ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠭᠡᠰᠢᠭᠳᠡᠨ ᠬᠦᠩ — ᠷᠤᠯᠭᠠᠷᠵᠠᠪ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2009/9/29
           ᠷᠤᠯᠭᠠᠷᠵᠠᠪ᠂ ᠬᠢᠳᠠᠳ ᠨᠡᠷ᠎ᠡ ᠹᠦ᠋ ᠲᠢᠩ ︵富亭） 1888 ᠤᠨ ᠤ 10 ᠰᠠᠷ᠎ᠠ ᠳᠤ ᠵᠤᠤ ᠤᠳᠠ ᠴᠢᠭᠤᠯᠭᠠᠨ ᠤ ᠭᠡᠰᠢᠭᠳᠡᠨ ᠬᠤᠰᠢᠭᠤᠨ ᠤ ᠪᠠᠷᠠᠭᠤᠨ ᠠᠷᠤ ︵ᠤᠳᠦ ᠶᠢᠨ ᠲᠠᠷᠬᠠᠠᠠᠭᠤᠯᠠ ᠰᠤᠮᠤ︶ ᠨᠤᠳᠤᠭ ᠤᠨ ᠪᠠᠬᠢᠳᠡᠢ ᠶᠢᠨ ᠭᠤᠤᠯ ᠤᠨ ᠪᠠᠷᠠᠭᠤᠨ ᠲᠡᠨᠵᠢᠨ ᠳᠤ᠂ ᠬᠦᠭᠡ ᠮᠤᠩᠭᠤᠯ ᠤᠨ ᠪᠠᠳᠤᠮᠦ᠋ᠩᠭᠡ ᠲᠠᠶᠠᠨ ᠬᠠᠨ ᠤ ᠠᠷᠪᠠᠨ ᠲᠦᠷᠪᠡᠳᠦᠭᠡᠷ ᠦᠶ᠎ᠡ ᠶᠢᠨ ᠤᠮᠪᠤᠯ ᠪᠤᠯᠬᠤ ᠮᠠᠨᠢᠪᠠᠳᠠᠷ᠎ᠠ ᠶᠢᠨ ᠤᠤᠭᠠᠨ ᠬᠦᠦ ᠪᠤᠯᠵᠦ ᠵᠠᠶᠠᠭᠠᠵᠠᠢ᠃ ᠷᠤᠯᠭᠠᠷᠵᠠᠪ ᠠᠪᠤᠭᠠᠢ ᠪᠤᠯ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠰᠤᠶᠤᠯ ᠭᠡᠭᠡᠷᠡᠯ ᠤᠨ ᠭᠠᠷᠮᠠᠭᠠᠢ ᠵᠢᠳᠬᠦᠯᠳᠡᠨ᠂ ᠹᠸᠦᠳᠠᠯ ᠶᠤᠰᠤᠨ ᠳᠤ ᠦᠭᠡᠷᠡᠴᠢᠯᠡᠯᠳᠡ ᠬᠢᠭᠰᠡᠨ ᠠᠷᠠᠳᠴᠢᠯᠠᠭᠰᠠᠨ ᠦᠵᠡᠯᠳᠡᠨ᠂ ᠤᠯᠤᠰ ᠲᠦᠷᠦᠴᠢᠨ᠂ ᠲᠡᠦᠭᠡᠴᠢ ᠂ ᠭᠡᠯᠡ ᠵᠦᠢᠴᠢ᠂ ᠵᠤᠬᠢᠶᠠᠯᠴᠢ᠂ ᠤᠷᠴᠢᠭᠤᠯᠤᠭᠴᠢ ᠮᠦᠷᠳᠡᠭᠡᠨ ᠰᠤᠷᠭᠠᠨ ᠬᠦᠮᠦᠵᠢᠯ ᠤᠨ ᠵᠢᠳᠬᠦᠯᠳᠡᠨ ᠶᠤᠮ᠃ ᠲᠡᠷᠡ ᠮᠤᠩᠭᠤᠯ᠂ ᠬᠢᠳᠠᠳ᠂ ᠮᠠᠨᠵᠦ ᠭᠤᠷᠪᠠᠨ ᠭᠡᠯᠡ ᠮᠡᠳᠡᠳᠡᠭ ᠶᠡᠭᠡ ᠡᠷᠳᠡᠮᠳᠡᠢ ᠬᠦᠮᠦᠨ ᠪᠠᠶᠢᠵᠠᠢ᠃         ᠷᠤᠯᠭᠠᠷᠵᠠᠪ ᠠᠪᠤᠭᠠᠢ ᠶᠢᠨ ᠬᠤᠷᠢᠭᠠᠳ ᠨᠠᠰᠤᠳᠠᠢ ᠪᠠᠶᠢᠬᠤ ᠳᠤᠨᠢ ᠬᠠᠭᠤᠴᠢᠨ ᠲᠣᠮᠳᠠᠳᠦ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠠᠴᠠ ᠲᠡᠬᠦᠨ ᠢ ᠬᠦᠩ ᠡᠷᠬᠦᠮᠵᠢᠯᠡᠭᠰᠡᠨ ᠪᠤᠯᠪᠠᠴᠦ ᠭᠡᠰᠢᠭᠳᠡᠨ ᠤ ᠵᠠᠰᠠᠭ ᠪᠠᠷᠢᠭᠴᠢ ᠨᠠᠮᠵᠢᠯ ᠬᠦᠩ ᠨᠠᠰᠦ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ ᠪᠠᠬᠢᠵᠢᠶᠠᠭ᠎ᠠ ᠯᠤᠭ᠎ᠠ ᠵᠠᠰᠠᠭ ᠤᠨ ᠰᠠᠭᠤᠷᠢᠨ ᠪᠤᠯᠢᠶᠠᠯᠳᠤᠨ ᠵᠦᠷᠢᠴᠡᠯ ᠡᠬᠦᠰᠦᠭᠰᠡᠨ ᠠᠴᠠ ᠪᠤᠯᠵᠦ ᠭᠡᠷ ᠠᠴᠠ ᠭᠠᠷᠴᠦ᠂ ᠭᠡᠰᠦᠨ ᠲᠡᠨᠦᠵᠦ ᠪᠠᠶᠢᠭᠠᠳ ᠬᠠᠯᠬ᠎ᠠ ᠮᠤᠩᠭᠤᠯ ᠤᠨ ᠶᠡᠭᠡ ᠬᠦᠷᠢᠶ᠎ᠡ ︵ᠤᠳᠦ ᠶᠢᠨ ᠤᠯᠠᠭᠠᠨᠪᠠᠭᠠᠳᠤᠷ︶᠎ ᠳᠤ ᠬᠦᠷᠴᠦ ᠤᠯᠠᠨ ᠠᠯᠳᠠᠷᠳᠦ ᠵᠤᠬᠢᠶᠠᠯᠴᠢ᠂ ᠡᠷᠳᠡᠮᠳᠡᠨ ᠲᠠᠢ ᠤᠴᠠᠷᠠᠨ ᠲᠠᠨᠢᠯᠴᠠᠵᠦ᠂ ᠪᠠᠭᠰᠢ ᠪᠠᠷᠢᠨ ᠪᠢᠴᠢᠭ ᠡᠷᠳᠡᠮ ᠰᠤᠷᠴᠦ᠂ ᠬᠤᠯᠠ ᠶᠢ ᠬᠠᠷᠠᠵᠦ ᠶᠡᠭᠡ ᠶᠢ ᠦᠵᠡᠨ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯ ᠤᠨ ᠨᠦᠯᠦᠭᠡ ᠶᠢ ᠬᠦᠷᠳᠡᠵᠦ ᠡᠬᠢᠯᠡᠭᠰᠡᠨ ᠪᠠᠶᠢᠵᠠᠢ᠃         ᠬᠠᠯᠬ᠎ᠠ ᠮᠤᠩᠭᠤᠯ ᠳᠤ ᠪᠠᠶᠢᠬᠤ ᠬᠤᠭᠤᠴᠠᠭᠠᠨ ᠳᠠᠬᠢ ᠷᠤᠯᠭᠠᠷᠵᠠᠪ ᠤᠨ ᠲᠤᠬᠠᠢ ᠭᠡᠰᠡᠭ ᠪᠤᠰᠠᠭ ᠦᠢᠯᠡ ᠶᠠᠪᠤᠳᠠᠯ ᠤᠨ ᠲᠡᠮᠳᠡᠭᠯᠡᠯ ᠢ ᠮᠤᠩᠭᠤᠯ ᠤᠯᠤᠰ ᠤᠨ ᠲᠠᠩᠰᠠ ᠡᠪᠭᠡᠮᠡᠯ ᠤᠨ ᠭᠠᠵᠠᠷ ᠠᠴᠠ ᠶᠠᠫᠤᠨ ᠤ ᠮᠤᠩᠭᠤᠯᠴᠢ ᠡᠷᠳᠡᠮᠳᠡᠨ ᠲᠠᠴᠢᠪᠠᠨᠠ ᠶᠤᠺᠤᠲ᠋ᠤ᠋ ᠠᠪᠤᠭᠠᠢ ᠤᠷᠴᠢᠮᠬᠠᠨ ᠤᠯᠵᠦ ᠠᠪᠤᠭᠰᠠᠨ ᠪᠠᠶᠢᠵᠠᠢ᠃ 2006 ᠤᠨ ᠤ 7 ᠰᠠᠷ᠎ᠠ ᠳᠤ ᠪᠤᠯᠤᠭᠰᠠᠨ ᠶᠢᠰᠦᠳᠦᠭᠡᠷ ᠤᠳᠠᠭᠠᠨ ᠤ ᠤᠯᠠᠨ ᠤᠯᠤᠰ ᠤᠨ ᠮᠤᠩᠭᠤᠯ ᠰᠤᠳᠤᠯᠤᠯ ᠤᠨ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠬᠤᠷᠠᠯ ᠲᠡᠭᠡᠷ᠎ᠡ ᠶᠠᠫᠤᠨ ᠤ ᠮᠤᠩᠭᠤᠯᠴᠢ ᠡᠷᠳᠡᠮᠳᠡᠨ ᠲᠠᠴᠢᠪᠠᠨᠠ ᠶᠤᠺᠤᠲ᠋ᠤ᠋ ᠠᠪᠤᠭᠠᠢ ᠭᠡᠰᠢᠭᠳᠡᠨ ᠪᠠ ᠷᠤᠯᠭᠠᠷᠵᠠᠪ ᠤᠨ ᠲᠤᠬᠠᠢ ᠦᠬᠦᠯᠡᠯ ᠲᠡᠪᠰᠢᠬᠦᠯᠵᠡᠢ᠃ ᠲᠤᠰ ᠬᠤᠷᠠᠯ ᠳᠤ ᠤᠷᠤᠯᠴᠠᠭᠰᠠᠨ ᠭᠡᠰᠢᠭᠳᠡᠨ ᠨᠤᠳᠤᠭ ᠲᠠᠢ ᠡᠷᠳᠡᠮᠳᠡᠨ ᠰ᠊ · ᠪᠤᠶᠠᠨᠳᠠᠯᠠᠢ ᠲᠡᠬᠦᠨ ᠲᠠᠢ ᠲᠠᠨᠢᠯᠴᠠᠨ ᠮᠡᠳᠡᠯᠴᠡᠭᠰᠡᠨ ᠪᠠᠶᠢᠨ᠎ᠠ᠃ ᠲᠡᠭᠡᠭᠡᠳ ᠡᠨᠡ ᠵᠢᠯ ᠤᠨ 7  ᠰᠠᠷ᠎ᠠ ᠳᠤ ᠲᠠᠴᠢᠪᠠᠨᠠ ᠶᠤᠺᠤᠲ᠋ᠤ᠋ ᠠᠪᠤᠭᠠᠢ ᠭᠡᠰᠢᠭᠳᠡᠨ ᠳᠤ ᠲᠤᠰᠬᠠᠶᠢᠯᠠᠨ ᠢᠷᠡᠵᠦ ᠪᠤᠶᠠᠨᠳᠡᠬᠦᠰ᠂ ᠤ᠊ · ᠰᠡᠴᠡᠨᠪᠠᠭᠠᠳᠤᠷ᠂ ᠰᠡᠷᠡᠩᠨᠠᠳᠮᠢᠳ ᠵᠡᠷᠭᠡ ᠨᠦᠬᠦᠳ ᠲᠠᠢ ᠠᠭᠤᠯᠵᠠᠨ ᠶᠠᠷᠢᠯᠴᠠᠵᠦ᠂ ᠭᠡᠰᠢᠭᠳᠡᠨ ᠤ ᠲᠤᠬᠠᠢ ᠲᠤᠭᠤᠷᠢᠨ ᠰᠤᠳᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠢᠩᠬᠢᠭᠡᠳ ᠤ᠊ · ᠰᠡᠴᠡᠨᠪᠠᠭᠠᠳᠤᠷ ᠠᠪᠤᠭᠠᠢ ᠷᠤᠯᠭᠠᠷᠵᠠᠪ ᠤᠨ ᠬᠠᠯᠬ᠎ᠠ ᠮᠤᠩᠭᠤᠯ ᠳᠤ ᠪᠠᠶᠢᠭᠰᠠᠨ ᠦᠶ᠎ᠡ ᠶᠢᠨ ᠵᠠᠷᠢᠮ ᠵᠦᠢᠯᠡᠰ ᠢ ᠠᠩᠬᠠᠷᠤᠨ ᠲᠡᠮᠳᠡᠭᠯᠡᠵᠦ ᠠᠪᠤᠭᠰᠠᠨ ᠪᠠᠶᠢᠨ᠎ᠠ᠃ ᠠᠳᠡ ᠲᠤᠷᠠᠳᠪᠠᠯ᠄        1912 ᠤᠨ ᠤ 8 ᠰᠠᠷ᠎ᠠ ᠳᠤ ᠷᠤᠯᠭᠠᠷᠵᠠᠪ ᠬᠠᠯᠬ᠎ᠠ ᠶᠢᠨ ᠶᠠᠮᠤᠨ ᠳᠤ ᠪᠢᠴᠢᠭ ᠡᠷᠬᠦᠵᠦ᠂ ᠪᠠᠬᠢᠵᠢᠶᠠᠭ᠎ᠠ ᠶᠢ ᠲᠦᠳᠦᠭᠡᠷ ᠵᠡᠷᠭᠡ ᠶᠢᠨ ᠲᠠᠶᠢᠵᠢ ᠠᠴᠠ ᠬᠤᠶᠠᠳᠤᠭᠠᠷ ᠵᠡᠷᠭᠡ ᠶᠢᠨ ᠲᠠᠶᠢᠵᠢ ᠲᠡᠪᠰᠢᠬᠦᠯᠦᠭᠰᠡᠨ ᠶᠠᠪᠤᠳᠠᠯ ᠢ ᠰᠢᠬᠦᠮᠵᠢᠯᠡᠨ ᠵᠠᠭᠠᠯᠳᠤᠵᠠᠢ᠃ ᠲᠤᠳᠤᠭᠠᠳᠦ ᠶᠠᠮᠤᠨ ᠨᠢ ᠡᠨᠡᠬᠦ ᠪᠢᠴᠢᠭ ᠢ ᠵᠢᠪᠽᠤᠨᠳᠠᠮᠪᠠ ᠬᠤᠳᠤᠭᠳᠦ ᠳᠤ ᠲᠤᠯᠢᠯᠠᠭᠤᠯᠬᠤ ᠪᠠᠷ ᠡᠷᠬᠦᠨ ᠲᠡᠪᠰᠢᠬᠦᠯᠦᠭᠰᠡᠨ ᠪᠠᠶᠢᠵᠠᠢ ︵ᠡᠨᠡᠬᠦ ᠭᠠᠷ ᠪᠢᠴᠢᠮᠡᠯ ᠢ ᠠᠷᠤ ᠳᠤ ᠲᠠᠭᠠᠯᠳᠤᠭᠤᠯᠪᠠ︶᠃        1916 ᠤᠨ ᠳᠤ ᠷᠤᠯᠭᠠᠷᠵᠠᠪ ᠤᠷᠤᠰ ᠮᠤᠩᠭᠤᠯ ᠤᠨ ᠬᠢᠯᠢ ᠶᠢᠨ ᠬᠢᠶᠠᠭᠳᠦ ᠭᠡᠰᠡᠨ ᠭᠠᠵᠠᠷ ᠪᠠᠷᠭᠤ ᠶᠢᠨ ᠬᠠᠳᠠᠨ ᠪᠠᠭᠠᠳᠤᠷ ᠲᠠᠮᠳᠢᠨᠰᠦ᠋ᠷᠦᠩ ᠲᠠᠢ ᠬᠤᠶᠠᠭᠤᠯᠠ ᠬᠢᠯᠢ ᠬᠠᠮᠠᠭᠠᠯᠠᠵᠦ ᠪᠠᠶᠢᠭᠰᠠᠨ ᠢ ᠲᠡᠮᠳᠡᠭᠯᠡᠵᠦ ᠪᠠᠶᠢᠨ᠎ᠠ᠃        1917 ᠤᠨ ᠳᠤ ᠷᠤᠯᠭᠠᠷᠵᠠᠪ ᠬᠠᠯᠬ᠎ᠠ ᠭᠤᠤᠯ ᠤᠨ ᠪᠠᠪᠤᠵᠠᠪ ᠤᠨ ᠴᠡᠷᠢᠭ ᠢ ᠠᠪᠴᠢᠷᠠᠬᠤ ᠪᠠᠷ ᠶᠠᠪᠤᠭᠠᠳ ᠰᠤᠷᠠᠭ ᠦᠭᠡᠢ ᠪᠤᠯᠪᠠ ᠭᠡᠰᠡᠨ ᠲᠡᠮᠳᠡᠭᠯᠡᠯ ᠲᠠᠢ᠃ ᠲᠡᠭᠡᠭᠰᠡᠨ ᠴᠢᠨᠢ ᠬᠠᠷᠢᠨ ᠷᠤᠯᠭᠠᠷᠵᠠᠪ ᠠᠪᠤᠭᠠᠢ ᠪᠠᠪᠤᠵᠠᠪ ᠤᠨ ᠴᠡᠷᠢᠭ ᠢ ᠲᠠᠭᠠᠭᠤᠯᠤᠨ ᠨᠤᠳᠤᠭ ᠲᠠᠭᠠᠨ ᠢᠷᠡᠵᠦ᠂ ᠪᠦᠭᠳᠦᠷ ᠬᠠᠷᠠᠭ᠎ᠠ ᠲᠠᠢ ᠯᠢᠶᠠᠨᠵᠸᠦ ᠫᠤᠤ 500 ᠠᠪᠴᠢᠷᠠᠭᠠᠳ ᠬᠤᠰᠢᠭᠤ ᠴᠡᠷᠢᠭ ᠲᠠᠢ ᠨᠡᠶᠢᠯᠡᠵᠦ᠂ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠰᠦᠮ᠎ᠡ ᠭᠡᠶᠢᠳ ᠢ ᠰᠦᠢᠳᠭᠡᠨ ᠭᠠᠯᠳᠠᠵᠦ ᠶᠠᠪᠤᠭᠰᠠᠨ ᠬᠠᠷ᠎ᠠ ᠴᠡᠷᠢᠭ ᠢ ᠪᠠᠶᠢᠯᠳᠤᠨ ᠬᠦᠭᠡᠭᠡᠵᠦ᠂ ᠺᠠᠶᠢᠯᠤ ︵ᠬᠠᠯᠢᠭᠤᠳᠦ︶ ᠦᠩᠭᠡᠷᠡᠳᠡᠯ᠎ᠡ ᠪᠠᠶᠢᠯᠳᠤᠨ ᠲᠠᠭᠤᠵᠦ ᠶᠡᠭᠡᠳᠡ ᠲᠡᠶᠢᠯᠦᠭᠰᠡᠨ ᠰᠤᠷᠠᠭ ᠲᠠᠢ ᠭᠡᠵᠦ ᠲᠡᠮᠳᠡᠭᠯᠡᠵᠦ ᠪᠠᠶᠢᠨ᠎ᠠ ᠭᠡᠨ᠎ᠡ᠃ ᠷᠤᠯᠭᠠᠷᠵᠠᠪ ᠠᠪᠤᠭᠠᠢ ᠮᠤᠩᠭᠤᠯ ᠤᠯᠤᠰ ᠠᠴᠠ ᠪᠤᠴᠠᠵᠦ ᠢᠷᠡᠭᠰᠡᠨ ᠤ ᠲᠠᠷᠠᠭ᠎ᠠ ᠮᠦᠭᠳᠡᠨ ᠬᠤᠳᠠ ᠳᠤ ᠰᠠᠭᠤᠵᠦ ᠵᠠᠩ ᠰᠢᠦᠸᠠᠢ ᠯᠢᠶᠠᠩ ᠤᠨ ᠲᠤᠤᠷ᠎ᠠ ᠰᠣᠯᠠ ᠵᠦᠪᠯᠡᠭᠴᠢ ᠪᠠᠷ ᠠᠵᠢᠯᠯᠠᠵᠦ ᠪᠠᠶᠢᠬᠤ ᠳᠠᠭᠠᠨ ᠬᠤᠷᠴᠢᠨ ᠤ ᠭᠡᠰᠢᠩᠭᠡ᠂ ᠷᠠᠰᠢᠰᠡᠩᠭᠡ ᠵᠡᠷᠭᠡ ᠲᠠᠪᠰᠢᠭᠰᠠᠨ ᠰᠡᠭᠡᠭᠡᠳᠡᠳ ᠲᠠᠢ ᠬᠠᠮᠳᠦ ᠤᠯᠠᠨ ᠬᠤᠰᠢᠭᠤ ᠴᠢᠭᠤᠯᠭᠠᠨ ᠢᠶᠠᠷ ᠲᠤᠭᠤᠷᠢᠵᠦ ᠪᠠᠳᠢᠷ ᠡᠷᠢᠵᠦ᠂ ᠮᠦᠩᠬᠦ ᠴᠤᠭᠯᠠᠭᠤᠯᠤᠨ 1926 ᠤᠨ ᠳᠤ ︽ᠵᠡᠬᠦᠨ ᠮᠤᠩᠭᠤᠯ ᠤᠨ ᠪᠢᠴᠢᠭ ᠤᠨ ᠬᠤᠷᠢᠶ᠎ᠠ︾ ᠎ ᠶᠢ ᠪᠠᠶᠢᠭᠤᠯᠵᠠᠢ᠃  ᠢᠩᠬᠢᠭᠡᠳ ᠤᠷᠢᠳ ᠬᠤᠵᠢᠳ ︽ᠰᠤᠪᠤᠳ ᠡᠷᠢᠭᠡ︾᠂ ︽ᠮᠤᠩᠭᠤᠯ ᠦᠰᠦᠭ ᠎ ᠤᠨ ᠶᠤᠰᠤᠨ ᠎ ᠢ    ᠲᠤᠳᠤᠳᠬᠠᠭᠴᠢ   ᠲᠤᠯᠢ︾᠂ ︽ᠮᠤᠩᠭᠤᠯ ᠦᠰᠦᠭ ᠤᠨ ᠶᠤᠰᠤᠨ ᠢ ᠰᠠᠶᠢᠳᠦᠷ ᠨᠤᠮᠯᠠᠭᠰᠠᠨ ᠭᠡᠯᠡ ᠴᠢᠮᠡᠭ︾᠂ ︽ᠬᠦᠩ ᠤᠨ ᠵᠤᠤ ᠶᠢᠨ ᠭᠡᠭᠡᠨ ᠤ ᠰᠤᠷᠭᠠᠯ︾᠂ ᠲᠡᠦᠭᠡ᠂ ᠭᠡᠯᠡ᠂ ᠤᠷᠠᠨ ᠵᠤᠬᠢᠶᠠᠯ ᠤᠨ ᠨᠤᠮ ᠢ ᠭᠡᠪᠯᠡᠬᠦᠯᠦᠨ ᠲᠠᠷᠬᠠᠭᠠᠭᠰᠠᠨ ᠪᠠᠶᠢᠨ᠎ᠠ᠃         ᠪᠢᠴᠢᠭ ᠤᠨ ᠬᠤᠷᠢᠶ᠎ᠠ ᠪᠠᠶᠢᠭᠤᠯᠤᠭᠰᠠᠨ ᠵᠤᠷᠢᠯᠭ᠎ᠠ ᠨᠢ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤᠨ ᠬᠤᠤᠷ ᠲᠤ ᠬᠦᠨ ᠠᠪᠳᠠᠭᠰᠠᠨ ᠮᠤᠩᠭᠤᠯᠴᠦᠳ ᠤᠨ ᠮᠡᠳᠡᠯ ᠤᠬᠠᠭᠠᠨ ᠢ ᠨᠡᠭᠡᠭᠡᠭᠳᠡᠬᠦᠯᠵᠦ᠂ ᠹᠸᠦᠳᠠᠯ ᠤᠨ ᠬᠤᠴᠣᠷᠤᠩᠭᠤᠢ ᠪᠠᠯᠠᠷᠯᠢᠭ ᠪᠠᠶᠢᠳᠠᠯ ᠢ ᠦᠭᠡᠷᠡᠴᠢᠯᠡᠨ᠂ ᠦᠨᠳᠦᠰᠦᠳᠡᠨ ᠤ ᠤᠳᠬ᠎ᠠ ᠰᠤᠶᠤᠯ ᠢ ᠬᠦᠭᠵᠢᠬᠦᠯᠦᠨ ᠪᠤᠰᠤᠳ ᠦᠨᠳᠦᠰᠦᠳᠡᠨ ᠠᠴᠠ ᠬᠤᠴᠤᠷᠭᠠᠬᠤ ᠦᠭᠡᠢ ᠭᠡᠵᠦ ᠴᠢᠷᠮᠠᠶᠢᠯᠭ᠎ᠠ ᠭᠠᠷᠭᠠᠭᠰᠠᠨ ᠨᠢ ᠢᠯᠡᠷᠭᠡᠢ᠃        ᠡᠵᠡᠷᠭᠡᠭ ᠲᠦᠷᠢᠮᠡᠭᠡᠶᠢᠳᠡᠨ ᠪᠠ ᠹᠸᠦᠳᠠᠯ ᠢ ᠡᠰᠡᠷᠬᠦᠴᠡᠵᠦ᠂ ᠤᠯᠤᠰ ᠦᠨᠳᠦᠰᠦᠳᠡᠨ ᠢᠶᠠᠨ ᠬᠠᠶᠢᠷᠠᠯᠠᠬᠤ᠂ ᠡᠷᠭᠡ ᠴᠢᠯᠦᠭᠡ ᠡᠷᠭᠡ ᠲᠡᠭᠰᠢ ᠪᠠᠶᠢᠬᠤ ᠶᠢ ᠡᠷᠬᠢᠮᠯᠡᠭᠰᠡᠨ ᠠᠷᠠᠳᠴᠢᠯᠠᠯᠳᠦ ᠦᠵᠡᠯ ᠢ ᠲᠤᠰᠬᠠᠭᠰᠠᠨ ᠤᠷᠠᠨ ᠵᠤᠬᠢᠶᠠᠯ᠂ ᠭᠡᠯᠡ ᠪᠢᠴᠢᠭ᠂ ᠲᠡᠦᠭᠡ᠂ ᠭᠠᠵᠠᠷ ᠵᠦᠢ᠂ ᠶᠤᠰᠦ ᠮᠤᠷᠠᠯ᠂ ᠶᠡᠷᠦ ᠶᠢᠨ ᠮᠡᠳᠡᠯᠭᠡ ᠬᠢᠭᠡᠳ ᠪᠠᠶᠢᠭᠠᠯᠢ ᠶᠢᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠢ ᠬᠠᠮᠤᠷᠤᠭᠰᠠᠨ ᠰᠡᠩᠭᠡᠷᠡᠬᠦᠯᠬᠦ ᠰᠢᠨᠵᠢ ᠪᠦᠬᠦᠢ ᠶᠡᠷᠦᠩᠭᠡᠶᠢᠯᠡᠭᠰᠡᠨ ᠴᠢᠨᠠᠷ ᠲᠠᠢ ᠬᠢᠴᠢᠶᠡᠯ ᠤᠨ ᠪᠢᠴᠢᠭ ︽ᠠᠩᠬᠠᠨ ᠰᠤᠷᠭᠠᠬᠤ ᠤᠯᠤᠰ ᠤᠨ ᠤᠳᠬ᠎ᠠ︾ ᠭᠡᠬᠦ ᠨᠤᠮ ᠨᠠᠶᠢᠷᠠᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃         ᠲᠤᠰ ᠨᠠᠢᠮᠠᠨ ᠲᠡᠪᠳᠡᠷ ᠬᠢᠴᠢᠶᠡᠯ ᠤᠨ ᠪᠢᠴᠢᠭ ᠢ ᠰᠢᠨᠵᠢᠨ ᠱᠦᠬᠦᠪᠡᠰᠦ ᠦᠨᠳᠦᠰᠦᠳᠡᠨ ᠤᠭᠰᠠᠭᠠᠳᠠᠨ ᠤ ᠪᠠᠨ ᠦᠷᠨᠢᠨ ᠲᠡᠭᠵᠢᠷᠡᠬᠦ ᠶᠢᠨ ᠲᠦᠯᠦᠭᠡ᠂ ᠤᠶᠤᠨ ᠪᠢᠯᠢᠭ ᠢᠶᠠᠨ ᠨᠡᠭᠡᠭᠡᠭᠳᠡᠬᠦᠯᠵᠦ᠂  ᠤᠳᠬ᠎ᠠ ᠰᠤᠶᠤᠯ ᠢ ᠡᠵᠡᠮᠰᠢᠬᠦ  ᠶᠢᠨ ᠲᠦᠯᠦᠭᠡ᠂  ᠪᠠᠶᠢᠭᠠᠯᠢ ᠶᠢᠨ ᠡᠬᠢ ᠪᠠᠶᠠᠯᠢᠭ ᠢ ᠬᠠᠶᠢᠷᠠᠯᠠᠨ ᠬᠠᠮᠠᠭᠠᠯᠠᠬᠤ ᠶᠢᠨ ᠲᠦᠯᠦᠭᠡ ᠬᠦᠮᠦᠨ ᠪᠤᠯᠤᠭᠰᠠᠳ ᠤᠨ ᠤᠭ ᠴᠢᠨᠠᠷ  ᠢᠶᠠᠨ ᠰᠠᠬᠢᠬᠤ  ᠪᠠ ᠡᠷᠭᠡ  ᠲᠡᠭᠰᠢ᠂ ᠴᠢᠯᠦᠭᠡᠳᠦ  ᠠᠮᠢᠳᠤᠷᠠᠯ  ᠢ  ᠤᠬᠠᠭᠤᠯᠤᠭᠰᠠᠨ   ᠠᠭᠤᠯᠭ᠎ᠠ   ᠰᠠᠨᠠᠭ᠎ᠠ  ᠬᠦᠨ ᠪᠠᠶᠢᠳᠠᠭ᠃         ᠠᠳᠡ ᠬᠢᠴᠢᠶᠡᠯ ᠤᠨ ᠪᠢᠴᠢᠭ ᠲᠤᠳᠤᠷᠠᠬᠢ ᠭᠤᠷᠪᠠᠳᠤᠭᠠᠷ ᠲᠡᠪᠳᠡᠷ ᠤᠨ ᠭᠤᠴᠢᠨ ᠲᠤᠯᠤᠳᠤᠭᠠᠷ ᠬᠢᠴᠢᠶᠡᠯ ᠠᠴᠠ ᠵᠢᠱᠢᠶ᠎ᠡ ᠲᠠᠳᠠᠪᠠᠯ᠄         ︽ᠠᠭᠤᠯᠠᠨ ᠳᠤᠷ ᠪᠠᠷᠰ ᠪᠠᠶᠢᠵᠦ᠂ ᠬᠦᠮᠦᠨ ᠪᠠ ᠮᠠᠯ ᠢ ᠬᠤᠤᠷᠯᠠᠬᠤ ᠶᠢᠨ ᠲᠤᠯᠠ ᠠᠩᠴᠢᠨ ᠠᠷᠠᠳ ᠪᠠᠷᠰ ᠢ ᠪᠠᠷᠢᠰᠤᠭᠠᠢ ᠭᠡᠮᠡᠨ ᠵᠤᠭᠤᠷᠢ ᠤᠬᠤᠵᠦ ᠪᠡᠯᠡᠳᠭᠡᠭᠡᠳ᠂ ᠭᠡᠷᠡᠮ ᠳᠤᠷ ︿ᠡᠬᠦᠨ ᠤ ᠲᠤᠤᠷ᠎ᠠ ᠪᠠᠷᠰ ᠤᠨ ᠵᠤᠭᠤᠷᠢ ᠪᠤᠢ᠂ ᠶᠠᠪᠤᠬᠤ ᠬᠦᠮᠦᠨ ᠠᠯᠬᠤᠮ ᠢᠶᠠᠨ ᠵᠤᠭᠰᠦ︕﹀ ᠭᠡᠮᠡᠨ ᠶᠡᠭᠡ ᠦᠰᠦᠭ ᠢᠶᠠᠷ ᠪᠢᠴᠢᠪᠡᠢ᠃  ᠦᠰᠦᠭ ᠦᠯᠦ ᠲᠠᠨᠢᠭᠴᠢ ᠨᠢᠭᠡᠨ ᠬᠦᠮᠦᠨ ᠭᠡᠷᠡᠮ ᠤᠨ ᠡᠩᠭᠡᠷ ᠢᠶᠠᠷ ᠲᠠᠭᠠᠷᠢᠨ ᠦᠩᠭᠡᠷᠡᠬᠦᠢ ᠳᠡᠭᠡᠨ ᠪᠢᠴᠢᠭ ᠢ ᠬᠠᠶᠢᠬᠤᠷᠤᠭᠰᠠᠨ ᠦᠭᠡᠢ ᠲᠤᠯᠠ ᠭᠡᠨᠡᠳᠳᠡ ᠬᠦᠯ ᠠᠳᠡᠭᠳᠡᠵᠦ ᠵᠤᠭᠤᠷᠢ ᠳᠤᠷ ᠤᠨᠠᠭᠠᠳ ᠬᠦᠯ ᠢᠨᠦ ᠰᠢᠷᠠᠭᠳᠤᠵᠦ᠂ ᠦᠨᠳᠦᠷ ᠲᠠᠭᠤᠨ ᠢᠶᠠᠷ ᠪᠠᠷᠬᠢᠷᠠᠬᠤᠶ᠎ᠠ ᠤᠯᠠᠨ ᠬᠦᠮᠦᠨ ᠤᠳᠴᠦ᠂ ᠲᠠᠳᠠᠵᠦ ᠭᠠᠷᠭᠠᠭᠠᠳ ᠭᠡᠷᠡᠮ ᠲᠡᠭᠡᠷᠡᠬᠢ ᠪᠢᠴᠢᠭ ᠢ ᠵᠢᠭᠠᠵᠦ ᠦᠵᠡᠬᠦᠯᠪᠡᠰᠦ ᠲᠡᠷᠡ ᠲᠠᠷᠤᠢ ᠰᠡᠬᠦᠷᠡᠰᠦᠨ ᠠᠯᠳᠠᠵᠦ ᠦᠬᠦᠯᠡᠷᠦᠨ᠄ ︿ᠪᠢ ᠭᠡᠷᠪᠡ ᠦᠰᠦᠭ ᠲᠠᠨᠢᠬᠤ ᠪᠤᠯᠪᠠᠰᠦ᠂ ᠶᠠᠭᠤᠨᠢ ᠡᠶᠢᠮᠦ ᠳᠤᠷ ᠬᠦᠷᠬᠦ ᠠᠵᠢ﹀  ᠭᠡᠮᠡᠭᠡᠳ ᠲᠡᠬᠦᠨᠴᠡ ᠡᠬᠢᠯᠡᠨ ᠰᠢᠮᠳᠡᠨ ᠰᠤᠷᠴᠤᠬᠤᠢ︾ ᠭᠡᠵᠦ ᠰᠤᠶᠤᠯ ᠮᠡᠳᠡᠯᠭᠡ ᠰᠤᠷᠬᠤ ᠶᠢᠨ ᠴᠢᠬᠤᠯᠠ ᠶᠤᠰᠦ ᠶᠢ ᠰᠡᠩᠭᠡᠷᠡᠬᠦᠯᠦᠨ ᠲᠠᠨᠢᠭᠤᠯᠤᠭᠰᠠᠨ ᠪᠠᠶᠢᠵᠠᠢ᠃ ᠷᠤᠯᠭᠠᠷᠵᠠᠪ ︽ᠠᠩᠬᠠᠨ ᠰᠤᠷᠭᠠᠬᠤ ᠤᠯᠤᠰ ᠤᠨ ᠤᠳᠬ᠎ᠠ︾᠎ ᠶᠢ ᠨᠠᠶᠢᠷᠠᠭᠤᠯᠤᠨ ᠵᠤᠬᠢᠶᠠᠬᠤ ᠳᠠᠭᠠᠨ ᠮᠤᠩᠭᠤᠯ ᠦᠰᠦᠭ ᠵᠢᠭᠠᠬᠤ ᠠᠷᠭ᠎ᠠ ᠶᠢ ᠴᠤ ᠰᠤᠳᠤᠯᠵᠠᠢ᠃ ᠦᠶ᠎ᠡ ᠪᠠᠷ ᠵᠠᠳᠠᠯᠬᠤ ᠠᠷᠭ᠎ᠠ ᠶᠢ ᠭᠡᠷᠡᠭᠯᠡᠵᠦ᠂ ᠰᠤᠷᠬᠤ ᠨᠠᠰᠤᠨ ᠤ ᠭᠡᠦᠭᠡᠳ ᠤᠨ ᠤᠨᠴᠠᠯᠢᠭ ᠲᠤ ᠵᠤᠬᠢᠴᠠᠭᠤᠯᠤᠨ ᠬᠦᠢᠭᠡᠨ ᠠᠴᠠ ᠬᠦᠨᠵᠡᠭᠡᠶᠢᠷᠡᠬᠦᠯᠬᠦ᠂ ᠰᠠᠨᠠᠭ᠎ᠠ ᠲᠦᠷᠬᠦ ᠪᠠᠷ ᠢᠯᠡ ᠬᠦᠮᠦᠵᠢᠬᠦᠯᠬᠦ᠂ ᠮᠤᠩᠭᠤᠯ ᠠᠵᠦ ᠠᠮᠢᠳᠤᠷᠠᠯ ᠵᠠᠩ ᠲᠠᠳᠬᠠᠯ ᠲᠠᠢ ᠨᠢᠭᠳᠠ ᠤᠶᠠᠯᠳᠤᠭᠤᠯᠤᠭᠰᠠᠨ᠂ ᠤᠬᠤᠷ ᠠᠪᠰᠠᠷ᠂ ᠵᠤᠬᠢᠶᠠᠮᠵᠢ ᠴᠢᠩᠭ᠎ᠠ᠂ ᠤᠷᠤᠰᠤᠮ᠎ᠠ ᠰᠠᠶᠢᠬᠠᠨ ᠮᠤᠩᠭᠤᠯ ᠭᠡᠯᠡ ᠪᠠᠷ ᠨᠠᠶᠢᠷᠠᠭᠤᠯᠤᠨ ᠵᠤᠬᠢᠶᠠᠭᠰᠠᠨ ᠪᠠᠶᠢᠳᠠᠭ᠃ ᠲᠡᠬᠦᠨ ᠤ ᠭᠤᠤᠯ ᠪᠤᠯᠬᠤ ᠵᠤᠬᠢᠶᠠᠯ ᠠᠴᠠ ᠲᠤᠷᠠᠳᠪᠠᠯ᠂ ᠡᠭᠡ ᠨᠤᠳᠤᠭ ᠢᠶᠠᠨ ᠪᠠᠭ᠋ᠠᠷᠬᠠᠵᠦ᠂ ᠡᠳ᠋ ᠪᠠᠶᠠᠯᠢᠭ᠂ ᠠᠭᠤᠯᠠ ᠤᠰᠦ ᠪᠠᠨ ᠲᠠᠨᠢᠯᠴᠠᠭᠤᠯᠤᠭᠰᠠᠨ ︽ᠪᠤᠷᠤ ᠲᠤᠭᠤᠢ︾᠂ ︽ᠬᠦᠭᠡ ᠨᠠᠭᠤᠷ︾᠂ ︽ᠰᠢᠷ᠎ᠠ ᠮᠦᠷᠡᠨ︾᠂  ︽ᠦᠵᠦᠮᠦᠴᠢᠨ ᠤ ᠲᠠᠪᠤᠰᠤᠨ ᠨᠠᠭᠤᠷ︾ ᠵᠡᠷᠭᠡ ᠨᠠᠶᠢᠷᠠᠭᠤᠯᠤᠯ ᠤᠨ ᠵᠤᠬᠢᠶᠠᠯ ᠪᠠ ᠵᠠᠩ ᠵᠠᠩᠰᠢᠯ ᠳᠤ ᠬᠤᠯᠪᠤᠭᠳᠠᠭᠰᠠᠨ ︽ᠮᠤᠩᠭᠤᠯ ᠭᠡᠷ ︾᠂  ︽ᠬᠤᠨᠢᠨ ᠤ ᠦᠰᠦ︾   ᠵᠡᠷᠭᠡ ᠰᠤᠳᠤᠨ ᠪᠦᠳᠦᠭᠡᠯ ᠪᠤᠢ᠃ ᠦᠯᠢᠭᠡᠷ ᠤᠨ ᠵᠤᠬᠢᠶᠠᠯ ᠳᠤ ︽ᠪᠠᠭ᠎ᠠ ᠪᠢᠯᠵᠤᠤᠬᠠᠢ︾᠂  ︽ᠠᠭᠤᠯᠠ ᠶᠢᠨ ᠪᠠᠷᠰ︾ ᠂ ︽ᠠᠯᠳᠠᠨ ᠤᠷᠢᠶᠠᠩᠭᠤ ᠴᠡᠴᠡᠭ︾  ᠪᠤᠯᠤᠨ ︽ᠭᠡᠷᠢᠶ᠎ᠡ ᠶᠢᠨ ᠲᠠᠭᠤᠤ︾ ᠵᠡᠷᠭᠡ ᠰᠢᠯᠦᠭ ᠤᠳ ᠢ ᠲᠤᠷᠠᠳᠴᠦ ᠪᠤᠯᠤᠨ᠎ᠠ᠃         ᠷᠤᠯᠭᠠᠷᠵᠠᠪ ᠠᠪᠤᠭᠠᠢ 1929 ᠤᠨ ᠳᠤ ᠮᠦᠭᠳᠡᠨ ᠬᠤᠳᠠ ᠠᠴᠠ ᠰᠠᠯᠵᠦ ᠬᠤᠰᠢᠭᠤᠨ ᠳᠠᠭᠠᠨ ᠢᠷᠡᠵᠦ᠂ ᠪᠠᠬᠢᠵᠢᠶᠠᠭ᠎ᠠ ᠶᠢ ᠵᠠᠰᠠᠭ ᠰᠠᠭᠤᠷᠢᠨ ᠠᠴᠠ ᠪᠠᠭᠤᠯᠭᠠᠵᠦ᠂ ᠲᠤᠰ ᠵᠢᠯ ᠤᠨ ᠵᠢᠷᠭᠤᠳᠤᠭᠠᠷ ᠰᠠᠷ᠎ᠠ ᠳᠤ ᠲᠤᠰᠠᠯᠠᠭᠴᠢ ᠬᠦᠩ ᠤᠨ ᠵᠡᠷᠭᠡ ᠲᠠᠢ ᠵᠠᠰᠠᠭ ᠨᠤᠶᠠᠨ ᠪᠤᠯᠵᠠᠢ᠃ ᠡᠨᠡ ᠬᠤᠭᠤᠴᠠᠭᠠᠨ ᠳᠤ ᠲᠡᠷᠡ ᠮᠤᠩᠭᠤᠯᠴᠦᠳ ᠲᠤ ᠠᠯᠪᠠᠳᠦ ᠪᠤᠭᠤᠯ ᠢ ᠴᠢᠯᠦᠭᠡᠯᠡᠬᠦ ᠭᠡᠷᠡᠭᠳᠡᠢ᠃ ᠭᠡᠦᠭᠡᠳ ᠢᠶᠠᠨ ᠰᠤᠷᠭᠠᠭᠤᠯᠢ ᠳᠤ ᠤᠷᠤᠭᠤᠯᠬᠤ ᠭᠡᠷᠡᠭᠳᠡᠢ᠃ ᠭᠡᠦᠭᠡᠳ ᠢᠶᠠᠨ ᠯᠠᠮᠠ ᠪᠤᠯᠭᠠᠵᠦ ᠪᠤᠯᠬᠤ ᠦᠭᠡᠢ᠃ ᠡᠮᠡᠭᠳᠡᠶᠢᠴᠦᠳ ᠴᠢᠪᠠᠭᠠᠨᠴᠠ ᠪᠤᠯᠵᠦ ᠪᠤᠯᠬᠤ ᠦᠭᠡᠢ ᠭᠡᠬᠦ ᠮᠡᠳᠦ ᠹᠸᠦᠳᠠᠯ ᠶᠤᠰᠦ ᠠᠴᠠ ᠠᠩᠬᠢᠵᠢᠷᠠᠭᠤᠯᠬᠤ ᠵᠠᠷᠢᠮ ᠲᠠᠯ᠎ᠠ ᠶᠢᠨ ᠠᠵᠢᠯ ᠢ ᠬᠢᠭᠰᠡᠨ ᠪᠠᠶᠢᠨ᠎ᠠ᠃         ᠶᠠᠭᠤᠨ ᠤ ᠤᠷᠢᠳ ᠪᠢᠷᠠᠭᠤ ᠪᠠᠯᠭᠠᠰᠤᠨ ᠳᠤ ᠮᠤᠩᠭᠤᠯ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠪᠠᠶᠢᠭᠤᠯᠵᠦ᠂ ᠮᠤᠩᠭᠤᠯᠴᠦᠳ ᠤᠨ ᠭᠡᠦᠭᠡᠳ ᠢ ᠰᠤᠷᠭᠠᠭᠤᠯᠢ ᠳᠤ ᠤᠷᠤᠭᠤᠯᠤᠨ ᠪᠢᠴᠢᠭ ᠨᠤᠮ ᠰᠤᠷᠭᠠᠬᠤ ᠶᠢ ᠴᠢᠩᠭ᠎ᠠ ᠱᠠᠭᠠᠷᠳᠠᠵᠦ ᠪᠠᠶᠢᠵᠠᠢ᠃ ᠷᠤᠯᠭᠠᠷᠵᠠᠪ ᠠᠪᠤᠭᠠᠢ ᠬᠤᠰᠢᠭᠤ ᠵᠠᠰᠠᠭ ᠤᠨ ᠨᠡᠷ᠎ᠡ ᠪᠠᠷ ᠲᠤᠭᠳᠠᠭᠠᠯ ᠭᠠᠷᠭᠠᠵᠦ᠂ ︽ᠮᠤᠩᠭᠤᠯ ᠬᠦᠮᠦᠨ ᠬᠦᠦ ᠪᠠᠨ ᠯᠠᠮᠠ ᠪᠤᠯᠭᠠᠵᠦ ᠪᠤᠯᠬᠤ ᠦᠭᠡᠢ᠂ ᠭᠡᠦᠭᠡᠳ ᠪᠠᠭᠠᠴᠦᠳ ᠢ ᠡᠷᠡᠭᠳᠡᠢ ᠡᠮᠡᠭᠳᠡᠢ ᠡᠰᠡ ᠢᠯᠭᠠᠨ ᠰᠤᠷᠭᠠᠭᠤᠯᠢ ᠳᠤ ᠤᠷᠤᠭᠤᠯᠵᠦ᠂ ᠪᠢᠴᠢᠭ ᠨᠤᠮ ᠰᠤᠷᠭᠠᠬᠤ ᠭᠡᠷᠡᠭᠳᠡᠢ᠂ ᠭᠡᠨ ᠭᠡᠷᠪᠡ ᠭᠡᠦᠭᠡᠳ ᠢᠶᠠᠨ ᠰᠤᠷᠭᠠᠭᠤᠯᠢ ᠳᠤ ᠡᠰᠡ ᠰᠠᠭᠤᠯᠭᠠᠵᠦ᠂ ᠪᠢᠴᠢᠭ ᠨᠤᠮ ᠢ ᠰᠤᠷᠭᠠᠬᠤ ᠦᠭᠡᠢ ᠪᠤᠯ ᠲᠡᠬᠦᠨ ᠤ ᠮᠠᠯ ᠤᠨᠤᠭ᠎ᠠ ᠶᠢ ᠬᠤᠰᠢᠭᠤ ᠵᠠᠰᠠᠭ ᠠᠴᠠ ᠬᠤᠷᠢᠶᠠᠨ ᠠᠪᠤᠨ᠎ᠠ ᠭᠡᠵᠦ ᠲᠤᠩᠬᠠᠭ ᠭᠠᠷᠭᠠᠭᠰᠠᠨ ᠪᠦᠭᠡᠳ ᠭᠡᠷ ᠤᠨ ᠠᠮᠢᠳᠤᠷᠠᠯ ᠶᠠᠳᠠᠭᠤ ᠰᠤᠷᠤᠭᠴᠢᠳ ᠤᠨ ᠰᠤᠷᠤᠯᠭ᠎ᠠ ᠶᠢᠨ ᠰᠦᠢᠳᠭᠡᠯ ᠢ ᠬᠤᠰᠢᠭᠤ ᠵᠠᠰᠠᠭ ᠠᠴᠠ ᠬᠠᠷᠢᠭᠤᠴᠠᠨ᠎ᠠ︾ ᠭᠡᠵᠦ ᠲᠤᠭᠳᠠᠭᠠᠵᠠᠢ᠃ ᠡᠨᠡᠬᠦ ᠲᠤᠭᠳᠠᠭᠠᠯ ᠨᠢ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠡᠭᠡᠨ ᠤᠳᠦ ᠶᠢᠨ ᠮᠠᠨ ᠤ ᠤᠯᠤᠰ ᠲᠤ ᠶᠠᠪᠤᠭᠳᠠᠵᠦ ᠪᠠᠶᠢᠭ᠎ᠠ ︽ᠠᠯᠪᠠᠨ ᠵᠢᠷᠤᠮ ᠤᠨ ᠰᠤᠷᠭᠠᠨ ᠬᠦᠮᠦᠵᠢᠯ  ᠎ ᠤᠨ ᠬᠠᠤᠯᠢ︾ ᠰᠢᠭ᠋ ᠬᠠᠤᠯᠢ ᠪᠠᠶᠢᠵᠠᠢ ᠭᠡᠵᠦ ᠦᠵᠡᠵᠦ ᠪᠤᠯᠤᠮᠠᠷ ᠪᠠᠶᠢᠨ᠎ᠠ᠃        1934 ᠤᠨ ᠳᠤ ᠲᠡᠷᠡ ᠤᠤᠯ ᠤᠨ ᠵᠢᠩᠫᠧᠩ ᠰᠢᠶᠠᠨ ︵ᠢᠷᠭᠡᠨ ᠤᠯᠤᠰ ᠤᠨ ᠭᠤᠷᠪᠠᠳᠤᠭᠠᠷ ᠤᠨ ᠳᠤ ᠿᠧ ᠾᠧ ᠮᠤᠵᠢ ᠶᠢᠨ ᠤᠨᠴᠠᠭᠠᠢ ᠤᠷᠤᠨ ᠵᠢᠩᠫᠧᠩ ᠰᠢᠶᠠᠨ ᠭᠡᠵᠦ ᠬᠤᠰᠢᠭᠤᠨ ᠲᠦᠪ ᠪᠢᠷᠠᠭᠤ ᠳᠤ ᠪᠠᠶᠢᠭᠤᠯᠵᠠᠢ︶᠎ ᠢ ᠬᠠᠰᠤᠭᠰᠠᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ ᠵᠠᠰᠠᠭ ᠤᠨ ᠰᠠᠭᠤᠷᠢᠨ ᠢ ᠵᠠᠯᠭᠠᠮᠵᠢᠯᠠᠵᠦ᠂ ᠹᠸᠦᠳᠠᠯ ᠤᠨ ᠬᠠᠭᠤᠴᠢᠨ ᠲᠦᠷᠢᠮ ᠢ ᠡᠪᠳᠡᠵᠦ᠂ ᠭᠡᠰᠢᠭᠳᠡᠨ ᠬᠤᠰᠢᠭᠤᠨ ᠤ ᠠᠯᠪᠠᠨ ᠵᠠᠬᠢᠷᠭ᠎ᠠ ᠶᠢ ᠰᠢᠨ᠎ᠡ ᠪᠠᠷ ᠪᠠᠶᠢᠭᠤᠯᠤᠨ ᠦᠪᠡᠰᠦᠪᠡᠨ ᠬᠤᠰᠢᠭᠤᠨ ᠤ ᠠᠩᠬᠠᠳᠠᠭᠴᠢ ᠬᠤᠰᠢᠭᠤ ᠲᠠᠷᠤᠭ᠎ᠠ ᠪᠤᠯᠵᠠᠢ᠃ ᠢᠯᠠᠩᠭᠤᠶ᠎ᠠ ᠬᠤᠵᠢᠮ ᠨᠢ ᠲᠡᠬᠦᠨ ᠤ ᠦᠵᠡᠯᠳᠡ ᠵᠤᠷᠢᠯᠳᠠ ᠨᠢᠭᠡᠳᠦᠳᠡᠭ ᠲᠤᠰᠠᠯᠠᠭᠴᠢ ᠠᠯᠳᠠᠨᠸᠠᠴᠢᠷ ᠨᠠᠷ ᠢ ᠬᠤᠰᠢᠭᠤ ᠲᠠᠷᠤᠭ᠎ᠠ ᠲᠠᠯᠪᠢᠵᠦ᠂ ᠵᠠᠰᠠᠭ ᠤᠨ ᠢᠵᠠᠭᠤᠷ ᠤᠯᠠᠮᠵᠢᠯᠠᠯ ᠶᠤᠰᠦ ᠶᠢ ᠬᠠᠯᠠᠵᠦ ᠦᠭᠡᠷᠡᠴᠢᠯᠡᠭᠰᠡᠨ ᠡᠨᠡ ᠶᠠᠪᠤᠳᠠᠯ ᠨᠢ ᠴᠤ ᠷᠤᠯᠭᠠᠷᠵᠠᠪ ᠠᠪᠤᠭᠠᠢ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠡᠭᠡᠨ ᠨᠢᠭᠡᠨ ᠢᠳᠡᠪᠬᠢᠳᠡᠢ ᠠᠷᠠᠳᠴᠢᠯᠠᠭᠰᠠᠨ ᠦᠵᠡᠯᠳᠡᠨ᠂ ᠹᠸᠦᠳᠠᠯ ᠶᠤᠰᠤᠨ ᠤ ᠰᠢᠨᠡᠴᠢᠯᠡᠯᠳᠡ ᠬᠢᠭᠰᠡᠨ ᠬᠦᠮᠦᠨ ᠪᠤᠯᠬᠤ ᠶᠢ ᠬᠦᠢᠴᠡᠳ ᠬᠠᠷᠠᠭᠤᠯᠤᠨ᠎ᠠ᠃         ᠬᠤᠵᠢᠮ ᠨᠢ ᠷᠤᠯᠭᠠᠷᠵᠠᠪ ᠠᠪᠤᠭᠠᠢ ᠬᠠᠭᠤᠷᠮᠠᠭ ᠮᠠᠨᠵᠦ ᠶᠢᠨ ᠬᠢᠩᠭᠠᠨ ᠪᠠᠷᠠᠭᠤᠨ ᠮᠤᠵᠢ ᠶᠢᠨ ᠮᠤᠵᠢ ᠶᠢᠨ ᠲᠠᠷᠤᠭ᠎ᠠ ᠪᠤᠯᠵᠦ ᠦᠩᠭᠡᠷᠡᠵᠡᠢ᠃ ᠮᠤᠵᠢ ᠶᠢᠨ ᠲᠠᠷᠤᠭ᠎ᠠ ᠪᠠᠶᠢᠯ᠎ᠠ ᠭᠡᠳᠡᠭ ᠪᠤᠯᠪᠠᠴᠦ ᠦᠨᠡᠨᠳᠡᠭᠡᠨ ᠰᠢᠩᠭᠡᠯᠢᠭ ᠲᠤ ᠬᠤᠷᠢᠭᠳᠠᠭᠰᠠᠨ ᠪᠢᠯᠵᠤᠤᠬᠠᠢ ᠲᠡᠳᠦᠶᠢᠯᠡ ᠪᠠᠶᠢᠵᠦ᠂ ︽ᠪᠢ ᠮᠤᠵᠢ ᠶᠢᠨ ᠲᠠᠷᠤᠭ᠎ᠠ ᠶᠢᠨ ᠨᠡᠷ᠎ᠡ ᠶᠢ ᠵᠡᠬᠦᠭᠡᠳ ᠠᠵᠢᠯ ᠬᠢᠬᠦ ᠦᠭᠡᠢ ᠲᠤᠯᠠ ᠲᠤᠯᠢ ᠪᠢᠴᠢᠭ ᠨᠠᠶᠢᠷᠠᠭᠤᠯᠤᠨ ᠰᠠᠭᠤᠵᠦ ᠪᠠᠶᠢᠨ᠎ᠠ᠃ ᠡᠷᠭᠡ ᠮᠡᠳᠡᠯ ᠢ ᠪᠦᠷ ᠶᠠᠫᠤᠨ ᠨᠤᠶᠠᠳ ᠮᠡᠳᠡᠵᠦ ᠪᠠᠶᠢᠨ᠎ᠠ︾ ᠭᠡᠵᠦ ᠮᠠᠨᠤᠤᠯ ᠨᠤᠶᠠᠨ ᠪᠤᠯᠤᠭᠰᠠᠨ ᠢᠶᠠᠨ ᠮᠡᠳᠡᠷᠡᠨ ᠶᠠᠷᠢᠵᠦ ᠪᠠᠶᠢᠭᠰᠠᠨ ᠪᠦᠭᠡᠳ ᠬᠠᠶᠢᠷᠠᠨ ᠴᠠᠭ ᠢ ᠲᠠᠯᠠᠭᠠᠷ ᠰᠦᠢᠳᠭᠡᠭᠰᠡᠨ ᠦᠭᠡᠢ᠂ ᠲᠤᠮᠤ ᠭᠡᠮᠵᠢᠶᠡᠨ ᠤ ᠮᠤᠩᠭᠤᠯ ᠲᠤᠯᠢ ᠪᠢᠴᠢᠭ ᠨᠠᠶᠢᠷᠠᠭᠤᠯᠤᠭᠰᠠᠨ ᠪᠦᠭᠡᠳ ︽ᠮᠤᠩᠭᠤᠯ ᠤᠨ ᠤᠳᠬ᠎ᠠ ᠶᠢᠨ ᠰᠤᠷᠭᠠᠯ ᠤᠨ ᠬᠤᠷᠠᠯ︾᠎ ᠳᠤ ᠤᠳᠤᠷᠢᠳᠬᠤ ᠪᠠᠭᠰᠢ ᠪᠠᠷ ᠤᠷᠢᠭᠳᠠᠵᠦ᠂ ︽ᠤᠯᠠᠭᠠᠨ ᠪᠠᠷᠰ︾ ᠰᠡᠳᠬᠦᠯ ᠢ ᠬᠢᠨᠠᠨ ᠵᠠᠰᠠᠬᠤ ᠮᠡᠳᠦ ᠰᠤᠶᠤᠯ ᠤᠨ ᠠᠵᠢᠯ ᠢ ᠭᠤᠤᠯᠴᠢᠯᠠᠨ ᠬᠢᠵᠦ ᠪᠠᠶᠢᠵᠠᠢ᠃         ᠷᠤᠯᠭᠠᠷᠵᠠᠪ ᠠᠪᠤᠭᠠᠢ 1941 ᠤᠨ ᠤ 8 ᠰᠠᠷ᠎ᠠ ᠳᠤ ᠺᠠᠶᠢᠯᠤ ᠬᠤᠳᠠᠨ᠎ᠠ ᠲᠠᠪᠢᠨ ᠭᠤᠷᠪᠠᠳᠠᠢ ᠨᠠᠰᠦ ᠪᠠᠷᠠᠵᠠᠢ᠃  ᠲᠡᠬᠦᠨ ᠤ ᠨᠠᠰᠦ ᠪᠠᠷᠠᠭᠰᠠᠨ ᠲᠤᠬᠠᠢ ᠬᠦᠮᠦᠰ ᠤᠨ ᠭᠡᠯᠡᠯᠴᠡᠬᠦ ᠪᠠᠷ ᠨᠢᠭᠡ ᠤᠳᠠᠭ᠎ᠠ ᠶᠠᠫᠤᠨ ᠬᠦᠮᠦᠨ ᠭᠡᠷ ᠲᠡᠭᠡᠨ ᠵᠠᠯᠠᠵᠦ ᠲᠠᠶᠢᠯᠠᠯᠭ᠎ᠠ ᠬᠢᠵᠡᠢ᠃  ᠲᠠᠶᠢᠯᠠᠯᠭ᠎ᠠ ᠠᠴᠠ ᠭᠠᠷᠴᠦ ᠢᠷᠡᠬᠦ ᠳᠤ ᠲᠤᠯᠤᠭᠠᠢ ᠨᠢ ᠡᠷᠬᠢᠵᠦ᠂  ᠴᠢᠷᠠᠢ ᠨᠢ ᠬᠤᠵᠠᠶᠢᠵᠦ᠂  ᠨᠤᠭᠤᠭᠠᠨ ᠢᠶᠠᠷ ᠪᠦᠭᠡᠯᠵᠢᠭᠡᠳ ᠭᠡᠨᠡᠳᠳᠡ ᠪᠠᠷ ᠨᠠᠰᠦ ᠪᠠᠷᠠᠭᠰᠠᠨ ᠭᠡᠨ᠎ᠡ᠃         ᠷᠣᠯᠭᠠᠷᠵᠠᠪ ᠠᠪᠤᠭᠠᠢ ᠨᠠᠰᠦ ᠨᠦᠭᠴᠢᠭᠰᠡᠨ ᠤ ᠲᠠᠷᠠᠭ᠎ᠠ ᠠᠯᠳᠠᠷᠳᠦ ᠡᠷᠳᠡᠮᠳᠡᠨ ᠭᠡᠰᠢᠩᠭᠡ ᠠᠴᠠ ᠷᠤᠯᠭᠠᠷᠵᠠᠪ ᠤᠨ ᠴᠢᠨᠳᠠᠷ ᠤᠨ ᠤᠷᠳᠤᠳᠠ ᠬᠦᠵᠢ ᠡᠷᠬᠦᠨ ᠠᠷᠢᠬᠢ ᠲᠤᠰᠤᠭᠠᠵᠦ ᠭᠠᠰᠢᠭᠤᠳᠠᠨ᠄ ︽ᠷᠤ ᠠᠪᠤᠭᠠᠢ ᠹᠦ᠋ ᠲᠢᠩ ᠲᠠᠨ ᠤ ᠲᠡᠭᠡᠳᠦ ᠴᠢᠨᠳᠠᠷ ᠤᠨ ᠤᠷᠳᠤᠳᠠ ᠬᠦᠵᠢ ᠡᠷᠬᠦᠨ ᠠᠷᠢᠬᠢ ᠲᠤᠰᠤᠭᠠᠵᠦ ᠲᠠᠬᠢᠬᠤ ᠦᠭᠡ ᠠᠨᠤ᠄ ᠨᠡᠭᠡᠨ ᠰᠠᠨᠠᠪᠠᠰᠦ ᠠᠪᠤᠭᠠᠢ ᠲᠠᠨ ᠤ ᠪᠡᠶ᠎ᠡ ᠵᠠᠯᠠᠭᠤ ᠠᠴᠠ ᠡᠷᠳᠡᠮ ᠰᠤᠷᠤᠯᠭ᠎ᠠ ᠳᠤᠷ ᠰᠤᠳᠤᠯᠵᠦ᠂ ᠦᠪᠦᠷ ᠴᠢᠭᠤᠯᠭᠠᠨ᠎ᠠ ᠨᠡᠷ᠎ᠡ ᠲᠠᠭᠤᠷᠢᠰᠪᠠᠢ᠃ ᠲᠤᠮᠳᠠ ᠨᠠᠰᠤᠨ᠎ᠠ ᠵᠤᠷᠢᠭ ᠪᠤᠳᠤᠯᠭ᠎ᠠ ᠶᠢ ᠲᠡᠯᠭᠡᠷᠡᠬᠦᠯᠵᠦ᠂ ᠠᠷᠤ ᠬᠦᠷᠢᠶᠡᠨ᠎ᠡ ᠵᠢᠳᠬᠦᠯ ᠢᠯᠡᠷᠡᠪᠡᠢ᠃ ᠮᠦᠭᠳᠡᠨ ᠭᠡᠰᠢᠭᠳᠡᠨ ᠤ ᠲᠤᠰᠢᠶᠡᠯ ᠳᠤᠷ ᠠᠬᠤᠢ ᠳᠤᠷ ᠭᠠᠪᠢᠶ᠎ᠠ ᠴᠠᠷᠮᠠᠯ ᠭᠡᠳᠦᠷᠡᠭᠰᠡᠨ ᠤ ᠲᠤᠯᠠ ᠰᠤᠩᠭᠤᠭᠳᠠᠨ ᠲᠡᠪᠰᠢᠵᠦ ᠲᠤᠶᠢᠯ ᠤᠨ ᠭᠡᠰᠢᠭ ᠲᠤᠷ ᠬᠦᠷᠳᠡᠪᠡᠢ᠃ ᠲᠦᠷᠦᠯᠬᠢ ᠵᠠᠩ ᠰᠢᠳᠤᠷᠭᠤ ᠦᠨᠡᠨᠴᠢ᠂ ᠬᠦᠨᠳᠦ ᠪᠤᠯᠭᠤᠮᠵᠢᠳᠠᠢ ᠪᠦᠭᠡᠳ ᠰᠤᠷᠬᠤᠢ ᠳᠤᠷ ᠪᠠᠭ᠋ᠠᠳᠠᠢ᠂ ᠵᠠᠰᠠᠳᠠᠭ ᠦᠭᠡᠢ ᠳᠤᠷ ᠨᠦᠬᠦᠷ ᠪᠢᠳᠡ ᠤᠨᠴᠠ ᠪᠢᠰᠢᠷᠡᠬᠦ ᠶᠢᠨ ᠲᠤᠯᠠ ᠡᠬᠦᠷᠢ ᠤᠳᠠᠳᠠᠯ᠎ᠠ ᠠᠬᠤᠢ ᠶᠢ ᠡᠷᠡᠮᠵᠢᠯᠡᠬᠦ ᠪᠦᠯᠦᠭᠡ  ᠁︾ ᠭᠡᠵᠦ ᠪᠢᠴᠢᠭ ᠪᠢᠴᠢᠵᠦ ᠲᠠᠶᠢᠪᠠ᠃ ᠲᠡᠬᠦᠨ ᠤ ᠪᠢᠴᠢᠭᠰᠡᠨ ᠡᠨᠡᠬᠦ ︽ᠹᠦ᠋ ᠲᠢᠩ ᠠᠪᠤᠭᠠᠢ ᠳᠤᠷ ᠲᠠᠬᠢᠭᠰᠠᠨ ᠪᠢᠴᠢᠭ︾᠎ ᠨᠢ ᠬᠤᠵᠢᠮ ᠲᠤᠮᠳᠠᠳᠦ ᠰᠤᠷᠭᠠᠭᠤᠯᠢ ᠶᠢᠨ ᠰᠤᠷᠬᠤ ︽ᠭᠡᠯᠡ ᠪᠢᠴᠢᠭ︾᠎ ᠲᠤ ᠰᠤᠩᠭᠤᠭᠳᠠᠵᠠᠢ᠃         ᠷᠤᠯᠭᠠᠷᠵᠠᠪ ᠠᠪᠤᠭᠠᠢ ᠪᠤᠯ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠤᠶᠢᠷ᠎ᠠ ᠦᠶ᠎ᠡ ᠶᠢᠨ ᠲᠡᠦᠭᠡᠨ ᠎ ᠳᠠᠬᠢ ᠶᠡᠭᠡ ᠪᠢᠴᠢᠭ ᠤᠨ ᠬᠦᠮᠦᠨ᠂ ᠤᠯᠤᠰ ᠦᠨᠳᠦᠰᠦᠳᠡᠨ ᠢᠶᠠᠨ ᠰᠡᠷᠬᠦᠭᠡᠨ ᠪᠤᠰᠬᠠᠵᠦ᠂ ᠬᠦᠭᠵᠢᠬᠦᠯᠦᠨ ᠮᠠᠨᠳᠤᠭᠤᠯᠬᠤ ᠶᠢᠨ ᠲᠦᠯᠦᠭᠡ ᠬᠦᠴᠦᠯᠡᠨ ᠴᠢᠷᠮᠠᠶᠢᠭᠰᠠᠨ ᠰᠤᠶᠤᠯ ᠭᠡᠭᠡᠷᠡᠯ ᠤᠨ ᠭᠠᠷᠮᠠᠭᠠᠢ ᠵᠢᠳᠬᠦᠯᠳᠡᠨ ᠶᠤᠮ᠃ ᠷᠤᠯᠭᠠᠷᠵᠠᠪ ᠠᠪᠤᠭᠠᠢ ᠲᠠᠨ ᠤ ᠠᠯᠳᠠᠷ᠂ ᠲᠠᠨ ᠤ ᠵᠤᠷᠢᠭ ᠰᠠᠨᠠᠭ᠎ᠠ ᠮᠤᠩᠭᠤᠯ ᠰᠤᠶᠤᠯ ᠰᠤᠷᠭᠠᠨ ᠬᠦᠮᠦᠵᠢᠯ ᠤᠨ ᠲᠡᠦᠭᠡᠨ ᠳᠤ ᠦᠨᠢᠳᠡ ᠭᠡᠷᠡᠯᠳᠦᠨ᠎ᠡ᠃ ᠮᠦᠨ ᠴᠤ ᠮᠤᠩᠭᠤᠯ ᠤᠳᠬ᠎ᠠ ᠰᠤᠶᠤᠯ ᠳᠠᠭᠠᠨ ᠬᠠᠶᠢᠷᠠᠳᠠᠢ᠂ ᠦᠨᠳᠦᠰᠦᠳᠡᠨ ᠳᠡᠭᠡᠨ ᠬᠠᠶᠢᠷᠠᠳᠠᠢ᠂ ᠠᠷᠠᠳ ᠲᠦᠮᠡᠨ ᠤ ᠪᠠᠨ ᠰᠡᠳᠬᠢᠯ ᠳᠤ ᠮᠦᠩᠭᠡᠷᠡᠨ ᠲᠤᠶᠠᠭᠠᠷᠠᠨ᠎ᠠ᠃
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号