ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠢᠨᠵᠠᠨᠨᠠᠰᠢ ᠶᠢᠨ ︽ᠬᠦᠬᠡ ᠰᠤᠳᠤᠷ︾ ᠬᠢᠬᠡᠳ ᠳᠡᠬᠦᠨ ᠤ ᠠᠬᠤᠶᠢᠴᠢ ᠠᠴᠢ ᠬᠤᠯᠪᠤᠭᠳᠠᠯ ᠤᠨ ᠰᠤᠨᠢᠷᠬᠠᠮᠵᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2009/12/4
                      ᠪᠦᠷᠳᠡ ᠬᠠᠳᠤᠨ ᠳᠤ ᠵᠠᠬᠢᠭᠰᠠᠨ ᠲᠠᠢ ᠰᠡᠴᠡᠨ ᠤ ᠰᠤᠷᠭᠠᠯ ᠢ ᠰᠢᠨᠵᠢᠬᠦ ᠨᠢ       【 ᠲᠦᠯᠬᠢᠬᠦᠷ ᠦᠬᠡ 】᠄ ᠢᠨᠵᠠᠨᠨᠠᠰᠢ ︽ᠬᠦᠬᠡ ᠰᠤᠳᠤᠷ︾ ᠠᠬᠤᠶᠢᠴᠢ ᠠᠴᠢ ᠬᠤᠯᠪᠤᠭᠳᠠᠯ       【 ᠠᠭᠤᠯᠭ᠎ᠠ ᠶᠢᠨ ᠳᠤᠪᠴᠢ 】᠄ ᠢᠨᠵᠠᠨᠨᠠᠰᠢ ᠶᠢᠨ ︽ᠬᠦᠬᠡ ᠰᠤᠳᠤᠷ︾᠎ ᠲᠤ ᠪᠢᠴᠢᠭᠳᠡᠭᠰᠡᠨ ᠬᠤᠩᠬᠢᠷᠠᠳ ᠤᠨ ᠲᠠᠢ ᠰᠡᠴᠡᠨ ᠦᠬᠢᠨ ᠪᠦᠷᠳᠡ ᠳᠡᠭᠡᠨ ᠵᠠᠬᠢᠭᠰᠠᠨ ᠵᠠᠬᠢᠶ᠎ᠠ ᠶᠢ ᠰᠢᠨᠵᠢᠬᠦ ᠪᠠᠷ ᠳᠠᠮᠵᠢᠨ ᠡᠷᠳᠡᠨ ᠤ ᠮᠤᠩᠭᠤᠯᠴᠤᠳ ᠪᠡᠷᠢᠶᠡᠳ ᠢᠶᠠᠨ ᠬᠡᠷᠬᠢᠨ ᠱᠠᠭᠠᠷᠳᠠᠵᠤ ᠪᠠᠶᠢᠭᠰᠠᠨ ᠳᠤᠬᠠᠢ ᠳᠦᠬᠦᠮ ᠦᠬᠦᠯᠡᠵᠤ᠂ ᠳᠡᠳᠡᠬᠡᠷ ᠱᠠᠭᠠᠷᠳᠠᠯᠭ᠎ᠠ ᠦᠨᠦ ᠦᠶ᠎ᠡ ᠳᠤ ᠶᠠᠮᠠᠷ ᠠᠬᠤᠶᠢᠴᠢ ᠠᠴᠢ ᠬᠤᠯᠪᠤᠭᠳᠠᠯ ᠲᠠᠢ ᠶᠢ ᠳᠤᠳᠤᠷᠬᠠᠶᠢᠯᠠᠬᠤ ᠪᠠᠷ ᠤᠷᠤᠯᠳᠤᠪᠠ᠃        ︽ᠶᠡᠭᠡ ᠶᠤᠸᠠᠨ ᠤᠯᠤᠰ ᠤᠨ ᠮᠠᠨᠳᠤᠭᠰᠠᠨ ᠳᠦᠷᠦ ᠶᠢᠨ ᠬᠦᠬᠡ ᠰᠤᠳᠤᠷ︾ ᠬᠡᠮᠡᠬᠦ ᠳᠡᠤᠬᠡᠨ ᠷᠤᠮᠠᠨ ᠪᠤᠯ ᠸᠠᠩᠴᠢᠨᠪᠠᠯᠠ ᠶᠢᠨ ᠢᠨᠵᠠᠨᠨᠠᠰᠢ ᠶᠢᠨ ᠳᠦᠯᠦᠬᠡᠯᠡᠬᠦ ᠪᠦᠳᠦᠬᠡᠯ ᠳᠡᠳᠦᠢ ᠪᠢᠰᠢ ᠴᠢᠩᠬᠢᠰ ᠦᠬᠡᠳᠠᠢ ᠨᠠᠷ ᠤᠨ ᠪᠠᠭᠠᠳᠤᠷᠯᠢᠭ ᠦᠢᠯᠡ ᠪᠠᠷ ᠰᠡᠳᠦᠪᠯᠡᠭᠰᠡᠨ ᠮᠠᠨ ᠤ ᠦᠨᠳᠦᠰᠦᠳᠡᠨ ᠤ ᠳᠤᠮᠤᠬᠠᠨ ᠳᠡᠤᠬᠡᠨ ᠷᠤᠮᠠᠨ ᠮᠦᠨ᠃ ᠤᠤᠯ ᠷᠤᠮᠠᠨ ᠨᠢ 1830 — — 1891 ᠤᠨ ᠤ ᠬᠤᠭᠤᠷᠠᠨᠳᠤ ᠪᠢᠴᠢᠭᠳᠡᠭᠰᠡᠨ ᠪᠠ ᠡᠬᠢᠨ ᠤ ᠨᠠᠢᠮᠠᠨ ᠪᠦᠯᠦᠭ ᠢ ᠡᠴᠢᠬᠡ ᠸᠠᠩᠴᠢᠩᠪᠠᠯᠠ ᠨᠢ ᠪᠢᠴᠢᠭᠰᠡᠨ ᠪᠠᠶᠢᠨ᠎ᠠ᠃ ᠤᠳᠤ ᠤᠯᠳᠠᠭᠠᠳ ᠪᠠᠶᠢᠬᠤ ᠠᠴᠠ ᠡᠨᠡ ᠨᠠᠢᠮᠠᠨ ᠪᠦᠯᠦᠭ ᠵᠢᠴᠢ ᠢᠨᠵᠠᠨᠨᠠᠰᠢ ᠶᠢᠨ ᠵᠠᠯᠭᠠᠨ ᠳᠤᠭᠤᠷᠪᠢᠭᠰᠠᠨ ᠵᠢᠷᠠᠨ ᠨᠢᠬᠡᠨ ᠪᠦᠯᠦᠭ ᠳᠡᠳᠦᠢ᠃ ᠤᠭ ᠷᠤᠮᠠᠨ ᠎ ᠨᠢ ᠵᠠᠭᠤ ᠬᠤᠷᠢᠨ ᠪᠦᠯᠦᠭ ᠪᠠᠶᠢᠬᠤ ᠤᠴᠢᠷ ᠲᠠᠢ ᠬᠡᠬᠦ ᠮᠡᠳᠡᠭᠡ ᠪᠠᠶᠢᠬᠤ ᠪᠠ ᠵᠤᠬᠢᠶᠠᠭᠴᠢ ᠢᠨᠵᠠᠨᠨᠠᠰᠢ ᠤᠭ ᠷᠤᠮᠠᠨ ᠎ ᠢᠶᠠᠨ ᠶᠤᠸᠠᠨ ᠬᠦᠷᠦᠨ ᠤ ᠰᠡᠬᠦᠯᠴᠢ ᠬᠦᠷᠳᠡᠯ᠎ᠡ ᠪᠢᠴᠢᠬᠦ ᠳᠦᠯᠦᠪᠯᠡᠭᠡ ᠲᠠᠢ ᠪᠠᠶᠢᠭᠰᠠᠨ ᠪᠤᠯᠪᠠᠴᠤ ᠪᠦᠷᠢᠨ ᠪᠢᠴᠢᠭᠰᠡᠨ ᠡᠰᠡᠬᠦ ᠨᠢ ᠳᠤᠳᠤᠷᠬᠠᠢ ᠦᠬᠡᠢ᠃ ① ᠴᠠᠭ ᠳᠦᠷᠦ ᠶᠢᠨ ᠦᠢᠮᠡᠬᠡᠨ ᠳᠡᠪᠵᠢᠶᠡᠨ᠂ ᠮᠤᠩᠬᠠᠭ ᠬᠠᠷᠠᠩᠭᠤᠢ ᠳᠤ ᠡᠳᠡᠬᠡᠷ ᠬᠤᠪᠤᠷ ᠨᠠᠨᠳᠢᠨ ᠪᠠᠷᠢᠮᠳᠠ ᠤᠷᠤ ᠦᠬᠡᠢ ᠰᠦᠢᠳᠬᠡᠭᠳᠡᠭᠰᠡᠨ ᠪᠠᠶᠢᠵᠤ ᠪᠤᠯᠬᠤ ᠶᠤᠮ᠃ ᠵᠤᠬᠢᠶᠠᠭᠴᠢ ᠶᠢᠨ ᠠᠮᠢᠳᠤᠷᠴᠤ ᠪᠦᠬᠦᠢ ᠴᠠᠭ ᠦᠶ᠎ᠡ ᠳᠤ ᠡᠬᠦᠰᠦᠭᠰᠡᠨ ᠤᠯᠠᠭᠠᠨ ᠠᠯᠴᠢᠭᠤᠷᠳᠠᠨ ᠪᠤᠶᠤ ᠶᠢᠨ ᠳ᠋ᠠᠨ ᠳ᠋ᠤᠤ ᠶᠢᠨ ᠰᠦᠷᠬᠡᠬᠦᠦ ᠱᠠᠰᠢᠨ ᠤ ᠰᠠᠮᠠᠭᠤᠷᠠᠯ ᠶᠢᠨ ᠦᠶ᠎ᠡ ᠳᠤ ᠪᠤᠰᠤᠭᠴᠢᠳ ᠸᠠᠩᠴᠢᠨᠪᠠᠯᠠ ᠨᠤᠶᠠᠨ ᠤ ᠨᠤᠮ ᠤᠨ ᠠᠰᠠᠷ ᠢ ᠭᠠᠯᠳᠠᠭᠰᠠᠨ ᠬᠡᠬᠦ ᠬᠠᠷᠠᠰᠠᠯᠳᠤ ᠮᠡᠳᠡᠭᠡ ᠪᠠᠶᠢᠳᠠᠭ᠃ ᠡᠳᠡᠬᠡᠷ ᠨᠢ ᠮᠤᠩᠭᠤᠯ ᠤᠷᠠᠨ ᠵᠤᠬᠢᠶᠠᠯ ᠳᠡᠳᠦᠢ ᠦᠬᠡᠢ ᠪᠦᠬᠦᠶᠢᠯᠡ ᠮᠤᠩᠭᠤᠯ ᠰᠤᠳᠤᠯᠤᠯ ᠤᠨ ᠴᠠᠷ ᠬᠦᠷᠢᠶ᠎ᠡ ᠳᠤ ᠨᠦᠬᠦᠪᠦᠷᠢᠯᠡᠵᠤ ᠪᠤᠯᠤᠰᠢ ᠦᠬᠡᠢ ᠬᠤᠬᠢᠷᠤᠯ ᠢ ᠤᠴᠠᠷᠠᠭᠤᠯᠤᠭᠰᠠᠨ ᠨᠢ ᠮᠡᠳᠡᠬᠡᠵᠢ᠃        ᠬᠠᠷᠢᠨ ᠳᠠᠶᠢᠵᠢ ᠢᠨᠵᠠᠨᠨᠠᠰᠢ ᠮᠤᠩᠭᠤᠯ ᠤᠨ ᠸᠠᠩ ᠬᠦᠩ ᠳᠡᠬᠡᠳᠦ ᠳᠠᠪᠬᠤᠷᠭᠠᠳᠠᠳ ᠦᠩᠬᠡ ᠮᠦᠩᠬᠦᠨ ᠳᠤ ᠠᠪᠳᠠᠵᠤ ᠬᠠᠷᠠᠴᠤ ᠠᠷᠠᠳ ᠮᠤᠩᠬᠠᠭ ᠪᠢᠰᠢᠷᠠᠯ ᠳᠤ ᠪᠠᠯᠠᠶᠢᠷᠠᠵᠤ᠂ ᠤᠭ ᠦᠨᠳᠦᠰᠦ ᠪᠠᠨ ᠮᠠᠷᠳᠠᠨ ︽ᠡᠶᠢᠮᠦ ᠬᠡᠯᠦ ᠳᠡᠶᠢᠮᠦ ᠬᠡᠯᠦ︾ ᠬᠡᠮᠡᠵᠤ ᠪᠠᠶᠢᠭᠰᠠᠨ ᠪᠠᠯᠠᠷ ᠬᠠᠷᠠᠩᠭᠤᠢ ᠤᠷᠤᠭᠤᠳᠠᠯ ᠳᠤᠷᠤᠶᠢᠳᠠᠯ ᠤᠨ ᠴᠠᠭ ᠦᠶ᠎ᠡ ᠳᠤ ᠡᠷᠳᠡᠨ ᠤ ᠮᠤᠩᠭᠤᠯ ᠤᠨ ᠢᠯᠭᠤᠭᠰᠠᠨ ᠳᠡᠤᠬᠡ ᠶᠢ ᠦᠨᠳᠦᠰᠦᠯᠡᠵᠤ ᠴᠢᠩᠬᠢᠰ ᠦᠬᠡᠳᠠᠢ ᠪᠠ ᠳᠡᠬᠦᠨ ᠎ ᠤ ᠪᠠᠭᠠᠳᠤᠷ ᠤᠳ ᠢᠶᠠᠷ ᠭᠤᠤᠯ ᠰᠡᠳᠦᠪᠯᠡᠬᠦᠨ ᠪᠤᠯᠭᠠᠨ ᠪᠢᠴᠢᠭᠰᠡᠨ ᠳᠡᠤᠬᠡᠨ ᠷᠤᠮᠠᠨ ︽ᠶᠡᠭᠡ ᠶᠤᠸᠠᠨ ᠤᠯᠤᠰ ᠤᠨ ᠮᠠᠨᠳᠤᠭᠰᠠᠨ ᠳᠦᠷᠦ ᠶᠢᠨ ᠬᠦᠬᠡ ᠰᠤᠳᠤᠷ︾ ︵ᠳᠤᠷᠤᠭᠰᠢ ﹇ᠬᠦᠬᠡ ᠰᠤᠳᠤᠷ﹈ ᠬᠡᠵᠤ ᠳᠤᠪᠴᠢᠯᠠᠨ᠎ᠠ︶᠎ ᠢ ᠮᠠᠰᠢ ᠬᠠᠳᠠᠭᠤᠵᠢᠯᠳᠠᠢ ᠳᠤᠭᠤᠷᠪᠢᠵᠤ ︵ᠤᠴᠢᠷ ᠶᠠᠭᠤ ᠬᠡᠪᠡᠯ ᠡᠨᠡ ᠷᠤᠮᠠᠨ ᠢ ᠵᠤᠬᠢᠶᠠᠭᠴᠢ ﹇ᠭᠤᠴᠢᠨ ᠨᠠᠰᠤᠨ ᠠᠴᠠ ᠡᠬᠢᠯᠡᠵᠤ ᠠᠮᠢᠳᠤᠷᠠᠯ ᠪᠠᠭᠤᠷᠠᠵᠤ ᠡᠮ᠎ᠡ ᠦᠷ᠎ᠡ ᠦᠬᠦᠵᠤ ᠠᠯᠢᠪᠠ ᠵᠦᠢᠯ ᠴᠦᠮ ᠦᠬᠡᠳᠡ ᠦᠬᠡᠢ ᠪᠤᠯᠤᠭᠰᠠᠨ ᠪᠠᠶᠢᠳᠠᠯ﹈ ② ᠳᠤᠤᠷ᠎ᠠ ᠪᠢᠴᠢᠭᠰᠡᠨ ᠪᠠᠶᠢᠨ᠎ᠠ︶ ᠦᠨᠳᠦᠰᠦᠳᠡᠨ ᠤ ᠴᠤᠭ ᠰᠦᠯᠳᠡ ᠶᠢ ᠳᠠᠭᠤᠳᠠᠨ ᠰᠡᠷᠢᠬᠡᠵᠤ ︽ᠪᠦᠬᠦᠳᠡᠬᠡᠷ ᠬᠡᠬᠡᠨ ᠳᠤᠩᠭᠠᠯᠠᠭ ᠪᠤᠯᠬᠤ︾᠎ ᠶᠢ ᠰᠠᠨᠠᠭᠠᠴᠢᠯᠠᠵᠤ ᠪᠠᠶᠢᠭᠰᠠᠨ ᠤ ᠤᠴᠢᠷ᠂ ᠡᠨᠡ ᠶᠡᠭᠡ ᠬᠦᠮᠦᠨ ᠤ ᠤᠷᠠᠨ ᠪᠦᠳᠦᠬᠡᠯ ᠠᠴᠠ ᠠᠬᠤᠶᠢᠴᠢ ᠦᠵᠡᠯ ᠤᠨ ᠵᠤᠷᠢᠭ ᠰᠠᠨᠠᠭ᠎ᠠ ᠳᠡᠷᠡ ᠦᠶ᠎ᠡ ᠳᠡᠳᠦᠢ ᠦᠬᠡᠢ ᠦᠨᠦᠳᠦᠷ ᠴᠤ ᠬᠡᠷᠡᠯ ᠢᠶᠠᠨ ᠰᠠᠴᠤᠷᠠᠭᠤᠯᠤᠭᠰᠠᠭᠠᠷ ᠪᠠᠶᠢᠬᠤ ᠶᠢ ᠦᠬᠡᠶᠢᠰᠬᠡᠵᠤ ᠦᠯᠦ ᠴᠢᠳᠠᠨᠠᠮ᠃        ᠨᠡᠶᠢᠬᠡᠮ ᠤᠨ ᠬᠠᠷᠬᠢᠰ ᠬᠠᠷᠠᠩᠭᠤᠢ ᠪᠠᠯᠠᠢ ᠮᠤᠩᠬᠠᠭ ᠢ ᠦᠵᠡᠨ ᠶᠠᠳᠠᠳᠠᠭ ᠵᠤᠬᠢᠶᠠᠭᠴᠢ ᠢᠨᠵᠠᠨᠨᠠᠰᠢ ᠹᠸᠤᠳᠠᠯ ᠤᠨ ᠤᠷᠤᠭ ᠤᠨ ᠶᠤᠰᠤᠨ ᠳᠤ ᠬᠦᠨ ᠬᠤᠷᠤᠰᠴᠤ ᠴᠢᠯᠦᠬᠡᠳᠦ ᠢᠨᠠᠭ ᠳᠤᠷᠠᠯᠠᠯ ᠢ ᠬᠦᠬᠡᠬᠡᠴᠡᠯᠳᠦᠵᠤ ᠡᠮᠡᠭᠳᠠᠶᠢᠴᠤᠳ ᠤᠨ ᠭᠤᠨᠢᠭᠳᠤ ᠤᠴᠠᠷᠠᠯ᠂ ᠭᠠᠰᠢᠭᠤᠨ ᠬᠤᠪᠢ ᠵᠠᠶᠠᠭ᠎ᠠ ᠳᠤ ᠰᠠᠨᠠᠭ᠎ᠠ ᠳᠠᠯᠪᠢᠵᠤ ᠪᠠᠶᠢᠭᠰᠠᠨ ᠢ ᠳᠡᠷᠡ ᠡᠷᠬᠢᠮ ᠬᠦᠮᠦᠨ ᠤ ︽ᠤᠯᠠᠭᠠᠨ᠎ᠠ ᠤᠬᠢᠯᠠᠬᠤ ᠳᠠᠩᠬᠢᠮ︾᠂ ︽ᠨᠢᠬᠡᠨ ᠳᠠᠪᠬᠤᠷ ᠠᠰᠠᠷ︾᠎ ᠠᠴᠠ ᠬᠠᠷᠠᠵᠤ ᠪᠤᠯᠤᠨ᠎ᠠ᠃ ᠨᠡᠩ ᠤᠨᠴᠠᠯᠠᠨ ᠳᠤᠷᠠᠳᠬᠤ ᠨᠢ ᠸ᠊᠂ ᠢᠨᠵᠠᠨᠠᠰᠢ ᠶᠢᠨ ︽ᠬᠦᠬᠡ ᠰᠤᠳᠤᠷ︾᠎ ᠲᠤ ᠦᠬᠡᠯᠦᠨ᠂ ᠪᠦᠷᠳᠡ ᠵᠢᠴᠢ ᠬᠤᠩᠭᠤᠷᠵᠤᠯᠠ᠂ ᠰᠤᠯᠤᠩᠭᠤᠸ᠎ᠠ ᠮᠡᠳᠦ ᠶᠢᠨ ᠦᠢ ᠤᠯᠠᠨ ᠡᠮᠡᠭᠳᠠᠶᠢᠴᠤᠳ ᠤᠨ ᠳᠦᠷᠢ ᠶᠢ ᠤᠷᠠᠯᠠᠨ ᠪᠦᠳᠦᠬᠡᠭᠰᠡᠨ ᠪᠠᠶᠢᠨ᠎ᠠ᠃ ᠳᠡᠬᠡᠬᠦ ᠳᠤ ᠵᠤᠬᠢᠶᠠᠭᠴᠢ ᠠᠴᠠ ᠡᠨᠡ ᠤᠯᠠᠨ ᠰᠠᠷᠠᠨ ᠭᠤᠸ᠎ᠠ ᠮᠤᠩᠭᠤᠯ ᠪᠦᠰᠡᠬᠦᠶᠢᠴᠤᠳ ᠢ ᠪᠤᠢ ᠪᠤᠯᠭᠠᠭᠰᠠᠨ ᠴᠢᠬᠤᠯᠠ ᠡᠯᠧᠮᠨ᠋ᠲ ᠶᠢ ᠴᠤ ︽ᠬᠦᠬᠡ ᠰᠤᠳᠤᠷ︾᠎ ᠳᠠᠭᠠᠨ ᠤᠷᠬᠢᠭᠳᠠᠭᠤᠯᠤᠭ᠎ᠠ ᠦᠬᠡᠢ ᠪᠢᠯᠡ᠃ ᠳᠡᠬᠦᠨ ᠤ ᠨᠢᠬᠡᠨ ᠵᠢᠱᠢᠶ᠎ᠡ ᠨᠢ ᠬᠠᠳᠤᠨ ᠪᠦᠷᠳᠡ ᠶᠢ ᠳᠠᠶᠢᠽᠤ ᠳᠡᠮᠦᠵᠢᠨ ᠳᠤ ᠪᠠᠭᠤᠯᠭᠠᠵᠤ ᠦᠭᠬᠦ ᠎ ᠳᠤ ᠡᠴᠢᠬᠡ ᠲᠠᠢ ᠰᠡᠴᠡᠨ ᠨᠢ ᠠᠮᠢᠨᠴᠢᠯᠠᠨ ᠵᠠᠬᠢᠭᠰᠠᠨ ᠶᠢᠰᠦᠨ ᠵᠠᠬᠢᠶ᠎ᠠ ᠶᠢ ᠨᠠᠷᠢᠯᠢᠭ ᠳᠡᠮᠳᠡᠭᠯᠡᠭᠰᠡᠨ ᠤᠴᠢᠷ ᠮᠦᠨ᠃        ᠨᠢᠬᠡ᠂ ᠲᠠᠢ ᠰᠡᠴᠡᠨ ᠤ ᠵᠠᠬᠢᠭᠰᠠᠨ ᠵᠠᠬᠢᠶ᠎ᠠ  ᠪᠠ ᠳᠡᠬᠦᠨ ᠤ ᠤᠴᠢᠷ ᠵᠦᠢ        ︽ᠬᠦᠬᠡ ᠰᠤᠳᠤᠷ︾᠎ ᠤᠨ ᠳᠡᠳ᠋ ᠪᠦᠯᠦᠭ᠂ ︽ᠳᠠᠪᠤᠨ ᠬᠤᠯᠠᠭᠠᠢ ᠰᠦᠷᠦᠭ ᠳᠤᠷ ᠬᠦᠯᠦᠭ ᠪᠤᠭᠤᠷᠵᠢ ᠪᠠᠭᠠᠳᠤᠷ ᠢ ᠢᠯᠢᠳᠬᠡᠪᠡᠢ        ᠤᠯᠠᠨ ᠮᠡᠷᠬᠡᠳ ᠤᠨ ᠬᠤᠷᠠᠯ ᠳᠤᠷ ᠤᠶᠤᠳᠤ ᠰᠡᠴᠡᠨ ᠠᠷᠠᠬᠢ ᠶᠢ ᠰᠢᠬᠦᠮᠵᠢᠯᠡᠪᠡᠢ︾ ᠬᠡᠬᠦ ᠪᠦᠯᠦᠭ ᠳᠤ ᠳᠠᠶᠢᠽᠤ ᠪᠤᠭᠳᠠ ᠴᠢᠩᠬᠢᠰ ᠬᠠᠭᠠᠨ ᠰᠦᠢ ᠳᠤᠭᠳᠠᠭᠰᠠᠨ ᠪᠦᠷᠳᠡ ᠶᠢ ᠬᠠᠳᠤᠨ ᠪᠤᠯᠭᠠᠨ ᠪᠠᠭᠤᠯᠭᠠᠨ ᠠᠪᠳᠠᠭ᠃ ᠪᠦᠷᠳᠡ ᠶᠢ ᠳᠦᠷᠦᠭᠰᠡᠨ ᠬᠡᠷ ᠠᠴᠠ ᠪᠠᠨ ᠬᠠᠷᠢ ᠳᠤ ᠤᠴᠢᠬᠤ ᠳᠤ ᠡᠴᠢᠬᠡ ᠲᠠᠢ ᠰᠡᠴᠡᠨ ᠨᠢ ᠶᠢᠰᠦᠨ ᠵᠠᠬᠢᠶ᠎ᠠ ᠶᠢ ᠠᠮᠢᠨᠴᠢᠯᠠᠨ ᠵᠠᠬᠢᠵᠠᠢ᠃ ᠳᠡᠬᠦᠨ ᠢ ᠰᠡᠶᠢᠷᠡᠬᠦᠯᠪᠠᠯ᠄        ︽ᠳᠡᠷᠢᠬᠦᠨ ᠲᠤᠷ᠂ ᠤᠶᠤᠵᠤ ᠳᠤᠪᠬᠢᠬᠤ ᠶᠢ ᠬᠢᠴᠢᠶᠡ        ᠬᠤᠶᠠᠳᠤᠭᠠᠷ ᠲᠤᠷ᠂ ᠢᠳᠡᠬᠡᠨ ᠤᠮᠳᠠᠭᠠᠨ ᠢ ᠴᠡᠪᠡᠷᠯᠡ        ᠭᠤᠳᠠᠭᠠᠷ ᠲᠤᠷ᠂ ᠪᠤᠳᠤᠬᠤ ᠤᠬᠠᠬᠤ ᠶᠢ ᠬᠢᠨᠠ        ᠳᠦᠳᠦᠬᠡᠷ ᠲᠤᠷ᠂ ᠵᠢᠷᠦᠬᠡ ᠪᠠᠭ᠎ᠠ ᠦᠬᠡ ᠴᠦᠬᠡᠬᠡᠨ ᠪᠤᠯ        ᠳᠠᠪᠤᠳᠤᠭᠠᠷ ᠲᠤᠷ᠂ ᠪᠡᠶ᠎ᠡ ᠪᠠᠨ ᠰᠠᠬᠢᠨ ᠵᠤᠷᠢᠭ ᠪᠠᠳᠤ ᠪᠤᠯ        ᠵᠢᠷᠭᠤᠳᠤᠭᠠᠷ ᠲᠤᠷ᠂ ᠳᠠᠭᠤᠯᠠᠵᠤ ᠬᠢᠩᠰᠢᠬᠦ ᠶᠢ ᠪᠤᠤ ᠰᠤᠷ        ᠳᠤᠯᠤᠳᠤᠭᠠᠷ ᠲᠤᠷ᠂ ᠬᠠᠷᠠᠮ ᠬᠠᠷᠬᠢᠰ ᠢ ᠳᠡᠪᠴᠢᠳᠦᠬᠡᠢ        ᠨᠠᠢᠮᠠᠳᠤᠭᠠᠷ ᠲᠤᠷ᠂ ᠬᠠᠳᠠᠮ ᠬᠠᠷᠢ ᠪᠠᠨ ᠬᠦᠨᠳᠦᠯᠡ        ᠶᠢᠰᠦᠳᠦᠬᠡᠷ ᠲᠤᠷ᠂ ᠠᠯᠵᠠᠭᠤ ᠵᠠᠯᠬᠠᠭᠤ ᠶᠢ ᠳᠡᠪᠴᠢᠳᠦᠬᠡᠢ︾ ③        ᠳᠡᠬᠡᠷᠡᠬᠢ ᠵᠠᠬᠢᠶ᠎ᠠ ᠬᠡᠳᠦᠢ ᠴᠢᠬᠤᠯᠠ ᠪᠤᠯᠬᠤ ᠶᠢ ᠲᠠᠢ ᠰᠠᠴᠡᠨ ︽ᠡᠨᠡ ᠶᠢᠰᠦᠨ ᠵᠦᠢᠯ ᠎ ᠠᠴᠠ ᠨᠢᠬᠡᠨ ᠢ ᠤᠰᠤᠯᠳᠠᠪᠠᠰᠤ ᠶᠢᠰᠦᠨ ᠤᠯᠤᠰ ᠤᠨ ᠬᠡᠯᠡ ᠶᠢ ᠰᠤᠷᠴᠤ ᠪᠢᠴᠢᠭ ᠢ ᠬᠢᠴᠢᠶᠡᠭᠰᠡᠨ ᠲᠠᠢ ᠰᠡᠴᠡᠨ ᠴᠤᠯᠠᠳᠤ ᠮᠢᠨᠤ ᠬᠡᠤᠬᠡᠨ ᠪᠤᠰᠤ ᠪᠤᠯᠤᠮᠤᠢ︾ ④ ᠬᠡᠵᠤ ᠮᠠᠰᠢ ᠬᠠᠳᠠᠭᠤ ᠴᠢᠩᠳᠠᠯᠠᠨ ᠰᠤᠷᠭᠠᠭᠰᠠᠨ ᠢ ᠵᠤᠬᠢᠶᠠᠭᠴᠢ ᠎ ᠠᠴᠠ ᠬᠡᠬᠡᠯ ᠦᠬᠡᠢ ᠳᠡᠮᠳᠡᠭᠯᠡᠭᠰᠡᠨ ᠢ ᠦᠵᠡᠪᠡᠰᠦ ᠵᠤᠬᠢᠶᠠᠭᠴᠢ ᠪᠦᠷᠳᠡ ᠦᠵᠡᠨ ᠤ ᠡᠵᠡᠨ ᠴᠢᠩᠬᠢᠰ ᠤᠨ ᠳᠤᠯᠭᠤᠷ ᠳᠦᠷᠦ ᠪᠠᠶᠢᠭᠤᠯᠠᠵᠤ ᠵᠠᠰᠠᠬᠤ ᠳᠤ ᠯᠤᠳᠤ ᠭᠠᠪᠢᠶ᠎ᠠ ᠦᠵᠡᠬᠦᠯᠦᠨ ᠰᠤᠤᠳᠤ ᠬᠠᠳᠤᠨ ᠪᠤᠯᠤᠭᠰᠠᠨ ᠰᠢᠯᠳᠠᠭᠠᠨ ᠢ ᠡᠨᠡᠬᠦ ᠰᠤᠷᠭᠠᠯ ᠲᠠᠢ ᠴᠢᠩᠭ᠎ᠠ ᠬᠤᠯᠪᠤᠭ᠎ᠠ ᠲᠠᠢ ᠬᠡᠵᠤ ᠦᠵᠡᠵᠤ ᠪᠠᠶᠢᠬᠤ ᠶᠢ ᠮᠡᠳᠡᠵᠤ ᠪᠤᠯᠤᠨ᠎ᠠ᠃        ᠳᠡᠬᠡᠷᠡᠬᠢ ᠰᠤᠷᠭᠠᠯ ᠢ ᠪᠢᠳᠡ ᠵᠤᠷᠪᠤᠰ ᠳᠠᠷᠠᠭᠠᠯᠠᠨ ᠵᠠᠳᠤᠯᠠᠵᠤ ᠦᠵᠡᠶ᠎ᠡ᠂ ᠳᠡᠬᠡᠬᠡᠳ ᠮᠤᠩᠭᠤᠯ ᠤᠨ ᠢᠯᠭᠤᠯᠤᠭᠰᠠᠨ ᠦᠶ᠎ᠡ ᠳᠤ ᠮᠤᠩᠭᠤᠯᠴᠤᠳ ᠦᠬᠢᠳ ᠢ ᠶᠠᠭᠠᠬᠢᠵᠤ ᠰᠤᠷᠭᠠᠵᠤ ᠪᠠᠶᠢᠭᠰᠠᠨ᠂ ᠪᠡᠷᠢ ᠪᠤᠯᠬᠤ ᠬᠦᠮᠦᠨ ᠢ ᠬᠡᠷᠬᠢᠨ ᠱᠠᠭᠠᠷᠳᠠᠵᠤ ᠪᠠᠶᠢᠭᠰᠠᠨ ᠢ ᠬᠠᠷᠠᠶ᠎ᠠ᠃        ᠨᠢᠬᠡᠳᠦᠬᠡᠷ ᠵᠤᠷᠪᠤᠰ ᠲᠤ᠂ ᠤᠶᠤᠵᠤ ᠳᠤᠪᠬᠢᠬᠤ ᠶᠢ ᠬᠢᠴᠢᠶᠡ ᠬᠡᠵᠡᠢ᠃ ᠶᠠᠭᠠᠬᠢᠭᠠᠳ ᠬᠠᠨ ᠤ ᠬᠠᠳᠤᠨ ᠪᠤᠯᠬᠤ ᠳᠤᠮᠤ ᠬᠦᠮᠦᠨ ᠢ ᠤᠶᠤᠵᠤ ᠳᠤᠪᠬᠢᠬᠤ ᠶᠢ ᠬᠢᠴᠢᠶᠡ ᠬᠡᠵᠤ ᠳᠡᠷᠡ ᠳᠤᠰᠤᠮ ᠢᠶᠠᠨ ᠳᠡᠷᠢᠬᠦᠨ ᠵᠤᠷᠪᠤᠰ ᠪᠤᠯᠭᠠᠨ ᠦᠬᠦᠯᠡᠭᠰᠡᠨ ᠪᠤᠢ ᠬᠡᠬᠦ ᠠᠰᠠᠭᠤᠳᠠᠯ ᠶᠠᠭᠤᠨ ᠳᠡᠷᠢᠬᠦᠨ ᠳᠤ ᠳᠠᠯᠪᠢᠭᠳᠠᠬᠤ ᠪᠤᠯᠤᠨ᠎ᠠ᠃ ᠴᠢᠩ ᠦᠨᠡᠨ ᠢ ᠬᠡᠯᠡᠬᠦ ᠳᠤ ᠬᠢᠶᠠᠨ ᠠᠶᠢᠮᠠᠭ ᠤᠨ ᠬᠠᠨ ᠤ ᠬᠠᠳᠤᠨ ᠦᠪᠡᠷ ᠲᠤ ᠪᠠᠨ ᠤᠶᠤᠬᠤ ᠴᠢᠬᠤᠯᠠ ᠦᠬᠡᠢ᠃ ᠬᠡᠳᠡᠯ᠎ᠡ ᠤᠶᠤᠵᠤ ᠳᠤᠪᠬᠢᠬᠤ ᠨᠢ ᠡᠮᠡᠭᠳᠠᠢ ᠬᠦᠮᠦᠨ ᠤ ᠡᠩ ᠤᠨ ᠤᠷ᠎ᠠ ᠬᠡᠵᠤ ᠦᠵᠡᠳᠡᠭ ᠮᠤᠩᠭᠤᠯᠴᠤᠳ ᠦᠬᠢᠨ ᠬᠦᠮᠦᠨ ᠢ ᠬᠠᠷᠠᠴᠤ᠂ ᠬᠠᠳᠤᠨ ᠬᠡᠵᠤ ᠢᠯᠭᠠᠯ ᠦᠬᠡᠢ ᠠᠯᠢ ᠨᠢ ᠴᠤ ᠪᠤᠯᠤᠭᠰᠠᠨ ᠪᠦᠷᠢᠳᠡᠬᠦᠯᠬᠦ ᠤᠴᠢᠷ ᠲᠠᠢ ᠬᠡᠮᠡᠨ ᠦᠵᠡᠳᠡᠭ ᠦᠵᠡᠯ ᠨᠦᠯᠦᠬᠡᠯᠡᠵᠤ ᠪᠠᠶᠢᠨ᠎ᠠ᠃ ᠳᠡᠶᠢᠮᠤ ᠴᠤ ᠤᠴᠢᠷ ᠠᠴᠠ ᠮᠤᠩᠭᠤᠯᠴᠤᠳ ᠬᠤᠨᠢᠨ ᠤ ᠳᠠᠩᠨᠠᠢ ᠶᠢ ︽ᠤᠷᠠᠨ ᠳᠠᠩᠨᠠᠢ︾ ᠬᠡᠵᠤ ᠨᠡᠷᠡᠯᠡᠬᠦ ᠪᠠ ᠳᠡᠬᠦᠨ ᠢ ᠦᠬᠢᠳ ᠲᠤ ᠦᠭᠴᠤ ︽ᠤᠷᠠᠨ ᠪᠤᠯᠤᠭᠠᠷᠠᠢ︕︾ ᠬᠡᠵᠤ ᠢᠷᠦᠬᠡᠳᠡᠭ ᠠᠵᠠᠢ᠃ ᠤᠶᠤᠵᠤ ᠳᠤᠪᠬᠢᠬᠤ ᠮᠡᠳᠦ ᠶᠢᠨ ᠵᠢᠵᠢᠭ ᠤᠴᠢᠷ ᠲᠤ ᠴᠤ ᠮᠠᠰᠢ ᠤᠯᠠᠨ ᠴᠡᠬᠡᠷ ᠶᠤᠰᠤᠨ ᠬᠤᠯᠪᠤᠭᠳᠠᠳᠠᠭ ᠤᠴᠢᠷ ᠠᠴᠠ ᠡᠮᠡᠭᠳᠠᠶᠢᠴᠤᠳ ᠡᠬᠦᠨ ᠢ ᠬᠢᠴᠢᠶᠡᠬᠦ ᠨᠢ ᠴᠢᠬᠤᠯᠠ᠃ ᠡᠰᠡ ᠳᠡᠬᠡᠪᠡᠰᠤ ︽ᠬᠡᠷ ᠤᠨ ᠰᠤᠷᠭᠠᠯ︾ ᠮᠠᠭᠤ ︽ᠰᠤᠷᠭᠠᠯ ᠰᠤᠷᠳᠠᠯ︾ ᠦᠬᠡᠢ ᠬᠡᠭᠳᠡᠵᠤ ᠬᠦᠮᠦᠨ ᠤ ᠬᠦᠨᠳᠦᠳᠬᠡᠯ ᠢ ᠤᠯᠳᠠᠭ ᠦᠬᠡᠢ᠃ ᠳᠡᠷᠡ ᠴᠡᠬᠡᠷ ᠢ ᠵᠢᠱᠢᠶᠡᠯᠡᠬᠦ ᠳᠤ᠄        ᠬᠤᠪᠴᠠᠰᠤ ᠤᠶᠤᠬᠤ ᠳᠤ ᠰᠦᠪᠯᠡᠭᠰᠡᠨ ᠤᠳᠠᠰᠤ ᠪᠠᠨ ᠳᠤᠳᠠᠭᠤ ᠦᠯᠡᠳᠡᠬᠡᠵᠤ ᠬᠤᠨᠤᠬᠤ ᠎ ᠶᠢ ᠴᠡᠬᠡᠷᠯᠡᠳᠡᠭ᠃ ᠰᠦᠪᠯᠡᠭᠰᠡᠨ ᠤᠳᠠᠰᠤ ᠪᠠᠨ ᠵᠠᠪᠠᠯ ᠤᠶᠤᠵᠤ ᠳᠠᠭᠤᠰᠬᠠᠳᠠᠭ᠃ ⑤ ᠨᠦᠬᠦᠬᠡ ᠳᠠᠯ᠎ᠠ ᠪᠠᠷ ᠡᠨᠡ ᠵᠤᠷᠪᠤᠰ ᠲᠤ ᠡᠴᠢᠬᠡ ᠲᠠᠢ ᠰᠡᠴᠡᠨ ᠠᠴᠠ ᠪᠦᠷᠳᠡ ᠶᠢ ᠡᠬᠡᠯ ᠳᠠᠷᠤᠤ ᠪᠠᠶᠢᠭᠳᠤᠨ ᠬᠡᠮᠡᠨ ᠳᠤᠬᠢᠭᠰᠠᠨ ᠬᠡᠵᠤ ᠦᠵᠡᠬᠦ ᠪᠤᠯᠤᠮᠵᠢ ᠪᠦᠷᠢᠨ ᠬᠠᠷᠠᠭᠳᠠᠵᠤ ᠪᠠᠶᠢᠨ᠎ᠠ᠃        ᠬᠤᠶᠠᠳᠤᠭᠠᠷ ᠲᠤ᠂ ᠢᠳᠡᠬᠡᠨ ᠤᠮᠳᠠᠭᠠᠨ ᠢ ᠴᠡᠪᠡᠷᠯᠡ ᠬᠡᠵᠤ ᠵᠠᠬᠢᠭᠰᠠᠨ᠃ ᠶᠡᠷᠦ ᠨᠢ ᠮᠤᠩᠭᠤᠯ ᠤᠨ ᠨᠡᠬᠦᠳᠡᠯᠴᠢᠳ ᠴᠡᠮᠴᠡᠬᠡᠷ ᠴᠡᠪᠡᠷ ᠢᠶᠠᠷ ᠢᠶᠠᠨ ᠳᠡᠤᠬᠡᠨ ᠠᠴᠠ ᠤᠯᠠᠮᠵᠢᠯᠠᠯ ᠲᠠᠢ᠃ ᠨᠡᠬᠦᠬᠡᠳ ᠶᠠᠪᠤᠬᠤ ᠎ ᠳᠠᠭᠠᠨ ᠪᠠᠭᠤᠴᠠ ᠪᠠᠨ ᠴᠡᠪᠡᠷᠯᠡᠳᠡᠭ ᠵᠠᠩᠰᠢᠯ ᠲᠠᠢ ᠡᠶᠢᠮᠦ ᠦᠨᠳᠦᠰᠦᠳᠡᠨ ᠴᠡᠪᠡᠷ ᠦᠬᠡᠢ ᠴᠤ ᠶᠠᠭᠠᠬᠢᠬᠤᠪ᠃ ᠬᠡᠷᠬᠡᠢ ᠬᠡᠵᠤ ᠡᠬᠡᠨᠡᠷ ᠢᠶᠠᠨ ᠬᠡᠯᠡᠳᠡᠭ ᠮᠤᠩᠭᠤᠯᠴᠤᠳ ᠡᠮᠡᠭᠳᠠᠢ ᠬᠦᠮᠦᠨ ᠢ ᠬᠡᠷ ᠤᠨ ᠬᠡᠷᠡᠯ ᠬᠡᠬᠡ ᠬᠡᠮᠡᠨ ᠦᠵᠡᠳᠡᠭ᠃ ᠳᠡᠶᠢᠮᠦ ᠴᠤ ᠤᠴᠢᠷ ᠠᠴᠠ ︽ᠬᠡᠷᠬᠡᠢ ᠰᠠᠶᠢᠳᠤ ᠶᠢᠨ ᠬᠡᠷ ᠴᠡᠮᠴᠡᠬᠡᠷ︾ ᠬᠡᠳᠡᠭ ᠦᠬᠡ ᠭᠠᠷᠤᠭᠰᠠᠨ᠃ ᠴᠢᠩᠬᠢᠰ ᠤᠨ ︽ᠶᠡᠭᠡ ᠵᠠᠰᠠᠭ ᠬᠠᠤᠯᠢ︾᠎ ᠳᠤ ᠴᠤ᠄ ︽ᠨᠦᠬᠦᠷ ᠨᠢ ᠳᠠᠶᠢᠨ ᠳᠤ ᠶᠤᠮ ᠤᠤ︖ ᠠᠩ ᠬᠦᠷᠦᠬᠡᠨ ᠳᠤ ᠶᠠᠪᠤᠭᠰᠠᠨ ᠪᠠᠶᠢᠬᠤ ᠎ ᠳᠤ ᠡᠬᠡᠨᠡᠷ ᠨᠢ ᠬᠡᠷ ᠤᠷᠤᠨ ᠢᠶᠠᠨ ᠴᠡᠪᠡᠷ ᠴᠡᠮᠴᠡᠬᠡᠷ ᠪᠠᠶᠢᠯᠭᠠᠬᠤ ᠶᠤᠰᠤᠳᠠᠢ︾ ⑥ ᠬᠡᠮᠡᠨ ᠬᠠᠤᠯᠢ ᠵᠦᠢ ᠶᠢᠨ ᠳᠠᠭᠠᠤ ᠵᠢᠭᠠᠭᠰᠠᠨ ᠪᠠᠶᠢᠳᠠᠭ᠃ ︽ᠶᠤᠰᠤ ᠶᠤᠮᠪᠤᠭᠤᠷ ᠳᠦᠷᠦ ᠳᠤᠮᠪᠤᠭᠤᠷ︾ ᠬᠡᠵᠤ ᠦᠵᠡᠳᠡᠭ ᠮᠤᠩᠭᠤᠯᠴᠤᠳ ᠢᠳᠡᠬᠡᠨ ᠤᠮᠳᠠᠭᠠᠨ ᠤ ᠬᠤᠪᠢ ᠳᠤ ᠴᠤ ᠮᠠᠰᠢ ᠬᠠᠳᠠᠭᠤ ᠶᠤᠰᠤ ᠶᠢ ᠵᠢᠷᠤᠮᠯᠠᠵᠤ ᠪᠠᠶᠢᠭᠰᠠᠨ ᠢ ︽ᠨᠠᠭᠠᠴᠤ ᠶᠢᠨ ᠳᠠᠯ᠎ᠠ ᠳᠤ ᠳᠠᠯᠤ ᠭᠠᠷᠭᠠᠳᠠᠭ ᠦᠬᠡᠢ︾ ᠵᠷᠬᠡ ᠴᠡᠬᠡᠷ ᠠᠴᠠ ᠤᠯᠵᠤ ᠬᠠᠷᠠᠨ᠎ᠠ᠃ ᠬᠡᠨ ᠳᠤ ᠶᠠᠮᠠᠷ ᠢᠳᠡᠭᠡ ᠭᠠᠷᠭᠠᠬᠤ ᠬᠡᠷᠡᠭᠳᠠᠢ ᠶᠢ ᠬᠠᠳᠤᠨ ᠬᠦᠮᠦᠨ ᠡᠵᠡᠨ ᠮᠡᠳᠡᠳᠡᠭ ᠤᠴᠢᠷ ︽ᠢᠳᠡᠬᠡᠨ ᠤᠮᠳᠠᠭᠠᠨ ᠢ ᠡᠰᠡ ᠴᠡᠪᠡᠷᠯᠡᠪᠡᠰᠦ︾ ᠳᠤᠮᠤ ᠠᠯᠳᠠᠰᠢ ᠭᠠᠷᠤᠨ᠎ᠠ ᠰᠢᠦ ᠳ᠋ᠧ᠃        ᠭᠤᠷᠪᠠᠳᠤᠭᠠᠷ ᠲᠤ᠂ ᠪᠤᠳᠤᠵᠤ ᠤᠬᠠᠬᠤ ᠶᠢ ᠬᠢᠨᠠ ᠬᠡᠮᠡᠨ ᠵᠠᠬᠢᠭᠰᠠᠨ᠃ ᠮᠤᠩᠭᠤᠯᠴᠤᠳ ᠡᠮᠡᠭᠳᠠᠶᠢᠴᠤᠳ ᠤᠨ ᠡᠷᠬᠡ ᠶᠢ ᠬᠠᠷᠢᠴᠠᠩᠭᠤᠢ ᠬᠦᠨᠳᠦᠯᠡᠵᠤ ᠪᠠᠶᠢᠭᠰᠠᠨ ᠨᠢ ᠡᠬᠡ ᠶᠢᠨ ᠡᠷᠬᠡᠳᠦ ᠨᠡᠶᠢᠬᠡᠮ ᠤᠨ ᠤᠯᠠ ᠮᠦᠷ ᠮᠤᠩᠭᠤᠯ ᠢ ᠶᠡᠭᠡ ᠤᠷᠤᠢ ᠪᠤᠯᠳᠠᠯ᠎ᠠ ᠨᠦᠯᠦᠬᠡᠯᠡᠵᠤ ᠪᠠᠶᠢᠭᠰᠠᠨ ᠤ ᠤᠴᠢᠷ ᠪᠢᠵᠡ᠃ ᠳᠡᠬᠡᠬᠡᠳ ᠴᠤ ︽ᠡᠷᠯᠢᠭ ᠎ ᠠᠴᠠ ᠠᠶᠤᠳᠠᠭ ᠦᠬᠡᠢ ᠡᠵᠡᠨ ᠴᠢᠩᠬᠢᠰ ᠡᠵᠢ ᠠᠴᠠ ᠪᠠᠨ ᠠᠶᠤᠬᠤ ᠶᠢᠨ ᠶᠡᠭᠡ ᠪᠠᠷ ᠠᠶᠤᠪᠠ︾ ᠬᠡᠳᠡᠭ ᠦᠬᠡ ᠭᠠᠷᠤᠭᠰᠠᠨ ᠪᠢᠵᠡ᠃ ᠡᠶᠢᠮᠦ ᠵᠠᠩᠰᠢᠯ ᠲᠠᠢ ᠮᠤᠩᠭᠤᠯᠴᠤᠳ ᠬᠠᠳᠤᠳ ᠢ ᠬᠦᠨᠳᠦᠯᠡᠵᠤ ︽ᠬᠦᠵᠦᠬᠦᠦ ᠬᠠᠮᠢᠭᠠᠰᠢ ᠪᠤᠯ ᠳᠤᠯᠤᠭᠠᠢ ᠳᠡᠶᠢᠰᠢ ᠪᠠᠨ︾ ᠬᠡᠵᠤ ᠦᠵᠡᠵᠤ ︽ᠬᠠᠳᠤᠨ ᠬᠦᠵᠦᠬᠦᠦ︾ ᠬᠡᠬᠦ ᠦᠬᠡ ᠶᠢ ᠡᠬᠦᠰᠬᠡᠭᠰᠡᠨ ᠪᠠᠶᠢᠬᠤ᠃ ᠶᠡᠷᠦ ᠨᠢ ᠬᠤᠷᠠᠯᠳᠠᠢ ᠳᠤ ᠬᠠᠳᠤᠳ ᠴᠤ ᠤᠷᠤᠯᠴᠠᠨ ᠦᠨᠡᠳᠦ ᠰᠠᠨᠠᠭᠤᠯᠭ᠎ᠠ ᠪᠠᠨ ᠦᠭᠴᠤ ᠪᠠᠶᠢᠭᠰᠠᠨ ᠢ ᠶᠢᠰᠦᠢ ᠬᠠᠳᠤᠨ ᠦᠬᠦᠬᠦ ᠶᠠᠯ᠎ᠠ ᠠᠴᠠ ᠰᠦᠷᠳᠡᠯ ᠦᠬᠡᠢ ᠡᠵᠡᠨ ᠴᠢᠩᠬᠢᠰ ᠲᠤ ᠮᠦᠩᠬᠡ ᠪᠤᠰᠤ ᠶᠢ ᠰᠠᠨᠠᠭᠤᠯᠵᠤ ᠪᠠᠶᠢᠭᠰᠠᠨ ᠎ ᠠᠴᠠ ᠮᠡᠳᠡᠵᠤ ᠪᠤᠯᠤᠨ᠎ᠠ᠃ ᠡᠶᠢᠮᠦ ᠠᠴᠠ ᠬᠠᠳᠤᠨ ᠪᠤᠯᠤᠭᠴᠢ ᠬᠦᠮᠦᠨ ᠴᠡᠴᠡᠨ ᠮᠡᠷᠬᠡᠨ ᠤᠬᠠᠭᠠᠨ ᠲᠠᠢ ᠪᠠᠶᠢᠵᠤ ᠪᠤᠳᠤᠵᠤ ᠬᠢᠨᠠᠬᠤ ᠶᠢ ᠬᠢᠴᠢᠶᠡᠬᠦ ᠬᠡᠷᠡᠭᠳᠠᠢ ᠬᠡᠵᠤ ᠮᠤᠩᠭᠤᠯ ᠤᠨ ᠨᠡᠬᠦᠳᠡᠯᠴᠢᠳ ᠦᠵᠡᠳᠡᠭ ᠠᠵᠠᠢ᠃        ᠳᠦᠷᠪᠡᠳᠦᠬᠡᠷ ᠲᠤ᠂ ᠵᠢᠷᠦᠬᠡ ᠪᠠᠭ᠎ᠠ ᠦᠬᠡ ᠴᠦᠬᠡᠬᠡᠨ ᠪᠤᠯ ᠬᠡᠵᠤ ᠵᠠᠬᠢᠭᠰᠠᠨ ᠪᠠᠶᠢᠨ᠎ᠠ᠃ ᠶᠡᠷᠦ ᠨᠢ ᠬᠤᠶᠠᠷ ᠠᠯᠠᠭ᠎ᠠ ᠬᠠᠪᠢᠷᠬᠤ ᠦᠬᠡᠢ ᠪᠤᠯ ᠳᠠᠭᠤᠨ ᠭᠠᠷᠳᠠᠭ ᠦᠬᠡᠢ ᠵᠢᠮ᠎ᠡ ᠲᠠᠢ᠃ ᠬᠡᠷ ᠪᠦᠯᠢ ᠶᠢᠨ ᠡᠪ ᠨᠠᠶᠢᠷ ᠲᠠᠢ ᠪᠠᠶᠢᠬᠤ ᠶᠢ ᠨᠦᠬᠦᠷ ᠬᠠᠳᠤᠨ ᠬᠤᠶᠠᠷ ᠤᠨ ᠠᠭᠤᠴᠢ ᠪᠠᠶᠢᠬᠤ ᠲᠠᠢ ᠨᠢᠭᠳᠠ ᠬᠤᠯᠪᠤᠭ᠎ᠠ ᠲᠠᠢ ᠠᠵᠠᠢ᠃ ᠳᠡᠬᠡᠬᠡᠳ ᠴᠤ ᠡᠮᠡᠭᠳᠠᠢ ᠬᠦᠮᠦᠨ ᠦᠬᠡ ᠤᠯᠠᠳᠠᠵᠤ ᠬᠤᠪ ᠶᠡᠬᠡᠳᠦᠪᠡᠯ ᠬᠦᠨᠳᠦ ᠪᠠᠨ ᠪᠠᠷᠠᠵᠤ ᠬᠡᠷᠡᠬᠦᠯ ᠤᠨ ᠦᠨᠳᠦᠰᠦ ᠪᠤᠯᠳᠠᠭ ᠬᠡᠬᠦ᠃ ᠶᠠᠭ ᠡᠶᠢᠮᠦ ᠠᠴᠠ ᠡᠷᠳᠡᠨ ᠤ ᠮᠤᠩᠭᠤᠯᠴᠤᠳ ᠡᠮᠡᠭᠳᠠᠶᠢᠴᠤᠳ ᠢ ᠦᠬᠡ ᠴᠦᠬᠡᠬᠡᠨ ᠠᠵᠢᠯ ᠶᠡᠬᠡᠳᠠᠢ ᠪᠠᠶᠢᠬᠤ ᠶᠢ ᠱᠠᠭᠠᠷᠳᠠᠵᠤ ᠪᠠᠶᠢᠵᠠᠢ᠃        ᠳᠠᠪᠤᠳᠤᠭᠠᠷ ᠲᠤᠷ᠂ ᠪᠡᠶ᠎ᠡ ᠪᠠᠨ ᠰᠠᠬᠢᠨ ᠵᠤᠷᠢᠭ ᠪᠠᠳᠤ ᠪᠤᠯ ᠬᠡᠵᠤ ᠰᠤᠷᠭᠠᠭᠰᠠᠨ᠃ ᠮᠤᠩᠭᠤᠯᠴᠤᠳ ᠬᠡᠤᠬᠡᠨ ᠬᠦᠮᠦᠨ ᠢ ᠵᠢᠷᠤᠭ ᠰᠢᠯᠦᠭ ᠲᠤ ᠳᠠᠰᠬᠠᠬᠤ ᠬᠡᠵᠤ ᠬᠦᠬᠡᠬᠡᠴᠡᠯᠳᠦᠳᠡᠭ ᠪᠢᠰᠢ᠂ ᠬᠡᠳᠡᠷᠬᠦ ᠪᠠᠨ ᠬᠠᠳᠠᠨ ᠵᠤᠷᠢᠭ ᠲᠠᠢ᠂ ᠠᠤᠭ᠎ᠠ ᠪᠤᠳᠤᠯᠭ᠎ᠠ ᠲᠠᠢ ᠪᠤᠯᠭᠠᠬᠤ ᠪᠠᠷ ᠱᠠᠭᠠᠷᠳᠠᠳᠠᠭ ᠠᠵᠠᠢ᠃ ᠳᠡᠶᠢᠮᠦ ᠴᠤ ᠤᠴᠢᠷ ᠠᠴᠠ ᠪᠦᠷᠳᠡ᠂ ᠮᠠᠨᠳᠤᠬᠠᠢ ᠮᠡᠳᠦ ᠳᠤᠮᠤ ᠨᠦᠯᠦᠬᠡ ᠪᠦᠬᠦᠢ ᠬᠠᠳᠤᠳ ᠠᠯᠢ ᠤᠯᠠᠨ ᠳᠤᠳᠤᠷᠠᠭᠰᠠᠨ ᠪᠠᠶᠢᠨ᠎ᠠ᠃        ᠵᠢᠷᠭᠤᠳᠤᠭᠠᠷ ᠲᠤᠷ᠂ ᠳᠠᠭᠤᠯᠠᠵᠤ ᠬᠢᠩᠰᠢᠬᠦ ᠶᠢ ᠪᠢᠳᠡᠬᠡᠢ ᠰᠤᠷ ᠬᠡᠵᠤ ᠵᠠᠬᠢᠵᠠᠢ᠃ ︽ᠳᠡᠯᠡᠬᠡᠢ ᠰᠢᠭ ᠪᠠᠶᠠᠨ ᠶᠠᠪᠤᠯ᠎ᠠ ᠴᠤ ᠳᠡᠷᠡᠨ ᠳᠡᠬᠡᠷ᠎ᠡ ᠪᠠᠨ ᠳᠠᠭᠤᠯᠠᠳᠠᠭ ᠦᠬᠡᠢ ᠮᠤᠩᠭᠤᠯ︾ ᠬᠡᠵᠤ ᠶᠠᠷᠢᠭᠰᠠᠨ ᠰᠢᠭ᠋ ᠮᠤᠩᠭᠤᠯ ᠪᠦᠰᠡᠬᠦᠶᠢᠴᠤᠳ ᠮᠤᠷᠢᠳᠠᠨ ᠵᠠᠯᠠᠭᠤᠰ ᠢᠶᠠᠨ ᠤᠶᠠᠷᠳᠠᠯ᠎ᠠ ᠳᠠᠭᠤᠯᠠᠳᠠᠭ ᠠᠪᠠᠴᠤ ᠬᠢᠳᠠᠳ ᠤᠨ ᠳᠠᠭᠤᠴᠢ ᠡᠮᠡᠰ ᠰᠢᠭ᠋ ᠬᠢᠩᠰᠢᠵᠤ ᠶᠠᠪᠤᠭ᠎ᠠ ᠦᠬᠡᠢ ᠶᠢ ᠳᠡᠤᠬᠡ ᠮᠠᠷᠳᠠᠭ᠎ᠠ ᠦᠬᠡᠢ᠃        ᠳᠤᠯᠤᠳᠤᠭᠠᠷ ᠵᠤᠷᠪᠤᠰ ᠵᠠᠬᠢᠶ᠎ᠠ ᠳᠤ ᠬᠠᠷᠠᠮ ᠬᠠᠷᠬᠢᠰ ᠢ ᠳᠡᠪᠴᠢᠳᠦᠬᠡᠢ ᠬᠡᠵᠤ ᠵᠠᠬᠢᠭᠰᠠᠨ᠃ ᠡᠨᠡ ᠰᠤᠷᠭᠠᠯ ᠳᠤ ᠪᠤᠤ ᠬᠠᠷᠠᠮᠴᠢ ᠪᠠᠢ ᠬᠡᠵᠤ ᠵᠠᠬᠢᠭ᠎ᠠ ᠦᠬᠡᠢ᠂ ᠬᠠᠷᠢᠨ ︽ᠬᠠᠷᠬᠢᠰ︾ ᠬᠡᠳᠡᠭ ᠦᠬᠡ ᠶᠢ ᠵᠠᠷᠤᠭᠰᠠᠨ ᠨᠢ ᠶᠤᠰᠤᠨ ᠳᠤᠳᠤᠷ᠎ᠠ ᠬᠠᠷᠠᠮᠨᠠᠵᠤ ᠪᠠᠢ᠂ ᠬᠠᠷᠢᠨ ᠬᠠᠷᠬᠢᠰ ᠬᠠᠷᠠᠮ ᠢ ᠳᠡᠪᠴᠢᠳᠦᠬᠡᠢ ᠬᠡᠮᠡᠬᠦ ᠰᠠᠨᠠᠭ᠎ᠠ ᠠᠭᠤᠯᠠᠵᠤ ᠪᠤᠢ᠃ ︽ᠶᠡᠭᠡ ᠵᠠᠰᠠᠭ︾᠎ ᠲᠤ ︽ᠡᠯᠴᠢ ᠴᠤ ᠪᠤᠯ᠂ ᠵᠤᠴᠢᠨ ᠴᠤ ᠪᠤᠯ ᠪᠦᠬᠦ ᠶᠠᠭᠤᠮ᠎ᠠ ᠴᠡᠭᠴᠡᠲᠠᠢ ᠪᠠᠶᠢᠬᠤ ᠤᠴᠢᠷ ᠲᠠᠢ᠂ ᠬᠠᠷᠢᠨ ﹇ᠡᠵᠡᠭᠳᠠᠢ﹈᠎ ᠨᠢ ᠵᠤᠴᠢᠨ ᠳᠤ ᠰᠠᠶᠢᠨ ᠬᠤᠭᠤᠯᠠ ᠪᠤᠶᠤ ᠬᠡᠷᠡᠭ ᠲᠠᠢ ᠵᠦᠢᠯ ᠢ ᠨᠢ ᠪᠡᠯᠡᠳᠬᠡᠵᠤ ᠦᠭᠬᠦ ᠬᠡᠷᠡᠭᠳᠠᠢ︾ ᠬᠡᠵᠤ ᠵᠢᠭᠠᠭᠰᠠᠨ ᠪᠠᠶᠢᠳᠠᠭ ⑦᠃        ᠨᠠᠢᠮᠠᠳᠤᠭᠠᠷ ᠲᠤᠷ᠂ ᠬᠠᠳᠠᠮ ᠬᠠᠷᠢ ᠪᠠᠨ ᠬᠦᠨᠳᠦᠯᠡ᠃ ᠡᠨᠡ ᠪᠤᠯ ᠪᠡᠷᠢ ᠪᠤᠯᠬᠤ ᠬᠦᠮᠦᠨ ᠎ ᠤ ᠦᠨᠳᠦᠰᠦᠨ ᠶᠤᠰᠤᠨ ᠱᠠᠭᠠᠷᠳᠠᠯᠭ᠎ᠠ ᠠᠵᠠᠢ᠃        ᠶᠢᠰᠦᠳᠦᠬᠡᠷ ᠲᠤᠷ᠂ ᠠᠯᠵᠠᠭᠤ ᠵᠠᠯᠬᠠᠭᠤ ᠶᠢ ᠳᠡᠪᠴᠢᠳᠦᠬᠡᠢ ᠬᠡᠵᠠᠢ᠃ ᠠᠶᠢᠯ ᠢᠶᠠᠨ ᠦᠬᠡᠳᠡᠯᠡᠬᠦᠯᠵᠤ ᠬᠡᠷ ᠢᠶᠠᠨ ᠴᠡᠮᠴᠡᠬᠡᠷ ᠠᠪᠴᠤ ᠶᠠᠪᠤᠬᠤ ᠨᠢ ᠠᠯᠢ ᠴᠤ ᠴᠠᠭ ᠲᠤ ᠬᠡᠷᠬᠡᠢ ᠶᠢᠨ ᠬᠢᠨᠢ ᠠᠵᠢᠯᠴᠢ ᠡᠰᠡᠬᠦ ᠎ ᠲᠠᠢ ᠮᠠᠰᠢ ᠨᠢᠭᠳᠠ ᠬᠤᠯᠪᠤᠭ᠎ᠠ ᠲᠠᠢ ᠠᠵᠠᠢ᠃        ᠳᠡᠬᠡᠷᠡᠬᠢ ᠶᠢᠰᠦᠨ ᠵᠤᠷᠪᠤᠰ ᠰᠤᠷᠭᠠᠯ ᠠᠴᠠ ᠦᠵᠡᠵᠤ ᠭᠠᠷᠬᠤ ᠨᠢ᠄        ⑴᠎ ᠳᠤ ᠪᠦᠷ ᠦᠨᠳᠦᠰᠦᠨ ᠶᠠᠭᠤᠮ᠎ᠠ ᠶᠢ ᠶᠠᠷᠢᠵᠠᠢ᠃ ᠤᠭ ᠰᠤᠷᠭᠠᠯ ᠳᠤ ᠳᠦᠷᠦ ᠳᠤ ᠤᠷᠤᠯᠴᠠᠬᠤ᠂ ᠬᠡᠷᠬᠢᠨ ᠬᠠᠨ ᠤ ᠬᠠᠳᠤᠨ ᠪᠤᠯᠬᠤ ᠳᠤᠬᠠᠢ ᠵᠢᠭᠠᠭᠰᠠᠨ ᠦᠬᠡᠢ ᠬᠠᠷᠢᠨ ᠪᠦᠰᠡᠬᠦᠢ ᠬᠦᠮᠦᠨ᠂ ᠬᠡᠷ ᠤᠨ ᠡᠵᠡᠭᠳᠠᠢ ᠬᠦᠮᠦᠨ ᠶᠠᠮᠠᠷ ᠪᠠᠶᠢᠬᠤ ᠶᠢ ᠵᠢᠷ ᠤᠨ ᠬᠦᠮᠦᠨ ᠤ ᠡᠬᠡᠯ ᠠᠮᠢᠳᠤᠷᠠᠯ ᠳᠤᠮᠳᠠᠬᠢ ᠤᠴᠢᠷ ᠤᠳ ᠢ ᠵᠠᠬᠢᠵᠠᠢ᠃        ⑵᠎ ᠳᠤ ᠬᠡᠤᠬᠡᠨ ᠢᠶᠠᠨ ︽ᠡᠷ᠎ᠡ ᠶᠢᠨ ᠪᠤᠭᠤᠯ ᠬᠡᠷ ᠤᠨ ᠵᠠᠷᠤᠴᠠ︾ ᠪᠤᠯᠭᠠᠬᠤ ᠬᠡᠰᠡᠨ ᠪᠢᠰᠢ᠂ ᠬᠠᠷᠢᠨ ᠤᠬᠠᠭᠠᠨ ᠲᠠᠢ᠂ ᠴᠡᠴᠡᠨ᠂ ᠬᠠᠶᠢᠷ᠎ᠠ ᠬᠦᠨᠳᠦᠳᠬᠡᠯ ᠲᠠᠢ ᠠᠤᠭ᠎ᠠ ᠪᠤᠳᠤᠯᠭ᠎ᠠ ᠲᠠᠢ ᠪᠤᠯᠭᠠᠬᠤ ᠬᠡᠵᠤ ᠱᠠᠭᠠᠷᠳᠠᠵᠤ ᠪᠠᠶᠢᠭᠰᠠᠨ ᠪᠠᠶᠢᠨ᠎ᠠ᠃        ⑶᠎ ᠳᠤ ᠳᠤᠮᠤ ᠬᠠᠳᠤᠨ ᠬᠡᠷᠬᠢᠨ ᠰᠠᠭᠤᠬᠤ ᠶᠢ ᠵᠢᠭᠠᠭᠰᠠᠨ ᠪᠢᠰᠢ ᠬᠠᠷᠢᠨ ᠡᠬᠡᠯ ᠬᠦᠮᠦᠨ ᠎ ᠤ ᠬᠡᠷᠬᠡᠢ ᠰᠢᠭ ᠬᠡᠷ ᠤᠷᠤᠨ ᠢᠶᠠᠨ ᠬᠡᠷᠡᠯᠳᠡᠬᠦᠯᠦᠨ ᠡᠷ᠎ᠡ ᠨᠦᠬᠦᠷ ᠲᠤ ᠪᠠᠨ ᠳᠤᠰᠯᠠᠯᠴᠠᠵᠤ ᠶᠠᠪᠤᠬᠤ ᠶᠢ ᠱᠠᠭᠠᠷᠳᠠᠵᠠᠢ ᠃ ᠴᠢᠩᠬᠢᠰ ᠤᠨ ᠰᠤᠷᠭᠠᠯ ᠳᠤ ︽ᠪᠡᠶ᠎ᠡ ᠪᠠᠨ ᠵᠠᠰᠠᠵᠤ ᠴᠢᠳᠠᠪᠠᠰᠤ ᠬᠡᠷ ᠢᠶᠠᠨ ᠵᠠᠰᠠᠵᠤ ᠴᠢᠳᠠᠮᠤᠢ᠂ ᠬᠡᠷ ᠢᠶᠠᠨ ᠵᠠᠰᠠᠵᠤ ᠴᠢᠳᠠᠪᠠᠰᠤ᠂ ᠳᠦᠷᠦ ᠶᠢ ᠵᠠᠰᠠᠵᠤ ᠴᠢᠳᠠᠮᠤᠢ︾ ᠬᠡᠮᠡᠭᠰᠡᠨ ᠪᠠᠶᠢᠳᠠᠭ ᠢ ᠪᠤᠳᠤᠯᠳᠠᠢ᠃        ⑷᠎ ᠳᠤ ᠡᠨᠡ ᠰᠤᠷᠭᠠᠯ ᠢ ᠡᠩ ᠤᠨ ᠮᠠᠶ᠋ᠢᠭ ᠢᠶᠠᠷ ᠵᠠᠬᠢᠭᠰᠨ᠎ᠠ ᠪᠢᠰᠢ᠂ ᠬᠠᠷᠢᠨ ᠡᠴᠢᠬᠡ ᠬᠡᠤᠬᠡᠨ ᠤ ᠬᠠᠷᠢᠴᠠᠭ᠎ᠠ ᠳᠠᠰᠤᠯᠬᠤ ᠡᠰᠡᠬᠦ ᠲᠠᠢ ᠬᠤᠯᠪᠤᠭᠳᠠᠭᠤᠯᠤᠨ ᠴᠢᠩᠳᠠᠯᠠᠨ ᠵᠠᠬᠢᠵᠠᠢ᠃        ᠬᠤᠶᠠᠷ᠂ ᠲᠠᠢ ᠰᠡᠴᠡᠨ ᠤ ᠰᠤᠷᠭᠠᠯ ᠬᠢᠬᠡᠳ ᠳᠡᠬᠦᠨ ᠤ ᠤᠳᠤᠬᠢ ᠨᠡᠶᠢᠬᠡᠮ ᠳᠠᠬᠢ ᠠᠬᠤᠶᠢᠴᠢ ᠠᠴᠢ ᠬᠤᠯᠪᠤᠭᠳᠠᠯ        ᠨᠡᠶᠢᠬᠡᠮ ᠬᠦᠭᠵᠢᠵᠤ᠂ ᠲᠠᠢ ᠰᠡᠴᠡᠨ ᠤ ᠰᠡᠴᠡᠯᠡᠭᠰᠡᠨ ᠰᠤᠷᠭᠠᠯ ᠳᠡᠷᠳᠡᠭᠡ ᠵᠠᠭᠤᠨ ᠤ ᠠᠯᠤᠰ ᠲᠠᠬᠢ ᠤᠴᠢᠷ ᠪᠤᠯᠴᠢᠬᠠᠭᠰᠠᠨ ᠪᠠᠶᠢᠬᠤ ᠳᠤ ᠠᠵᠠ ᠪᠠᠷ ᠪᠢᠳᠡ ᠳᠡᠷᠡᠬᠦ ᠠᠯᠳᠠᠨ ᠰᠤᠷᠭᠠᠯ ᠢ ᠢᠨᠵᠠᠨᠠᠰᠢ ᠶᠢᠨ ︽ᠬᠦᠬᠡ ᠰᠤᠳᠤᠷ︾ ᠨᠤᠮ ᠠᠴᠠ ᠬᠠᠷᠠᠵᠤ ᠪᠠᠶᠢᠨ᠎ᠠ᠃ ᠬᠡᠬᠦ ᠳᠤ ᠤᠯᠠᠨ ᠬᠦᠮᠦᠨ ᠡᠨᠡᠬᠦ ᠰᠤᠷᠭᠠᠯ ᠢ ᠴᠠᠭ ᠦᠶ᠎ᠡ ᠎ ᠠᠴᠠ ᠬᠤᠴᠤᠷᠠᠭᠰᠠᠨ ᠬᠡᠵᠤ ᠦᠵᠡᠵᠤ ᠪᠤᠢ᠃ ᠳᠡᠬᠡᠪᠡᠯ ᠨᠠᠢᠮᠠᠨ ᠵᠠᠭᠤᠨ ᠤ ᠳᠡᠷᠳᠡᠬᠡᠬᠢ ᠴᠡᠴᠡᠨ ᠳᠡᠬᠡᠳᠦᠰ ᠤᠨ ᠮᠢᠨᠢ ᠰᠤᠷᠭᠠᠯ ᠨᠡᠬᠡᠷᠡᠨ ᠴᠠᠭ ᠦᠶ᠎ᠡ ᠠᠴᠠ ᠬᠤᠴᠤᠷᠠᠭᠰᠠᠨ ᠤᠤ︖ ᠬᠡᠪᠡᠯ ᠮᠢᠨᠤ ᠦᠵᠡᠬᠦ ᠪᠠᠷ ᠴᠠᠭ ᠦᠶ᠎ᠡ ᠠᠴᠠ ᠬᠤᠴᠤᠷᠠᠭᠰᠨ᠎ᠠ ᠪᠢᠰᠢ ᠬᠠᠷᠢᠨ ᠴᠤ ᠦᠨᠦ ᠶᠢᠨ ᠦᠶ᠎ᠡ ᠳᠤ ᠳᠤᠩ ᠴᠢᠬᠤᠯᠠ ᠱᠠᠭᠠᠷᠳᠠᠵᠤ ᠪᠠᠶᠢᠨ᠎ᠠ᠃ ᠠᠪᠤᠨ ᠦᠵᠡᠬᠦ ᠳᠤ ᠲᠠᠢ ᠰᠡᠴᠡᠨ ᠤ ᠡᠳᠡᠬᠡᠷ ᠰᠤᠷᠭᠠᠯ ᠨᠢ ᠡᠮᠡᠭᠳᠠᠶᠢᠴᠤᠳ ᠤᠨ ᠡᠷᠬᠡ ᠴᠢᠯᠦᠬᠡ ᠶᠢ ᠮᠠᠰᠢᠳᠠ ᠬᠢᠵᠠᠭᠠᠷᠯᠠᠵᠤ ᠪᠠᠶᠢᠬᠤ ᠮᠡᠳᠦ ᠪᠤᠯᠪᠠᠴᠤ ᠦᠨᠡᠨ ᠳᠡᠭᠡᠨ ᠳᠡᠶᠢᠮᠦ ᠪᠢᠰᠢ᠃        ᠦᠨᠦᠳᠦᠷ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠬᠦᠷᠢᠶᠡᠨ ᠳᠠᠬᠢ ᠡᠮᠡᠭᠳᠠᠢ ᠤᠶᠤᠳᠠᠳ ᠦᠢᠯᠡ ᠤᠳᠠᠰᠤᠨ ᠤ ᠠᠵᠢᠯ ᠢ ᠴᠢᠳᠠᠬᠤ ᠨᠢ ᠬᠡᠳᠦ ᠯᠠ ᠪᠠᠶᠢᠬᠤ ᠠᠵᠠᠢ᠃ ᠬᠠᠷᠢᠨ ᠴᠤ ᠪᠤᠳᠤᠯᠭ᠎ᠠ ᠪᠠᠭᠠᠳᠠᠢ᠂ ᠵᠢᠷᠦᠬᠡ ᠶᠡᠭᠡ ᠲᠠᠢ᠂ ᠬᠡᠷᠡᠬᠦᠯᠴᠢ᠂ ᠰᠤᠯᠠ ᠵᠠᠳᠠᠭᠠᠢ᠂ ᠬᠦᠮᠦᠨ ᠮᠦᠰᠦ ᠮᠠᠭᠤ ᠁ ᠵᠡᠷᠬᠡ ᠨᠠᠵᠠᠭᠠᠢ ᠵᠦᠢᠯ ᠤᠳ ᠶᠡᠬᠡᠬᠡᠨ ᠭᠠᠵᠠᠷ ᠠᠪᠴᠤ ᠪᠠᠶᠢᠨ᠎ᠠ᠃ ᠦᠨᠦᠳᠦᠷ ᠳᠡᠯᠡᠬᠡᠢ ᠳᠠᠶᠠᠭᠠᠷ ᠬᠦᠮᠦᠨ ᠤ ᠡᠷᠬᠡ ᠶᠢ ᠬᠦᠨᠳᠦᠳᠬᠡᠵᠤ ᠠᠪᠠᠴᠤ ᠡᠮᠡᠭᠳᠠᠶᠢᠴᠤᠳ ᠠᠷᠠᠬᠢ ᠳᠠᠮᠠᠬᠢ ᠤᠤᠭᠤᠬᠤ᠂ ᠳᠠᠮᠠᠬᠢ ᠳᠠᠳᠠᠬᠤ᠂ ᠪᠦᠵᠢᠭ ᠦᠰᠦᠷᠬᠡᠨ ᠳᠤ ᠳᠠᠩᠳᠠ ᠬᠦᠶᠦᠬᠦ ᠨᠢ ᠪᠡᠶ᠎ᠡ ᠰᠡᠳᠬᠢᠯ ᠤᠨ ᠠᠯᠢ ᠠᠯᠢ ᠨᠢ ᠳᠤ ᠴᠤ ᠠᠰᠢᠭ ᠦᠬᠡᠢ ᠠᠵᠠᠢ᠃ ᠬᠡᠤᠬᠡᠳ ᠤᠨ ᠬᠦᠮᠦᠵᠢᠯ ᠳᠤ ᠡᠬᠡ ᠬᠦᠮᠦᠨ ᠮᠠᠰᠢ ᠴᠢᠬᠤᠯᠠ ᠨᠦᠯᠦᠬᠡ ᠦᠵᠡᠬᠦᠯᠳᠡᠭ ᠢ ︽ᠡᠬᠡ ᠨᠢ ᠬᠡᠬᠡᠷ ᠠᠯᠠᠭ ᠪᠤᠯ ᠤᠨᠠᠭ᠎ᠠ ᠨᠢ ᠰᠢᠬᠢᠷ᠎ᠠ ᠠᠯᠠᠭ︾ ᠬᠡᠬᠦ ᠠᠷᠠᠳ ᠤᠨ ᠮᠠᠨᠢ ᠴᠡᠴᠡᠨ ᠦᠬᠡ ᠪᠦᠷᠢᠨ ᠬᠠᠷᠠᠭᠤᠯᠵᠤ ᠪᠠᠶᠢᠨ᠎ᠠ᠃ ᠰᠡᠬᠦᠯ ᠤᠨ ᠦᠶ᠎ᠡ ᠳᠤ ᠪᠡᠷᠢ ᠨᠢ ᠬᠠᠳᠠᠮ ᠢᠶᠠᠨ ᠬᠡᠷ ᠠᠴᠠ ᠪᠠᠨ ᠦᠯᠡᠳᠡᠵᠤ ᠭᠠᠷᠭᠠᠭᠰᠠᠨ᠂ ᠪᠦᠰᠡᠬᠦᠢ ᠨᠢ ᠵᠠᠪᠬᠠᠶᠢᠷᠠᠵᠤ ᠠᠶᠢᠯ ᠨᠢ ᠰᠠᠷᠨᠢᠭᠰᠠᠨ ᠮᠡᠳᠡᠭᠡ ᠬᠤᠳᠠ ᠬᠦᠳᠡᠭᠡ ᠦᠬᠡᠢ ᠭᠠᠵᠠᠷ ᠠᠪᠴᠤ ᠪᠤᠢ ᠨᠢ ᠤᠯᠠᠮᠵᠢᠯᠠᠯᠳᠤ ᠶᠤᠰᠤ ᠵᠠᠩᠰᠢᠯ ᠮᠠᠨᠢ ᠠᠯᠳᠠᠭᠳᠠᠵᠤ ᠪᠠᠶᠢᠬᠤ ᠶᠢᠨ ᠦᠷ᠎ᠡ ᠨᠦᠯᠦᠬᠡ ᠴᠤ ᠪᠢᠯᠢᠦ︖ ᠦᠨᠳᠦᠰᠦᠳᠡᠨ ᠤ ᠰᠡᠷᠬᠦᠨ ᠮᠠᠨᠳᠤᠯ ᠳᠤ ᠬᠤᠶᠢᠴᠢ ᠦᠶ᠎ᠡ ᠶᠢᠨ ᠪᠡᠶ᠎ᠡ ᠰᠡᠳᠬᠢᠯ ᠤᠨ ᠬᠡᠪ ᠴᠢᠨᠠᠷ ᠴᠢᠬᠤᠯᠠ ᠦᠢᠯᠡᠳᠦᠯ ᠦᠵᠡᠬᠦᠯᠳᠡᠭ ᠢ ᠦᠬᠡᠷ᠎ᠡ ᠦᠨᠳᠦᠰᠦᠳᠡᠨ ᠨᠦᠭᠦᠳ ᠤᠨ ᠮᠠᠨᠳᠤᠨ ᠪᠠᠭᠤᠷᠠᠭᠰᠠᠨ ᠳᠡᠤᠬᠡ ᠶᠠᠷᠢᠵᠤ ᠪᠠᠶᠢᠨ᠎ᠠ᠃ ᠳᠡᠶᠢᠮᠦ ᠠᠴᠠ ᠰᠠᠶᠢᠨ ᠰᠠᠶᠢᠬᠠᠨ ᠬᠡᠷ ᠪᠦᠯᠢ ᠢ ᠰᠤᠳᠤᠨ ᠡᠬᠡᠴᠤᠤᠯ ᠯᠠ ᠳᠦᠰᠢᠵᠤ ᠳᠡᠨᠳᠡ ᠎ ᠠᠴᠠ ᠬᠦᠬᠡ ᠮᠤᠩᠭᠤᠯ ᠤᠨ ᠢᠷᠡᠬᠡᠳᠦᠢ ᠳᠤᠷᠭᠠᠨ ᠳᠤ ᠪᠤᠭᠤᠯᠳᠠ ᠲᠠᠢ ᠦᠰᠦᠨ᠎ᠡ ᠪᠢᠵᠡ᠃        ᠡᠷᠦᠬᠡ ᠬᠡᠷ ᠤᠨ ᠬᠤᠶᠠᠷ ᠳᠤᠯᠭᠠᠭᠤᠷᠢ ᠶᠢᠨ ᠨᠢᠬᠡ᠂ ᠳᠦᠷᠦ ᠶᠢᠨ ᠮᠢᠨᠢ ᠬᠠᠭᠠᠰ ᠳᠡᠭᠷᠢ ᠪᠤᠯᠤᠭᠰᠠᠨ ᠬᠠᠳᠤᠨ ᠵᠠᠶᠠᠭ᠎ᠠ ᠦᠷᠦᠰᠢᠶᠡᠵᠤ ᠮᠤᠩᠭᠤᠯ ᠤᠨ ᠮᠠᠨᠢ ᠮᠢᠩᠭᠠᠨ ᠮᠢᠩᠭᠠᠨ ᠦᠬᠢᠳ ᠢ ᠲᠠᠢ ᠰᠡᠴᠡᠨ ᠤ ᠰᠤᠷᠭᠠᠯ ᠳᠤ ᠬᠦᠮᠦᠵᠢᠭᠰᠡᠨ ᠪᠦᠷᠳᠡ ᠰᠢᠭ ᠪᠤᠯᠭᠠᠵᠤ ᠮᠤᠩᠭᠤᠯ ᠡᠷᠡᠰ ᠤᠨ ᠵᠠᠶᠠᠭ᠎ᠠ ᠶᠢ ᠳᠦᠰᠢᠬᠦ ᠳᠤᠯᠠᠭᠠᠨ ᠦᠷᠬᠦᠬᠡᠨ ᠤ ᠪᠠᠨ ᠬᠡᠷᠡᠯ ᠬᠡᠬᠡ ᠢᠪᠡᠬᠡᠭᠴᠢ ᠪᠤᠯᠭᠠᠵᠤ ᠬᠠᠶᠢᠷᠠᠯᠠ︕        【 ᠵᠡᠬᠦᠯᠳᠡ 】         ① ᠸ᠊᠂ ᠢᠨᠵᠠᠨᠨᠠᠰᠢ ᠶᠢᠨ ︽ᠶᠡᠭᠡ ᠶᠤᠸᠠᠨ ᠤᠯᠤᠰ ᠤᠨ ᠮᠠᠨᠳᠤᠭᠰᠠᠨ ᠳᠦᠷᠦ ᠶᠢᠨ ᠬᠦᠬᠡ ᠰᠤᠳᠤᠷ︾ ᠦᠪᠦᠷ ᠮᠤᠩᠭᠤᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠᠨ ᠤ 1981 ᠤᠨ ᠤ ᠬᠡᠪ ᠤᠨ 2 ᠳ᠋ᠤᠭᠠᠷ ᠳᠠᠯ᠎ᠠ         ② ᠸ᠊᠂ ᠢᠨᠵᠠᠨᠨᠠᠰᠢ ᠶᠢᠨ ︽ᠤᠭ ᠢᠵᠠᠭᠤᠷ ᠢᠶᠠᠨ ᠮᠠᠷᠳᠠᠵᠤ ᠪᠤᠯᠬᠤ ᠦᠬᠡᠢ︾ ᠵᠤᠬᠢᠶᠠᠯ ᠤᠨ ᠦᠬᠡ         ③ ᠸ᠊᠂ ᠢᠨᠵᠠᠨᠨᠠᠰᠢ ᠶᠢᠨ ︽ᠶᠡᠭᠡ ᠶᠤᠸᠠᠨ ᠤᠯᠤᠰ ᠤᠨ ᠮᠠᠨᠳᠤᠭᠰᠠᠨ ᠳᠦᠷᠦ ᠶᠢᠨ ᠬᠦᠬᠡ ᠰᠤᠳᠤᠷ︾ ᠦᠪᠦᠷ ᠮᠤᠩᠭᠤᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠᠨ ᠤ 1981 ᠤᠨ ᠤ ᠬᠡᠪ         ᠳᠤᠪᠴᠢᠳᠤ ᠳᠤᠯᠳᠤ         ④ ᠸ᠊᠂ ᠢᠨᠵᠠᠨᠨᠠᠰᠢ ᠶᠢᠨ ︽ᠶᠡᠭᠡ ᠶᠤᠸᠠᠨ ᠤᠯᠤᠰ ᠤᠨ ᠮᠠᠨᠳᠤᠭᠰᠠᠨ ᠳᠦᠷᠦ ᠶᠢᠨ ᠬᠦᠬᠡ ᠰᠤᠳᠤᠷ︾ ᠦᠪᠦᠷ ᠮᠤᠩᠭᠤᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠᠨ ᠤ 1981 ᠤᠨ ᠤ ᠬᠡᠪ ᠤᠨ 137 ᠳᠠᠯ᠎ᠠ ᠳᠤ         ⑤ ᠰᠤᠳᠨᠠᠮ ᠨᠠᠷ ᠤᠨ ᠨᠠᠶᠢᠷᠠᠭᠤᠯᠤᠭᠰᠠᠨ ︽ᠮᠤᠩᠭᠤᠯ ᠴᠡᠬᠡᠷ ᠤᠨ ᠴᠢᠭᠤᠯᠭᠠᠨ︾ ᠦᠪᠦᠷ ᠮᠤᠩᠭᠤᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠᠨ ᠤ 2006 ᠤᠨ ᠤ ᠬᠡᠪ ᠤᠨ 171 ᠳ᠋ᠤᠬᠡᠷ ᠳᠠᠯ᠎ᠠ         ⑥ ᠭ᠊᠂ ᠠᠺᠢᠮ ᠤᠨ ︽ᠴᠢᠩᠬᠢᠰ ᠤᠨ ᠤᠶᠤᠨ ᠪᠢᠯᠢᠭ ᠤᠨ ᠰᠤᠷᠭᠠᠯ ᠤᠷᠤᠰᠢᠪᠠᠢ︾ ᠠᠯᠤᠰ ᠤᠨ ᠪᠠᠷ᠎ᠠ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ 2005 ᠤᠨ ᠤ ᠬᠡᠪᠯᠡᠯ 137 ᠳ᠋ᠤᠭᠠᠷ ᠳᠠᠯ᠎ᠠ         ⑦ ᠭ᠊᠂ ᠠᠺᠢᠮ ᠤᠨ ︽ᠴᠢᠩᠬᠢᠰ ᠤᠨ ᠤᠶᠤᠨ ᠪᠢᠯᠢᠭ ᠤᠨ ᠰᠤᠷᠭᠠᠯ ᠤᠷᠤᠰᠢᠪᠠᠢ︾ ᠠᠯᠤᠰ ᠤᠨ ᠪᠠᠷ᠎ᠠ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ 2005 ᠤᠨ ᠤ ᠬᠡᠪᠯᠡᠯ 136 ᠳ᠋ᠤᠭᠠᠷ ᠳᠠᠯ᠎ᠠ
  
ᠢᠷᠡᠯᠲᠡ᠄ www.kqmw.gov.cn
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备09001939号