᠤᠯᠵᠢᠯᠠᠭᠴᠢ ᠭᠡᠰᠢᠭᠪᠡᠶᠠᠷ      9 ᠰᠠᠷ᠎ᠠ ᠶᠢᠨ 20᠎ ᠤ ᠡᠳᠤᠷ ᠤᠨ ᠦᠳᠡ ᠶᠢᠨ ᠡᠮᠦᠨ᠎ᠠ᠂ ︽ᠮᠤᠩᠭᠤᠯᠴᠤᠳ ᠤᠨ ᠭᠡᠷ ᠪᠦᠯᠢ ᠶᠢᠨ ᠬᠦᠮᠦᠵᠢᠯ︾ ᠭᠡᠬᠦ ᠨᠤᠮ ᠤᠨ ᠵᠤᠬᠢᠶᠠᠭᠴᠢ ᠪᠤᠯᠤᠴᠢᠯᠠᠭᠤ ᠦᠪᠤᠷ ᠮᠤᠩᠭᠤᠯ ᠤᠨ ᠪᠠᠭᠰᠢ ᠶᠢᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠨᠢᠭᠡᠨ ᠬᠢᠴᠢᠶᠠᠯ ᠤᠨ ᠬᠡᠷ ᠲᠤ ︽ᠮᠤᠩᠭᠤᠯᠴᠤᠳ ᠤᠨ ᠤᠯᠠᠮᠵᠢᠯᠠᠯᠳᠤ ᠬᠡᠷ ᠪᠦᠯᠢ ᠶᠢᠨ ᠬᠦᠮᠦᠵᠢᠯ ᠪᠤᠯᠤᠨ ᠰᠡᠳᠬᠢᠴᠠ ᠶᠢᠨ ᠡᠷᠡᠭᠦᠯ ᠮᠠᠨᠳᠤ︾ ᠬᠡᠬᠦ ᠠᠭᠤᠯᠭ᠎ᠠ ᠪᠠᠷ ᠲᠠᠶᠢᠯᠤᠮᠵᠢ ᠬᠢᠭᠰᠡᠨ ᠪᠢᠯᠠ᠃      ︽ᠨᠠᠶᠢᠭᠡᠮ ᠤᠨ ᠬᠦᠭᠵᠢᠯᠳᠠ ᠬᠤᠪᠢᠷᠠᠯᠳᠠ ᠪᠤᠯᠨ ᠢᠨᠲ᠋ᠧᠷ ᠰᠦᠯᠵᠢᠶ᠎ᠠ ᠲᠦᠭᠡᠮᠡᠯᠵᠢᠬᠦ ᠶᠢ ᠲᠠᠭᠠᠯᠳᠤᠨ ᠮᠤᠩᠭᠤᠯᠴᠤᠳ ᠤᠨ ᠦᠢᠯᠡᠳᠪᠤᠷᠢᠯᠠᠯ ᠠᠮᠢᠳᠤᠷᠠᠯ ᠤᠨ ᠠᠷᠭ᠎ᠠ ᠭᠡᠯᠪᠡᠷᠢ᠂ ᠲᠤᠮᠤᠴᠤᠳ ᠤᠨ ᠠᠰᠢᠭ ᠰᠤᠨᠢᠷᠬᠠᠯ᠂ ᠬᠠᠷᠢᠯᠴᠠᠭ᠎ᠠ ᠶᠠᠪᠤᠯᠴᠠᠭ᠎ᠠ ᠠᠴᠠ ᠡᠬᠢᠯᠡᠭᠡᠳ ᠬᠡᠦᠭᠡᠳ ᠤᠨ ᠰᠡᠳᠬᠢᠵᠦ ᠰᠤᠨᠢᠷᠬᠠᠬᠤ ᠨᠢ ᠬᠦᠷᠳᠡᠯ᠎ᠠ ᠬᠤᠪᠢᠷᠠᠵᠦ᠂ ᠦᠨᠤᠳᠤᠷ ᠤᠨ ᠬᠡᠦᠭᠡᠳ ᠤᠨ ᠬᠦᠮᠦᠵᠢᠯ ᠳᠤ ᠤᠯᠠᠨ ᠰᠢᠨ᠎ᠠ ᠠᠰᠠᠭᠤᠳᠠᠯ ᠲᠤᠯᠭᠠᠷᠠᠵᠦ ᠪᠠᠶᠢᠨ᠎ᠠ︾ ᠬᠡᠵᠦ ᠪᠤᠯᠤᠴᠢᠯᠠᠭᠤ ᠲᠠᠶᠢᠯᠤᠮᠵᠢ ᠪᠠᠨ ᠡᠬᠢᠯᠡᠬᠦᠯᠵᠦ᠂ ︽ᠦᠨᠠᠨ ᠳᠡᠭᠡᠨ᠂ ᠮᠠᠨ ᠤ ᠮᠤᠩᠭᠤᠯᠴᠤᠳ ᠪᠤᠯ ᠰᠢᠰᠲ᠋ᠧᠮᠵᠢᠭᠰᠡᠨ ᠬᠡᠷ ᠪᠦᠯᠢ ᠶᠢᠨ ᠬᠦᠮᠦᠵᠢᠯ ᠰᠤᠷᠭᠠᠯ ᠲᠠᠢ ᠰᠤᠶᠤᠯᠳᠤ ᠤᠭᠰᠠᠭᠠᠳᠠᠨ᠂ ᠬᠡᠦᠭᠡᠢ ᠶᠢᠨ ᠬᠦᠮᠤᠵᠢᠯ ᠠᠴᠠ ᠡᠬᠢᠯᠡᠭᠡᠳ ᠬᠡᠯᠡ ᠵᠠᠩᠰᠢᠯ᠂ ᠠᠵᠤ ᠲᠦᠷᠦᠬᠦ ᠶᠤᠰᠤᠨ ᠬᠦᠷᠳᠡᠯ᠎ᠠ ᠪᠦᠷᠢᠨ ᠬᠦᠮᠦᠵᠢᠯ ᠲᠠᠢ ᠪᠠᠶᠢᠵᠦ᠂ ᠨᠡᠶᠢᠭᠡᠮ᠂ ᠦᠢᠯᠡᠳᠪᠤᠷᠢᠯᠠᠯ ᠠᠮᠢᠳᠤᠷᠠᠯ ᠤᠨ ᠬᠡᠷᠡᠭᠴᠡᠭᠡ ᠱᠠᠭᠠᠷᠳᠠᠯᠭ᠎ᠠ ᠪᠠᠷ ᠬᠡᠦᠭᠡᠳ ᠢᠶᠠᠨ ᠠᠶᠠᠨᠴᠢᠨ ᠵᠢᠩᠴᠢᠨ᠂ ᠠᠩᠴᠢᠨ ᠬᠦᠷᠦᠭᠡᠴᠢᠨ᠂ ᠤᠶᠠᠭᠠᠴᠢᠨ ᠡᠮᠨᠢᠭᠴᠢᠨ᠂ ᠤᠶᠤᠳᠠᠯᠴᠢᠨ ᠰᠠᠭᠠᠯᠢᠴᠢᠨ᠂ ᠡᠮᠴᠢ ᠲᠤᠮᠴᠢ᠂ ᠤᠷᠠᠯᠢᠭᠴᠢᠨ ᠲᠠᠭᠤᠴᠢᠨ ᠬᠡᠳ ᠤᠯᠠᠨ ᠰᠠᠶᠢᠬᠠᠨ ᠠᠪᠢᠶᠠᠰᠳᠠᠨ ᠴᠢᠳᠠᠪᠤᠷᠢᠳᠠᠨ ᠪᠤᠯᠭᠠᠠ ᠬᠦᠮᠦᠵᠢᠬᠦᠯᠵᠦ ᠪᠠᠶᠢᠭᠰᠠᠨ ᠶᠤᠮ᠂ ᠦᠨᠤᠳᠤᠷ ᠬᠡᠳᠦ᠋ᠢᠪᠠᠷ ᠡᠳᠡᠭᠡᠷ ᠤᠯᠠᠨ ᠠᠵᠢᠯ ᠮᠡᠷᠭᠡᠵᠢᠯ ᠤᠨ ᠵᠠᠷᠢᠮ ᠨᠢ ᠨᠠᠶᠢᠭᠡᠮ ᠤᠨ ᠬᠡᠷᠡᠭᠴᠡᠭᠡ ᠠᠴᠠ ᠬᠤᠯᠠᠳᠠᠭᠰᠠᠨ ᠪᠤᠯᠪᠠᠴᠤ ᠬᠡᠦᠭᠡᠳ ᠬᠦᠮᠦᠵᠢᠬᠦᠯᠬᠦ ᠠᠷᠭ᠎ᠠ ᠵᠦᠢ ᠨᠢ ᠬᠡᠵᠢᠶᠠᠳᠠ ᠬᠤᠴᠤᠷᠬᠤ ᠶᠤᠰᠤ ᠦᠭᠡᠢ᠃ ᠡᠶᠢᠮᠦ ᠠᠴᠠ ᠪᠢᠳᠠ ᠤᠳᠤ ᠶᠢᠨ ᠨᠡᠶᠢᠭᠡᠮ ᠤᠨ ᠤᠷᠴᠢᠨ ᠳᠤ ᠤᠯᠠᠮᠵᠢᠯᠠᠯᠳᠤ ᠬᠡᠷ ᠪᠦ᠋ᠯᠢ ᠶᠢᠨ ᠬᠦᠮᠦᠵᠢᠯ ᠢᠶᠠᠨ ᠬᠡᠷᠬᠢᠨ ᠦᠪᠯᠡᠬᠦ ᠲᠤᠬᠠᠢ ᠠᠩᠬᠠᠷᠤᠯ ᠲᠠᠯᠪᠢᠨ ᠠᠷᠭ᠎ᠠ ᠰᠦᠪᠡᠭᠴᠢᠯᠡᠬᠦ ᠶᠤᠰᠤᠳᠠᠢ᠂ ᠬᠠᠮᠤᠭ ᠤᠨ ᠴᠢᠬᠤᠯᠠ ᠨᠢ ᠬᠦᠮᠦᠰ ᠤᠨ ᠶᠠᠰᠤ ᠴᠢᠰᠤᠨ ᠳᠤ ᠰᠢᠩᠭᠡᠭᠰᠡᠨ ᠤᠳᠤᠮᠰᠢᠯ ᠬᠡᠳᠡᠭ ᠰᠤᠶᠤᠯ ᠤᠨ ᠰᠦᠭ ᠰᠦᠨᠠᠰᠤ ᠪᠠᠨ ᠲᠠᠨᠢᠵᠦ ᠮᠡᠳᠡᠬᠦ ᠬᠡᠷᠡᠭᠳᠡᠢ ᠪᠤᠯᠤᠭᠠᠳ ᠪᠠᠶᠢᠨ᠎ᠠ︾ ᠬᠡᠳ ᠠᠭᠤᠯᠭ᠎ᠠ ᠳᠠᠭᠠᠨ ᠰᠢᠭᠤᠳ ᠤᠷᠤᠪᠠ᠃        ᠬᠡᠷ ᠪᠦᠯᠢ ᠶᠢᠨ 80%᠎ ᠤᠨ ᠬᠠᠷᠢᠭᠤᠴᠠᠯᠭ᠎ᠠ      ᠪᠤᠯᠤᠴᠢᠯᠠᠭᠤ ᠶᠢᠨ ᠦᠵᠡᠬᠦ ᠪᠠᠷ᠂ ᠤᠯᠠᠩᠭᠢ ᠬᠡᠷ ᠤᠨ ᠠᠬᠠᠮᠠᠳ ᠬᠡᠦᠭᠡᠳ ᠢᠶᠠᠨ ᠰᠠᠶᠢᠨ ᠪᠠᠭᠰᠢ ᠰᠠᠶᠢᠨ ᠰᠤᠷᠭᠠᠭᠤᠯᠢ ᠳᠤ ᠬᠦᠷᠭᠡᠪᠡᠯ ᠪᠤᠯᠴᠢᠬᠠᠨ᠎ᠠ ᠬᠡᠬᠦ ᠰᠢᠤᠬᠠᠨ ᠤᠢᠢᠯᠠᠭᠠᠯᠳᠠ ᠲᠠᠢ ᠪᠠᠶᠢᠳᠠᠭ ᠨᠢ ᠲᠤᠩ ᠪᠤᠷᠤᠭᠤ᠃      ᠰᠤᠷᠭᠠᠭᠤᠯᠢ ᠶᠢᠨ ᠬᠦᠮᠦᠵᠢᠯ ᠬᠡᠵᠢᠶ᠎ᠠ ᠴᠤ ᠬᠡᠷ ᠪᠦᠯᠢ ᠶᠢᠨ ᠬᠦᠮᠦᠵᠢᠯ ᠢ ᠤᠷᠤᠯᠠᠵᠦ ᠴᠢᠳᠠᠬᠤ ᠦᠭᠡᠢ᠃ ᠰᠤᠷᠭᠠᠭᠤᠯᠢ ᠶᠢᠨ ᠬᠦᠮᠦᠵᠢᠯ ᠪᠤᠯ ᠲᠠᠷᠢᠬᠢᠨ ᠤ ᠬᠦᠮᠦᠵᠢᠯ ᠪᠤᠶᠤ ᠡᠷᠳᠡᠮ ᠨᠤᠮ ᠵᠢᠭᠠᠬᠤ ᠪᠠᠷ ᠭᠤᠤᠯᠳᠠᠨ᠎ᠠ᠃ ᠰᠠᠶᠢᠨ ᠰᠤᠷᠬᠤ ᠤᠤ᠂ ᠮᠠᠭᠤ ᠰᠤᠷᠬᠤ ᠤᠤ︖ ᠬᠡᠳᠡᠭ ᠨᠢ ᠲᠠᠷᠢᠬᠢ ᠲᠤᠯᠤᠭᠠᠢ ᠲᠠᠢ ᠬᠠᠮᠢᠶ᠎ᠠ ᠦᠭᠡᠢ᠂ ᠬᠠᠷᠢᠨ ᠬᠡᠦᠭᠡᠳ ᠤᠨ ᠤᠪᠤᠷ ᠰᠡᠳᠬᠢᠯᠭᠡ ᠵᠠᠩ ᠰᠡᠳᠬᠢᠴᠠ ᠲᠤᠷ᠎ᠠ ᠰᠤᠨᠢᠷᠬᠠᠯ ᠠᠴᠠ ᠲᠤᠭᠳᠠᠭᠠᠭᠳᠠᠨ᠎ᠠ᠂ ᠲᠡᠭᠡᠭᠦ ᠳᠤ ᠡᠨᠡ ᠨᠢ ᠬᠡᠷ ᠪᠦᠯᠢ ᠶᠢᠨ ᠬᠦᠮᠤᠵᠢᠯ ᠲᠠᠢ ᠬᠤᠯᠪᠤᠭᠳᠠᠳᠠᠭ᠃ ᠦᠭᠡᠷ᠎ᠠ ᠪᠠᠷ ᠬᠡᠯᠡᠪᠡᠯ ᠵᠢᠷᠤᠭᠡ ᠰᠡᠳᠬᠢᠯ ᠤᠨ ᠬᠦᠮᠤᠵᠢᠯ ᠪᠤᠶᠤ ᠶᠠᠮᠠᠷᠬᠠᠨ ᠬᠦᠮᠦᠨ ᠮᠦᠰᠦ ᠵᠠᠩ ᠰᠤᠷᠳᠠᠯ ᠲᠠᠢ ᠬᠦᠮᠦᠨ ᠪᠤᠯᠬᠤ ᠨᠢ ᠭᠤᠤᠯᠳᠠᠭᠤ ᠬᠡᠷ ᠪᠦᠯᠢ ᠶᠢᠨ ᠤᠷᠴᠢᠨ ᠳᠤ ᠲᠦᠯᠦᠪᠰᠢᠷᠡᠨ᠎ᠠ᠃ ᠬᠠᠯᠠᠭᠤᠨ ᠰᠡᠳᠬᠢᠯ᠂ ᠦᠭᠡᠳᠡᠷᠭᠡᠭ ᠰᠡᠳᠬᠢᠯ᠂ ᠬᠠᠷᠢᠭᠤᠴᠠᠯᠭᠠᠳᠤ ᠰᠡᠳᠬᠢᠯ᠂ ᠠᠴᠢᠯᠠᠯ ᠵᠢᠷᠤᠮ ᠤᠨ ᠰᠡᠳᠬᠢᠯ᠂ ᠦᠷᠦ ᠵᠦᠭᠡᠯᠡᠨ ᠰᠡᠳᠬᠢᠯ ᠭᠡᠳ ᠲᠠᠷᠠ ᠤᠯᠠᠨ ᠬᠦᠮᠦᠯᠢᠭ ᠰᠡᠳᠬᠢᠯᠭᠡ ᠶᠢ ᠬᠡᠦᠭᠡᠳ ᠬᠡᠷ ᠪᠦᠯᠢ ᠶᠢᠨ ᠠᠭᠠᠷ ᠠᠴᠠ ᠬᠦᠷᠳᠡᠨ᠎ᠠ᠃ ᠬᠡᠦᠭᠡᠳ ᠢ ᠰᠤᠷᠭᠠᠭᠤᠯᠢ ᠳᠤ ᠬᠦᠷᠭᠡᠬᠦ ᠦᠶᠡᠰ ᠪᠠᠷᠤᠭ ︽ᠰᠡᠴᠡᠨ ᠰᠡᠷᠭᠦᠯᠡᠩ︾ ᠪᠤᠶᠤ ︽ᠪᠢᠳᠠᠭᠤ ᠮᠤᠩᠬᠠᠭ︾᠎ ᠨᠢ ᠨᠢᠭᠡᠨᠳᠡ ᠢᠯᠭᠠᠷᠠᠴᠢᠬᠠᠭᠰᠠᠨ ᠪᠠᠶᠢᠳᠠᠭ᠃ ᠲᠤᠬᠠᠢᠢᠯᠠᠪᠠᠯ᠂ ᠬᠠᠯᠠᠭᠤᠨ ᠲᠤᠯᠠᠭᠠᠨ ᠬᠡᠷ ᠪᠦᠯᠢ ᠶᠢᠨ ᠤᠷᠴᠢᠨ ᠳᠤ ᠪᠤᠶᠢᠵᠢᠭᠰᠠᠨ ᠬᠡᠦᠭᠡᠳ ᠤᠨ ᠬᠠᠯᠠᠭᠤᠨ ᠰᠡᠳᠬᠢᠯ ᠨᠢ ᠨᠡᠭᠡᠭᠡᠭᠳᠡᠵᠦ ᠶᠠᠭᠤᠮ᠎ᠠ ᠪᠦᠬᠦᠨ ᠳᠤ ᠰᠤᠨᠢᠭᠤᠴᠢ ᠪᠠᠶᠢᠵᠦ ︽ᠰᠡᠴᠡᠨ ᠰᠡᠷᠭᠦᠯᠠᠩ︾ ᠬᠡᠮᠡᠭᠳᠡᠵᠦ︔ ᠬᠡᠷ ᠵᠠᠭᠤᠷ᠎ᠠ ᠪᠠᠨ ᠬᠠᠯᠠᠭᠤᠨ ᠲᠤᠯᠠᠭᠠᠨ ᠶᠠᠷᠢᠶ᠎ᠠ ᠵᠤᠭᠤᠭ ᠦᠭᠡᠢ᠂ ᠬᠡᠦᠭᠡᠳ ᠲᠠᠢ ᠪᠠᠨ ᠰᠡᠳᠬᠢᠯ ᠰᠠᠨᠠᠭ᠎ᠠ ᠪᠠᠨ ᠤᠢᠢᠯᠠᠭᠠᠯᠴᠠᠳᠠᠭ ᠦᠭᠡᠢ᠂ ᠡᠪ ᠨᠠᠶᠢᠷ ᠪᠠᠷᠤᠭᠳᠠᠢ ᠬᠡᠷ ᠪᠦᠯᠢ ᠶᠢᠨ ᠤᠷᠴᠢᠨ ᠳᠤ ᠦᠰᠦᠭᠰᠡᠨ ᠬᠡᠦᠭᠡᠳ ᠶᠠᠭᠤᠮᠠᠨ ᠳᠤ ᠲᠠᠮᠠᠢ ᠲᠤᠷ᠎ᠠ ᠰᠤᠨᠢᠷᠬᠠᠯ ᠦᠭᠡᠢ᠂ ᠬᠡᠯᠡ ᠠᠮᠠᠨ ᠳᠠᠭᠠᠨ ᠪᠢᠳᠠᠭᠤ᠂ ᠬᠦᠮᠦᠨ ᠠᠴᠠ ᠵᠠᠶᠢᠳᠠᠭᠤ ᠬᠦᠳᠡᠮᠰᠦᠭ ᠪᠠᠶᠢᠵᠦ᠂ ᠠᠮᠠᠷᠠᠬᠠ ︽ᠪᠢᠳᠠᠭᠤ ᠮᠤᠩᠬᠠᠭ︾ ᠬᠡᠮᠠᠨ ᠦᠵᠡᠭᠳᠡᠨ᠎ᠠ᠃      ᠨᠦᠬᠦᠭᠡ ᠲᠠᠯ᠎ᠠ ᠪᠠᠷ ᠠᠪᠤ ᠡᠵᠢ ᠪᠤᠯᠤᠭᠰᠠᠨ ᠪᠢᠳᠠ ᠭᠠᠭᠴᠠ ᠬᠤᠶᠠᠷᠬᠠᠨ ᠬᠡᠦᠭᠡᠳ ᠲᠠᠢ ᠪᠠᠨ ᠪᠠᠰᠠ ᠰᠡᠳᠬᠢᠯ ᠰᠠᠨᠠᠭ᠎ᠠ ᠪᠠᠨ ᠰᠠᠶᠢᠬᠠᠨ ᠤᠢᠢᠯᠠᠭᠠᠯᠴᠠᠬᠤ ᠳᠤ ᠬᠦᠴᠢᠷᠳᠡᠵᠦ ᠪᠠᠶᠢᠬᠤ ᠳᠤ᠂ ᠠᠳᠠᠯᠢ ᠪᠤᠰᠤ ᠬᠡᠷ ᠪᠦᠯᠢ ᠶᠢᠨ ᠠᠭᠠᠷ ᠲᠤ ᠦᠰᠴᠤ ᠪᠠᠶᠢᠭ᠎ᠠ ᠲᠠᠷᠠ ᠤᠯᠠᠨ ᠠᠪᠤ ᠶᠢᠨ ᠬᠡᠦᠭᠡᠳ ᠢ ᠲᠠᠭᠠᠭᠤᠯᠵᠤ ᠶᠠᠪᠤᠭ᠎ᠠ ᠪᠠᠭᠰᠢ ᠰᠤᠷᠭᠠᠭᠤᠯᠢ ᠳᠤ ᠠᠯᠢᠪᠠ ᠶᠢ ᠨᠠᠶᠢᠳᠠᠬᠤ ᠪᠤᠯ ᠲᠤᠩ ᠤᠰᠤᠯ ᠲᠠᠢ ᠪᠤᠳᠤᠯ᠃ ︽ᠰᠤᠶᠤᠯ ᠤᠨ ᠶᠡᠭᠡ ᠬᠤᠪᠢᠰᠬᠠᠯ︾᠎ ᠤᠨ ᠭᠠᠯᠵᠠᠭᠤ ᠰᠢᠭᠤᠷᠭ᠎ᠠ ᠨᠠᠮᠳᠠᠵᠦ᠂ 1977 ᠤᠨ ᠠᠴᠠ ᠡᠬᠢᠯᠡᠨ ᠤᠯᠤᠰ ᠤᠨ ᠰᠢᠯᠭᠠᠯᠳᠠ ᠰᠡᠷᠭᠦᠭᠦ ᠳᠤ᠂ ᠮᠢᠩᠭᠠᠨᠴᠤᠭᠳᠤ᠂ ᠬᠠᠷᠠᠨᠤᠳ ᠰᠠᠶᠢᠨᠴᠤᠭᠳᠤ᠂ ᠪᠤᠷᠵᠢᠭᠢᠨ ᠬᠡᠷᠡᠯᠳᠦ᠂ ᠷᠠ᠊ · ᠡᠷᠳᠡᠮᠳᠦ᠂ ᠲᠡᠭᠦᠰᠪᠠᠶᠠᠷ ᠁ ᠬᠡᠳ ᠲᠤᠩ ᠤᠯᠠᠨ ᠪᠢᠴᠢᠭᠳᠡᠨ ᠡᠷᠳᠡᠮᠳᠡᠨ᠂ ᠰᠢᠨᠵᠢᠯᠠᠬᠦ ᠤᠬᠠᠭᠠᠨᠳᠠᠨ ᠴᠤᠯᠭᠤᠷᠠᠨ ᠭᠠᠷᠤᠭᠰᠠᠨ ᠢ ᠬᠦᠮᠦᠨ ᠪᠦᠬᠦᠨ ᠮᠡᠳᠡᠵᠦ ᠪᠠᠶᠢᠨ᠎ᠠ᠃ ᠰᠤᠷᠭᠠᠭᠤᠯᠢ ᠪᠠ ᠨᠠᠶᠢᠭᠡᠮ ᠤᠨ ᠬᠦᠮᠦᠵᠢᠯ ᠬᠦᠯ ᠠᠯᠳᠠᠨ ᠰᠠᠮᠠᠭᠤᠷᠠᠵᠦ ᠪᠠᠶᠢᠬᠰᠠᠨ ᠲᠡᠳᠡᠭᠡᠷ ᠤᠨ ᠵᠢᠯ ᠤᠳ ᠲᠤ ᠲᠡᠳᠡᠭᠡᠷ ᠰᠤᠳᠤᠨ ᠬᠦᠮᠦᠰ ᠴᠤᠯᠭᠤᠷᠠᠬᠤ ᠳᠤ ᠮᠠᠯᠴᠢᠨ ᠠᠷᠠᠳ ᠤᠨ ᠬᠡᠷ ᠪᠦ᠋ᠯᠢ ᠶᠢᠨ ᠬᠦᠮᠦᠵᠢᠯ ᠬᠠᠮᠤᠭ ᠤᠨ ᠴᠢᠬᠤᠯᠠ ᠦᠢᠯᠡᠳᠦᠯ ᠦᠵᠡᠬᠦᠯᠦᠭᠰᠨᠨ ᠶᠤᠮ᠃ ᠡᠶᠢᠮᠦ ᠠᠴᠠ ᠡᠷᠳᠡᠮᠳᠡᠳ ᠤᠨ ︽ᠬᠡᠦᠭᠡᠳ ᠤᠨ ᠬᠦᠮᠦᠨ ᠪᠤᠯᠬᠤ ᠳᠤ ᠬᠡᠷ ᠪᠦᠯᠢ 80%᠎ ᠤᠨ ᠬᠠᠷᠢᠭᠤᠴᠠᠯᠭ᠎ᠠ ᠲᠠᠢ︾ ᠬᠡᠰᠡᠨ ᠢ ᠵᠦᠪ ᠢᠶᠠᠷ ᠤᠢᠢᠯᠠᠭᠠᠬᠤ ᠴᠢᠬᠤᠯᠠᠳᠠᠢ᠃      ᠠᠮᠧᠷᠢᠺᠠ ᠶᠢᠨ ᠬᠠᠷᠸᠠᠷᠳ᠋ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠰᠤᠳᠤᠯᠭᠠᠨ ᠳᠤ ︽ᠬᠦᠮᠦᠨ ᠤ ᠬᠤᠪᠢ ᠵᠠᠶᠠᠭ᠎ᠠ ᠨᠠᠢᠮᠠᠨ ᠴᠠᠭ ᠤᠨ ᠭᠠᠳᠠᠨ᠎ᠠ ᠢᠯᠭᠠᠷᠠᠨ᠎ᠠ︾ ᠬᠡᠰᠡᠨ ᠳ᠋ᠦᠡᠭᠨᠠᠯᠳᠠ ᠪᠠᠶᠢᠳᠠᠭ᠃ ᠬᠡᠦᠭᠡᠳ ᠴᠤ ᠬᠡᠰᠡᠨ᠂ ᠲᠤᠮᠤᠴᠤᠳ ᠴᠤ ᠬᠡᠰᠡᠨ ᠰᠤᠷᠤᠯᠴᠠᠵᠦ ᠪᠠᠶᠢᠭ᠎ᠠ ᠪᠤᠶᠤ ᠠᠵᠢᠯᠯᠠᠵᠦ ᠪᠠᠶᠢᠭ᠎ᠠ ᠴᠠᠭ ᠲᠤ ᠶᠠᠮᠠᠷ ᠴᠤ ᠤᠴᠢᠷ ᠶᠠᠪᠤᠳᠠᠯ ᠳᠤ ᠬᠤᠯᠪᠤᠭᠳᠠᠬᠤ ᠦᠭᠡᠢ᠂ ᠬᠡᠳᠦᠷᠡᠬᠦ ᠳᠡᠭᠡᠨ ᠠᠵᠢᠯ ᠰᠤᠷᠤᠯᠭ᠎ᠠ ᠶᠢᠨ ᠰᠠᠶᠢᠨ ᠮᠠᠭᠤ ᠶᠢᠨ ᠵᠦᠷᠢᠶ᠎ᠠ ᠭᠠᠷᠬᠤ ᠲᠠᠳᠤᠢ᠂ ᠬᠠᠷᠢᠨ ᠠᠵᠢᠯ ᠰᠤᠷᠤᠯᠭ᠎ᠠ ᠶᠢᠨ ᠭᠠᠳᠠᠭᠤᠷ ᠶᠠᠭᠤ ᠰᠤᠨᠢᠷᠬᠠᠵᠦ ᠬᠠᠮᠢᠭᠠᠰᠢ ᠪᠠᠨ ᠬᠦᠶᠦᠵᠦ ᠪᠠᠶᠢᠨ᠎ᠠ ᠬᠡᠳᠡᠭ ᠢᠶᠠᠷ ᠨᠢᠭᠡ ᠬᠦᠮᠦᠨ ᠤ ᠬᠤᠪᠢ ᠵᠠᠶᠠᠭ᠎ᠠ ᠲᠤᠭᠳᠠᠭᠠᠭᠳᠠᠨ᠎ᠠ᠃ ᠬᠡᠦᠭᠡᠳ ᠰᠤᠷᠭᠠᠭᠤᠯᠢ ᠪᠠᠨ ᠲᠠᠷᠬᠠᠭᠠᠳ ᠲᠤᠭᠯᠠᠭᠠᠮ ᠤᠨ ᠭᠠᠵᠠᠷ ᠢᠨᠲᠧᠷ ᠰᠦᠯᠵᠢᠶ᠎ᠠ ᠪᠠᠷ ᠡᠷᠬᠢᠴᠡᠵᠦ ᠪᠠᠶᠢᠨ᠎ᠠ ᠤᠤ︖ ᠡᠰᠡᠪᠠᠯ ᠬᠡᠷ ᠲᠡᠭᠡᠨ ᠬᠠᠷᠢᠭᠠᠳ ᠪᠠᠶᠠᠷ ᠬᠦᠷ ᠲᠠᠢ ᠨᠠᠭᠠᠳᠴᠤ ᠪᠠᠶᠢᠨ᠎ᠠ ᠤᠤ︖ ᠠᠪᠤ ᠡᠵᠢ ᠳᠡᠭᠡᠨ ᠲᠤᠰᠠ ᠲᠠᠮ ᠪᠤᠯᠵᠤ ᠪᠠᠶᠢᠨ᠎ᠠ ᠤᠤ︖ ᠦᠪᠠᠷ ᠤᠨ ᠲᠤᠷ᠎ᠠ ᠰᠤᠨᠢᠷᠬᠠᠯ ᠲᠠᠢ ᠶᠠᠭᠤᠮ᠎ᠠ ᠪᠠᠨ ᠤᠷᠤᠯᠳᠤᠵᠦ ᠪᠠᠶᠢᠨ᠎ᠠ ᠤᠤ︖ ᠲᠤᠮᠤᠴᠤᠳ ᠨᠢ ᠠᠵᠢᠯ ᠪᠠᠭᠤᠪᠠᠯ ᠭᠠᠳᠠᠭᠤᠷ ᠬᠦᠶᠦᠵᠦ ᠪᠠᠶᠢᠨ᠎ᠠ ᠤᠤ ︖ ᠡᠰᠡᠪᠡᠯ ᠬᠡᠷ ᠲᠡᠭᠡᠨ ᠶᠠᠭᠠᠷᠠᠵᠦ ᠪᠠᠶᠢᠨ᠎ᠠ ᠤᠤ︖ ᠠᠵᠢᠯ ᠤᠨ ᠴᠢᠯᠦᠭᠡᠨ ᠳᠡᠭᠡᠨ ᠠᠪᠢᠶᠠᠰ ᠲᠤᠷ᠎ᠠ ᠲᠠᠢ ᠵᠦᠢᠯ ᠢᠶᠠᠨ ᠤᠷᠤᠯᠳᠤᠵᠦ ᠪᠠᠶᠢᠨ᠎ᠠ ᠤᠤ︖ ᠬᠡᠳᠡᠭ ᠢᠶᠠᠷ ᠲᠤᠰ ᠬᠦᠮᠦᠨ ᠪᠤᠶᠤ ᠲᠤᠰ ᠠᠶᠢᠯ ᠭᠡᠷ ᠤᠨ ᠠᠮᠢᠳᠤᠷᠠᠯ ᠤᠨ ᠦᠡᠭᠭᠡ ᠲᠤᠭᠳᠠᠭᠠᠭᠳᠠᠨ᠎ᠠ᠃       ᠬᠠᠮᠤᠭ ᠤᠨ ᠴᠢᠬᠤᠯᠠ ᠨᠢ ᠨᠦᠬᠦᠴᠡᠯ ᠲᠦᠭᠦᠭᠡᠷᠦᠮᠵᠢ ᠪᠤᠰᠤ ᠬᠠᠷᠢᠨ ᠬᠡᠷ ᠪᠦᠯᠢ ᠶᠢᠨ ᠬᠦᠮᠦᠵᠢᠯ ᠶᠤᠮ      ᠪᠤᠯᠤᠴᠢᠯᠠᠭᠤ ᠶᠢᠨ ᠦᠵᠡᠬᠦ ᠪᠠᠷ᠂ ᠦᠨᠤᠳᠤᠷ ᠤᠨ ᠬᠡᠦᠭᠡᠳ ᠤᠨ ᠬᠦᠮᠦᠵᠢᠯ ᠳᠤ ᠤᠷᠤᠰᠢᠵᠦ ᠪᠠᠶᠢᠭ᠎ᠠ ᠴᠢᠬᠤᠯᠠ ᠠᠰᠠᠭᠤᠳᠠᠯ ᠪᠤᠯ ᠵᠤᠭᠤᠰ ᠮᠦᠡᠭᠭᠦ᠂ ᠰᠤᠷᠭᠠᠭᠤᠯᠢ ᠶᠢᠨ ᠨᠦᠬᠦᠴᠡᠯ ᠲᠦᠭᠦᠭᠡᠷᠦᠮᠵᠢ ᠶᠢᠨ ᠠᠰᠠᠭᠤᠳᠠᠯ ᠪᠢᠰᠢ ᠂ ᠬᠠᠷᠢᠨ ᠤᠯᠠᠮᠵᠢᠯᠠᠯᠳᠤ ᠬᠡᠷ ᠪᠦᠯᠢ ᠶᠢᠨ ᠬᠦᠮᠤᠵᠢᠯ ᠰᠤᠷᠭᠠᠯ ᠪᠤᠶᠤ ᠮᠤᠩᠭᠤᠯ ᠰᠤᠶᠤᠯ ᠰᠡᠳᠬᠢᠬᠦᠢ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠬᠡᠭᠡᠭᠳᠡᠵᠦ ᠪᠠᠶᠢᠭ᠎ᠠ ᠶᠠᠪᠤᠳᠠᠯ ᠪᠤᠯᠤᠨ᠎ᠠ᠃      ︽ᠬᠡᠭᠡᠷ ᠠᠯᠠᠭ ᠠᠴᠠ ᠰᠢᠬᠢᠷ᠎ᠠ ᠠᠯᠠᠭ︾᠂ ︽ᠬᠠᠷᠢᠶᠠᠯᠴᠢ ᠡᠭᠡ ᠶᠢᠨ ᠬᠡᠷᠡᠭᠦᠯᠴᠢ ᠬᠦᠦ︾ ᠬᠡᠰᠡᠨ ᠨᠢ ᠪᠦᠷ ᠬᠡᠷ ᠪᠦᠯᠢ ᠶᠢᠨ ᠬᠦᠮᠤᠵᠢᠯ ᠤᠨ ᠤᠯᠠᠮᠵᠢᠯᠠᠯ ᠤᠳᠤᠮᠰᠢᠯ ᠢ ᠵᠢᠭᠠᠭᠰᠨᠨ ᠪᠠᠶᠢᠳᠠᠭ᠃ ᠤᠯᠠᠨ ᠦᠶ᠎ᠠ ᠲᠠᠮᠵᠢᠭᠰᠠᠨ ᠬᠡᠷ ᠤᠨ ᠰᠤᠷᠭᠠᠯ᠂ ᠠᠮᠢᠳᠤᠷᠠᠯ ᠤᠨ ᠵᠠᠩ ᠲᠠᠳᠬᠠᠯ᠂ ᠠᠶᠢᠯ ᠬᠡᠷ ᠤᠨ ᠰᠤᠷᠳᠠᠯ ᠪᠤᠯ ᠬᠡᠦᠭᠡᠳ ᠤᠨ ᠦᠰᠦᠨ ᠪᠤᠶᠢᠵᠢᠬᠤ ᠶᠢ ᠨᠦᠯᠦᠭᠡᠯᠡᠬᠦ ᠬᠠᠮᠤᠭ ᠤᠨ ᠴᠢᠬᠤᠯᠠ ᠬᠦᠴᠦᠨ ᠵᠦᠢᠯ ᠪᠤᠯᠤᠨ᠎ᠠ᠃ ︽ᠮᠠᠯ ᠡᠵᠡᠨ ᠢᠶᠠᠨ︾ ᠬᠡᠳᠡᠭᠴᠢᠯᠠᠨ᠂ ᠨᠢᠭᠡ ᠬᠤᠳᠠ ᠠᠶᠢᠯ ᠤᠨ ᠮᠠᠯ ᠰᠦᠷᠦᠭ ᠤᠨ ᠬᠡᠪᠳᠡᠰᠢᠯᠠᠵᠦ ᠪᠠᠶᠢᠭ᠎ᠠ ᠪᠠᠶᠢᠳᠠᠯ ᠠᠴᠠ ᠲᠠᠷᠠ ᠠᠶᠢᠯ ᠤᠨ ᠠᠮᠢᠳᠤᠷᠠᠯ ᠤᠨ ᠲᠢᠭ ᠵᠢᠷᠤᠮ ᠲᠠᠨᠢᠭᠳᠠᠵᠤ᠂ ᠤᠨᠤᠭᠠᠨ ᠤ ᠮᠤᠷᠢ ᠤᠷᠤᠯᠳᠤᠭᠠᠨ ᠤ ᠮᠤᠷᠢ ᠨᠠᠩ ᠴᠤ ᠤᠶᠠᠭᠠᠴᠢᠨ ᠡᠵᠡᠨ ᠤ ᠪᠠᠨ ᠠᠪᠤᠷᠢ ᠠᠷᠠᠨᠰᠢᠨ ᠤᠬᠠᠭᠠᠨ ᠬᠦᠳᠡᠯᠮᠤᠷᠢ ᠶᠢ ᠬᠦᠢᠴᠡᠳ ᠦᠵᠡᠬᠦᠯᠵᠦ ᠪᠠᠶᠢᠳᠠᠭ᠃ ᠮᠠᠯ ᠰᠦᠷᠦᠭ ᠲᠤᠨᠢ ᠬᠦᠷᠳᠡᠯ᠎ᠠ ᠡᠳ᠋ᠯᠡᠭᠰᠡᠨ ᠡᠵᠡᠨ ᠤ ᠬᠢᠨᠢ ᠤᠬᠠᠭᠠᠨ ᠰᠠᠮᠪᠠᠭ᠎ᠠ ᠰᠢᠩᠭᠡᠵᠦ ᠪᠠᠶᠢᠳᠠᠭ ᠶᠤᠮ ᠴᠢᠨᠢ᠂ ᠤᠳᠤᠮ ᠵᠠᠯᠭᠠᠬᠤ ᠦᠷ᠎ᠠ ᠬᠡᠦᠭᠡᠳ ᠲᠤᠨᠢ ᠡᠨᠡᠬᠦ ᠭᠠᠯ ᠭᠤᠯᠤᠮᠳᠠ ᠶᠢᠨ ᠤᠯᠠᠨ ᠵᠠᠭᠤᠨ ᠲᠠᠮᠵᠢᠭᠰᠠᠨ ᠤᠳᠤᠮ ᠰᠤᠷᠳᠠᠯ ᠦᠪᠯᠡᠭᠳᠡᠬᠦ ᠦᠭᠡᠢ ᠶᠠᠭᠠᠬᠢᠬᠤ ᠪᠤᠢ᠃ ᠬᠡᠷ ᠪᠦᠯᠢ ᠶᠢᠨ ᠤᠳᠤᠮᠰᠢᠯ ᠤᠨ ᠡᠨᠡᠬᠦ ᠭᠠᠶᠢᠬᠠᠮᠰᠢᠭ ᠢ ᠮᠡᠳᠡᠬᠦ ᠪᠤᠯᠬᠤᠷ ᠮᠠᠨ ᠤ ᠠᠷᠠᠳ ᠤᠨ ᠲᠤᠮᠳᠠ ︽ᠪᠤᠳᠤᠭ ᠠᠷᠢᠯᠳᠠᠭ ᠤᠳᠤᠮ ᠠᠷᠢᠯᠳᠠᠭ ᠦᠭᠡᠢ︾ ᠬᠡᠰᠡᠨ ᠲᠤᠩ ᠤᠴᠢᠷᠳᠠᠢ ᠦᠭᠡ ᠶᠡᠭᠡ ᠡᠷᠳᠡᠨ ᠠᠴᠠ ᠤᠯᠠᠮᠵᠢᠯᠠᠭᠳᠠᠵᠠᠢ᠃      ᠨᠤᠬᠠᠢ ᠮᠤᠷᠢ ᠪᠠᠨ ᠬᠦᠷᠳᠡᠯ᠎ᠠ ᠬᠦᠮᠦᠨ ᠤ ᠰᠠᠨᠠᠭ᠎ᠠ ᠶᠢ ᠤᠢᠢᠯᠠᠭᠠᠮ᠎ᠠ ᠭᠠᠷᠰᠢᠭᠤᠯᠵᠤ ᠴᠢᠳᠠᠳᠠᠭ ᠮᠠᠨ ᠤ ᠰᠤᠶᠤᠯᠳᠤ ᠲᠦᠮᠠᠨ ᠦᠨᠤᠳᠤᠷ ᠬᠡᠦᠭᠡᠳ ᠤᠨ ᠬᠦᠮᠦᠵᠢᠯ ᠳᠤ ᠭᠠᠷ ᠠᠯᠳᠠᠭᠠᠳ ᠬᠡᠴᠡᠭᠦᠳᠡᠵᠤ ᠪᠠᠶᠢᠭ᠎ᠠ ᠶᠢᠨ ᠦᠨᠳᠦᠰᠦ ᠨᠢ ᠨᠠᠶᠢᠭᠡᠮ ᠤᠨ ᠦᠡᠭᠭᠡᠪᠴᠢ ᠲᠠᠯ᠎ᠠ ᠶᠢ ᠬᠡᠳᠦᠷᠭᠡᠢ ᠲᠠᠭᠠᠵᠦ ᠲᠡᠷᠪᠡᠬᠦ ᠪᠤᠶᠤ ᠠᠮᠢᠨᠴᠢᠷ ᠬᠤᠪᠢᠨᠴᠢᠷ ᠰᠤᠶᠤᠯ ᠰᠡᠳᠬᠢᠬᠦᠢ ᠳᠤ ᠲᠠᠩᠳᠡᠬᠦᠦ ᠨᠦᠯᠦᠭᠡᠯᠡᠭᠳᠡᠵᠦ ᠪᠠᠶᠢᠭ᠎ᠠ ᠠᠴᠠ ᠪᠤᠯᠵᠠᠢ᠃ ᠬᠡᠦᠭᠡᠳ ᠬᠦᠮᠦᠵᠢᠬᠦᠯᠬᠦ ᠬᠠᠷᠠᠯᠳᠠ ᠢᠪᠴᠤᠷᠠᠵᠦ᠂ ᠬᠡᠴᠢᠨᠡᠨ ᠤᠯᠠᠨ ᠬᠡᠷ ᠤᠨ ᠠᠬᠠᠮᠠᠳ ᠬᠡᠦᠭᠡᠳ ᠢᠶᠠᠨ ᠢᠷᠡᠭᠡᠳᠦᠢ ᠳᠤ ᠪᠦᠷ ᠲᠠᠷᠤᠭ᠎ᠠ᠂ ᠢᠨᠵᠧᠨᠧᠷ᠂ ᠡᠷᠳᠡᠮᠳᠡᠨ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠳᠠᠨ ᠪᠤᠯᠭᠠᠬᠤ ᠬᠦᠰᠡᠯ ᠲᠠᠢ ᠪᠠᠶᠢᠨ᠎ᠠ᠂ ᠡᠭᠦᠨ ᠤ ᠡᠰᠡᠷᠬᠦ ᠪᠠᠷ ᠵᠠᠷᠢᠮ ᠬᠡᠷ ᠤᠨ ᠠᠬᠠᠮᠠᠳ ᠬᠡᠦᠭᠡᠳ ᠢᠶᠠᠨ ᠰᠤᠷᠭᠠᠭᠤᠯᠢ ᠳᠤ ᠲᠤᠰᠢᠶᠠᠭᠠᠳ ᠦᠭᠪᠠᠯ ᠴᠠᠰᠢ ᠪᠠᠨ ᠶᠠᠭᠤ ᠶᠢ ᠨᠢ ᠴᠤ ᠬᠠᠮᠢᠶᠠᠷᠬᠤ ᠦᠭᠡᠢ ᠬᠠᠶᠠᠨ ᠳᠤᠨᠢ ᠬᠠᠶᠠᠴᠢᠬᠠᠳᠠᠭ᠃ ᠡᠳᠡᠭᠡᠷ ᠨᠢ ᠪᠦᠷ ᠲᠦᠢᠯᠰᠢᠷᠠᠭᠰᠠᠨ ᠦᠵᠡᠯᠳᠡ ᠶᠤᠮ᠃ ᠬᠦᠮᠦᠨ ᠪᠦᠬᠦᠨ ᠲᠠᠷᠤᠭ᠎ᠠ ᠪᠤᠯᠬᠤ ᠪᠢᠰᠢ᠂ ᠠᠳᠠᠯᠢᠬᠠᠨ ᠢᠶᠠᠷ ᠬᠦᠮᠦᠨ ᠪᠦᠬᠦᠨ ᠡᠷᠳᠡᠮᠳᠡᠨ ᠪᠤᠯᠬᠤ ᠴᠤ ᠪᠢᠰᠢ᠂ ᠡᠨᠡ ᠪᠤᠯ ᠬᠡᠦᠭᠡᠳ ᠤᠨ ᠲᠦᠷᠦᠯᠬᠢ ᠠᠪᠢᠶᠠᠰ ᠪᠤᠶᠤ ᠲᠤᠷ᠎ᠠ ᠰᠤᠨᠢᠷᠬᠠᠯ ᠠᠴᠠ ᠪᠤᠯᠬᠤ ᠠᠰᠠᠭᠤᠳᠠᠯ᠃ ᠬᠠᠷᠢᠨ ᠬᠡᠦᠭᠡᠳ ᠢ ᠡᠷᠡᠭᠦᠯ ᠰᠠᠷᠠᠭᠤᠯ ᠵᠠᠩ ᠰᠡᠳᠬᠢᠴᠠ ᠲᠠᠢ ᠬᠦᠮᠦᠨ ᠪᠤᠯᠭᠠᠨ ᠬᠦᠮᠦᠵᠢᠬᠦᠯᠬᠦ ᠪᠤᠯ ᠪᠢᠳᠠ ᠪᠦᠬᠦᠨ ᠤ ᠬᠠᠮᠳᠤ ᠶᠢᠨ ᠬᠦᠰᠡᠯ ᠬᠠᠷᠠᠯᠳᠠ ᠪᠠᠶᠢᠬᠤ ᠶᠤᠰᠤᠳᠠᠢ᠃ ᠬᠡᠦᠭᠡᠳ ᠤᠨ ᠪᠠᠶ᠎ᠠ ᠰᠡᠳᠬᠢᠴᠠ ᠡᠷᠡᠭᠦᠯ ᠰᠠᠷᠠᠭᠤᠯ ᠯᠠ ᠪᠤᠶᠢᠵᠢᠪᠠᠯ ᠲᠤᠮᠤ ᠪᠤᠯᠤᠭᠰᠠᠨ ᠬᠤᠶᠢᠨ᠎ᠠ ᠶᠠᠮᠠᠷ ᠠᠵᠢᠯ ᠬᠢᠭᠰᠡᠨ ᠴᠤ ᠠᠮᠢᠨ ᠳᠠᠭᠠᠨ ᠯᠠᠪ ᠵᠦᠪ᠃ ᠤᠳᠤ ᠶᠢᠨ ᠬᠡᠦᠭᠡᠳ ᠢ ᠲᠠᠩᠴᠢ ᠬᠠᠷᠢᠭᠤᠴᠠᠯᠭᠠᠳᠤ ᠰᠡᠳᠬᠢᠯᠭᠡ ᠦᠭᠡᠢ᠂ ᠠᠵᠢᠯ ᠲᠠᠰᠬᠠᠯ ᠢᠶᠠᠨ ᠬᠢᠬᠦ ᠨᠢ ᠠᠯᠠᠩ ᠰᠠᠯᠠᠩ᠂ ᠡᠭᠦᠷᠭᠡ ᠲᠤᠰᠢᠶᠠᠯ ᠦᠭᠭᠦ ᠦᠭᠡᠢ ᠪᠤᠯ ᠪᠠᠶ᠎ᠠ ᠪᠠᠨ ᠲᠠᠭᠠᠭᠠᠵᠦ ᠠᠵᠢᠯ ᠶᠠᠪᠤᠳᠠᠯ ᠢ ᠲᠤᠤᠱᠳᠠᠢ ᠬᠢᠨ᠎ᠠ ᠬᠡᠵᠦ ᠪᠠᠶᠢᠬᠤ ᠦᠭᠡᠢ᠂ ᠲᠤᠩ ᠠᠮᠢᠨᠴᠢᠷ ᠬᠤᠪᠢᠨᠴᠢᠷ ᠁ ᠬᠡᠬᠦ ᠮᠠᠳᠤ ᠪᠠᠷ ᠬᠡᠯᠡᠳᠡᠭ᠃ ᠶᠠᠭᠠᠬᠢᠭᠠᠳ ᠡᠶᠢᠮᠦ ᠪᠤᠯᠤᠭᠰᠠᠨ ᠲᠤᠬᠠᠢ ᠪᠢᠳᠠ ᠡᠳᠦᠷ ᠲᠤᠳᠤᠮ ᠤᠨ ᠶᠠᠷᠢᠶ᠎ᠠ ᠵᠤᠭᠤᠭ᠂ ᠬᠡᠦᠭᠡᠳ ᠲᠡᠭᠡᠨ ᠬᠠᠨᠳᠤᠬᠤ ᠤᠪᠤᠷ ᠰᠤᠷᠳᠠᠯ᠂ ᠬᠡᠦᠭᠡᠳ ᠲᠡᠭᠡᠨ ᠵᠠᠬᠢᠵᠦ ᠰᠠᠨᠠᠭᠤᠯᠵᠤ ᠪᠠᠶᠢᠭ᠎ᠠ ᠰᠤᠷᠭᠠᠯ ᠵᠢᠭᠠᠪᠤᠷᠢ ᠪᠠᠨ ᠬᠢᠨᠠᠵᠦ ᠦᠵᠡᠪᠡᠯ ᠪᠦᠬᠦᠨ ᠢ ᠮᠡᠳᠡᠴᠢᠭᠡᠨ᠎ᠠ᠃ ᠬᠡᠦᠭᠡᠳ ᠢᠶᠠᠨ ᠬᠦᠮᠦᠨ ᠳᠤ ᠯᠠ ᠪᠢᠳᠠᠭᠡᠢ ᠬᠤᠨᠵᠢᠭᠳᠠ᠂ ︽ᠬᠦᠮᠦᠨ ᠴᠢᠮᠠᠢᠢ ᠨᠢᠭᠡ ᠢᠰᠬᠦᠯᠦᠭᠡᠳ ᠠᠪᠤᠪᠠᠯ ᠴᠢ ᠪᠤᠴᠠᠭᠠᠳ ᠬᠤᠶᠠᠷ ᠢᠰᠬᠦᠯᠦᠭᠡᠳ ᠠᠪ︾ ᠬᠡᠮᠡᠨ ᠠᠮᠠᠨ ᠵᠠᠬᠢᠶ᠎ᠠ ᠲᠠᠮᠵᠢᠭᠤᠯᠤᠨ᠎ᠠ᠃      ︽ᠤᠬᠠᠭᠠᠨ ᠨᠢ ᠤᠭᠤᠳᠠᠨ ᠳᠠᠭᠠᠨ ᠰᠢᠷᠬᠢᠨ᠎ᠠ︾ ᠬᠡᠭᠴᠢ ᠪᠠᠷ᠂ ᠬᠡᠴᠢᠨᠡᠨ ᠬᠤᠪᠢᠨᠴᠢᠷ ᠪᠠᠶᠢᠬᠤ ᠲᠤᠳᠤᠮ ᠤᠬᠠᠭᠠᠨ ᠪᠤᠳᠤᠯ ᠨᠢ ᠲᠦᠴᠢᠨᠠᠨ ᠢᠪᠴᠤᠷᠠᠵᠦ᠂ ᠡᠴᠦᠰ ᠲᠡᠭᠡᠨ ᠠᠮᠢᠨ ᠳᠠᠭᠠᠨ ᠴᠤ ᠵᠦᠪ ᠦᠭᠡᠢ ᠭᠤᠶᠤᠯᠭᠠᠴᠢᠨ ᠪᠤᠯᠳᠠᠭ᠃ ᠲᠤᠮᠤ ᠬᠦᠮᠦᠨ ᠲᠤᠮᠤ ᠶᠢ ᠰᠡᠳᠬᠢᠵᠦ᠂ ᠵᠢᠵᠢᠭ ᠬᠦᠮᠦᠨ ᠵᠢᠵᠢᠭ ᠤᠴᠢᠷ ᠢ ᠰᠡᠳᠬᠢᠳᠡᠭ᠃ ᠪᠢᠳᠠ ᠴᠢᠨᠢ ᠠᠮᠠ ᠨᠡᠭᠡᠭᠡᠮᠡᠭᠴᠡ ᠬᠦᠮᠦᠨ ᠮᠠᠭᠤᠯᠠᠬᠤ ᠠᠴᠠ ᠡᠬᠢᠯᠡᠭᠡᠳ ᠠᠶᠢᠯ ᠰᠠᠭᠠᠬᠠᠯᠳᠠ ᠶᠢᠨ ᠬᠤᠭ ᠤᠨ ᠵᠤᠭᠤᠭ ᠠᠴᠠ ᠴᠠᠰᠢ ᠶᠠᠭᠤᠮ᠎ᠠ ᠰᠡᠳᠬᠢᠬᠦ ᠦᠭᠡᠢ ᠬᠡᠮᠵᠢᠶᠠᠨ ᠳᠤ ᠬᠦᠷᠴᠤ ᠪᠠᠶᠢᠭ᠎ᠠ ᠨᠢ ᠶᠠᠮᠠᠷ ᠬᠦᠬᠡᠷᠦᠭᠦ᠋ᠢᠯᠠᠯᠳᠠᠢ ᠪᠤᠯᠤᠨ ᠵᠢᠵᠢᠭᠷᠡᠭᠰᠡᠨ ᠪᠤᠢ︕ ᠰᠡᠳᠬᠢᠴᠠ ᠵᠦᠢ ᠶᠢᠨ ᠮᠡᠷᠭᠡᠵᠢᠯ ᠤᠨ ᠲᠠᠯ᠎ᠠ ᠠᠴᠠ ᠶᠠᠷᠢᠪᠠᠯ᠂ ᠨᠢᠭᠡ ᠬᠦᠮᠦᠨ ᠤ ᠬᠠᠷᠢᠭᠤᠴᠠᠯᠭᠠᠳᠤ ᠰᠡᠳᠭᠢᠯᠭᠡ ᠬᠡᠴᠢᠨᠠᠨ ᠶᠡᠭᠡ ᠪᠠᠶᠢᠬᠤ ᠲᠤᠳᠤᠮ ᠲᠠᠷᠠ ᠬᠦᠮᠦᠨ ᠤ ᠬᠤᠪᠢ ᠶᠢᠨ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠲᠠᠳᠤᠢ ᠶᠡᠭᠡ ᠨᠡᠭᠡᠭᠡᠭᠳᠡᠳᠡᠭ᠃ ᠲᠤᠮᠤ ᠶᠢ ᠪᠦᠳᠦᠭᠡᠵᠦ ᠶᠡᠭᠡ ᠭᠠᠪᠢᠶ᠎ᠠ ᠪᠠᠶᠢᠭᠤᠯᠤᠭᠰᠠᠨ ᠠᠯᠳᠠᠷᠳᠤ ᠬᠦᠮᠦᠰ ᠪᠦᠷ ᠯᠠ ᠤᠭᠰᠠᠭ᠎ᠠ ᠶᠠᠰᠤᠳᠠᠨ ᠤ ᠪᠠᠨ ᠲᠦᠯᠦᠭᠡ ᠶᠡᠭᠡ ᠬᠠᠷᠢᠭᠤᠴᠠᠯᠭ᠎ᠠ ᠡᠭᠦᠷᠭᠡᠯᠡᠭᠰᠡᠨ ᠪᠠᠶᠢᠳᠠᠭ᠃       ᠮᠤᠩᠭᠤᠯᠴᠤᠳ ᠤᠨ ᠴᠡᠭᠡᠷ ᠶᠤᠰᠤ ᠪᠤᠯ ᠬᠡᠦᠭᠡᠳ ᠤᠨ ᠬᠦᠮᠦᠵᠢᠯ ᠰᠤᠷᠭᠠᠯ ᠮᠦᠨ      ᠪᠤᠯᠤᠴᠢᠯᠠᠭᠤ ᠶᠢᠨ ᠦᠵᠡᠬᠦ ᠪᠠᠷ᠂ ᠮᠤᠩᠭᠤᠯᠴᠤᠳ ᠤᠨ ᠴᠡᠭᠡᠷ ᠶᠤᠰᠤ ᠪᠤᠯ ︽ᠪᠠᠶᠢᠭᠠᠯᠢ ᠶᠢᠷᠳᠢᠨᠴᠤ᠂ ᠬᠡᠷᠡᠭ ᠪᠤᠳᠠᠰ ᠤᠨ ᠲᠤᠬᠠᠢ ᠲᠠᠨᠢᠯᠳᠠ ᠲᠤᠳᠠᠮᠠᠭ︾᠎ ᠠᠴᠠ ᠡᠭᠦᠰᠦᠭᠰᠡᠨ ᠵᠦᠢᠯ ᠪᠢᠰᠢ᠂ ᠬᠠᠷᠢᠨ ᠬᠡᠦᠭᠡᠳ ᠤᠨ ᠬᠦᠮᠦᠵᠢᠯ ᠳᠤ ᠵᠤᠷᠢᠭᠤᠯᠵᠤ᠂ ᠬᠡᠦᠭᠡᠳ ᠤᠨ ᠰᠡᠳᠬᠢᠴᠠ ᠶᠢᠨ ᠤᠨᠴᠠᠯᠢᠭ ᠲᠤ ᠶᠠᠪ ᠴᠠᠪ ᠵᠤᠬᠢᠴᠠᠭᠤᠯᠤᠨ᠂ ᠬᠡᠦᠭᠡᠳ ᠪᠠᠭᠠᠴᠤᠳ ᠲᠤ ᠶᠤᠰᠤ ᠰᠤᠷᠳᠠᠯ ᠢ ᠲᠤᠩ ᠬᠢᠯᠪᠠᠷᠬᠠᠨ ᠢᠶᠠᠷ ᠬᠡᠪᠰᠢᠬᠦᠯᠵᠦ ᠵᠠᠩᠰᠢᠭᠤᠯᠳᠠᠭ ᠰᠢᠯᠢᠳᠡᠭ ᠰᠤᠶᠤᠯ ᠤᠯᠠᠮᠵᠢᠯᠠᠯ ᠮᠦᠨ᠃ ᠠᠷᠠᠳ ᠤᠨ ᠴᠡᠭᠡᠷ ᠶᠤᠰᠤᠨ ᠳᠤ ︽ᠮᠠᠭᠤ ᠢᠷᠸ᠎ᠠ ᠪᠤᠯᠤᠨ᠎ᠠ︾᠂ ︽ᠪᠤᠶᠠᠨ ᠢᠶᠠᠨ ᠪᠠᠷᠠᠨ᠎ᠠ︾ ᠂ ︽ᠨᠢᠬᠦᠯ ᠪᠤᠯᠤᠨ᠎ᠠ︾᠂ ︽ᠶᠠᠷ᠎ᠠ ᠬᠠᠳᠠᠬᠢ ᠭᠠᠷᠤᠨ᠎ᠠ︾ ᠬᠡᠬᠦ ᠮᠠᠳᠤ ᠪᠠᠷ ᠬᠡᠦᠭᠡᠳ ᠤᠨ ᠠᠶᠤᠨ ᠰᠦᠷᠳᠡᠬᠦ ᠰᠡᠳᠬᠢᠴᠠ ᠳᠤ ᠵᠤᠬᠢᠴᠠᠭᠤᠯᠤᠨ ᠶᠠᠭᠤ ᠶᠠᠭᠠᠬᠢᠬᠤ ᠲᠤᠬᠠᠢ ᠰᠤᠩᠭᠤᠯᠳᠠ ᠬᠢᠬᠦ ᠵᠠᠢ ᠦᠭᠭᠦ ᠠᠴᠠ ᠪᠢᠰᠢ᠂ ︽ᠢᠡᠭᠭᠢᠵᠦ ᠪᠤᠯᠬᠤ ᠦᠭᠡᠢ︾᠂ ︽ᠲᠡᠭᠡᠵᠦ ᠪᠤᠯᠬᠤ ᠦᠭᠡᠢ︾ ᠬᠡᠮᠡᠨ ᠬᠡᠦᠭᠡᠳ ᠤᠨ ᠰᠡᠳᠬᠢᠯ ᠳᠤ ᠰᠦᠷᠭᠡᠦ ᠰᠡᠳᠬᠢᠴᠠ ᠡᠬᠦᠰᠬᠦ ᠠᠯᠪᠠᠳᠠᠯᠭ᠎ᠠ ᠶᠢᠨ ᠴᠢᠨᠠᠷᠳᠠᠢ ᠲᠠᠰᠤᠷᠬᠠᠢ ᠵᠠᠷᠯᠢᠭ ᠪᠠᠭᠤᠯᠭᠠᠳᠠᠭ ᠦᠭᠡᠢ ᠨᠢ ᠭᠠᠶᠢᠬᠠᠮᠰᠢᠭ᠃ ᠠᠷᠪᠢᠴᠢ ᠭᠠᠮᠳᠠᠢ ᠶᠤᠰᠤ ᠵᠠᠩᠰᠢᠯ ᠢ ᠬᠡᠪᠰᠢᠬᠦᠯᠬᠦ ᠳᠤ᠂ ᠰᠤᠷᠤᠭᠴᠢ ᠬᠤᠭᠤᠯᠠᠯᠠᠬᠤ ᠳᠠᠭᠠᠨ ᠠᠰᠬᠠᠵᠦ ᠴᠢᠳᠬᠤᠭᠰᠠᠨ ᠪᠠᠶᠢᠪᠠᠯ᠂ ᠦᠨᠤᠳᠤᠷ ᠤᠨ ᠮᠤᠷᠠᠯ ᠤᠨ ᠬᠦᠮᠦᠵᠢᠯ ᠤᠨ ᠠᠪᠳᠠᠯ ᠢᠶᠠᠷ ᠪᠤᠯ᠂ ︽ᠠᠪᠤ ᠴᠢᠨᠢ ᠪᠠᠶᠠᠨ ᠪᠤᠯ ᠶᠠᠭᠠᠬᠢᠬᠤ ᠪᠤᠢ︖ ᠡᠨᠡ ᠴᠢᠨᠢ ᠲᠠᠷᠢᠶᠠᠴᠢᠨ ᠬᠦᠮᠦᠨ ᠤ ᠬᠦᠯᠦᠰᠦ ᠬᠦᠳᠡᠯᠮᠤᠷᠢ ᠰᠢᠦ᠂ ᠠᠮᠤ ᠬᠦᠨᠠᠰᠦ ᠶᠢ ᠢᠡᠭᠭᠢᠵᠦ ᠰᠦᠢᠳᠭᠡᠵᠦ ᠪᠤᠯᠬᠤ ᠦᠭᠡᠢ᠂ ᠲᠡᠯᠡᠭᠡᠢ ᠲᠡᠭᠡᠷ᠎ᠠ ᠬᠤᠭᠤᠯᠠᠨ ᠳᠠᠭᠠᠨ ᠴᠠᠳᠬᠤ ᠦᠭᠡᠢ ᠲᠤᠩ ᠤᠯᠠᠨ ᠦᠯᠦᠰᠬᠦᠯᠡᠩ ᠬᠦᠮᠦᠨ ᠪᠠᠶᠢᠭᠰᠠᠭᠠᠷ ᠁︾ ᠬᠡᠮᠡᠨ ᠶᠡᠭᠡ ᠶᠤᠰᠤ ᠶᠢ ᠤᠷᠤᠰᠬᠠᠵᠦ ᠭᠠᠷᠤᠭᠠᠳ᠂ ᠬᠡᠦᠭᠡᠳ ᠤᠨ ᠰᠦᠷᠭᠡᠦ ᠰᠡᠳᠬᠢᠴᠠ ᠶᠢ ᠤᠯᠠᠮ ᠬᠦᠨᠳᠡᠳᠡᠭ ᠪᠤᠯ᠂ ᠬᠠᠷᠢᠨ ᠦᠡᠭᠭᠡᠷᠡᠭᠰᠡᠨ ᠤ ᠵᠤᠷᠰᠢᠯ ᠢᠶᠠᠷ ᠪᠤᠯ ︽ᠭᠠᠵᠠᠷ ᠲᠡᠭᠡᠷ᠎ᠠ ᠤᠨᠠᠭᠰᠠᠨ ᠮᠦᠬᠦᠯᠢᠭ ᠠᠮᠤ ᠲᠡᠭᠷᠢ ᠲᠡᠭᠡᠷ᠎ᠠ ᠲᠡᠮᠡᠭᠡᠨ ᠴᠢᠨᠡᠭᠡ ᠬᠠᠷᠠᠭᠳᠠᠨ᠎ᠠ ᠬᠡᠨ᠎ᠠ ᠰᠢᠦ᠂ ᠪᠤᠶᠠᠨ ᠢᠶᠠᠨ ᠪᠠᠷᠠᠨ᠎ᠠ︾ ᠬᠡᠳ ᠨᠠᠰᠤᠳᠠᠨ ᠨᠢ ᠲᠤᠯᠤᠪᠤᠷ ᠬᠤᠷᠤᠭᠤᠨ ᠳᠠᠭᠠᠨ ᠨᠠᠭᠠᠯᠳᠤᠭᠤᠯᠵᠤ ᠠᠪᠤᠭᠠᠳ ᠠᠮᠠᠠ ᠳᠠᠭᠠᠨ ᠬᠢᠴᠢᠭᠡᠳᠡᠭ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ᠂ ᠬᠦᠮᠦᠨ ᠤ ᠡᠮᠦᠨ᠎ᠠ ᠠᠴᠠ ᠲᠦᠢ ᠬᠡᠵᠦ ᠨᠢᠯᠪᠤᠪᠠᠯ ᠠᠮᠠᠨ ᠬᠦᠨᠠᠰᠤ ᠪᠠᠨ ᠪᠠᠷᠠᠨ᠎ᠠ᠂ ᠬᠦᠮᠦᠨ ᠬᠠᠷᠢᠶᠠᠪᠠᠯ ᠠᠮᠠᠨ ᠲᠡᠭᠡᠷ᠎ᠠ ᠴᠢᠨᠢ ᠶᠠᠷ᠎ᠠ ᠭᠠᠷᠤᠨ᠎ᠠ᠂ ᠵᠠᠮ ᠲᠡᠭᠡᠷ᠎ᠠ ᠪᠠᠶ᠎ᠠ ᠵᠠᠰᠠᠪᠠᠯ ᠰᠠᠭᠤᠳᠠᠯ ᠲᠡᠭᠡᠷ᠎ᠠ ᠨᠢ ᠬᠠᠳᠠᠬᠢ ᠭᠠᠷᠤᠨ᠎ᠠ ᠬᠡᠬᠦ ᠮᠠᠳᠤ ᠪᠠᠷ ᠴᠡᠭᠡᠷᠯᠡᠬᠦᠯᠳᠡᠭ ᠨᠢ ᠬᠡᠦᠭᠡᠳ ᠤᠨ ᠠᠮᠳᠠᠳᠠᠢ ᠶᠠᠭᠤᠮ᠎ᠠ ᠤᠯᠵᠤ ᠢᠳᠡᠬᠦ ᠦᠭᠡᠢ᠂ ᠠᠮᠠ᠂ ᠰᠠᠭᠤᠳᠠᠯ ᠲᠡᠭᠡᠷ᠎ᠠ ᠨᠢ ᠶᠠᠷ᠎ᠠ ᠬᠠᠳᠠᠬᠢ ᠭᠠᠷᠬᠤ ᠠᠴᠠ ᠠᠶᠤᠬᠤ ᠰᠡᠳᠬᠢᠴᠠ ᠶᠢ ᠠᠰᠢᠬᠯᠠᠨ ᠲᠤᠩ ᠬᠢᠯᠪᠠᠷᠬᠠᠨ ᠢᠶᠠᠷ ᠬᠡᠦᠭᠡᠳ ᠢᠶᠠᠨ ᠪᠤᠯᠪᠠᠰᠤᠨ ᠰᠠᠶᠢᠬᠠᠨ ᠵᠠᠩᠰᠢᠯ ᠲᠠᠢ ᠪᠤᠯᠭᠠᠨ ᠬᠡᠪᠰᠢᠬᠦᠯᠳᠡᠭ ᠪᠠᠶᠢᠵᠠᠢ᠃ ᠬᠡᠦᠭᠡᠳ ᠨᠠᠰᠤᠨ ᠳᠠᠭᠠᠨ ᠬᠡᠪᠰᠢᠭᠰᠡᠨ ᠵᠠᠩᠰᠢᠯ ᠨᠠᠰᠤᠨ ᠲᠤᠷᠰᠢᠳᠡ ᠬᠤᠪᠢᠷᠠᠬᠤ ᠳᠤ ᠬᠡᠴᠡᠬᠦᠦ ᠮᠤᠵᠢᠭᠤᠳᠠ ᠪᠠᠶᠢᠳᠠᠭ ᠨᠢ ᠭᠠᠶᠢᠬᠠᠯᠳᠠᠢ᠃ ᠲᠡᠭᠡᠬᠦ ᠪᠠᠷ ︽ᠰᠤᠷᠤᠭᠰᠠᠨ ᠵᠠᠩ ᠢ ᠰᠤᠷ ᠢᠶᠠᠷ ᠪᠤᠭᠤᠵᠤ ᠲᠠᠶᠢᠯᠬᠦ ᠦᠭᠡᠢ︾ ᠬᠡᠮᠡᠳᠡᠭ᠃        ᠬᠡᠷ ᠪᠦᠯᠢ ᠶᠢᠨ ᠬᠦᠮᠦᠵᠢᠯ ᠤᠨ ᠠᠩᠬᠠᠷᠤᠭᠤᠰᠢᠳᠠᠢ ᠠᠰᠠᠭᠤᠳᠠᠯ ᠤᠳ      ᠨᠢᠭᠡ᠂ ᠬᠡᠦᠭᠡᠳ ᠢᠶᠠᠨ ᠢᠯᠠᠬᠦᠭᠡᠨ ᠪᠦᠪᠠᠶᠢᠯᠠᠨ᠎ᠠ᠃ ᠦᠯᠦᠭᠡᠢ ᠲᠠᠢ ᠬᠡᠦᠭᠡᠳ ᠢᠶᠠᠨ ᠪᠦᠪᠠᠶᠢᠯᠠᠵᠤ ᠰᠠᠭᠠᠳᠠᠭᠤᠯᠬᠤ ᠪᠤᠶᠤ ᠤᠨᠳᠠᠭᠤᠯᠬᠤ ᠪᠤᠯ ᠮᠠᠨ ᠤ ᠰᠤᠶᠤᠯ ᠤᠨ ᠭᠠᠶᠢᠬᠠᠮᠰᠢᠭ᠃ ᠪᠦᠪᠡᠢ ᠶᠢᠨ ᠲᠠᠭᠤᠤ ᠰᠤᠨᠤᠰᠴᠤ ᠪᠠᠶᠢᠭᠠᠳ ᠤᠨᠳᠠᠬᠤ ᠬᠡᠦᠭᠡᠳ ᠲᠠᠶᠢᠪᠤᠭᠤ ᠰᠠᠶᠢᠬᠠᠨ ᠤᠨᠳᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠡᠶᠢᠮᠦᠷᠬᠦ ᠬᠠᠶᠢᠷ᠎ᠠ ᠶᠢᠨ ᠪᠦᠪᠠᠢ ᠲᠠᠢ ᠤᠷᠴᠢᠨ ᠨᠢ ᠬᠡᠦᠭᠡᠳ ᠤᠨ ᠰᠠᠨᠠᠭ᠎ᠠ ᠪᠤᠳᠤᠯ ᠢ ᠨᠠᠮ ᠲᠤᠭᠳᠠᠭᠤᠨ᠂ ᠦᠷᠦ ᠵᠦᠭᠡᠯᠠᠨ᠂ ᠠᠴᠢᠯᠠᠯ ᠵᠢᠷᠤᠮ ᠤᠨ ᠰᠡᠳᠬᠢᠯᠭᠡ ᠲᠠᠢ ᠪᠤᠯᠤᠨ ᠲᠦᠯᠦᠪᠰᠢᠬᠦ ᠳᠤ ᠲᠤᠩ ᠴᠢᠬᠤᠯᠠ ᠨᠦᠯᠦᠭᠡ ᠦᠵᠡᠬᠦᠯᠦᠨ᠎ᠠ᠃      ᠤᠳᠤ ᠶᠢᠨ ᠬᠡᠦᠭᠡᠳ ᠡᠴᠢᠭᠡ ᠡᠭᠡ ᠶᠢᠨ ᠪᠦᠪᠠᠶᠢᠯᠠᠯ ᠡᠩᠭᠦᠷᠠᠶᠢᠯᠠᠯ ᠢᠶᠠᠷ ᠲᠤᠳᠠᠭᠳᠠᠵᠦ ᠪᠤᠢ᠃ ᠤᠯᠠᠩᠭᠢ ᠵᠠᠯᠠᠭᠤ ᠡᠭᠡᠴᠤᠳ ᠬᠡᠦᠭᠡᠳ ᠢᠶᠠᠨ ᠪᠦᠪᠠᠶᠢᠯᠠᠵᠦ ᠰᠠᠭᠠᠳᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠤᠯᠤᠭᠰᠠᠨ ᠮᠦᠷᠳᠡᠭᠡᠨ ᠵᠠᠷᠢᠮ ᠨᠢ ᠄ ︽ᠴᠢᠳᠬᠦᠷ ᠢᠷᠡᠯ᠎ᠠ︕ ᠭᠠᠳᠠᠨ᠎ᠠ ᠶᠠᠭᠤ ᠲᠤᠤᠭᠠᠷᠴᠤ ᠪᠠᠶᠢᠨ᠎ᠠ ᠪᠤᠢ︖ ᠬᠤᠭ ᠲᠡᠭᠦᠳᠡᠭ ᠬᠦᠮᠦᠨ ᠢᠷᠡᠵᠤ ᠪᠠᠶᠢᠨ᠎ᠠ ᠲᠦᠷᠭᠡᠨ ᠤᠨᠳᠠ ᠡ᠂ ᠦᠭᠡᠢ ᠪᠤᠯ ᠠᠪᠤᠭᠠᠳ ᠶᠠᠪᠤᠨ᠎ᠠ ᠰᠢᠦ︾ ᠬᠡᠮᠡᠨ ᠬᠡᠦᠭᠡᠳ ᠢᠶᠠᠨ ᠠᠶᠤᠯᠭᠠᠠ ᠤᠨᠳᠠᠭᠤᠯᠵᠤ ᠪᠠᠶᠢᠨ᠎ᠠ᠃ ᠠᠶᠤᠵᠤ ᠡᠮᠢᠶᠠᠵᠦ ᠤᠨᠳᠠᠭᠰᠠᠨ ᠬᠡᠦᠭᠡᠳ ᠬᠠᠷ᠎ᠠ ᠲᠠᠷᠤᠬᠤ ᠪᠤᠶᠤ ᠲᠠᠶᠢᠪᠤᠩ ᠲᠠᠪᠠᠳᠠᠢ ᠤᠨᠳᠠᠵᠤ ᠲᠠᠶᠢᠯᠬᠦ ᠦᠭᠡᠢ᠃ ᠡᠶᠢᠮᠦᠷᠬᠦ ᠤᠷᠴᠢᠨ ᠳᠤ ᠦᠰᠬᠦ ᠬᠡᠦᠭᠡᠳ ᠠᠮᠠᠷᠬᠠᠨ ᠰᠡᠳᠬᠢᠴᠠ ᠶᠢᠨ ᠠᠷᠬᠠᠭ ᠲᠠᠢ ᠪᠤᠯᠳᠠᠭ᠃      ᠮᠠᠯᠴᠢᠨ ᠠᠷᠠᠳ ᠤᠨ ᠮᠠᠨᠢ ᠪᠦᠪᠡᠢ ᠶᠢᠨ ᠲᠠᠭᠤᠤ᠂ ᠲᠤᠶᠢᠭ ᠤᠨ ᠲᠠᠭᠤᠤ ᠢᠡᠭᠭᠡ ᠶᠢ ᠴᠤ ᠨᠢᠯᠪᠤᠰᠤ ᠪᠦᠮᠪᠤᠷᠢᠬᠦᠯᠦᠨ ᠪᠤᠳᠤᠭᠤ ᠶᠢ ᠨᠢ ᠠᠪᠤᠭᠤᠯᠳᠠᠭ ᠬᠠᠶᠢᠷ᠎ᠠ ᠶᠢᠨ ᠰᠢᠳᠢ ᠲᠠᠢ ᠪᠠᠶᠢᠳᠠᠭ᠃ ᠡᠨᠡ ᠬᠠᠶᠢᠷ᠎ᠠ ᠬᠡᠦᠭᠡᠳ ᠲᠤ ᠨᠠᠩ ᠴᠤ ᠬᠡᠷᠡᠭᠴᠡᠭᠡ ᠲᠠᠢ᠃ ᠦᠡᠭᠭᠡᠷᠡᠭᠰᠡᠨ ᠤ ᠬᠡᠷ ᠤᠨ ᠠᠬᠠᠮᠠᠳ᠂ ᠨᠠᠰᠤᠳᠠᠨ ᠪᠤᠭᠤᠷᠤᠯᠴᠤᠳ ᠬᠡᠦᠭᠡᠳ ᠢᠶᠠᠨ ᠪᠦᠷ ᠪᠦᠪᠡᠢ ᠶᠢᠨ ᠲᠠᠭᠤᠤ ᠲᠤᠮᠳᠠ ᠡᠩᠭᠦᠷᠡᠶᠢᠯᠠᠨ ᠡᠷᠭᠡᠯᠡᠬᠦᠯᠵᠦ᠂ ᠦᠯᠢᠭᠡᠷ ᠲᠠᠦᠭᠡ ᠶᠠᠷᠢᠨ ᠤᠬᠠᠭᠠᠷᠠᠭᠤᠯᠵᠤ ᠬᠦᠮᠦᠵᠢᠬᠦᠯᠳᠡᠭ᠃ ᠬᠡᠳᠡᠯ᠎ᠠ ᠤᠳᠤ ᠶᠢᠨ ᠬᠡᠷ ᠤᠨ ᠠᠬᠠᠮᠠᠳ ᠦᠰᠦᠭ ᠲᠠᠨᠢᠬᠤ ᠪᠠᠶᠢᠳᠠᠯ᠎ᠠ ᠨᠤᠮ ᠤᠩᠰᠢᠬᠤ ᠦᠭᠡᠢ ᠪᠤᠯᠵᠤ᠂ ᠨᠠᠩ ᠴᠤ ᠦᠯᠢᠭᠡᠷ ᠴᠡᠭᠡᠵᠢᠯᠠᠵᠦ ᠶᠠᠷᠢᠬᠤ ᠬᠡᠳᠡᠭ ᠨᠢ ᠡᠳᠦᠷ ᠤᠨ ᠤᠳᠤ ᠰᠢᠭ᠋ ᠬᠤᠪᠤᠷ ᠪᠤᠯᠵᠠᠢ᠃ ᠵᠠᠪ ᠯᠠ ᠭᠠᠷᠪᠠᠯ ᠲᠧᠯᠸᠢᠰ ᠢᠶᠠᠨ ᠨᠡᠭᠡᠭᠡᠵᠦ ᠵᠤᠳᠤᠭᠠᠨ ᠠᠯᠠᠯᠳᠤᠭᠠᠨ᠂ ᠬᠡᠷᠡᠭᠦᠯ ᠴᠤᠤᠬᠢᠶᠠᠨ᠂ ᠰᠠᠯᠤᠯᠳᠠ ᠪᠤᠳᠠᠷᠠᠯ᠂ ᠤᠷᠢᠯᠠᠭ᠎ᠠ ᠪᠠᠷᠬᠢᠷᠠᠭ᠎ᠠ᠂ ᠮᠡᠭᠡᠯᠡᠯ ᠪᠠᠰᠢᠷᠯᠠᠯ ᠢᠶᠠᠷ ᠲᠦᠭᠦᠷᠦᠭᠰᠡᠨ ᠬᠠᠭᠤᠷᠮᠠᠭ ᠵᠦᠴᠦᠭᠡ ᠰᠤᠨᠢᠷᠬᠠᠳᠠᠭ᠃      ᠬᠤᠶᠠᠷ᠂ ᠬᠦᠮᠦᠰ ᠦᠶ᠎ᠠ ᠵᠡᠷᠭᠡ ᠪᠠᠷ ᠢᠶᠠᠨ ᠲᠠᠭᠠᠷᠠᠪᠠᠯ ᠶᠠᠮᠠᠷ ᠴᠤ ᠨᠠᠷᠬᠢᠶ᠎ᠠ ᠬᠦᠬᠡᠷᠦᠭᠡ ᠲᠠᠢ ᠵᠤᠭᠤᠭ ᠶᠠᠷᠢᠬᠤ ᠨᠢ ᠡᠩ ᠤᠨ ᠤᠴᠢᠷ᠂ ᠬᠡᠪᠡᠴᠦ ᠬᠡᠦᠭᠡᠳ ᠤᠨ ᠡᠮᠦᠨ᠎ᠠ ᠪᠤᠯ ᠬᠡᠯᠡᠬᠦ ᠬᠢᠬᠦ ᠪᠠᠨ ᠴᠦᠮ ᠬᠢᠴᠢᠶᠡᠬᠦ ᠶᠤᠰᠤᠳᠠᠢ᠃ ᠡᠨᠡ ᠲᠠᠯ᠎ᠠ ᠪᠠᠷ᠂ ᠮᠠᠨ ᠳᠤ ᠤᠯᠠᠨ ᠰᠠᠶᠢᠬᠠᠨ ᠴᠡᠭᠡᠷ ᠪᠠᠶᠢᠭᠰᠠᠨ᠂ ᠲᠤᠮᠤᠴᠤᠳ ᠵᠤᠭᠤᠭᠳᠠᠵᠦ ᠪᠠᠶᠢᠬᠤ ᠳᠤ ᠬᠡᠦᠭᠡᠳ ᠬᠠᠵᠠᠭᠤ ᠳᠤ ᠢᠷᠡᠪᠡᠯ ︽ᠪᠢᠳᠡᠭᠡᠢ ᠲᠤᠮᠤ ᠬᠦᠮᠦᠨ ᠤ ᠦᠭᠡ ᠶᠢ ᠴᠢᠩᠨᠠᠭᠠᠳ ᠪᠠᠢ᠂ ᠨᠠᠭᠠᠳᠬᠤ ᠪᠠᠷ ᠭᠠᠷ᠂ ᠲᠤᠭᠤᠯ ᠪᠢᠷᠠᠭᠤᠨ ᠳᠤ ᠶᠠᠪᠤ︾ ᠬᠡᠮᠡᠨ ᠵᠠᠩᠨᠠᠵᠦ ᠭᠠᠷᠭᠠᠳᠠᠭ᠃ ᠤᠳᠤ ᠵᠠᠷᠢᠮ ᠬᠡᠷ ᠤᠨ ᠠᠬᠠᠮᠠᠳ ᠶᠠᠮᠠᠷ ᠴᠤ ᠡᠷᠡᠭᠡ ᠴᠡᠭᠡᠷ ᠦᠭᠡᠢ ᠪᠤᠯᠵᠤ᠂ ᠬᠡᠦᠭᠡᠳ ᠤᠨ ᠡᠮᠦᠨ᠎ᠠ ᠪᠠᠭᠰᠢ ᠶᠢ ᠨᠢ ᠮᠠᠭᠤᠯᠠᠨ᠎ᠠ᠂ ᠰᠤᠷᠭᠠᠭᠤᠯᠢ ᠶᠢ ᠨᠢ ᠮᠠᠭᠤᠯᠠᠨ᠎ᠠ᠂ ᠨᠠᠶᠢᠭᠡᠮ ᠢ ᠮᠠᠭᠤᠯᠠᠨ᠎ᠠ᠂ ᠡᠨᠡ ᠪᠤᠯ ᠲᠤᠩ ᠬᠠᠷᠢᠭᠤᠴᠠᠯᠭ᠎ᠠ ᠦᠭᠡᠢ ᠬᠢᠳᠡᠯ᠃ ᠪᠠᠭᠰᠢ ᠪᠤᠯᠤᠨ ᠰᠤᠷᠭᠠᠭᠤᠯᠢ ᠶᠢᠨ ᠲᠤᠳᠠᠭᠳᠠᠯ ᠢ ᠪᠠᠭᠰᠢ ᠪᠤᠯᠤᠨ ᠰᠤᠷᠭᠠᠭᠤᠯᠢ ᠳᠤᠨᠢ ᠶᠠᠷᠢᠪᠠᠯ ᠰᠠᠢᠢ ᠬᠠᠷᠢᠭᠤᠴᠠᠯᠭ᠎ᠠ ᠲᠠᠢ ᠠᠵᠢᠯᠯᠠᠭ᠎ᠠ ᠪᠤᠯᠤᠨ᠎ᠠ᠂ ᠬᠡᠦᠭᠡᠳ ᠲᠤ ᠬᠡᠯᠡᠪᠠᠯ ᠨᠠᠵᠠᠭᠠᠢ ᠨᠦᠯᠦᠭᠡ ᠦᠵᠡᠬᠦᠯᠦᠨ᠎ᠠ᠃ ᠬᠡᠦᠭᠡᠳ ᠮᠠᠨᠢ ᠮᠠᠭᠤ ᠪᠠᠭᠰᠢ ᠮᠠᠭᠤᠬᠠᠢ ᠰᠤᠷᠭᠠᠭᠤᠯᠢ ᠶᠢᠨ ᠤᠷᠴᠢᠨ ᠳᠤ ᠬᠡᠷᠬᠢᠨ ᠪᠠᠶᠠᠷᠳᠠᠢ ᠰᠤᠷᠤᠯᠴᠠᠬᠤ ᠪᠢᠯᠠ︕ ᠠᠮᠠᠨ ᠪᠡᠯᠭᠡ ᠶᠢ ᠲᠡᠭᠡᠳᠦᠯᠡᠳᠡᠭ ᠮᠠᠯᠴᠢᠨ ᠲᠦᠮᠠᠨ ᠮᠠᠨᠢ ᠤᠴᠠᠷᠠᠭᠰᠠᠨ ᠪᠦᠬᠦᠨ ᠢᠶᠠᠨ ᠢᠷᠦᠭᠡᠵᠦ ᠪᠠᠶᠢᠳᠠᠭ ᠰᠠᠶᠢᠬᠠᠨ ᠤᠯᠠᠮᠵᠢᠯᠠᠯ ᠲᠠᠢ ᠪᠠᠶᠢᠭᠰᠠᠨ᠂ ᠤᠳᠤ ᠠᠭᠤᠯᠵᠠᠭᠰᠠᠨ ᠪᠦᠬᠦᠨ ᠳᠤ ᠬᠦᠮᠦᠨ ᠮᠠᠭᠤᠯᠠᠬᠤ᠂ ᠲᠠᠨᠢᠯ ᠨᠠᠶᠢᠵᠠ ᠤᠢᠢᠷ᠎ᠠ ᠲᠤᠳᠤᠨᠤ ᠬᠦᠮᠦᠨ ᠪᠦᠬᠦᠨ ᠳᠡᠭᠡᠨ ᠭᠤᠮᠤᠳᠠᠬᠤ ᠡᠮᠵᠡᠭ ᠰᠡᠳᠬᠢᠴᠠ ᠲᠠᠢ ᠪᠤᠯᠵᠤ ᠪᠠᠶᠢᠨ᠎ᠠ᠃ ᠡᠶᠢᠮᠦᠷᠬᠦ ᠰᠡᠳᠬᠢᠴᠠ ᠲᠠᠢ ᠬᠦᠮᠦᠰ ᠤᠨ ᠰᠡᠳᠬᠢᠯ ᠰᠠᠨᠠᠭ᠎ᠠ ᠰᠠᠷᠠᠭᠤᠯ ᠦᠭᠡᠳᠡᠷᠭᠡᠭ ᠪᠠᠶᠢᠵᠦ ᠴᠢᠳᠠᠬᠤ ᠦᠭᠡᠢ᠂ ᠦᠭᠡᠳᠡᠷᠭᠡᠭ ᠰᠡᠳᠬᠢᠯᠭᠡ ᠦᠭᠡᠢ ᠬᠦᠮᠦᠰ ᠠᠵᠢᠯ ᠠᠮᠢᠳᠤᠷᠠᠯ ᠢᠶᠠᠨ ᠦᠡᠭᠭᠡ ᠲᠠᠢ ᠠᠪᠴᠤ ᠶᠠᠪᠤᠬᠤ ᠳᠤ ᠬᠡᠴᠡᠬᠦᠦ᠃ ᠡᠨᠡ ᠮᠠᠳᠦ ᠶᠢᠨ ᠬᠡᠷ ᠤᠨ ᠠᠭᠠᠷ᠂ ᠠᠮᠢᠳᠤᠷᠠᠯ ᠤᠨ ᠤᠷᠴᠢᠨ ᠳᠤ ᠦᠰᠴᠤ ᠪᠠᠶᠢᠭ᠎ᠠ ᠬᠡᠦᠭᠡᠳ ᠮᠠᠨᠢ ᠪᠠᠭᠰᠢ ᠠᠬᠠᠮᠠᠳ ᠢᠶᠠᠨ ᠬᠦᠨᠳᠦᠯᠡᠬᠦ ᠶᠢ ᠮᠠᠳᠡᠬᠦ ᠦᠭᠡᠢ᠃      ᠡᠴᠢᠭᠡ ᠡᠬᠡ ᠪᠤᠯᠤᠭᠰᠠᠳ ᠬᠡᠦᠭᠡᠳ ᠤᠨ ᠢᠶᠠᠨ ᠡᠮᠦᠨ᠎ᠠ ᠬᠡᠯᠡᠬᠦ ᠦᠭᠡ᠂ ᠬᠢᠬᠦ ᠦᠢᠯᠠ ᠪᠦᠬᠦᠨ ᠳᠡᠭᠡᠨ ᠬᠢᠨᠠᠯᠳᠠ ᠲᠠᠢ ᠪᠠᠶᠢᠬᠤ ᠨᠢ ᠨᠠᠶᠢᠭᠡᠮ ᠦᠷ᠎ᠠ ᠬᠡᠦᠭᠡᠳ ᠲᠡᠭᠡᠨ ᠬᠠᠷᠢᠭᠤᠴᠠᠵᠤ ᠪᠠᠶᠢᠭ᠎ᠠ ᠶᠠᠪᠤᠳᠠᠯ ᠮᠦᠨ᠃ ᠨᠠᠰᠤᠳᠠᠨ ᠢᠶᠠᠨ ᠬᠦᠨᠳᠦᠯᠡᠵᠦ ᠠᠴᠢᠯᠠᠯ ᠡᠯᠪᠡᠷᠢᠯᠳᠡᠢ ᠠᠰᠠᠷᠠᠬᠤ᠂ ᠰᠠᠳᠤᠨ ᠲᠦᠷᠦᠯ ᠲᠠᠢ ᠪᠠᠨ ᠡᠯᠢᠭᠡᠰᠡᠭ ᠲᠤᠳᠤᠨᠤ ᠶᠠᠪᠤᠯᠴᠠᠬᠤ᠂ ᠠᠶᠢᠯ ᠰᠠᠭᠠᠬᠠᠯᠳᠠ ᠲᠠᠢ ᠪᠠᠨ ᠡᠪ ᠵᠦᠢᠳᠡᠢ ᠬᠠᠮᠵᠢᠯᠴᠠᠨ ᠡᠶ᠎ᠡ ᠨᠠᠶᠢᠷᠳᠠᠢ ᠪᠠᠶᠢᠬᠤ᠂ ᠬᠦᠳᠡᠯᠮᠤᠷᠢ ᠳᠤ ᠰᠢᠭᠤᠷᠬᠠᠢ᠂ ᠬᠦᠮᠦᠨ ᠳᠤ ᠲᠤᠰᠠᠴᠢ᠂ ᠪᠤᠰᠤᠳ ᠤᠨ ᠤᠰᠤᠯ ᠢ ᠠᠭᠤᠴᠢᠯᠠᠵᠦ ᠠᠭᠤᠳᠠᠮᠴᠢ ᠬᠠᠨᠳᠤᠬᠤ ᠮᠠᠳᠤ ᠰᠢᠳᠤᠷᠭᠤ ᠲᠦᠪᠰᠢᠨ ᠰᠢᠯᠢᠳᠡᠭ ᠪᠤᠯᠪᠠᠰᠤᠨ ᠵᠠᠩ ᠰᠤᠷᠳᠠᠯ ᠲᠠᠢ ᠶᠠᠪᠤᠭᠰᠠᠨ ᠯᠠ ᠪᠠᠶᠢᠪᠠᠯ ᠲᠠᠷᠠ ᠪᠦᠬᠦᠨ ᠨᠢ ᠬᠡᠦᠭᠡᠳ ᠤᠨ ᠴᠢᠨᠢ ᠤᠶᠤᠨ ᠤ ᠲᠠᠵᠢᠭᠡᠯ ᠪᠤᠯᠵᠤ᠂ ᠰᠠᠶᠢᠨ ᠰᠠᠶᠢᠠᠬᠨ ᠬᠦᠮᠦᠨ ᠤ ᠲᠦᠷᠢ ᠶᠢ ᠪᠦᠳᠦᠭᠡᠨ᠎ᠠ ᠬᠡᠳᠡᠭ ᠲᠤ ᠪᠠᠳᠤ ᠢᠳᠡᠭᠡᠭᠡᠷᠡᠢ︕      ᠭᠤᠷᠪᠠ᠂ ᠦᠵᠡᠬᠦ ᠺᠢᠨᠣ᠋᠂ ᠨᠠᠭᠠᠳᠬᠤ ᠲᠤᠭᠯᠠᠭᠠᠮ ᠢᠶᠠᠷ ᠲᠤᠳᠠᠬᠤ ᠦᠭᠡᠢ ᠵᠢᠷᠭᠠᠯᠳᠠᠢ ᠴᠠᠭ ᠤᠨ ᠪᠤᠶᠠᠨᠳᠠᠢ ᠬᠡᠦᠭᠡᠳ ᠬᠡᠵᠦ ᠪᠤᠤ ᠪᠤᠳᠤᠭᠠᠷᠠᠢ᠃ ᠤᠳᠤ ᠶᠢᠨ ᠬᠦᠮᠦᠰ ᠭᠠᠭᠴᠠ ᠬᠡᠦᠭᠡᠳ ᠠᠪᠬᠤ ᠨᠢ ᠤᠯᠠᠰᠢᠷᠠᠭᠰᠠᠨ ᠠᠴᠠ ᠠᠶᠢᠯ ᠬᠡᠷ ᠲᠤ ᠬᠡᠦᠭᠡᠳ ᠴᠦᠭᠡᠷᠠᠵᠦ᠂ ᠬᠡᠦᠭᠡᠳ ᠨᠠᠭᠠᠳᠬᠤ ᠬᠠᠨᠢ ᠦᠭᠡᠢ᠂ ᠪᠠᠶᠠᠷ ᠵᠢᠷᠭᠠᠯ ᠢᠶᠠᠨ ᠬᠤᠪᠢᠶᠠᠯᠴᠠᠬᠤ ᠬᠠᠨᠢ ᠦᠭᠡᠢ᠂ ᠭᠤᠨᠢᠭ ᠵᠤᠪᠠᠯᠠᠩ ᠢᠶᠠᠨ ᠬᠤᠪᠢᠶᠠᠯᠴᠠᠬᠤ ᠨᠦᠬᠦᠷ ᠦᠭᠡᠢ ᠪᠤᠯᠵᠠᠢ᠃ ᠤᠳᠤ ᠶᠢᠨ ᠬᠡᠦᠭᠡᠳ ᠢ ᠬᠦᠮᠦᠨ ᠲᠠᠢ ᠬᠠᠮᠳᠤ ᠦᠰᠦᠨ ᠪᠤᠶᠢᠵᠢᠵᠦ ᠪᠠᠶᠢᠨ᠎ᠠ ᠬᠡᠬᠦ ᠠᠴᠠ ᠮᠠᠰᠢᠨ ᠲᠠᠢ ᠬᠠᠮᠳᠤ ᠦᠰᠴᠤ ᠪᠠᠶᠢᠨ᠎ᠠ ᠬᠡᠵᠦ ᠬᠡᠯᠡᠪᠡᠯ ᠢᠯᠡᠬᠦᠦ ᠲᠤᠬᠢᠷᠠᠮᠵᠢᠳᠠᠢ᠃ ᠦᠯᠦᠭᠡᠢ ᠲᠠᠢ ᠪᠠᠶᠢᠬᠤ ᠠᠴᠠ ᠪᠠᠨ ᠲᠧᠯᠸᠢᠰ ᠦᠵᠡᠵᠦ᠂ ᠪᠠᠭ᠎ᠠ ᠯᠠ ᠶᠡᠭᠡ ᠪᠤᠯᠤᠮᠠᠭᠴᠠ ᠶᠠᠮᠠᠷ ᠴᠤ ᠬᠠᠶᠢᠷ᠎ᠠ ᠰᠠᠳᠤᠨ ᠤ ᠬᠠᠷᠢᠴᠠᠭ᠎ᠠ ᠦᠭᠡᠢ ᠡᠯ᠎ᠠ ᠵᠦᠢᠯ ᠤᠨ ᠬᠡᠦᠭᠡᠯᠳᠡᠢ᠂ ᠮᠠᠰᠢᠨ ᠲᠤᠭᠯᠠᠭᠠᠮ᠂ ᠲᠡᠭᠡᠵᠦ ᠪᠠᠶᠢᠳᠠᠯ᠎ᠠ ᠭᠠᠷ ᠤᠳᠠᠰᠤ ᠰᠦᠯᠵᠢᠶᠠᠨ ᠨᠠᠶᠢᠵᠢ ᠲᠠᠢ ᠨᠦᠬᠦᠷᠯᠠᠵᠦ᠂ ᠬᠠᠵᠠᠭᠤᠳᠠᠬᠢ ᠬᠦᠮᠦᠰ ᠠᠴᠠ ᠪᠠᠨ ᠬᠦᠨᠳᠠᠶᠢᠷᠠᠵᠦ ᠵᠠᠶᠢᠳᠠᠵᠦ ᠡᠬᠢᠯᠡᠳᠡᠭ᠃ ᠠᠬ᠎ᠠ ᠡᠭᠡᠴᠢ ᠶᠢᠨ ᠬᠠᠯᠠᠮᠵᠢ ᠬᠦᠷᠳᠡᠭᠰᠡᠨ ᠦᠭᠡᠢ᠂ ᠲᠡᠭᠦᠦ ᠨᠠᠷ ᠢ ᠬᠠᠷᠠᠭᠠᠯᠵᠠᠬᠤ ᠬᠠᠷᠢᠭᠤᠴᠠᠯᠭ᠎ᠠ ᠮᠡᠳᠡᠭᠰᠡᠨ ᠦᠭᠡᠢ ᠬᠡᠦᠭᠡᠳ ᠮᠠᠨᠢ ᠬᠡᠨ ᠢ ᠴᠤ ᠤᠢᠢᠯᠠᠭᠠᠵᠦ ᠬᠠᠯᠠᠮᠵᠢᠯᠠᠬᠤ ᠶᠢ ᠮᠡᠳᠡᠬᠦ ᠦᠭᠡᠢ ᠬᠤᠪᠢᠨᠴᠢᠷ ᠵᠠᠩ ᠲᠠᠢ ᠪᠤᠯᠤᠨ ᠲᠦᠯᠦᠪᠰᠢᠷᠡᠵᠦ ᠪᠠᠶᠢᠨ᠎ᠠ᠃      ᠲᠡᠭᠡᠬᠦ ᠪᠠᠷ᠂ ᠬᠡᠷ ᠤᠨ ᠠᠬᠠᠮᠠᠳ ᠬᠡᠦᠭᠡᠳ ᠤᠨ ᠢᠶᠠᠨ ᠪᠠᠭ᠎ᠠ ᠨᠠᠰᠤᠨ ᠤ ᠪᠠᠶᠠᠷ ᠵᠢᠷᠭᠠᠯ ᠳᠤ ᠢᠯᠡᠬᠦᠭᠡᠨ ᠰᠠᠨᠠᠭ᠎ᠠ ᠲᠠᠯᠪᠢᠵᠦ᠂ ᠦᠶ᠎ᠠ ᠬᠤᠷᠠᠭ ᠤᠨ ᠨᠠᠶᠢᠵᠢ ᠨᠠᠷ ᠲᠠᠢ ᠨᠢ ᠢᠯᠡᠭᠦᠭᠡᠨ ᠬᠠᠮᠳᠤ ᠨᠠᠭᠠᠳᠤᠭᠤᠯᠵᠤ ᠪᠠᠶᠢᠭᠠᠷᠠᠢ ᠬᠡᠵᠦ ᠰᠠᠨᠠᠭᠤᠯᠤᠶ᠎ᠠ᠃      ᠲᠦᠷᠪᠠ᠂ ᠶᠠᠭᠤ ᠪᠦᠬᠦᠨ ᠢ ᠨᠢ ᠪᠠᠯᠠᠨᠴᠢᠯᠠᠵᠦ ᠦᠭᠬᠦ ᠶᠢ ᠬᠡᠦᠭᠡᠳ ᠤᠨ ᠠᠮᠢᠳᠤᠷᠠᠨ ᠪᠦᠳᠦᠭᠡᠬᠦ ᠡᠷᠭᠡ ᠶᠢ ᠨᠢ ᠪᠤᠯᠢᠶᠠᠭᠰᠠᠨ ᠬᠡᠵᠦ ᠦᠵᠡᠵᠦ ᠪᠤᠯᠤᠨ᠎ᠠ᠃ ᠦᠡᠭᠭᠡᠷᠡᠭᠰᠡᠨ ᠳᠤ ᠬᠡᠦᠭᠡᠳ ᠡᠳᠦᠷᠵᠢᠨ ᠡᠴᠢᠭᠡ ᠡᠭᠡ ᠪᠠᠨ ᠰᠡᠭᠦᠯᠳᠡᠵᠦ ᠠᠰᠠᠭᠤᠬᠤ ᠦᠭᠡᠢ ᠵᠦᠢᠯ ᠬᠡᠵᠦ ᠦᠭᠡᠢ᠂ ᠬᠢᠵᠦ ᠤᠷᠤᠯᠳᠤᠬᠤ ᠦᠭᠡᠢ ᠶᠠᠭᠤᠮ᠎ᠠ ᠬᠡᠵᠦ ᠦᠭᠡᠢ᠂ ᠡᠴᠢᠭᠡ ᠡᠭᠡ ᠨᠢ ᠴᠤ ᠠᠵᠢᠯ ᠮᠤᠳᠤᠨ ᠳᠠᠭᠠᠨ ᠰᠠᠶᠢᠨ ᠲᠠᠭᠠᠭᠤᠯᠳᠠᠭ ᠪᠠᠶᠢᠭᠰᠠᠨ᠃ ᠬᠡᠬᠦ ᠳᠤ᠂ ᠤᠳᠤ ᠵᠠᠷᠢᠮ ᠬᠡᠷ ᠤᠨ ᠠᠬᠠᠮᠠᠳ ᠬᠡᠦᠭᠡᠳ ᠢᠶᠠᠨ ᠵᠦᠪᠭᠡᠨ ᠰᠠᠶᠢᠨ ᠰᠤᠷᠪᠠᠯ ᠪᠤᠯᠴᠢᠬᠠᠨ᠎ᠠ ᠬᠡᠰᠡᠨ ᠪᠠᠶᠢᠳᠠᠯ ᠲᠠᠢ ᠪᠤᠯᠵᠤ ᠪᠠᠶᠢᠨ᠎ᠠ᠃ ᠬᠢᠴᠢᠶᠠᠯ ᠪᠠᠭᠤᠭᠠᠳ ᠢᠷᠡᠬᠦ ᠳᠤᠨᠢ ᠢᠳᠡᠵᠦ ᠤᠤᠭᠤᠬᠤ ᠨᠢ ᠪᠠᠯᠠᠨ᠂ ᠲᠠᠰᠬᠠᠯ ᠬᠢᠬᠦ ᠳᠤ ᠬᠠᠵᠠᠭᠤ ᠳᠤᠨᠢ ᠬᠠᠷᠠᠵᠦ ᠰᠠᠭᠤᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠤᠰᠤ ᠴᠠᠢ ᠵᠢᠮᠢᠰ ᠰᠢᠬᠢᠷ ᠲᠤ ᠬᠦᠷᠳᠡᠯ᠎ᠠ ᠵᠦᠭᠡᠭᠡᠵᠦ ᠶᠠᠭᠠᠷᠠᠨ᠎ᠠ᠂ ᠤᠨᠳᠠᠬᠤ ᠳᠤ ᠤᠷᠤ ᠬᠦᠨᠵᠢᠯᠠ ᠶᠢ ᠨᠢ ᠲᠡᠯᠭᠡᠵᠦ ᠦᠭᠭᠦᠨ᠎ᠠ᠂ ᠰᠤᠷᠭᠠᠭᠤᠯᠢ ᠳᠠᠭᠠᠨ ᠶᠠᠪᠤᠬᠤ ᠳᠤᠨᠢ ᠲᠠᠰᠬᠠᠯ ᠲᠡᠪᠳᠡᠷ ᠡᠮᠦᠰᠴᠤ ᠵᠡᠬᠦᠬᠦ ᠶᠢ ᠨᠢ ᠬᠦᠷᠳᠡᠯ᠎ᠠ ᠪᠠᠯᠠᠳᠭᠡᠵᠦ ᠦᠭᠭᠦᠨ᠎ᠠ᠂ ᠮᠡᠷᠳᠡᠵᠦ ᠤᠷᠬᠢᠭᠰᠠᠨ ᠢ ᠨᠢ ᠬᠤᠶᠢᠨ᠎ᠠ ᠠᠴᠠ ᠨᠢ ᠬᠦᠷᠭᠡᠵᠦ ᠬᠦᠶᠦᠨ᠎ᠠ᠃ ᠬᠡᠦᠭᠡᠳ ᠶᠠᠭᠤᠮ᠎ᠠ ᠬᠢᠬᠦ ᠶᠢ ᠪᠠᠶᠢᠴᠢᠬ᠎ᠠ᠂ ᠰᠡᠳᠬᠢᠬᠦ ᠴᠤ ᠬᠡᠷᠡᠭ ᠦᠭᠡᠢ ᠪᠤᠯᠤᠭᠰᠠᠨ᠃ ᠡᠶᠢᠮᠦᠷᠬᠦ ᠤᠷᠴᠢᠨ ᠳᠤ ᠦᠰᠬᠦ ᠬᠡᠦᠭᠡᠳ ᠲᠤᠷ᠎ᠠ ᠰᠤᠨᠢᠷᠬᠠᠯ ᠳᠠᠩ ᠴᠤᠯᠭᠤᠢ᠂ ᠰᠡᠷᠡᠯ ᠰᠡᠳᠬᠢᠬᠦᠢ ᠨᠢ ᠲᠦᠭᠵᠢᠷᠡᠭᠰᠡᠨ᠂ ᠠᠵᠢᠯ ᠠᠮᠢᠳᠤᠷᠠᠯ ᠢ ᠤᠢᠢᠯᠠᠭᠠᠬᠤ ᠦᠭᠡᠢ᠂ ᠪᠠᠶ᠎ᠠ ᠪᠠᠨ ᠲᠠᠭᠠᠭᠠᠬᠤ ᠴᠢᠳᠠᠪᠤᠷᠢ ᠪᠠᠷ ᠠᠨᠠᠢ᠂ ᠦᠪᠠᠷ ᠤᠨ ᠦᠵᠡᠯᠳᠡ ᠪᠠᠷ ᠲᠤᠳᠠᠮᠠᠭ᠂ ᠶᠠᠭᠤᠮ᠎ᠠ ᠪᠦᠬᠦᠨ ᠢ ᠪᠤᠰᠤᠳ ᠲᠤ ᠨᠠᠶᠢᠳᠠᠬᠤ ᠵᠠᠮᠳᠡᠭ ᠠᠷᠠᠨᠰᠢᠨ ᠲᠠᠢ ᠪᠤᠯᠤᠨ᠎ᠠ᠃      ᠰᠢᠯᠢᠳᠡᠭ ᠡᠴᠢᠭᠡ ᠡᠭᠡ ᠪᠤᠯ ᠬᠡᠦᠭᠡᠳ ᠤᠨ ᠰᠡᠳᠬᠢᠯ ᠤᠨ ᠨᠠᠶᠢᠵᠢ ᠨᠢ ᠪᠤᠯᠵᠤ᠂ ᠬᠡᠦᠭᠡᠳ ᠤᠨ ᠡᠷᠭᠡ ᠴᠢᠯᠦᠭᠡᠳᠡᠢ ᠦᠰᠦᠨ ᠪᠤᠶᠢᠵᠢᠯᠳᠠ ᠳᠤ ᠲᠤᠷᠰᠢᠯᠭ᠎ᠠ ᠵᠦᠪᠳᠠᠯᠴᠡᠭᠡ ᠦᠭᠳᠡᠭ ᠦᠮᠦᠭ ᠲᠦᠰᠢᠭ ᠪᠤᠯᠬᠤ ᠠᠴᠠ ᠪᠢᠰᠢ᠂ ᠠᠯᠢᠪᠠ ᠶᠢ ᠬᠡᠦᠭᠡᠳ ᠤᠨ ᠡᠮᠦᠨ᠎ᠠ ᠠᠴᠠ ᠬᠢᠭᠰᠡᠭᠡᠷ ᠪᠠᠶᠢᠵᠦ ᠬᠡᠦᠭᠡᠳ ᠢ ᠶᠠᠭᠤ ᠬᠢᠬᠦ᠂ ᠬᠠᠮᠢᠭᠠᠰᠢ ᠶᠠᠪᠤᠬᠤ ᠪᠠᠨ ᠴᠤ ᠤᠯᠬᠤ ᠦᠭᠡᠢ ᠵᠦᠭ ᠴᠢᠭ ᠢᠶᠠᠨ ᠠᠯᠳᠠᠭᠰᠠᠨ ᠬᠦᠮᠦᠨ ᠪᠤᠯᠭᠠᠳᠠᠭ ᠦᠭᠡᠢ᠃      ᠲᠠᠪᠤ᠂ ᠬᠡᠦᠭᠡᠳ ᠢᠶᠠᠨ ᠢᠯᠡᠬᠦᠭᠡᠨ ᠤᠷᠮᠠᠰᠢᠭᠤᠯᠵᠤ᠂ ᠲᠠᠳᠠᠨ ᠳᠤ ᠶᠠᠷᠢᠵᠤ ᠬᠢᠬᠦ ᠵᠠᠪᠰᠢᠶᠠᠨ ᠤᠯᠭᠤᠨ᠎ᠠ᠃ ᠬᠡᠷ ᠤᠨ ᠠᠬᠠᠮᠠᠳ ᠬᠡᠦᠭᠡᠳ ᠲᠠᠢ ᠪᠠᠨ ᠬᠠᠷᠢᠴᠠᠬᠤ ᠳᠠᠭᠠᠨ ᠬᠡᠦᠭᠡᠳ ᠤᠨ ᠶᠠᠷᠢᠬᠤ ᠶᠢ ᠰᠤᠨᠤᠰᠬᠤ ᠨᠢ ᠪᠠᠭ᠎ᠠ᠂ ᠵᠠᠬᠢᠵᠦ ᠰᠤᠷᠭᠠᠬᠤ ᠨᠢ ᠤᠯᠠᠨ ᠪᠤᠯᠤᠭᠰᠠᠨ ᠠᠴᠠ ᠬᠡᠦᠭᠡᠳ ᠦᠰᠬᠦ ᠲᠤᠳᠤᠮ ᠠᠪᠤ ᠡᠵᠢ ᠲᠠᠢ ᠪᠠᠨ ᠶᠠᠷᠢᠯᠴᠠᠬᠤ ᠲᠤᠷ᠎ᠠ ᠦᠭᠡᠢ᠂ ᠶᠠᠷᠢᠭᠰᠠᠨ ᠴᠤ ᠦᠭᠡ ᠬᠠᠮᠠᠷ ᠨᠠᠶᠢᠯᠠᠬᠦ ᠦᠭᠡᠢ ᠪᠤᠯᠵᠠᠢ᠃ ᠡᠭᠦᠨ ᠤ ᠳ᠋ᠦᠩ ᠳᠤ᠂ ᠪᠤᠬᠢᠨᠢᠳᠤᠩᠭᠤᠢ ᠪᠠᠴᠢᠮᠳᠠᠭᠤ ᠵᠠᠩ ᠲᠠᠢ᠂ ᠰᠡᠳᠬᠢᠯ ᠰᠠᠨᠠᠭ᠎ᠠ ᠪᠢᠳᠡᠬᠦᠷᠠᠯ ᠲᠠᠢ ᠬᠡᠦᠭᠡᠳ ᠵᠠᠯᠠᠭᠤᠴᠤᠳ ᠤᠯᠠᠨ ᠪᠤᠯᠵᠤ ᠪᠤᠢ᠃ ᠡᠶᠢᠮᠦ ᠠᠴᠠ ᠬᠡᠦᠭᠡᠳ ᠢᠶᠠᠨ ᠰᠠᠶᠢᠳᠤᠷ ᠤᠢᠢᠯᠠᠭᠠᠵᠦ᠂ ᠬᠡᠦᠭᠡᠳ ᠲᠠᠢ ᠪᠠᠨ ᠰᠠᠶᠢᠬᠠᠨ ᠨᠠᠶᠢᠵᠢᠯᠠᠵᠦ᠂ ᠲᠤᠷ᠎ᠠ ᠪᠠᠬ᠎ᠠ ᠲᠠᠢ ᠵᠦᠢᠯ ᠢ ᠨᠢ ᠢᠯᠡᠬᠦᠦ ᠤᠷᠮᠠᠰᠢᠭᠤᠯᠵᠤ᠂ ᠬᠡᠦᠭᠡᠳ ᠤᠨ ᠬᠡᠨᠡᠨ ᠴᠠᠭᠠᠨ ᠬᠦᠰᠡᠯ ᠮᠦᠷᠦᠭᠡᠳᠦᠯ ᠢ ᠨᠢ ᠤᠷᠭᠤᠭᠤᠯᠵᠤ ᠬᠦᠭᠵᠢᠬᠡᠬᠦ ᠬᠡᠷᠡᠭᠳᠡᠢ᠂ ᠮᠡᠳᠡᠭᠰᠡᠨ ᠴᠢᠳᠠᠭᠰᠠᠨ ᠶᠠᠭᠤᠮ᠎ᠠ ᠶᠢ ᠨᠢ ᠭᠠᠶᠢᠬᠠᠭᠤᠯᠵᠤ ᠬᠡᠷᠡᠭᠯᠡᠬᠦ ᠵᠠᠪᠰᠢᠶᠠᠨ ᠤᠯᠭᠤᠬᠤ ᠴᠢᠬᠤᠯᠠᠳᠠᠢ᠃
 
ᠢᠷᠡᠯᠲᠡ᠄ ᠦᠪᠤᠷ ᠮᠤᠩᠭᠤᠯ ᠤᠨ ᠡᠳᠤᠷ ᠤᠨ ᠰᠤᠨᠢᠨ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号